Пресвятой Богородице
Тропарь, гл. 4
К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози на ны милосердовавши, потщися, погибаем от множества прегрешений: не отврати Твоя рабы тщи. Тя бо едину надежду имамы.
Слава… и ныне…: Не умолчим никогда, Богородице, силы Твоя глаголати, недостойнии; аще бо Ты не бы предстояла молящи, кто бы нас избавил от толиких бед; кто же бы сохранил доныне свободны; не отступим Владычице от Тебе: Твоя бо рабы спасаеши присно от всяких лютых.
Кондак, гл. 6 Не имамы иныя помощи, не имамы иныя надежды, разве Тебе, Владычице; Ты нам помози: на Тебе надеемся и Тобою хвалимся: Твои бо есьмы раби, да не постыдимся.
Другой кондак, гл. 6 Предстательство христиан непостыдное, ходатайство ко Творцу непреложное, не презри грешных молений гласы, но предвари яко благая на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.
На утрени Прокимен, гл. 4: Помяну имя Твое во всяком роде и роде.
На литургии
Прокимен, песнь Богородицы, гл. 3: Величит душа моя Господа, и возрадовася дух мой о Бозе, Спасе моем.
Стих: Яко призре на смирение рабы Своея, се бо отныне ублажат мя вси роди.
Аллилуиа, гл. 8: Слыши дщи, и виждь, и приклони ухо твое.
Причастен: Чашу спасения прииму, и имя Господне призову.
Ангелам
См. службу понедельника, стр. 87.
И сие величание: Величаем вас, Архангели, Ангели, и вся воинства, Херувими и Серафими, славящия Господа.
Пророкам
Тропарь, гл. 2
Пророка Твоего (имя) память, Господи, празднующе, тем Тя молим: спаси души наша.
Кондак, гл. 4 Просветившееся Духом чистое твое сердце, пророчества бысть светлейшаго приятелище: зриши бо яко настоящая, далече сущая: сего ради тя почитаем, пророче блаженне (имя), славне.
На утрени
Величание: Величаем тя, пророче Божий (имя), и чтем святую память твою: ты бо молиши за нас Христа, Бога нашего.
Прокимен как на литургии.
На литургии
Прокимен, гл. 4: Ты иерей во век, по чину Мелхиседекову.
Стих: Рече Господь Господеви моему: седи одесную мене, дондеже положу враги твоя подножие ногама твоима.
Аллилуиа, гл. 5: Моисей и Аарон во иереех Его, и Самуил в призывающих имя Его.
Причастен: В память вечную будет праведник, от слуха зла не убоится.
Апостолу
Тропарь, гл. 3
Апостоле святый (имя), моли милостиваго Бога, да прегрешений оставление подаст душам нашим.
Кондак, гл. 4
Яко звезду пресветлую Церковь всегда стяжа тя, Апостоле (имя), чудес твоих многоподаванием просвещаема. Темже зовем Христу: спаси чтущих верою память Твоего Апостола, Многомилостиве.
Величание: Величаем тя, Апостоле Христов (имя), и чтем болезни и труды твоя, имиже трудился еси во благовестии Христове.
Прокимен, аллилуиа, причастен — см. службу дневную четверга, стр. 89.
Апостолам
Тропарь, гл. 3
Апостоли святии, молите милостиваго Бога, да прегрешений оставление подаст душам нашим.
Кондак, гл. 4
Лозие явистеся Христова винограда мудрии, гроздие приносяще в добро детел ех, вино нам спасения источающе: егоже приемлем веселия исполняющееся. Празднуем честную вашу память, в нюже молите дароватися нам велицей милости, и отпущению грехов, Господни Апостоли.
Величание: Величаем вас, святии Апостоли, иже весь мир ученьми своими просветившия, и вся концы ко Христу приведшия.
Прокимен, аллилуиа, причастен — см. службу дневную четверга, стр. 89.
Святителю
Тропарь, гл. 4
Правило веры и образ кротости, воздержания учителя, яви тя стаду своему, яже вещей истина: сего ради стяжал еси смирением высокая, нищетою богатая, отче священноначальниче (имя), моли Христа Бога спастися душам нашим.
