Из великопостных богослужений
Молитва св. Ефрема Сирина
Господи и Владыко живота моего, дух праздности, уныния, любоначалия и празднословия не даждь ми (поклон).
Дух же целомурия, смиренномудрия, терпения и любве даруй ми рабу твоему (поклон).
Ей, Господи Царю, даруй ми зрети моя прегрешения и не осуждати брата моего, яко благословен еси во веки веков. Аминь (поклон).
Ирмосы великого канона
1. Помощник и покровитель бысть мне во спасение: Сей мой Бог, и прославлю Его: Бог отца моего, и вознесу Его: славно бо прославися.
2. Вонми, небо, и возглаголю, и воспою Христа, от Девы плотию пришедшаго.
Видите, видите, яко Аз есмь Бог, манну одождивый и воду из камене источивый древле в пустыни людем Моим десницею единою и крепостию Моею.
3. На недвижимем, Христе, камени заповедей Твоих утверди мое помышление.
Утверди, Господи, на камени заповедий Твоих подвигшееся сердце мое, яко един свят еси и Господь.
4. Услыша пророк пришествие Твое, Господи, и убояся, яко хощеши от Девы родитися и человеком явитися, и глаголаше: услышах слух Твой и убояхся, слава силе Твоей, Господи.
5. От нощи утренююща, Человеколюбче, просвети, молюся, и настави и мене на повеления Твоя, и научи мя, Спасе, творити волю Твою.
6. Возопих всем сердцем моим к щедрому Богу, и услыша мя от ада преисподняго, и возведе от тли живот мой.
Кондак: Душе моя, душе моя, востани, что спиши? Конец приближается, и имаши смутитися: воспряни убо, да пощадит тя Христос Бог, везде сый и вся исполняяй.
7. Согрешихом, беззаконновахом, неправдовахом пред Тобою, ниже соблюдохом, ниже сотворихом, якоже заповедал еси нам: но не предаждь нас до конца, отцев Боже.
8. Его же воинства небесная славят, и трепещут херувими и серафими, всякое дыхание и тварь, пойте, благословите и превозносите во вся веки.
9. Бессеменнаго зачатия рождество несказанное, Матере безмужныя нетленен плод: Божие бо рождение обновляет естества; темже Тя вси роди, яко Богоневестную Матерь, православно величаем.
На великом повечерии
Пресвятая Владычице Богородице, моли о нас грешных.
Вся небесныя силы святых Ангел и Архангел, молите о нас грешных.
Святый Иоанне пророче и Предтече и Крестителю Господа нашего Иисуса Христа, моли о нас грешных.
Святии славнии Апостоли, пророцы и мученицы, и вси святии, молите…
Преподобнии и Богоноснии отцы наши, пастырие и учителие вселенныя, молите…
Непобедимая и непостижимая и Божественная сила честнаго и животворящаго Креста, не остави нас грешных.
Боже, очисти нас грешных.
Боже, очисти нас грешных и помилуй нас.
Первого часа
Тропарь, гл. 6
Заутра услыши глас мой, Царю мой и Боже мой.
Третьего часа
Тропарь, гл. 6
Господи, Иже Пресвятаго Твоего Духа в третий час Апостолом Твоим ниспославый. Того, Благий, не отъими от нас, но обнови нас молящих Ти ся.
Шестого часа
Тропарь, гл. 2
Иже в шестый день же и час на кресте прнгвождей в ран дерзновенный Адамов грех, и согрешений наших рукописание раздери, Христе Боже, и спаси нас.
Девятого часа
Тропарь, гл. 8
Иже в девятый час нас ради плотию смерть вкусивый, умертви плоти нашея мудрование, Христе Боже, и спаси нас.
На преждеосвященной литургии
Да исправится молитва моя, яко кадило пред Тобою: воз деяние руку моею, жертва вечерняя.
Господи, воззвах к Тебе, услыши мя: вонми гласу моления моего, внегда воззвати ми к Тебе.
Положи, Господи, хранение устом моим и дверь ограждения о устнах моих.
Не уклони сердце мое в словеса лукавствия, непщевати вины о гресех.
На великом входе
Ныне силы небесныя с нами невидимо служат: се бо входит Царь славы, се жертва тайная совершена дориносится.
