Приложение 1.

Слово великого князя Андрея Боголюбского о милости Божией

Издаётся по списку XVI в. БАН.Ф. 31. № 33.16.11. Л. 198 об. -199 об. (по фотографическому воспроизведению в статье: Филипповский Г.Ю. «Слово» Андрея Боголюбского о празднике 1 августа // Памятники истории и культуры. Вып. 2. Ярославль, 1983. С. 79–81). Для разночтений привлечены также списки ИРЛИ. Колл. В.Н. Перетца. № 80. Л. 320 об. — 321 об. 1597 г. (издан: Филипповский Г.Ю. «Слово» Андрея Боголюбского о празднике 1 августа по списку 1597 г. // Культура славян и Русь. М., 1998. С. 236–237) и Забелинский (ГИМ. Собр. Забелина. № 369. XVI в.; издан: Забелин И.Е. Следы литературного труда Андрея Боголюбского // Археологические известия и заметки. 1895. № 2–3. С. 46–47).

Месяца августа в 1 день. Слово великого князя Андрея Боголюбьскаго о милости Божий. Господи Вседръжителю.

Господа Бога нашего и человеколюбца милостиваго Спаса и Пречистыя Матери благодатию заступающе ны от всех бед и болезни и от всех враг видимых и невидимых и победу от нея имея на враги и по велицеи Божий милости и Божиа Матере празднуим вкупе Господу нашему и Его Матери августа // (Л. 199) в 1 день на память святых Маковеи уставихом якоже в Костянтине граде уставиша святии цари благовернии Пантократор милости Божи и человеколюбию, тако и сии праздник уставлен бысть худым и грешьным рабом Божи-им и Пречистыа Его Матере Богородица Андреем князем, сыном Георгьевым, вънуком Манамаховым именем Владимера, царя и князя всеа Руси.

О многомилостивеи Вседръжителю, неизреченне едине человеколюбче Господи Боже нашь, и Ты, Пречистаа Госпоже Богородице Дево, рожешия всех творьца Господа нашего Ису-са Христа, чистаа Мати Богу, благословеная, поющая тя верою спасай, напасти и молву отгонящи, милостива, яко Бога рожеши, все елико хощеши и можеши творити невъзбранно, Девице, еже не срамьляета всех притекающих к вама страхом и верою и любовию. Тако и не, грешному и недостойномуАндрею, приложита неизреченныя милости своеа свыше посылающе. От Тебе бо, Владыко и Пречистая Мати Божиа, всяко данье благо и дари свершени посылаются уповающим к тебе с ве// (Л. 199 об.)рою ныне и всегда и в бесконечныа векы, аминь.

 

Приложение 2.

Слово о празднике 1 августа

Слово о празднике 1 августа входит в цикл из пяти статей, включающий Сказание о чудесах Владимирской иконы Божией Матери. Ниже текст Слова печатается по изданию: Кучкин В. А., Сумникова Т.А. Древнейшая редакция Сказания об иконе Владимирской Богоматери // Чудотворная икона в Византии и Древней Руси. М., 1996. С. 501–502 (по списку 60–70-х гг. XVI в.: РГБ.Ф. 98 (Егор.). № 637. Л. 383 об. — 385).

Месяца августа в 1 день празднуемь Всемилостивому Христу и Пречистеи Его Матери.

Ведети есть о сем нам, възлюбленая братиа, еже Пантократныи день милости Божий празднуемь. Благочестивому и верному нашему цесарю и князю Андрею уставлыцю се праздновати со царемь Мануилом повелениемь патриарха Луки и митрополита [Костянтина] всея Руси и Нестера епископа ростовьскаго.

