Чудодейственная сила материнской молитвы

Михалицын Павел Евгеньевич

Акафисты и молитвы перед чтимыми иконами Пресвятой Богородицы и святых угодников Божиих

 

 

Акафист Пресвятой Владычице нашей Богородице и Приснодеве Марии

 

Кондак 1

Взбранной Воеводе победительная, яко избавльшеся от злых, благодарственная восписуем Ти раби Твои, Богородице, но яко имущая державу непобедимую, от всяких нас бед свободи, да зовем Ти: радуйся, Невесто Неневестная.

 

Икос 1

Ангел предстатель с небесе послан бысть рещи Богородице: радуйся, и со безплотным гласом воплощаема Тя зря, Господи, ужасашеся и стояше, зовый к Ней таковая:

Радуйся, Еюже радость возсияет;

радуйся, Еюже клятва изчезнет.

Радуйся, падшаго Адама воззвание;

радуйся, слез Евиных избавление.

Радуйся, высото неудобовосходимая человеческими помыслы;

радуйся, глубино неудобозримая и ангельскима очима.

Радуйся, яко еси Царево седалище;

радуйся, яко носиши Носящаго вся.

Радуйся, Звездо, являющая Солнце;

радуйся, утробо Божественнаго воплощения.

Радуйся, Еюже обновляется тварь;

радуйся, Еюже покланяемся Творцу.

Радуйся, Невесто Неневестная.

 

Кондак 2

Видящи Святая Себе в чистоте, глаголет Гавриилу дерзостно: преславное твоего гласа неудобоприятельно души Моей является: безсеменнаго бо зачатия рождество како глаголеши, зовый: Аллилуиа.

 

Икос 2

Разум недоразумеваемый разумети Дева ищущи, возопи к служащему: из боку чисту Сыну како есть родитися мощно, рцы Ми? К Нейже он рече со страхом, обаче зовый сице:

Радуйся, совета неизреченнаго Таиннице;

радуйся, молчания просящих веро.

Радуйся, чудес Христовых начало;

радуйся, велений Его главизно.

Радуйся, лествице небесная, Еюже сниде Бог;

радуйся, мосте, преводяй сущих от земли на небо.

Радуйся, Ангелов многословущее чудо;

радуйся, бесов многоплачевное поражение.

Радуйся, Свет неизреченно родившая;

радуйся, еже како, ни единаго же научившая.

Радуйся, премудрых превосходящая разум;

радуйся, верных озаряющая смыслы.

Радуйся, Невесто Неневестная.

 

Кондак 3

Сила Вышняго осени тогда к зачатию Браконеискусную, и благоплодная Тоя ложесна, яко село показа сладкое, всем хотящим жати спасение, всегда пети сице: Аллилуиа.

 

Икос 3

Имущи Богоприятную Дева утробу, востече ко Елисавети: младенец же оноя абие познав Сея целование, радовашеся, и играньми яко песньми вопияше к Богородице:

Радуйся, отрасли неувядаемыя розго;

радуйся, Плода безсмертнаго стяжание.

Радуйся, Делателя делающая Человеколюбца;

радуйся, Садителя жизни нашея рождшая.

Радуйся, ниво, растящая гобзование щедрот;

радуйся, трапезо, носящая обилие очищения.

Радуйся, яко рай пищный процветаеши;

радуйся, яко пристанище душам готовиши.

Радуйся, приятное молитвы кадило;

радуйся, всего мира очищение.

Радуйся, Божие к смертным благоволение;

радуйся, смертных к Богу дерзновение.

Радуйся, Невесто Неневестная.

 

Кондак 4

Бурю внутрь имея помышлений сумнительных, целомудренный Иосиф смятеся, к Тебе зря небрачней, и бракоокрадованную помышляя, Непорочная; уведев же Твое зачатие от Духа Свята, рече: Аллилуиа.

 

Икос 4

Слышаша пастырие Ангелов, поющих плотское Христово пришествие, и текше, яко к Пастырю, видят Сего яко агнца непорочна, во чреве Мариине упасшася, Юже поюще реша:

Радуйся, Агнца и Пастыря Мати;

радуйся, дворе словесных овец.

Радуйся, невидимых врагов мучение;

радуйся, райских дверей отверзение.

Радуйся, яко небесная срадуются земным;

радуйся, яко земная сликовствуют небесным.

Радуйся, апостолов немолчная уста;

радуйся, страстотерпцев непобедимая дерзосте.

Радуйся, твердое веры утверждение;

радуйся, светлое благодати познание.

Радуйся, Еюже обнажися ад;

радуйся, Еюже облекохомся славою.

Радуйся, Невесто Неневестная.

 

Кондак 5

Боготечную звезду узревше волсви, тоя последоваша зари, и яко светильник держаще ю, тою испытаху крепкаго Царя, и достигше Непостижимаго, возрадовашася, Ему вопиюще: Аллилуиа.

 

Икос 5

Видеша отроцы халдейстии на руку Девичу Создавшаго руками человеки, и Владыку разумевающе Его, аще и рабий прият зрак, потщашася дарми послужити Ему, и возопити Благословенней:

Радуйся, Звезды незаходимыя Мати;

радуйся, заре таинственнаго дне.

Радуйся, прелести пещь угасившая;

радуйся, Троицы таинники просвещающая.

Радуйся, мучителя безчеловечнаго изметающая от начальства;

радуйся, Господа Человеколюбца показавшая Христа.

Радуйся, варварскаго избавляющая служения;

радуйся, тимения изымающая дел.

Радуйся, огня поклонение угасившая;

радуйся, пламене страстей изменяющая.

Радуйся, верных наставнице целомудрия;

радуйся, всех родов веселие.

Радуйся, Невесто Неневестная.

 

Кондак 6

Проповедницы богоноснии, бывше волсви, возвратишася в Вавилон, скончавше Твое пророчество, и проповедавше Тя Христа всем, оставиша Ирода яко буесловна, не ведуща пети: Аллилуиа.

 

Икос 6

Возсиявый во Египте просвещение истины, отгнал еси лжи тьму: идоли бо его, Спасе, не терпяще Твоея крепости, падоша, сих же избавльшиися вопияху к Богородице:

Радуйся, исправление человеков;

радуйся, низпадение бесов.

Радуйся, прелести державу поправшая;

радуйся, идольскую лесть обличившая.

Радуйся, море, потопившее фараона мысленнаго;

радуйся, каменю, напоивший жаждущия жизни.

Радуйся, огненный столпе, наставляяй сущия во тьме;

радуйся, покрове миру, ширший облака.

Радуйся, пище, манны приемнице;

радуйся, сладости святыя служительнице.

Радуйся, земле обетования;

радуйся, из неяже течет мед и млеко.

Радуйся, Невесто Неневестная.

 

Кондак 7

Хотящу Симеону от нынешняго века преставитися прелестнаго, вдался еси яко младенец тому, но познался еси ему и Бог совершенный. Темже удивися Твоей неизреченней премудрости, зовый: Аллилуиа.

 

Икос 7

Новую показа тварь, явлься Зиждитель нам от Него бывшим, из безсеменныя прозяб утробы, и сохранив Ю, якоже бе, нетленну, да чудо видяще, воспоем Ю, вопиюще:

Радуйся, цвете нетления;

радуйся, венче воздержания.

Радуйся, воскресения образ облистающая;

радуйся, ангельское житие являющая.

Радуйся, древо светлоплодовитое, от негоже питаются вернии;

радуйся, древо благосеннолиственное, имже покрываются мнози.

Радуйся, во чреве носящая Избавителя плененным;

радуйся, рождшая Наставника заблудшим.

Радуйся, Судии праведнаго умоление;

радуйся, многих согрешений прощение.

Радуйся, одеждо нагих дерзновения;

радуйся, любы, всякое желание побеждающая.

Радуйся, Невесто Неневестная.

 

Кондак 8

Странное рождество видевше, устранимся мира, ум на небеса преложше: сего бо ради высокий Бог на земли явися смиренный человек, хотяй привлещи к высоте Тому вопиющия: Аллилуиа.

 

Икос 8

Весь бе в нижних и вышних никакоже отступи неописанное Слово: снизхождение бо Божественное, не прехождение же местное бысть, и рождество от Девы Богоприятныя, слышащия сия:

Радуйся, Бога невместимаго вместилище;

радуйся, честнаго таинства двери.

Радуйся, неверных сумнительное слышание;

радуйся, верных известная похвало.

Радуйся, колеснице пресвятая Сущаго на Херувимех;

радуйся, селение преславное Сущаго на Серафимех.

Радуйся, противная в тожде собравшая;

радуйся, девство и рождество сочетавшая.

Радуйся, Еюже разрешися преступление;

радуйся, Еюже отверзеся рай.

Радуйся, ключу Царствия Христова;

радуйся, надеждо благ вечных.

Радуйся, Невесто Неневестная.

 

Кондак 9

Всякое естество ангельское удивися великому Твоего вочеловечения делу; неприступнаго бо яко Бога, зряще всем приступнаго Человека, нам убо спребывающа, слышаща же от всех: Аллилуиа.

 

Икос 9

Ветия многовещанныя, яко рыбы безгласныя видим о Тебе, Богородице, недоумевают бо глаголати, еже како и Дева пребываеши, и родити возмогла еси. Мы же, таинству дивящеся, верно вопием:

Радуйся, премудрости Божия приятелище;

радуйся, промышления Его сокровище.

Радуйся, любомудрыя немудрыя являющая;

радуйся, хитрословесныя безсловесныя обличающая.

Радуйся, яко обуяша лютии взыскателе;

радуйся, яко увядоша баснотворцы.

Радуйся, афинейская плетения растерзающая;

радуйся, рыбарския мрежи исполняющая.

Радуйся, из глубины неведения извлачающая;

радуйся, многи в разуме просвещающая.

Радуйся, кораблю хотящих спастися;

радуйся, пристанище житейских плаваний.

Радуйся, Невесто Неневестная.

 

Кондак 10

Спасти хотя мир, Иже всех Украситель, к сему самообетован прииде, и Пастырь сый, яко Бог, нас ради явися по нам человек: подобным бо подобное призвав, яко Бог слышит: Аллилуиа.

 

Икос 10

Стена еси девам, Богородице Дево, и всем к Тебе прибегающим: ибо небесе и земли Творец устрои Тя, Пречистая, вселься во утробе Твоей, и вся приглашати Тебе научи:

Радуйся, столпе девства;

радуйся, дверь спасения.

Радуйся, начальнице мысленнаго наздания;

радуйся, подательнице Божественныя благости.

Радуйся, Ты бо обновила еси зачатыя студно;

радуйся, Ты бо наказала еси окраденныя умом.

Радуйся, тлителя смыслов упраждняющая;

радуйся, Сеятеля чистоты рождшая.

Радуйся, чертоже безсеменнаго уневещения;

радуйся, верных Господеви сочетавшая.

Радуйся, добрая младопитательнице девам;

радуйся, невестокрасительнице душ святых.

Радуйся, Невесто Неневестная.

 

Кондак 11

Пение всякое побеждается, спростретися тщащееся ко множеству многих щедрот Твоих: равночисленныя бо песка песни аще приносим Ти, Царю Святый, ничтоже совершаем достойно, яже дал еси нам, Тебе вопиющим: Аллилуиа.

 

Икос 11

Светоприемную свещу, сущим во тьме явльшуюся, зрим Святую Деву, невещественный бо вжигающи огнь, наставляет к разуму Божественному вся, зарею ум просвещающая, званием же почитаемая сими:

Радуйся, луче умнаго Солнца;

радуйся, светило незаходимаго Света.

Радуйся, молние, души просвещающая;

радуйся, яко гром враги устрашающая.

Радуйся, яко многосветлое возсияваеши просвещение;

радуйся, яко многотекущую источаеши реку.

Радуйся, купели живописующая образ;

радуйся, греховную отъемлющая скверну.

Радуйся, бане, омывающая совесть;

радуйся, чаше, черплющая радость.

Радуйся, обоняние Христова благоухания;

радуйся, животе тайнаго веселия.

Радуйся, Невесто Неневестная.

 

Кондак 12

Благодать дати восхотев, долгов древних, всех долгов Решитель человеком, прииде Собою ко отшедшим Того благодати и, раздрав рукописание, слышит от всех сице: Аллилуиа.

 

Икос 12

Поюще Твое Рождество, хвалим Тя вси, яко одушевленный храм, Богородице: во Твоей бо вселився утробе содержай вся рукою Господь, освяти, прослави и научи вопити Тебе всех:

Радуйся, селение Бога и Слова;

радуйся, святая святых большая.

Радуйся, ковчеже, позлащенный Духом;

радуйся, сокровище живота неистощимое.

Радуйся, честный венче людей благочестивых;

радуйся, честная похвало иереев благоговейных.

Радуйся, церкве непоколебимый столпе;

радуйся, Царствия нерушимая стено.

Радуйся, Еюже воздвижутся победы;

радуйся, Еюже низпадают врази.

Радуйся, тела моего врачевание;

радуйся, души моея спасение.

Радуйся, Невесто Неневестная.

 

Кондак 13

О Всепетая Мати, рождшая всех святых Святейшее Слово! Нынешнее приемши приношение, от всякия избави напасти всех, и будущия изми муки, о Тебе вопиющих: Аллилуиа.

Этот кондак читается трижды; затем икос 1 и кондак 1.

 

Молитвы ко Пресвятой Богородице

 

Молитва первая

О Пресвятая Госпоже Владычице Богородице, вышши еси всех Ангел и Архангел, и всея твари честнейши, помощнице еси обидимых, ненадеющихся надеяние, убогих заступнице, печальных утешение, алчущих кормительнице, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице Владычице, милостию Твоею спаси и помилуй святейшия патриархи православныя, преосвященныя митрополиты, архиепископы и епископы и весь священнический и иноческий чин, и вся православныя христианы ризою Твоею честною защити; и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги наша. О Всемилостивая Госпоже Владычице Богородице! Воздвигни нас из глубины греховныя и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от напрасныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечнии, еже ко спасению; и сподоби ны, грешныя рабы Твоя, Царствия Сына Твоего, Христа Бога нашего, яко держава Его благословенна и препрославлена со Безначальным Его Отцем, и с Пресвятым и Благим и Животворящим Его Духом, ныне и присно, и во веки веков. Аминь.

 

Молитва вторая

О Пресвятая Дево, Мати Господа, Царице Небесе и земли! Вонми многоболезненному воздыханию души нашея, призри с высоты святыя Твоея на нас, с верою и любовию покланяющихся пречистому образу Твоему. Се бо грехми погружаеми и скорбьми обуреваемии, взирая на Твой образ, яко живей Ти сущей с нами, приносим смиренныя моления наша. Не имамы бо ни иныя помощи, ни инаго предстательства, ни утешения, токмо Тебе, о Мати всех скорбящих и обремененных. Помози нам немощным, утоли скорбь нашу, настави на путь правый нас, заблуждающих, уврачуй и спаси безнадежных, даруй нам прочее время живота нашего в мире и тишине проводити, подаждь христианскую кончину, и на страшнем суде Сына Твоего явися нам милосердая Заступница, да всегда поем, величаем и славим Тя, яко благую Заступницу рода христианскаго, со всеми угодившими Богу. Аминь.

 

Акафист Пресвятой Богородице перед иконой Ея, именуемой «Владимирская»

 

Кондак 1

Взбранной Воеводе, Заступнице нашей, взирающе на первописанный образ Твой, хвалебное пение воспеваем Ти, раби Твои, Богомати. Ты же, яко имущая державу непобедимую, сохрани и спаси благодарне Тебе вопиющия: Радуйся, Пречистая, от иконы Твоея милости нам источающая.

 

Икос 1

Ангельския Силы на Небеси немолчно воспевают Тя, Пречистая, зряще Славу Пребожественную, еюже Сын Твой прослави Тя; но и нас, земных, не оставила еси, яко некую лучу, ниспославши нам икону Твою, святым Лукою первописанную. О ней бо некогда изрекла еси: «С сим образом благодать Моя и сила да пребудут». Темже вернии раби Твои, по вся дни и на всяцем месте сбытие словес Твоих зряще, ко образу Твоему цельбоносному притекаем и, якоже Самей Ти, с нами сущей, вопием:

Радуйся, Ангелов Царице;

радуйся, всего мира Владычице.

Радуйся, на Небеси присно славимая;

радуйся, и на земли величаемая.

Радуйся, благодать Твою иконе Твоей сей даровавшая;

радуйся, на спасение человеков тую поставившая.

Радуйся, Божия благости скорая Подательнице;

радуйся, молений наших усердная Послушнице.

Радуйся, Пречистая, от иконы Твоея милости нам источающая.

 

Кондак 2

Видя чудес множество, от принесенныя в Вышград святыя иконы Твоея бываемое, благоверный князь Андрей возгореся духом и умоляше Тя, да скажеши святую волю Твою и да благословиши его в пределы Ростовския отъити. Темже, улучив желаемое и икону Твою взем, идяше в путь свой, радуяся и поя Богу: Аллилуиа.

 

Икос 2

Разумеша вси людие дивное шествие Твое, Царице Небесная, от Киева в землю Ростовскую, болящии бо исцеляхуся и ина знамения и чудеса бываху всем, с верою притекающим ко образу Твоему. Сего ради воспеша Тебе:

Радуйся, чудесы шествие иконы Твоея знаменавшая;

радуйся, многи немощныя исцелившая.

Радуйся, воздыхания наша не отвергающая;

радуйся, недостойныя молитвы наша приемлющая.

Радуйся, Матерния щедроты Твоя на нас изливающая;

радуйся, иконою Твоею нам благодеющая.

Радуйся, во обстоянии сущим скорую помощь дарующая;

радуйся, отчаянным надежду возвращающая.

Радуйся, Пречистая, от иконы Твоея милости нам источающая.

 

Кондак 3

Силою Твоею ограждаем, благоверный князь Андрей предел Владимирских достиже и зде благую волю Твою, Владычице, позна. В нощном бо видении тому явльшися, повелела еси от места сего не отходити и чудотворную икону Твою зде, во граде Владимире, поставити, да будет Северней стране нашей в благословение и людем Твоим в покров, вопиющим Богу: Аллилуиа.

 

Икос 3

Имея в себе благодатное сокровище, икону Твою Владимирскую, преуспеваше от силы в силу Отечество наше. Во дни бо обстояний и напастей не оставила еси род наш, Владычице, и во благовремении близ была еси, всесильным предстательством Твоим верныя люди Твоя заступающи, поющия Ти:

Радуйся, гнев Божий, праведно на ны движимый, утоляющая;

радуйся, на милость к нам, грешным, Господа преклоняющая.

Радуйся, яко смиренным мольбам рабов Твоих внемлеши;

радуйся, яко утешение Твое нам подати поспешаеши.

Радуйся, яко иконою Твоею от всяких нас бед ограждаеши;

радуйся, яко тою козни вражия разрушаеши.

Радуйся, в час скорби люди Твоя укрепляющая;

радуйся, тихое и безмятежное житие тем дарующая.

Радуйся, Пречистая, от иконы Твоея милости нам источающая.

 

Кондак 4

Бурю помышлений сумнительных пройде благоверный князь Андрей, от множества врагов некогда обстоим: Ты же, Всепетая, дивным от иконы Твоея знамением славную победу тому предвозвестила еси. Темже верою обновився и о имени Твоем дерзая, воспе Богу: Аллилуиа.

 

Икос 4

Слышавше мятежницы убиение благовернаго князя Андрея, град Владимир расхитити устремишася, но икону Твою чудотворную, на стогна града изнесенную, внезапу узревше, умилишася сердцем и на колена падше, во гресе своем покаяшася. Благочестивии же людие, таковому от иконы Твоея благодатному явлению радующеся, песнь благодарственную воспеша Тебе:

Радуйся, междоусобных браней утоление;

радуйся, ожестевших сердец умягчение.

Радуйся, яко заблуждшия на путь правый возвращаеши;

радуйся, яко от соблазнов суетных нас ограждаеши.

Радуйся, пагубы вседушевныя низлагающая;

радуйся, душевредная научения обличающая.

Радуйся, к Царствию Небесному путь невозбранный нам указующая;

радуйся, мир вечный и радость нам подающая.

Радуйся, Пречистая, от иконы Твоея милости нам источающая.

 

Кондак 5

Боготечная звезда отцем нашим бысть икона Твоя, Владычице, еяже светом ведоми, многажды побеждаху царствия, возмогаху от немощи, обращаху в бегство полки чуждих и путь к земному преуспеянию и небесному спасению обретаху. Сего ради по долгу славит Тя земля Российская, поющи Богу: Аллилуиа.

 

Икос 5

Видевше некогда людие владимирстии в чуднем видении град свой на воздусе вознесен и икону Твою верху его, якоже солнце, сияющу, со умилением разумеша, Владычице, неотступный покров Твой граду их и, Твое милостивое промышление о них славяще, воспеша Ти:

Радуйся, Мати милосердия;

радуйся, Источниче чудес.

Радуйся, бодрая наша Хранительнице;

радуйся, граду нашему Покрове.

Радуйся, горе к Небесным сокровищем ум наш возводящая;

радуйся, любовь к Богу в сердцах верных насаждающая.

Радуйся, маловерныя вразумляющая;

радуйся, неверных смыслы просвещающая.

Радуйся, Пречистая, от иконы Твоея милости нам источающая.

 

Кондак 6

Проповедник неизреченных чудес Твоих, Владычице, явися соборный храм Твой во граде Владимире, святою иконою Твоею украшенный. Попущением бо Божиим все благолепие его некогда во огни погибе, икона же святая Твоя, якоже купина неопалима пребысть, да и видевше и осязавше присутствие Твое, вернии воспоют: Аллилуиа.

 

Икос 6

Возсия паки свет иконы Твоея, Богородице, во дни лютаго нашествия Батыева. Аще бо нечестивии агаряне и пожгоша огнем соборный храм Твой и святителя Владимирскаго и люди, молящияся в церкви, умертвиша и вся конечному истреблению предаша, обаче икона Твоя и паки невреждена обретеся, подвизающи пети Тебе:

Радуйся, Купино Неопалимая;

радуйся, Сокровище неиждиваемое.

Радуйся, Стено несокрушимая;

радуйся, Прибежище всем, уповающим на Тя.

Радуйся, икону Твою и во пламени целу сохранив-шая;

радуйся, нам во утешение и спасение тую оставившая.

Радуйся, Ты бо еси наше Защищение;

радуйся, Ты бо еси всех благочестивых непрестанное радование.

Радуйся, Пречистая, от иконы Твоея милости нам источающая.

 

Кондак 7

Хотя великий князь Василий защищение стяжати стольному граду своему, повеле Владимирскую икону Твою в Москву пренести. И во сретение ея усердно исшедше князь и святитель Московский Киприан со освященным Собором и всем множеством людей, до земли пред нею поклонишася, якоже бо Самую Тя, Пречистая, к ним приходящую сретаху, зовуще Тебе: «О Мати Божия, спаси землю Русскую», вкупе же и поюще Богу: Аллилуиа.

 

Икос 7

Новое знамение сотворила еси, Пренепорочная, в день празднования сретения иконы Твоея Владимирския в Москве: в грозном бо видении, яко всемогущая Царица, множеством воинств Небесных обстоима, со святители Московскими явилася еси нечестивому агарянскому хану и от предел земли Русския отъити повелела еси. Тогда вернии людие Твои, врага видевше посрамлена и бежаща, с веселием пояху Тебе:

Радуйся, победо непобедимая;

радуйся, Царице Небесных Сил.

Радуйся, врага грозное посрамление;

радуйся, рабов Твоих Радосте нечаянная.

Радуйся, Надеждо всех лишенных надежды;

радуйся, спасение во дно адово нисшедших.

Радуйся, пришествием иконы Твоея Москву возвеселившая;

радуйся, заступлением Твоим и град Владимир не оставившая.

Радуйся, Пречистая, от иконы Твоея милости нам источающая.

 

Кондак 8

Странную победу всесильною помощию Твоею, Владычице, без брани совершившуюся, и до ныне Церковь Православная светло прославляет. Сретение иконы Твоея Владимирския празднующи и вся верная чада Своя созывающи милости Твоя благодарне исповедати, Сыну же Твоему и Богу пети: Аллилуиа.

 

Икос 8

Всю Тя Бог освяти, Пренепорочная, и яко Матерь Свою в готовое прибежище и теплый покров всем нам дарова. Темже от меньших земли и незнаемых возвеличися благословенный Тобою град Москва, благочестно икону Твою почитаяй; вся бо племена русская воедино собра и область свою над окрестными языки от моря и до моря и даже до конец земли распростре, всем веру Христову возвещаяй, Тебе же вопия:

Радуйся, земли нашея забрало;

радуйся, Церкве утверждение.

Радуйся, молитвенников наших похвало;

радуйся, людей Твоих спасение.

Радуйся, враги наша устрашающая;

радуйся, полки чуждих далече отгоняющая.

Радуйся, яко Тобою Русь Православная содержится;

радуйся, яко Тобою род христианский хвалится.

Радуйся, Пречистая, от иконы Твоея милости нам источающая.

 

Кондак 9

Всякое естество ангельское восхваляет Тя, Богородительнице, у престола Сына Твоего предстоящую и за страну нашу и вся христианы молящуюся. Мы же, людие Твои, молитв Твоих действо разумевающе, к чудотворней иконе Твоей с любовию притекаем и Богу прилежно вопием: Аллилуиа.

 

Икос 9

Витий земных художество не довлеет по достоянию благохвалити Тя, Пресвятая Всенепорочная, и иконы Твоея чудеса исчислити, имиже Церковь Православная величается, грады наша утверждаются и вси христиане Божественне веселятся. Темже за премногую любовь Твою к нам и вся милости Твоя приими от нас сие хвалебное пение:

Радуйся, Собором святых, в стране нашей просиявших, окружаемая и славимая;

радуйся, предстателей наших, чудотворцев российских, моления приемлющая.

Радуйся, ходатайством Твоим о нас Бога умилостивляющая;

радуйся, честным покровом Твоим нас присно осеняющая.

Радуйся, страны нашея преславная Защитнице;

радуйся, призывающим Тя скорая Помощнице.

Радуйся, труждающихся благодатное укрепление;

радуйся, кающихся грешников несумненное спасение.

Радуйся, Пречистая, от иконы Твоея милости нам источающая.

 

Кондак 10

Спасения ищуще, к Тебе прибегаем, Милосердная Мати, и, чудотворную Твою икону ныне обстояще, вся милости Твоя, тою отцем нашим явленныя, с любовию воспоминаем. Да не тщетна будет, Владычице, и наша надежда на Тя, на немощь нашу умилосердися и спаси вопиющия Богу: Аллилуиа.

 

Икос 10

Стена еси и заступление всем с верою прибегающим к Тебе, Всеблаженная Отроковице, всегда бо милости Твоя роду христианскому являла еси и отцем нашим многочастне и многообразне благодеяла еси, от нашествия иноплеменных и от всякия беды и нужды тех избавляющи. Не оскудей и ныне, Владычице, утоляющи лютыя на ны возстания греховныя и облак искушений отжени, Тебе бо навыкохом пети:

Радуйся, Мати Божия, Матернюю любовь к нам, грешным, простирающая;

радуйся, силою Твоею нашу немощь восполняющая.

Радуйся, милосердие Божие разумети нас научающая;

радуйся, к делом милосердия и нас возбуждающая.

Радуйся, страх Божий в сердца верных влагающая;

радуйся, грешники к покаянию призывающая.

Радуйся, невниманию нашему долготерпящая;

радуйся, от сна лености нас возставляющая.

Радуйся, Пречистая, от иконы Твоея милости нам источающая.

 

Кондак 11

Пение похвальное воспеша московстии людие, спасение Твое некогда улучивше: верху бо явльшися, светозарною одеждою одеяна, храм Твой и град Москву от запаления огненнаго ризою Твоею защитила еси. Неотступна пребуди, Всемощная, от места сего и ныне и нам избавление Твое видети даруй, да веселящеся воспоем: Аллилуиа.

 

Икос 11

Свет радости возсияла еси, Владычице, и во дни тыя, егда смотрением Божиим древняя красота церковная к нам паки возвратися и Священный Собор граду Москве Патриарха, всей же стране нашей единаго пастыря и молитвенника утверди. Ты же, Пречистая, от иконы Твоея Владимирския жребий первосвятительства сего избраннику Твоему даровала еси, да расточенныя овцы словеснаго стада Церкве Российския паки воедино соберет. Сего ради вопием Тебе:

Радуйся, скорбящих радосте;

радуйся, обуреваемых Пристанище.

Радуйся, в напастех нас не оставившая;

радуйся, во уничижении нашем свет надежды нам возсиявшая.

Радуйся, на смиренныя призревшая;

радуйся, низшедшия возвеличившая.

Радуйся, Церкве нашея Похвало;

радуйся людей Твоих веселие.

Радуйся, Пречистая, от иконы Твоея милости нам источающая.

 

Кондак 12

Благодать Твою не отыми от нас, милости Источниче, якоже во дни лихолетия святителей наших Иова и Ермогена услышала еси и землю Русскую от конечного расхищения, Православную же веру в ней от истребления спасла еси, да избавленнии Тобою Богу воспоем: Аллилуиа.

 

Икос 12

Поюще неисчетныя милости Твоя, от лет древних роду нашему явленныя и доныне не оскудевающия, хвалим Тя, Пречистая, яко неусыпную Хранительницу нашу и заступление, и Матернюю любовь Твою к стаду Сына Твоего ведуще, со дерзновением, аще и раби неключими есмы, вопием Тебе:

Радуйся, Русь Православную возлюбившая;

радуйся, веру истинную в ней утвердившая.

Радуйся, отцы наша во благочестии сохранившая;

радуйся, и наше неможение не отринувшая.

Радуйся, Утверждение наше незыблемое;

радуйся, Надеждо наша непостыдная.

Радуйся, Молитвеннице наша теплая;

радуйся, Заступнице усердная.

Радуйся, Пречистая, от иконы Твоея милости нам источающая.

