Канон Пресвятой Богородице пред иконой «Ахтырская»

Пе́снь 1

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Да́ждь на́м сло́во, Сло́ве Бо́жий, Иису́се Всеблаги́й, воспе́ти ра́достное явле́ние ико́ны ро́ждшия Тя́ Богоневе́сты и пресла́вная Тоя́ чудеса́, в ни́хже си́ла Твоя́ Боже́ственная сла́вно просла́вися.

О, преди́внаго Твоего́ чудесе́, Влады́чице, и мно́гаго милосе́рдия к лю́дем: се́ бо ико́ну Твою́ честну́ю в бы́лии тра́вном солнцеподо́бным сия́нием иере́ю благогове́йну явля́еши дне́сь и исцеле́ний мно́жество от Нея́ источа́еши неду́жным, я́ко Всеми́лостивая.

Ты́, о Богома́ти, ро́ждшая Претерпе́вшаго на́с ра́ди на дре́ве Кре́стнем распя́тие, умоли́ Его́ бла́гость, е́же страда́ние Его́ всегда́ па́мятовати, во́лю же Его́ Боже́ственную твори́ти и бла́г Небе́сных насле́дники бы́ти.

Влады́чице Всеблага́я, умоли́ Сладча́йшаго Сы́на Твоего́ и Го́спода, рукописа́ние гре́х на́ших на Кресте́ пригвозди́вшаго, да сподо́бит на́с досто́йно одесну́ю Его́ ста́ти и гла́с благи́й Его́ слы́шати, егда́ прии́дет во сла́ве Свое́й.

Пе́снь 3

Ирмо́с: Твоя́ песносло́вцы, Богоро́дице, Живы́й и Незави́стный Исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би.

Во о́бразе неве́сты яви́лася еси́ во сне́, Богоро́дице, обре́тшему ико́ну Твою́ иере́ю Дании́лу, лице́ Твое́ на ико́не омы́ти водо́ю повелева́ющи, и сия́, я́ко врачевство́ богода́нное, во исцеле́ние неду́жным яви́ся.

В ско́рбех мно́гих и гоне́ниих сконча́ти жи́знь вре́менную обре́тшему ико́ну Твою́ иере́ю суди́ла еси́: да, я́ко зла́то, в горни́ле скорбе́й очи́стився, досто́ин яви́тся блаже́ннаго в ве́чности упокое́ния.

Омраче́нных на́с грехи́ мно́гими, о Ма́ти Бо́жия, просвети́ и на стезю́ спаси́тельную покая́ния напра́ви, отве́рзи о́чи на́ша душе́вная, я́коже о́чи теле́сная слепо́й жене́ и слепо́му о́троку пред ико́ною Твое́ю отве́рзла еси́, да у́зрим све́т спасе́ния и и́мя Твое́ просла́вим свято́е во ве́ки.

Страсте́й нечи́стых беснова́ние обурева́ет на́с, Госпоже́ Всеми́лостивая, и ины́я Помо́щницы, ра́зве Тебе́, Всеблага́я, не и́мамы, от сего́ душегуби́тельнаго беснова́ния изба́ви на́с, я́коже мно́гая бесну́емыя от наси́лия вра́жия пред ико́ною Твое́ю свободи́ла еси́, я́ко Всеси́льная.

Седа́лен, гла́с 4

Я́ко вои́стину Боже́ственное украше́ние Це́ркви и зало́г ми́лости Твое́й к христоимени́тым лю́дем ико́на Твоя́, Богоро́дице Де́во, показа́ся: вся́к бо, с ве́рою к не́й приходя́й, в неду́зех исцеле́ние, в ско́рбех утеше́ние, в беда́х вспоможе́ние от Тебе́ ско́ро прие́млет, всеми́лостива бо су́щи, ми́лости Твоея́ исто́чник в чудотво́рнем о́бразе Твое́м на́м зде́ явля́еши, да сла́вим и́мя Твое́ преблагослове́нное во ве́ки.

Пе́снь 4

Ирмо́с: Седя́й в Сла́ве на Престо́ле Божества́ во о́блаце ле́гце, прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й.

Еди́наго возлюби́ти Христа́ сподо́би на́с, Влады́чице, и Ему́ при́сно угожда́ти Сама́ научи́ на́с, Всеблага́я, я́коже боля́щую Евфи́мию, во сне́ то́й я́вльшися, ко хра́му Твоему́ приити́ наста́вила еси́ и в не́м исцеле́ние неду́гом проси́ти.

Житие́ непоро́чное на земли́ соверши́ти помози́ на́м, Преблагослове́нная Де́во, и от разслабле́ния грехо́внаго руко́ю Твое́ю держа́вною свободи́ на́с, я́коже зело́ разсла́бленнаго Моисе́я пред ико́ною Твое́ю исцели́ла еси́ пресла́вно.

Ты́, о Благода́тная, в ми́лостивом явле́нии чудотво́рнаго Твоего́ о́браза страну́ на́шу благода́тно посети́ла еси́ и ны́не чудотворе́ньми, от него́ быва́емыми, на́с посеща́еши, и́хже мно́жество исчести́ невозмо́жно, но, ели́ко мо́щно, сия́ благода́рне во сла́ву Твою́ испове́дуем.

Благоче́стно отвсю́ду, о Богома́ти, к чудотво́рней ико́не Твое́й притека́ющия и усе́рдно покланя́ющияся ми́лостей Твои́х и щедро́т не лиша́еши, от бе́д сия́ спаса́ющи, от неду́г избавля́ющи, ду́хи лука́выя от ни́х прогоня́ющи, утеше́ние же и здра́вие все́м подаю́щи, я́ко Всеблага́я.

Пе́снь 5

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

К Твое́й, Де́во, прибега́ем бла́гости и о́чи серде́ц на́ших к Тебе́, Чи́стая, возводи́м: не пре́зри воздыха́ний на́ших моли́твенных, но бу́ди на́м покро́в и Помо́щница в Де́нь су́дный.

Еди́на все́м еси́ Предста́тельница, Богома́ти Влады́чице: услы́ши у́бо на́ша моле́ния, пред чудотво́рным о́бразом Твои́м дне́сь приноси́мая, и сподо́би на́с в бу́дущем ве́це узре́ти Тя́ ку́пно с Сыно́м Твои́м, на о́блацех во сла́ве гряду́щим, и гла́с Боже́ственный Его́ слы́шати, призыва́ющий в Ца́рство Небе́сное.

Земля́ Росси́йская явле́нием чудотво́рнаго Твоего́ о́браза, Влады́чице, освяти́ся, и гра́д ма́лый вели́к и зна́емь по благода́ти Твое́й во все́х конце́х яви́ся: в не́м бо драгоце́нное сокро́вище блюде́тся Твоя́ целе́бная ико́на, зало́г сы́й Твоего́ к на́м благоволе́ния.

Лю́тыми помышле́нии от лука́вых вра́г стужа́емых на́с не оста́ви поги́бнути до конца́, Богороди́тельнице: трепе́щут бо си́лы Твоея́ ду́си тьмы́ и боя́тся и́мене Твоего́, я́коже мно́гажды у ико́ны Твоея́ чудотво́рныя сия́ изъяви́шася. И́хже злоде́йства и на́с изба́ви, упова́ние на Тя́ возложи́вших.

