На Малей Вечерни
На Господи воззвах, стихиры на 4, глас 1:
Подобен: Небесных чинов…
Слава неизреченному человеколюбию Твоему, Господи, / даровавшему нам великаго светильника и дивнаго наставника Силуана, / иже во тьме века сего отчаяннаго и превратнаго / явил еси нетленный свет боговедения Твоего / в утешение многим, / егоже молитвами и в нас открый / тайну путей во спасение вечное / и благослови люди Твоя миром.
Процвел еси яко сладковонный цвет сада Пречистыя Владычицы / Силуане богомудре, / яже избра тя молитися о вселенней / и омраченныя просветити / светом Евангелия. / Темже и нас облагоухай словесы твоими богоглаголивыми, / да любовию славим пречистую память твою.
Всемирное радование / возсия днесь святая память твоя, / преподобне отче, / озаряющи вселенныя концы. / Ты бо в молениих с воплем крепким и многими слезами / объял еси концы вселенныя, да вси спасены будут. / Сего ради и ныне языцы вси / приносят ти дань смиренныя любве и благодарения.
Лицезревый Кроткаго, Смиреннаго Царя славы / возжелал еси желанием уподобитися Ему/ и кроток быв и смирен сердцем / плоды сладкия принесл еси Христова смирения, / яко древо благосеннолиственное. / И нас научи смиряти души наша / пред Отцем Небесным и братиями нашими, / да обрящем вечную победу с тобою.
Слава, глас 8
О чуда нова! Мирския мудрости непричастен сый / узрел еси Христа, и, озаренный богословити небесная, / учиши со властию, Силуане богонаученне, / яко в Дусе Святем познавается Бог на небеси и на земли. / И тебе дадеся сия благодать: / да познают Бога людие и обратятся к Нему, / писал еси от Лица Божия милосердия. / Свидетель ти еси Сам Господь, / и мы яко таинника благодати и богослова дивна ублажаем.
И ныне, Богородичен, глас тойже:
Пречистая Богородице, упование наше / на небеси живущи и непрестанно зрящи славу Божию / не забуди и нас, убогих твоих, Благая, / но милосердием Твоим не престай / покрывати всю землю и вся народы.
На стиховне. Стихиры глас 2:
Подобен: Доме Евфрафов…
Селение пространное благодати Утешителя, / Иже научи тя состраждати всякой твари, / храмы и нас сотвори Духа Святаго, / да будем милосерди, отче благоутробне.
Стих: Честна пред Господем смерть преподобных его
Книгу твою стяжахом, / яко сокровище богословия неистощимое / и правило жизни нелестное, / Силуане, учителю верный, / тобою бо явися нам Бог якоже есть, / и обретохом путь покаянием, / темже смиренно славим тя.
Стих: Что воздам Господеви о всех, яже воздаде ми?
Образе Божий непорочне, / зерцало света несозданнаго, / теплото божественная, Силуане отче наш, / озаряеши умы и сердца умиляеши, / подаваяй очесем источники слез, / не премолчи вопия ко Христу/ о любовию совершающих святую память твою.
Слава, глас 6:
Священниче Бога Вышняго / по чину Мелхиседекову / Силуане богомудрейший, / на вселенстем жертвеннице принеслся еси Богови / в воню благоухания / и кровь сердца твоего дал еси, да живи будут братия твоя, / не престай воздевая руки твоя о мире всего мира.
И ныне, глас тойже:
Се, Мати человеколюбивая / приводим Ти Силуана преподобнаго в моление, / простри руку и нам, обнищавшим во гресех, / и спаси нас, тихое пристанище душ наших.
Тропарь, глас 4:
Сладостию Духа напаяем / и теплотою Христовы любве согреваем / с плачем искал еси Христа в житии твоем, / и Того Смиренна и Кротка слезами изобразил еси в нас, / умильно зовущих ти: / печалию твоею исполнихомся веселия нетленнаго, / Силуане, утешителю наш и молитвенниче вселенныя.
Слава и ныне, Богородичен, глас тойже:
Еже от века утаеное, / и Ангелом несведомое таинство, / тобою, Богородице, сущим на земли явися Бог, / в неслитном соединении воплощаем, / и крест волею нас ради восприим, / имже воскресив первозданнаго, / спасе от смерти души наша.
Ин тропарь, глас 3:
Дух Святый научи тя любити Бога и человека, / лицезревый Христа исполнился еси неописаннаго Того смирения / и был еси источник слез о вселенней, / проповедая всем: «Любите враги ваша», / не забуди убо ихже возлюбил еси, / Силуане преподобне отче наш, / посещая чад твоих / и моляся присно Господеви / даровати нам святое Его смирение.
Слава и ныне, Богородичен, глас тойже:
Тя ходатайствовавшую спасение рода нашего / воспеваем, Богородице Лево, / плотию бо от Тебе восприятою. / Сын Твой и Бог наш / крестом восприим страсть, / избави нас от тли яко человеколюбец.
(Ектения, и отпуст)
На Велицей Вечерни
Стихологисуем Блажен муж, 1-й Антифон
На Господи воззвах: Стихиры на 8, глас 8:
Подобен: О преславнаго чудесе…
Приидите людие / от запада, и севера, и моря, и востока / вси труждающиися и обремененнии во гресех, / умиленными песньми восхвалим / всемирнаго стяжателя божественнаго Духа, Силуана, / той бо болезненне присно излияше струи слезныя, / да исполнится вселенная светом истиннаго боговедения. / Приидите убо вся земля / из покойных вод словес его почерпем вдохновение нетленное / и воззовем, обновленнии в естестве нашем по дару сему: / «Утешителю благий, плача ради Силуанова / утеши скорбящия души людей Твоих / и богатством милости Твоея спаси вся языки».
Время прейде плача Адамова, / преподобне Силуане, / яко ныне возсиял еси яко солнце в Царствии Отчем / и приступльши дерзновенно к Престолу благодати / обрел еси мзду трудов твоих. / Подаждь и нам участие и наследие с тобою / в неизследимей тайне любве Божия, / отче любоблагоутробне, / и испроси мирови мир и велию милость.
Приидите вернии, / иже благодатию Святаго Духа собраннии днесь / о памяти великаго во святых Силуана, / хвалу и славу принесем Господеви: / «Благодарим Тя, душелюбиве Господи, / яко не оставил еси нас сирых, / но якоже древле во Пророцех и Апостолех, и ныне в последняя / Дух Святый воздвиже нам благовестника милосердия Твоего.» / Не чернилом бо, но слезами и кровьми из сердца/ написана бысть книга его, / яко сад чистоты, имый посреди Живаго, Всепрощающаго, и Радостнаго Христа, / источающи же всем жаждущим реки воды живоносныя. / Се нам, отчаянным, возсия паки Свет Любве Отчия / и мы исцелехом.
Ины Стихиры, глас 6:
Подобен: Всю отложившие…
Имже образом желает елень на источники водныя / сице возжаждал еси ко Христу Богу / присно взывая во умилении: / «Скучает душа моя о Господе / и слезно ищу Его»/ Ныне же предстоя Ему неизреченно, / Силуане боговидче предивный, / ниспосли нам огонь божественныя любве, / да узрим в Духе Святем милостивое Лице Божие, / и видя, каков Он есть, уподобимся Ему, / Кроткому и Смиренному сердцем, / и обрящем покой в Нем во веки.
Больши сея любве никтоже имать, / да кто душу свою положит за други своя, / сице научи тя Дух Святый неизглаголанно любити людей, / и яко причастник Гефсиманскаго плача Иисуса Христа / кровь твою излиял еси в молениих за весь род Адамов, вопия: / «Господи, дай ми слезы, да плачет душа моя от любве к брату день и нощь» / Помяни нас убо, великий Силуане / на многострадальней земли поминающих тя / и росою слез твоих ороси мир и души наша.
Велико и чудно явися житие твое, Силуане богомудре, / истощивыйся бо до ада преисподняго / и познавый горесть богооставления, / возвысился еси до созерцания невечерняго Света Царствия, / отонюдуже, яко орел премудрый, / с высоты богословствуеши / всем народом земли / тайны будущаго века.
Сокровище любве нетленныя / припадаем ти, молящеся, Силуане блаженне, / утверди нас нести труды покаяния / и, ради любве Господа, терпети вся болезни и скорби до конца / якоже ты, отче предивне, / подвигом добрым победив / убелил еси ризу твою в крови Агнчи / и царствуеши ныне со Христом во веки.
Благодарим Тя, Господи и Создателю наш, / яко избранником Твоим Силуаном / открыл еси нам путь, имже идоша вси святии Твои. / Ты любиши плачущия, / и путем плача идоша к Тебе святии вси. / Ты любиши смиренныя, и благодатию Своею учиши их любви и смирению. / Радуешися убо, Господи, о смиренней душе. / Даждь и нам, Милостиве, молитвами преподобнаго отца / идти к Тебе путем смиреннаго плача, / егоже открыл еси нам.