 

Кондак 13

О Всепетая Мати, Заступнице Всемилостивая, Дево Богородице, обычным Твоим милосердием малое моление сие наше приемлющи, якоже древле, тако и ныне помилуй землю нашу Русскую и от всяких бед рабы Твоя избави, о Тебе вопиющия: Аллилуиа.

Этот кондак читается трижды; затем икос 1 и кондак 1.

 

Тропарь и молитва перед иконой Пресвятой Богородицы «Владимирская»

 

Тропарь, глас 4

Днесь светло красуется славнейший град Москва, яко зарю солнечную восприимши, Владычице, чудотворную Твою икону, к нейже ныне мы притекающе и молящеся Тебе, взываем сице: о Пречудная Владычице, Богородице, молися из Тебе Воплощенному Христу Богу нашему, да избавит град сей и вся грады и страны христианския невредимы от всех навет вражиих, и спасет души наша, яко Милосерд.

 

Молитва

Всемилостивая Госпоже Богородице, Небесная Царице, Всемощная Заступнице, непостыдное наше Упование! Благодаряще Тя о всех великих благодеяниях, в роды родов людем российским от Тебе бывших, пред пречистым образом Твоим молим Тя: сохрани град сей (или: весь сию; или: святую обитель сию) и предстоящия рабы Твоя и всю землю Русскую от глада, губительства, земли трясения, потопа, огня, меча, нашествия иноплеменных и междоусобныя брани. Сохрани и спаси, Госпоже, Великаго Господина и отца нашего (имя рек), Святейшаго Патриарха Московскаго и всея Руси, и Господина нашего (имя рек), Преосвященнейшаго епископа (или: архиепископа; или: митрополита) (титул), и вся Преосвященныя митрополиты, архиепископы и епископы православныя. Даждь им Церковь Российскую добре управити, верныя овцы Христовы негиблемы соблюсти. Помяни, Владычице, и весь священнический и монашеский чин, согрей сердца их ревностию о Бозе и достойно звания своего ходити коегождо укрепи. Спаси, Госпоже, и помилуй и вся рабы Твоя и даруй нам путь земнаго поприща без порока прейти. Утверди нас в вере Христовой и во усердии ко Православней Церкви, вложи в сердца наша дух страха Божия, дух благочестия, дух смирения, в напастех терпение нам подаждь, во благоденствии – воздержание, к ближним любовь, ко врагом всепрощение, в добрых делех преуспеяние. Избави нас от всякаго искушения и от окамененнаго нечувствия, в страшный же день суда сподоби нас ходатайством Твоим стати одесную Сына Твоего, Христа Бога нашего, Емуже подобает всякая слава, честь и поклонение со Отцем и Святым Духом, ныне и присно, и во веки веков. Аминь.

 

Акафист Пресвятой Богородице перед иконой Ея, именуемой «Казанская»

 

Кондак 1

Избранной от всех родов Заступнице рода христианскаго, покровом Своея благости покрывающей страну нашу Православную, благодарственная пения приносим Ти, Богородице, о явлении чудныя Твоея иконы. Ты же, яко Всемилостивая, всех притекающих к Тебе Помощнице, заступай нас во всех скорбех и нуждах, бедах и напастех, да зовем Ти: Радуйся, Заступнице усердная рода христианскаго.

 

Икос 1

Ангел предстатель послан бысть рещи Богородице «Радуйся», егда Бог Слово воплощашеся во утробе Ея: и мы, грешнии, прославляюще явление чудныя Ея иконы и Божественнаго Младенца Спаса Христа, со умилением вопием Благодатней:

Радуйся, Богоизбранная Отроковице;

радуйся, Мати Божия.

Радуйся, Царице Небесе и земли;

радуйся, светлое Церкве Небесныя и земныя украшение.

Радуйся, Ангелы чтимая;

радуйся, певаемая от Серафим.

Радуйся, светлое пророческое сбытие;

радуйся, апостолов похвало.

Радуйся, мученическое исповедание;

радуйся, преподобных венче.

Радуйся, праведных веселие;

радуйся, грешных упование.

Радуйся, Заступнице усердная рода христианскаго.

 

Кондак 2

Видящи, Всенепорочная, с высоты Небеснаго жилища Своего, идеже с Сыном Твоим в славе пребываеши, скорбь рабов Твоих в новопросвещеннем граде, яко гневнаго ради Божия посещения вера Христова поругаема бывает агарянским зловерием, благоволила еси явити икону Свою, чудесы ю прославляющи, да утверждаемии знаменьми Твоея благодати, христолюбивии людие верно вопиют Богу: Аллилуиа.

 

Икос 2

Разумение трикратнаго явления Богоматере мудрая отроковица ищущи, тече ко властем, поведающи им дивное явление и грозное прещение: мы же дивящеся свыше данному отроковице вразумлению, благоговейно вопием к Преблагословенней:

Радуйся, устнами чистыми хвалу Богови совершающая;

радуйся, тайны благодати Божия верным открывающая.

Радуйся, неверных сумнительное слышание.

Радуйся, верных известная похвало;

радуйся, молние, неверных устрашающая.

Радуйся, славою чудес Твоих верных разум озаряющая;

радуйся, агарянскаго зловерия обличение.

Радуйся, гордыни их низложение;

радуйся, веры христианския утверждение.

Радуйся, почитания святых икон освящение;

радуйся, скорбь нашу в радость претворяющая.

Радуйся, несумненною надеждою нас увеселяющая.

Радуйся, Заступнице усердная рода христианскаго.

 

Кондак 3

Сила Вышняго благодатию Богоматере умудри и укрепи отроковицу к исканию многоценнаго Божия дара, и та, с верою дерзающи о Господе, приступи к труду и, скрытое в земли обретши сокровище святыя иконы Богоматери, радостно возопи к Богу: Аллилуиа.

 

Икос 3

Имеющи благоутробное промышление о новопросвещенных людех града Казани, от пречестныя Твоея иконы токи чудес источила еси, Владычице, слепым телесныма очима зрение подавающи, омраченных же душевно светом богопознания и благочестия озаряющи, девствующим под осенением Твоея иконы пристанище небурное дарующи. Сего ради зовем Ти:

Радуйся, явлением иконы Твоея тьму лютых обстояний отгоняющая;

радуйся, лучами чудес всех просвещающая.

Радуйся, слепых прозрение;

радуйся, омраченных смыслом просвещение.

Радуйся, славо Православия;

радуйся, тихое пристанище ищущих спасения.

Радуйся, Мати целомудрия;

радуйся, покрове и ограждение девства.

Радуйся, Еюже ликовствует все множество верных;

радуйся, Еяже ради рыдает демонское полчище.

Радуйся, всех христиан вожделенная Помощнице;

радуйся, всех скорбящих Радосте.

Радуйся, Заступнице усердная рода христианскаго.

 

Кондак 4

Бурю смятений и крамолы врагами воздвигнутую в стране нашей утолити тщащься блаженный Ермоген, списатель чудес Твоея, Богомати, иконы, слезно пред нею моляшеся и видев, яко воинству православному в щит и победное знамение Твоя икона даровася, верою укрепляемый до конца живота своего, вопияше Богу: Аллилуиа.

 

Икос 4

Слышавше православнии воини откровенную Преподобным Сергием святителю Арсению тайну, яко предстательством Богоматере суд об Отечестве нашем преложен на милость, икону Богоматерню, яко знамя победное, приимше, исхитиша матерь градов русских из рук супостат и возопиша Заступнице христиан:

Радуйся, Мати Бога Вышняго;

радуйся, яко за всех молиши Сына Твоего, Христа Бога нашего.

Радуйся, яко всем твориши спастися в державный Твой покров прибегающим;

радуйся, Заступнице всех сущих в скорбех и болезнех.

Радуйся, всем молящимся сокрушенным сердцем пред пречистым Твоим образом полезная дарующая;

радуйся, избавление зол всем, невозвратно надежду имущим на Тя.

Радуйся, тихое и доброе пристанище;

радуйся, скорая Помощнице.

Радуйся, готовый и теплый покрове спасения;

радуйся, источающая нам неоскудныя милости.

Радуйся, предваряющая на помощь;

радуйся, избавляющая от всех бед.

Радуйся, Заступнице усердная рода христианскаго.

 

Кондак 5

Боготочная звезда явися Твоя, Богомати, икона, всю страну Российскую обтекающая, лучами чудес Твоих осиявающая всех блуждающих по морю страстнаго жития, мрак печалей и мглу всяких недуг и скорбей прогоняющая и наставляющая на путь спасения с верою к Тебе притекающих и вопиющих к Богу: Аллилуиа.

 

Икос 5

Видев царь Петр, яко от святыя иконы Богоматерни благодатию Божиею содеваются многия чудеса, приемлет ю в путеводительницу воинству своему и в день брани на свеев в щит и покров, и победив до конца врага с помощию Богоматере, тем камень совершенный во основание новаго царствующего града положи, икону же Твою чудную, яко освящение, яко щит и ограждение, в сердце града постави. Сего ради вопием Пречистей:

Радуйся, жилище и доме Христа Бога нашего;

радуйся, вместилище неизреченныя Его славы.

Радуйся, граде одушевленный, присно царствующий;

радуйся, палато преукрашенная.

Радуйся, Радосте градов и весей;

радуйся, непобедимое христиан в бедах хранилище и предградие.

Радуйся, Церкве Православныя похвало;

радуйся, Русской земли утверждение.

Радуйся, христолюбиваго воинства Помощнице;

радуйся, врагов одоление.

Радуйся, от бед избавление;

радуйся, Матерними Твоими щедротами всех посещающая.

Радуйся, Заступнице усердная рода христианскаго.

 

Кондак 6

Предстояще пред пречистым Твоим образом архиереев сословии и вси людие, монаси и мирстии, проповедуют, Госпоже Богородительнице, великия Твоя милости, яко грады ограждаеши, обители покрываеши, веси защищаеши, и, ведуще Тя воистинну Помощницу сильну и непобедиму, со слезами приносят Ти молитвы, да простреши к Сыну Твоему Богоносныя руки за люди Твоя, во еже избавити нас от всех бед и напастей, да благодарне вопием Богу: Аллилуиа.

 

Икос 6

Возсиявши просвещение истинное и отгнавши древле лесть агарянскую во новопросвещенней стране Казанской, ныне во всех градех российских светиши светом чудес и милостей: притекающий бо с верою ко Твоей иконе цельбоносней скорбей избавление, недугов исцеление и радости всякия исполнения приемлют, вопиюще Тебе усердно:

Радуйся, неистощимый источниче святыни;

радуйся, многотекущая реко Божественная благодати.

Радуйся, грешных с Богом примирение;

радуйся, грехов наших очищение.

Радуйся, благочестия Наставнице;

радуйся, в добрых делех утверждение и помоще.

Радуйся, добрыя обеты приемлющая;

радуйся, благим намерениям способствующая.

Радуйся, злыя начинания разрушающая;

радуйся, вражия козни расторгающая.

Радуйся, скорая человеком Помощнице;

радуйся, милость сугубо нам подающая.

Радуйся, Заступнице усердная рода христианскаго.

 

Кондак 7

Хотящу народу православному исповедати милости Преблагословенныя Царицы Неба и земли и по силе благодарственная принести о избавлении его от нашествия иноплеменных, дивному храму, созданному в честь пречудныя иконы, победная в дар принесе, да вси памятующе милость Богоматере, спасшия град сей и страну, выну воспевают Богу благодарными усты: Аллилуиа.

 

Икос 7

Стольному граду России святая икона Твоя, Богомати, воистину явися благая Одигитрия, якоже древле Цареграду: к Тебе бо прибегают людие, помощи Твоея на начало пути и дел своих просяще и благодарственная приносяще моления пред пречистою иконою Твоею за избавление от скорбей и напастей, Тебе Помощницу и Заступницу крепкую ведают. Темже благодарственно вопием Ти:

Радуйся, Российския страны покрове;

радуйся, Православия в ней ограждение и утверждение.

Радуйся, несокрушимый щите воинов наших;

радуйся, броне их неуязвимая.

Радуйся, козни врагов обличающая;

радуйся, яко паучину их растерзающая.

Радуйся, нечестия обличение;

радуйся, крамолы разрушение.

Радуйся, юных от заблуждений исправление;

радуйся, старцев утешение.

Радуйся, душевредных учений низложение;

радуйся, душеполезных знаний дарование.

Радуйся, Заступнице усердная рода христианскаго.

 

Кондак 8

Странно и сумнительно неверующим слушати, како от иконы Твоея токи благодати истекают, воня животная благоухает: мы же, верующе слову, реченному Тобой, Владычице, к первонаписанней иконе: «С тобой Моя благодать и сила», уповаем, яко и с сею иконою благодать Твоя выну: темже, благоговейно предстояще, лобызаем ю, поклоняемся ей, яко Тебе Самей сущей, честь бо иконы на первообразное восходит, и Твоя благодать сею иконою знамения и чудеса содевает всем, с верою притекающим к Тебе и вопиющим Богу: Аллилуиа.

 

Икос 8

Вся бывши горе, к Небесным взята, и земных не оставляеши, Богомати, священным Твоим предстательством: имаши бо матернее дерзновение ко Христу Богу нашему. Темже утверди в мире глубоце православных житие и вся полезная всегда даруй рабом Твоим, да величающе воспеваем Ти:

Радуйся, Невместимаго вместилище;

радуйся, осененная силою Вышняго.

Радуйся, прозябшая Клас Небесный;

радуйся, мир весь душепагубнаго глада избавльшая.

Радуйся, выну ходатайствующая за род наш;

радуйся, яко много может молитва Твоя пред Сыном Твоим и Богом.

Радуйся, всех нас при Кресте Сына Твоего усыновившая;

радуйся, всегда Матернюю любовь к нам являющая.

Радуйся, Ходатаице вечных благ;

радуйся, и во временней жизни полезная нам подающая.

Радуйся, известное прибежище наше во всех скорбных обстояниих;

радуйся, несомненное утешение в печалех.

Радуйся, Заступнице усердная рода христианскаго.

 

Кондак 9

Всякаго естества ангельскаго превышшая явилася еси, Пресвятая Дево: Бога бо зачала еси плотию, Невместимаго всеми вместила еси во утробе Твоей, на руках носила еси Носящаго весь мир дланию: темже, яко Честнейшую Херувим и Славнейшую без сравнения Серафим величающе Тя, вопием о Тебе Богу: Аллилуиа.

 

Икос 9

Вития многовещанныя, яко рыбы безгласныя, видим о Тебе, Богородице: недоумеет бо всяк язык благохвалити Тя по достоянию, изумевает ум пети Тя, Богородице; обаче Благая сущи, приими и от нас архангельский глас, Тебе вопиющих:

Радуйся, Благодатная;

радуйся, яко Господь с Тобою.

Радуйся, Благословенная в женах;

радуйся, обретшая благодать у Бога.

Радуйся, родившая Спасителя миру;

радуйся, Мати Сына Божия.

Радуйся, Родительнице Вечнаго Царя;

радуйся, израстившая нам плод живота.

Радуйся, освященная Духом Святым;

радуйся, осененная силою Всевышняго.

Радуйся, верная Рабо Господня;

радуйся, яко Тя блажат вси роди.

Радуйся, Заступнице усердная рода христианскаго.

 

Кондак 10

Спасти хотящи многия от находящих зол, скорбей и болезней, чудную икону Твою, Богомати, даровала еси, еяже ради слепии прозирают, хромии ходят, разслабленнии возстают, беснующиися исцеляются, земли плодоносие подается, людие от смертоносныя язвы избавляются, грады и домы от огня спасаются: темже прославляюще Бога, дающаго нам таковыя милости, вопием Ему усердно: Аллилуиа.

 

Икос 10

Стена еси, Богородице, стране Российстей, градом ограждение и слава, православному воинству на враги укрепление. Темже, благодаряще Тя, вопием:

Радуйся, прославляющих Тя прославляющая;

радуйся, не чтущих Тя посрамляющая.

Радуйся, врагов устрашение;

радуйся, от нашествия иноплеменных избавление.

Радуйся, воинов крепосте;

радуйся, в дни брани забрало и ограждение.

Радуйся, в дни мира живоносный саде, увеселяющий сердца верных;

радуйся, оружие, егоже трепещут демони.

Радуйся, спасительный елей, умащающий греховныя раны кающихся;

радуйся, теплое наше упование.

Радуйся, несумненная наша Надеждо;

радуйся, тихое и доброе пристанище.

Радуйся, Заступнице усердная рода христианскаго.

 

Кондак 11

Пение хвалебное и благодарственное приносят Тебе, Владычице, припадающе ко иконе Твоей и любезно лобызающе ю, дев лицы, под державным покровом Твоим тихое и мирное иноческое житие провождающии, и возложивше на Тя все упование, радостно вопиют Богу: Аллилуиа.

 

Икос 11

Яко светоприемную свещу, зрим Твою честную икону, Пресвятая Владычице: та бо невещественный огнь благодати Твоея восприемши, и в подобиих ея новы возжигает светильники, причастны тояжде силы благодатныя, и озаряет чудесы, наставляющи на путь спасения всех вопиющих Ти сице:

Радуйся, Невесто Неневестная;

радуйся, Богоизбранная Отроковице, Мати Дево.

Радуйся, добрая Наставнице непорочнаго девства;

радуйся, Хранительнице ревнующих о чистоте.

Радуйся, жен похвало;

радуйся, дев величание.

Радуйся, вдов заступление;

радуйся, сирот призрение.

Радуйся, нищих Питательнице;

радуйся, нагих одеяние.

Радуйся, печальных утешение;

радуйся, скорбящих веселие.

Радуйся, Заступнице усердная рода христианскаго.

 

Кондак 12

Благодать дати восхотевши почитающим Тя с любовию, Богородительнице, присущего Ти силу благодатную оставила еси во святых Твоих иконах, ибо Божественная благодать, спребывающи тем (иконам), знамения и чудеса выну содевает и душевных и телесных недуг исцеление всем с верою приходящим подает Твоими Богоматерними непрестанными к Богу молитвами о вопиющих Ему: Аллилуиа.

 

Икос 12

Поюще Твоя чудеса, бывшая в древняя и настоящая времена, хвалим Тя, яко Живоносный Источник благодати, яко неистощимую реку чудес, яко бездну милости и щедрот, и все упование по Бозе возлагающе на Тя и в сей и в будущей жизни, прославляюще Тя, вопием:

Радуйся, христиан непостыдное упование;

радуйся, верных спасительное прибежище.

Радуйся, ненадежных надеяние;

радуйся, отчаянных спасение.

Радуйся, бане, омывающая совесть;

радуйся, росо, оживляющая души.

Радуйся, болезней врачевство скорое и безмездное;

радуйся, от всех бед быстрое избавление.

Радуйся, Утешительнице во всякой скорби;

радуйся, из глубины погибели спасающая.

Радуйся, отрадо в день смерти;

радуйся, единая Надеждо и по смерти.

Радуйся, Заступнице усердная рода христианскаго.

 

Кондак 13

О Всепетая Мати, рождшая всех святых Святейшее Слово, приими ныне малое сие моление и, величия ради благости Твоея и бездны щедрот Твоих, не помяни множества грехов наших, но исполни во благих прошения наша, подавающи телу здравие, души спасение, избавляющи от всякия нужды и печали и Царствия Небеснаго наследники сотворяющи всех верно вопиющих Богу: Аллилуиа.

Этот кондак читается трижды; затем икос 1 и кондак 1.

 

Тропарь и молитва перед иконой Пресвятой Богородицы «Казанская»

 

Тропарь, глас 4

Заступница усердная, Мати Господа Вышняго! За всех молиши Сына Твоего, Христа Бога нашего, и всем твориши спастися, в державный Твой покров прибегающим. Всех нас заступи, о Госпоже, Царице и Владычице, иже в напастех, и в скорбех, и в болезнех обремененных грехи многими, предстоящих и молящихся Тебе умиленною душею и сокрушенным сердцем пред пречистым Твоим образом со слезами, и невозвратно надежду имущих на Тя, избавления всех зол, всем полезная даруй, и вся спаси, Богородице Дево: Ты бо еси Божественный Покров рабом Твоим.

 

Молитва первая

О Пресвятая Госпоже Владычице Богородице! Со страхом, верою и любовию припадающе пред честною иконою Твоею, молим Тя: не отврати лица Твоего от прибегающих к Тебе, умоли, милосердая Мати, Сына Твоего и Бога нашего, Господа Иисуса Христа, да сохранит мирну страну нашу, Церковь Свою Святую да незыблему соблюдет от неверия, ересей и раскола. Не имамы бо иныя помощи, не имамы иныя надежды, разве Тебе, Пречистая Дево: Ты еси всесильная христиан Помощница и Заступница. Избави всех, с верою Тебе молящихся, от падений греховных, от навета злых человек, от всяких искушений, скорбей, бед и от напрасныя смерти: даруй нам дух сокрушения, смирение сердца, чистоту помышлений, исправление греховныя жизни и оставление прегрешений, да вси благодарне воспевающе величия Твоя, сподобимся Небеснаго Царствия и тамо со всеми святыми прославим пречестное и великолепое имя Отца и Сына, и Святаго Духа. Аминь.

 

Молитва вторая

О Пресвятая Владычице Богородице, Царице Небеси и земли, вышшая ангел и архангел и всея твари честнейшая, чистая Дево Марие, миру благая Помощнице, и всем людем утверждение, и во всяких нуждах избавление! Призри и ныне, Госпоже Всемилостивая, на рабы Твоя, Тебе умиленною душею и сокрушенным сердцем молящияся, со слезами к Тебе припадающия и покланяющияся пречистому и цельбоносному образу Твоему, и помощи и заступления Твоего просящия. О Всемилостивая и Премилосердая Дево, Богородице Чистая! Воззри, Госпоже, на люди Твоя: мы бо, грешнии, не имамы иныя помощи, разве Тебе и от Тебе рождшагося Христа Бога нашего. Ты еси заступница и предстательница наша. Ты еси обидимых защищение, скорбящим радование, сирым прибежище, вдовам хранительница, девам слава, плачущим веселие, больным посещение, немощным исцеление, грешным спасение. Сего ради, о Богомати, к Тебе прибегаем, и на Твой Пречистый образ с Предвечным на руку Твоею держимым Младенцем, Господем нашим Иисусом Христом, взирающе, умиленное пение Тебе приносим и вопием: помилуй нас, Мати Божия, и прошение наше исполни, вся бо суть возможна ходатайству Твоему: яко Тебе слава подобает ныне и присно, и во веки веков. Аминь.

 

Акафист Пресвятой Богородице перед иконой Ея, именуемой «Тихвинская»

 

Кондак 1

Взбранной Воеводе, Владычице нашей Богородице, благодарственная пения восписуем о явлении чудныя Ея иконы, к Нейже притекающии присно избавляются от враг видимых и невидимых. Ты же, Госпоже Неба и земли, яко милосердная Мати, приими ныне малое сие моление наше и неотступну никогда же сотвори милость Твою от нас и заступление, охраняющи от всех бед и напастей нас, зовущих Ти: Радуйся, Владычице, милостивая о нас пред Богом Заступнице.

 

Икос 1

Ангелов лицы ликовствующе служат Тебе, Владычице, и почитающе Тя, на руку Твоею носившую Творца видимыя и невидимыя твари, икону Твою с места на место преносят. Мы же, земнороднии, дивящеся чудному явлению иконы Твоея, Ангелы носимыя, вопием Ти сице:

Радуйся, всех Небесных Сил высшая;

радуйся, вся ангельския чины превосходящая.

Радуйся, Честнейшая Херувим;

радуйся, Славнейшая без сравнения Серафим.

Радуйся, радование Ангелов;

радуйся, похваление ликов небесных.

Радуйся, от Ангелов воспеваемая;

радуйся, от Серафимов прославляемая.

Радуйся, от Архангел поклоняемая;

радуйся, от воинств небесных почитаемая.

Радуйся, в иконе Твоей от Ангел чтимая;

радуйся, в видимем образе Твоем от невидимых сил носимая.

Радуйся, Владычице, милостивая о нас пред Богом Заступнице.

 

Кондак 2

Видяще рыбарие над пучиною вод носимую невидимою силою и светом подобно солнцу сияющую Твою, Богомати, икону с Предвечным Младенцем, рыбарей призвавшим на уловление мира в сети спасения, возопиша: Аллилуиа.

 

Икос 2

Разум недоразуменный дивнаго явления иконы Твоя разумети людие ищуще, уведеша, яко чтимая в Цареграде пречестная икона в наследие российскому роду даровася. Темже мы, благодаряще за милость Твою к роду нашему, вопием Ти:

Радуйся, Мати истинныя жизни;

радуйся, послушанием Твоим преслушание Евы исцелившая.

Радуйся, затворенный Эдем отверзшая;

радуйся, миру явившая Сокрушителя главы змиевой.

Радуйся, ковчеже Умирителя мира носивший;

радуйся, мир спасшая от потопления греховнаго.

Радуйся, лествице, еюже сниде Бог;

радуйся, земных возводящая на небо.

Радуйся, море фараона мысленнаго потопившее;

радуйся, купино, неопалившаяся всельшимся в Тя огнем Божества.

Радуйся, скрижале Богописанная;

радуйся, каменю, воду жизни источивший жаждущим.

Радуйся, Владычице, милостивая о нас пред Богом Заступнице.

 

Кондак 3

Сила Вышняго осеняше страну Тихвинскую, егда икона Пречистыя Богоматере, многочастне являющися и временным пребыванием освящающи землю, к воздвизанию храмов святых возбуждаше, да славится имя Владычицы во славу Триипостаснаго Бога, Емуже вопием: Аллилуиа.

 

Икос 3

Имуще благоутробное изволение, да людие страны Тихвинския вожделеют пребывания Твоего с ними, да памятуют выну покров Твой, икону Твою являла еси многочастне, дондеже указала еси богоизбранное место вселения ея. Темже, чудящеся, вопием Ти:

Радуйся, скиние, в нейже вселися Божество телесне;

радуйся, святая святых, в неюже единою вниде вечный Архиерей.

Радуйся, кивоте позлащенный Духом, Законодателя носивший;

радуйся, светильниче, огнем Божественным возженный.

Радуйся, стамно, носившая манну жизни Христа;

радуйся, трапезо, хлеб животный вместившая.

Радуйся, кадильнице, угль Божества имущая, мир весь облагоухавшая;

радуйся, жезле цвет, прозябший Христа.

Радуйся, столпе, к вечному наследию руководяй;

радуйся, облаче, от враг видимых и невидимых покрываяй.

Радуйся, земле обетования;

радуйся, руно, на негоже Христос, яко дождь сниде с небесе.

Радуйся, Владычице, милостивая о нас пред Богом Заступнице.

 

Кондак 4

Бурю смущения и скорби утолити тщашеся, благовернии людие взываше ко Господу: яви нам Божественный дар, егоже человеколюбне стране Российстей послал еси, не скрый сокровища, имже душевную нищету нашу обогатити надеяхомся, претвори печаль нашу в радость, отри слезы и рыдания. И улучивше желаемое, возопиша: Аллилуиа.

 

Икос 4

Слышав пастырь паствы своея радостное обретение и Матерь Пастыреначальника упасшуюся в странах Тихвинских, устрояет храм в честь новоявленныя иконы Ея, и пресвитеры учреждает, да выну прославляя Богоматерь, вопиют Ей:

Радуйся, Дщи, приклонившая ухо ко гласу Отца Небеснаго;

радуйся, яко праматернее сетование разрушися рождеством Твоим.

Радуйся, Невесто, Еяже доброты вожделе Царь Небесный;

радуйся, Царице, одесную Царя представшая.

Радуйся, рясны златыми украшенная и всю славу внутрь имущая;

радуйся, вводящая многих в чертог Царства Небеснаго.

Радуйся, яблоко, егоже благовоние обоняет весь мир;

радуйся, крине чистоты, блистанием светящийся.

Радуйся, миро благовонное, всему миру излиянное;

радуйся, царскую порфиру, плоть Творца всех, из девственных кровей Твоих исткавшая.

Радуйся, живый запечатленный источниче, источивший воду жизни;

радуйся, мысленный винограде, гроздь Божественный возрастивший.

Радуйся, Владычице, милостивая о нас пред Богом Заступнице.

 

Кондак 5

Боготечная звезда явися икона Твоя, Богомати, вся страну Тихвинскую обтекающи, и сущих во тьме невежествия светом боговедения озаряющи, скорбящих радостию осиявающи, заблуждающих же на путь делания заповедей Сына Твоего и Бога наставляющи. Ему же благодарственне вопием: Аллилуиа.

 

Икос 5

Видев Георгий на кладе древа седящу Жену, жезл червленный в руках имущу и светом неизреченным сияющу, Ейже предстоя беседоваше дивный Святитель, позна чрез благоухание благодати Тя, Богородицу, чувственный зрак приимшую и Святителя Николая предстояща Тебе, и возопи со трепетом:

Радуйся, доме, егоже созда Себе для вселения Премудрость Божия;

радуйся, Дево, Еммануила родившая.

Радуйся, жезле Иессеов, от негоже прозябе цвет Христос Бог;

радуйся, Неневестная Невесто, осенением Духа заченшая Сына.

Радуйся, свитче, в немже перстом Отчим написася Слово;

радуйся, книго девства запечатленная, Иосифу на хранение врученная.

Радуйся, клеще таинственная, угль Божества во чреве приемшая;

радуйся, престоле превознесенный, на немже плотию возседе Христос.

Радуйся, облаче легкий, на немже прииде Господь славы;

радуйся, врата затворенная, имиже един Христос пройде.

Радуйся, горо несекомая, от неяже краеугольный камень отсечеся, Христос;

радуйся, огнеросная пеще, неопально приимшая огнь Божества.

Радуйся, Владычице, милостивая о нас пред Богом Заступнице.

 

Кондак 6

Проповедник быв видимаго Твоего пребывания в стране Тихвинстей и дивнаго промышления о ней, благочестивый Георгий явление Твое и волю Твою людем возвести, ейже неповинующиися чудесы вразумляются славити Тя, Владычице, и пети Богу: Аллилуиа.