Пе́снь 6

Ирмо́с: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Освяще́ние, здра́вие и спасе́ние душа́м и телесе́м на́шим, Ма́ти Бо́жия, от святы́я Твоея́ ико́ны подае́ши, е́йже благоче́стно покланя́емся и усты́ и се́рдцем благогове́йно сию́ целу́ем, Твоя́ чудеса́ и неисче́тную ми́лость к христиа́нскому ро́ду при́сно сла́вяще.

Ко́е благодаре́ние принесе́м Ти́, Богоро́дице, я́ко в после́дняя ле́та такова́го да́ра сподо́била еси́ на́с, дарова́вши на́м многоцеле́бную Твою́ ико́ну? Те́м у́бо, о Всеблага́я, о такове́й неизрече́нней ми́лости досто́йно благодари́ти Тя́ Сама́ на́с научи́.

Боголе́пное явле́ние Пречи́стыя ико́ны Твоея́, Влады́чице, но́вое явле́ние Бо́жия благода́ти, Правосла́вной Це́ркви прису́щей, в посрамле́ние ересе́й и раско́лов показа́ся и я́ко но́вое утеше́ние свы́ше все́м правосла́вным и ве́рным ея́ сыно́м подае́тся.

Ма́ти Бо́жия милосе́рдая, ми́лости Твоея́ две́ри отве́рзи на́м, озари́ на́с све́том Боже́ственныя благода́ти Твоея́ и от мы́сленных волко́в соблюди́ на́с невреди́мых, в Правосла́вии неруши́мом сподо́бивши на́с благоугожда́ти Сы́ну Твоему́ и Бо́гу и приити́ живота́ коне́ц благи́й.

Конда́к, гла́с 8

Притеце́м, ве́рнии, к благода́тному ми́лостей и щедро́т исто́чнику— чудотво́рному Пречи́стыя Де́вы о́бразу: се́й бо на́м свы́ше дарова́ся, душа́м и телесе́м во спасе́ние, ему́же покланя́ющеся с любо́вию, возопие́м к Богоро́дице: о Всепе́тая Ма́ти, о Цари́це Всеми́лостивая, покры́й и соблюди́ на́с от вся́каго зла́ Твои́м к Бо́гу Ма́терним предста́тельством.

И́кос

Пресла́вное явле́ние ико́ны Твоея́, Богоро́дице, ра́дости испо́лни сердца́ ве́рных сыно́в Правосла́вныя Це́ркве: ца́рие бо и святи́тели о се́м возликова́ша и вси́ лю́дие утеше́ния Небе́снаго испо́лнишася, я́ко в после́дняя на́ша времена́ таковы́й да́р Бо́жия благода́ти Росси́и свы́ше дарова́н бы́сть Твои́м благопромышле́нием, Влады́чице. Мо́лим у́бо Твою́ бла́гость, уми́льно к чудотво́рному Твоему́ о́бразу припа́дающе: спаса́й все́х на́с от вся́каго зла́ Твои́м к Бо́гу Ма́терним предста́тельством.

Пе́снь 7

Ирмо́с: Не послужи́ша тва́ри Богому́дрии па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Вдови́ц заступле́ние и сиро́т Покрови́тельнице, Влады́чице Пречи́стая, не́кия умира́ющия ма́тере моли́тву о ча́дех ея́ услы́шала еси́ и па́че наде́яния сиро́тствующия дще́ри ея́ благоустро́ила еси́, я́же сла́вити навыко́ша ми́лость Твою́ по вся́ дни́ живота́ своего́.

Извеще́ние от Тебе́, Богоро́дице, благочести́вая императри́ца Елисаве́та прии́мши, сиро́тствующия две́ отрокови́цы под кро́в своего́ попече́ния восприя́т, Твою́ же ико́ну честну́ю зело́ возлюби́ и но́вый хра́м вме́сто ве́тхаго от щедро́т свои́х ца́рских благоле́пно сооруди́.

Изве́стная ве́рных еси́ Помо́щница и вся́ких бла́г Пода́тельница, Пречи́стая Де́во, ико́ною бо Твое́ю чудотво́рною неисче́тныя ми́лости прося́щим подае́ши и вся́ спаса́еши, и́же Тебе́ ве́рно вопию́т от души́: поми́луй и спаси́ на́с, Влады́чице.

Ма́ти Бо́жия Всеблага́я, милосе́рдых щедро́т Твои́х не лиши́ на́с, обнища́вших во гресе́х, и от че́люстей мы́сленнаго во́лка исхити́ ду́ши на́ша, да не поги́бнем до конца́, но прино́сим при́сно плоды́ покая́ния Бо́гу.

Пе́снь 8

Ирмо́с: О́троки благочести́выя в пещи́ Рождество́ Богоро́дичо спасло́ е́сть; тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

О, пресла́вных чуде́с Твои́х, Влады́чице, и мно́гаго Твоего́ к челове́ком сострада́ния: еди́ным бо прикоснове́нием к ико́не Твое́й немощны́я врачу́еши и издале́че, в со́ниих и виде́ниих, к не́й тре́бующих Твоего́ заступле́ния призыва́еши.

Вода́ освяще́нная и еле́й от лампа́ды ико́ны Твоея́ святы́я неду́ги неисце́льныя, Богоро́дице Де́во, врачу́ют и о́ныя с ве́рою прие́млющым во исцеле́ние и спасе́ние быва́ют; сего́ ра́ди Тя́, Цели́тельницу, ублажа́ем и чудеса́ Твоя́, от ико́ны Твоея́ явле́нная и присноявля́емая, сла́вим.

Воспе́ти пречи́стаго о́браза Твоего́ явле́ние сподо́би на́с, Влады́чице, и пе́ний на́ших хвале́бных, Тебе́ от усе́рдия возноси́мых дне́сь, не пре́зри, но приими́, Всепе́тая, моли́твы ра́б Твои́х и пода́ждь на́м в ну́ждах и беда́х по́мощь Твою́ держа́вную и Твоего́ заступле́ния благода́ть.

Дне́сь ра́дости испо́лнила еси́ на́с, Богоро́дице, яви́вши на́м ико́ну Твою́ святу́ю ди́вно, на ню́же взира́юще и с любо́вию е́й покланя́ющеся, Тебе́ си́це вопие́м: Ма́ти Бо́жия, спаси́ гра́д и страну́ явле́нием ико́ны Твоея́ просла́вленныя и вся́ ны́ поми́луй, я́ко милосе́рдая Предста́тельница.

Пе́снь 9

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Явле́ние преди́вныя ико́ны Твоея́, Ма́ти Бо́жия, славосло́вим ра́достно: сия́ бо, в бы́лии тра́вном све́том Боже́ственным сия́ющая, яви́ся и чуде́с мно́жество сотвори́, я́ко вои́стину Твоего́ к на́м благоволе́ния зало́г Богодарова́нный.

Я́ко звезда́ светоза́рная, ико́на Твоя́, Пресвята́я Богоро́дице Де́во, явле́нием свои́м Це́рковь Росси́йскую благода́тно озари́: лучи́ бо чуде́с испуща́ет и ве́рныя ду́ши к славосло́вию Бо́га, все́льшагося в Тя́, приво́дит, я́ко Тобо́ю па́дшему челове́честву благоде́ющаго.