Слава, глава 8:
Приспе всечестное твое успение днесь, / преподобне отче Силуане, / яко тихий свет / от пропасти греховныя возводящее ум наш / к видению непостижимаго образа Христа Бога, / Егоже болезнуя запечатлел еси в сердцах верных / богодухновенными словесы твоими. / О, дивне Старче, / блаженни есмы, имуще тя отца и учителя. / Усты бо твоими, исполнь огня благодати / боговедение своим языком приимше вси / светом Духа просветихомся / и воистину богословити Творца озарихомся, вопиюще: / «Слава Тебе, Отче Небесный, / давшему нам Единороднаго Сына нашего ради спасения. / Слава Тебе, Сыне Единородне, / яко благоволил еси родитися от Пречистыя Девы / и страдал, и ниспослал еси нам Духа Свята на землю. / Слава Тебе, Душе Святый, / небесных тайн откровение и любве Христовы дарование. / Троице Святая, / молитвами таинника Твоего Силуана / помилуй нас и мир Твой.»
И ныне, Богородичен, догматик, глас тойже:
Царь Небесный за человеколюбие на земле явися, / и с человеки поживе: / от Девы бо Чистыя плоть приемый, / и из Нея прошедый с восприятием: / Един есть Сын, сугуб естеством, но не ипостасию. / Темже совершенна Того Бога и совершенна человека воистинну проповедающе, / исповедуем Христа Бога нашего: / Егоже моли, Мати Безневестная / помиловатися душам нашим.
Вход, прокимен дне, чтения три:
Соборнаго послания Иоаннова чтение (главы 3 и 4)
Возлюблении, аще сердце наше не зазрит нам, дерзновение имамы к Богу. И Егоже аще просим, приемлем от Него: яко заповеди Его соблюдаем и угодная пред Ним творим. И сия есть заповедь Его, да веруем во имя Сына Его Иисуса Христа, и любим друг друга, якоже дал есть заповедь нам. И соблюдаяй заповеди Его, в Нем пребывает и Той в Нем, и о сем разумеем, яко пребывает в нас от Духа, Егоже дал есть нам. Возлюбленнии, не всякому духу веруйте, но искушайте духи, аще от Бога суть: яко мнози лжепророцы изыдоша в мир. О сем познавайте Духа Божия и духа лестча: всяк дух, иже исповедует Иисуса Христа во плоти пришедша от Бога есть. И всяк дух, иже не исповедует Иисуса Христа во плоти пришедша, от Бога несть: и сей есть антихристов, егоже слышасте, яко грядет и ныне в мире есть уже. Вы от Бога есте, чадца, и победисте тех: яко Болий есть, иже в вас, нежели, иже в мире. Они от мира суть: сего ради от мира глаголют, и мир тех послушает. Мы от Бога есмы: иже знает Бога, послушает нас: и иже несть от Бога, не послушает нас.
Соборнаго послания Иоаннова чтение
Возлюбленнии, аще сице возлюбил есть нас Бог, и мы должни есмы друг друга любити. Бога никтоже нигдеже виде. Аще друг друга любим, Бог в нас пребывает, и любы Его совершенна есть в нас. О сем разумеем, яко в Нем пребываем, и Той в нас, яко от Духа Своего дал есть нам. И мы видехом и свидетельствуем, яко Отец посла Сына Спасителя миру. Иже аще исповесть, яко Иисус есть Сын Божий, Бог в нем пребывает, и той в Бозе. И мы познахом и веровахом любовь, юже имать Бог к нам. Бог любы есть и пребываяй в любви, в Бозе пребывает, и Бог в нем пребывает.
Соборнаго послания Иоаннова чтение
Возлюбленнии, аще кто речет, яко люблю Бога, а брата своего ненавидит, ложь есть: ибо не любяй брата своего, егоже виде, Бога, Егоже не виде, како может любити? И сию заповедь имамы от Него, да любяй Бога любит и брата своего. Всяк веруяй, яко Иисус есть Христос, от Бога рожден есть, и всяк любяй Рождшаго, любит и Рожденнаго от Него. О сем вемы, яко любим чада Божия, егда Бога любим, и заповеди Его соблюдаем, сия бо есть любы Божия, да заповеди Его соблюдаем, и заповеди Его тяжки не суть. Яко всяк рожденный от Бога побеждает мир: и сия есть победа победившая мир, вера наша. Кто есть побеждаяй мир, токмо веруяй, яко Иисус есть Сын Божий.
На Литии стихиры Преподобнаго
Глас 1 (яже поется изрядно в Обители Преподобнаго)
Преподобне отче Силуане, / се чада твоя, яже собрал еси от конец земли, / днесь сошедшеся во всечестнем храме твоем / о памяти твоей красующеся, умильно глаголем: / Радуйся древо райское, / воздавшее плод мира, и всяку душу скорбящую осеняющее. / Не забуди овец двора твоего, отче милостиве,/ но духом твоим упаси на животныя источники вод! / И пречистым покровом твоим сохрани место сие / в честь и память твою насажденное, / и пребываяй ныне в Свете Лица Божия, / не престай молися Пресвятей Троице / помиловати души наша / и вечным покоем упокоити нас с тобою, / аше и недостойни есмы нарещся сынове твои.
Ин вариант
[Преподобне отче Силуане, / се чада твоя, яже собрал еси от конец земли, / днесь сошедшеся во всечестнем храме твоем / о памяти твоей красующеся, умильно глаголем: / Радуйся, древо райское, / воздавшее плод мира, и всяку душу скорбящую осеняющее. / Не забуди овец двора твоего, отче милостиве, / но духом твоим упаси на животныя источники вод: / И пречистым покровом твоим сохрани место сие, / еже насади в честь и память твою / ученик твой верный и сотаинник, / с нимже пребывай ныне во свете Лица Божия / не престайте молящеся Пресвятей Троице / помиловати души наши / и вечным покоем упокоити нас с вами, / аще и недостойни есмы нарещися сынове ваши.]
Глас 2
«Егда явлюся Христу Богу / молитися имам за весь род человеческий, / да вси людие обратятся ко Господу / и упокоятся в Нем, / яко любы Божия всем хощет спастися.» / Помяни убо обетование твое ныне, / Силуане, божественне молитвенниче наш / и умилостиви Христа о гресех наших и о гресех всего мира.
Глас 3
Се Силуан преподобный / на праздник свой собирает церковным гласом зовущи: / «Возлюбленнии, смирите себе, / да украсит вас Господь кротостию Своею и смирением, / смиритеся убо и покаянием стяжите милующее сердце / и узрите славу Господню. / Чадца моя, любите друг друга, и возлюбит вас Господь, / любите друг друга, и узрите тогда милость Божию, / и вселится в вас Дух Святый, / и познаете и обрящете Небесное Царство со мною».
Глас 4
На образ твой зряще, преподобне отче, / в немже обновися зрак Адама превозданнаго, / радостию радуемся, / ты бо ум и душу омый слезами великими / восприял еси свыше царское священие, / еже ходатайствовати воздыханьми неизглаголанными / о всем мире, взывающи: / «Господи, посли милость Твою на детей земли, ихже любиши / и всем им даждь разумети любовь Твою / и познати славу Твою Духом Святым». / Темже вшедши ныне во внутреннейшее завесы / исполни света сердца поющих ти: / Радуйся, Силуане, сладчайший покрове вселенныя.
Слава: Глас 8
О преславнаго чудесе! / Се лик Преподобных Отец / покаянием присно на земли истаеваемых / неизреченно предстоит Царю Небесному / и с Пречистою, Присноблаженною Богородицею / рыдание о мире приносит. / Тамо Сергий, смиренный муж желаний / и Серафим убогий, / к нимже причтеся ныне и Силуан, новоявленный источник воды живыя. / Ихже любовию ублажим, глаголюще: / О белоризный Соборе, измовенный слезами, / миродохновеннии цветы райстии, / звезды мысленныя тверди, возсиявшия вселенней кротость и смирение Христово, / Отцы любоблагоутробнии, / непрестанно молитеся во еже водворитися нам / во светлых Обителех Отца Небеснаго.
И ныне. Крестобогородичен, глас тойже
У Креста стоящи, море скорбей носила еси, Пречистая / по реченному Силуаном, угодником Твоим: / аще множае любы, паче множае страдание души, / но печаль Твоя в радость бысть по воскресении Сына Твоего. / Да возрадуется убо и сердце наше тогда / радостию неизглаголанною / в лицезрении славы Божия / и славы Твоея, Дево Пренепорочная.