 

Икос 6

Возсияти свету Богопознания явлением иконы Твоей изволившая, и свет иноческия жизни возжещи благоволила еси, Богомати, на месте явления Твоея иконы, да иноков лицы вопиют Ти непрестанно:

Радуйся, неплоднаго корене благоплодное прозябение;

радуйся, от младенчества Богу посвященная.

Радуйся, во святем храме воспитавшаяся;

радуйся, Богу уневестившаяся.

Радуйся, всеми добродетельми преукрашенная;

радуйся, светоносная палато, Владыце уготованная.

Радуйся, благодатию Божию предочищенная;

радуйся, от начала веков во главизну нашего спасения предызбранная.

Радуйся, Невесто Архитектона небеснаго, земному тектону на хранение врученная;

радуйся, малый Назарет Своим пребыванием возвеличившая.

Радуйся, горних сил похвало;

радуйся, всех земнородных слава.

Радуйся, Владычице, милостивая о нас пред Богом Заступнице.

 

Кондак 7

Хотящим преподобным Мартирию и Кириллу во уединении подвизатися и труды и подвиги иноческими Богу угождати, путь в место вожделеваемаго подвига в столпе огненнем и гласе указала еси. Они же, познавше Тя, яко Одигитрию благую, спутешествующую им, возопиша Богу: Аллилуиа.

 

Икос 7

Новый источник чудес в стране северней явися икона Твоя Тихвинская, Пресвятая Владычице, независтно точащий исцеления всем, притекающим с верою: слепии бо прозирают, немии благоглаголиви бывают, глусии слышат, разслабленнии возстают, бесноватии от уз демонских свобождаются. Темже, славяще Тя, возопием:

Радуйся, яко на Тебе почи благоволение Отчее;

радуйся, Духом Святым осененная.

Радуйся, яко в Тебе воплотися Сын Божий, Спас миру;

радуйся, совета неизреченнаго Таиннице.

Радуйся, от Ангела благовестие приимшая;

радуйся, ангельским, еже радуйся, весь мир обрадовавшая.

Радуйся, яко Господь с Тобою;

радуйся, яко Тобою вси земнороднии Богу приближишася.

Радуйся, Благословенная в женах;

радуйся, всем женам благословение даровавшая.

Радуйся, Мати до рождества и по рождестве пребывши Девою;

радуйся, начаток чести и славы девства.

Радуйся, Владычице, милостивая о нас пред Богом Заступнице.

 

Кондак 8

Странно чудо явления образа Твоего, Владычице, и несказанно удивляет премирная и ужасает земная, вкупе же и просвещает благодатию рождшагося от Тебе Христа Бога нашего. Странно и заступление обители от врагов, хвалившихся разорити достояние Твое. Сего ради вопием Богу: Аллилуиа.

 

Икос 8

Вся еси в вышних, Владычице, но и нижних не оставляеши, защищающи, аки стеною и забралом, честною иконою Твоею обитель Твою. Рекла бо еси, егда бысть нашествие вражие, да возьмут людие икону Мою и обыдут по стенам окрест, и узрят милость Божию. Темже, избавленнии Тобою от враг, возопиша Тебе:

Радуйся, Мати Творца и Господа Своего;

радуйся, Еяже ради младенец Иоанн взыграся во чреве Елисаветы.

Радуйся, от всех родов ублажаемая;

радуйся, смирением возвышенная.

Радуйся, небесным радование и земным мир рождением Твоим даровавшая;

радуйся, от Ангелов славословие, от пастырей величание, от волхвов поклонение о рождении Твоем приимшая.

Радуйся, млеком питавшая горняя и дольняя благодатию Своею Питающаго;

радуйся, пеленами повившая Одевающагося светом, яко ризою.

Радуйся, носившая на руку Твоею Носящаго весь мир дланию;

радуйся, во храм принесшая священие храма.

Радуйся, Симеоном благословенная;

радуйся, Анною пророчицею возвеличенная.

Радуйся, Владычице, милостивая о нас пред Богом Заступнице.

 

Кондак 9

Всякаго естества ангельскаго чистейши сущи, Владычице, обитель, ради пришествия Твоея иконы созданную, от нечистоты греховныя близ погибели бывшую, но покаянием очистившуюся, яко общая Молебница о роде христианском, избавила еси от врагов, по подобию нечистых животных подкопати ю трудившихся. Темже вопием Богу: Аллилуиа.

 

Икос 9

Вития многовещанныя недоумеют воспети по достоянию множество чудес Твоих, Владычице, и тайны Твоего строения спасения человеков: ово бо благостию, ово же посещением наказаний руководиши людий на путь спасения. Зане необориму обитель сохранивши от врагов видимых, огненным очищением благоволила еси очистити от уязвлений врага невидимаго, вразумляя, яко чистота, воздержание и молитвы сердечныя угоднее Тебе паче хвалы единых точию уст. Темже вопием Ти:

Радуйся, Египет освятившая пришествием Твоим;

радуйся, Галилейскую страну прославившая пребыванием Твоим.

Радуйся, по всему Иерусалиму искавшая Отроча Твое, Егоже возлюби душа Твоя;

радуйся, в дому Отца Его обретшая Его.

Радуйся, вся глаголы о Сыне Твоем слагавшая в сердце Своем;

радуйся, в Сыне Твоем прежде всех познавшая Бога.

Радуйся, Сыну Твоему послужившая в земнем житии Его;

радуйся, страданием Его спострадавшая.

Радуйся, при Кресте Сына Твоего усыновление Иоанна Апостола и всех верующих приимшая;

радуйся, матерински возлюбившая искупленных кровию Его.

Радуйся, первее всех уразумевшая тайну воскресения Сына Твоего;

радуйся, премногой радости насладившаяся в вознесении Сына Твоего на небеса.

Радуйся, Владычице, милостивая о нас пред Богом Заступнице.

 

Кондак 10

Спасти хотящи многия люди от обдержащих их скорбей и болезней и веру их утвердити во всесильное заступление Твое, Владычице, во многих градех, обителех, весех православныя страны силу чудотворения даровала еси изображением честныя иконы Твоея, да видяще являемую Тобою милость, вопиют со умилением Богу: Аллилуиа.

 

Икос 10

Стена и щит была еси, Владычице, православному воинству, под знамением Твоея иконы противу двадесяти язык воинствовавшему, сохраняя его от стрел вражиих. Темже буди стена и покров от всех врагов видимых и невидимых и нам, ко пречестней иконе Твоей с верою и любовию припадающим и вопиющим Тебе:

Радуйся, утешение верным по вознесении Сына Твоего;

радуйся, Учительнице и Споспешнице Апостолом.

Радуйся, извещением Твоего к Богу отшествия обрадованная;

радуйся, лик ученический облаком к погребению Ти совокупльшая.

Радуйся, от земли дланьми Сына Твоего восприемлемая;

радуйся, от всех ангельских чиноначалий провождаемая.

Радуйся, земное небо к горнему селению возвышенное;

радуйся, престоле Господень, от земли вознесенный в Царствие Небесное.

Радуйся, воздух освятившая восхождением Твоим;

радуйся, чрез Фому уверившая Твое на небо с плотию преселение.

Радуйся, ученическому лику обещание хранити его исполньшая;

радуйся, присещением Твоим от Сына Твоего и Бога мир тому подавшая.

Радуйся, Владычице, милостивая о нас пред Богом Заступнице.

 

Кондак 11

Пение всякое побеждается, спростретися тщашеся ко множеству чудес, присно бываемых от святыя Твоея и чудотворныя иконы. Якоже бо скорая Помощница, недуги исцеляеши, от бед избавляеши, от мучения демонов свобождаеши, на всяком месте с верою Тя призывающих и вопиющих Богу: Аллилуиа.

 

Икос 11

Светоприемную свещу зрим святую икону Твою, Богомати, во странах Тихвинских благодатию Твоею возженную, всю страну просвещающую и многих ко свету своему привлекающую на спасение душ. Темже вопием Ти:

Радуйся, сохраняти и спасати всех призывающих Тя обещавшая;

радуйся, прославляющих Тя прославляющая.

Радуйся, к Сыну Твоему и Богу молитвы верных приносящая;

радуйся, и Сама непрестанно у престола Сына Твоего и Бога молящаяся о всех.

Радуйся, благодать Твою иконам Твоим честным даровавшая;

радуйся, всю вселенную лучами Твоея благодати озарившая.

Радуйся, Честнейшая Херувим и Славнейшая Серафим;

радуйся, всея твари высшая.

Радуйся, Царице Неба и земли;

радуйся, яко много может молитва Твоя пред Сыном Твоим.

Радуйся, всего рода христианскаго скорое заступление;

радуйся, всех верных твердое упование.

Радуйся, Владычице, милостивая о нас пред Богом Заступнице.

 

Кондак 12

Благодати Твоея новое знамение дати восхотев, Петрову граду источник чудес отверзла еси, Богомати, в иконе Твоей, да верующии вразумляются, труждающиися и скорбящии обретают готовое прибежище и заступление, прославляющи Бога, даровавшаго таковая, вопиют Ему: Аллилуиа.

 

Икос 12

Поюще чудеса Твоя и милости, роду нашему явленныя, умильно припадаем к пречистому образу Твоему, Владычице, и лобызающе, со страхом и любовию молим Тя: настави нас на путь спасения, да достойни будем выну Твоего милостиваго заступления, буди присно Заступница и Ходатаица о нас, вопиющих Ти:

Радуйся, верных утверждение и защищение;

радуйся, неверных вразумление и просвещение.

Радуйся, отчаянных Надеждо;

радуйся, грешных спасение.

Радуйся, печальных утешение;

радуйся, больных изцеление.

Радуйся, вдов и сирот покрове;

радуйся, обидимых прибежище.

Радуйся, царей укрепление;

радуйся, святителей удобрение.

Радуйся, девствующих похвало;

радуйся, всех благочестивых веселие.

Радуйся, Владычице, милостивая о нас пред Богом Заступнице.

 

Кондак 13

О Всепетая Мати, рождшая всех святых Святейшее Слово, нам покров и защищение в жизни сей от врагов видимых и невидимых, от бед и скорбей, сохрани от искушений и грехопадений, и в будущей жизни, на суде Сына Твоего и Бога нашего, буди Заступница и Ходатаица, избавляющи нас от вечнаго осуждения, да спасеннии Тобою, с лики ангельскими вопием Богу: Аллилуиа.

Этот кондак читается трижды; затем икос 1 и кондак 1.

 

Тропарь, кондак и молитва перед иконой Пресвятой Богородицы «Тихвинская»

 

Тропарь, глас 4

Днесь, яко солнце пресветлое, возсия нам на воздусе всечестная икона Твоя, Владычице, лучами милости мир просвещающи, юже великая Россия, яко некий дар Божественный свыше благоговейне восприемши, прославляет Тя, Богомати, всех Владычицу, и от Тебе рождшагося Христа Бога нашего величает радостно. Емуже молися, о Госпоже Царице Богородице, да сохранит вся грады и страны христианския невредимы от всех навет вражиих, и спасет верою покланяющихся Его Божественному и Твоему пречистому образу, Дево Неискусобрачная.

 

Кондак, глас 8

Притецем, людие, к Деве Богородице Царице, благодаряще Христа Бога, и к Тоя чудотворней иконе умильно взирающе припадем, и возопием Ей: о Владычице Марие! Присетивши страну сию Твоего честнаго образа явлением чудесно, спасай в мире и благовременстве вся христианы, наследники показующи небесныя жизни. Тебе бо верно зовем: радуйся, Дево, мира спасение.

 

Молитва перед иконой Пресвятой Богородицы «Тихвинская»

О Пресвятая Дево, Мати Господа Вышних Сил, небесе и земли Царице, града и страны нашея Всемощная Заступнице! Приими хвалебно-благодарственное пение сие от нас, недостойных раб Твоих, и вознеси молитвы наша ко Престолу Бога, Сына Твоего, да милостив будет неправдам нашим и пробавит благость Свою чтущим всечестное имя Твое и с верою и любовию покланяющимся чудотворному образу Твоему. Несмы бо достойни от Него помиловани быти, аще не Ты умилостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомненней и скорой Заступнице нашей: услыши нас, молящихся Тебе, осени нас вседержавным покровом Твоим и испроси у Бога Сына Твоего пастырем нашим ревность и бдение о душах, градоправителем мудрость и силу, судиям правду и нелицеприятие, наставником разум и смиренномудрие, супругам любовь и согласие, чадам послушание, обидимым терпение, обидящим страх Божий, скорбящим благодушие, радующимся воздержание: всем же нам дух разума и благочестия, дух милосердия и кротости, дух чистоты и правды. Ей, Госпоже Пресвятая, умилосердися на немощныя люди Твоя: разсеянныя собери, заблуждшия на путь правый настави, старость поддержи, юныя уцеломудри, младенцы воспитай, и призри на всех нас призрением милостиваго Твоего заступления, воздвигни нас из глубины греховныя и просвети сердечныя очи наша к зрению спасения, милостива нам буди зде и тамо, в стране земнаго пришельствия и на Страшнем Суде Сына Твоего: преставльшиися же в вере и покаянии от жития сего отцы и братию нашу в вечней жизни со Ангелы и со всеми святыми жити сотвори. Ты бо еси, Госпоже, слава небесных и упование земных, Ты по Бозе наша Надежда и Заступница всех, притекающих к Тебе с верою. К Тебе убо молимся, и Тебе, яко Всемогущей Помощнице, сами себе и друг друга и весь живот наш предаем, ныне и присно, и во веки веков. Аминь.

 

Акафист Пресвятой Богородице перед иконой Ея, именуемой «Целительница»

 

Кондак 1

Избранной от всех родов Пресвятей Деве Богородице, явившейся иногда клирику болящу во еже исцелити его от болезни лютыя, похвальныя приносим пения: Ты же, Всемилостивая Владычице, яко имущая державу непобедимую, от всяких бед и скорбей и болезней свободи ны, зовущия Ти: Радуйся, Благодатная Целительнице душ и телес наших.

 

Икос 1

Архангел Гавриил, возвещая Пресвятей Деве Марии безсеменное зачатие от Нея Сына Божия, рече: Радуйся, Благодатная, Господь с Тобою, благословенна Ты в женах, мы же, грешнии, гласу Архангелову подражати дерзающе, с верою, любовию и благоговением вопием пения сицевая:

Радуйся, от начала веков во главу нашего спасения предызбранная;

радуйся, многообразне от пророков предвозвещенная.

Радуйся, Невесто Неневестная, заченшая Сына от Духа Святаго;

радуйся, Мати в рождестве и по рождестве пребывшая Дево.

Радуйся, одеющего светом яко ризою пеленами повившая;

радуйся, млеком питавшая горняя и дольняя благодатию Своею питающаго.

Радуйся, на руку Твоею носившая Вседержителя;

радуйся, о Промыслителе всея твари попечение имевшая.

Радуйся, паче всех от Него превознесенная;

радуйся, честнейшая и славнейшая без сравнения всех небесных сил.

Радуйся, Благодатная, Целительнице душ и телес наших.

 

Кондак 2

Видяще, Пресвятая Владычица, усерднаго и благоговейнаго клирика Викентия, на всяк день преклоняющаго колена пред честным Твоим образом и Архангельское приветствие Тебе приносящего, приняла еси таковое его благоугождение и даровала еси ему во дни болезни внезапное и дивное со одра восстание. Темже и мы преклоняем колена душ и телес наших пред цельбоносным Твоим образом, Госпоже наша Богородице, и поминающе чудное явление болящему клирику, вопием Сыну Твоему и Богу нашему: Аллилуиа.

 

Икос 2

Разумев чудесное исцеление от тяжкого недуга, клирик Викентий, восста с убогого ложа своего, иде в церковь и тамо песньми хвалебными прослави Тя, Целительницу всех болящих; приими убо и от нас, Мати Божия, сии благохваления:

Радуйся, от врат смертных неисцельно болящих к жизни возвращающая;

радуйся, сострадания к страждущим преисполненная.

Радуйся, пораженных различными недуги чудесно исцеляющая;

радуйся, во всяких скорбех и печалех небесную отраду в сердца наша изливающая.

Радуйся, любовию к Богу и ближним нас воодушевляющая;

радуйся, от растлевающих душу и тело соблазнов мира сего сохраняющая.

Радуйся, скорая Услышательница усердно Тебе молящихся;

радуйся, источающая великия милости и щедроты любящим Тя.

Радуйся, уповающим на Тя вся потребная в животе сем дарующая;

радуйся, ублажающих Тя в грозный час смерти не оставляющая.

Радуйся, Благодатная, Целительнице душ и телес наших.

 

Кондак 3

Силою, данною от Тебе, Госпоже Царице и Владычице, святая икона Твоя источает неоскудно исцеления страждущим от недуг многоразличных и несумненною верою к Ней притекающим, Богу же вопиющим: Аллилуиа.

 

Икос 3

Имущи премногую любовь к роду христианскому и матернее о нем попечение всем просящим у Тебе помощи и заступления, всякое благое прошение скоро исполняеши; сего ради Тебе, Всемощней Заступнице и скорой Помощнице нашей, приносим похвалы сия:

Радуйся, скорбящих утешение;

радуйся, безнадежных надежде.

Радуйся, труждающих помощь и укрепление;

радуйся, нищих одеяние.

Радуйся, алчущих питательнице;

радуйся, обидимых и гонимых заступление.

Радуйся, обидящих устрашительнице;

радуйся, в христианской вере наставнице.

Радуйся, взыскание погибших;

радуйся, споручнице спасения грешных.

Радуйся, от лукавых бесов мощное защищение.

Радуйся, Благодатная, Целительнице душ и телес наших.

 

Кондак 4

Бури страстей и похотей искушений бесовских избави нас, Премилосердная Богородице, укрепи и сохрани в нас до конца жизни нашея веру православную и преданность святей Церкви, да возможем невозбранно пети Господу Богу: Аллилуиа.

 

Икос 4

Слыша Господь на небеси Твоя о нас моления, Преблагая Владычице, исполняет скоро всякое прошение Твое; ведуще таковое матернее дерзновение к Сыну Твоему Иисусу Христу, вси к Тебе прибегаем и усердно молим Тя: предстательствуй за нас, многогрешных рабов Твоих, пред Всемогущим Создателем нашим, да не погубит нас со беззаконьми нашими, но да подаст нам оставление прегрешений, вопиющих Тебе из глубины души:

Радуйся, предстательнице пред Богом, мир от бед спасающая;

радуйся, Сына Твоего на милость к нам недостойным преклоняющая.

Радуйся, от запаления огненнаго росою молитв Твоих избавляющая;

радуйся, удары молнии и грома от главы нашея отводящая.

Радуйся, юродивую мудрость века сего посрамляющая;

радуйся, пути спасения заблудшим показующая.

Радуйся, грешным к Богу дерзновение дарующая;

радуйся, изнемогающим в напастех, скорбех и искушениях скоро помогающая.

Радуйся, в посте и молитве и Богомыслии пребывающим присно спребывающая;

радуйся, блага земная, суетная и скоро преходящая презирати нас научающая.

Радуйся, к небесным и вечным сокровищам умы и сердца наша возводящая.

Радуйся, Благодатная, Целительнице душ и телес наших.

 

Кондак 5

Свет небесный озари храмину болящего клирика, егда предстала еси, Преблагая Владычице, даровати ему исцеление от лютого недуга. О Пресвятая Госпоже Богородице, просвети помраченныя многими грехми души наша и подаждь исцеление болезнующим телесем нашим, да прославляя Твоя милости, вопием радостно Богу: Аллилуиа.

 

Икос 5

Видяще Тя, Владычицу Богородицу, пред огнезрачным престолом Пресвятыя Троицы стоящу и за христиан молящуюся, небесныя силы и вси святии, от века Богу угодившии, немолчными славословиями ублажают Тя. Мы же, грешнии, на земле любовию к Тебе подвизаеми, дерзаем воспевати Тебе сице:

Радуйся, матернею любовию весь мир христианский объемлющая;

радуйся, всех верных благая Заступнице.

Радуйся, изрядная Споборнице ведущим брань противу искушений мирских и душевредных;

радуйся, от всякия злобы и вражды миром и любовию ограждающая.

Радуйся, всех прибегающих под кров Твой приемлющая;

радуйся, наставнице целомудрия и воздержания.

Радуйся, подвижников благочестия к горнему Иерусалиму Путеводительнице;

радуйся, душепагубных ересей и расколов искоренительнице.

Радуйся, душеполезных знаний подательница;

радуйся, скорая в бедах и печалех утешительница.

Радуйся, Молитвенница наша пред Сыном Твоим и Богом.

Радуйся, Благодатная, Целительнице душ и телес наших.

 

Кондак 6

Проповедует святая Православная Церковь множество чудес Твоих, великия Твоя милости, Преблагая Владычице, яко грады и веси ограждаеши, обители иноческия и жилища благочестивых рабов защищаеши, обидимых заступаеши, и вся благая и душеполезная ниспосылаеши всем прославляющим Тя и поющим Сыну Твоему: Аллилуиа.

 

Икос 6

Светло красуется зде, Госпоже Богородице, чудотворная Твоя икона, именуемая Целительница, прогоняющи от всех верных тьму искушений и напастей и обильно Светло Богоисточая исцеления. Сего ради во умилении зовем Ти:

Радуйся, от неисцельных болезней скорое исцеление подающая;

радуйся, от всяких бед и скорбей избавляющая.

Радуйся, греховныя страсти укрощающая;

радуйся, колеблющихся в вере православней укрепляющая.

Радуйся, утешение благодатное изливающая в сердца боголюбивыя;

радуйся, надеждою небесных благ верных души услаждающая.

Радуйся, в добрых делех преуспевати нам помогающая;

радуйся, от видимых и невидимых враг нас защищающая.

Радуйся, благодатию Твоею падших восставляющая;

радуйся, страх Божий в сердца наша вселяющая.

Радуйся, вся благая прошения наша скоро исполняющая.

Радуйся, Благодатная, Целительнице душ и телес наших.

 

Кондак 7

Хотящи явити милосердие Твое неизреченное, даровала еси нам, преблагая Богородице Дево, чудотворную Твою икону, именуемую Целительницею, да вси притекающии к ней с верою от болезней свобождаются и всякаго утешения сподобляются, сего ради вопием о Тебе Богу: Аллилуиа.

 

Икос 7

Дивна и преславна дела Твоя, Пренепорочная Владычице, всем бо богатым и нищим, здравым и болящим, и с прилежною молитвою пред цельбоносною иконою притекающим вся благая по коегождо потребе и в меру веры и любве подаеши, темже и мы не таим Твоих благодеяний, но благодарственно прославляя милости Твоя, глаголем Ти сице:

Радуйся, глухих слышание;

радуйся, слепых прозрение.

Радуйся, немых глаголание;

радуйся, хромых хождение.

Радуйся, прокаженных очищение;

радуйся, расслабленных укрепление.

Радуйся, от злых и лукавых духов свобождение;

радуйся, по Бозе наше прибежище и заступление.

Радуйся, от нужд, печалей и бед непреложное избавление;

радуйся, пристрастие к тленному богатству искореняющая.

Радуйся, искати богатство нетленное на небеси научающая.

Радуйся, Благодатная, Целительнице душ и телес наших.

 

Кондак 8

Странники и пришельцы в мире сем скорбнем и многомятежнем, вечнаго небеснаго отечества взыскуем и Тебе всемошную Царицу, Приснодеву Богородицу, смиренно просим: путеводствуй нас по стезям спасительных заповедей Сына Твоего, Христа Бога нашего, да избежим сетей невидимаго врага, возможем невозбранно воспевати Вседержителю Богу песнь: Аллилуиа.

 

Икос 8

Весь мир христианский ублажает Тя, Пренепорочную Деву, гласы хвалебными; всем верным, наипаче же болящим, утешительно есть взирати на всечестную икону Твою, Целительница именуемую. О Пречудная Госпоже Богородице, приими и наша умиленная благохваления таковая:

Радуйся, Радосте наша;

радуйся, доброто несказанная.

Радуйся, высото добродетелей;

радуйся, глубино смиренномудрия.

Радуйся, неистощимый источниче милостей и щедрот;

радуйся, благоуханный цвете девства и чистоты.

Радуйся, веры христианския утверждение;

радуйся, нечестия обличение.

Радуйся, горних сил похвало;

радуйся, всех праведных славо.

Радуйся, Благодатная, Целительнице душ и телес наших.

 

Кондак 9

Все упование на Тя возлагаем, Мати Божия, и в скорбех и болезнех ко святой иконе Твоей с благоговением и верою притекаем, чающе от нея скоро утешение и исцеление получити. О Пресвятая Царице Богородице, воззри милостивно на нас, смиренных рабов Твоих, и ускори исполнити вся яже на пользу нам в сей жизни и в будущей. Да прославляя Твое благоутробие, воспеваем Творцу Богу: Аллилуиа.

 

Икос 9

Ветии многовещаннии не возмогут достойно восхвалити Тя, Пречистую Деву, честнейшую Херувим и славнейшую без сравнения Серафим, безсеменно рождшую Спаса душ наших. Мы же, аще и немощнии, обаче любовию к Тебе побеждаеми, отверзаем недостойныя уста своя на похвалу Тебе сицевая:

Радуйся, чудес Христовых начало;

радуйся, исполнение всех пророчеств.

Радуйся, чистотою Ангелов превосшедшая;

радуйся, девство и рождество в себе чудно сочетавшая.

Радуйся, в обою непорочно и свято себе сохраньшая;

радуйся, Мати Сына Божия и Бога Вышняго.

Радуйся, падшему человечеству отверзшая вход в Царствие Горнее;

радуйся, тихое пристанище от бурь плавающих по морю житейскому.

Радуйся, Богом дарованная отрадо страждущим;

радуйся, сияющая благодатию и славою предивных знаний и чудес.

Радуйся, Благодатная, Целительнице душ и телес наших.

 

Кондак 10

Спасти хотя весь род человеческий от беззаконий и вечныя муки, человеколюбец Господь Тя, Матерь Свою, дарова в помощь, покров и защиту верующим в Него. Прославляя таковое милосердие о нас, грешных, благодарственным сердцем и устны вопием Ему: Аллилуиа.

 

Икос 10

Стена еси необоримая и заступление крепкое, Богородице Дево, всем с молитвою к Тебе прибегающим. Темже убо и нас, недостойных, огради от лютых болезней и от всякаго злаго обстояния и подаждь в делех благовременную помощь и укрепление взывающим Ти:

Радуйся, Заступнице наша и похвало;

радуйся, хранительнице наша и утверждение.

Радуйся, Отрадо наша и дивное о нас попечение;

радуйся, известное прибежище наше во всех скорбных обстояниях.

Радуйся, младенцев воспитание;

радуйся, юных наставнице целомудрия.

Радуйся, супругам любовь и согласие подавающая;

радуйся, благоговейных старцев к мирной кончине жития приводящая.

Радуйся, верных пастырей святыя Церкви укрепляющая и вразумляющая;

радуйся, в иноческом образе подвизающимся Ходатаице вечнаго радования.

Радуйся, в мире благочестиво живущих не оставляющая Своим заступлением.

Радуйся, Благодатная, Целительнице душ и телес наших.

 

Кондак 11

Пения и мольбы всеумиленныя наши, приносимыя пред цельбоносным Твоим образом, приими, Приснодево Богородице, и сподоби до конца жизни нашея Единому Богу воспевати: Аллилуиа.

 

Икос 11

Светозарне сияет чудотворная икона Твоя, Мати Божия, источая верным токи исцелений благодатных, наставляя блуждающих во тьме грехов на светлый путь добродетелей и спасения. Сего ради вопием Ти хвалебныя песни таковая:

Радуйся, осенением Твоея иконы силу вражию от всех прогоняющая;

радуйся, всем, прибегающим в скорбех, нуждах и болезнех, скорое утешение и исцеление подавающая.

Радуйся, чудо чудес, Одигитрие Владычице, на путь спасения наставляющая;

радуйся, мирное устроение обуреваемым напастьми дарующая.

Радуйся, чистотою Твоею чистоте жития нас научающая;

радуйся, лукавых, гордых и гневливых людей вразумляющая.

Радуйся, правую веру и страх Божий в нас вселяющая;

радуйся, светом Христова учения тьму неверия прогоняющая.

Радуйся, смущение помышлений сумнительных удаляющая;

радуйся, всех духовных даров щедрая Подательница.

Радуйся, Благодатная, Целительнице душ и телес наших.

 

Кондак 12

Благодатию и щедротами Твоими, Премилосердная Владычице, не оставляеши христиан православных, даруя скорбящим утешение, обидимым заступление, болящим и всем сущим в бедах многоразличных избавление, сего ради, прославляюще Тя, благодарственно вопием Богу: Аллилуиа.

 

Икос 12

Поюще Твоя неизреченныя милости и чудеса, являемыя нам, недостойным, преклоняем колена перед цельбоносным Твоим образом, Богородице Приснодево, молим Тя усердно: подаждь нам мир, тишину и благую кончину и не остави без Твоея помощи и заступления во втором пришествии Сына Твоего и Бога нашего всех, приносящих Ти со умилением сия похвалы:

Радуйся, в уныние и отчаяние впадших надеждою спасения укрепляющая;

радуйся, узы греховныя разрешающая.

Радуйся, праведный на нас гнев Божий на милость прелагающая;

радуйся, земное житие наше добре устрояющая.

Радуйся, от опасных обстояний нас избавляющая;

радуйся, в час кончины всем верным скорая Помощнице.

Радуйся, чтущих Тя на мытарствах воздушных заступающая;

радуйся, любовь к Тебе имущим врата райская отверзающая.

Радуйся, прославляющих Тя вечнаго блаженства в Царствии Небесном сподобляющая;

радуйся, не чтущих Тя перед всеми посрамляющая.

Радуйся, державная скоропомощница наша во дни тяжких испытаний.