Еди́наго от Тро́ицы нетле́нно ро́ждши, Богороди́тельнице, Ма́тернее к Нему́ дерзнове́ние и́маши: слы́шит бо моли́тву Твою́ Сы́н Тво́й и Бо́г и ми́лостивно к проше́нию Твоему́ приклоня́ется, Его́же не преста́й моли́ти за ро́д христиа́нский, при́сно в пе́снех Тя́ сла́вящий.

Приими́ на́ша хвале́бныя гла́сы, Влады́чице, и пе́ние смире́нное не отве́ргни, но, я́ко Сы́н не́когда Тво́й две́ ле́пте вдови́цы прия́т, та́ко и на́ше славосло́вие благоуго́дно да бу́дет пред Тобо́ю. Сла́ва Тебе́, Богоро́дице Де́во, ико́ною Твое́ю честно́ю пресла́вная чудеса́ творя́щей, сла́ва Тебе́.

Свети́лен

Пречи́стаго о́браза Твоего́ явле́ние, Ма́ти Бо́жия, пра́зднуем све́тло, и́бо в не́м Твои́х чудотворе́ний вели́чество познае́м и Твои́х щедро́т мно́жество прие́млем: ми́луеши бо и ще́дриши чту́щия Тя́ и от бе́д спаса́еши упова́ющыя на Тя́, Богоро́дице Всепе́тая и Неискусобра́чная.

 

Канон первый Пресвятой Богородице пред иконой «Боголюбская»

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Благоговеют пред Тобою, Богородице, Ангелов начальницы и святых чини честно служат Ти, праведнии красуются, князь же Андрей молится, и град Владимир похваляется светло. Мы же, грешнии, припадая к Твоей святой иконе, Боголюбивая, милости просим: озари наша сердца, Пресвятая Дево Богородице.

Князь Андрей вопияше со слезами: Пресвятая Царице Богородице, упование Христианом, умоли Сына Своего, Христа Бога нашего, о державе Твоей, Ты бо изволила еси в пределех страны Владимирския обители Своей славно создатися во имя Твое, Боголюбивая.

Приидите, христоименитии людие, умы тайно очистившеся, притецем в храм Матере Христа Бога нашего, Боголюбимое место страны Владимирския яко Богоприятное селение видяще: в нем бо являет нам Свою милость Владычица.

Под кров Твой, Богородице Дево, прибегаем вси, роди человечестии: просвети, Боголюбивая, место святое торжества Твоего, и мы, грешнии раби Твои, молящеся Пречистей Твоей иконе, просим от Тебе прияти великия милости.

Песнь 3

Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.

Заступнице и покров граду Владимиру и всякому граду и стране, буди нам Помощница и прибежище, Боголюбивая, всех нас заступи, Госпоже Царице и Богородице, и во всяких злых местех верныя сохрани.

Приими хвалу от уст наших недостойных, о Пресвятая Богородице, Дево Боголюбивая, надеждо наша и похвало! Покланяемся Твоему преславному образу: мольбу приими о рабех Твоих.

Пречистеи руце Твои, Царице и Богородице, милостивно воздвигни к Сыну Твоему и Богу нашему, просящи отпущения согрешений наших, и житие наше исправи, и всякия благодати исполни нас и милости сподоби.

Пресвятая Дево, Мати Боголюбивая, сохрани рабы Твоя от всякия сопротивныя силы, и избави от всякия напасти, и радость миру сотвори душевную и телесную, и презри нам вся согрешения.

Седален, глас 2

Моление теплое и стена необоримая, милости источниче, мирови прибежище, прилежно вопием Ти: Богородице Владычице, предвари и от бед избави нас, едина вскоре Предстательствующая.

Песнь 4

Ирмос: Седяй в славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Евангелия Христова Богогласный списатель Лука написа образ Твой чудный, Всенепорочная Владычице, и Младенца Ти Превечнаго на руку изобрази; святый же князь Андрей в нощном видении узрев Тя, молящуюся за ны, даде нам образ Твоего моления, к Немуже притекающия бед и напастей избавляеши.

О Пресвятая Дево Богородице, Ты изволила еси изыти из Греческия страны в чудотворном образе Твоем и доити до святаго места, идеже и явилася еси князю Андрею; он же, моляся Тебе, со слезами вопияше: Пресвятая Дево Богородице, избави нас от всяких бед и скорбей.

На Тя упование возложихом, Боголюбивая Мати Дево, Предстательницу Тя живота тверду и непоколебиму стяжахом, моли о нас, рабех Твоих, Всещедраго Бога.

Ты еси похвала и венец святым всем, вси на Тя по Бозе надежду возложихом и Тебе молимся, Боголюбивая Царице, Божия Мати, Помощнице грешным и спасение рабом Твоим.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Всякое место, Пресвятая Дево Богородице, Своею милостию просвещаеши, граду же Владимиру и месту Боголюбимому великая похвала и утверждение, в бедах сущим скорая Помощница.

Проповедует преславно величия Твоя Лавра, яже во Твое имя начало прия, Мати Божия Боголюбивая, хвалят молебницы, и величают чудотворный образ Твоего моления о нас, и глаголют: утверди, Господи, обитель сию.

Приспе днесь память твоя, княже Андрее, радуется преславный град Владимир и Боголюбимое место красуется, зовуще: Пресвятая Дево Богородице, спаси нас и избави от всякия нужды и печали.

Марие, златая кадильнице, страсти пагубныя отжени от нас и утверди нас непоколебимых, Пресвятая Дево Боголюбивая, не имамы бо иныя помощи, разве Тебе, Владычице.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Пришествием честнаго образа Твоего, Царице Богородице, освятила еси место Боголюбимое, на немже обитель Свою от древних лет сохраняеши, идеже и нас сподоби Тебе пети чистыми сердцы.

Не ужасайся, княже Андрее, и не дивися, видев образ Пречистыя Богородицы, от Греческия страны изшедший, доити же града Ростова не изволивший: се бо доиде до места святаго, свыше пронареченнаго, и подвиже вопити тебе к Преблагословенней: о Всемилостивая! моли о нас Сына Своего, Христа Бога нашего.

Воздвигнем руце свои горе и вознесем хваления Господеви: се бо воистину прииде Пречистая Дева и Богородица Боголюбивая: вся озаряя верныя Божественною Своею иконою.

Храм живый и освященный сущи, Пренепорочная, Пребезначальное Слово плотию родила еси, безсловесия мир избавльшее, избави и нас от напастей Твоими молитвами, Боголюбивая.

Кондак, глас 3

Дева днесь предстоит Сыну, руце Свои к Нему простирающи, святый князь Андрей радуется, и с ним Российская страна торжествует, нас бо ради молит Богородица Превечнаго Бога.