Кондак, гл. 2 Божественный гром, труба духовная, веры насадителю и отсекателю ересей, Троицы угодниче, великий святителю (имя), со Ангелы предстоя присно, моли непрестанно о всех нас.
На утрени
Величание: Величаем тя, святителю отче (имя), и чтем святую память твою: ты бо молиши за нас Христа, Бога нашего.
Прокимен как на литургии.
На литургии
Прокимен, гл. 1: Уста моя возглаголют премудрость и поучение сердца моего разум.
Стих: Услышите сия вси языцы, внушите вси живущии по вселенней.
Аллилуиа, гл. 2: Уста праведнаго поучатся премудрости, и язык его возглаголет суд.
Причастен: В память вечную будет праведник, от слуха зла не убоится.
Святителям
Тропарь, гл. 4
Боже отец наших, творяй присно с нами по Твоей кротости, не остави милость Твою от нас: но молитвами их в мире управи живот наш.
Кондак, гл. 8 Яко добродетелей учителие, и иерархов украшение, Церковь поющи вас славит: молитвами вашими подайте чтущим вас любовию добродетелей исправление, и соблазнов избавление, яко непобедимии.
На утрени
Величание: Величаем вас, святителие велицыи, и чтем святую память вашу: вы бо молите за нас Христа, Бога нашего.
Прокимен как на литургии.
На литургии
Прокимен, гл. 7: Честна пред Господем смерть преподобных Его.
Стих: Что воздам Господеви о всех, яже воздаде ми.
Аллилуиа, гл. 2: Священницы Твои облекутся в правду.
Причастен: В память вечную будет праведник, от слуха зла не убоится.
Преподобному
Тропарь, гл. 8
В тебе, отче, известно спасеся еже по образу: приим бо крест последовал еси Христу, и дея учил еси презирати убо плоть, преходит бо: прилежати же о души, вещи бессмертней: темже и со Ангелы срадуется, преподобие (имя), дух твой.
Кондак, гл. 2 Чистотою душевною Божественно вооружився, и непрестанныя молитвы яко копие вручив крепко, пробол еси бесовская ополчения (имя), отче наш, моли непрестанно о всех нас.
На утрени
Величание: Ублажаем тя, преподобие отче (имя), и чтем святую память твою, наставниче монахов и собеседниче Ангелов.
Прокимен как на литургии.
На литургии
Прокимен, гл. 1: Честна пред Господем смерть преподобных Его.
Стих: Что воздам Господеви о всех, яже воздаде ми.
Аллилуиа, гл. 6: Блажен муж бояйся Господа, в заповедех Его восхощет зело.
Причастен: В память вечную будет праведник, от слуха зла не убоится.
Преподобным
Тропарь, гл. 4
Боже отец наших, творяй присно с нами по Твоей кротости, не остави милость Твою от нас, но молитвами их в мире управи живот наш.
Кондак, гл. 2
Волнений множество невлажно проходяще, бесплотныя враги струями слез ваших крепко погрузили есте, Богомудрии и Преподобнии: и чудес дар приимше, молите непрестанно о всех нас.
Прочее как преподобному.
Мученику
Тропарь, гл. 4
Мученик Твой, Господи (имя), во страдании своем венец прият нетленный от Тебе, Бога нашего: имеяй бо крепость Твою, мучителей низложи, сокруши и демонов немощныя дерзости: того молитвами спаси души наша.
Кондак, гл. 6 Звезда светлая явился еси, непрелестная мирови, Солнце Христа возвещающи, зарями твоими страстотерпче (имя), и прелесть погасил еси всю: нам же подаеши свет, моляся непрестанно о всех нас.
На утрени
Величание: Величаем тя, страстотерпче святый (имя), и чтем честныя страдания Твоя, яже за Христа претерпел еси.
Прокимен, гл. 4: Праведник яко финике процветет, яко кедр, иже в Ливане, умножится.
На литургии
Прокимен, гл. 7: Возвеселится праведник о Господе, и уповает на Него.
Стих: Услыши, Боже, глас мой, внегда молитимися к Тебе.
Аллилуиа, гл. 4: Праведник яко финике процветет, яко кедр, иже в Ливане, умножится.