Верою и любовию приступим, да причастницы жизни вечныя будем. Аллилуиа.
После: Со страхом Божиим… вместо: Благословен грядый…, поется: Благословлю Господа на всякое время, хвала Его во устех моих. Хлеб небесный и чашу жизни вкусите и видите яко благ Господь. Аллилуиа.
Малое повечерие
Молитвами святых Отец наших, Господи Иисусе Христе Боже наш, помилуй нас.
Слава Тебе, Боже наш, слава Тебе.
Царю небесный…
Святый Боже… (трижды).
Слава… и ныне…
Пресвятая Троице…
Господи помилуй (трижды).
Слава… и ныне…
Отче наш…
Господи, помилуй (12раз).
Слава… и ныне…
Приидите поклонимся… и псалом 50 (стр. 5), затем следующие псалмы:
Боже в помощь мою вонми, Господи, помощи ми потщися: да постыдятся и посрамятся ищущии душу мою. Да возвратятся вспять, и постыдятся хотящии ми злая. Да возвратятся абие стыдящеся, глаголющии ми: благоже, благоже. Да возрадуются и возвеселятся о Тебе вси ищущии Тебе Боже: и да глаголют выну: да возвеличится Господь, любящий спасение Твое. Аз же нищ есмь и убог, Боже помози ми: помощник мой и избавитель еси Ты, Господи, не закосни.
Господи, услыши молитву мою, внуши моление мое во истине Твоей, услыши мя в правде Твоей. И не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой. Посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творениих руку Твоею поучахся. Воздех к Тебе руце мои, душа моя яко земля безводная Тебе. Скоро услыши мя, Господи, изчезе дух мой: не отврати лица Твоего от мене, и уподоблюся нисходящим в ров. Слышану сотвори мне заутра милость Твою, яко на Тя уловах. Скажи мне, Господи, путь, воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой. Дух Твой благий наставит мя на землю праву. Имене Твоего ради, Господи, живиши мя, правдою Твоею изведеши от печали душу мою: и милостию Твоею потребиши враги моя, и погубиши вся стужающыя души моей, яко аз раб Твой есмь.
Слава в вышних Богу, и на земли мир, в человецех благоволение. Хвалим Тя, благословим Тя, кланяем Ти ся, славословим Тя, благодарим Тя, великия ради славы Твоея. Господи Царю небесный, Боже Отче вседержителю, Господи Сыне единородный, Иисусе Христе, и Святый Душе. Господи Боже, Агнче Божий, Сыне Отечь, вземляй грех мира, помилуй нас, вземляй грехи мира, приими молитву нашу: седяй одесную Отца, помилуй нас. Яко Ты еси един свят, Ты еси един Господь, Иисус Христос, в славу Бога Отца, аминь.
На всяку нощь благословлю Тя, и восхвалю имя Твое во веки, и в век века.
Господи, прибежище был еси нам в род и род. Аз рех: Господи, помилуй мя, исцели душу мою, яко согреших Тебе. Господи, к Тебе прибегох, научи мя творити волю Твою, яко Ты еси Бог мой: яко у Тебе источник живота, во свете Твоем узрим свет. Пробави милость Твою ведущим Тя.
Сподоби, Господи, в нощь сию без греха сохранитися нам. Благословен еси, Господи, Боже отец наших, и хвально, и прославлено имя Твое во веки, аминь.
Буди, Господи, милость Твоя на нас, якоже уповахом на Тя. Благословен еси, Господи, научи мя оправданием Твоим. Благословен еси, Владыко, вразуми мя оправданием Твоим. Благословен еси, Святый, просвети мя оправдании Твоими.
Господи, милость Твоя во век, дел руку Твоею не презри. Тебе подобает хвала, Тебе подобает пение, Тебе слава подобает, Отцу, и Сыну, и Святому Духу, ныне и присно и во веки веков, аминь.
Верую во единаго Бога (стр. 42).
После Верую читается Канон или Акафист Спасителю или Пресвятой Богородице или положенному святому.
Затем: Достойно есть (стр. 45).
Трисвятое по Отче наш (стр. 4).
После Отче наш читается тропарь дня, святого и храма, и затем нижеследующие тропари. (Если же есть праздник, то читается только кондак праздника и пропускаются нижеследующие тропари.)