Мануилу цесарю мирно в любви и братолюбии живущю с благочестивым князем нашим Ондреем, случися им в един день изыти на брань: оному из Цесаряграда на срачины, а сему из Ростова на болгары. Обычаи же имеяше князь Андреи: егда к боеви идяше, всегда чистою душею, икону Владычица нашиа Богородица и приснодевыя Мария и крест прозвитера два в священных ризах ношаху. И ту приимаше от святых та-инь плоти и крови Господня, и сущий с ним, глаголя се: «Богородице Владычице, родивши Христа Бога нашего, уповая на Тя весь не погибнеть. Аз же, раб Твои, имею Тя стену и покров и крест Сына Твоего — оружие на врагы обоюдуостро, и огнь, пополяя противных наших лица, хотящих с нами брани». И падоша вси на колену пред Святою Богородицею, со слезами целующе. И шедше взяша 4 городы болгарьскыи, пятый Бряхимов на Каме. И воротився от сеча, вси видеша луча огнены от иконы Спаса нашего Владыкы Бога, и весь полк его окрыть. Он же воротися опять и попали грады ты огнемь и положи землю ту пусту, а прочий городы осади дань платити.

То же видение и Мануил цесарь тамо виде в 1-й день августа, праздновати уставиша милости Божия человеколюбия, якоже рече пророк: «Егоже хощю помилую, и помиловань будеть».

И ныне тако покрыи, Владыко, Руския земля, люди твоя вся, уповающая на Тя. Тем вси припадем Ти, глаголюще: «Господи Исусе Христе, что Ти въздамы о всех, яже въздасть нам. Велии бо еси и чюдна дела Твоя. Благословен Господь Бог, иже не дасть нас в плен врагом нашим, но Сам призри на ны милоетию Своею и человеколюбиемь Своимь защити ны. И славою възнесе десницю уповающих на Тя, и Матерьне моление услыша и помилова люди Своя милостию человеколюбия Своего. Церквы исполнися славы Твоея, Владыко, юже яко дверь показал еси небесную на земли, в ней же молим Ти, глаголюще: “Господи, призри с небеси и вижь и посети винограда Своего, и сверши, еже насади десница святая Твоя. Всех бо очи, Владыко, на Тя уповають, Твоея милости чающе и щедрот, хвалы и пения всылаемь славе Твоей. Прослави Сам славою уповающих на Тя, многоименитого Бога и Спаса нашего. Ты бо, имея престол небо, подножие же землю, призри милостивныма Своима очама на вся люди, уповающая на Тя и на Пречистую Твою Матерь и на вся святыя Твоя, иже пострадаша за имя Твое о нас грешных, моления Тебе приносящих”». Аз же написах Ти се повелениемь цесаря Мануила и всего причта церковьнаго, да празднуемь вси обьще месяца августа 1 день в славу Святыа Троица. Аминь.

В различных сборниках (преимущественно Прологах) это Слово встречается как без добавлений, так и с различными продолжениями.

Без добавлений в Прологах, в том числе ранних, напр.: РГБ. Рогож. № 511 первой трети XV в.; РГБ. Больш. № 188 первой половины XV в. Различные продолжения представлены несколькими разновидностями памятника.

2а. Первая разновидность («Установление о постах») встречается в самом раннем Прилуцком Прологе: РНБ. СПбДА A.I.264 Т. 2 — первой четверти (начала?) XV в., где, правда, первые 17 строк продолжения выскоблены; см.: Лосева О.В. Жития русских святых в составе древнерусских Прологов XII — первой трети XV вв. М., 2009. С. 444–448 (утраченный фрагмент восстанавливается по Прологу РГБ. Болып. № 195 50-х гг. XVI в.).

Данное продолжение печатается (по списку РГБ. Больш. № 195) по изданию: Конявская Е.Л. К истории сложения проложнои статьи на 1 августа//Древняя Русь. Вопросы медиевистики. 2012. № 1 (47). С. 8:

…да празднуем вси обще месяца августа в 1 день в славу Святыя Троица Отца и Сына.

Заповедь святых отець кануном и праздником, како говети всем христианом правоверъным.