Икос

Дево и Мати Боголюбивая, Царице Марие Богородице, Милостивая Ходатаице к Сыну Своему и Богу нашему за ны, рабы Твоя! Ты, Отроковице, благоизволила еси Твоему пречудному образу, егоже написа Богоглаголивый Лука, первее от страны Греческия, потом же и от царствующаго града Киева изыти, по умолению благовернаго князя Андрея, и явити милость Свою новопросвещенным людем страны сея, но, не изволивши достигнути града Ростова, возлюбила еси пребывати в пределех Владимирских, идеже и явилася еси верному рабу Твоему, князю Андрею, молящися о людех Твоих Сыну и Богу Твоему, якоже древле святому Андрею в храме Влахернстем. Темже святый князь Андрей, новописав Тебе, Молитвенницу о людех Твоих, остави нам сей молитвенный лик Твой, Боголюбивая Мати, и основа обитель в месте Твоего явления, из неяже от чудотворныя Твоея иконы и по всей стране Российстей милость, и помощь, и исцеление подаеши с верою приходящим к Тебе: нас бо ради молиши, Богородице, Превечнаго Бога.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Боголюбивому житию первоначальник и наставник, княже Андрее, был еси и молебно подвизался еси пред пречудным образом Божия Матере: светлейши бо солнца возсия пречестная икона Пресвятыя Богородицы, Ейже молися спастися нам.

Херувим и Серафим превышши явилася еси, Богородице: Ты бо едина прияла еси Невместимаго Бога во утробе Своей и благоволила доити образу Твоему Боголюбимаго места. Мы же, раби Твои, вси вернии, песньми Тя ублажаем.

Пресвятая Госпоже Дево Богородице, Мати Христа Бога нашего, всяко можеши нам быти Помощница, посетившая чудным образом Твоим. Боголюбимое место сие, Боголюбивая Владычице, посети и нас и не остави, якоже Сама веси, с верою приходящих к Тебе.

Приступи к чудному образу Боголюбивыя Богоматере великий князь Андрей и, простер руце свои, взем яко безценное сокровище, и возвести отцу своему, како чудесно из Вышеграда посети место Боголюбимое.

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Приими моление наше, Пречистая Богородице, сохрани и заступи от всякаго зла и не отрини нас от Своего честнаго образа: Тя бо имамы Молитвенницу теплу, и стену тверду, и покров нерушимый, и земли нашей великую похвалу и утверждение.

Радуемся душею и веселимся сердцем, взирающе на образ Твой, Пресвятая Богородице Боголюбивая, имуще Тя державу непобедимую и утверждение непоколебимое, надежду, и упование, и душам нашим спасение.

Помощница еси в скорбех, и в напастех, и бедах и в темницах избавление, на брани и в ратех заступление, Богоотроковице Чистая, и избавление всем верным человеком, и похвала, и граду нашему великое утверждение.

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Се Тебе, Пресвятая Царице Боголюбивая, посылается с Небесе Архангел Гавриил, Царя всех и Бога провозвестити пришествие и возгласити Тебе: радуйся, Благодатная, Господь с Тобою.

Радуйся, Мати Дево, радуйся, Пречистая, приятелище Божие, радуйся, свещниче Света, Адамово воззвание и Евино избавление, горо святая и преславная и священный чертоже.

Ты еси похвала христианом, Владычице, Ты оружие на враги и стена, к Тебе прибегаем, Тя и ныне на помощь призываем: Госпоже Царице Богородице, спаси и сохрани правоверныя люди Твоя, Боголюбивая.

О Всемилостивая христианом Помощнице! Не может Тя воспети достойно ум человеческий и ангельский, яко всея твари Честнейшую, Небесных и земных сил славнейшую, всех бо Творца родила еси и Бога. Но, о Владычице! приими милостивно наше моление, всегда бо на Тя надеемся.

Светилен

Боголюбскому древле Андрею представшая и икону источник чудес показавшая, Боголюбивая Мати песненно днесь да почтится.

 

Канон второй Богородице пред иконой «Боголюбская»

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Слово рабу Твоему подаждь, Госпоже Пресвятая, Слово бо сниде на Тя, якоже свыше роса, грешную душу мою очисти, Царице Благая, яко да, радуяся, славлю Твоя чудеса.

Князю Андрею в нощи представши, Небесная Мати, в сердце смятенном его бурю сомнений Ты всех кротце смирила еси, подвигши того воспевати милость и силу Твою, дивну всегда в чудесех.

Руце простерла еси, молитвенно Сыну представши: славы и милости луч, Сыне, да сходит с небес людем и месту сему. Того умоли о создавших храм и обитель сию, Рождшая бездну чудес.

Боголюбивая всех Царице, обители славо, грешных, молящихся нас днесь, приими словеса, дерзость врагов низложи, неверных разруши державу, верным же присно подаждь пети Твоя чудеса.

Песнь 3

Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.

Чтуще икону Твою, вси в скорби к Тебе прибегаем, точиши бо, Госпоже, Ты утешение всем, в радости паки Тебе, Пречистая, песнь воспеваем. Темже подаждь, да и аз милость Твою исповем.

Светло красуется днесь обитель сия всечестная, образ имущая Твой, яко источник цельбам, Ты же, Заступнице всех, Споручнице грешных святая, Спаса Христа преклони к нашим смиренным мольбам.

В бури пристанище всем Ты, Боголюбивая Мати, сущим в пути и в бедах, в мори далече покров, спутница верна всем: Тебе бо дадеся спасати души убогих Твоих, Тя возносящих рабов.

Вечныя муки и тьмы, губительных вражиих сетей, Чистая Дево, спаси, Тя призываем в мольбе, славу же Бога духов безсмертных сподоби нас зрети в светлых чертозех Его: вся бо возможна Тебе.

Седален, глас 2

Моление теплое и стена необоримая, милости источниче, мирови прибежище, прилежно вопием Ти: Богородице Владычице, предвари и от бед избави нас, едина вскоре Предстательствующая.

Песнь 4

Ирмос: Седяй в славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Облаком легким носим, Твой Сын, Пресвятая, прииде, Матере волю творя. Князь же блаженный Андрей паде со слезами во прах, прослави о всех, яже виде, слава, Христе, вопия, Божией силе Твоей.

Светом Твоим просвещен, на Горнюю славу взирая, глас Пребожественный Твой слыша блаженный Андрей, Духом же Святым взыграв, воспе о Тебе, Пресвятая: слава, Христе Всецарю, Божией силе Твоей.

Милость Его и покров молящимся нам ниспослати Сына и Бога моли, Чистая, верных людей щите, забрало Церквей, вселенней реко благодати, яко да песнь принесем велией силе Твоей.

Облаче светлый Христов, неверия мглы нас избави, верным ослабу подаждь в жизни привременней сей, Церковь Святую Твою незыблему в мире управи, яко да вси воспоем: слава державе Твоей.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Сына Безлетнаго Ты носила еси несказанно, грешным спасение всем светло вещающая; ныне о нас, Госпоже, молися Тому непрестанно, всем воспевающим Тя мир подавающая.

Присно Твоя благодать, Царице, нисходит на место, еже избрала еси, всем источающая дары целебныя, тем поем Тебе, Богоневесто, верою славящим Тя мир подавающая.

Обремененнии вси страстьми и недуги, грядите, воду спасительную, всех исцеляющую, зде от иконы сея в веселии днесь почерпите, славяще Матерь Христа, мир подавающую.