На Стиховне, стихиры, глас 5:
Подобен: Радуйся живоносный кресте…
Радуйся, христообразный уме, / Фаворским светом озаренный мыслити божественная, / возгремел еси миру неописанную тайну Христова смирения. / Лицезревый бо Смиреннаго и Кроткаго / мнился еси нижайше всех/ и радуяся зрел еси братия твоя / в Духе Святем сияющия и подобныя Христу, / ибо смирение Христово в меньших обитает, / радуют бо ся яко меньшии суть. / Тако научихомся тобою мудрствовати. / О тебе убо хвалимся, верный и истинный наставниче / и яко смирившагося до конца и мир победивша / небо и земля вся ныне тя ублажаем.
Стих: Честна пред Господем смерть преподобных Его
Радуйся, Пророков сопричастниче / и Апостолов единомысленниче, / яко Дух Господень воистину бысть на тебе. / Егоже ради помаза тя Бог благовестити нищим, / посла тя исцелити сокрушенныя сердцем пречистым елеем глагол твоих. / Радуйся, яснейший свидетелю человеколюбия Божия, / тобою бо глас Спасов паки изыде во вселенную / проповедая плененным отпущение, зовущи: / «Приидите ко Мне, овцы Моя, и Аз упокою вы, / упокою и на небе и на земли. /Аз бо желанно жду вас, яко возлюбленных детей, / и мир Мой дам вам, и вы будете в радости, / и радости вашей не будет конца».
Стих: Что воздам Господеви о всех, яже воздаде ми
Радуйся, Пречистыя Богородицы таинниче, / Силуане целомудре, / ты бо духом созерцал еси Приснодеву у Креста стоящую / и неизреченно за мир рыдающую, / и сие страшное видение предал еси мирове яве. / Радуйся, тебе бо Дух Святый открыл сокровенный рай любве Владычицы/ и неизследимую глубину скорби Ея познал еси. / Радуйся, яко Сергий и Серафим дивнии / благоуханный крине сего словеснаго рая. / Радуйся, ныне зриши Богоневесту во славе, / юже прилежно моли / выну слезным покровом покрывати землю, / утешати люди отчаянныя / и миловати души наша.
Слава, глас 6:
Все твое желание к Богу прострый / путь постнический совершил еси, преподобие отче, / и класы благодатныя пожавый любовию / ныне богатишися воистинну сторицею, / всех людей земли питаяй сладким хлебом учения твоего. / Темже и притекающим ныне к тихим струям глагол твоих / подаждь орошение сердца и образы блаженнаго умиления / Силуане, Божественнаго Духа стяжателю / и учителю всемирный.
И ныне, Богородичен, глас тойже:
Творец и Избавитель мой, Пречистая, / Христос Господь из Твоих ложесн прошед, / в мя оболкийся, первыя клятвы Адама свободи. / Темже Ти, Всечистая, яко Божии Матери же и Деве / воистину вопием немолчно: Радуйся ангельски, / радуйся, Владычице / предстательство и покрове и спасение душ наших.
Тропарь, глас 4:
Сладостию Духа напаяем / и теплотою Христовы любве согреваем / с плачем искал еси Христа в житии твоем, / и Того Смиренна и Кротка слезами изобразил еси в нас, / умильно зовущих ти: / «Печалию твоею исполнихомся веселия нетленнаго, / Силуане, утешителю наш и молитвенниче вселенныя».
Слава и ныне, Богородичен, глас тойже:
Еже от века утаеное, / и Ангелом несведомое таинство, / Тобою, Богородице, сущим на земли явися Бог, / в неслитном соединении воплощаемь, / и крест волею нас ради восприим, / имже воскресив первозданнаго, / спасе от смерти души наша.
Ин тропарь, глас 3:
Дух Святый научи тя любити Бога и человека, / лицезревый Христа, исполнился еси неописаннаго Того смирения / и был еси источник слез о вселенней, / проповедая всем: «Любите враги ваша» / Не забуди убо ихже возлюбил еси, / Силуане, преподобне отче наш, / посещая чад твоих / и моляся присно Господеви / даровати нам святое Его смирение.
Слава и ныне, Богородичен, глас тойже:
Тя, ходатайствовавшую спасение рода нашего / воспеваем, Богородице Дево, / плотию бо от Тебе восприятою / Сын Твой и Бог наш / крестом восприим страсть, / избави нас от тли, яко человеколюбец.
На Утрени
НА БОГ ГОСПОДЬ, ТРОПАРЬ ПРЕПОДОБНОМУ ДВАЖДЫ
СЛАВА И НЫНЕ: Тя ходатайствовавшую:
По 1-й Кафисме, седален, глас 3:
Воспомяну душа твоя любовь Господню, / и согреся сердце твое, преподобие отче Силуане, / и восплакася еси глубоким плачем, / зане толико оскорбил еси любимаго Творца твоего, / но Он грехи твоя не помяну, блаженне: / и предадеся тогда душа твоя глубочайшему и печальному плачу, / да помилует Господь всяку душу и возьмет в Свое Небесное Царство, / и плачет душа твоя о всем мире.
Слава и ныне, Богородичен, глас тойже:
Пречистая Богородице Дево / радосте и упование рода человеческаго, / в молитве за мир источающая слезы милосердия, / сподоби и нас сего непостижимаго плача, / имже в житии плакася присно избранник твой / Силуан всепреподобный.
По 2-й Кафисме, седален, глас 6:
Непостижимым явлением во свете / душу раба Твоего Силуана привлекл еси к Себе, Господи, / и она к Тебе востече, яко претихая река. / Ум святаго Твоего прилепися к Тебе, Господи / и влечеся к Тебе, Свету и радости нашей. / Сердце преподобнаго утвердися в любви Твоей, Господи / и не возможе забыти Тя, / яко сладка есть благодать Духа Святаго, / еяже и нас сподоби молитвами его, / да разумеем славу Твою.
Слава и ныне, Богороличен, глас тойже:
Вышшая всех во смирении явилася еси, Богомати, / темже Тя вси роди на земли ублажают, / и Тебе служат вся Силы Небесныя, / и молю Тя, Милостивая, / подаждь ми Духа смиреннаго, / яко да обрящет душа моя покой в Бозе.
ПОЛИЕЛЕЙ И ВЕЛИЧАНИЕ:
Ублажаем тя, преподобие отче наш Силуане, и чтем святую память твою, наставниче монахов и собеседниче ангелов.
Псалом избранный: Терпя потерпех Господа, и внят ми и услыша молитву мою
По Полиелеи седален, глас 8:
Яко труба доброгласная, воззвал еси во всю землю, / аще кто не любит враги, / той не позна Бога, якоже достоит. / Темже видяще тя живый храм таковыя любве / молим тя, преподобие Силуане, / просвети омраченная сердца наша молитвами твоими / и сподоби нас истиннаго вселения Духа Божия, / Иже научит неизреченно любити враги наша.
Слава, и ныне, Богородичен, глас тойже:
Владычице, якоже воззвала еси от пропасти погибели / раба твоего Силуана, омывши его слезами, / и мене, погибшаго, милосердне взыщи / и сотвори овча послушное гласу Сына Твоего и Бога нашего. / Ты бо еси взыскание погибших / и отчаянных грешников единое упование, / яко милость Твоя даже до ада нисходит, Благодатная.
Степенна, 1-й Антифон 4-го гласа
Прокимен, глас 4:
Честна пред Господем смерть преподобных Его
стих: Что воздам Господеви о всех, яже воздаде ми?
Евангелие от Матфея — зачало 43
Рече Господь Своим учеником: Вся Мне предана суть Отцем Моим, и никтоже знает Сына токмо Отец, ни Отца кто знает токмо Сын, и емуже аще волит Сын открыти. Приидите ко Мне вси труждающиися и обремененнии, и Аз упокою вы. Возмите иго Мое, и научитеся от Мене, яко кроток есмь и смирен сердцем, и обрящете покой душам вашим. Иго бо Мое благо и бремя Мое легко есть.
По 50-м Псалме, стихира, глас 2:
Сиянием Духа озаряем / и божественною любовию изменяем / ум Христов стяжал еси, Силуане тайновидче, / и яко вторый Богослов, зрел еси небесная яко настоящая, / и одушевленное быв Евангелие, / закон зело новейший на скрижалех сердец наших начертал еси, взывая /
Елико множайшая любы, толико множайшее страдание души/
Елико полнейшая любы, толико полнейшее познание/
Елико разжженнейшая любы, толико пламеннейшая молитва/
Елико совершеннейшая любы, толико святейшая жизнь/
О чуда нова! / яко полн сый любве, полн был еси и богословия, / темже тя, яко друга Христа / и Троицы сладость смиренно почитаем.