Боже отец наших, творяй присно с нами по Твоей кротости: не отстави милость Твою от нас, но молитвами их в мире управи живот наш.
Во всем мире мученик Твоих кровьми, яко багряницею и виссом, церковь Твоя украсившися, теми вопиет Ти, Христе Боже: людем Твоим щедроты Твоя ниспосли, мир жительству Твоему даруй, и душам нашим велию милость.
Слава: Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь бесконечная. И ныне: Молитвами, Господи, всех святых, и Богородицы, Твой мир даждь нам и помилуй нас, яко един щедр.
Господи, помилуй (40раз).
Иже на всякое время (стр. 6).
Господи помилуй (трижды).
Слава… и ныне: Честнейшую херувим и славнейшую без сравнения серафим, без нетления Бога Слова рождшую, сущую Богородицу тя величаем.
Именем Господним благослови, Отче.
Молитвами святых отец наших, Господи Иисусе Христе Боже наш, помилуй нас, аминь.
Молитва молебна ко Пресв. Богородице
Нескверная, неблазная, нетленная, пречистая, чистая Дево, Богоневесто Владычице, яже Бога Слова человеком преславным твоим рождеством соединившая, и отринувшееся естество рода нашего небесным совокупльшая, яже ненадежных едина надежда, и боримых помоще, готовое заступление к тебе притекающих, и всех христиан прибежище: не гнушайся мене грешнаго, сквернаго, скверными помыслы, и словесы, и деяньми всего себе непотребна сотворша, и разумом лености сластей жития раба бывша. Но яко человеколюбиваго Бога Мати, человеколюбие умилосердися о мне грешнем и блуднем, и приими мое еже от скверных устен приносимое тебе моление: и твоего Сына, и нашего Владыку и Господа, матернее твое дерзновение употребляющи, моли, да отверзет и мне человеколюбныя утробы своея благости, и презрев моя бесчисленная прегрешения, обратит мя к покаянию, и Своих заповедей делателя искусна явит мя. И предстани мне присно, яко милостивая, и милосердая, и благолюбивая, в настоящем убо житии теплая предстательнице и помощнице, сопротивных нашествия отгоняющи, и ко спасению наставляющи мя: и во время исхода моего окаянную мою душу соблюдающи, и темныя зраки лукавых бесов далече от нея отгоняющи: в страшный же день суда вечныя мя избавляющи муки и неизреченныя славы Твоего Сына и Бога нашего наследника мя показующи: Юже и да улучу, Владычице моя, пресвятая Богородице, твоим ходатайством и заступлением, благодатию и человеколюбием единороднаго Сына твоего, Господа и Бога и Спаса нашего Иисуса Христа: Емуже подобает всякая слава, честь и поклонение, со безначальным Его Отцем, и пресвятым и благим и животворящим Его Духом, ныне и присно, и во веки веков, аминь.
Молитва ко пресв. Троице
И даждь нам, Владыко, на сон грядущым, покой тела и души, и сохрани нас от мрачнаго сна греховнаго, и от всякаго темнаго и нощнаго сладострастия. Укроти стремления страстей, угаси разжженныя стрелы лукаваго, яже на ны льстивно движимыя. Плоти нашея востания утоли, и всякое земное и вещественное наше мудрование успи. И даруй нам, Боже, бодр ум, целомудр помысл, сердце трезвящееся, сон легок, и всякаго сатанина мечтания изменен. Восстави же нас во время молитвы утверждены в заповедех Твоих, и память судеб Твоих в себе тверду имуща: всенощное славословие нам даруй, во еже пети и благословити и славити пречестное и великолепое имя Твое, Отца, и Сына, и Святаго Духа, ныне и присно, и во веки веков, аминь.
Преславная Приснодево, Мати Христа Бога, принеси нашу молитву Сыну твоему и Богу нашему, да спасет тобою души наша.
Упование мое Отец, прибежище мое Сын, покров мой Дух Святый: Троице Святая, слава Тебе. Слава… и ныне… Господи помилуй (3).
Молитвами Пречистыя Твоея Матере и всех святых, Господи Иисусе Христе Боже наш, помилуй нас. Аминь.