Радуйся, Благодатная, Целительнице душ и телес наших.

 

Кондак 13

О Всепетая Мати Сладчайшего Господа нашего Иисуса Христа, милостивно приими сие малое моление наше, избави нас от всякия напасти, болезни и внезапныя смерти и сподоби нас наследниками быти Царствия Небеснаго и со всеми святыми воспевати Сыну Твоему и Богу нашему: Аллилуиа.

Этот кондак читается трижды; затем икос 1 и кондак 1.

 

Молитвы перед иконой Пресвятой Богородицы «Целительница»

 

Молитва перед иконой Пресвятой Богородицы «Целительница»

О Пресвятая Госпоже, Царице Богородице, Высшая всех небесных сил и Святейшая всех святых. Припадаем и покланяемся Тебе пред всечестным и цельбоносным образом Твоим, воспоминающе дивное явление Твое болящему клирику Викентию, и усердно молим Тя, Всесильную рода нашего Заступницу и Помощницу: якоже древле подала исцеление тому клирику, так и ныне исцели наша души и телеса, болезнующия ранами грехов и страстей многоразличных, избави нас от всяких напастей, бед, скорбей и вечнаго осуждения. Сохрани от душепагубных учений и безверия, от льстивых и наглых нападений невидимых врагов. Подаждь нам христианскую кончину безболезненну, мирну, непостыдну, Святых Тайн причастну. Сподоби нас на нелицеприятном судище Христове стати одесную Всеправеднаго Судии и блаженный глас Его услышати: Приидите благословеннии Отца Моего, наследуйте уготованное вам Царствие от сложения мира. Аминь.

 

Молитва другая

Приими, о Всеблагословенная и Всемощная Госпоже Владычице Богородице Дево, печальныя сия молитвы, со слезами Тебе приносимыя от нас, недостойных рабов Твоих, к Твоему цельбоносному образу пение возсылающих со умилением, яко Тебе Самой сущей и прислушающей моления наша и подающей с верою просящим. По коемуждо бо прошению исполнение твориши, скорби облегчаеши, немощным здравие даруеши, расслабленных и недужных исцеляеши, от бесных бесы прогоняеши, обидимыя от бед избавляеши, прокаженных очищаеши и малых детей милуеши, еще же, Госпоже Владычице Богородице, от уз и темницы свобождаеши и всякия многоразличныя страсти врачуеши: вся бо суть возможна ходатайством Твоим к Сыну Твоему Христу Богу нашему. О Всепетая Мати, Пресвятая Богородице! Не престай молитися о нас, недостойных рабех Твоих, славящих Тя и почитающих Тя, и поклоняющихся со умилением пречистому образу Твоему, и надежду имущих невозвратну и веру несумненну к Тебе, Приснодеве Преславней и Непорочней, славящих и чтущих Тя и вопиющих во веки веков. Аминь.

 

Акафист Пресвятой Богородице перед иконой Ея, именуемой «Иверская»

 

Кондак 1

Взбранной Воеводе, Владычице нашей Богородице, похвальная пения приносим Ти, раби Твои, яко пришествием честнаго образа Твоего стяжавшии щит крепкий, стену необоримую и стража неусыпна. Ты же, яко имущая державу непобедимую, покрый и защити нас, Владычице, от всех врагов видимых и невидимых и избави от всякаго вреда, душевнаго и телеснаго, да зовем Ти: радуйся, благая Вратарнице, двери райския верным отверзающая.

 

Икос 1

Ангел предстатель послан бысть рещи Богородице, егда паде Ей жребий апостольскаго служения в земли Иверстей: не разлучайся Иерусалима, жребий же, Тебе падший, просветится в последния дни, Ты же имаши потрудитися в земли, юже Тебе Бог изволит. Темже зовем Ти:

Радуйся, Еюже Евангелие благовестится;

радуйся, Еюже идольская прелесть упразднится.

Радуйся, Еюже власть князя тьмы разрушится;

радуйся, Еюже Царство Христово утвердится.

Радуйся, падших во тьму идолослужения к свету Евангелия воззвание;

радуйся, от рабства диаволу, в свободу славы чад Божиих приведение.

Радуйся, готовая Служительнице Сына Своего и Бога;

радуйся, послушанием преслушание Евы исцеляющая.

Радуйся, высото добродетелей;

радуйся, глубино смиренномудрия.

Радуйся, Еюже невернии познают Творца;

радуйся, Еюже вернии усыновляются Отцу.

Радуйся, благая Вратарнице, двери райския верным отверзающая.

 

Кондак 2й

Видящи Святая Дева дивное и новое о Себе промышление Божие, яко Раба Господня, присно готовая творити волю Его, возопи: Аллилуиа.

 

Икос 2

Разум недоразумеваемый глагола ангельскаго разумен Тебе, Пречистая, творя Господь, управи шествие Твое к горе Афонстей, идеже проповедася Тобою Евангелие, и тако явися жребий Твой. Мы же радостно вопием:

Радуйся, освятившая Афон Своим пришествием;

радуйся, низложившая тамо идолов.

Радуйся, насадившая тамо веру истинную;

радуйся, неверие отгнавшая.

Радуйся, в жребий Себе гору сию избравшая;

радуйся, благодать сему месту обещавшая.

Радуйся, верным, живущим в ней, Подательнице земных благ;

радуйся, Споручнице вечнаго их спасения.

Радуйся, теплая Ходатаице о живущих в жребии Твоем;

радуйся, всех врагов их устрашение.

Радуйся, милость Сына Своего до скончания века месту сему обещавшая;

радуйся, благодать Его неотступною быти предрекшая.

Радуйся, благая Вратарнице, двери райския верным отверзающая.

 

Кондак 3

Сила Вышняго заступлением Богоматере осени Святую гору и удолия и дебри ея яко село пространное показа всем, в иночестей жизни хотящим жати спасение, внегда пети сице: Аллилуиа.

 

Икос 3

Имущи промышление о жребии Своем, людех Иверския земли, устроила еси в месте, идеже Сама к Афону пристала еси, обитель роду их, в тихое пристанище ищущим спасения; хотящи даровати ей в щит и ограждение икону Свою, да вси взывают:

Радуйся, пославшая проповедницу Евангелия в землю Иверскую;

радуйся, обратившая сию страну от прелести идольстей к свету Христову.

Радуйся, отрасли неувядаемыя розго, дивную лозу Нине даровавшая;

радуйся, от нея произрастившая гроздие чудес и благия веры.

Радуйся, сад духовный на Афоне насадившая;

радуйся, струю из него просвещения духовнаго стране Иверстей источившая.

Радуйся, Евфимия златословесная уста;

радуйся, Торникия непобедимая крепосте.

Радуйся, всех благочестивых укрепление;

радуйся, иноков ограждение.

Радуйся, тихое пристанище ищущих спасения;

радуйся, вечный покой им уготовляющая.

Радуйся, благая Вратарнице, двери райския верным отверзающая.

 

Кондак 4

Бурю внутрь имущи помышлений сумнительных, честная вдовица, яже в Никеи, смятеся, зряще копием воина-иконоборца прободену святую и чтимую икону Богоматере и абие источившу кровь и, страхом обдержима, да не поругана будет святая икона, с молитвою слезоточащи, вверже ю в море. Увидевши же ю прямо верху воды путь творящу и текущу к Западу, возопи с веселием: Аллилуиа.

 

Икос 4

Видеша иноцы Святыя горы явльшийся в мори яко пламень, яко столп огнен, егоже верх досязаше небеси, яко солнце сияющее, и в нощи притекоша к краю моря и, видевше святую икону Богоматере, по морю носимую силою свыше, возопиша Благодатней:

Радуйся, Купино, законоположником предзримая;

радуйся, столпе огненный, наставляяй сущия во тьме.

Радуйся, лествице, досязающая до Небес, еюже сниде Бог;

радуйся, мосте, преводяй сущих от земли на Небо.

Радуйся, заре таинственнаго дне;

радуйся, Звездо, являющая Солнце.

Радуйся, Свет Неизреченный родившая;

радуйся, еже како ни единаго же научившая.

Радуйся, облеченная в солнце, сияющая благодатию и славою всей вселенней;

радуйся, молние, души просвещающая и верных смыслы озаряющая.

Радуйся, светлосте, во тьме светящая;

радуйся, яко многосветлое возсияваеши просвещение.

Радуйся, благая Вратарнице, двери райския верным отверзающая.

 

Кондак 5

Боготечную икону Свою дати хотящи Иверстей обители, рекла еси, Богомати, преподобному Гавриилу: иди с ликом иноков к брегу моря, сниди в пучину и приими икону Мою. Он же, верою и любовию окриляем, по воде, аки по суху, ходя, прият ю во объятия своя и, достиг сокровища, иным недостижимаго, в достояние иноков рода своего иверскаго, веселяся пояше: Аллилуиа.

 

Икос 5

Видеша иноцы иверстии многажды икону Богоматере из храма в верху врат монастырских на стену града незримою силою изнесенную, ужасахуся и стояху, зовуще к ней таковая:

Радуйся, святую икону дати нам изволившая;

радуйся, покров ея быти нам обещавшая.

Радуйся, любовь Твою к обители нашей показавшая;

радуйся, благое о ней промышление явившая.

Радуйся, помощь наша в чуждей стране;

радуйся, в странствии нашем утешение.

Радуйся, Божие к нам благоволение;

радуйся, наше к Богу дерзновение.

Радуйся, слез наших избавление;

радуйся, сирых нас Защитнице.

Радуйся, ограждение наше;

радуйся, едина Радосте наша.

Радуйся, благая Вратарнице, двери райския верным отверзающая.

 

Кондак 6

Проповедника творящи Гавриила воли Своея, рекла еси к нему, Владычице: не приидох хранима быти от вас, но да буду Аз Хранительница ваша не токмо в настоящем, но и в будущем веце. Се даю вам знамение: дондеже зрите в монастыре икону Мою, не оскудеет вам благодать Сына Моего и милость, да вопиют Ему вси: Аллилуиа.

 

Икос 6

Возсия радость велия слышавшим Твоя, Богомати, обетования, и Тебе, Небесней Вратарнице, храм на вратех обители с веселием иноцы воздвигоша и возопиша тако:

Радуйся, Хранительнице наша в настоящем веце;

радуйся, Предстательнице наша в будущем.

Радуйся, страху Божию нас научающая;

радуйся, на путь добродетели наставляющая.

Радуйся, дерзновение наше и надеждо;

радуйся, упование наше и покров.

Радуйся, благоутробие Сына Своего к нам преклонившая;

радуйся, благодать Его неоскудно пребывати с нами возвещающая.

Радуйся, святую икону залогом милости давшая;

радуйся, дар чудодействия ей даровавшая.

Радуйся, прилог всякаго зла от обители отражающая;

радуйся, всему благому вход отверзающая.

Радуйся, благая Вратарнице, двери райския верным отверзающая.

 

Кондак 7

Хотящу иногда злочестивому Амире обитель Иверскую разорити и стадо иноков, тамо собранное, разсеяти, скоро позна крепкое обители заступление от Богоматере, увидев корабли своя в пучине моря погрязшия и ратники изгибшия. И пришед со смирением, сребро и злато в обитель даяше, молитвы прося. Иноцы же, видевше сия, возопиша к Богу: Аллилуиа.

 

Икос 7

Новыя и безчисленныя чудеса показа Богоматерь, в обители оскудение вина, муки и елея восполняющи, бесныя исцеляющи, хромым хождение дарующи, слепым прозрение и всяк недуг врачующи, да видяще чудеса сия, воспевают Тебе:

Радуйся, Взбранная Воеводо, враги побеждающая;

радуйся, скорая на помощь призывающим Тя.

Радуйся, не презирающая моления нашего;

радуйся, обещания Своего не отступающая.

Радуйся, скорбь обители в радость претворяющая;

радуйся, оскудение обители восполняющая.

Радуйся, слепых прозрение;

радуйся, хромых хождение.

Радуйся, всех немощных Целительнице;

радуйся, всех скорбных Утешительнице.

Радуйся, яко не престаеши промышляющи и спасающи нас;

радуйся, яко от толиких бед избавляеши нас.

Радуйся, благая Вратарнице, двери райския верным отверзающая.

 

Кондак 8

Странно покрываемую от иконы Богоматере обитель Иверскую слышав Патриарх Никон, вожделе и Российстей стране благодати Ея стяжати причастие; сего ради, создав обитель в честь славнаго образа, со тщанием испроси изображение чудотворнаго образа Богоматере, да покровом Ея защищаеми, вопиют Богу: Аллилуиа.

 

Икос 8

Вся сущи в Вышних, но и нижних не отступающи, благоизволила еси, Богомати, якоже древле преподобному Антонию даровася благословение горы Афонския на утверждение обители Печерския, даровати и новой обители в стране Российстей благодать Свою, еюже благословила еси Афон, в подобии честнаго образа Твоего; темже взываем Ти:

Радуйся, страны Российския покрове, ширший облака;

радуйся, Православныя веры в ней ограждение и утверждение.

Радуйся, Православныя Церкве непоколебимый столпе;

радуйся, ересей и расколов обличение.

Радуйся, светлыми лучами чудотворных икон всю страну озаряющая;

радуйся, дары исцелений и милостей от них источающая.

Радуйся, врагов устрашение;

радуйся, святителей веселие.

Радуйся, иереев похвало;

радуйся, иноков Наставнице.

Радуйся, всего рода нашего спасение.

Радуйся, благая Вратарнице, двери райския верным отверзающая.

 

Кондак 9

Всяко тщание имуще о написании честнаго образа милостивыя Вратарницы, сонм постников иверских молебныя пения совершает; водою от чудныя иконы омывает дску, на нейже имать изобразитися честный образ, и преподобнаго Иамвлиха освящает, иже подвизався в посте, молитве и бдении со всею братиею, списа вапы, святою водою и мощами освященными, честное изображение Богоматере, выну моляся и вопия Богу: Аллилуиа.

 

Икос 9

Ветия многовещанныя, яко рыбы безгласныя, видим о Тебе, Богородице: недоумеют бо, како по достоинству похвалити вся чудеса Твоя, явленная роду нашему от святыя Твоея иконы: еще бо на пути в Российскую страну сия чудодействоваше, благочестивому Мануилу повелевая выкуп дати неверным, возбраняющим шествие святыя иконы в страну Русскую, и сугубо ему послежде отдавши. Мы же, дивящеся, верно вопием Ти:

Радуйся, источниче чудес неисчерпаемый;

радуйся, всякия милости Подательнице.

Радуйся, всегда теплая о нас Ходатаице к Богу;

радуйся, промышления Его о нас сокровище.

Радуйся, сущим в бедах прибежище;

радуйся, скорбящих утешение.

Радуйся, больных исцеление;

радуйся, немощных укрепление.

Радуйся, вдов заступление;

радуйся, сиротствующих милосердая Мати.

Радуйся, заблуждающих на путь истины обращение;

радуйся, грешников к покаянию воззвание.

Радуйся, благая Вратарнице, двери райския верным отверзающая.

 

Кондак 10

Спасти хотящи многия люди от бед и скорбей, источаеши, Богомати, неоскудный источник милости от Своея иконы роду нашему: се бо и в стольном граде Москве благая Вратарница являешися всем поклоняющимся Тебе, скорое вспоможение подавающи, и в новой обители Иверстей благодати струи от иконы Твоея испущаеши, и во иных градех, обителех и весех чтущим Тя полезное прошение исполняющи. Темже, прославляя Бога, давшаго нам благодать таковую, вопием Ему: Аллилуиа.

 

Икос 10

Стена еси иноческому чину, Богородице, и всем, к Тебе прибегающим, ибо Небесе и земли Творец, вселься в девственней утробе Твоей, научи всех чистоты и целомудрия ревнителей возглашати Тебе:

Радуйся, девства сосуде избранный;

радуйся, чистейший образе целомудрия.

Радуйся, чертоже безсеменнаго уневещения;

радуйся, Невесто Неневестная.

Радуйся, Сеятеля чистоты рождшая;

радуйся, верных Господеви сочетавшая.

Радуйся, в бури искушений скорая Помощнице;

радуйся, прилоги врага отражающая.

Радуйся, мглу душевредных страстей отгоняющая;

радуйся, помыслы очищающая.

Радуйся, земныя сласти презирати научающая;

радуйся, к горнему умы и сердца направляющая.

Радуйся, благая Вратарнице, двери райския верным отверзающая.

 

Кондак 11

Пение всякое побеждается, спростретися тщащееся ко множеству многих щедрот Твоих: равночисленныя бо песка песни аще приносим Ти, Владычице наша Богородице, ничтоже совершаем достойно, яже подаваеши нам, о Тебе вопиющим: Аллилуиа.

 

Икос 11

Светоприемную свещу, сущим во тьме бед явльшуюся, зрим святую икону Богоматере: невещественный бо огнь благодати приемлющи, лучами чудес всех озаряет, научающи сице взывати Благословенней:

Радуйся, во всяких нуждах скорое вспоможение;

радуйся, в печалех быстрое услышание.

Радуйся, от огня, меча и нашествия иноплеменных нас избавляющая;

радуйся, от глада и напрасныя смерти нас свобождающая.

Радуйся, от язвы и всегубительства смертнаго нас соблюдающая;

радуйся, бедствующим в пути, на суше и на водах внезапное вспоможение.

Радуйся, язв душевных и телесных врачевание;

радуйся, оставленных врачами в Свои руки приемлющая.

Радуйся, милосердая Утешительнице всех скорбящих и обремененных;

радуйся, не отвергающая всех презренных и отверженных.

Радуйся, самых отчаянных из рова погибели исхищающая;

радуйся, и мене, обнаженнаго добрых дел, не оставляющая Своим покровом и заступлением.

Радуйся, благая Вратарнице, двери райския верным отверзающая.

 

Кондак 12

Благодать дати восхотев долгов древних, всех долгов Решитель человеком, прииде Собою ко отшедшим Того благодати и, раздрав рукописание, дарова нам крепкое Богоблагодатныя ходатайство, да вопием вси молитвами Ея: Аллилуиа.

 

Икос 12

Поюще Твоя чудеса, являемая нам в жизни сей, хвалим Тя, Богородице, яко милости источник неисчерпаемый. Но, припадающе к Тебе пред чудотворною иконою Твоею, молим Тя смиренно: буди нам покров и защищение и в день кончины нашея, и егда имамы предстати на суд страшному престолу Сына Твоего, да вопием ти:

Радуйся, во славе приседящая престолу Сына Твоего и тамо нас воспоминающая;

радуйся, с Сыном Твоим и Богом вечно царствующая и о нас ходатайствующая.

Радуйся, уповающим на Тя конец живота непостыден дарующая;

радуйся, безболезненную и мирную кончину устрояющая.

Радуйся, мытарств горьких избавление;

радуйся, от власти князя воздушнаго свобождение.

Радуйся, грехов наших непоминовение;

радуйся, по Господе упование нам блаженныя жизни.

Радуйся, уповающим на тя одесную Сына Твоего стояние устрояющая;

радуйся, блаженнаго гласа Онаго, Небеснаго Царствия наследие обещающаго, слышати сподобляющая.

Радуйся, благая Мати, всех чтущих Тя жити с Собою вселяющая;

радуйся, крепкая надеждо вечнаго спасения всем христианом.

Радуйся, благая Вратарнице, двери райския верным отверзающая.

 

Кондак 13

О Всепетая Мати, Пресвятая Госпоже Дево Богородице! Призри на нас, приносящих смиренно со слезами малыя сия молитвы пред пречистым Твоим образом и все упование и надежду возложивших на Тя, и избави нас всех бед и напастей в животе сем и будущия изми муки, да спасаемии Тобою, вопием выну: Аллилуиа.

Этот кондак читается трижды; затем икос 1 и кондак 1.

 

Тропарь и молитвы перед иконой Пресвятой Богородицы «Иверская»

 

Тропарь, глас 1

От святыя иконы Твоея, о Владычице Богородице, исцеления и цельбы подаются обильно, с верою и любовию приходящим к ней. Тако и мою немощь посети и душу мою помилуй, Благая, и тело исцели благодатию Твоею, Пречистая.

 

Молитва

О Пресвятая Дево, Мати Господа, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющихся пречистому образу Твоему. Се бо, грехми погружаемии и скорбьми обуреваемии, взирающе на Твой образ, яко живей Ти сущей с нами, приносим смиренная моления наша. Не имамы бо ни иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам, немощным, утоли скорбь нашу, настави на путь правый нас, заблуждающих, уврачуй и спаси безнадежных, даруй нам прочее время живота нашего в мире и тишине проводити, подаждь христианскую кончину и на Страшном Суде Сына Твоего явися нам милосердая Заступница, да всегда поем, величаем и славим Тя, яко благую Заступницу рода христианскаго, со всеми угодившими Богу. Аминь.

 

Молитва, чтомая в часовне Иверской иконы Божией Матери перед Ея образом на молебне

О Пресвятая Госпоже Владычице Богородице! Приими недостойную молитву нашу и сохрани нас от навета злых человек и от внезапныя смерти, и даруй нам прежде конца покаяние. На моление наше умилосердися, и радость вместо печали даруй. И избави нас, Госпоже, от всякия беды и напасти, скорби и болезни, и от всякаго зла. И сподоби нас, грешных рабов Твоих, одесную стати во Втором Пришествии Сына Твоего, Христа Бога нашего, и наследники быти Царствия Небеснаго и жизни вечныя со всеми святыми в безконечныя веки веков. Аминь.

 

Акафист Пресвятой Богородице, перед иконой Ея, именуемой «Озерянская»

 

Кондак 1

Взбранной Воеводе, невечерняго Света Родительнице, Божественное знамение спасения – Христа Богомладенца на руку Своею держащи, молитвам Церкве земныя внемлющей, струи животворныя от явленныя иконы Своея Озерянския всем верным источающей, благодарственная восписуем Ти раби Твои, Богородице. Но яко имущая державу непобедимую, от всяких нас бед свободи и щедротами Сына Твоего души наша озари, да зовем Ти: Радуйся, благословенная в женах Богородице, светом любве Христовой нас озаряющая.

 

Икос 1

Архангел Гавриил, спасение наше предвозвещая, благословенную в женах пронарече Тя, Богородице. Мы же, благовестнику Бога Вышняго внемлюще, велию таинству дивящеся, радуемся; Тебе, знамение Лика Своего Озерянскаго нам даровавшую, Матерь Господа нашего исповедуем, и яко Матери милосердия и щедрот, со благоговением вопием Ти:

Радуйся, священное сокровище славы Божией, свещеносяще во Святая Святых светло введенная;

радуйся, благоволения Божия предображение и человеков спасения проповедание.

Радуйся, пророческих проречений сбытие многоценное, Христа всем предвозвестившая;

радуйся, о Тебе бо Небесная вся удивишася, зряще Духа Святаго в Тя всельшася.

Радуйся, Главизно нашего спасения, Триипостасное естество в Едином Божестве миру явившая;

радуйся, Отроча Младо, Отчее Сияние, мир просветившее, нам родившая.

Радуйся, Мати Пречистая, прежде рождества и по рождестве Дева пребывшая;

радуйся, яко о Рождестве Сына Твоего вси земнороднии, спасающеся, возвеселишася.

Радуйся, благословенная в женах Богородице, светом любве Христовой нас озаряющая.

 

Кондак 2

Видя благочестивый муж веси Озерянския, егда изыде на делание свое, святую икону Твою, Владычице, внезапу косою его разсеченную, со слезами умиления к Лику Твоему повержеся и со благоговением разсеченныя части в дом свой принесе, слезно прося умилостивления о гресе своем. Егда же воутрии сих не обрете, страхом и скорбию объят бысть, помысли бо гневу Божию на доме своем быти, со умилением возопи Богу: Аллилуиа.

 

Икос 2

Разумети хотя тайны сея силу, еюже сокрыся из дому его святая икона Твоя, Владычице, муж сей боголюбивый на место разсечения ея поспеши. И егда же паки сращенну сию обретше, знамение велие в сем уразуме, о нем же иерею Феодору поведа, и людем веси Озерянския о чудеси велие возвести. Тии же о Твоем, Богомати, милосердии слышавше, гласом радования благодарне возопиша: Откуду нам сие, да Мати Господа нашего к нам прииде! Сице умиляющеся, воспеваху Ти таковая:

Радуйся, Благодатная, Господь с Тобою, Имже мир от греха и смерти спасеся;

радуйся, благословен бо Плод чрева Твоего, Имже глава змиева сокрушися.

Радуйся, Церкве Христовы, седмию Вселенскими Соборы утвержденныя, присное украшение;

радуйся, веры Православныя, Духом Святым ограждаемыя, непоколебимое утверждение.

Радуйся, Препрославленная, во дни нашествия иноплеменник всемощно нас охраняющая;

радуйся, мольбы верных Своих, пред Пречистым Твоим образом приносимыя, милостиво приемлющая.

Радуйся, сращением святыя иконы Твоея мужа праведна зело возвеселившая;

радуйся, разсеченное диаволом естество наше Рождеством Сына Твоего паки с Богом соединившая.

Радуйся, благословенная в женах Богородице, светом любве Христовой нас озаряющая.

 

Кондак 3

Сила благодати неисповедимая не токмо от святыя иконы Твоея, Пречистая, верным источашеся, но и во источнице, на месте чуднаго явления ея, хромым хождение, глухим слышание, слепым прозрение обильно подавашеся. Тако бо Твоего Матерняго милосердия бездну неизследимую людие видевше, от недугов душевных и телесных исцеляхуся, сердца же своя в любви Божией утверждаху, с веселием поюще Ему: Аллилуиа.

 

Икос 3

Имея сие неописуемое сокровище веры – Твоего, о Богомати, Лика Пречистаго благословение, и в нем Твой Покров и земли нашея благодатное украшение, иерей Божий Феодор, умиляяся, все имение свое разда и в пределех веси Озерянския святую обитель – храмину Лику Твоему со пустыннолюбцем Севастианом воздвиже; себе же в жертву живую – иночествовати в ней, Сыну Твоему и Богу нашему приведе, идеже со инеми пустыннолюбцы о Тебе, Благодатная, радуяся, сынолюбно воспе таковая:

Радуйся, Мудрость, Слово и Силу – Сына Отча, из Тебе воплотившагося, миру явившая;

радуйся, Христа, Пасху нетленную, мертвым, живым и грядущим уготовившая.

Радуйся, Владычице милостивая, Свой Божественный Покров на нас простирающая;

радуйся, Голубице чадолюбивая, утешение благое в сердца наша низпосылающая.

Радуйся, Покрове ширший облака, явлением иконы Твоея милостивно нас посетившая;

радуйся, любвеобильная Мати, землю Харьковскую благодатно освятившая.

Радуйся, Божия Слова предивное Селение, град наш и люди от нашествия вражия охраняющая;

радуйся, незримая путеводительнице, к небесному Отечеству нас руководящая.

Радуйся, благословенная в женах Богородице, светом любве Христовой нас озаряющая.

 

Кондак 4

Бурю житейских скорбей и напастей в людех утолити хотящи, святую икону Твою на утешение нам даровала еси, Владычице, Юже аки Самую Тя с нами сущую зряще, недоумеюще, взываем: кую Ти похвалу принесем, Заступнице усердная, Яже источник благодатных исцелений пред Пречистым образом Твоим с верою молящимся и Твоея помощи просящим всещедро источаеши, и сице непрестанно нас милуеши, разве неисчерпаемыя щедроты Твоя величающе, благодарственно вопием Триединому Богу: Аллилуиа.

 

Икос 4

Слышавше ближнии и дальнии людие о пречудном явлении святыя иконы Твоея и о чудесех, от нея бываемых, со умилением в святую обитель Озерянскую притекаху, и во всяких скорбех житейских, и в дни нашествия иноплеменник, в надежде спасения своего, о Тебе, Всепетая Мати, уверяшася, и сице ликовствующе, Господа любовию прославляху. Темже и мы, надежду радости сея приемше, о Господе радуемся, Тебе же гласом хваления приносим таковая:

Радуйся, Агнице, рождшая Агнца, вземшаго грехи мира, небесе и земли Царице и Владычице;

радуйся, всех верных от зол ограждение и священное прибежище.

Радуйся, Благая Утешительнице, нечаянную радость в святей иконе Твоей нам принесшая;

радуйся, душ немощных Целительнице, благость любве Божия нам открывшая.

Радуйся, упование на милосердие Божие в сердца наша благодатно вселяющая;

радуйся, теплотою любве Божественныя сердца наша оживотворяющая.

Радуйся, одушевленный Храме, Великаго Царя Божественное жилище;

радуйся, Селение Небесное, Херувим пребольше и Серафим превыше.

Радуйся, благословенная в женах Богородице, светом любве Христовой нас озаряющая.

 

Кондак 5

Боготечней звезде икона Твоя, о Богомати, уподобися, егда святыя обители – Озерянскую, Куряжскую и Харьковскую обтекаше и цельбоносньми струи, неоскудно от нея источающимися, изобильно верных напаяше и, благодатию Святаго духа тех оживотворяющи, телесне и душевне, по вере их, исцеляше. Мы же душевныма нашима очима к Тебе, Первообразу Ея, возводимся, недугов наших исцеления, грехов прощения и Небесным Утешителем душ наших посещения умильно просим, с верою вопиюще о Тебе Богу: Аллилуиа.

 

Икос 5

Видевше икону Твою, Владычице, косою разсеченную и чудодейственно сращенную сущу, и токи чудес от нея изливаемыя, вси людие, со усердием к ней притекающе, Матерний Покров Твой и защищение, надежду и умилостивление в ней разумеваху. Сице и мы, стрелами врага разсекаеми и волнами страстей потопляеми, душевне изнемогающе, в Тебе, о Всеблагая, надежду нашего спасения имуще, дерзающе молимся: услыши нас, грешными усты глаголющих Ти сицевая:

Радуйся, Преблагая Покровительнице града нашего, Твоими бо молитвами роди христианстии спасаются;

радуйся, всех греховне блуждающих на путь жизни вечныя добре наставляющая.