Молебный Канон преподобному и Богоносному Отцу нашему Силуану Афонскому
Благословившу священнику, начинаем:
Псалом 142: ГОСПОДИ, УСЛЫШИ МОЛИТВУ МОЮ…
Слава и ныне: Аллилуиа
Бог Господь и явися нам: со стихи: Таже:
Тропарь Преподобному: глас 4:
Сладостью Духа напаяем / и теплотою Христовы любве согреваем, / с плачем искал еси Христа в житии твоем, / и Того Смиренна и Кротка слезами изобразил еси в нас, / умильно зовущих ти: / «Печалию твоею исполнихомся веселия нетленнаго, / Силуане, утешителю наш и молитвенниче вселенныя".
Слава, ин тропарь, глас 3:
Дух Святый научи тя любити Бога и человека, / лицезревый Христа, исполнился еси неописаннаго смирения / и был еси источник слез о вселенней, / проповедая всем: «Любите враги ваша» / Не забуди убо ихже возлюбил еси, / Силуане, преподобне отче наш, / посещая чад твоих / и моляся присно Господеви / даровати нам святое Его смирение.
И ныне, Богородичен, глас 4:
Всех скорбящих Радосте, / светлый Покров вселенныя Ты еси, Владычице, / в крове крилу Твоею покрый и Обитель сию, / в славу милостиваго Сына Твоего возложенную, / к Тебе бо день и нощь взываем / в скорбех и белезнех, смиреннии раби Твои, / буди пристанище спасения нам / и вся настави к тихому свету Христовых заповедей / со Предтечею и Силуаном преподобным / в мире и любви управляющи живот наш. / Ты бо еси иноком отрада / и сладчайшая утеха душ наших, / Дево пренепорочная.
Таже Псалом 50: Помилуй мя, Боже:
И Канон, егоже краегранесие: «Скорбящих нас утеши Силуаном, милостиве»
ПЕСНЬ 1-я. Глас 8
Ирмос: Воду прошел яко сушу, и египетскаго зла избежав, израильтянин вопияше: Избавителю и Богу нашему поим.
Преподобие отче Силуане, моли Бога о нас.
Скорбьми и болезньми обременении к тебе прибегаем, Силуане отче наш, утешения ищуще: о носителю дивный Духа Святаго, одожди сердца наша росою умиления.
Преподобие отче Силуане, моли Бога о нас.
Книгу твою, одушевленную дыханием Духа, яко залог нетленныя отеческия любве оставил еси нам, юже чтуще мним слышати твой тихий глас, взывающий нас от бездны греха к исправлению жития.
Слава: Охладе любы многих за умножение беззакония, и мраз нощи безлунныя объят нас, но вжег светильник молитвы твоея отче, разреши мглу страстей и согрей сердца наша сладчайшим светом милости Божия.
И ныне: Радость всех скорбящих, алчущим питательница, бездомных светлая обитель, обуреваемым тишина Ты еси, Владычице, со преподобным Силуаном не престай молитеся, да познают вси людие Сына Твоего Духом Святым.
ПЕСНЬ 3
Ирмос: Небеснаго круга верхотворче Господи, и церкве зиждителю, Ты мене утверди в любви Твоей, желаний краю, верных утверждение, едине Человеколюбче.
Буди нам отец и покровитель, Силуане благосердне, — отри слезы беззащитных сирот, прохлади души, изнемогающая тяготами житейскими, и всем даждь разумети, что есть отрада Господня.
Яко глубочайший сосуд, исполнь даров Пресвятаго Духа, изливай нам тишину божественную, яко буря злых обдержит ны, и вопием ти от сердца: умири жизнь нашу миром Христовым, преподобне.
Слава: Щадити всех и вся учил еси, верный органе Святаго Духа, и ныне невидимою рукою прикоснися очесем нашим, да узрим славу Божию в братии нашей, и потечет, яко поток огненный, молитва, милующая всякую тварь.
И ныне: Именем Твоим, Владычице, горы искапают сладость, холми яко агнцы взыграются, и земнороднии вси радости неизглаголанныя исполняемся, зряше Тя, ширшую небес и чистшую светлостей солнечных, осеняющую мир милосердием Твоим.
Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству.
Моли Бога о нас, преподобне отче Силуане, яко мы усердно к тебе прибегаем, скорому помощнику и молитвеннику о душах наших.
Ектения сугубая: Помилуй нас, Боже:
Тропарь, глас 2:
Плачущим сокровенное радование, / боримым защитниче и сирым помощниче, / нищих и убогих покровителю, / заступник за простыя и смиренныя люди / и всему миру печальник ты еси, / потщися избавити ны от бед и напастей, / Силуане отче наш, / яко обнищахом зело во гресех.
ПЕСНЬ 4
Ирмос: Услышах, Господи, смотрения Твоего таинство, разумех дела Твоя, и прославих Твое Божество.
Хлебом жизни укрепи руце ослабленныя и колена разслабленная, Силуане, яко уны дух наш от страха и чаяния грядущих на вселенную; да утешатся малодушнии зрением Господа всепрощающа и не убоятся ктому, имуще Христа крепкаго поборника.
Ныне зряй непостижимо красоту Лица Господня и наслаждаяйся райския доброты, не гнушайся безобразия нашего, отче, но дай помысл умиления, да покаянием обрящем паки Образ Христова благолепия.
Слава: Аще и время твоих скорбей прейде, Силуане дивне, обаче утробою Христовою не престаеши сострадати нам, бедствующим на земли, и во свете невечернем приносиши о нас слезы неизреченныя любве, ихже ради вси сладости утешения исполняемся.
И ныне: Сыны Твоя нарече нас распятый Господь, Чистая, темже от греховныя тьмы избавльшихся яви нас воистину чада Божия, да со дерзновением воззовем: «Отче наш небесный, слава Тебе, балаговолившему породнити нас Страстьми Христовыми».
ПЕСНЬ 5
Ирмос: Просвети нас повелении Твоими, Господи, и мышцею Твоею высокою, Твой мир подаждь нам, Человеколюбче.
Уязвленныя страстьми многими не презри нас, отче, яко близ есмы отчаяния, но милосердне обвяжи раны наша, и слезами пречистыми покажи ны паки паче снега чистейшия.
Тек орел на высоту смирения, вещим взором приникаеши в глубины богословия, и нам, слепым, даруй прозрение Духом Святым, отче, да исполнимся божественных догматов и правослано прославим Троицу Единосущную во веки.
Слава: Егда удари Моисей жезлом камень, потекоша воды в пустыни, и ныне ты, отче, острием словес твоих уязви ожесточенная сердца наша, да напоимся струями живоносными, и возсияет нам из купели слезныя чудный Свет Воли Божией.
И ныне: Шипок тайный рая Богоматерняго, на Горе Святей прозябший, ныне благоухаеши вселенную всю ученьми твоими, мудре, и нам погибающим от яда тлетворнаго буди воня Христова в живот вечный.
ПЕСНЬ 6
Ирмос: Молитву пролию ко Господу, и Тому возвещу печали моя, яко зол душа моя исполнися, и живот мой аду приближися: и молюся яко Иона: от тли, Боже, возведи мя.
Источник жизни помози найти заблуждшим в пустыни мира, и нас притекающих к тихим струям словес твоих, Силуане богомудре, напой реками воды живыя, истекшими от чрева твоего.
Слез наших не премолчи, Силуане блаженне, якоже сам в житии твоем в плаче истаиваем, познал еси томление души отпадшия от Бога, темже явися ныне помощник державный всем сокрушенным скорбьми житейскими.
Слава: Имуще тя питателя жизни нашея, Силуане милостиве, вопием: «Дай нам пищу благодати, яко глад Божий постиже нас, отче, дай нам, жаждущим, живую воду богоразумия Духом Святым, и в теплую ризу облецы ны любве божественныя».
И ныне: Людие да веселятся, осеняемии тайным пришествием Богоматере, покрывающия вся скорби земли, к Нейже души наша влекутся непрестанно любовию, ублажюще Ю гласы твоими, Силуане, яко радость и упование наше.
Ектения сугубая, священник поминает О ЗДРАВИИ
Синаксарий
В тойже день память творим преподобнаго и богоноснаго отца нашего Силуана Афонскаго во священней Русской обители Святаго Великомученика Пантелеймона, яже на Святей Горе подвизавшася, бололюбиве же скончавшагося о Господе 11/24-го Септемврия спасительнаго лета 1938.
Стихи:
Силуан сей, небеснаго Иерусалима житель, родителей бысть благочестивых от страны Российския прозябших, от веси подвластныя Тамбову граду, Шовская нарицаемыя. Роди же ся лета тысяща осмь сот шестьдесят шестаго от Слова Божия по плоти рождения, от юности призван к покаянию от самыя Всепетыя Богородицы и Приснодевы Марии.