Глада, огня и меча, нашествия иноплеменных, язв губительных присно спасающая, Мати Всепетая, днесь услыши мольбу нас, смиренных, бурю страстей утиши, мир подавающая.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Боголюбивая днесь к веселию вся созывает, храм преукрасивши сей образом чудным Своим, благочестивых собор Небесными дары венчает. Тем, Богомудрии вси, Матерь Христову почтим.

Радостно, вернии вси, грядите, восплещим руками, зряще Превысшую всех ангельских горних чинов Деву, Царицу Небес, во храме днесь сущую с нами, всем источающую токи целебных даров.

Разве Тебе, Госпоже, не имам надежды иныя: Ты мя избави от бед, Ты помози до конца поприще мне преити неблазненно жизни земныя, да воспою Тя всегда, рождшую миру Творца.

Призри, Святая, с Небес, к рабом Твоим в помощь потщися, всякую язву, болезнь, всякий недуг исцели. Старцу согбенному жезл, Заступница сирым явися, Мати Отершаго вся горькия слезы земли.

Кондак, глас 3

Дева днесь предстоит Сыну, руце Свои к Нему простирающи, святый князь Андрей радуется, и с ним Российская страна торжествует, нас бо ради молит Богородица Превечнаго Бога.

Икос

Дево и Мати Боголюбивая, Царице Марие Богородице, Милостивая Ходатаице к Сыну Своему и Богу нашему за ны, рабы Твоя! Ты, Отроковице, благоизволила еси Твоему пречудному образу, егоже написа Богоглаголивый Лука, первее от страны Греческия, потом же и от царствующаго града Киева изыти, по умолению благовернаго князя Андрея, и явити милость Свою новопросвещенным людем страны сея, но, не изволивши достигнути града Ростова, возлюбила еси пребывати в пределех Владимирских, идеже и явилася еси верному рабу Твоему, князю Андрею, молящися о людех Твоих Сыну и Богу Твоему, якоже древле святому Андрею в храме Влахернстем. Темже святый князь Андрей, новописав Тебе, Молитвенницу о людех Твоих, остави нам сей молитвенный лик Твой, Боголюбивая Мати, и основа обитель в месте Твоего явления, из неяже от чудотворныя Твоея иконы и по всей стране Российстей милость, и помощь, и исцеление подаеши с верою приходящим к Тебе: нас бо ради молиши, Богородице, Превечнаго Бога.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Славит Тя присно страна Российская, Дево, имущи к Богу Ходатаицу теплую на Небеси, темже и празднует днесь, Тебе благодарне поющи: Мати Христова, во век благословена еси.

Град и обитель сию Твоим омофором, Честная, присно покрый и мольбу нашу горе вознеси к Сыну и Богу щедрот, да славим Тя вси, Преблагая, Боголюбивая, Ты благословена еси.

Зноя палящаго вся избави, дождь ранний и поздний жаждущей люте земли Щедраго дати проси, нивы от вреда спаси, да милость Господню славим, Тебе же поем: благословена еси.

Людем Твоим, Госпоже, земли устроение зрети, мудрость в правителех, суд правый сподоби, да вси в мире всегда поживем, немолчно дерзающе пети: миру Хранительнице, благословена еси.

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Образом, Дево, святым обходиши веси и домы, всякому возрасту честь, всем христианом хвала, всех ты надежда еси, Тобою бо род наш блюдимый славит усердно Творца: Господа пойте, дела.

Веру мою приими, пристанище тихое буди; душу, Благая, спаси, Ты бо еси родила Спаса нам, грешным, Христа. Убогих Твоих не забуди, даруй нам звати всегда: Господа пойте, дела.

Тело мое исцели, страстей треволнение вскоре, Дево, в души укроти. Ты бо еси низвела свыше Божественный мир на волны житейскаго моря верно поющим всегда: Господа пойте, дела.

В день оный страшный конца, егда пробуждении встанем гласом последней трубы, буди нам Ты похвала, руце воздевши Твои, Благому за грешных предстани, да одесную Того, Господа, хвалим, дела.

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Всяк земнородный в сей день, Святым просвещаемый Духом, весело радуяся Горних умов естеству, тайно поющему зде, да внемлет очищенным слухом, вся да поклонится тварь девственному Рождеству.

Иноков лики и дев, Пречистыя праздник почтите, мужи, и жены, и вси, радостно днесь к торжеству с нами сошедшеся зде, псаломски играюще, рцыте: Дево, да будет во век честь Твоему Рождеству.

Верных пресветлый собор, Пречистая, днесь назирает свыше Свою благодать, душ и телес врачевство, грешным прощение, всем ослабу долгов обещает: Матерь бо слышит Свою присно Тоя Рождество.

Боголюбивей воздах устен похвалу и молюся: буди Споручница ми, храме святый Божества, в час испытания дел, егда пред судищем явлюся, Дево, умилостиви суд Твоего Рождества.

Светилен

Боголюбскому древле Андрею представшая и икону источник чудес показавшая, Боголюбивая Мати песненно днесь да почтится.

 

Канон Пресвятой Богородице пред иконой «Взыскание погибших»

Песнь 1

Ирмос: Отверзу уста моя и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Умилосердися о нас, грешных, погибающих, Пресвятая Богородице, но вместо печали даруй нам радость, да воспеваем Тя, Всесвятая Владычице.

Утиши душ наших свирепство, понеже многия скорби и печали нападоша на нас, грешных, да не погибнем во зле, окаяннии.

Ты еси наша крепость и утверждение и от врагов защищение, и сего ради не боимся вражия навета, но присно поем Тя и славим, Всеславная.

Напасти, и беды, и скорби многи приидоша на нас и отяготиша нас, и от всего сердца молим Тя, вопиюще: избави, Богородительнице, от обдержащих нас зол и веселия исполни.

Песнь 3

Ирмос: Твоя песнословцы, Богородице, живый и независтный источниче, лик себе совокупльшия, духовно утверди, в Божественней Твоей славе венцев славы сподоби.

Ты еси теплая Предстательница и твердое заступление, избави нас, Всесвятая, от нашедших на нас напастей, Ты бо еси, Владычице, падших исправление.

Избави нас, Пречистая, от напастей, и бед, и омрачения душевнаго, и уныния, вся страсти отжени от нас, Чистая, да присно Тя славим.

К Тебе притекаем, Пречистая, не презри нашея болезни и воздыхания, но призри на нас, сущих в скорби, и сию нашу печаль на радость преложи, Богоблаженная.

Виждь, Владычице, беду нашу и скорби, яко в тех лукавый враг поглотити нас тщится, но Ты, Пречистая, препни его злохитрое коварство, да, избавльшися, славим Тя, твердую Заступницу за ны, во гресех погибающих.

Седален, глас 2

Моление теплое и стена необоримая, милости источниче, мирови прибежище, прилежно вопием Ти: Богородице, Владычице, предвари и от бед избави нас, Едина вскоре предстательствующая.

Песнь 4

Ирмос: Седяй в славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Ты еси, Пречистая Дево, надеждо и утверждение наше нерушимое, и лютых бед освобождение, и от печали утешение, и душ наших просвещение, и во уповании нашем непоколебимый столпе.