Радуйся, безумства, лени и страстей силою любве Твоея нас милостивно спасающая;

радуйся, бедныя души наша, огнем Духа Святаго, на подвиг любве согревающая и укрепляющая.

Радуйся, всех под Твой покров и защищение Матернее приемлющая;

радуйся, в подвиге веры изнемогающих молитвам их внемлющая.

Радуйся, болящия и безнадежныя от одра болезни возставляющая;

радуйся, верная Спутнице, путешествующих и по морю плавающих от всяких бед избавляющая.

Радуйся, благословенная в женах Богородице, светом любве Христовой нас озаряющая.

 

Кондак 6

Проповедник немолчен благодатныя помощи Богоматере явися человек некий, суху руку имый, иже со слезами умиления к иконе Ея святей припадая, удобь исцеление прият, и о чудеси, на нем бывшем, с радостию и благодарением всей церкви поведа. Мы же, имуще сию источник благодатных исцелений, наипаче же пред Престолом Божиим Заступницы усердныя за всех нас Матернее заступление, со дерзновением вопием любящему нас Богу: Аллилуиа.

 

Икос 6

Возсия нам, паче лучь солнечных, святая икона Твоя, Владычице, в пределех Озерянских, егда губительная язва на страну нашу найде, и многи острием смерти изсече. Людие же, гнев Божий видяще, со слезами умиления ко святей иконе Твоей, о Богомати, повергахуся, и не токмо православнии, но и иновернии, к источнику Твоего милосердия притекавшии с верою, исцеляхуся. Сице бо милость Божию Твоими Матерними молитвами на себе видяще, со благодарением воспеваху Ти таковая:

Радуйся, в дни мора язвеннаго непреложная наша Надеждо и Спасительнице;

радуйся, всех, в неудобоисцельных недузех страждущих, премилосердная Целительнице.

Радуйся, ум наш, небрежением омраченный, благодатными струями, от иконы Твоея изливаемыми, озаряющая;

радуйся, близ смерти сущия и душевне изнемогающия милостивно к жизни возвращающая.

Радуйся, светлое благодати познание, о Тебе бо вся силы небесныя хвалятся;

радуйся, надеждо благ вечных, Тобою бо земнороднии к жизни вечней приуготовляются.

Радуйся, Мати Предвечнаго Бога, целебную радость верным источающая;

радуйся, Честною Кровию Сына Твоего грехи мира омывающая;

Радуйся, благословенная в женах Богородице, светом любве Христовой нас озаряющая.

 

Кондак 7

Хотящи явити людем страждущим Твоея Матерния любве неисчерпаемую щедрот бездну, аки студенцы в пустыни знойней, чудотворныя иконы Твоя и новая знамения от них, о Богомати, даровала еси, да вси в болезнех душевных и телесных неисцельно изнемогающи, и ко Твоему милосердию с верою притекающии, спасение обретают. Тако у иконы Твоея Озерянския немощнии и одержимии, исцеления душ и телес своих приемлюще, с веселием и благодарением воспеваша Богу: Аллилуиа.

 

Икос 7

Новую песнь хваления принесе Ти пажить Харьковская, Мати Врача душ и телес наших, егда некая слепая отроковица с материю своею слезныя молитвы у иконы Твоея Озерянския творящи, внезапну велиим гласом радования возопи: О, мати моя! Свет Божий вижу, тьму непроходную очес моих просвещающий! Людие же, видевше Твоего, о Богомати, благодатнаго врачевания силу, Твоему милосердию себе вверяху, с верою и любовию ко святей иконе Твоей припадающе, таковыми взываху похвалы:

Радуйся, Источниче милосердия неисчерпаемый, неисцельных болезней врачевание содержащий;

радуйся, всех оставленных врачами Твоею благодатною силою исцеляющая.

Радуйся, дев благочестивых невестительнице и усердная о нас молитвеннице;

радуйся, во искушениих и соблазнах житейских блуждающих ко спасению Путеводительнице.

Радуйся, Звездо неугасимая, зрети Бога Вышняго нас просвещающая;

радуйся, растления душевнаго и совести лукавства нас избавляющая.

Радуйся, о Тебе бо матери и дщери, и невесты Христовы надежду имуще, спасаются;

радуйся, божественную радость и вечное спасение уповающим на Тя приуготовляющая.

Радуйся, благословенная в женах Богородице, светом любве Христовой нас озаряющая.

 

Кондак 8

Страшное и ужасное видение людем Божиим бысть, егда у святыя иконы Твоея, Владычице, чудо велие и неизреченное совершися: дщерь бо некая, бесом томимая сущи, хулу страшную на Сию изрекаше, обаче молитв ради Святыя Церкве, наипаче же Твоего предстательства силою, от сего лукавства спасена бысть, и на славословие Твое, Пречистая, подвижеся. Мы же радуемся и веселимся, яко не посмеются о нас врази наши, ниже погубит нас Господь грех ради наших молитвами Твоими. Сего ради, благодаряще, о Тебе вопием Богу: Аллилуиа.

 

Икос 8

Вся в вышних пребывающи и нижних, к Лику Твоему святому припадающих, никакоже оставляеши, Богородице. Сице бо человек, духа злаго имый, с верою моляся пред Пречистым образом Твоим Озерянским, Владычице, исцелен бысть, и в радости душевней о благодеянии на нем бывшем, благодарение Тебе принесе. С ним же и на нас, о Всеблагая, во время благопотребно посети и от ловления диаволя души наша сохрани, да не постыдимся, ниже посрамимся, принося Ти сицевыя похвалы:

Радуйся, яко именем Твоим, паче всякаго имене, пленения диаволя и всея силы вражия человецы свобождаются;

радуйся, яко призывающий имя твое от клеветы человеческия и внезапныя смерти Тобою избавляются.

Радуйся, бедствующим на всяком месте всеусердная Предстательнице;

радуйся, за обидимых, озлобленных и уничиженных присная Ходатаице.

Радуйся, Ты бо кающихся грешников из челюстей духов злобы изымаеши;

радуйся, Ты бо всех на Тя уповающих в любовь Божию вводиши.

Радуйся, красотою девства Твоего воспевати величие Божие нас научающая;

радуйся, Рождеством Сына Твоего грозное смерти жало притупляющая.

Радуйся, благословенная в женах Богородице, светом любве Христовой нас озаряющая.

 

Кондак 9

Вси, сущии в бедах, болезнех и печалех, радостно восхвалим Святую Заступницу нашу, Богородицу, обретшую благодать у Бога, во еже недужныя исцеляти, немощныя укрепляти, плененныя свобождати и стражущия от духов нечистых и прочих бед избавляти. Темже, яко несомненней Предстательнице нашей, умильно глаголем: помози и научи нас, о Милосердствующая Мати, волю Божию всегда творити, и пребывати в любви Его, и яко кадило благовонное, непрестанно приносити Ему: Аллилуиа.

 

Икос 9

Витии многовещаннии недоумеют, что глаголати о Тебе, Мати Божия, видяще тайну необъемлемую и величие неописуемое святаго Лика Твоего, Дево Чистая, даром чудотворений сияющаго и всех, припадающих к нему с верою, цельбоносными дарами снабдевающаго. Мы же, неисчетная благодеяния сия ведуще, аще и от скверных устен наших, обаче умиленною душею и сердцем сокрушенным, дерзаем воспевати Тебе сия похвалы:

Радуйся, Отца Небеснаго благоволения предображение, кающихся грешников милосердием Божиим снабдевающая;

радуйся, Едина Мати милосердия, вдов и сирот милующая и питающая.

Радуйся, на горе Афонстей, Почаевстей и в иных обителех иконами Твоими преславно чудодействующая;

радуйся, новую купель Силоамскую в пустыне Озерянстей верным на утешение источившая.

Радуйся, иноков благоподвизающихся к Отечеству Небесному верная Предводительнице;

радуйся, супружеств христианских благословение и чад их Преблагая Покровительнице.

Радуйся, Церкве Небесныя присное радование, земныя же от всех козней вражиих непреодоленное избавление;

радуйся, в вечнем Царствии Сына Твоего радости неизреченныя верным уготовление.

Радуйся, благословенная в женах Богородице, светом любве Христовой нас озаряющая.

 

Кондак 10

Спасительное прибежище и Твоего Предстательства уверение, и милосердия Твоего явление – икона Озерянская нам, Владычице, показася, пред Нею же души наша в молитве изливаем и верою Тебе вопием: воззри, Милосердая, на люди Твоя, вся скорби наша и печали утоли, утешение благое в сердца наша низпосли, и спасение вечное душам нашим, Пречистая, испроси, да спасаеми Тобою, Сыну Твоему и Богу нашему благодарно зовем: Аллилуиа.

 

Икос 10

Стену тверду и от бед ограждение, противу козней вражиих спасительное прибежище, недугов исцеление и ины дары многи в святей иконе Твоей, Владычице, обильно даровала еси нам. Сию благоверный христолюбец, иже ушесы своими зело страдаше, в трикратном явлении видев, со умилением к Той припадая, благодатнаго исцеления сподобися. Тако видяще любве Твоея, Богомати, неисчерпаемое море, дерзающе, молимся: услыши нас убогих, грешными усты глаголющих Ти сицевая:

Радуйся, Предвечнаго Царя Родительнице, Церкве Православныя забрало и ограждение;

радуйся, народа нашего от бед Хранительнице, и от всех врагов избавление.

Радуйся, наша всеусердная Благодетельнице, паству Харьковскую матерински опекающая;

радуйся, Цвете Небеснаго благоухания, благодатным миром сердца наша растворяющая.

Радуйся, незримая Предстательнице, Ты бо воистину крепость наша и спасение;

радуйся, благоутробная и милостивая к человеком, болезней наших надежное исцеление.

Радуйся, благая хлебодательнице, дождями ранними и поздними землю нашу напояющая;

радуйся, от враг видимых и невидимых, возстающих на ны, нас избавляющая.

Радуйся, благословенная в женах Богородице, светом любве Христовой нас озаряющая.

 

Кондак 11

Пение всеумиленное приносим Ти, Всемилостивая Владычице! Не вемы бо, что сотворим, егда внезапу найде на нас страшный час смерти? На Тя все упование наше возлагаем, и к Твоей святей иконе, юже на утешение нам даровала еси, припадающе, просим: буди милостива к нам, грешным, и не презри молений наших, но всели в сердца наша печаль по Бозе, Спасителе нашем, да пламенною любовию зовем Ему: Аллилуиа.

 

Икос 11

Светозарную свещу, во мраце жития сущим неугасимую, зрим святую икону Твою, Всенепорочная, – Твоего милосердия источник, благодать всем источающий, у него же мнози грешницы, кающеся, спасение улучиша, и Твоим ходатайством Царствие Небесное обретоша. Помози и нам, Всемилостивая, да Твоими Матерними молитвами с мудрыми девами Царствию Христову приобщимся, идеже веселящеся вопием Ти таковая:

Радуйся, приятное молитвы кадило, за спасение мира у престола Святыя Троицы присно благоухающая;

радуйся, органе молитвы неумолкающия, милосердия Божия миру просящая.

Радуйся, равноапостолов и проповедников евангельския истины благодатное вдохновение;

радуйся, верных иерархов Церкве Христовы правило веры и от скорбей избавление.

Радуйся, храмов Божиих усердных строителей и верных в них служителей любовию Христовою обогащение;

радуйся, трудолюбивых земледельцев хлебом жизни вечныя насыщение.

Радуйся, Божественною красотою Сына Твоего и Бога нашего непрестанно наслаждающаяся;

радуйся, Его же, яко Судию и Бога, о спасении мира неотступно умоляющая.

Радуйся, благословенная в женах Богородице, светом любве Христовой нас озаряющая.

 

Кондак 12

Благодати Твоея земное знамение дати восхотевши, источник чудес неисчетных пажити Харьковстей в иконе Твоей Озерянской отверзла еси, Владычице. В ней же Божественная благодать, еюже Всевышний облагодатствова Тя, знамения и чудеса выну содевает, душевных и телесных недугов исцеление всем, с верою притекающим, подает. Темже и нам благодати сея помощь у Сына Твоего, Пречистая, испроси, да не погибнем люте без покаяния, но Тобою спасаемии, немолчно поем Единому Светозарному Богу: Аллилуиа.

 

Икос 12

Поюще любве Твоея бездну неизреченную, юже изливаеши роду христианскому, благодарно припадающе, молим Тя, Богородице: яко в животе сем, тако и в страшный час смерти не остави нас, но ускори на помощь и, яко воистину Матерь Божия и над всеми владычествующая, от лютых мытарств и руки бесовския души наша исхити и Сыну Твоему и Богу нашему спасены приведи, да якоже на земли, тако и на небеси, со всеми святыми воспеваем Ти таковыя похвалы:

Радуйся, щедрот бездно, от начала веков во главизну нашего спасения предъизбранная;

радуйся, источниче любве неизреченныя, Материю милостивою Страстотерпцем Голгофским миру указанная.

Радуйся, у Креста Сыну Своему сострадавшая, и с Ним мир возлюбившая;

радуйся, Церковь Сына Твоего от всех зол избавляющая, род христианский возвеличившая.

Радуйся, цвете девства неувядаемого, венец всех добродетелей в Себе сплетшая;

радуйся, радуго Божественнаго Знамения, небесныя и земныя у Престола Божия Собою совокупльшая.

Радуйся, всесвятый бо Лик Твой, благодатию и жизнию дышущий, яко рай Божественный, на Тя взирающим;

радуйся, превыше Небес Превознесенная, Отрадо и Утешение непрестанно Тя величающим.

Радуйся, благословенная в женах Богородице, светом любве Христовой нас озаряющая.

 

Кондак 13

О Преблагословенная Мати Христа Бога нашего, Церкве Небесныя предивное украшение, земныя же щит и утверждение, всем во всяких скорбех Матернее заступление, и среди соблазнов мира сего благодатное душ наших озарение! Приими, Всемилостивая, сие убогое моление наше, пред Пречистым образом Твоим Тебе приносимое, и умоли Всеблагаго Бога явити милость Свою на ны и на народы наша, во еже в силе и благодати Духа Святаго всякое зло препобеждая, николиже в любви Божией не насытитися, и тако чистым сердцем зде и в будущем веце воспевати святых Святейшему Слову: Аллилуиа.

Этот кондак читается трижды; затем икос 1 и кондак 1.

 

Тропарь и молитва перед иконой Пресвятой Богородицы «Озерянская»

 

Тропарь, глас 3

Твоего предстательства уверение и милосердия Твоего явление икона Озерянская нам, Владычице, показася; пред неюже души наша в молитве изливаем и верою Тебе вопием: воззри, Милосердая, на люди Твоя, вся скорби наша и печали утоли, утешение благое в сердца наша низпосли и спасение вечное душам нашим, Пречистая, испроси.

 

Молитва

От суеты житейския возникше и ума своего помыслы во едино собравше, ко Твоей, Богородице, иконе очи душ и телес наших воздвизаем, и Тебе взываем сице: не остави, Пречистая, нас, немощных, во гресех наших растлетися, не попусти злому демону души наша от Сына Твоего в дебри страстей отгнати, но помози нам Того заповеди присно памятовати, да ниже блудным возбешением себе предаем, ниже друг друга злобою угрызаем, но якоже днесь, святыни Твоей предстояще, о исправлении жития нашего ревностию распаляемся, тако и от храма Твоего в дома своя отшедше, сие доброе намерение сохранити потщимся. По сих же и телесныя наша нужды утоли, и горести Твоею молитвою исцели, Всепетая. Вемы, яко подобаше нам паче вся сия благодушне претерпевати и точию о терпении в скорбех Господа просити: но понеже изнемогают в печалях душы наша и помыслы уныния нашу колеблют веру, сего ради в сокрушении сердец к Тебе сице взываем: якоже безчисленныя болящия страдальцы исцелила еси и скорбящия утешила еси, тако и нас, пред чудотворною Твоею иконою припадающих и в скорби Тебе молящихся, услыши и всех прошения во благое исполни, болящим здравие, скорбящим утешение подающи, во вражде сущим мир от Бога низпосылающи, сомнящимся же веры утверждение. Услыши грешныя рабы Твоя, Пречистая, воздвигни нас на благодарственное Ти славословие, да умножится вера людей Твоих, да прославится в них Твое заступление, да тако Царствие Сына Твоего посреди нас утвердится. Емуже подобает всякая слава, честь и поклонение, со Безначальным Его Отцем, и Пресвятым и Благим и Животворящим Духом, ныне и присно, и во веки веков. Аминь.

 

Акафист Пресвятой Богородице перед иконой Ея, именуемой «Песчанская»

 

Кондак 1

Взбранной Воеводе, всего мира Утешительнице и Надеждо спасения рода христианского, к Тебе припадаем во вся дни жизни нашей, яко к источнику всех духовных дарований, и молим Тя: услыши нас, вопиющих к Тебе в часы дневныя и нощныя, в болезнех и скорбех, в нуждах и напастях всегда в радости зовущих: Радуйся, Владычице мира, иконою Твоею Песчанскою сердца наша утешающая.

 

Икос 1

Ангелом Предстателем наченши, восхваляет Тя, Матерь Божию, вселенная вся, яко Ты еси свет просвещения разума нашего, Ты Посредница между нами и Богом, Твои матерния молитвы много могут пред престолом Вседержителя, Ты десницею Своею приводиши нас от земли к небеси, Ты неизглаголанное и непостижимое спасения нашего сокровище, и сего ради не веемы, грешнии, киими похвалами воспети благодарная Тебе, но приими от сердец наших величания сия:

Радуйся, в райской радости всегда пребывающая;

радуйся, таковую радость нам желающая.

Радуйся, любящих Сына Твоего чадами Своими именующая;

радуйся, в истинной вере нас сохраняющая.

Радуйся, от ереси и расколов нас защищающая;

радуйся, милосердия Божия нам Ходатаице.

Радуйся, о продлении жизни на земле Сына Своего умоляющая;

радуйся, за умерших всех без покаяния выну скорбящая.

Радуйся, с Ангелом-хранителем Хранительнице наша усердная;

радуйся, на Страшнем Суде Сына Твоего едина Надеждо на спасение наше.

Радуйся, Владычице мира, иконою Твоею Песчанскою сердца наша утешающая.

 

Кондак 2

Видеши, о Преблагословенная Мати Божия, како велико беззаконие рода человеческаго, и того ради попусти Господь на землю и живущих на ней глады, моры, трусы, сухости и потопления. Ты же, Всемилостивая, умоли Всеблагаго Бога, да удалит от рода сего фараонитское жестокосердие, и да будет он покорен деснице Господней, да приидет в совершенное покаяние, возопив Ему согласно: Аллилуиа.

 

Икос 2

Разум совершенный небеснаго вестника Гавриила, благовествующего Тебе волю Божию, яко Тебе единей быти блаженней в женах Матери Сына Божия. Яко Сам Бог Отец изрек сатане, искусившему наших прародителей: семя Жены сотрет главу змия, чесого ради обетования Тебе чаяша вси народы. Ты же Сама предрекла еси, яко ублажат Тя вси роди и от того часа вопиют Тебе святое хваление сицевое:

Радуйся, от Превечного Бога всего мира избранная Отроковице;

радуйся, Вместилище, Спасителя Бога во утробу Свою приемшая.

Радуйся, Материю Того от Господа наименованная;

радуйся, от того же времени весь мир Богоматернею любовию покрывающая.

Радуйся, неусыпающая Молитвеннице и Ходатаице наша пред престолом Божиим;

радуйся, живых Надеждо и усопших упование в страшный час Суда Божия.

Радуйся, к доброму ответу за жизнь нашу на Страшнем Суде нас приуготовляющая;

радуйся, от рождества до разлучения души от тела нашего нас не оставляющая.

Радуйся, в радость вечную богоизбранных приводящая;

радуйся, за скорби временныя в палатах вечных ликующая.

Радуйся, Владычице мира, иконою Твоею Песчанскою сердца наша утешающая.

 

Кондак 3

Сила Вышняго спасе мир от потопления греховнаго воплощением от Тебе Сына Божия, Царице Небесная, ибо враг рода нашего, диавол, восхоте погубити в отчуждении от истинного Бога весь род человеческий, в беззаконии и идолослужении ходити поучая. Господь же разрушил есть сети его посланием в мир Сына Своего Единороднаго и Тя, Матерь Чистую, дарова Ему, да побеждена будет сила вражия и да обратятся вси людие ко Творцу Своему и Богу, возопив Ему: Аллилуиа.

 

Икос 3

Имуще таковую Посредницу спасения рода нашего, молящеся непрестанне взывати к Тебе: буди же нам ограждение и стена крепка и необоримая, сохраняй нас в вере православной отеческой во вся дни жизни нашея. Научи нас быти покорными чадами Церкви Сына Твоего, юже стяжа Кровию Своею Честною. Сподоби нас благодарными быти Богу за великия милости Его, научи исполняти заповеди Его и уставы святоотеческия, направляй нас, Всеблагая Мати, на путь спасения. Избави нас от греха и гнева Божия, и наказания вечнаго, за еже воспевати Тебе благодарения таковая:

Радуйся, на небесех царствующая и нас доле не оставляющая;

радуйся, всех радостей неисчерпаемый Источниче.

Радуйся, горечь жизни нашея услаждающая;

радуйся, недремлющая Покровительнице, нас же спящих сохраняющая.

Радуйся, на труды дневные нас благословляющая;

радуйся, благодарения Богу приносити нас научающая.

Радуйся, во дни праздников на путь к храму Божию стопы наша направляющая;

радуйся, житейское попечение во дни святыя оставляти повелевающая.

Радуйся, за непочитание дней святых наказующая;

радуйся, сладчайшим учением Сына Твоего, яже есть едино на потребу, души насыщающая.

Радуйся, Владычице мира, иконою Твоею Песчанскою сердца наша утешающая.

 

Кондак 4

Бурю различных скорбей и страданий утоляти хотяще, людие Вознесенския церкви и вси окрест живущие слышаша о велицей силе благодатней, исходящей от иконы Богоматери во граде Изюме, притекоша и припадающе к ней с радостию великою, яко к Самой сущей Царице Небесной, град сей и живущих в нем зело возлюбившей и благодатным светом от иконы Своея Песчанския озарившей. Имуще же вси едину надежду на Тя, Пречистая, и в веселии сердец возопиша Богу: Аллилуиа.

 

Икос 4

Слышаша людие вси, яко верный Богу и Тебе, Богомати, служитель Твой святитель Иоасаф, узрев во сне икону Твою в неведомом храме в сорном месте лежащую, и лучезарное сияние из нея исходящее, потщася воспоминанием чудного видения, направити стопы своя на путь искания святыни сея во всей обширной епархии своей. Егда же града Изюма достиже, вшед в церковь, виде икону Твою, Богомати, в притворе угли кадильны ограждающую, и абие воспомяну есть нощное видение и благодать от нея исходящую ощути. Долго с умилением, взирая на лик Твой и осенив себя крестным знамением, смиренно пад на колени пред нею громогласно молящеся: «Царице Небесная! Прости небрежность Твоих служителей, не ведят бо, что творят». Тебе же Самой во умилении сердца возопи таковая:

Радуйся, икон Своих чудотворных Хранительнице усердная;

радуйся, в сонных видениях от икон Своих многим силу благодатную показующая.

Радуйся, ветхия иконы лучезарным сиянием обновляющая;

радуйся, христианам, в бедах сущим, ко святым иконам Твоим обращатися повелевающая.

Радуйся, святителя Иоасафа с ранней юности возлюбившая;

радуйся, первыя его моления пред святыней сей приявшая.

Радуйся, его же душу со всеми святыми на небо преселившая;

радуйся, его же святые мощи чудотворною силою обогатившая.

Радуйся, святителя Иоасафа, молитвенника за Русь Святую на небо избравшая.

Радуйся, Владычице мира, иконою Твоею Песчанскою сердца наша утешающая.

 

Кондак 5

Яко боготечную звезду восприимше людие изюмские икону Твою от рук святителя, потщашася новый храм Богу устроити, и бысть между создателями его распря на время некое. Но из загробного мира некая умершая жена Екатерина, трижды являяся своему богатому мужу в сонном видении с чудотворною иконою Богоматери Песчанскою, повелела ему оставити скупость свою, ея же ради погибель души его бысть, и соорудити храм на богатство свое. Он же, со страхом приняв вразумление свыше на сие, созда храм в честь Вознесения Сына Твоего, Пречистая, и в веселии сердца возопи Богу: Аллилуиа.

 

Икос 5

Видевши исполнение Промысла Божия на себе во обретении святыни Песчанския, пребысть святитель Иоасаф во граде Изюме три дня и три нощи, по всяк час вознося в церкви благодарственное молебное пение пред пречистым образом Богоматери, за еже удостоился чудного видения глас слышати от него: «Сею иконою Пресвятая Владычица являет особое знамение Своего заступничества для града сего и страны целыя»; сего ради возопи Богородице:

Радуйся, иконою Песчанскою, якоже и первонаписанною святым Лукою, благодатию Твоею и Рождшагося от Тебе обогатившая;

радуйся, сердца наша неизреченною радостию наполняющая.

Радуйся, во граде Изюме, аки втором Назарете, с нами незримо пребывающая;

радуйся, иконам Своим силу чудодействовати дарующая.

Радуйся, земных и малодушных нас не оставляющая;

радуйся, печаль житейскую от сердец наших прогоняющая.

Радуйся, безродных сирот Своим Покровом и благодатию сохраняющая;

радуйся, невинно осужденных и оклеветанных к вечной правде приводящая.

Радуйся, жизненный крест, данный нам волею Божею, нести нам помогающая.

Радуйся, Владычице мира, иконою Твоею Песчанскою сердца наша утешающая.

 

Кондак 6

Бысть некий учитель во граде сем Изюме, у него же младенцы друг за другом умираша. Егда же последний бысть одержим болезнью велией, вземше родители его и несоша к иконе Твоей, Богомати, имуще едину надежду на Тя. Еще же на пути сущу конец постиже младенца сего. Но родители его, имуще великую веру Тебе, Пречистая, положиша младенца умершаго пред иконою Твоею. Во время же пения молебнаго начаша со слезами и воплем горьким взывати: «Мати Божия, помози нам, спаси чадо наше». Ты же, Всемилостивая, видя твердую веру их и упование на Тя, возвратила жизнь маденцу, тогда же и людие, окрест стоящие, в радости неизреченной прославляху Тя, Пречистая, и Вседержителя Господа хваляху песней: Аллилуиа.

 

Икос 6

Новое чудо показа Царица Небесная, егда во время пения «О Всепетая Мати» воскресшему младенцу уста откры и повелела еси ему велиим гласом воздати хвалу Тебе. Вси же, зряще знамение сие, во умилении сердечнем возопиша Тебе таковая:

Радуйся, умерших оживление;

радуйся, рыдающих родителей увеселение.

Радуйся, чудесами от иконы Твоея к Себе призывающая;

радуйся, из пропасти неверия светом разума Евангелия восхищающая.

Радуйся, Подательнице утешения унывающим;

радуйся, Небесная Воспитательнице, детей наших страху Божию и целомудрию научающая.

Радуйся, у Сына Твоего и Бога нашего обилие всяких благ нам испросившая;

радуйся, во время страдания Сына Твоего оружие скорбное в душу Свою приявшая.

Радуйся, на умирающего Сына Твоего на Кресте за грехи мира взирающая;

радуйся, и нас на смертном одре не оставляющая.

Радуйся, Владычице мира, иконою Твоею Песчанскою сердца наша утешающая.

 

Кондак 7

Хотяще явити ко всем приходящим милосердие Свое и гнев Свой на служителя алтаря Господня, юже во искушение впадши, от врага рода человеческого завистию мучим, дерзнув запретити молебное пение Царице Небесной пред иконою Ея всем жителям в весех живущим, порази его Матерь Божия лютою болезнию. Он же, осознав грех свой и силу гнева Божия, егда принесоша его на одре и положиша пред чудотворным образом, начаша молити Богородицу: «Мати милосердная, прости ожесточение сердца моего и воздвигни от одра болезни». По окончании же пения молебнаго исцеление восчувствовав, восстав, облобыза честный образ Твой, со слезами благодарно вопия Богу: Аллилуиа.

 

Икос 7

Возсия светом знамений и чудес, егда принесена бысть икона Твоя чудотворная, Богомати, в новый созданный храм. Люди верныя стекахуся со всех окрест жилищ своих и наполняху не токмо храм, но и ограду церковную, и вси аки усты праведныя Елизаветы взываху: «Откуда нам сие, да прииде Мати Господа нашего во град Изюм», – да в радости духовной взываху Тебе сицевая:

Радуйся, первейшая Помощнице в создании храма нашего;

радуйся, обогатившая оный иконою Твоею чудотворною.

Радуйся, Небесная Госпоже граду Изюму, яко же и многим градовом страны нашея чудотворную икону давшая;

радуйся, многих жителей града сего и весей, унылых, скорбных и в бедах сущих, благодатию от иконы Твоея возвеселившая.

Радуйся, град наш Покровом Твоим присно покрывающая;

радуйся, маловерных и неверных чрез чудодейственную силу от иконы Песчанския к вере в Бога приводящая.

Радуйся, Богоматернею любовию нас согревающая;

радуйся, нас на Твой образ, яко на живую Матерь Бога нашего очима веры взирающих, сохраняющая.

Радуйся, приемлющая нас, яко едину надежду на Тя имущих на помилование у Бога и спасение Тобою чающих;

радуйся, по благодати, яко же и Сын Твой, везде Сущая и всякое прошение верных Своих исполняющая.

Радуйся, Владычице мира, иконою Твоею Песчанскою сердца наша утешающая.

 

Кондак 8

Странно и сумнительно неверующим слышати, о Преславная Мати Царя Небесного, како на Твой святый образ вернии людие очима своима и умиленными душами взираху, от всех скорбей избавляются и от бед сохраняются. Премилосердная Мати Божия, не точию телесныя недуги исцеляеши, но и беснующемуся лета многи от иконы Своея Песчанския вражию силу прогнала еси. Буди же нам, Всеблагая, Ходатаицей о спасении нашем, да вечно славим Тя со всеми небожителями, вопия Богу хвалебную песнь: Аллилуиа.