Вшедшу убо двадесяти седмому лету от возраста его, отречеся от житейских и в напутие приим молитвы иже во Святых Иоанна Кронштадскаго, отъиде на знаменитейшую Гору Афонскую, яже во Елладе, иноческое иго на ся возложив в монастыре Святаго Великомученика Пантелеимона. Отдав убо себе вседушно Богови, по мале времени, не токмо непрестанную прият молитву от Пресвятыя Богородицы туне, но и Богоявления неизреченнаго сподобися, явльшуся ему во славе Господу нашему Иисусу Христу в честнем храме пророка Илии, иже на жерновех глаголемыя Обители.
Обаче, оскудевшей первей благодати, плачем велиим всепреподобный обдержим, и множайшим, попущением Божиим, предан быв умных врагов искушением, лет пятьнадесять стопам последующи Христовым, «моления же и молитвы к Могущему спасти его от смерти, с воплем крепким и со слезами принес» (Евр. 5, 7), научен Богом быв, свыше глас внушает Законоположника: «Держи ум твой во аде, и не отчаивайся», егоже яко правило соблюл нелестное, тече путь Антониев, Макариев, Сисоев, Пименов, и прочих славных наставников пустынных, ихже и меры постиже и дарования, апостольстий и пророческий учитель явлейся, жив и по смерти.
Остави бо писания, исполнь благодати и Духа Святаго, яже объяви того ученик и наперсник старец Софроний, строитель и архимандрит иже на Бретанийском острове Обители благочестивых православных христиан. И кая зде потреба множайших о всепреподобнем Силуане слов, егда убо предварив авва сей житие онаго и учение известно и широко изложи же и списа в начале книги божественных сих и медоточивых писаний.
Яже книга учит, якоже мощно чтущим наблюсти и разумети, колик сей подвижник Господень, и како известным заповедей соблюдением умерщвлен до конца житию, Христа в себе жива быти по Павлу стяжа (Гал. 2, 20), книга другим богодухновенная быв, написнная тростию Духа. Слова сия уверяют иже тем «от всего языка, иже под небесем» (Деян. 2, 5) «в разум истины» (1Тим. 2, 4) пришедше мнози и ныне доселе приходяше. Бяше бо сей дивный «кроток и смирен сердцем» (Мат. 11, 29), пламенный к Богу молитвенник о спасении всех людей и проповедник безприкладный яже к врагом любве, еяже ничесоже твержде Божественнаго Духа истиннаго пришествия знамение. Прейде же от смерти в живот сей блаженный преподобный Силуан, исполнен дний, иже по Духу, дне двадесять четвертаго месяца Септемврия, лета тысяща девять сот тридесять и осьмаго, царствующу Господу нашему Иисусу Христу, Емуже слава и держава во веки веков. Аминь.
Егоже и всех Святых Твоих молитвами, Христе Боже, помилуй нас и спаси нас и мир твой. Аминь.
ПЕСНЬ 7
Ирмос: От Иудеи дошедши отроцы, в Вавилоне иногда, верою троическою пламень пещный попраша, поюще: Отцев Боже, благословен еси.
Угасе в нас огнь благодати и небо затворися нам, но даждь нам помощь от скорби, Силуане отче наш, и просвети нас пети во смирении и любви даже до последняго издыхания: Благословен еси, Боже Отец наших.
Адовы ужасы, яко скимни, обыдоша нас, но моления твоя стяжахом яко покров божественный, имже покрываеши нагия дерзновения, отче милостиве, и сердца согреваеши печалию греховною унывающая.
Слава: Неописаннаго смирения Христа Бога вкусивый, во вся дни живота твоего смирялся еси жестко, отче, и нас научи стяжати кроткаго и смиреннаго Духа, да не погубим благодати ктому и не возрыдаем о ней адамовым рыданием.
И ныне: О всепетая Мати, рождшая всех святых святейшее Слово, вдохнови нам слово пламенное, да сынолепне воспоем милость Твою, еюже матерски болезнуеши о скорбящем мире, якоже возвести нам Силуан, таинник Твой.
ПЕСНЬ 8
Ирмос: Царя небеснаго, егоже поют вои ангельстии, хвалите и превозносите во вся веки.
Милующее вемы сердце твое, Силуане, яко на земли тайно научаем Духом Святым, выну скорбел еси о грешницех, в молитвах проливая слезы о них, темже утробу твою сострадательную ныне отверзи и нам, сирым твоим.
Молитвою слезною укрепи нас утреневати от нощи греховныя, Силуане отче наш, и во свете нетленныя любве, веселыми ногами пойдем с тобою за утренней Звездою, Христом, славяще Его во вся веки.
Идеже любы, тамо и печаль, яко любы присно состраждет, темже, отче милостиве, пой нам, скорбящим на земли, песнь, ейже научи тя Дух Святый, и расширится сердце наше тещи путь крестный даже до конца.
Слава: Лики ангельскими неизреченно воспеваемую, ныне зриши во славе Матерь и Деву, Юже умоли, любоблагоутробне, ниспослати нам богородичную благодать, еже матерним сердцем болезновати о всех, яко о присных детех.
И ныне: От змея греховнаго Симеона юнаго спасла еси, Мати, на стези покаяния наставивши, и души наша, иссохшия от горести уныния наслади посещением Твоим и исправи, яко жезл, непорочно сохранити пути жестоки, любве ради Сына Твоего.
ПЕСНЬ 9
Ирмос: Воистину Богородицу Тя исповедуем, спасеннии Тобою, Дево чистая, с безплотными лики Тя величающе.
Се вся земля скорбит и взывает ти гласом нашим, отче всемирне: Научи нас смирити себе и любити враги, да вселится в ны Дух Святый и обрящем Небесное Царство с тобою.
Труждаяйся паче человека, пророчески приял еси во чреве, страха ради Господа, и поболел и родил еси нам Духа спасения Божия, имже веселиши многия, отче, и росою слез твоих исцелиши вся поющия ти: Радуйся, Силуане, утешителю наш.
Изнеможе всякое слово, и токмо воздыхания сердечная оставишася нам, но глаголы твоя украдше, приносим ти последний сей глас: Силуане, отче наш, моли о нас, детех твоих ныне и в час судный, да будем с тобою на небесех, слышаще песни, яже поются Духом Святым.
Слава: Видел еси Свет истинный, приял еси Духа Небеснаго, таинниче благодати, да свободимся и мы тобою от всякия прелести, Силуане, и научимся поклонятися живоначальней Троице Духом и истиною.
И ныне: Елей светильника нашего оскуде, и мрак смертный найде на нас, но возсиявши, пречистая Заре, введи ны в чертог Христов, да причастницы будем тайныя Вечери Агнца со отцами нашими и с Тобою, девственная Радосте небесных и земных.
На Хвалитех, стихиры, глас 2
Благодарим Тя, Господи / о дивнем утешителе скорбящих / теплейшем предстателе нищих и малых мира сего / и надмирнем печальнице всего рода человескаго, / молим Тя, Многомилостиве: / Прииди и вселися в ны со Отцем и Духом Святым / и сотвори нас подобны Тебе, Кроткому и Смиренному, / якоже до конца бысть подобен Тебе / чадо Твое и отец наш, Силуан всепреподобный.
О милости Господни! / Се Христос научает тя путем жизни вечныя / и тайну бытия открывает мирови, глаголя: / «Держи ум твой во аде и не отчаивайся» / Сие бо есть оружие непобедимое на враги, / сие огнь попаляяй страсти и возсияваяй свет смирения Христова. / Дерзаим убо людие, / воспоим и мы песнь великаго подвижника Спасова: / «Скоро аз умру и окаянная душа моя снидет во ад, / и тамо един аз имам плакати о Господе». / И обрящем, братие, покой душам нашим.
Внемля Пресвятому Духу, / в сердце твоем тайно гласящему истину догматов Божия мудрости, / весь сообразен был еси Евангельскому слову, / Силуане, богослове возлюбленне, / и мирови явился еси книга жива, / в нейже Утешитель, уясняя в последняя благовестие Христово, / новописа степени блаженства, взывая тобою во всю вселенную: /
Блаженна душа, возлюбльшая смирение и слезы / и ненавидящая злыя помыслы. /
Блаженна душа, любящая брата своего, / ибо брат наш есть наша жизнь. /
Блаженна душа, любящая брата, / в нейже живет Дух Господень / и дает ей мир и радость, / и плачет она за весь мир.
Равноапостольный явился еси, Силуане, / в молитве сокровенней, / егда взывал еси в безмолвней ноши: / «Молю Тя, Господи милостиве / да познают Тя Духом Святым вси народи земли». / И ныне безболезненно предстоя Престолу Божию / виждь на всех сынов Адама, скорбящих в мире сем, / не презри сокрушение наше, болезни и воздыхания, / и даждь народом утешитися лицезрением кроткаго и милостиваго Лица Господня, / да согреются печальная сердца людей / и насладятся глубоким и сладким миром Святаго Духа.