В сих печалех буди сладкое утешение, и в бедах скорая Помощница, и в молитвах Предстательница, Тя бо, Мати Божия, стяжавши, от всяких бед избавляемся и ко спасению Тобою наставляемся.

Ты еси, Пречистая Дево, сущим в бедах прибежище, немощным помогаеши, грешных исправляеши и ко спасению наставляеши, яко Мати Божия сущая.

Суди обидящих, и побори борющих нас, и от напраснаго оскорбления избави нас, осужденных, яко Ты Судию Праведнаго родила еси, Всенепорочная, Иже хощет судити комуждо по делом его.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына всем воспевающим Тя мир подавающая.

Преклонися к мольбам рабов Твоих, Владычице, и не закосни избавити нас от всех скорбей и бед, яже обдержат нас, видимых и невидимых врагов отжени от нас, да не зле погибнем, окаяннии.

Ты в напастех и скорбех милостиво защищаеши, иже под кров Твой прибегают; приими, Пречистая, и наше сие малое от унылаго сердца моление, да не зле в отчаянии погибнем.

Милостивым и кротким оком, Богородительнице, и милосердием Твоим призри на нас, недостойных, и от обстоящия напасти нас свободи, призывающих Тя на помощь, Всепречистая.

Первозданный Адам и Ева Тобою, Владычице, избавистася от слез, с ними же и нас, припадающих и молящихся Ти, избави слез, печалей и скорбей и подаждь полезное нам утешение о Бозе, Спасе нашем.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Услыши печальный вопль раб Твоих, требующих помощи Твоея, Богомати, Ты бо еси упование наше, потщися печаль нашу на радость преложити.

Избави нас, Владычице, от языка льстива и от человека неправедна изми нас, вся бо Ты можеши, яко Мати Зиждителя нашего сущи.

Вемы Тя, Богоблагодатная, скорое погибших взыскание, нас, немощных, крепость и утверждение; духом, усты и сердцем зовем Ти: от напастей и печали свободи нас, Владычице, к Тебе прибегающих.

Избави нас от напастей и бед, Богоневесто, Тя бо устрои Бог на спасение и заступление наше Ходатаицу, сего ради и нам, недостойным, исходатайствуй от печали избавление.

Кондак, глас 6

Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.

Ин кондак, глас тойже

Не имамы иныя помощи, не имамы иныя надежды, разве Тебе, Пречистая Дево, Ты нам помози, на Тебе надеемся и Тобою хвалимся: Твои бо есмы раби, да не постыдимся.

Песнь 7

Ирмос: Не послужиша твари Богомудрии, паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Ты еси, Пречистая Дево, Покровительница наша и непрестанное радование душ наших, не презри нас, одержимых лютою бедою и неутешимою печалию, но заступи и помилуй рабы Твоя.

Ты еси крепость наша, Пречистая Владычице, и в нашедших нечаемых скорбех утешение, и сего ради мы, недостойнии раби Твоя, всенадежно вопием Ти: помилуй нас, падших.

Исцели душевныя язвы, Владычице, и заступи нас, рабов Твоих, избави нас от пагубныя сети лукаваго, от всякаго падения и от развращения изми нас, Преблагословенная.

Сокруши советы неправедныя, иже изощрены суть на ны, мы бо иныя помощи не имамы, разве Тебе, Чистая, и к Тебе прибегаем: не попусти погибнути, яко вся Тебе возможна суть.

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте дела и превозносите Его во вся веки.

Души наша сохрани под кровом Твоим, Преблагословенная Богородице, и от различных належащих на нас бед и скорбей избави нас, да не порадуется враг наш о нашей погибели, но да славим Тя, Божию Матерь, во веки.

Убояхомся помощи человеческия искати, прибегохом к Тебе, Всенепорочная, Ты еси Хранительница христианом, днесь к покрову притекохом, надеяся на милость благоутробия Твоего; матерински помилуй нас, да славим Тя во веки.

Ты еси, Пречистая Дево, просвещение и избавление, Ты еси Помощница наша всерадостная и стена нерушимая, слава и хвала наша, Всенепорочная, да прославим Тя во веки.

На Тя всю надежду спасения нашего возложихом, Неискусобрачная Богородительнице, и на помощь призываем Тя: спаси нас от печали сия и напасти и от всех скорбей избави нас, да славим Тя во веки.

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Изсше, яко скудель, от печали крепость наша, и ко аду приближихомся; от язык душепагубных предвари, Мати Божия, заступлением Твоим и от обдержащих нас скорбей рукою, Мати, Твоею избави нас, да славим Тя, Чистая Приснодево. (Дважды.)

Всенепорочная Отроковице, всем верным крепкая Помощнице, и упование христианом, буди и о нас неотступная Молебница к Сыну Твоему и Богу о освобождении от нашедшия сия напасти, да вопием Ти: радуйся, Чистая Приснодево.

Ты еси крепость наша, прибежище и стена необоримая, Ты еси теплая к Богу Молитвенница, всяких напастей и бед свободи, Едина Благословенная, да вопием Ти: радуйся, Преблаженная Богородице, Приснодево!

 

Канон Пресвятой Богородице пред иконой «Владимирской»

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Просвети, Владычице, души наша зарею Божественною, паче ума благодатию Твоею, и независтный дар подаждь ми воспети Тя, яко Помощницу человеческому существу, Препетая, верное заступление, на враги победу отечеству нашему.

Приидите, соберитеся, российстии собори, в пречестный храм Всенепорочныя Владычицы и возопиите, умильно молящеся, к честному образу взирающе: Богородице Безневестная, хвалящия Тя спаси.

Твой, Богомати, всечестный образ Богогласный Евангелия Христова описатель, пребожественный Лука, написав, Творца всех на Твоих честных руках вообрази, к немуже притекающии напасти и печали избавляеши и вся покрываеши Твоею милостию.

Храм прекрасный, Содетель всех едину Тя обрет, в Тя вселися и человеки обожи. К Немуже за ны, Богородице, молися, спасти ны от поганых пленения и всякия иныя скорби, находящия на ны, да Твоего днесь образа сретение всечестно празднуем.

Песнь 3

Ирмос: Твоя песнословцы, Богородице, Живый и Независтный Источниче, лик Себе совокупльшия, духовно утверди, в Божественней Твоей славе венцев славы сподоби.

Все помышление отвергше, Богомудрии, приидите в сретение прекрасныя зари, держащия пресветлую лучу, вся просвещающую и милостию весь мир обогащшую.

Твою, Богомати, всечестную и чудотворную икону российстии люди стяжавше, яко заступление крепко и стену нерушиму, молятся Ти, на враги победу даровати отечеству нашему.

Облак светозарный показася, росою благодати вся омывающи телесныя скверны и души просвещающи, едина Всепетая.

Древо многоплодно явилася еси, пищею негиблющею вся насыщающи, души же веселящи, Богоневесто Чистая, добродеяния всем источи и от скорбей, нуждных спаси.

Ин кондак, глас 8

К Взбранней Воеводе и Заступнице, Деве и Богородице, в чистей совести, верою утвердившеся, русстии народи, невозвратно надежду имуще, притецем, к чудотворному Ея и пречистому образу, и возопием Ей: радуйся, Невесто Неневестная.