Ведомо буди вам, о чада, святии и апостоли и вселеньская церкви преда нам говенье августа месяца в 1-й день августа: не ести мяс ни рыб до Успениа Святыя Богородица. Болше же суще крестияном, аще в который день причтется праздник Честныя Святыя Богородица в среду или в пяток, не яс[ти] мяс, но Пречистыя ради Богородица емы рыбы; межу же святым говеньем есть святое Преображенье Господа Бога и Спаса нашего, в который день причтется, аще в суботу или в неделю, ту всю 15 дни не ясть мяс августа месяца. Говенье велико уставиша святии отцы во имя единосущныя Троица.

Как отмечает Е.Л. Конявская (Там же), это добавление частично текстуально совпадает с т. н. «Правилом» митр. Максима.

Ср.:

«Ведомо буди вам, чада, святии апостоли и вселенская церкви святая не преда нам по всяку среду и пяток ясти мяса, или сыр, или млеко… Посем же уставиша говение августа месяца до Успения Святыя Богородица, а в 1 августа не ясти мяса, в который день причтется не ясти рыбы. Болше ж суще християном, аще и причтется праздник Святя Богороидца в среду или в пяток, не ясти мяса, но Пречистыя ради Богородица ямы рыбу. Между святым говением есть и святое Преображение Господа Бога и Спаса нашего Иисуса Христа; в который день причтется не ясти мяса и сию; 15 днии не ясти мяса августа месяца, говение велико уставиша святии отцы…»

(Цит. по: Макарий (Булгаков), митр. История Русской Церкви. Кн. 3. М., 1995. С. 447.)

По мнению Е.Л. Конявской (Указ. соч. С. 9), «очевидно, что книжник, присоединивший текст о постах к проложнои статье на 1 августа, использовал какую-то иную версию полного текста, который, возможно, потом стал приписываться митрополиту Максиму».

2 б. Второе продолжение — «Слово о милости Божией» Андрея Боголюбского. встречающееся как самостоятельный памятник. В состав данного Слова на 1 августа оно включено в целом ряде рукописей. Вводится фразой:

…Аз же написах ти се повелениемь царя Мануила и всего причта церковнаго, да празднуим вси обще месяца августа 1 день Вседержителя Господа Бога нашего Человеколюбца, и милостью и Святыя Его Матере благодатию заступляеми от всех бед и болезни и от враг видимых и невидимых… (и т. д., см. Приложение 1).

Издано (только окончание, по списку Унд. № 228, конца XV в.): Конявская Е.Л. К истории сложения проложной статьи на 1 августа. С. 11, а также полностью (по списку ГИМ. Забелин. № 369): Забелин И.Е. Указ. соч. С. 46–47.

2в. Третье продолжение (Поучение на праздник 1 августа) встречается в рукописях: РГБ. Егор. № 921 (окончание издано: Кучкин В. А., Сумникова Т.А. Указ. соч. С. 499, прим. 51.); РНБ. F.I.257; РГБ. Рум. №397;ГАТО.№ 1153.

Печатается (по списку РНБ. F.I.257: из Толстовского собр., сборник житий и поучений, сер. XVI в.) по изданию: Конявская Е.Л. К истории сложения проложной статьи на 1 августа. С. 12:

…Аз же написах се повелением царя Мануила и всего причта церьковнаго, да празднуем вси обще месяца августа в 1 день в славу Святыя Троица Отца и Сына и Святаго Духа, нарица-емаго в три имени, а не в три богы, но в единаго Бога Спаса нашего Исуса Христа и Пречистыа Его Матере Преблагосло-веныя Владычиця нашея Богородиця и Приснодевица Мариа, празднуем с любовию. Мир и любовь попромежю себе имуще, и милостынею убогыя наделяюще, с свещами к церкви текуще на святое пение, от всех дел удаляющеся, а страху Божию внимающе с боязнию. Аще прибудем в добрых делех, то милости Божиа сподобимся. Аще время испустим, а другое не сведаем, в кое время пойдем к Всемогущему Судии, а нашя дела вся пред нами написана будут, еже кто что створил, то въсприим-уть кыиждо по делом своим. Въсприимут праведници жизнь вечную, а грешници муку вечную. Да мы, братие, малии и ве-лиции, прежде того дне суднаго въсприимем добрая дела и не-постыдни обрящемся на Страшнем судищи и милостив глас услышим от Всемилостиваго Спаса нашего Исуса Христа, да Того праздник и Пречистеи Его Матере, и вся праздникы Господня празднуем честно. Тому подобает честь и покланяние Отцу и Сыну и Святому Духу всегда и ныне и присно и въ ве-кы веком. Аминь.