СЛАВА, глас 6:
О Душе Святый, великий Царю, / милостивне приими Церковь Твою / молебный глас Силуанов днесь приносящую Ти. / Что воздадим Тебе, мы, грешная земля, / зане открыл еси нам непостижимую тайну / и дал еси нам познати Господа, Создателя нашего / и вкусити безмерныя любве Его к нам. / О Тебе радость, Утешителю благий, / глубокий и сладкий мир душ наших, / Ты бо сотворил еси нас сродники Отца Небеснаго. / Научи убо нас неизглаголанней любви к народу, / научи нас любити враги и слезно молитися о них, / научи нас, Всеблагий, смирению Христову, да будем свободни от всякия тьмы, / и жизнь вечная да будет в душах наших. / О Душе Святый, мил еси Ты, и сладок паче всего земнаго, / обитай в нас всегда, / да вси согласно славим Творца / Отца, и Сына, и Святаго Духа во веки.
И НЫНЕ, Богородичен, глас тойже:
Око сердца моего воспущаю к Тебе, Владычице, / не презри малаго моего воздыхания, / в час, егда судит Сын Твой миру, / буди ми покров и помощница.
Славословие великое. И Отпуст.
На Литургии
Блаженна от канона преподобнаго, песнь 3 и 6.
Прокимен, глас 7:
Честна пред Господем смерть преподобных Его
Стих: Что воздам Господеви о всех, яже воздаде ми?
Апостол, к Галатом, зачало 213
или сей: Соборнаго послания Иоаннова чтение: (зач.73, гл.4, 7-11)
Возлюбеннии, возлюбим друг друга, яко любы от Бога есть: и всяк любяй, от Бога рожден есть, и знает Бога. А не любяй, не позна Бога; яко Бог любы есть. О сем явися любы Божия в нас, яко Сына Своего Единороднаго посла Бог в мир, да живи будем Им. О сем есть любы, не яко мы возлюбихом Бога, но яко Той возлюби нас, и посла Сына Своего очищение о гресех наших. Возлюбленнии, аще сице возлюбил есть нас Бог, и мы должны есмы друг друга любити.
Аллилуиа, глас 6:
Блажен муж бояйся Господа, в заповедех Его восхощет зело
Стих: Сильно на земли будет семя Его.
Евангелие от Луки, зачало 24,
или от Луки, зачало 26
Рече Господь: якоже хощете да творят вам человецы, и вы творите им такожде. И аще любите любящия вы, кая вам благодать есть? ибо и грешницы любящия их любят. И аще благотворите благотворящим вам, кая вам благодать есть? ибо и грешницы тожде творят: и аще взаим даете, от нихже чаете восприяти, кая вам благодать есть? ибо и грешницы грешником взаим давают да восприимут равная. Обаче любите враги ваша, и благотворите, и взаим дайте ничесоже чающе, и будет мзда ваша многа, и будете сынове Вышняго, яко Той благ есть на неблагодарныя и злыя. Будите убо милосерди, якоже и Отец ваш милосерд есть.
Акафист
Кондак 1
Избранный молитвенниче и Духа селение благовонное, / Силуане преподобне, / присно источая слезы на земли, / горел еси желанием да вси людие спасутся / и узрят славу Божию. / Но яко в болезнех стяжав утробу Христову, / избави нас от печали греховныя, / да наполнятся Духа уста наша воспети тебе: / РАДУЙСЯ, ВЕЛИКИЙ СИЛУАНЕ, СЛАДЧАЙШИЙ БОГОСЛОВЕ.
Икос 1
Ангельский Царь, от юности призвавый тя благодатию Своею, предустави тя, Силуане богомудре, сообразна быти образу Сына Своего, да свидетельствуеши мирови о любви Божией, и воздвигнеши от пропасти отчаяния люди благодарно зовущия ти:
Радуйся, сияние любве Отчия
Радуйся, проповедниче Христова всепрощения
Радуйся, теплото, исполнь Духа Святаго
Радуйся, красото образа первозданнаго
Радуйся, имже источаются слезы
Радуйся, имже очищаются смыслы
Радуйся, отрасле распятыя земли русския
Радуйся, древо жизни, носяй плоды сладкия
Радуйся, раю посреде имый Христа кроткаго
Радуйся, лозы Христовы благоплодная розго
Радуйся, огнем благодати просвещаеши умы
Радуйся, пламенем любве исцеляеши души
РАДУЙСЯ, ВЕЛИКИЙ СИЛУАНЕ, СЛАДЧАЙШИЙ БОГОСЛОВЕ.
Кондак 2
Видящи тя Пречистая Дева в бездне греховней погибаюша, милосердова о тебе и тихими словесы воззва к покаянию. Ты же, отче святый, познавый Ю Духом, николиже забыл еси сие дивное посещение и кроткий глас Божия Матере, но присно влеклся еси к Ней, любовию поющи: Аллилуиа.
Икос 2
Разум небесный стяжав покаянием, и в напутие приим молитвы великаго пастыря Иоанна, яко овча жаждущее, вселился еси во двор Пантелеимонов, идеже среди адскаго жжения распинался еси мирови, глаголя: «Зле умру за грехи моя». Мы же дивящеся крепости твоего покаяния, вопием ти сице:
Радуйся, Христа паче души своея возлюбивый
Радуйся, во след Агнцу Божию последовавый
Радуйся, злато огнем искушений очищенное
Радуйся, кадило покаянным пламенем возносимое
Радуйся, воине Христов мужеумный
Радуйся, послушания непорочна исполненный
Радуйся, горо мраком богооставления приосененная
Радуйся, Гефсиманскою нощию помысливый Бога неумолима
Радуйся, тебе бо открыся тайна Христова истощания
Радуйся, ты бо отчаялся еси да утешиши многия
Радуйся, от юности на высоту совершенства возшедый
Радуйся, Господа распята и Воскресша образе предивный.
РАДУЙСЯ, ВЕЛИКИЙ СИЛУАНЕ, СЛАДЧАЙШИЙ БОГОСЛОВЕ.
Кондак 3
Силу молитвы Иисусовы приим в сердце твое от Пречистыя Богородицы туне, множеству вражеских нападений подверглся еси, блаженне, бдением же, пощением и непрестанными теченьми слез твоих умилостивляя Господа, и поя Ему: Аллилуиа.
Икос 3
Имуще тя учителя и наставника, Силуане богосне, укрепляемся на подвиг крестный. Ты бо научился еси от Господа путем жизни вечныя, и восприял еси небесных тайн откровение Духом Святым, Имже вдохновляемся воспети тебе:
Радуйся, Христообразный уме
Радуйся, сердце заповедию Христовою расширенное
Радуйся, яко Духом Святым и тело твое освятися
Радуйся, яко мощами твоими вернии благоухаются
Радуйся, Святыя Троицы таинниче
Радуйся, Отца Небеснаго сыне возлюбленне
Радуйся, присный друже Христа
Радуйся, Духа Свята огненная уста
Радуйся, неизреченная богословствуеши яве
Радуйся, на персех Христа почерпый струи Божия любве
Радуйся, реко боговедением орошающая концы
Радуйся, кладезю жаждущия напаяющий
РАЛУЙСЯ, ВЕЛИКИЙ СИЛУАНЕ, СЛАДЧАЙШИЙ БОГОСЛОВЕ.
Кондак 4
Бури житейския и помыслов душетленных не убоимся, Силуане отче наш, яко словеса твоя — светильник ногама нашима и свет стезям нашим. Тобою бо научихомся мнети себе нижайшия всех и вожделети присно смирения Христова, победную песнь на враги поюще: Аллилуиа.
Икос 4
Да услышит земля и возвелелится о милости Господней, яко живый Христос непостижимо явися ти, преподобие Силуане, и сподоби тя насладитися Духом Святым, имже познал еси Господа и возлюбил Его до конца. Мы же дивящеся сему неизреченному богоявлению, ублажаем тя сице:
Радуйся, Кроткаго и Смиреннаго лицезревый
Радуйся, желанием уподобится Ему возжелевый
Радуйся, яко сладость Духа всего тебе исполни
Радуйся, яко мученически жаждал еси страданий Христа ради
Радуйся, тихий и кроткий взор Христов никогдаже забывай
Радуйся, последи Того присно со слезами искавый
Радуйся, от ада возведенный к видению лица Божия
Радуйся, слышавый тамо глаголы неизреченныя
Радуйся, причастниче славы сынов Воскресения
Радуйся, тайновидче человеколюбия Божия
Радуйся, Духом озаренный богословити Творца
Радуйся, Того проповедавый милостива и всепрощающа
РАДУЙСЯ, ВЕЛИКИЙ СИЛУАНЕ, СЛАДЧАЙШИЙ БОГОСЛОВЕ.