Причастен: В память вечную будет праведник, от слуха зла не убоится.
Мученикам
Тропарь, гл. 4
Мученицы Твои, Господи, во страданиях своих венцы прияша нетленныя от Тебе, Бога нашего: имуще бо крепость Твою, мучителей низложиша, сокрушиша и демонов немощныя дерзости. Тех молитвами спаси души наша.
Иной тропарь, гл. 1 Болезньми святых, имиже о Тебе пострадаша, умолен буди, Господи, и вся наша болезни исцели, Человеколюбче, молимся.
Кондак, гл. 2 Светильницы светлии явльшеся, Божественнии мученицы, тварь всю светлостию чудес озаряете, недуги разрешающе, и глубокую тьму всегда отгоняюще, Христу Богу молящеся непрестанно о всех нас.
На утрени
Величание: Величаем вас, страстотерпцы святыя, и чтем честная страдания ваша, яже за Христа претерпели есте.
Прокимен, гл. 4: Воззваша праведнии и Господь услыша их, и от всех скорбей их избави их.
На литургии
Прокимен, гл. 4: Святым, иже суть на земли Его, удиви Господь вся хотения своя в них.
Стих: Предзрех Господа предо мною выну, яко одесную мене есть, да не подвижуся.
Аллилуиа, гл. 4: Воззваша праведнии и Господь услыша их, и от всех скорбей их избави их.
Причастен: Радуйтеся праведнии о Господе, правым подобает похвала.
Священномученику
Тропарь, гл. 4
И нравом причастник, и престолом наместник Апостолом быв, деяние обрел еси Богодухновенне, в видения восход: сего ради слово истины исправляя, и веры ради пострадал еси даже до крове, священномучениче (имя), моли Христа Бога, спастися душам нашим.
Кондак, гл. 4 Во святителех благочестно пожив, и мучения путь прошед, пдольския угасил еси жертвы, и поборник быв твоему стаду, Богомудре. Тем-же тя почитающе, тайно вопием ти: от бед избави ны присно твоими мольбами, отче наш, (имя).
На утрени
Величание: Величаем тя, священномучениче (имя) и чтем святую память твою, ты бо молиши за нас Христа Бога нашего.
Прокимен, гл. 7: Честна пред Господем смерть преподобных Его.
На литургии
Прокимен, гл. 8: Восхвалятся преподобнии во славе, и возрадуются на ложах своих.
Стих: Воспойте Господеви песнь нову, хваление Его в церкви преподобных.
Аллилуиа, гл. 2: Священницы Твои облекутся в правду.
Причастен: В память вечную будет праведник от слуха зла не убоится.
Священномученикам
Тропарь, гл. 4
Боже отец наших… см. святителям, стр. 151.
Кондак, гл. 3 Яко светильники незаходимыя разумнаго Солнца, сошедшеся днесь восхвалим песньми: воссияли бо есте сущим во тьме неразумия, всех созывающе к высоте благочестия, священномученицы. Тем вопием вам: радуйтеся постников всех основание.
На утрени
Величание: Величаем вас, свяшенномученицы Христовы, и чтем честная страдания Ваша, яже за Христа претерпели есте.
Прокимен как на литургии.
На литургии
Прокимен, гл. 7: Честна пред Господем смерть преподобных Его.
Стих: Что воздам Господеви о всех, яже воздаде ми.
Аллилуиа, гл. 2: Священницы Твои облекутся в правду.
Причастен: Радуйтеся праведнии о Господе, правым подобает похвала.
Преподобномученику
Тропарь, гл. 8
В тебе, отче, известно спасеся еже по образу: приим бо крест последовал еси Христу, и дея учил еси презирати убо плоть, преходит бо: прилежати же о души, вещи бессмертней: темже и со Ангелы срадуется, преподобномучениче (имя), дух твой.
Кондак, гл. 2 Яко постника благочестна и искусна, и страдальца произволением честна, и пустыни жителя сообразна, в песнех достойно восхвалим (имя) приснохвальнаго: той бо змия попрал есть.
На утрени
Величание: Ублажаем тя, преподобномучениче (имя), и чтем святую память Твою, наставниче монахов и собеседниче Ангелов.