 

Икос 8

Вся бывши горе, и земных не оставляеши, о Всеблагая и Всемилостивая Мати Божия, Ты же, яко и Сын Твой, не хощеши смерти грешнику, но еже обратитися и живу быти ему. За таковую милость Твою взываем вси Тебе:

Радуйся, иереев Божиих вразумление;

радуйся, временно наказующая и вечно милующая.

Радуйся, в болезнех сущих к Себе призывающая;

радуйся, пастырям Церкви о величии благодати священства всегда напоминающая.

Радуйся, надежду имущих на Тя никогда не посрамляющая;

радуйся, расслабленным телесне и духовне скорое врачевание подавающая.

Радуйся, во всякой беде и нужде нас не оставляющая;

радуйся, исцелениями родителей детям радость возвращающая.

Радуйся, умирающим детям здравие дарующая и родителей от печали избавляющая;

радуйся, в конце мира всем деснаго стояния желающая.

Радуйся, Владычице мира, иконою Твоею Песчанскою сердца наша утешающая.

 

Кондак 9

Всякое естество ангельское удивися о неописуемом море чудес, изливаемом от икон Твоих, Богородице. Помазанием елея от лампады горящей пред святою иконою Твоею Песчанскою Ты некоторой болящей Анне исцеление руки даровала еси. Тя ублажают вси роди, Тя величают вся Небесныя силы, и мы, земнороднии, Тебе едину ограду и утешение в жизни сей временней прославляюще, Тебе и Сыну Твоему вопием: Аллилуиа.

 

Икос 9

Ветия многовещанныя не могут воспети достойно тайны Твоего, Владычице, строения спасения человеков, егда за беззакония людей Господь попусти велицей болезни во граде Изюме быти и во всех весех его, и множество людей погибоша. Страх же нападе на всяк возраст, темже взяша Пречистый образ Твой, несоша его освящения ради улиц и домов, с молитвою слезною взывающи: «О, Всеблагая Целительнице, спаси нас от смерти лютыя». Ты же, Всемилостивая, укротила бурю смертную, люди же научила благодарственно воспевати Богу славу подобающую, Тебе же Самой взывати сице:

Радуйся, покаянными слезами души наша от греховныя скверны очищающая;

радуйся, оставленных врачами с омертвением удес оживлением от иконы Песчанской радости велия сподобляющая.

Радуйся, радость в домы наша приносящая иконою Своею Чудотворною;

радуйся, родителей милующая и детей сохраняющая.

Радуйся, слепца из града Воронежа во град Изюм призвавшая и от иконы Своея чудотворныя зрение ему даровавшая;

радуйся, Врачебнице наша Всемилосердная, недуги наша туне исцеляющая.

Радуйся, нас ради Небо оставляющая и в скорби сущим на земли помогающая;

радуйся, и в самый час кончины страдания наша утоляющая.

Радуйся, Поборнице наша на рати злобных сил поднебесных;

радуйся, в адских мучениях томящихся о спасении их Сына Своего умоляющая.

Радуйся, Владычице мира, иконою Твоею Песчанскою сердца наша утешающая.

 

Кондак 10

Спасти хотя люди Своя от зол многих, даровала еси икону Твою, Владычице, слепым – в прозрение, хромым – в хождение, расслабленным – в восстание, беснующимся – в исцеление, гордым – в смирение, нераскаянным – в покаяние, всем коегождо недуга – исцеление, зол и скорбей, и болезней отгнание, градов утверждение, земли плодоносие, за няже от земнородных не возможет достойно восхваляти Тя по величеству милости Твоея к роду человеческому. Но мы, любовию понуждаеми, дерзаем взывати Богу, усыновившему нас Тебе при Кресте Своем и даровавшему нам таковую Путеводительницу на небо, поя Ему: Аллилуиа.

 

Икос 10

Стена еси всем, прибегающим к Тебе, Дево, всегда являющися и почитателю иконы Твоея Игнатию, имевшему благое намерение посетить святый град Иерусалим и святую Землю, юже освяти Господь стопы Своими, Помощницей явилася еси, егда он, падши пред образом Твоим, просяще на путь благословения и помощи Твоея. Ты же, Всещедрая, неотложно чрез рабу некую обильную помощь денежную подала еси ему, да исполнит благое желание свое. Он умиленною душею вознесе Тебе благодарственное хваление сицевое:

Радуйся, добрые намерения благословляющая;

радуйся, на путь к Царствию Небесному нас наставляющая.

Радуйся, в Небесном Иерусалиме жизни вечно всем желающая;

радуйся, к благочестию и целомудрию жизнь нашу наставляющая.

Радуйся, бракосочетающимся на верную супружескую жизнь иконами Своими благословляющая;

радуйся, непокорным и враждующим чадам Церкви, Страшным Судом грозящая.

Радуйся, благотворителей и украсителей святых храмов небесною красотою вознаграждающая;

радуйся, за ленивых и нерадивых о спасении своем зело скорбящая.

Радуйся, любящих Тя и Сына Твоего милостию Своею покрывающая;

радуйся, о Госпоже, Ты наша Мати Божия и Мати всех матерей и всего рода христианского.

Радуйся, Владычице мира, иконою Твоею Песчанскою сердца наша утешающая.

 

Кондак 11

Пение хвалебно благодарственное приносяще Тебе, Владычице, вемы каковую скорбь приносим мы, грешнии, Сыну Твоему отступствы своими, маловерием, суеверием и прочими грехами. Молити убо Тебе, Всемилостивая, не престанем. Своим предстательством и ходатайством пред престолом Божиим соедини нас во Святей Соборной и Апостольской Церкви, да будем вси едино, яко же Отец, Сын и Святый Дух, да в единстве веры воспеваем Богу: Аллилуиа.

 

Икос 11

Яко светоприемную свещу явила еси, Владычице, икону Твою во граде сем Изюме, источник благодатной воды открыла еси подле храма Сына Твоего, идеже икона Твоя чудотворная Песчанская пребывает. Слепорожденному младенцу прозрение от нея даровала еси, за еже людие от времене того почерпают благой дар сей на пользу душевную и телесную. Тебе же Самой Владычице от усердия своего взывают:

Радуйся, чудотворною силою водный источник доныне сохраняющая;

радуйся, воды кроплением вражию силу от домов и семейств наших отгоняющая.

Радуйся, яко же от иконы, тако и от источника великия щедроты верным дарующая;

радуйся, безматерних младенцев Сама Матерь их присносущная.

Радуйся, скитальцев, не имущих покрова земного, Обитель для них небесную приготовляющая;

радуйся, в лютых болезнех к Тебе вопиющих терпение им ниспосылающая.

Радуйся, гонимых, в темницах томимых за любовь к Сыну Твоему и Богу нашему, небесною радостию утешающая;

радуйся, за охлаждение веры, попрание славы Божией выну скорбящая.

Радуйся, к долготерпению и милосердию о грешном мире Господа Сил умоляющая;

радуйся, во время жизни земной все скорби мира сего познавшая.

Радуйся, Владычице мира, иконою Твоею Песчанскою сердца наша утешающая.

 

Кондак 12

Благодать исходит всегда, Пречистая, от иконы Твоея Песчанския, яко непобедимая Воевода на враги наша, видимыя и невидимыя, нечистыя духи прогоняеши, враждующих миром и любовию умудряеши, непокорных наказуеши, раздоры семейныя союзом любве связуеши, неведущих и неверующих на путь истинный наставляеши, мы же, прославляя Тя, Всеблагую Помощницу в жизни нашей, благодарно воспеваем Богу: Аллилуиа.

 

Икос 12

Поюще Твое из древних времен дивное защищение Отечества нашего, егда постигоша его глады и моры, огнь и опустошение, нашествия иноплеменных и междуусобныя брани, у Тебе, Владычице, отцы и матери и малыя дети со слезами помощи просяще. Ты же, Всеблагая, спасение даровала еси неотложно, покрывала Покровом Своим Отечество наше. Мы же Тебе, Избавительнице нашей, со умилением приносим сие благодарение и похвалы сия:

Радуйся, правоверных верная Хранительнице;

радуйся, правыя брани Споборнице.

Радуйся, христианских обителей и всех святынь Хранительнице;

радуйся, о Отечестве нашем пред Богом Молитвеннице.

Радуйся, во времена нашествия иноверных наша Освободительнице;

радуйся, во время глада наша Кормительнице.

Радуйся, и в радостях житейских Ты нас благоразумию научающая;

радуйся, Всемилостивая Молитвеннице, мира миру у Бога умоляющая.

Радуйся, Свете наш прекрасный и вечный.

Радуйся, Владычице мира, иконою Твоею Песчанскою сердца наша утешающая.

 

Кондак 13

О Всепетая Мати, прими от нас благодарное пение сие, Тебе возносимое. Прости нам, Всемилосердная, яко по немощем нашим не возмогохом изглаголати всех благодеяний от иконы Твоея Песчанской. Но буди с нами в жизни сей и Ходатаицей пред Богом о жизни вечной, да всегда благодарно восхваляем Тя и Богу вопием: Аллилуиа.

Этот кондак читается трижды; затем икос 1 и кондак 1.

 

Тропарь и молитва перед иконой Пресвятой Богородицы «Песчанская»

 

Тропарь, глас 4

О Пречудная, Преблагословенная Мати Христа Бога нашего! Лучезарным небесным светом от иконы Своея Песчанской град Изюм и люди страны нашей Тебе присно озаряеши. Руце Свои Пречистыя к Тебе молящим простираеши. О Всеблагая, Ты многотекущая река божественной благодати. Ты нас под покровом Своим сохрани, Сына Своего о нас моли и в горний Иерусалим введи.

 

Молитва

О Премилостивая и Премилосердная Мати Божия, Покровительнице града нашего Изюма и страны нашея, купно же и всего мира Молитвеннице! Приими коленопреклонение ума и сердца нашего и услыши молитвы, во умилении душ наших Тебе возсылаемыя, якоже издревле приимала еси и молитвы любящих душ зде, пред иконою Твоею возносимыя. Помози нам в побеждении прелестей и соблазнов мира сего, не попусти нам отверженным быти вечнаго небеснаго блаженства. Ты едина наша радость и утешение в жизни сей временней, Ты едина наша надежда в жизни вечней. Веруем, яко Ты Своею Богоматернею любовию и снисхождением удостоиши нас с Собою вожделеннаго Царствия Сына Твоего. Тебе убо просим: не отступай от нас, Всеблагая, защищай от всех козней вражиих, не попусти нас чрез грехи наша лишитися милосердия Божия, изжени из нас леность в молитве и посещения храма Божия. Избави нас от малодушия, уныния, вражды, гнева, подозрения, зависти, клеветы, ненависти и гордости бесовския. Вразуми поправших заповеди Церкве Христовы. Сродником нашим даруй мир и любовь, да согласно поживут родители и дети. Да будет в стране нашей правда Божия, да сохранятся в народе нашем святоотеческия обычаи. Вознеси, о Всеблагая, усердныя молитвы пред Богом о всего мира умирении, да не погибнет род людский в пламени опустошения всемирнаго, да познают вси народи Отца своего Небеснаго и Тя, Матерь Божию, Заступницу рода христианскаго. Приведи вси народы к истинному покаянию и жизни греховныя исправлению, да не будет нам страшен день Страшнаго Суда Божия, но сподобит нас Господь с Тобою вечныя радости небесныя, Емуже подобает всякая слава, честь и поклонение, Отцу и Сыну, и Святому Духу, ныне и присно, и во веки веков. Аминь.

 

Акафист Пресвятой Богородице перед иконой Ея, именуемой «Ахтырская»

 

Кондак 1

Избранней от всех родов Божией Матери и Царице, предивно цельбоносную икону Свою явившей, на нейже у Креста Христова стоящую Заступницу нашу видяще, похвальное Той возглашаем пение; Ты же, Госпоже Всемилостивая, яко имущая милосердие неизреченное, теплым Твоим предстательством и заступлением от всяких нас бед и недугов свобождай, во умилении Тебе зовущих: Радуйся, Благодатная, непрестанно за нас Христу молящаяся.

 

Икос 1

Ангелов Царице и всея твари Владычице, Пречистая Дево Богородице, егда у Креста возлюбленнаго Сына Твоего предстояла еси, Того страдания, нас ради претерпенная, зрящи, тогда сердцем люте уязвлялася еси: воистину оружие скорбное пройде душу Твою. Темже и мы, многоболезненное Твое у Креста предстояние, на иконе изображенное, видящи, сице вопити Тебе дерзаем:

Радуйся, Отца Безначальнаго Невесто прекрасная;

радуйся, Сына Предвечнаго Родительнице неискусобрачная.

Радуйся, Духа Святаго палато непорочная;

радуйся, Троицы Живоначальныя Таиннице Божественная.

Радуйся, ангельских воинств удивление;

радуйся, рода человеческаго возвышение.

Радуйся, воспеваемая от Херувим;

радуйся, велегласно славимая от Серафим.

Радуйся, радость неизреченную в нетленнем рождестве Сына Твоего приявшая;

радуйся, скорбь велию Того в смерти крестней претерпевшая.

Радуйся, благодать, во еже скорбныя утешати, от Него приявшая;

радуйся, радость милосердаго Твоего заступления всему миру даровавшая.

Радуйся, Благодатная, непрестанно за нас Христу молящаяся.

 

Кондак 2

Видев Тя, Богородительнице чистая, на Кресте пригвожденный Сын Твой и Бог у Креста Его предстоящу и болезненному Тому состраждущу, возлюбленному ученику Своему Иоанну Тя в Матерь нарече и сим весь род христианский Тебе усынови, да будеши воистину Мати всем скорбящим, Сына Твоего Христа Бога призывающим и поющим Ему: Аллилуиа.

 

Икос 2

Разума неразуменна вольнаго Христова страдания не разумеша богоубийцы иудее и Тебе, Богоневесто, горце обезчадиша, мы же Тя, у Креста Сына Твоего и Господа на иконе изображенную, видяще, тепле веруем, яко скорбныя гласы молитвенник Твоих приемлеши и того ради благодарне глаголем:

Радуйся, о Христе Спасителе нашем и нам Благая Мати;

радуйся, всех нас в скорбный час страстей Его усыновившая.

Радуйся, нас, сирых и безпомощных, Твоею матернею любовию не оставляющая;

радуйся, милосердым ухом Твоим к нам приникающая.

Радуйся, крест скорбных испытаний сама добльственно понесшая;

радуйся, Твоим сострастием и нам несение его облегчающая.

Радуйся, в земней юдоли скорбей несумненная наша надежда и утешение;

радуйся, в будущем веце всех верных радость и защищение.

Радуйся, страхом смерти и суда Божия спящия совести пробуждающая;

радуйся, коснеющия во гресех к покаянию спасительному приводящая.

Радуйся, из рова погибельнаго отчаянныя исхищающая;

радуйся, в светлыя обители покоя вечнаго труждающихся возводящая.

Радуйся, Благодатная, непрестанно за нас Христу молящаяся.

 

Кондак 3

Силою Божиею, чрез святыя иконы Твоя являемою, спасати нас не престаеши, Всеблагая Владычице: тако и зде в малороссийстем граде нашем великия чудеса светоносным явлением многоцелебнаго образа Твоего показала еси; емуже поклоняющеся с любовию, вопием Христу Богу: Аллилуиа.

 

Икос 3

Имущи матернее попечение о людех, Честною Кровию Сына Твоего искупленных, Госпоже Пресвятая, благодатную икону Твою в былии травнем смиренномудрому иерею Даниилу явити благоволила еси и сию светоносным сиянием и чудесы многими прославила еси, да вси вернии похвальными песньми Тебе взывают:

Радуйся, многотекущий источник милости Божией нам даровавшая;

радуйся, залог Твоего матерняго о нас попечения пречудно преподавшая.

Радуйся, иерею благоговейному в травнем злаце икону Твою святую явившая;

радуйся, солнцеподобными лучами тую озарившая.

Радуйся, наш малый град чудесы великими прославльшая;

радуйся, незнамое дотоле имя его всем верным известно сотворившая.

Радуйся, всю Церковь Российскую явлением иконы Твоея духовно возвеселившая;

радуйся, всю страну нашу покровом Твоим святым осенившая.

Радуйся, верным исцеления от иконы Твоея подающая;

радуйся, неверныя чудесы Твоими посрамляющая.

Радуйся, скоропослушно молитвам смиренным внемлющая;

радуйся, скорбная воздыхания страждущих и печалию угнетенных незримо утоляющая.

Радуйся, Благодатная, непрестанно за нас Христу молящаяся.

 

Кондак 4

Буря недоумения смути Даниила иерея, святую икону Твою обретшаго, обаче со страхом молебно к Тебе возопи, да будеши ему в животе Помощница, в час смертный Заступница; сему убо и мы подражающе, таяжде моления Тебе, Мати Божия, возносити дерзаем, Владыце же живота и смерти, Христу Богу зовем: Аллилуиа.

 

Икос 4

Слышав иерей Даниил во сне повеление Твое, Пречистая Дева, да омыет водою лик Твой Святый на иконе и да украсит сию благолепно, потщася волю Твою благоговейно исполнити, Тебе же, Своим милосердием неизреченным его взыскавшей, благодарственно вопияше:

Радуйся, Мати Господа Вышняго;

радуйся, яко Господь присно с Тобою пребывает.

Радуйся, небес похвало и земли заступление;

радуйся, рода христианскаго непрестанное пение.

Радуйся, любящая смиренныя сердцем;

радуйся, богатящая нищия духом.

Радуйся, избранныя рабы своя благодатно посещающая;

радуйся, в сониих и видениих волю Свою им открывающая.

Радуйся, светлостию иконы Твоея мрак грехов прогоняющая;

радуйся, знаменми и чудесы от нея источаемыми в Православней вере всех утверждающая.

Радуйся, верным Путеводительница ко спасению;

радуйся, кающимся Утешительница и упование.

Радуйся, Благодатная, непрестанно за нас Христу молящаяся.

 

Кондак 5

Боготечная звезда святая и чудотворная икона Твоя, Владычице, явися, дивным сиянием храмину смиренномудраго иерея Даниила озарившая, вода же, икону Твою омывшая, целебную силу прияти сподобися: темже люди, с верою сию поюще и тою окропляеми, врачевство благодатное получиша и хвалу Богу сице воспеша: Аллилуиа.

 

Икос 5

Видев иерей Даниил в соннем видении Тя, Владычице, во образе Невесты прекрасныя явльшуюся и от омытия иконы Твоея воду слиянную недужным вкушати повелевшую, позна Тя, Преблагословенная Дево, Целительницу благодатную и, тою водою болящую исцелив, во умилении сердца вопияше Тебе:

Радуйся, в недузех страждущих врачевство благодатное;

радуйся, болезней многолетних исцеление скорое и совершенное.

Радуйся, единым прикосновением к иконе Твоей святей здравие недугующим подающая;

радуйся, водою и елеем, от нея освященным, смертне болящие возставляющая.

Радуйся, пред Сыном Твоим и Богом дерзновенная наша Предстательнице;

радуйся, гнев Его, праведно на нас движимый, на милость преклоняющая.

Радуйся, скорбию сокрушенных Утешительнице;

радуйся, печалию удрученных Ободрительнице.

Радуйся, радосте наша пресвятая;

радуйся, отрадо наша неизглаголанная.

Радуйся, премилосердая требующим Помощнице;

радуйся, рода христианскаго неусыпающая Попечительнице.

Радуйся, Благодатная, непрестанно за нас Христу молящаяся.

 

Кондак 6

Проповедник чудес, от иконы Твоея явленных, иерей Даниил явися, егда целебный Твой образ, Владычице, в храм Божий принесе и благоговейно постави, да всеми видим пребывает и, аки залог благодатный Твоего к людям благоволения, почитается, о немже радующеся, яко о сокровище Богом даннем, зовем дароподателю Христу: Аллилуиа.

 

Икос 6

Светом многоразличных чудес святую икону Твою, Богомати, прославивши и обретшаго ю, яко избранника Своего знаменовавши, сего путем скорбных лишений и напастей к блаженству райскому возвела еси, егоже и нас сподоби, Госпоже Всемилостивая, с верою и любовию Тебе взывающих:

Радуйся, поборников веры и благочестия к чертогом Отца Небеснаго приводящая;

радуйся, надеждою благ вечных скудость благ временных восполняющая.

Радуйся, слезами горести и лишений нечистоту греховную омывающая;

радуйся, попущением земных скорбей путь к радостям райским открывающая.

Радуйся, кроткия духом во уповании на Тя утверждающая;

радуйся, гонимым за правду Царствие Небесное уготовляющая.

Радуйся, иконою Твоею святою преславно чудодействующая;

радуйся, дивныя знамения тою совершающая.

Радуйся, служителей Церкви Христовой благодатная помоще;

радуйся, иереев благоговейных богомудрая Наставнице.

Радуйся, веры православныя утверждение;

радуйся, рода христианскаго возвышение.

Радуйся, Благодатная, непрестанно за нас Христу молящаяся.

 

Кондак 7

Хотящи паче прославити икону Твою святую, Богомати, и богатыя милости от нея людем низпослати, некия жены предсмертную мольбу о дщерех ея, пред иконою Твоею вознесенную, дивно услышала еси и, благочестивейшей царице Елисавете во сне явившися, осиротелыя отроковицы воспитати той повелела еси, яже до конца живота своего Твою милость памятующе, Всевышнему Отцу сирот благодарственно воспеваем: Аллилуиа.

 

Икос 7

Дивное повеление Твое исполняющи, благочестивейшая царица, обе юные отроковицы со тщанием воспита и сама на поклонение чудотворному Твоему образу прийти потщася, идеже храм благолепен соорудити повеле, в немже ныне предстояще, благоговейно вопием Ти:

Радуйся, безматерних сирот незримая Воспитательнице;

радуйся, юных и безпомощных дев благосердная Попечительнице.

Радуйся, матернею любовию Твоею всяк возраст верных объемлющая;

радуйся, во благих усердныя молитвы исполняющая.

Радуйся, царства российскаго благодатное утверждение;

радуйся, церкве святыя благолепное украшение.

Радуйся, Царице Небесная, от цариц земных благоговейное приемшая поклонение;

радуйся, благолепный храм аки жертву приятную, Тебе принесенную, благословившая.

Радуйся, в нем милостиво молитвы верных приемлющая;

радуйся, чудесы многими его святившая.

Радуйся, во храме земнем неизреченную красоту храма небеснаго показующая;

радуйся, молебные гласы земных с гласом сил небесных соединяющая.

Радуйся, Благодатная, непрестанно за нас Христу молящаяся.

 

Кондак 8

Странницы есмы и пришельцы на земли сей, скорбей и болезней исполненней, прелестьми мира сего и наветы духа злобы искушаемии: в Тебе же, Мати Божия, неисчерпаемый источник благодатных дарований обретающе, и Небеснаго отечества, достигнути уповаем, взывающе совершителю нашего спасения Христу Господу: Аллилуиа.

 

Икос 8

Весь мир преблагословенное имя Твое, Богородице, славит, и Твоего Божественнаго лика изображение чтит благоговейно, имже предивная чудеса во вселенней совершаеши. Темже и мы чудотворную икону Твою, Богомати, яко солнце лучами чудес сияющую, видяще, со умилением Тебе взываем:

Радуйся, яко от востока и до запада имя Твое ублажается;

радуйся, яко вси роди благоговейно Тя величают.

Радуйся, Православную Россию паче иных стран возлюбившая;

радуйся, чудотворными иконами Твоими сию обогатившая.

Радуйся, сиянием чудес Твоих мрак ересей и расколов прогоняющая;

радуйся, богатыми милостьми Твоими неверныя к вере приводящая.

Радуйся, ревнителей веры Христовой многопопечительная Наставнице;

радуйся, отпадающих от нея грозная Обличительнице.

Радуйся, ищущих Христова просвещения светом Боговедения озаряющая;

радуйся, хулителей веры православныя в пучину томления душевнаго ввергающая.

Радуйся, надежду имущих на Тя николиже оставляющая;

радуйся, моления верных присно исполняющая.

Радуйся, Благодатная, непрестанно за нас Христу молящаяся.

 

Кондак 9

Вся ангельская воинства служат Тебе, Владычице Мира, превознесенну в Сионе Небеснем Тя созерцающе, и неземными похвалами чествуют Тя с любовию. Единому же прославившему Тя Богу немолчно взывают: Аллилуиа.

 

Икос 9

Витийство человеческое не может достойно прославити Тя, Мати Господа вышних сил: изумевают бо и умы ангельстии пети Тя, Богородице, обаче мы грешнии, благодарне Тя чтуще, сицевыя песни, аки детей лепетание, Тебе приносити дерзаем:

Радуйся, лествице, небо и землю соединившая;

радуйся, стамно, благодати Божия преисполненная.

Радуйся, Бога Слова в плоть земнородных облекшая;

радуйся, дольнему миру Христа Спасителя породившая.

Радуйся, именем Матере Божия возвеличенная;

радуйся, превыше небес вознесенная.

Радуйся, пред Неюже силы ада и тьмы трепещут;

радуйся, Юже светлии лици небесных сил славословят непрестанно.

Радуйся, святых храмов благодатное освящение;

радуйся, иноческих обителей покров и снабдение.

Радуйся, христианских жилищ благодатное охранение;

радуйся, всего мира освящение.

Радуйся, Благодатная, непрестанно за нас Христу молящаяся.

 

Кондак 10

Спастися всем верным желающи, обильно на вся, притекающия к Тебе, Богородице Дево, дары Твоея благодатныя помощи изливаеши и Твоим матерним покровом от козней и ловления диавольскаго всяк возраст ограждаеши, верно вопиющих Богу: Аллилуиа.

 

Икос 10

Стена еси девам, Преблагословенная Дево, и всем верным от враг видимых и невидимых покров и защищение. Темже помощь Твою благую от святаго образа Твоего являти нам и доднесь не престаеши, к немуже припадающе, умильно взываем Тебе:

Радуйся, домы наша иконою Твоею благословляющая;

радуйся, нивы и пажити наша осенением ея освящающая.

Радуйся, возвеянием добрых ветров и росою благовременных дождей земли плодородие дарующая;

радуйся, всю тварь от щедрот Сына Твоего обильно питающая.

Радуйся, грады и веси наша от смертоносныя язвы спасающая;

радуйся, в годину бедствий на помощь к нам ускоряющая.

Радуйся, яко Твоя матерняя молитва много может к благосердию Владыки;

радуйся, яко Твоим предстательством от прещения за грехи наша бываемаго освобождаемся.

Радуйся, от жития временнаго отходящих державная Заступнице;

радуйся, в грозный час смертный верным изрядная Пособнице.

Радуйся, ключу Царствия Христова;

радуйся, двере райская.

Радуйся, Благодатная, непрестанно за нас Христу молящаяся.

 

Кондак 11

Пение благодарственное приносим Ти, Владычице Пречистая, яко многоцелебный Твой образ нам даровала еси, на немже плачущую Тя зрим со умилением: убо и наше окаменелое в беззакониих сердце слезами умиления напои обильно, о Всеблагая, да, ими от скверны греховныя очистившеся, сподобимся пети со святыми Царю Славы, Христу Богу: Аллилуиа.

 

Икос 11

Светоносная лампада, елеем милости преисполненная, явилася еси в Церкви Христовой, Владычице, вся концы земли светом истиннаго Боговедения просвещающая и к блаженству вечному приводящая зовущих Ти таковая:

Радуйся, суемудрие противников веры Христовы посрамляющая;

радуйся, чистоту догматов Православия чудесы Твоими охраняющая.

Радуйся, заблудшим от пути праваго Путеводительнице ко спасению;

радуйся, во прегрешения тяжкая впавшим Пособнице к покаянию и исправлению.

Радуйся, в сердца закоснелых грешников светлый луч надежды на прощение Божие вселяющая;

радуйся, тем от отчаяния и вечныя гибели души их спасающая.

Радуйся, благовестником учения Христова всегдашняя Помощнице;

радуйся, проповедником Царства Божия Богоглаголивая Споспешнице.

Радуйся, молитвы верных к престолу Небеснаго Царя возносящая;

радуйся, и Сама пред Сыном Твоим и Богом всегда о нас молящаяся.

Радуйся, мира Заступнице;

радуйся, милости и щедрот неоскудевающий источниче.

Радуйся, Благодатная, непрестанно за нас Христу молящаяся.

 

Кондак 12

Благодати залог, многоцелебный образ Твой даровала еси нам, Владычице, к немуже притекающие, прилежно молимся Тебе: приими, Госпоже Всеблагая, пред сим чудодейственным образом приносимое Тебе поклонение и в напастех наших помощь и защиту нам подаждь, да выну вопием даровавшему Тебе толикую силу благодати Христу Богу: Аллилуиа.

 

Икос 12

Поюще Твоя чудеса, Богомати Пречистая, проповедуем Твою к христианскому роду милость: се бо и многажды дивная знамения милосердия Твоего, от многоцелебнаго образа Твоего являемая, зде видехом, яже разум наш бренный превосходят и токмо верою постигаются, верных же вопити Тебе подвизают:

Радуйся, образ Твой честный во утешение и освящение нам даровавшая;

радуйся, сим милость многу людем Твоим явльшая и присно являющая.

Радуйся, неоскудный источник помощи и исцелений в нем открывающая;

радуйся, молитвы усердно пред ним возносимыя, благоутробне приемлющая.

Радуйся, о том освященному собору Церкве Российския усты раб Твоих поведавшая;

радуйся, граду нашему милосердие Твое иконы явлением запечатлевшая.

Радуйся, крестному поклонению ею нас научающая;

радуйся, силу спасительную распятия Христова на ней показующая.

Радуйся, руце Твои в помощь нам простирающая;

радуйся, всем верным двери милосердия Божия отверзающая.