Кондак 5
Несозданным светом осиянный, в тебе, отче, мудрствовася еже и во Христе Иисусе, Иже показа тя новейша богослова и молитвенника дивна, мир слезами орошающа, да вси людие познают Бога, якоже ты познал еси Его Духом Святым, и обратятся к Нему, в радости зовуще: Аллилуиа.
Икос 5
Видевши, яко умалися совершенная благодать, юже приял еси, явльшуся ти Христу, плачем объят был еси, преподобне, и множество прейдя огненных искушений, болезненне учился еси, еже како стяжевается благодать, и како хранится она. Темже, яко благодати таиннику и подвижнику премудрому, воспеваем ти сице:
Радуйся, скучает о Господе душа твоя
Радуйся, еленю, жаждущий к струям жизни вечныя
Радуйся, красотою плененный Лица Божия
Радуйся, звездо, от нощи с плачем утренюющая
Радуйся, страдальче от умных враг множицею мучимый
Радуйся, воздыханьми взывавый к Могущему спасти
Радуйся, призвавый милость Серафимовым воплем
Радуйся, в наследие стяжавый благодать страданием
Радуйся, кровьми приемый разум духовный
Радуйся, ведение сие яко сокровище нам оставивый
Радуйся, имже вдохновляемся погубленная рыданьми восприяти
РАДУЙСЯ, ВЕЛИКИЙ СИЛУАНЕ, СЛАДЧАЙШИЙ БОГОСЛОВЕ.
Кондак 6
Проповедник безприкладный яже к врагом любве явился еси миру, Силуане преподобне, яко Дух Святый уподоби тя распятому Христу, и научи тя миловати враги яко присныя дети и слезно молитися о них. И нас сподоби, отче возлюбленне, сего истиннаго знания, еже есть жизнь вечная, да с тобою воспоем Богу: Аллилуиа.
Икос 6
Возсия тебе свет разума, Силуане богомудре, егда по летех пятинадесятих борения унывшу в тебе духу твоему, глас Господень показа ти путь ко смирению, рек: «Держи ум твой во аде, и не отчаивайся». Еже правило приимше яко оружие непобедимое на враги, благодарно вопием ти:
Радуйся, богонаученный подвижниче
Радуйся, светило сущим во тьме возсиявающее
Радуйся, единомысленниче древних Отец пустынных
Радуйся, обогащенный разумом Святых
Радуйся, подвигу Серафимову духом приобщенный
Радуйся, огненным деланием в мужа совершенна пришедый
Радуйся, имже открыся тайна любве, яже есть смирение
Радуйся, имже отчаянный век наш прият исцеление
Радуйся, смирение Христово, яко бисер, взыскавый
Радуйся, гордыню богоначертанным законом попаливый
Радуйся, подобно Христу послушанием истощивыйся до ада
Радуйся, путь заповедей Его текий веселыма ногами
РАДУЙСЯ, ВЕЛИКИЙ СИЛУАНЕ, СЛАДЧАЙШИЙ БОГОСЛОВЕ.
Кондак 7
Хотяй всем человеком спастися Человеколюбец Господь остави тя вкусити адских мучений, яко да будеши пламенный молитвенник о томящихся во аде и сени смертней, имже в нощи ходатайствовал еси отраду и покой слезами великими, да не лишатся славы и любве таковаго Бога, но да вси воспоют во свете невечернем: Аллилуиа.
Икос 7
Новый Адам явлейся вселенней, блаженне, Духом Святым познал еси в себе тайну падения первозданного, и каяйся перед небом и землею, взывал еси: «Милостиве, помилуй мя, падшаго». Темже Силы Небесныя страхом содержими бяху, и радуюшеся о пакаянии твоем взываху ти:
Радуйся, Адамовым плачем лишение славы Божия плакавый
Радуйся, землю струями слезными оросивый
Радуйся, яко пустыня мира таинственно внемляше ти
Радуйся, якоже райское и царское паки приял еси
Радуйся, вся роды человеческия объимый покаянием
Радуйся, познание милости Божия ходатайствовавый всем
Радуйся, болезньми возставивый первозданную красоту
Радуйся, царю и иерею по чину Мелхиседекову
Радуйся, жертво, на вселенстем жертвеннице принесенная
Радуйся, яко ныне прейде время плача Адамова
Радуйся, спребываеши вечно Христу, о Немже рыдаше душа твоя
Радуйся, и даждь нам благодать Адамова покаяния
РАДУЙСЯ, ВЕЛИКИЙ СИЛУАНЕ, СЛАДЧАЙШИЙ БОГОСЛОВЕ.
Кондак 8
Странная на тебе совершишася, преподобне, яко непричастен сый мирския мудрости, познал еси неизреченная Божия, и богословил еси тайны будущаго века, органе светозарный Духа Святаго, Иже усты твоими возвести нам, яко велико есть точию еже стяжати смиреннаго Духа любве Христовы, яже всех милует, поющи Господеви: Аллилуиа.
Икос 8
Весь сообразен быв евангельскому слову, обрел еси сердце милующее всю тварь, и подобно Отцу Небесному, облобызавшему блуднаго сына, мил тебе бысть всякий брат твой. И аки пламенем томяся, да вси людие познают сицеваго Господа, взывал еси: «Дай ми, Господи, слезы да плачет душа моя от любве к брату день и нощь». Тем же мы вси яко благовестника небеснаго величаем тя сице:
Радуйся, Гефсиманскаго плача причастниче
Радуйся, селение Бога и человека вмещающее
Радуйся, печаль и радость в себе странно сочетавый
Радуйся, плоде мира же всего дражайший
Радуйся, пречистый елее сокрушенныя исцеляяй
Радуйся, тихий свете отчаянныя возставляяй
Радуйся, присно о нищих и униженных болезновал еси
Радуйся, теплотою Духа скорбящия души согревал еси
Радуйся, яко Серафим звери дивия милующий
Радуйся, избавлься от тьмы ныне смиренно царствуеши
Радуйся, источниче слез совесть омывающий
Радуйся, орле, под криле небо и землю собирающий
РАДУЙСЯ, ВЕЛИКИЙ СИЛУАНЕ, СЛАДЧАЙШИЙ БОГОСЛОВЕ.
Кондак 9
Всем Небесным Силам тайно внимая, воспевающим страдания Господня, предзрел еси Христа пред собою выну, блаженне, простирающа руки Своя на Кресте, да будем смиренны, и сладчайшую песнь, юже научи тя Дух Святый, херувимски пел еси Ему в души твоей: Аллилуиа.
Икос 9
Вития премудрыя века сего побеждая, духодвижно писал еси от Лица Божия милосердия, Силуане блаженне, да вси языцы иже под небесем приидут в познание истины единаго Бога. И мы прияхом книгу твою, яко огнь Утешителев, имже ожесточенная смягчаются и подаются слезы умиления благодарно поющим ти:
Радуйся, Евангелие одушевленное, имже концы просвещаются
Радуйся, книго тростию Духа написанная
Радуйся, имже Благовестие изыде паки во всю землю
Радуйся, имже новое добротолюбие дадеся миру
Радуйся, глубино тайн препростыми словесы явленная
Радуйся, высото совершенства всем предложенная
Радуйся, сокровище неистощимое богословия
Радуйся, пророческая уста, имиже Дух Святый глагола
Радуйся, учиши бо со властию, Апостолов наследниче
Радуйся, воды целительныя неисчерпаемый источниче
Радуйся, жало к любви горней уязвляющее
Радуйся, жезле из камене струи источающий
РАДУЙСЯ, ВЕЛИКИЙ СИЛУАНЕ, СЛАДЧАЙШИЙ БОГОСЛОВЕ.
Кондак 10
Спасения рода человеча жаждущи, уподобился еси Христу, молящемуся в Гефсимании, да искупит вся от клятвы законныя, яко Дух Святый исполни тя любве Христовы, яже умирает, да прочии живи будут, и тако зрящи в коемждо брате твоем образ славы Божия, пролиял еси кровь твою в молениих за весь род Адамов, взывающи Богу: Аллилуиа.
Икос 10
Стену необоримую рода христианскаго, Пресвятую Деву познал еси, Силуане предивне, яко, всельшуся в тя Духу Святому, сродник был еси Пречистыя и всех небожителей, ихже мысли и чувствия тайне уразумев, возвестил еси нам, умильно поющим ти:
Радуйся, избранниче возлюблен Богоматере
Радуйся, рая благодатныя благовонный цвете
Радуйся, яко Сергий и Серафим, таинниче Пречистыя
Радуйся, взиравый на высоту любве Ея пламенныя
Радуйся, приникнувый в глубину скорби Владычицы
Радуйся, яко Богородичным плачем в Духе Святем плакал еси
Радуйся, ты бо у Креста стоял еси неизреченне с Богородицею
Радуйся, ты бо умно созерцал еси покров Ея над землею
Радуйся, печаль ея о людех в сердце твоем носивый
Радуйся, грешных милование Пречистыя в утешение нам уяснивый
Радуйся, ныне зриши Богородицу во славе
Радуйся, словеса твоя о Деве нам в светлость и радование
РАДУЙСЯ, ВЕЛИКИЙ СИЛУАНЕ, СЛАДЧАЙШИЙ БОГОСЛОВЕ.