2г. Четвёртое продолжение включает в себя молитву от имени автора, обращенную к Спасителю. Фрагмент печатается (по списку Син. № 556, сборник XV–XVI вв.) по изданию В.О. Ключевского (Сказание о чудесах Владимирской иконы Божией Матери / Изд. Общества любителей древней письменности. Вып. 30. СПб., 1878. С. 21–26; данный фрагмент с дополнением: С. 25–26):

…и на вся святы Твоа, иже пострадаша за имя Твое святое, и о нас грешных, молитвы Тобе приносящих, приими, Господи, и направь ны, Господи, на стезю покаяния. Подай нам, Господи, время преже коньчины смертныя, да быхом ся покаяли. Потерьпи ны, Господи, не прогневайся на [нас] грех ради наших. И мне грешному дай, Господи, преже конца покаание, зане согреших паче Содома и Гомора, прогневах Твое человеколюбие и отгнах от себе аггела, хранителя моего. Аз же написах повелением царя Мануила и всего причта церковнаго, да празднуем вси обще месяца августа в 1 день в славу единосущьныя и неразделимыя Троица Отца и Сына и Святаго Духа всегда и ныне и присно и въ векы веком. Аминь.

2д. Сокращённый вариант Слова о празднике 1 августа сохранился в сборнике митрополичьих грамот: ГИМ. Син. № 562. Печатается по изданию: Русский феодальный архив XIV — первой трети XVI века / Текст подг. А.И. Плигузов, Г.В. Семенченко, Л.Ф. Кузьмина; под ред. В.И. Буганова. М., 1987. Ч. 3. С. 535–536:

Августа в 1 день. Происхождение честнаго креста

Ведети подобает о сем Пантократом дни, в он же милости Божия празнуем Всемилостиваго Спаса нашего Исуса Христа и Пречистыя Его Матере и честнаго креста происхожение.

Благочестивому и благоверному царю Мануилу Царяграда и христолюбивому князю Андрею Георгиевичю Ростовъскому уставивше се праздновати с царем Мануилом. Повеление Лукы, патриарха Царяграда, и митрополита Констянтина всеа Руси, и Нестера, епископа ростовскаго. Мануилу царю мирно и в братолюбии живущу с благоверным и христолюбивым князем Андреем Георгиевичем. Случи же ся им в един день изыти на брань: благочестивому царю Мануилу на срацыны из Царяграда, а христолюбивому князю Андрю на болгары из Ростова. Обычай же имяше князь Андрей: егда на брань идяше чистою душою, икону Пречистыя Владычица нашея Богородица и Приснодевица Мария и честный крест прозвитера два в священных ризах ношаху. И ту приимаше святых тайн, плоти и крови Господня, и сущий с ним, глаголя сице: «Пресвятая Госпоже, Владычице Богородице, рожшия Христа Бога нашего, уповаяй на Тя всяк не погибнет. Тем же и аз, грешный раб Твой, имею Тя стену и покров, и крест Сына Твоего оружие на враги обоюдуостро, и огнь попаляа лица противных наших, хотящих с нами брани». И падше вси на колену пред пречистым образом Святыа Богородица и со слезами целующе икону Святыа Богородица и честный крест. И Божиею милостию взяша тогда четыре грады болгарскыя, а пятой Пряхимон на Каме. И сице одолев болгар и возвратися от сечя. И все виде-ша лучя огнены от иконы Спаса нашего Бога и Владыкы. Весь полк его окрест озари. Он же, возвратився опять, залити повеле грады их огнем и положите землю ту пусту. А прочий грады осади и дань повеле имати с них. Такожде и благочестивый царь Мануил греческый одоле срацыны и то же видение виде во един день, августа 1 день. И праздновати уставиша честному кресту милость Божию и человеколюбие.