Радуйся, Судию праведнаго о нас умоляющая;

радуйся, Царствия Небеснаго верныя сподобляющая.

Радуйся, Благодатная, непрестанно за нас Христу молящаяся.

 

Кондак 13

О Всепетая Мати, Сладчайшаго Господа нашего Иисуса Христа нетленно рождшая и спасительным страданием Его многоболезненно спострадавшая, приими милостиво сие малое моление наше, пред многоцелебным Твоим образом с любовию Тебе приносимое, и всемощным Твоим предстательством и заступлением избави нас от временныя напасти и муки вечныя, да сподобимся, по кончине жития нашего, со всеми святыми взывати Спасителю Богу: Аллилуиа.

Этот кондак читается трижды; затем икос 1 и кондак 1.

 

Тропарь и молитва перед иконой Пресвятой Богородицы «Ахтырская»

 

Тропарь, глас 4

Преблагословенная Дево, Богородительнице Чистая, у Креста Сына Твоего и Бога нашего предстоящи, скорбь велию претерпела еси и благодать от Него прияла еси сущия в скорбех утешати; темже на пречистый образ Твой благоговейно взирающе, и изображенную Тя на нем пред Крестом Спаса нашего видяще, умиленно к Тебе вопием: Заступнице усердная, Благая и милостивая! Ускори избавити ны от всякия скорби, нужды и болезни, и спаси души наша, да Тя со благодарением славим во веки.

 

Молитва

О Преблагословенная и Многомилостивая Владычице мира! Се мы, грешнии, на святый образ Твой взирающе и на нем Тя в скорби и сострадании распятому за нас Христу Спасителю предстоящу видяще, усердно молим Тя, известную о нас к Сыну Твоему молитвенницу: не остави нас в день испытания и скорби, но во искушениих и напастех нам бываемых огради нас всечестным покровом Твоим от враг видимых и невидимых и даждь нам силу, во еже всесовершенную и благую волю Творца и мира Владыки творити. Зриши бо, милостивая Заступнице наша, колико грехам всяческим подвержени есмы: не токмо бо волею согрешаем, но и неволею в многоразличныя прегрешения впадаем. Сего ради к Тебе, державней устроительнице спасения христианскаго, прибегаем и умиленно вопием: ум наш познанием Божественныя истины просвети, сердце наше теплотою христианския любви и спасительных желаний согревай, волю же нашу в нелицемерном заповедей Господних исполнении утверди. Ей, Госпоже Премилостивая, приникни с высоты небесныя к воздыханиям и молитве нас, грешных: исцели болезни недужных, умири сердца озлобленных, даждь терпение страждущим, внуши страх Божий обидящим, укрепи гонимыя за правду, сироты и вдовы защити, подаждь утешение плачущим, испроси прощение кающимся, демонскую же бурю страстей во грешных душах утиши и в сердцах, чтущих Тя, Христову кротость и любовь вкорени и духом милосердия и сострадания сия утверди; отпадшыя же от веры еретики и отступники к познанию истины направи и уста нечестивых, хулящих Святую Церковь и веру православную поносящих, загради. Отшедшим от жития сего отцем и братиям и сестрам нашим, о Мати Божия, прощение грехов и предначатие блаженства вечнаго испроси. Егда же и нашея кончины час приближится, тогда убо, о Владычице, приими душу нашу и в сонме праведных сию упокой, идеже лици Ангел и святых угодник немолчно славословят державу и милость Отца и Сына, и Святаго Духа, и Твое матернее о нас предстательство и заступление, ныне и присно, и во веки веков. Аминь.

 

Акафист Пресвятой Богородице перед иконой Ея, именуемой «Почаевская»

 

Кондак 1

Взбранной Воеводе родов христианских и страны нашея известней Избавительнице хвалебныя песни принесем, вернии, на святей горе Ея собравшеся; Ты же, яко имущая милосердие неизреченное, О Владычице Богородице, моления нашего, пред чудотворным Твоим образом возносимаго, не отвержи, да в умилении сердец зовем Ти: Радуйся, Похвало Почаевская и всего мира Надеждо и Утешение.

 

Икос 1

Архангел Гавриил первее радуйся тебе приношаше, Владычице, егда зачатие Сына Божия благовествоваше, по преславнем же Успении Твоем вся Небесныя силы туюжде хвалу на Небеси Тебе непрестанно приносят; како убо мы, грешнии, своя гласы с гласы Безплотных совокупити дерзнем? Обаче милосердие Твое ко всем кающимся поминающе, устне наша со страхом и любовию отверзаем, глаголюще сице:

Радуйся, милости бездно;

радуйся, любве неистощимое море.

Радуйся, рода христианскаго Благая Предстательнице;

радуйся, обители Почаевския стено нерушимая.

Радуйся, православныя люди на гору Почаевскую узами любве привлекающая;

радуйся, всякую печаль от душ их отгоняющая.

Радуйся, Еяже чудотворный образ, яко звезда, от горы Почаевския нас путеводствует;

радуйся, Ейже возносимыя молитвы страстныя прилоги вскоре отражают.

Радуйся, явлением Своим на горе сей люди утешившая;

радуйся, след стопы Твоея на ней нам оставившая.

Радуйся, верных присное дерзновение;

радуйся, сумнящихся доброе утверждение.

Радуйся, Похвало Почаевская и всего мира Надеждо и Утешение.

 

Кондак 2

Видевше пустынницы почаевстии и простец Иоанн босый Пресвятую Богородицу на скале, во огненном столпе явльшуюся, след стопы Ея налобызаху и водою, зде камени истекшею, окропляяся, вопияху Богу: Аллилуиа.

 

Икос 2

Разум недоразумеваемый о явлении Твоем, Владычице, ищуще, в сицевом уповании утверждается, яко первее от агарян, послежде от еретиков оплот Православия на горе Почаевстей утвердити благоволила еси, сего ради в Твой святый храм приходяще, теплою верою сердца наша исполняем, глаголющи:

Радуйся, истинныя веры утверждение;

радуйся, зловерия явное обличение.

Радуйся, древле в Неопалимей Купине Синайстей известившаяся;

радуйся, христианом в столпе огненном зде явившаяся.

Радуйся, яко в пещи горящей, росою спасеннии, Авраамстии отроцы Тя предвозвестиша;

радуйся, яко водою от следа стопы Твоея исцеленнии благодать Твою проповедаша.

Радуйся, землю нашу, древле от агарян разоренную, явлением Твоим тогда утешившая;

радуйся, и ныне многими знаменьми молящияся зде ободряющая.

Радуйся, кающихся скорое услышание;

радуйся, подвизающимся помощь и прибежище.

Радуйся, и неведущих вразумление;

радуйся, и малодушных укрепление.

Радуйся, Похвало Почаевская и всего мира Надеждо и Утешение.

 

Кондак 3

Силу сугубыя благодати явила еси, Владычице, на горе Почаевстей, егда место явления Твоего по триех стех летех чудотворною иконою Своею обогатила еси, юже рукою святителя Неофита Еллина, из Москвы грядущаго, первее боярыне Анне даровала еси, потом же от нея во обитель Почаевскую прияла еси, радующимся людем и поющим Богу: Аллилуиа.

 

Икос 3

Имущи в дому своем икону Твою, Владычице, боярыня Анна, и исцеление от нея слепорожденному брату своему Филиппу бывшее уведевши, абие духом ревности о славе Твоей возгоре и обитель из камене во имя Пречестнаго Успения Твоего пустынником почаевским устрояет, в ней же, чудотворному образу Твоему поклоняющися, взывает сице:

Радуйся, сокровище богатное в Твоей святей иконе нам преподавшая;

радуйся, святителя рукою дарованным образом Твоим землю нашу освятившая.

Радуйся, души наша от земнаго богатства отвращающая;

радуйся, Славу Божию пети нас научающая.

Радуйся, яко чудеса Твоя зряще, к Небеси сердцы своими восхищаемся;

радуйся, яко во обители Твоей, аки в преддверии рая обретаемся.

Радуйся, православныя люди иконою Твоею утешившая;

радуйся, от всех стран молящияся люди во обитель Почаевскую призывающая.

Радуйся, еюже вера умножается;

радуйся, еюже уныние отгонится.

Радуйся, иноков почаевских присное Радование;

радуйся, мирских людей непостыдное Упование.

Радуйся, Похвало Почаевская и всего мира Надеждо и Утешение.

 

Кондак 4

Буря еретическаго неистовства на святую обитель Твою устремившися, Владычице, святую икону Твою рукою злых иконоборцев пленивши и на злохуление тех подвигши, вскоре гневом Божиим удержана бысть, егда невидимая сила безстудне пиршествующия хульники, аки Артаксеркса и Ирода, сляче и в недуг вверже, над святынею Твоею ругавшихся и не уведевших пети: Аллилуиа.

 

Икос 4

Слышаша иноцы почаевстии и вси православнии людие, яко святая икона Твоя по седминадесятих летех еретическаго пленения во святую обитель от посрамленных хулителей возвращается, абие на сретение ея изыдоша и плач свой на радость преложше, вопияху Тебе:

Радуйся, христианом прибежище;

радуйся, еретиков обличение.

Радуйся, обитель Почаевскую иконы Твоея до конца не лишившая;

радуйся, злохуление иконоборцев посрамившая.

Радуйся, яко в бедах не унывати и нас научаеши;

радуйся, яко Правосудию Божию веровати нам повелеваеши.

Радуйся, Еюже Православие во стране нашей утвердися;

радуйся, Еюже и вся вселенная воплощенную истину прияти сподобися.

Радуйся, долготерпение Божие подражающая;

радуйся, в терпении люди Твоя утверждающая.

Радуйся, яко смиреннии Тобою утешение приемлют;

Радуйся, яко горделивии Тобою смиряются.

Радуйся, Похвало Почаевская и всего мира Надеждо и Утешение.

 

Кондак 5

Боготечная звезда ищущим спасения явилася еси, Владычице, к Солнцу Правды сих приводящая, якоже бо в земнем житии Твоем о людех Предстательница к Сыну Твоему в Кане Галилейстей показалася еси, тако и по преславном Твоем на Небеса отшествии, моления о верных, от конец земли приносимая, к Сыну Твоему возносиши и зде, на горе Почаевстей, исцеления многоразличная от Него людем подаеши, вопиющим Богу: Аллилуиа.

 

Икос 5

Видеша людие, на гору Почаевскую, якоже в древняя, тако и в последняя лета притекающии, множества исцелений, Тобою подаваемая, в желании спасения души своя утверждаху и о гресех своих покаяние теплое приношаху, вопиюще Тебе:

Радуйся, слепых прозрение и хромых исцеление;

радуйся, бесных от демонов избавление.

Радуйся, плененнаго инока во обитель Твою на воздусе чудесне возвратившая;

радуйся, младенца Симеона предумерша по молитве старицы воскресившая.

Радуйся, яко в сих знамениих сила древних чудес Твоих людем паки явися;

радуйся, яко исцеления от святыя иконы Твоея и в последняя дни не оскудеша.

Радуйся, во всем мире источник исцелений от святых икон Твоих подающая;

радуйся, паче сих духовными дарованьми молящияся обогащающая.

Радуйся, Еюже православнии роди хвалятся;

радуйся, к Еяже помощи и маловернии притекают.

Радуйся, земнородных упование;

радуйся, Небесных чинов радование.

Радуйся, Похвало Почаевская и всего мира Надеждо и Утешение.

 

Кондак 6

Проповедницы славы Пречистыя Девы явишася агаряне, на обитель Почаевскую нашедшии и видения Пречистыя Богородицы с преподобным Иовом первее не уразумевшии; егда бо стрелы, от них пущаемыя, паки на ня устремишася, абие силу Владычицы проразумевше и покаяние о безумии своем принесше, верою возопиша: Аллилуиа.

 

Икос 6

Возсия видение Твое, Владычице, на горе Почаевстей, егда братия обители, зело от агарян осаждаема, с велиим воплем моление пред святою Твоею иконою и пред ракою преподобнаго Иова возношаше, егда же братия агаряны, видением сим смятенныя и бежащия, виде, абие с веселием воспе Тебе сице:

Радуйся, Избавительнице наша и спасение;

радуйся, рода христианскаго присное вспоможение.

Радуйся, нечестивыя враги от Твоея святыни отгнавшая;

радуйся, в покаяние их приводящая.

Радуйся, Еяже и невидимии спасения нашего врази трепещут;

радуйся, Ейже Святии Ангели и преставльшиися праведницы на Небеси поклоняются.

Радуйся, преподобнаго Иова в молитву с Собою приемшая;

радуйся, агаряны ко Святому Крещению видением Своим приведшая.

Радуйся, яко Тобою вернии страх смертный в конец отложиша;

радуйся, яко Тебе ради нецыи от агарян богобоязненнии иноцы зде явишася.

Радуйся, истины присное изъявление;

радуйся, заблуждающимся доброе вразумление.

Радуйся, Похвало Почаевская и всего мира Надеждо и Утешение.

 

Кондак 7

Хотящи желание Вечнаго Живота возгрети в сердцах христианских, Пресвятая Богородица болящия чудесы Своими исцеляет, бесы изгоняет, плененныя свобождает, мертвыя воскрешает, да мы вси, силу Божию уразумевше, земная возненавидим и о душах своих попечение приложим, непрестанно вопиюще Богу: Аллилуиа.

 

Икос 7

Новыя и тягчайшия беды претерпе обитель Почаевская, егда вкупе со всею страною, от Православия лестию отторженная, во обладание еретиков вдадеся, обаче прошедшим стом и десятим летом паки православным христианом вдана бысть, в нюже православнии иноцы, пришедше и святыя мощи преподобнаго Иова из-под спуда изъемше, к чудотворному образу Владычицы припадаху, глаголюще:

Радуйся, Православия защитнице;

радуйся, еретиков обличительнице.

Радуйся, обитель Твою до конца не оставившая;

радуйся, страху Божию нас научающая.

Радуйся, яко предстательством Твоим страна Волынская паки ко Православию возвратися;

радуйся, яко от лет древних мнозии еретицы Твоим вразумлением исправишася.

Радуйся, во святую Лавру Твою верных на молитву паки призывающая;

радуйся, и неверныя зде поклонятися православней святыне научающая.

Радуйся, Юже праведницы и праведнии непрестанно воспевают;

радуйся, в Нейже и падшии в покаянии притекают.

Радуйся, отступников к вере возвращение;

радуйся, прельщаемых к свету истины возведение.

Радуйся, Похвало Почаевская и всего мира Надеждо и Утешение.

 

Кондак 8

Странное чудо зрим о Тебе, Богомати, елико бо телеснии недузи святыя Твоея иконы целованием и воды почаевския кроплением исцеляются, тако и душевныя страсти видением святыни Твоея отъемлются, вера утверждается и умиления сердца наша исполняются, поющих Богу: Аллилуиа.

 

Икос 8

Весь аз недостойный грехами исполнился, мирскому рассеянию вдався и о души своей вознерадев, обаче на святую икону Твою, Владычице, взирая, и просвещение от нея безчисленным людем, зде приходящим, видя, паки на путь спасения устремляюся и в радости сердца воспеваю Ти сице:

Радуйся, чистоты сокровище;

радуйся, милостей бездно.

Радуйся, к Сыну Твоему о верных моления выну приносящая;

радуйся, моления грешных не отвергающая.

Радуйся, яко Тобою мнози отчаяния греховнаго избегоша;

радуйся, яко призывающии имя Твое от падения страннаго возсташа.

Радуйся, Еюже иконоборная ересь во вселенней посрамися;

радуйся, Еюже истинная вера Волынской стране возвратися.

Радуйся, к подвигу целомудрия души возводящая;

радуйся, обидящим прощати научающая.

Радуйся сердец наших умиление;

радуйся, душ наших упование.

Радуйся, Похвало Почаевская и всего мира Надеждо и Утешение.

 

Кондак 9

Всякия отступства и еретическая блуждания покаявшемуся народу земли Волынския отпустила еси, Владычице, и паки источник исцелений от чудотворныя Твоея иконы от следа стопы Твоея на горе Почаевстей в православной Лавре Твоей людем открыла еси, токмо аще покаяние о гресех своих принесут Богу и о Твоей помощи не сумнящеся, возопиют ему: Аллилуиа.

 

Икос 9

Ветия славы Твоея явишася, Владычице, слепии и хромии исцеление от Твоея иконы, православным людем возвращенныя, приявшии, яко и еретической жене некоей болящей Тя в помощь призвати и по исцелении истинную веру исповедати и облобызати, нам же вопити Тебе сице:

Радуйся, Царя Небеснаго умоление;

радуйся, земных присное предстательство.

Радуйся, от лютерских заблуждений жену некую недуга исцелением отвратившая;

радуйся, вся люди во истине Православия уверившая.

Радуйся, яко Тебе ради православнии людие столькраты прельщения агарянская победиша;

радуйся, яко Тебе ради и совращеннии от латын паки Православную веру облобызаша.

Радуйся, к Нейже вси живущии молитвенно очи воздвизают;

радуйся, Юже и молящиися о упокоении умерших в помощь призывают.

Радуйся, и от житейских нужд притекающия к Тебе изъемлющая;

радуйся, паче сих всякия нужды претерпевающим крепость дарствующая.

Радуйся, христолюбивому воинству во бранех вспоможение;

радуйся, на демоны воинствующим благое наставление.

Радуйся, Похвало Почаевская и всего мира Надеждо и Утешение.

 

Кондак 10

Спасти хотяше, Пречистая Богородица, препростую некую старицу, во ослеплении латынстем бывшую и внуку малую имущую, Православием убо просвещенную, но телесными очесы слепотствующу, темже сима обема благое желание влагает, еже на горе Почаевстей чудотворному Ея образу поклонитися, идеже абие слепую отроковицу чудесне исцеляет и старицу Православную веру исповедати научает, вопиющую Богу: Аллилуиа.

 

Икос 10

Стена нерушимая истинныя веры явилася еси, Владычице, зане якоже нечестивии еретицы от прославления Тебе, яко Истинныя Богородицы, со упорством отвергошася, тако и православнии в вере Твоей тверди пребыша, и от молитв непрестанно Тебе приносимых николиже отвратитися восхощут, и сих ради еретических глагол во ушеса своя приимати не дерзнут, но сердцем благодарным восхваляти Тя не престанут, глаголюще:

Радуйся, христианом отрадо и утешение;

радуйся, ангельским чином славо и поклонение.

Радуйся, от льстивых глагол еретических нас отвращающая;

радуйся, памятованием милостей Твоих умы наша к Богу возносящая.

Радуйся, святыя апостолы ко Успению Твоему на облацех воздушных призвавшая;

радуйся, и грешныя люди в той день на гору Почаевскую в тысящах и тмах на всяко лето собирающая.

Радуйся, Еяже ради христиане трудность пути, аки сладкое упокоение, подъемлют;

радуйся, Еяже ради и ленивии подражати им тщатся.

Радуйся, иноком сладость мирскую забыти благодатию Твоею пособствующая;

радуйся, вспять озирающияся сновиденьми грозными устрашающая.

Радуйся, Церкве Христовы лучшая диадимо;

радуйся, страны нашея щите неодолимый.

Радуйся, Похвало Почаевская и всего мира Надеждо и Утешение.

 

Кондак 11

Пение благодарное о Твоих, Владычице, благодеяниях во всем мире от христиан возносимое, аки фимиам к Небеси непрестанно восходящий помышляюще; и наша убогая хваления не отвратити Тебе просим, еще же и благодать покаяния даровати Тебе молим, со упованием поюще Богу: Аллилуиа.

 

Икос 11

Свет живота временнаго и Вечныя Жизни упование явилася еси, Владычице, человеку некоему в Бессарабии умрети имущему, но внезапу, по вкушении воды от святыни Почаевския, здраву бывшему, еже сродницы его видевше, со страхом и умилением Тебе воззваша:

Радуйся, болящих исцеление;

радуйся, скорбящих слышание.

Радуйся, Тобою бо смерть пришедшая отгнася;

радуйся, Тобою бо вера несумненная нам даровася.

Радуйся, яко предвещание Гавриила пред очию нашею сбывается;

радуйся, яко от всех родов, по глаголу Твоему, ныне и присно ублажаешися.

Радуйся, гору Почаевскую, яко место пребывания Твоего освятившая;

радуйся, аки вторый Назарет тую явившая.

Радуйся, яже никогоже упования отвратившая;

радуйся, всех молитвы тепле приемлющая.

Радуйся, здравие нам подавающая;

радуйся, ко спасению нас возводящая.

Радуйся, Похвало Почаевская и всего мира Надеждо и Утешение.

 

Кондак 12

Благодать исцелений и умиления молитвеннаго от Твоея, Владычице, иконы источаемая, да не вотще душам нашим будет, аще бо грех ради во окамененное бесчувствие впадохом; обаче, яко имущая власть мертвыя воскрешати, и наше пробуди душевное омертвение, и помыслом лучшим сердца наша озари, да греховную прелесть возненавидевше, воспоем Богу: Аллилуиа.

 

Икос 12

Поюще Твоя чудеса, во обители Почаевстей явленная, молим Тя, Владычице, лица Твоего от страны нашея не отврати, но и всем, приходящим на святую гору Твою и милости от Тебе ищущим, во благое прошение исполни, да вси воспоют Ти сице:

Радуйся, всеправеднаго Бога умилостивление;

радуйся, христиан ко Христу дерзновение.

Радуйся, торжество веры в Лавре Твоей являющая;

радуйся, сердца человеков любовию распаляющая.

Радуйся, яко древним чудесем подобное зде видети людие сподобишася;

радуйся, яко гора сия, аки вторый Синай, в странах христианских прославися.

Радуйся, Бога на земли явльшагося во чреве Твоем понесшая;

радуйся, человеки молитвою Твоею к Богу возносящая.

Радуйся, икону Твою яко проповедницу спасения во обители Твоей оставившая;

радуйся, след стопы Твоея, целебною водою исполняемый, чудесы прославившая.

Радуйся, с Небесных высот на рабы Твоя призирающая;

радуйся, на благия деяния верныя наставляющая.

Радуйся, Похвало Почаевская и всего мира Надеждо и Утешение.

 

Кондак 13

О всепетая Мати Христа Бога, вся роды христианския любовию Себе всыновившая, достойныя похвалы воспети Тебе недоумеем мы, грешнии, обаче любовию Твоею побеждаемии и к Твоему чудотворному образу очи своя возносяше, молим Тя: в борении и нуждах наших не остави чад Твоих, заступлению Твоему тепле верующих и Сыну Твоему вопиющих: Аллилуиа.

Этот кондак читается трижды; затем икос 1 и кондак 1.

 

Тропарь и молитва перед иконой Пресвятой Богородицы «Почаевская»

 

Тропарь, глас 4

Пред святою Твоею иконою, Владычице, молящиися исцелений сподобляются, веры истинныя познание приемлют и агарянская нашествия отражают. Темже и нам, к Тебе припадающим, грехов оставление испроси, помыслы благочестия сердца наша просвети и к Сыну Твоему молитву вознеси о спасении душ наших.

 

Молитва

К Тебе, о Богомати, молитвенно притекаем мы, грешнии, чудеса Твоя во святей лавре Почаевстей явленная поминающе и о своих сокрушающеся прегрешениих. Вемы, Владычице, вемы, яко не подобаше нам, грешным, чесого просити, токмо о еже Праведному Судии беззакония наша оставити нам. Вся бо нами в житии претерпенная, скорби же и нужды, и болезни, яко плоды падений наших, прозябоша нам, Богу сия на исправление наше попущающу. Темже вся сия истиною и судом Своим наведе Господь на грешныя рабы Своя, иже в печалех своих к заступлению Твоему, Пречистая, притекоша и во умилении сердец к Тебе взывают сице: грехов и беззаконий наших, Благая, не помяни, но паче всечестныя руцы Твоя воздвигши к Сыну Твоему и Богу предстани, да люте содеянная нами отпустит нам, да за премногия неисполненная обещания наша лица Своего от рабов Своих не отвратит, да благодати Своея, спасению нашему пособствующия, от душ наших не отымет. Ей, Владычице, буди спасению нашему Ходатаица и, малодушия нашего не возгнушавшися, призри на стенания наша, яже в бедах и скорбех наших пред чудотворным Твоим образом возносим. Просвети умиленными помыслы умы наша, веру нашу укрепи, надежду утверди, любве сладчайший дар сподоби нас прияти. Сими убо, Пречистая, дарованьми, а не болезньми и скорбьми живот наш ко спасению да возводится, но от уныния и отчаяния души наша ограждающи, избави нас, маломощных, от находящих на ны бед и нужд, и клеветы человеческия, и болезней нестерпимых. Даруй мир и благоустроение жительству христианскому предстательством Твоим, Владычице, утверди Православную веру в стране нашей, во всем мире. Церковь Апостольскую и Соборную умалению не предаждь, уставы святых отец на веки непоколебимы сохрани, всех к Тебе притекающих от рова погибельнаго спаси. Еще же и ересию прельщенных братий наших или веру спасительную в греховных страстех погубивших паки ко истинней вере и покаянию приведи, да вкупе с нами Твоему чудотворному образу покланяющеся, Твое предстательство исповедят. Сподоби убо нас, Пречистая Госпоже Богородице, еще в животе сем победу истины Твоим заступлением узрети, сподоби нас благодатную радость прежде кончины нашея восприяти, якоже древле насельники почаевстии Твоим явлением победители и просветители агарян показала еси, да вси мы благодарным сердцем вкупе со Ангелы, и пророки, и апостолы, и со всеми святыми Твое милосердие прославляюще, воздадим славу, честь и поклонение в Троице певаемому Богу Отцу и Сыну, и Святому Духу, во веки веков. Аминь.

 

Акафист Пресвятой Богородице перед иконой Ея, именуемой «Всецарица»

 

Кондак 1

Новоявленней Твоей иконе предстояще, верни, умильно воспеваем Ти, Всецарице, раби Твои: низпосли цельбы к Тебе притекающим ныне рабом Твоим, да вси радостно зовем Ти: Радуйся, Всецарице, недуги наша благодатию исцеляющая.

 

Икос 1

Ангел предстатель с небесе сшед, рече Всецарице: радуйся! И боговещанным гласом воплощаема Тя зря, Господи, возопи к Ней таковая:

Радуйся, Главизно нашего спасения;

радуйся, Исполнение Зиждителева смотрения.

Радуйся, яко Тобою Бог воплотися;

радуйся, яко Невидимый в Тебе изобразися.

Радуйся, Милость мира внутрь приявшая;

радуйся, одеяние плоти Слову соткавшая.

Радуйся, уму непостижная Горняя Славо;

радуйся, сердца оживившая Небесная Манно.

Радуйся, Звездо, благодати сияние;

радуйся, Источниче, живыя воды излияние.

Радуйся, Богородице, в Женах благословенная;

радуйся, рождшая Спаса, Дево нетленная.

Радуйся, Всецарице, недуги наша благодатию исцеляющая.

 

Кондак 2

Безначальное Слово Отроча младо Тобою бысть, исцеления подая Тя, Дево, чтущим и неизреченное Его Рождество воспевающим: Аллилуиа.

 

Икос 2

Разум недоразумеваемый разумети Дева ищущи, возопи к служащему: Яко Отроковица чистая, како буду Вышняго Матерь – изъясни; к Нейже Гавриил рече со страхом, зовый таковая:

Радуйся, Совета Вышняго Избраннице;

радуйся, гласа молящихся Скоропослушнице.

Радуйся, Сокровище Христова мира;

радуйся, людей Твоих Надеждо и Сило.

Радуйся, раковыя язвы дивная Губительнице;

радуйся, прочих болезней Исцелительнице.

Радуйся, единое миру Заступление;

радуйся, верное в скорбех Избавление.

Радуйся, плач и слезы присно утоляющая;

радуйся, спасения входы всем отверзающая.

Радуйся, Скиптре и Державо Афон населяющих;

радуйся, Жезле монахов и мирян.

Радуйся, Всецарице, недуги наша благодатию исцеляющая.

 

Кондак 3

Сила Вышняго осенивши Тя, Отроковице, плоть прият неизреченно, показа Тя село сладкое, хотящим жати спасение и поющим: Аллилуиа.

 

Икос 3

Прославися дивно святая икона Твоя, Всецарица именуемая, егда цельбоносно явися Богоматери изображение; вопиющим же пред нею с верою исцеления подаеши, да умножаются песни сицевыя:

Радуйся, Мати незаходимаго Света;

радуйся претерпевших до конца Победо.

Радуйся, в болезнех и скорбех сущим Врачевание;

радуйся, сирот и вдовиц Нерушимая Стено.

Радуйся, двери райския отверзающая;

радуйся, труждающихся и обремененных заступающая.

Радуйся, о спасении верных Ходатаице;

радуйся, за род человеческий Молитвеннице.

Радуйся, Лествице небесная, возводящая от земли к небеси;

радуйся, Водо живая, омывающая смертныя грехи.

Радуйся, Агнице, сердца незлобивых хранящая;

радуйся, Покрове, чад Церкви осеняющий.

Радуйся, Всецарице, недуги наша благодатию исцеляющая.

 

Кондак 4

Живот мирови даруя, Владыка мира вселися во утробу Твою неискусомужно; Матерь верных Тя показав, в мире тех воспевати призва: Аллилуиа.

 

Икос 4

Преславная содеяшася о Тебе, Граде Божий, исцелениям бывающим от святыя иконы Твоея; цельбоносныя струи врачеваний приемлюще, благодарственно, о Всецарице, вопием:

Радуйся, Снадобие, боль утоляющее;

радуйся, Прохладо, жар недужных остужающая.

Радуйся, прижигающая раковыя язвы аки пламенем;

радуйся, подымающая со одра оставленных врачьми.

Радуйся, лик Свой Пречистый избранным являющая;

радуйся, от греховных уз разрешающая.

Радуйся, яко Тобою избавление от смерти даровася;

радуйся, яко Тобою безсчетный сонм верных оправдася.

Радуйся, Высото, человеческими помыслы неизследованная;

радуйся, Глубино, единым Словом изведанная.