Прокимен, гл. 1: Честна пред Господем смерть преподобных Его.
На литургии
Прокимен, гл. 8: Восхвалятся преподобнии во славе, и возрадуются на ложах своих.
Стих: Воспойте Господеви песнь нову, хваление Его в церкви преподобных.
Аллилуиа, гл. 6: Блажен муж бояйся Господа, в заповедях Его восхощет зело.
Причастен: Радуйтеся праведнии о Господе, правым подобает похвала.
Преподобномученикам
Тропарь, гл. 4
Боже отец наших, творяй присно с нами по Твоей кротости, не отстави милость Твою от нас, но молитвами их в мире управи живот наш.
Кондак, гл. 2
Волнений множество невлажно проходяще, бесплотныя враги струями слез ваших крепко погрузили есте, Богомудрии и Преподобнии: и чудес дар приимше, молите непрестанно о всех нас.
Величание: Ублажаем вас, преподобнии мученицы, и чтем честная страдания ваша, яже за Христа претерпели есте.
Прочее как преподобномученику.
Мученице
Тропарь, гл. 4
Агница Твоя Иисусе (имя) зовет велиим гласом: Тебе, Женише мой, люблю, и Тебе ищущи страдальчествую и сраспинаюся, и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою, но яко жертву непорочную приими мя, с любовию пожершуюся Тебе: тоя молитвами яко Милостив, спаси души наша.
Кондак, гл. 2 Храм Твой всечестный, яко цельбу душевную обретше вси вернии, велегласно вопием ти, дево мученице (имя) великоименитая: Христа Бога моли непрестанно о всех нас.
На утрени
Величание: Величаем тя, страстотерпице Христова (имя), и чтем честное страдание твое, еже за Христа претерпела еси.
Прокимен как на литургии.
На литургии
Прокимен, гл. 4: Дивен Бог во святых Своих, Бог Израилев.
Стих: В церквах благословите Бога, Господа от источник Израилевых.
Аллилуиа, гл. 1: Терпя потерпех Господа и внят ми, и услыша молитву мою.
Причастен: Радуйтеся праведнии о Господе, правым подобает похвала.
Мученицам
Тропарь, гл. 1
Агницы словесныя Агнцу и Пастырю приведостеся мучением ко Христу, течение скончавше, и веру соблюдше. Темже днесь радостною душею совершаем, досточуднии, святую вашу память, Христа величающе.
Кондак, гл. 4
Страстотерпиц Христовых память празднуем и верою просяще помощи, избавитися всем от всякия скорби, зовущи: Бог наш с нами, иже сих прославивый якоже изволи.
Величание: Величаем вас, страстотерпицы святыя, и чтем честная страдания ваша, яже за Христа претерпели есте.
Прочее как мученице.
Преподобной
Тропарь, гл. 8
В тебе, мати, известно спасеся еже по образу: приимши бо крест последовала еси Христу, и деющи учила еси презирати плоть, преходит бо: прилежати же о души, вещи бессмертней: темже и со Ангелы срадуется, преподобная (имя), дух твой.
Кондак, гл. 2 За любовь Господню, преподобная, покоя желание возненавидела еси, пощением дух твой просветивши: крепко бо звери победила еси; но молитвами твоими противных шатание разори.
На утрени
Величание: Ублажаем тя, преподобная матп (имя), и чтем святую память твою, ты бо молиши за нас Христа Бога нашего.
Прокимен как на литургии.
На литургии
Прокимен, гл. 4: Дивен Бог во святых Своих, Бог Израилев.
Стих: В церквах благословите Бога, Господа от источник Израилевых.
Аллилуиа, гл. 1: Терпя потерпех Господа и внят ми, и услыша молитву мою.
Причастен: В память вечную будет праведник, от слуха зла не убоится.
Преподобным женам
Тропарь, гл. 2
Истинному желанию уневестившеся Христославнии, и временнаго обручника отвергшеся совокупления, и добродетельными подвиги возрастше, на высоту востекосте нетления, краснодушии и многобогатнии, столпи инокующим женам и правило. Темже о нас молите непрестанно, иже любовию вашу память празднующих.