Седален, глас 4

Народи боголюбивии, приидите в сретение: се бо приходит Дева, всех пророков превышши, честным Своим образом, Жизнодателя миру на руках имеющи, град Свой сохраняти страждущий, варварскую дерзость низложити, вообразитися всем Хранительница тверда, держава и ограждение верно молящимся.

Слава, и ныне, тойже

Песнь 4

Ирмос: Неизследный Божий совет, еже от Девы воплощения Тебе, Вышняго, пророк Аввакум усмотряя, зовяше: слава силе Твоей, Господи.

Гору превелию, юже Даниил виде, от неяже камень отсечеся без руки и вся соблазны истни, верныя же просвети, истинное светозарное солнце показа, лучами просвещающи, Богородице Приснодево.

Вооружаются на люди Твоя, Чистая Богородице, сынове Агарины, злый совет творяще, грады разоряюще, верныя же погубляюще, но Ты, Всепетая, Твоею милостию вся низложи, исмаильтяны враги покаряющи отечеству нашему.

Небо одушевлено, едина Богомати, Свет велий приемши, вся просвещающи, тьму держащих бед разжени и нас Вышняго причастия сподоби.

Давид пред кивотом ликовствует, левити же воспевают, паче же пред Тобою, Богородительнице Чистая, Россия хвалами яко Царицу воспевает, гласы молебными прилежно Ти вопиющи: радуйся, Заступнице града нашего.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Тебе, Богомати, великий во пророцех Исаия провиде Духом, Угль имеющу во чреве, верныя просвещающ и соблазны вся пожигающ, спасая род человеч.

Жезл Ааронов прозябла еси и злобный корень исторгнула еси, Дево Богоневестная, Жизнодателя рождши миру, Егоже моли сему граду спастися от многих напастей.

Ныне убо приступите с веселием, Богоизбранное стадо, российстии собори, ко Всечестней Божией Матери и честный Ея образ любезно приимите: се бо благодать неисчерпаемая, воды точащи Божественныя неоскудно, Юже, вернии, почтим и честному образу Ея поклонимся.

От корене Иессеева древо возрасте всем животное, Плод убо прозябла еси во утробе Твоей, Дево Чистая, вся люди насыщающи Твоею милостию.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

От Тебе, Богомати, истече поток сладкий, вся напаяя люди, душ измывая скверны, Богородице Владычице, спаси всех, покланяющихся верно честному образу Твоему.

Вси убо, совокупльшеся вкупе, воспоем Чистую Деву, Богоизбранную лествицу Иаковлю, Гедеоново же руно, радости Ходатаицу, крепость и похвалу спасаемых, Богородительницу Чистую.

Се ныне веселие приближается, скорбь же потребляется, вернии спасаются, яко от источника радость почерпающе, выну хвалами воспевают: радуйся, Чистая Владычице, спасения нашего начаток и всех верных стена и похвала.

Подаждь нам помощь мольбами Твоими, Пречистая Богородице, скорби убо находят на ны и печали умножаются, врази ополчаются, но Ты, Пречистая, представши, избави, врагов наших шатание низложи, на враги победу даруй, да посрамятся вси, являющии рабом Твоим злая.

Кондак, глас 8

Взбранной Воеводе победительная, яко избавльшеся от злых пришествием Твоего честнаго образа, Владычице Богородице, светло сотворяем празднество сретения Твоего и обычно зовем Ти: радуйся, Невесто Неневестная.

Икос:

Ангел предстатель с Небесе послан бысть рещи Богородице: радуйся, и, со безплотным гласом воплощаема Тя зря, Господи, ужасашеся, и стояще, зовыи к Ней таковая: радуйся, Еюже радость возсияет; радуйся, Еюже клятва исчезнет. Радуйся, падшаго Адама воззвание; радуйся, слез Евиных избавление. Радуйся, высоте неудобовосходимая человеческими помыслы; радуйся, глубине неудобозримая и ангельскима очима. Радуйся, яко еси Царево седалище; радуйся, яко носиши Носящаго вся. Радуйся, звездо, являющая солнце; радуйся, утробо Божественнаго воплощения. Радуйся, Еюже обновляется тварь; радуйся, Еюже покланяемся Творцу. Радуйся, Невесто Неневестная.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Яко порфирою и виссом, червленою хламидою, Дево Богородице Владычице, град Твой, Тобою одеяся, Христа величает и пришествие честнаго Твоего образа славит, явльшася паче луч солнечных и немрачным светом просвещающа велегласно хвалящия Тя.

Скрижали, богописанныя перстом Духа, в ярости Моисей сокруши; но в Тебе, Чистая, преславный Творец вселився, невредну Тя сохрани. Емуже поем: отец наших Боже, благословен еси.

Приими Твоих раб мольбы, Пречистая Дево Богородице, непостоянную бурю утиши молитвами Твоими и советы противных врагов разжени, нападающих на стадо Твое, Всенепорочная Владычице.

Тебе едину помощницу роду человеческому, Богородице Марие, Зиждитель всех рождеством Своим назнамена и пророцы прообразиша: ов Тя дверь, ин же Тя ложницу Божию; мы же Тя воспеваем Родительницу Божию, и Ходатаицу к Богу, и Заступницу от всех зол, находящих на ны.

Песнь 8

Ирмос: Отроки благочестивыя в пещи Рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Како Тя, Дево, по достоянию воспоем? Помощь твердую, Хранительницу жизни нашея и Ходатаицу непреложну к Сыну Твоему и Богу нашему, Егоже воспеваем и превозносим во веки.

Цвете прекрасный и воня пищная, облагоухаеши, Богородице Марие, вся, и спасаеши, и от недуг исцеляеши, бесы прогоняеши. Темже Ти вопием: радуйся, Помощнице всем молящимся верным.

Столп явльшися, Богомати, нахождения противных отгоня: Тя бо чтущим сердцем теплым явилася еси стена, и ограждение, и спасительное прибежище.

Давидски воспеваем Ти песнь, гору Божию Тя именующе, Пречистая Дево: Источника бо сущим приснотекущаго источила еси. Егоже поем и превозносим во веки.

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Радости Ходатаице, возвесели наш смысл вопити Тебе, Богородице Чистая: радуйся, Хранительнице наша, державо, и ограждение, и спасительное прибежище.

Да восхвалят согласно Тя небо и земля, яко Жизнодателя миру рождши: радуйся, тихое пристанище, животныя воды источниче неисчерпаемый, Владычице.

Собравшеся днесь, людие, во сретение Пречистыя Божия Матере, Яже винограда мысленнаго грези носящи, вино источающ всегда и веселия всех исполняющ, яко Богородицу по долгу славим.

Божественная река вод животных, вся удолия напояющи, наша соблазны, Богомати, погрузи и до конца потреби.

Светилен

Да почтится днесь Богомати, Зиждителя рождшая, райских дверей отверзение и всего мира очищение, победу давшая христолюбивому воинству, о Сей бо пророцы глаголаша, Той поклонимся.

Слава, и ныне:

Пресветлая днесь милостивная светлость, Божия благодать, вся радостно одождяет небесными тучами, на стези сладкия направляющи, Богородице Владычице, всех, познавших Тя земных, Приснодево, ныне бо вся земля Российская радуется, верою Тя славящи.