 

Приложение 3.

Сокращённая редакция Жития князя Андрея Боголюбского

Издаётся по списку XVIII или XIX в.: ГИМ. Увар. № 2081. Л. 16–31 об. Тетрадь с Житием вплетена в сборник-конволют 1830–1840-х гг., включающий в себя рукописи разного формата, написанные в разное время разными почерками; по крайней мере часть из них происходит из Флорищевой пустыни на реке Лух, недалеко от города Гороховца (в нынешней Нижегородской области). Две рукописи до 1830–1840-х гг. принадлежали иноку этой обители Михаилу, жившему прежде в муромском Благовещенском монастыре (Л. 15 об., 100 об.). Описание сборника: Леонид (Кавелин), архим. Систематическое описание славяно-русских рукописей собрания гр. А.С. Уварова. 4.4. М., 1894. С. 460–461.

Житие святаго и благоверна! о великаго князя и страстотерпца Андреа Георгиевича Боголюбскаго чудотворца

Бяше сей благоверный и великий князь Андрей Георгие-вичь Боголюбский самодержец, сын великаго князя Георгия Владимировича Долгорукаго. Сей святый великий князь Андрей, яко крин, цветяше в добропребываниих день и нощь, // (Л. 16 об.) преспевая в законе Господни. Родитель же его великий князь Георгий поиде из Вышеграда и сяде на великом княжении в преименитом граде Киеве, на свое же место посади в Вышеграде сына своего боголюбиваго князя Андреа. В некое время сей великий князь помысли господствовати во граде Ростове. Беседующу же ему и разглагольствующу о святых иконах с боляры своими, от них же поведа ему един о образе чудотворном Пресвятыя Богородицы. По претечении от // (Л. 17) создания мира шести тысящ шести сот пятидесяти лет при державе родителя сего святаго и великаго князя Андреа Георгиевича Боголюбскаго принесен бысть той святый и чудотворный образ из Царяграда в царственный град Киев некоторым христолюбивым мужем чина купеческаго, Пирогощею зовомым, и поставлен бысть в киевской державе в Вышеграде в девичье монастыре, и тако той святый и чудотворный образ в том монастыре некая лета пре6ы//(Л. 17об.) ваше и преест[ест] венная чудеса подаваше всем, с верою приходящим, от них же зде некая да рекутся.