Радуйся, Пророчествие прежде Тебе бывших патриархов;

радуйся, Наставнице Тебе молившихся иерархов.

Радуйся, Всецарице, недуги наша благодатию исцеляющая.

 

Кондак 5

Пречистый Храм Спасов познахом Тя, Отроковице; к Тебе припадаем, Чистая, да нас соделаеши храмы Божества, вопиющих Ему: Аллилуиа.

 

Икос 5

Видеша чини ангельстии на руку Твоею Создавшаго рукою человеки, и яко Владычицу разумевающе Тя едину, аще и Рабою Себе нарекла еси, потщашася песньми послужити Ти, Благословенней, сицевыми:

Радуйся, Богом поставленная превыше Небесных Сил;

радуйся, чудесными исцеленьми исполняющая мир.

Радуйся, хвалу и славу от небес слышащая;

радуйся, благодарение от земли приемлющая.

Радуйся, яко семя тли в сердцах потребила еси;

радуйся, яко козней диавольских ярем сокрушила еси.

Радуйся, юдоль плачевную исполнившая радостию;

радуйся скорби изменяющая в небесную сладость.

Радуйся, Благоухание Богу приятное;

радуйся, кающихся грешников Веселие изрядное.

Радуйся, Броне правды от искушений;

радуйся, Щите ограждения от вражды и нестроений.

Радуйся, Всецарице, недуги наша благодатию исцеляющая.

 

Кондак 6

Проповедницы богоглаголивии, Спасовы ученицы, предсташа Ти, Дево, чудно, внегда от земли к небеси восходила еси, да единым сердцем и усты воспоют Богови: Аллилуиа.

 

Икос 6

Возсия дивная благодать от иконы Твоея, Всецарице, егда юноша, ученьми сатанинскими омраченный, пред нею паде и недвижим бысть; паче чаяния же от уз мрачных свобожденный, со страхом и радостию взываше Ти сице:

Радуйся, Исправление нечестиваго жития;

радуйся, Утешение страждущих люте.

Радуйся, бесовских полчищ от Церкве Отгнание;

радуйся, мглы греховныя Разсеяние.

Радуйся, козней невидимых Упразднение;

радуйся, демонских чар всемощное Одоление.

Радуйся, Светильниче, прельщенных наставляяй;

радуйся, Облаче, невинных от зла покрываяй.

Радуйся, Холме, небесною манною питающий;

радуйся, Долино, смирением Христовым насыщающая.

Радуйся, Каменю Небесного Царствия;

радуйся, Зерцало превечнаго Света.

Радуйся, Всецарице, недуги наша благодатию исцеляющая.

 

Кондак 7

Хотящу дати Себе в снедь верным, благоволил еси от Девы воплотитися, да приемлюще Пречистое Тело и Кровь Твою, познают Тя, Бога совершеннаго; темже, дивящеся неизреченней премудрости сей, зовем: Аллилуиа.

 

Икос 7

Новое показа таинство явлься Зиждитель, со ученики свершивый Тайную Свою Вечерю; мы же, моляще Всецарицу удостоити нас Божественныя Святыни, восписуем Ей сицевая:

Радуйся, Подательнице Небеснаго Хлеба;

радуйся, Родительнице Вечнаго Живота.

Радуйся, Чаше, Христу приобщающая;

радуйся, душу и тело с Богом сочетавающая.

Радуйся, Лжице златая, исполнь Божественных Таин;

радуйся, драгий Кивоте, вместилище великия Святыни.

Радуйся, Персте, на святую Евхаристию указуяй;

радуйся, Трапезо, предлагающая нам Пищу Святую.

Радуйся, достойных причастников одесную поставляющая;

радуйся, ревнителей Божественныя Литургии от ада избавляющая.

Радуйся, приводящая смертных к Источнику безсмертия;

радуйся, ограждающая чад Своих миром и крепостию.

Радуйся, Всецарице, недуги наша благодатию исцеляющая.

 

Кондак 8

Странное Рождество видевше, житейское всякое отложше попечение, горе имеим сердца; на сие бо Вышний явися, во еже привлещи Тому вопиющия: Аллилуиа.

 

Икос 8

Неотступно в недрах Отеческих пребывая, Слово неописанное на земли плоть бысть; Бог Велий сотвори величие Деве и призре на смирение Рабы Своея, слышащия сицевая:

Радуйся, невместимаго Бога вместившая;

радуйся, надмирнаго Творца миру явившая.

Радуйся, яко сокрушися смерти держава;

радуйся, яко исцелися Адамова рана.

Радуйся, Пластырю, струпы душевныя заживляяй;

радуйся, Елее, язвы телесныя умащаяй.

Радуйся, Утоление болезней раждающих;

радуйся, Облегчение мук умирающих.

Радуйся, нанесшая поражение аду;

радуйся, притупившая смерти жало.

Радуйся, Чаяние всеобщаго воскресения;

радуйся, православных несумненное спасение.

Радуйся, Всецарице, недуги наша благодатию исцеляющая.

 

Кондак 9

Всякое естество ангельское и человеческое удивися величию непостижимаго Твоего воплощения, Слове; недоумевающе же о сей велией тайне благочестия, со страхом и трепетом благодарственно зовем Ти: Аллилуиа.

 

Икос 10

Многоразличными недуги одержимии, о Всецарице, от святыя иконы Твоея паче чаяния исцеления получают, да приимше верою благодать, велегласно взывают Ти:

Радуйся, здравых чад присное Сохранение;

радуйся, болящих ко здравию Преложение.

Радуйся, детей недугующих Исцеление;

радуйся, юных страдальцев Мати.

Радуйся, Восстание на одр болезни поверженных;

радуйся, Отрадо страхом смертным одержимых.

Радуйся, яко внемлеши человеков рыданиям;

радуйся, призревающая на наша стенания.

Радуйся, болей земных небесною радостию Растворение;

радуйся, люте обуреваемых пачеестественное Терпение.

Радуйся, яко уготовляеши плачущим радость;

радуйся, яко снабдеваеши кротких крылома молитвы.

Радуйся, Всецарице, недуги наша благодатию исцеляющая.

 

Кондак 10

Спасти хотя Зиждитель истлевшее грехом человеческое естество, сниде на Тя, яко дождь на руно, и купину Тя соделав неопалимую, Бог сый бысть человек, да воспеваем Ему: Аллилуиа.

 

Икос 10

Стена еси девам, Отроковице чистая, и всем о чистоте радящим: в Тя бо вселися Бог, очищаяй разумныя создания Своя, да избывше всякия скверны, предлагаем Ти сицевая:

Радуйся, молчания взыскующих Собеседнице;

радуйся, Венче хранящих девство.

Радуйся, Начало и Конец духовнаго совершения;

радуйся, Хранилище Божественнаго Откровения.

Радуйся, Троическаго Совета Таиннице;

радуйся, спасения человеков Виновнице.

Радуйся, Вершино, гордым умам неприступная;

радуйся, Убежище, смиренным сердцам доступное.

Радуйся, Чистая, небесе чистейшая;

радуйся, Херувимов и Серафимов честнейшая.

Радуйся, Обрадованная, яко прияла еси от Архангела радование;

радуйся, Утешенная, яко руце Твои осязасте воскресшаго Христа.

Радуйся, Всецарице, недуги наша благодатию исцеляющая.

 

Кондак 11

Пение тщашеся разумное Спасу приносити, всегда неключими, Владычице, остаемся раби Твои; кто бо может достойно воспети Бога, Егоже имя, яко миро излиянное; сего ради вопием Ему: Аллилуиа.

 

Икос 11

Свет велий возсияв во тьме седящим, посети нас, о Дево, Восток свыше, Сын и Бог Твой; Тя соделав свещею на свещнице, светоносным чадом церковным наказует приносити Ти сицевая:

Радуйся, Заре Умнаго Солнца;

радуйся, Вместилище Божественнаго Огня.

Радуйся, Свете, яко одеяние святых соткала еси;

радуйся, Свеще, яко тьму бесовскую отгнала еси.

Радуйся, косных умов Просвещение;

радуйся, грешных сердец Озарение.

Радуйся, Деснице, из моря суетствий изводящая;

радуйся, Луче, путеводящая к Царствию спасающихся.

Радуйся, Молние, нераскаянных поражающая;

радуйся, Громе, губителей устрашающий.

Радуйся, лукавыя совести Просветление;

радуйся, Умилостивление Божия Суда.

Радуйся, Всецарице, недуги наша благодатию исцеляющая.

 

Кондак 12

Благодать дати восхотев, Завета Ветхаго Податель Новый нам дарова; мы же, благодать приимше, не делы закона, но единою верою спасение улучивше, восписуем вси: Аллилуиа.

 

Икос 12

Поюще Твое рождество, якоже древле Израиль в кимвалех сеновную скинию воспеваше, тако мы ныне Тя, Скинию истинну, добродетельми прославляем, да слышиши от всех сицевая:

Радуйся, Песне, воспеваемая горе;

радуйся, Псалме, слышимый низу.

Радуйся, Единому Богу достойно послужившая;

радуйся, Божественней Троице смирением угодившая.

Радуйся, веки Носящаго носившая в Себе;

радуйся, Престоле Содержащаго Вселенную в руце.

Радуйся, Тайно неизреченная веков и времен;

радуйся, Упование твердое народов и племен.

Радуйся, сердечное радование иереев благоговейных;

радуйся, быстрое Слышание молитв церковных и келейных.

Радуйся, Премудрости Доме богозданный;

радуйся, Милости Сосуде, Богом избранный.

Радуйся, Всецарице, недуги наша благодатию исцеляющая.

 

Кондак 13

О Всецарице Мати, рождшая всех святых Святейшее Слово, нынешнее наше приявши песнопение, от всякия смертныя болезни исцели ны и будущаго избави осуждения вопиющих: Аллилуиа.

Этот кондак читается трижды; затем икос 1 и кондак 1.

 

Тропарь и молитва перед иконой Пресвятой Богородицы «Пантанасса» («Всецарица»)

 

Тропарь, глас 4

Образом радостотворным честныя Всецарицы, желанием теплым взыскающих благодати Твоея спаси, Владычице; избави от обстояний к Тебе прибегающих; от всякия напасти огради стадо Твое, к заступлению Твоему взывающее присно.

 

Молитва первая

О Всеблагая, досточудная Богородице, Пантанасса, Всецарице! Несмь достоин, да внидеши под кров мой! Но яко милостиваго Бога любоблагоутробная Мати, рцы слово, да исцелится душа моя и укрепится немощствующее тело мое. Имаши бо державу непобедимую, и не изнеможет у Тебе всяк глагол, о Всецарице! Ты за мя упроси, Ты за мя умоли, да прославляю преславное имя Твое всегда, ныне и в безконечные веки. Аминь.

 

Молитва вторая

О Пречистая Богомати, Всецарице! Услыши многоболезненное воздыхание наше пред чудотворною иконою Твоею, из Афонскаго удела в Россию пренесенною, призри на чад Твоих, неисцельными недуги страждущих, ко святому образу Твоему с верою припадающих! Якоже птица крылома покрывает птенцы своя, тако и Ты ныне, присно жива сущи, покрый нас многоцелебным Твоим омофором. Тамо, идеже надежда исчезает, несумненною Надеждою буди. Тамо, идеже лютыя скорби превозмогают, Терпением и Ослабою явися. Тамо, идеже мрак отчаяния в души вселися, да возсияет неизреченный свет Божества! Малодушныя утеши, немощныя укрепи, ожесточенным сердцам умягчение и просвещение даруй. Исцели болящия люди Твоя, о Всемилостивая Царице! Ум и руки врачующих нас благослови, да послужат орудием Всемощнаго Врача, Христа Спаса нашего. Яко живей Ти, сущей с нами, молимся пред иконою Твоею, о Владычице! Простри руце Твои, исполненныя исцеления и врачбы, Радосте скорбящих, в печалех Утешение, да чудотворную помощь скоро получив, прославляем Живоначальную и Нераздельную Троицу, Отца и Сына, и Святаго Духа, во веки веков. Аминь.

 

Акафист святому великомученику и целителю Пантелеимону

 

Кондак 1

Избранный страстотерпче Христов и врачу благодатный, туне подаяй недугующим исцеления, песньми восхваляем тя, заступника нашего. Ты же, яко имеяй дерзновение ко Господу, от всяких бед и болезней свобождай нас, любовию тебе зовущих:

Радуйся, великомучениче и целителю Пантелеимоне.

 

Икос 1

Ангела земнаго и небеснаго человека вемы тя, славный Пантелеимоне: ангельскою бо непорочностию и мученичеством украшен, преселился еси от земли на Небо, идеже со Ангелы и всеми святыми предстоя Престолу Господа славы, молися о нас, земных, почитающих тя звании сими:

Радуйся; светлосте благочестия;

радуйся, преславный светильниче Церкве.

Радуйся, мучеников пречестных украшение;

радуйся, верных в непоколебимом терпении утверждение.

Радуйся, юности преизрядная похвало;

радуйся, поборниче Христов, в мужестве неодоленный.

Радуйся, произрастший в мире, премирен явивыйся;

радуйся, ангеле во плоти, превосходяй смертных.

Радуйся, небожителю всеблаженный;

радуйся, Божественнаго разума вместилище.

Радуйся, имже вера возвысися;

радуйся, имже прелесть низложися.

Радуйся, великомучениче и целителю Пантелеимоне.

 

Кондак 2

Видя тя Владыка сосуд избран, возлюби души твоея доброту. Ты бо земную всякую сладость и славу презрев, венцем мученическим возжелел еси украситися, уязвлен Божественною любовию, и вдохновенно поя: Аллилуиа.

 

Икос 2

Разум богодухновен имея, о доблий воителю Пантелеимоне, изумил еси царя Максимиана мужеством души твоея и словесы, имиже дерзновенно проповедал еси Христа. Тем похваляюще дерзновение твое, глаголем сице:

Радуйся, угрозы Максимиана презревый;

радуйся, советом нечестивых не покоривыйся.

Радуйся, насаждение истиннаго Богопочитания;

радуйся, искоренение демонскаго служения.

Радуйся, неистовства мучителей изобличителю;

радуйся, идольския прелести низложителю.

Радуйся, разгнавый нечестивых соборища;

радуйся, пременивый тленная на Небесная.

Радуйся, собеседниче невещественных Ангелов;

радуйся, сликовствователю многострадальных святых.

Радуйся, имже сатана посрамися;

радуйся, имже Христос прославися.

Радуйся, великомучениче и целителю Пантелеимоне.

 

Кондак 3

Силою Вышняго, дарованною тебе, и крепким терпением твоим обезсилил еси мучителеву дерзость, мужественный победоносче: огня, зверей, колеса не убоявся и мечем усечен во главу, венец победы приял еси от Христа Бога, взывая Ему: Аллилуиа.

 

Икос 3

Имущи обитель твоя вседрагую главу твою, богомудрый страстотерпче, яко превеликое сокровище, радости исполняется о сем и, любовию воспевающи данную тебе от Бога благодать исцелений, благодарно зовет ти:

Радуйся, Никомидии светильниче всесветлый;

радуйся, чтущей тя обители страже неусыпный.

Радуйся, имже охладе безбожие;

радуйся, имже возрасте богопознание.

Радуйся, светлая страстотерпцев славо;

радуйся, радостное православных слышание.

Радуйся, исцелений благодатный источниче;

радуйся, дарований великих вместилище.

Радуйся, благовонное миро, облагоухающее души;

радуйся, яко помогаеши призывающим тя.

Радуйся, слепым зрение даровавый;

радуйся, хромым благошествие устроивый.

Радуйся, великомучениче и целителю Пантелеимоне.

 

Кондак 4

Бурею помышлений многобожия одержим, нечестивый царь смутися, уведев от завиствовавших тебе врачев, яко всякия неисцельныя недуги целиши ты именем Христа. Мы же, веселием славяще дивнаго в тебе Бога, вопием Ему: Аллилуиа.

 

Икос 4

Слышавше никомидийстии людие о великом сострадании твоем к страждущим и о безмездном врачевании от всяких болезней, устремишася вси к тебе, с верою во врачующую благодать, в тебе сущую, и, приемлюще скорая исцеления от всяких болезней, прославляху и тебе величаху, всемилостиваго целителя своего, зовуще ти:

Радуйся, помазанный миром благодати;

радуйся, храме Бога освященный.

Радуйся, великая благочестивых славо;

радуйся, твердая озлобляемых стено.

Радуйся, мудрых превосходяй разумом;

радуйся, верных осияваяй мысли.

Радуйся, Божественных даров приятелище и многообразных нам милостей Господних источниче;

радуйся, скорый помощниче страждущим.

Радуйся, обуреваемых пристанище;

радуйся, заблуждших наставниче.

Радуйся, болящих туне врачуяй;

радуйся, обильно исцеления источаяй.

Радуйся, великомучениче и целителю Пантелеимоне.

 

Кондак 5

Чудо преславное сотвори тобою Господь, егда чрез служителя Своего Ермолая призва тя в чудный Свой свет. Ехидною бо велиею угрызено умершее отроча по молитве твоей ко Христу абие оживе и воста здраво. Познав убо Жизнодавца всех Истиннаго Бога, с твердою верою воззвал еси Ему: Аллилуиа.

 

Икос 5

Узре свет слепый, емуже с призыванием имене Христова прикоснулся еси ты, славне. Ермолаем бо пресвитером просвещен, отринув отеческое многобожие, восприял еси матернее благочестие, имже и отца просветил еси. Сего ради тебе, славному угоднику Божию и чудному врачу, взываем:

Радуйся, к Богу велие рачение имеяй;

радуйся, присногорящий огню Божественныя любве.

Радуйся, деятельный послушателю священных поучений Ермолая;

радуйся, последовавый советам матере твоей Еввулы.

Радуйся, яко вся раздал еси, да Христа приобрящеши;

радуйся, любовь к миру любовию Божиею победивый.

Радуйся, яко вместо сладких мира за Христа лютая страдания приял еси;

радуйся, яко общник сотворился еси Страстем Христовым.

Радуйся, восторжествовавый над всеми страстьми;

радуйся, украсивыйся благодатным безстрастием.

Радуйся, исполняяй радости притекающия к тебе;

радуйся, туне исцеляяй всех благодатию Христовою.

Радуйся, великомучениче и целителю Пантелеимоне.

 

Кондак 6

Проповедник истины явися просвещенный тобою телесне и душевне слепец: подобно бо евангельскому слепцу, дерзновенно пред всеми исповеда Света Истиннаго, Христа, просвещающа всякаго человека; нечестиваго же царя и боги языческия укорив, чрез мечное усечение взыде к немерцающему свету на Небеси пети Богу: Аллилуиа.

 

Икос 6

С светлым лицем представ судилищу цареву, дерзновенно взывал еси, преблаженне, во услышание всех: всецелебная сила моя и слава Христос есть, Истинный Бог, Владыка всех, мертвыя воскрешаяй и всяк недуг отгоняяй. За таковое исповедание ублажающе тя, глаголем:

Радуйся, уста громогласная Божества Христова;

радуйся, языче медоточный, вещаяй Его домостроительство.

Радуйся, ветие превысшаго Богословия;

радуйся, сеятелю мудрый благочестия.

Радуйся, сладкозвучная веры свирель;

радуйся, славный проповедниче Православия.

Радуйся, прежде смерти явивый дивная;

радуйся, по смерти совершаяй чудная.

Радуйся, зрителю славы Христовой;

радуйся, послушателю молящихся тебе.

Радуйся, подателю милости тоя требующим;

радуйся, ходатаю благ почитающим память твою.

Радуйся, великомучениче и целителю Пантелеимоне.

 

Кондак 7

Миро излияся на душу твою, богомудрый Целебниче, от Утешителя Духа, темже по смерти честныя останки твоя, благоуханием своим страстей злосмрадие отгоняя, исцеление подают вопиющим верою Богу: Аллилуиа.

 

Икос 7

Егда узреша идольстии чтители многолетна разслабленна, молитвою твоею, святе, воздвигнута и ходяща, мнози увероваша во Христа; жрецы же бесовстии, завистию снедаеми, подвигоша царя на ярость. Тебе убо, нещадно за Христа стружему и опаляему бывшу, со умилением зовем:

Радуйся, наслаждения земная презревый;

радуйся, благ вещественных превысший.

Радуйся, яко вся красная мира сего ни во что же вменил еси;

радуйся, яко славу скоротекущую с себе отрясл еси.

Радуйся, неуловим пребывый ловлении Велиара;

радуйся, победивый мучителей коварства.

Радуйся, не пощадивый за Христа жизни своея;

радуйся, враг явивыйся враждебныя плоти.

Радуйся, многобожия широту утеснивый;

радуйся, Божественною силою идолы поправый.

Радуйся, острейшая стрело, язвящая враги;

радуйся, предстателю, заступаяй верующия.

Радуйся, великомучениче и целителю Пантелеимоне.

 

Кондак 8

Страннолепно являшеся тебе Господь, ободряя и соблюдая в мучениих за имя Его: во образе бо пресвитера Ермолая, клокочущее олово, в неже ввержен был еси, охлади и в мори отрешив велий камень от выи твоей, изведе неврежденна на землю. Ты же, паки представ пред царя, торжественне пел еси Христу Богу: Аллилуиа.

 

Икос 8

Весь умне на Небеси водворялся, и низу на земли сущих не оставляеши, сопребывая с нами всечестною главою твоею, великий страстотерпче Христов, приемля от Господа и подая просвещение и освящение вопиющим тебе таковая:

Радуйся, премудросте Божественныя исполненный;

радуйся, промышления Божия о нас таинниче.

Радуйся, богомудренных умов услаждение;

радуйся, боголюбивых душ увеселение.

Радуйся, пресветлый Христов бисере;

радуйся, освященный душею и телом.

Радуйся, во дворех перворожденных на Небеси вселивыйся;

радуйся, в присноблаженных обитаяй чертозех.

Радуйся, света Троическаго зрителю;

радуйся, в молитвах к Богу теплый о нас предстателю.

Радуйся, просвещение душам подаваяй;

радуйся, скорбящим утешение низпосылаяй.

Радуйся, великомучениче и целителю Пантелеимоне.

 

Кондак 9

Всякое естество удивися, Пантелеимоне, сиянию в тебе благодати и богатству добродетелей: ангелоподобней чистоте твоей, великому мужеству в лютых страданиих, крепкой любве ко Христу и многому состраданию к людем, в нихже твориши преславная, во еже пети: Аллилуиа.

 

Икос 9

Ветии многовещаннии не возмогут по достоянию восхвалити борения твоя, славный добропобедниче, како непобедимою силою Божиею, юный леты, победи древняго исконнаго врага и посрами идольскую прелесть. Мы же, удивления исполненнии, зовем ти:

Радуйся, радостное зрелище Ангелов;

радуйся, благоговейное удивление человеков.

Радуйся, кровь за Христа излиявый и в смерти млеко источивый;

радуйся, тело за Него мученической смерти предавый.

Радуйся, исповедничества правило;

радуйся, доблий воине Царя царей.

Радуйся, тьмы державца победивый;

радуйся, победою твоею небесных и земных обвеселивый.

Радуйся, горняго мира обитателю блаженный;

радуйся, дольняго мира мудрый странниче.

Радуйся, древо, украшенное плодами благодатных дарований;

радуйся, носяй добропобедныя ветви.

Радуйся, великомучениче и целителю Пантелеимоне.

 

Кондак 10

Сострадания исполнен, яко истинный подражатель Подателя милости Господа, честный страдальче, Пантелеимоном (си есть, всемилостивым) от Него преименован еси, на вся притекающия к тебе милость изливая, юже и нам неоскудно источай, о тебе вопиющим Богу: Аллилуиа.

 

Икос 10

Стену тя тверду обрет мучитель, никиими же муками победиму, покусися сокрушити крепость твою зубы зверей и остриями мучилищнаго колеса, обаче и в сем ничтоже успе: сила бо Христова лютость зверей укроти, а страшное коло, на немже обращаемо бе тело твое, абие сокрушися. Тебе убо, непобедимому страстотерпцу, зовем:

Радуйся, честное Христово избрание;

радуйся, непорочное Богови благоухание.

Радуйся, твердый адаманте Церкве;

радуйся, непоколебимый столпе, досязаяй небесе.

Радуйся, звери видимыя укрощаяй;

радуйся, драконов невидимых сокрушаяй.

Радуйся, обагренный твоею за Христа кровию, срастворенною млеком;

радуйся, неувядаемыя приемый венцы.

Радуйся, радость причинивый Ангелом и человеком;

радуйся, прославленный Богом на Небеси и на земли.

Радуйся, небожителю, ликовствуяй с мученики;

радуйся, насыщаяйся лицезрением Христа пресладким.

Радуйся, великомучениче и целителю Пантелеимоне.

 

Кондак 11

Песнь исходную приносим твоему за Xриста заколению священному, в немже вместе с кровию млеко истече от тебе, великомучениче, и масличина, под неюже усечен был еси, исполнися целительных плодов. Темже Христу, дивно прославляющему славящия Его, тепле вопием: Аллилуиа.

 

Икос 11

Светозарная луча был еси, богомудре, во тьме многобожия седящим, путеводящая к Солнцу Правды Христу Богу, Емуже молися, во свете заповедей Его присно пребывати и нам, сицевая радостная тебе приносящим:

Радуйся, пресветлая звездо, на мысленней тверди блистающая;

радуйся, луча, христоименитым людем светящая.

Радуйся, таинственно облиставаемый от Солнца Христа;

радуйся, умне землю обтекаяй.

Радуйся, селение красное Пресвятаго Духа;

радуйся, сосуде пречестный, изливаяй исцеления.

Радуйся, чистоты сокровище;

радуйся, милости тезоимените.

Радуйся, Царствия Небеснаго наследниче;

радуйся, вечныя славы сопричастниче.

Радуйся, предстателю бедствующим в мори житейстем;

радуйся, безсребрениче, помогаяй призывающим тя с верою.

Радуйся, великомучениче и целителю Пантелеимоне.

 

Кондак 12

Благодати обилие приял еси, преблаженне, по обилию любве твоея ко Христу Богу, Иже и яви тя многоцелебным источником, безмездно врачующим душевныя и телесныя болезни притекающих к тебе с верою и Богу вопиющих: Аллилуиа.

 

Икос 12

Поюще многострадальныя подвиги твоя за Христа, славный страстотерпче, хвалим долготерпение твое, ублажаем мученическую кончину, почитаем и священную память твою, заступниче наш и целителю, и в похвалу сицевая тебе зовем:

Радуйся, благочестия трубо благозвучная;

радуйся, мечу, посекаяй нечестие.

Радуйся, строганный на древе за Распростершаго руце Свои на древе Крестнем;

радуйся, яко опаляем за Него, прелести пещь погасил еси.

Радуйся, язвами твоими враги уязвивый;

радуйся, кровию твоею токи идольския крове изсушивый.

Радуйся, в кипящее олово вверженный за Xриста;

радуйся, погруженный за имя Его в водах морских.

Радуйся, промышлением Божиим неврежден в сих пребывый;

радуйся, яко через огнь и воду мучений вшел еси в покой Небесный.

Радуйся, изливаяй неизсякаемыя струи милости верным;

радуйся, благосострадательный врачу, исцеления благодать подаваяй.

Радуйся, великомучениче и целителю Пантелеимоне.

 

Кондак 13

О многострадальный и предивный страстотерпче Христов и целителю наш Пантелеимоне! Милостиво прием сие малое от нас приношение, от многообразных недугов исцели ны и предстательством твоим сохрани от враг видимых и невидимых и вечнаго мучения избавитися нам Господа умоли, да во Царствии Его выну воспеваем: Аллилуиа.

Этот кондак читается трижды; затем икос 1 и кондак 1.

 

Тропарь и молитвы святому великомученику и целителю Пантелеимону

 

Тропарь, глас 3

Страстотерпче святый и целебниче Пантелеимоне, моли милостиваго Бога, да прегрешений оставление подаст душам нашим.

 

Молитва

О преславный мучениче и доблий воине Небеснаго Царя, Пантелеимоне всеблаженне, Милостиваго Бога преизрядный подражателю, иже Христа на земли дерзновенно исповедав, и многообразныя за Него муки претерпев, неувядаемый приял еси венец на небеси, идеже вечнаго наслаждаешися блаженства, и со дерзновением Престолу трисолнечнаго Божества предстоиши! К твоему христоподражательному состраданию по Бозе прибегаем вси мы, грешнии, и всеусердно молим тя, теплаго заступника и предстателя нашего: не престай призирати на нас, сущих в нуждах и скорбных обстояниих, и твоею молитвенною помощию и цельбоподательною силою избавляй нас присно от лютых зол, всегубительства и всякия иныя беды и болезни. Ты бо приял еси, святе, неоскудную благодать исцелений от Спаса нашего Иисуса Христа за твердую твою к Нему веру, при чистом и непорочном житии запечатленную муничеством и многопобедною твоею кончиною, в нейже по данной ти благодати и наименован от Христа Пантелеимоном, милости тезоименитым, милующим всех, притекающих к тебе в скорбех и болезнех. Сего ради, ведуще тя милостиваго ко всем помощника и целителя, с верою взываем к тебе: услыши нас, и богоприятным ходатайством твоим подавай нам вся благопотребная в житии сем и нужная к вечному спасению. Мученическим же дерзновением твоим умоли милостиваго Бога, да помилует нас, грешных и недостойных, по велицей милости Своей, да избавит от труса, потопа, огня, меча и всякаго праведнаго гнева и прещения, благовременне подвизая нас к очистительному и умилостивительному во гресех наших покаянию, ради множества щедрот Своих, да подаст всем нам безбедное, тихое и богоугодное житие, православным же властем и воинству нашему на вся враги победу и одоление, и всех нас от враг видимых и невидимых да сохранит благодатию Своею и непобедимым ополчением Ангел Своих, имиже ограждаеми и наставляеми, да поживем в веце сем в покаянии, чистоте и в творении богоугодных дел; да