Кондак, гл. 2
Телеса своя постом изнуривше, и неусыпными молитвами моляще Зиждителя о гресех своих: яко да приимете совершенное прощение, и приясте Божественное оставление, и Царствие небесное, молите Христа Бога о всех нас.
Величание: Ублажаем вас, преподобнии матери, и чтем святую память вашу, вы бо молите за нас Христа Бога нашего.
Прочее как преподобной.
Преподобномученице
Тропарь, гл. 4
Агница Твоя, Иисусе… см. мученице.
Кондак, гл. 4
Божественная память твоя (имя) днесь воссиявши явися мирови яко солнце, сказующи житие твое: ты бо воздержанием плотская допзания разорши, и страдания кровию уневестилася еси Христови. Темже хвалящия тя избави от всяких зол, да зовем ти: радуйся, мати преподобная.
Величание: Величаем тя, страстотерпице святая (имя), и чтем честное страдание твое, еже за Христа претерпела еси.
Прочее как мученице.
Исповеднику
(священно— и преподобноисповеднику)
Тропарь, гл. 8 Православия наставниче, благочестия учителю и чистоты, вселенныя светильниче, архиереев Богодухновенное удобрение, (имя) премудро, ученьми твоими вся просветил еси, цевнице духовная. Моли Христа Бога спастися душам нашим.
Кондак, гл. 2 Насладився Богомудре воздержания, и желания плотская ты успил еси, явився верою возращаемь и яко живота древо райское процвел еси, (имя) отче священный.
На утрени
Величание: Священноисповеднику: Величаем тя, святителю отче (имя), и чтем святую память твою: ты бо молиши за нас Христа, Бога нашего.
Преподобноисповеднику: Ублажаем тя, преподобие отче (имя), и чтем святую память твою, наставниче монахов и собеседниче Ангелов.
Прокимен, гл. 7: Честна пред Господем смерть преподобных Его.
Прочее см. преподобномученикам.
Бессребреникам
Тропарь, гл. 8
Святии бессребреницы и чудотворцы, посетите немощи наша: туне приясте, туне дадите нам.
Кондак, гл. 2 Благодать приимше исцелений простираете здравие сущим в нуждах, врачеве, чудотворцы преславнии: но вашим посещением ратников дерзости низложите мир исцеляюще чудесы.
На утрени
Величание: Величаем вас, чудотворцы славнии (имя), и чтем честная страдания ваша, яже за Христа претерпели есте.
Прокимен как на литургии.
На литургии
Прокимен, гл. 4: Святым, иже суть на земли Его, удиви Господь вся хотения Своя в них.
Стих: Предзрех Господа предо мною выну, яко одесную мене есть, да не подвижуся.
Аллилуиа, гл. 2: Се что добро или что красно, но еже жити братии вкупе.
Причастен: Радуйтеся праведнии о Господе, правым подобает похвала.
Христа ради юродивым
Тропарь, гл. 1
Глас Апостола Твоего Павла услышав глаголющ: мы юроди Христа ради, раб Твой, Христе Боже (имя), юрод бысть на земли Тебе ради: темже память его почитающе, Тебе молим, Господи, спаси души наша.
Кондак, гл. 8
Вышния красоты желая, и нижния сласти телесиыя тошно оставил еси, нестяжанием суетнаго мира, ангельское житие проходя скончався (имя) блаженне: с ними же Христа Бога моли непрестанно о всех нас.
Прочее как преподобному.
Усопшим
Тропарь, гл. 8
Глубиною мудрости человеколюбно вся строяй, и полезное всем подаваяй, едине Содетелю, упокой Господи души раб Твоих: на Тя бо упование возложиша, Творца и Зиждителя и Бога нашего.
Слава… и ныне… Тебе и стену и пристанище имамы, и молитвенницу благоприятну к Богу, Егоже родила еси, Богородице безневестная, верных спасение.
Кондак, гл. 8 Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь бесконечная.
На литургии
Прокимен, гл. 6: Души их во благих водворятся.
Стих: К Тебе, Господи, воздвигох душу мою, Боже мой, на Тя уловах, да не постыжуся во век.
Аллилуиа, гл. 8: и причастен: Блажени, яже избрал и приял еси, Господи, и память их в род и род.