В некое время клирицы обители тоя, входяще в церковь, видеша той богородичный чудотворный образ стоящ о себе кроме святыя трапезы, и начаша оттоле бывати различная чудеса. Сие же клирицы тии видяще, недоумевахуся и ужасахуся, не ведяху бо где сама Богоматерь изволит своему образу жилище // (Л. 18) избрати. Си вся слышав, Боголюбец святый и великий князь Андрей мысль же в себе имея, еже господст[в]овати во граде Ростове, надеяся на милостивыя щедроты Богоматерни, яко и тамо Пресвятая Богоматерь образом своим святым чудодействова имать, и разгореся сердечною любовию тече скоро в девичий монастырь и вниде во святую церковь, помолися умиление, и нача// (Л. 18об.) по святым иконам с сердечною любовию и страхом взирати. И абие узре той святый и чудотворный Пресвятыя Богоматере образ, светящей зраком божественнаго подобия паче инех икон, стоящих в церкви, и страхом великим одержим пал на землю пред тем чудотворным Богоматерним образом. И моляшеся на долг час со слезами, и по молитве востав, приступи ко образу // (Л. 19) Пресвятыя Богородицы, простер руце свои, прикоснуся тому чудотворному Пресвятыя Богородицы образу, взем же с места и понесе из церкви, яко некое безценное сокровище. Не возвести же сего благочестивому отцу своему великому князю Георгию Владимировичу, в Киеве ему пребывающу, яко той образ хотяше взяти с собою, послушав злолукаваго совета ближних своих боляр окаянных Кучковичев. И тако нощию изыде из Вышеграда с княгинею своею и с чады, // (Л. 19 об.) с боляры и со многими людми, взем же с собою из Вышеграда иереа Николая и зятя его диакона Нестора с женами их и детми. И тако идяху путем, молебная совершающе, и яко приидоша к реце Вузе нарицаемей, ей же зело наводнишейся, посла великий князь Андрей человека на коне в реку испытати броду, и той человек утопе в реце и невидимь бысть. Благоверный же великий князь Андрей пад пред чудотворным образом, моляся Пресвятей Богородице со // (Л. 20) слезами умиление и себе повинна творя утоплению человека. И по молитве (о дивство, братие!) изыде человек той из реки на коне ничим же вредим, жезл в руце своей. Потом приидоша на Рогожския поля, и вышереченнаго иерея Николая жена сниде с колесницы, и диаволим действом конь в ко[ле]снице разсвирепевся и сверже с себе иереева раба и изломи ему ногу, жену же иерееву ногами топташе и зубы грызяше и влачаше ю по земли, дондеже сотвори // (Л. 20 об.) ю мертву. Пресвитер же от горести сердечныя тече и возвести сие великому князю. И приидоша ко образу Пресвятыя Богородицы, начата со слезами молитися, падше вси на землю, и в том часе здрави быша жена иереева и раб, и никаковаго же вреда от того биения обретеся от них.

По изшествии великаго князя Андрея из Вышеграда родитель его благоверный князь Георгий Владимировичь в сие же лето преставися ко Господу и положен в Киеве. Остави же все самодержавие Российское сыну своему сему великому князю // (Л. 21) Андрею.

Идый же великий князь Андрей предприятым своим путем, и быв во Владимире, идеже с велию честию сретоша его с чудотворным Пресвятыя Богородицы образом вси граждане от мала и до велика, и поиде из Владимира к Ростову. И достиже вниз по реце Клязме от Владимира яко седмь поприщ, и на том месте бывши, и под тем чудотворным Пресвятыя Богородицы образом кони сташа и ни мало поступиша с места. Великий же князь Андрей нача о том дивитися и ужасатися и повеле иныя кони // (21 об.) сильнейшия привести на пременение первых коней. И быша по обычаю впряжены под то же возило, на нем же чудотворный Пресвятыя Богородицы образ стояше, но и тии кони такожде понуждаеми и биени бывше, никако же с места поступиша того могоша. Сие чудо великий князь Андрей видя, яко кони не могут со образом двигнутися с места того, ужасом велиим одержим бе, чудяся необычному действу, и повеле иных коней множество привести и впрящи // (Л. 22), обаче и по сих ничтоже успе. И нача велми плаката и тужити, помышляя яко за некое его прегрешение не хощет Пресвятая Богородица образа своего в Ростове поставити; обаче весь страх отложив и отчаяние отринув, того ради всю свою надежду на Господа Бога и на Пречистую Его Богоматерь возложив и ревностию разжегся, повеле иерею на том месте пред чудотворным Пресвятыя Богородицы образом молебное пение совершити, во время же то и сам пред образом Пресвятыя Богородицы паде на землю и со слезами // (Л. 22 об.) нача молитися, обещеваяся на том месте церковь каменную поставити и украсити ю, елико ему мощно. По молебном же пении великий князь Андрей вниде в шатер свой и пад на землю, нача со слезами пред святыми иконами молитися. И молящуся ему со слезами умиление, явися сама Пресвятая Богородица, теплая о всем мире предстательница, очевидне в шатре его стоящая, в единой руце хартию держащая. И рече ему: «Не хощу да образ мой несеши в Ростов, но постави его во // (Л.23) Владимире, а на сем месте во имя моего Рожества церковь каменную воздвигни и обиталище иноком состави». И воздвигши свои божественнии руце ко образу Владычню, невидима бысть.