Кондак 11
Пение новое воспел еси, блаженне, якоже научи тя Господь: держай ум твой во аде, слезно искал еси Бога, глоголя: «Скоро аз умру, и вселюся в темницу адову, идеже тужити и плаката имам о Господе». И тако до ада смиряяся, чистым умом предстоял еси Богу, и Духу свдетельствующу в души твоей спасение, взывал еси Ему: Аллилуиа.
Икос 11
Свет Христова смирения возсия мирови тобою, Силуане боговидче, яко Духом Святым познал еси сию неописанную тайну, и научивший от Господа кротости и смирению, обрел еси покой души твоей. Сподоби и нас смиреннаго Духа, да обрящем мир прежде конца, сице тя ублажающия:
Радуйся, смирения Христова сладкопевче
Радуйся, смиренне, гориши яко солнце неопалимое
Радуйся, телотою своею согреваеши всех
Радуйся, твоя бо есть земля кротких
Радуйся, цветущий саде, идеже обитает Бог
Радуйся, тебе любят Апостоли, Пророцы и Преподобнии
Радуйся, тебе любят Ангели, Серафими и Херувими
Радуйся, тебе любят небо и земля
Радуйся, тебе любит Дева Пречистая
Радуйся, смиренне, Господь о тебе радуется
Радуйся, до ада смиривыйся и мир победивый
Радуйся, небом и землею ныне прославленный
РАДУЙСЯ, ВЕЛИКИЙ СИЛУАНЕ, СЛАДЧАЙШИЙ БОГОСЛОВЕ.
Кондак 12
Благодатию Духа озаряемь, Силуане тайновидче, начертал еси нам закон божественныя любве, глаголя: «Аще кто множае любит, той и множае страждет», яко любы неизменно причастна печали бывает. Темже видяще тя, подобно Христу и Богородице, выну болезнующа о народе умильно вопием Богу: Аллилуиа.
Икос 12
Поющи песнь в души твоей, исполнь мира Божия, тихо прешел еси от смерти в жизнь, дивне, во благоухании подвига твоего. И ныне, идеже есть Господь, и ты предстоиши, зря славу кроткаго и милостиваго Лица Его, и по обещанию твоему молишися о всем роде человечестем, и о нас сынолепно тя воспевающих:
Радуйся, Духом Святым сродниче Господа
Радуйся, Бога дерзновение призывавый дражайша Отца
Радуйся, яко дети Отца Небеснаго видевый братию твою
Радуйся, Христос бо сотвори нас едину семью
Радуйся, слезами божественными сеявый скорби постныя
Радуйся, радостию пожавый класы присноживотия
Радуйся, пище небесная, алчущия питающая
Радуйся, чистое сердце, узревшее Бога
Радуйся, ныне уподобился еси Ему до конца
Радуйся, светлый пркрове вселенныя
Радуйся, и буди утешитель сирым твоим
Радуйся, и не забуди нас, скорбящих в мире сем
РАДУЙСЯ, ВЕЛИКИЙ СИЛУАНЕ, СЛАДЧАЙШИЙ БОГОСЛОВЕ.
Кондак 13
О предивный отче Силуане, / Духа носителю всемирный, / приими смиренную песнь благодарения, / яко тобою узрехом свет богоразумия, / и предстоя ныне Пресвятей Троице / поминай ихже возлюбил еси, мудре, / и настави нас к тихому пристанищу любве Отчия, / до сподобимся пети с тобою / Аллилуиа.
Сей кондак глаголи трижды.
Таже:
Икос 1
Ангельский Царь, от юности призвавый тя благодатию Своею, предустави тя, Силуане богомудре, сообразна быти образу Сына Своего, да свидетельствуеши мирови о любви Божией, и воздвигнеши от пропасти отчаяния люди благодарно зовущия ти:
Радуйся, сияние любве Отчия
Радуйся, проповедниче Христова всепрощения
Радуйся, теплото, исполнь Духа Святаго
Радуйся, красото образа первозданного
Радуйся, имже источаются слезы
Радуйся, имже очищаются смыслы
Радуйся, ветвь распятыя земли русския
Радуйся, древо жизни, носяй плоды сладкия
Радуйся, раю посреде имый Христа кроткаго
Радуйся, лозы Христовы благоплодная розго
Радуйся, огнем благодати просвещаеши умы
Радуйся, пламенем любве исцеляеши души
РАДУЙСЯ, ВЕЛИКИЙ СИЛУАНЕ, СЛАДЧАЙШИЙ БОГОСЛОВЕ.
Кондак 1
Избранный молитвенниче, и Духа селение благовонное, / Силуане преподобне, / присно источая слезы на земли, / горел еси желанием да вси людие спасутся / и узрят славу Божию, / но яко в болезнех стяжав утробу Христову / избави нас от печали греховныя, / да наполнятся Духа уста наша воспети тебе: / РАДУЙСЯ, ВЕЛИКИЙ СИЛУАНЕ, СЛАДЧАЙШИЙ БОГОСЛОВЕ.
Молитвы преподобному Силуану Афонскому
О Преподобне и Богоносне отче наш Силуане, возлюбивый непостижимо явльшагося тебе Христа паче всякаго инаго блага и всякия иныя красоты, и взыскавый Сего с великим плачем в житии твоем, ныне же веселяся с Небесными Силами, ненасытимо насыщаяйся неизреченныя Его доброты, молим тя, преблаженне, призри с небес на ны, недостойныя, с любовию творящия память твою святую, и прииди и стани среди нас, и буди сам ты начальник сего торжества нашего. Отче предивне Силуане, еще в житии сем насладивыйся Духом Святым, Иже неисповедимым пришествием своим даде ти узрети и познати Христа Бога, и уподобитися Ему в любви к человеку, молим тя, помяни нас, чад твоих, в тесноте и скорби сущих: болезнуя на земли в молитвах о мире, ныне же безболезненно предстоя Престолу Господа Славы, испроси мирови мир, Церкви Православней утверждение, священником — заступление, малодушным — терпение, омраченным — просвещение, отчаянным — непостыдную надежду, скорбящим — утешение, умирающим — благое напутствие и усопшим — отраду и упокоение в Бозе.
Ей, Отче наш Силуане, услыши нас, бедствующих в мире сем, страстей бурею потопляемых, и умири жизнь нашу, отыми от нас всяку вражду и неприязнь, защити нас предстательством твоим от всякаго навета вражия, научи нас любви, милосердию и единомыслию, да вси согласно славим Творца, Отца и Сына и Святаго Духа, ныне и присно и во веки веков. Аминь.
Ина молитва Преподобному (Яже читается изрядно во Обители его)
Преподобне отче Силуане, источниче слез, текущих в жизнь, ты еще на земли научился еси от Духа Святаго милосердию Христову, еже имаши ныне неотъемлемо и совершенно в Царствии Небеснем.
Помяни убо обетование твое молитися о всем скорбящем роде человечестем. Аще и живущии пред Лицем Бога Живаго не могут помышляти земная, вонми воздыханию нашему в час сей, и умоли милостиваго Господа, да ниспослет и нам, погибающим, Духа Утешителя, да разумеем, что есть любы к Богу, и что есть любы к человеку, и вдохновимся силою сея любве последовати Христу аможе аще пойдет.
Ей, Силуане блаженне, душа твоя вся в любви есть, сего ради припадаем ти и со слезами вопием: подаждь омраченному уму нашему помысл смирения и умиления, еже никогоже оскорбляти, но молитися о всех, якоже о себе самех. Вообрази в нас Образ Христов, якоже познал еси Его Духом Святым, и научи нас пути, имже шел еси, пути смиреннаго плача, покаяния и послушания. Ты бо еси отец наш, иже породил еси нас словом твоим, и мы чада твоя и овцы двора твоего, аще и недостойнии. Пребуди убо неотступно с нами, наставляя нас на истину Христову. Стеною молитвы твоея огради Обитель сию и всех живущих в ней, и утверди ю на камени евангельских заповедей, да сподобимся служити непорочно и верно слову и делу твоему. Мир и любовь помози нам обрести прежде конца, и в час смертный вложи в уста наша молитву твою сию: «Слава Тебе, Господи, яко ныне иду к Тебе, и имам вечно в мире и любви зрети Лице Твое. Твой тихий, кроткий взор привлече душу мою, и она скучает по Тебе; со Отцем и Святым Духом, Тебе слава во веки веков. Аминь».