Великий же князь Андрей от всего своего сердца и души весь распалився неизреченною радостию и пад на землю, усерднейшее приношаше благодарение Всевышнему Богу и Пренепорочной Его Богоматере и скоро повеле на том месте, идеже сподобися видети // (Л, 23 об.) Небесную Царицу, во имя Ея Пресвятого Рожества церковь каменную заложити. И призва искуснейших изографов, повеле образ Пресвятыя Богородицы таковым подобием, якоже явися ему, боголепне написати. Изъографи же написавше образ Пресвятыя Богородицы, яко же повеле им великий князь, и принесоша к нему. Он же видев той святый Пресвятыя Богородицы образ, пад пред ним на землю, моляся со слезами, благодарствующи Бога и // (Л. 24) скорую свою помощницу и заступницу, всех же уверяющи, яко таковым подобием точно сподобися видети явлшуюся ему Царицу Небесную. За помощию же Пресвятыя Богородицы и церковь каменную на показанном Богоматерию месте соверши, в ней же чудотворный Пресвятыя Богородицы образ, иже из Вышеграда принесе с собою, и новонаписанный в подобие явлшияся ему Богоматере образ, нареченный Боголюбивыя, постави. И освяти оную церковь, устави же того чуда // (Л. 24 об.) праздник праздновати по вся лета месяца иуния в 18 день, на память святаго мученика Леонтия. И сего ради преславнаго и чудеснаго Божия Матере явления великий князь Андрей нарече место то Боголюбимое, и оттоле же и сам прозвася Боголюбский. Потом же ту град построив и двор свой княжий близ новосозданныя Рожества Пресвятыя Богородицы церкви постави, и велми оно место любляше и // (Л. 25) живяше ту.

Таже поиде во град Суждаль, да и тамо обветшавшия церкви Божия возобновит. Пребывающу же ему тамо, и святыя церкви, такожде и град усердие обновляющу, менший его и любимый сын Глеб Андреевичь двадесятолетьн сый ко Господу отиде. Егда же уведа кончину любимейшаго своего сына, велми опечалися и поиде из Суждаля во Владимирь и с великою горестию и слезами погребе тело сына // (Л. 25об.) своего в церкви Успения Пресвятыя Богородицы златоверхой. Последи же прослави его Бог нетлением телеси и чудотворением, якоже ныне видим приходящим бо с верою к честным мощам его, источает чудеса. Потом же печалию одержимый поиде великий князь для утоления тоя в любимый свой град и обитель Боголюбскую и пребываше тамо всегда при образе Пресвятыя Богородицы, иже явися ему на том // (Л. 26) месте. Взираше же на образ Пресвятыя Богородицы, утешашеся о печали, поминая очевидное Пресвятыя Бгородицы посещение, и яко на самую Ея взирая, и велию отраду от скорби обретая, не отхождаше от церкве, но по[с]том и молитвою укреплен, пребываше при образе том, выну день и нощь моляся.

Бяху же у сего великаго князя Андрея ближний его и любимии боляре, зовови Кучковичи, [з]лии советницы диаволи. Сии прежде своим // (Л. 26 об.) лукавым советом увещаша его великаго князя, еже без отеческаго повеления взяти из Вышеграда чудотворный Пресвятыя Богородицы образ. Сии окаяннии Кучковичи, надеющийся на милости к себе великаго князя, неподобная содеваху. В них же бяше един, зовомый Иоаким Кучковичь; его же брат присный некия ради вины ят бысть и по градскому закону казнь восприя. Сия слыша Иоаким, и абие вселися в него // (Л. 27) сатана, и тече ко братии и сродником своим, злым советником сатанинским, и вопия к ним, глаголя: «Се днесь князь предал есть казни брата нашего, а заутра такожде и нас казнити имать. Да отмстим вскоре князю нашему». И тако окаяннии совет сотвориша и уготовашася на убиение великаго князя. Бе же таковому убийству первейший злоначалницы // (Л. 27 об.) Иоаким Кучковичь да зять его Петр, Анбал ключник Ясиня и Ефрем Моузовитин; всех же окаянных убийц числом бяше двадесять человек.

Великому убо князю в Боголюбове бывшу в великокняжеском своем доме, яже приделан бысть к церкви Рожества Пресвятыя Богородицы, идеже и ныне Божиею милостию и заступницы христианския видими суть, от молитвеннаго своего труда // (Л. 28) почивающу. Окаяннии убийцы, дождавшися нощи, собрашася и вземше кииждо оружие свое, пришедше ко двору княжиему. Бывших у врат и во дворе стоящих у сеней стражей побиша и двери выломавше, приидоша к ложнице его, идеже великий князь бяше с единым точию малым отроком и спяше. Окаяннии же убийцы у ложницы великаго князя при дверех лестию вопияху: «Господине великий княже!» Князь же услышав, рече: «Ты кто еси?» Убийцы // (Л. 28 об.) рекоша: «Прокопий». Князя же великаго услышавше окаяннии глас, начаша сильно бити в двери, и отбивше их, выломаша. Великий же князь скочи с постели своея и хотя взяти мечь, иже бе у него в ложнице сродника его великаго князя Бориса, и не обрете того меча, понеже мечь той из ложницы вынесе тайно ключник его Анбал. Два же окаяннии убийцы вскочиша в ложницу его и яша великаго князя. Он же единаго их поверже себе под ноги, а с другими нача братися крепко. Потом и прочий убийцы // (Л. 29) въскочиша в ложницу, и мневше великаго князя повержена на земли лежаща, и убиша подруга своего. Потом же познавше великаго князя и бияхуся с ним. Бе бо великий князь силен велми, и многими мечми изсекоша и сулицами пронзоша его. Мняще же мертва быти, оставиши его тако, вземше подруга своего, его же убиша под великим князем, и понесоша его вон. Великий же князь от болезни ран вскочи и потече за ними вслед из ложницы своея. Не могий же от толиких ран далее тещи, уклонися // (Л. 29 об.) под сени за лествицу и стеняше. Они же слышавше стенание его, вспять возвратишася, ищуще убити его, глаголюще друг ко другу: «Погибохом мы, яко великий князь жив есть». И вжегше свещи, поидоша по следу крови и обретоша его за десницею, на земли седяща, со стенанием воздыхающа и молитву творяща. Окаянный же убийца, Кучковых зять Петр, отсече ему десную руку, прочий же убийцы сбодоша его.

И тако святый благоверный // (Л. 30) великий князь Андрей Боголюбский, истинный хранитель заповедей Господних, доброревностный строитель святых церквей, чистейшую свою и святую душу предаде в руце Божий в лето 6683-го года месяца иуния против 29 дня в нощи на память святых и первоверховных апостол Петра и Паула.

Во утрий же день боголюбовския клирицы обретоша сего благовернаго князя Андреа тело под сенми всего уязвенна // (Л. 30 об.) я в крови лежаща на земли мертва, и вземше честное и святое тело его, внесоша в церковь Рожества Пресвятыя Богородицы, юже сам созда, и положиша его во гроб каменный. Узнавше же сие во граде Владимире, идоша священницы с диаконы и клирошанами великия соборныя церкви Пресвятыя Богородицы и весь град в Боголюбимый град, вземше честное и святое тело его со псалмы и песнми, с кандилы // (Л. 31) и многими возженными свещами, понесоша на главах своих во град Владимирь, и яко в Боголюбове, тако на пути, и во Владимире от мощей его святых многая чудеса и исцеления быша. Положиша его во Владимире в соборной церкви Успения Пресвятьы Богородицы, яже бе им создана, иулия в 5 день, торжество же памяти его уставиша праздновати по вся лета месяца иулия в 4 день.

Такова бяше благовернаго сего князя житие, такова того // (Л. 31 об.) изрядная и преславная чудеса, их творит неоскудно, и творя не престает и до сего дне, их же ради всех буди Богу нашему слава ныне и присно и во веки веков. Аминь.