 

Канон Пресвятой Богородице пред иконой «Всеблаженная»

Песнь 1

Ирмос: Песнь победную поим вси Богу, сотворшему дивная чудеса мышцею высокою и спасшему Израиля, яко прославися.

Днесь возсия Всенепорочныя Девы торжество, приидите убо, празднолюбцы, согласными песньми и пении радостно Сию воспоим.

Божественное и всенепорочное торжество Богородицы совершающе, притецем, богомудрии, руками плещуще светло, и духом боголепно песньми почтим.

Чистая, Всеблаженная, Всечестная Отроковице, светлое Твое торжество радостно совершающе, величия Твоя благоговейными мысльми, вернии, вси почитаем.

Марие Всепетая, Отроковице Дево, всечестную память Твою светло празднующе, веселою душею славу Твою всеблагоговейно ныне воспеваем.

Песнь 3

Ирмос: Да утвердится сердце мое в воли Твоей, Христе Боже, Иже над водами небо утверждей второе и основавый на водах землю, Всесильне.

Обетование предвечное исполняющи, Отроковице Всенепорочная, и от неплодныя матере, яко цвет, произрастши, смертным всем даровала еси радость неизглаголанную.

В рождестве Твоем возрадовашася честнии родителие Твои, Отроковице, Иоаким достохвальный и Анна всечестная, приводяще же Богови Тя, предаша верно.

Священник и пророк Захария прият Тя внутрь олтаря, свещеносныя же девы светло стекошася к Создателю, воспевающе песнь благодарственную.

Воспитавшаяся во Святая Святых, Отроковице Всенепорочная, пребыла еси вся чиста, и свята, и нескверна, от Ангела бо приимала еси пищу Небесную.

Песнь 4

Ирмос: Духом провидя, пророче Аввакуме, Словесе воплощение, проповедал еси, вопия: внегда приближитися летом — познаешися, внегда приити времени — покажешися. Слава силе Твоей, Господи.

Архангел послан бысть с высоты Небес, благовествуяй тайну страшную, во чреве же Твоем несказанно поносивши и рождши всех Творца, спасла еси человека, Владычице.

Безневестная Дево, Честная Голубице, Бога Слова Безначальнаго родила еси на земли, и прежде рождества Дева просиявши, по рождестве же воистину освящена пребывши, Марие Богоневесто.

Во страну Египетскую пришла еси, о, Честная, и чудес страшных Самовидица была еси, Сына же Твоего на Древе повешена и во гробе нове заключена видела еси, воскресша тридневно.

Яко одушевленный облак и столп света, Светодавца Солнца показала еси нам, на Небеса же преставилася еси, Благословенная, в позлащенней красоте преиспещрена, слава Ангелов, Всецарице.

Песнь 5

Ирмос: Твой мир даждь нам, Сыне Божий: иного бо, разве Тебе бога не знаем, Имя Твое именуем, яко Бог живых и мертвых еси.

Сын убо Твой, Всечестная, даровал есть верным Божественнаго лика нерукотворенное изображение, Ты же, Дево Всеблаженная, мирови честную Твою икону оставила еси.

Пречистую икону Твою, Мати Божия, богосветлыми благодатьми облистала еси, в царице же градов, Царица Божественных Ангелов, сию возложила еси.

Божественная Твоя икона и честная, Всеблаженная, многая всечестныя храмы преминувши, прославлена вселися во храме божественнем славнаго Победоносца.

Всечестная икона Твоя, Пречистая Дево, царствующаго града похвала есть и с верою прибегающим богатно изливает обильную Твою благодать.

Песнь 6

Ирмос: Пророка Иону подражая, вопию: живот мой, Блаже, свободи из тли и спаси мя, Спасе мира, зовуща: слава Тебе.

Пророк, помолився, свободися тления, мы же, лобызающе икону Твою, Честная Богоневесто, страшных бед верою избавляемся.

Светлый Твой и честный праздник совершающе и мысленных источников реки почерпающе, Всепетая, Твою икону лобызаем.

Неисчерпаем источник дарований священных показуется всепречистая икона лика Твоего, Всенескверная, всему миру благодать посылающи.

Святая Твоя икона, Всеблаженная, Чистая, великия и честныя церкве Христовы блистание есть велие и украшение.

Кондак, глас 4

В праздник Твой сошедшеся, вернии, священное ко славе Божией торжество Твое, Владычице, днесь всеблагоговейно совершаем, любовию же чтуще честную икону Твою, Тебе песнословим вси в радости: радуйся, Дево Честная, Всеблаженная.

Икос

Прежде век от Бога ясно избранная и Мати бывшая всех Царя, Егоже незримый Образ плотию обложившая, и зело помраченный образ Адамов неизреченно возобразившая, и Божественною силою начальника тьмы убившая, и Возбранная Воевода показавшаяся, соблюди град сей и спаси люди христоименитыя, Богородице, икону Твою чтущия и вопиющия Тебе тепло: радуйся, Дево Честная, Всеблаженная.

Песнь 7

Ирмос: Тебе, умную, Богородице, пещь, разсмотряем, вернии, якоже бо отроки спасе три Превозносимый, мир обнови, во чреве Твоем всецел, хвальный отцев Бог и препрославлен.

Имеяше убо прежде кивот богоданный скиния свидения, Соломонов же храм той унаследова, яко Божественное украшение; Твой же образ, Дево, имущи, Христова Церковь светло веселится.

Древле, играя, богоотец пред сенным ковчегом скакаше; христоименитии же людие похваляются, чтуще, яко кивот святыни, в Церкви Христовой всечестную икону Твою, Всеблаженная.

Во огнь лютый иконы ввергаху иконоборцы зломыслении, Феодора же царица иныя воздвиже, яко благочестия победное знамение; вернии же ныне лобызают священную Твою икону, Честная, Всеблаженная.

Мати Непорочная, Богородице Всепречистая, обогатихомся, вернии, изображение лица Твоего яко воистину многоценное сокровище имуще, ибо мы, с верою чтуще Твою икону, чтим Первообразное.

Песнь 8

Ирмос: Егоже ужасаются Ангели и вся воинства, яко Творца и Господа, пойте, священницы, прославите, отроцы, благословите, людие, и превозносите во вся веки.

Образу властителя нечестиваго посмеявшеся, отроцы избавишася от пещи и пламене, мы же, почитающе Твою икону честную, избавляемся от бед всяческих, Богородице.

Иконе поклонение Лев царь непреклонно людем запрети повелением страшным, Ты же, Чистая, даеши верным сокровище, Твоего лика, Дево, всечестную икону.

Возбраннии борцы за иконы Божественныя горесть мук тяжких претерпеша, обаче чтущии честный образ Твой, Дево, спасаются от всяких бед.

Образы и кумиры служения нечестиваго тлением исчезоша, и се уже благоговейно славим вси икону Твою, Пречистая Дево, во вся веки.

Песнь 9

Ирмос: Светоносный облак, в оньже всех Владыка, яко дождь с небесе на руно, сниде и воплотися нас ради, быв Человек, Безначальный, величаем вси яко Матерь Бога нашего Чистую.

Яко день лучезарный и Света Мати сущи, всем испущаеши всесветло спасения лучи; сего ради Тя, Всепречистая, ныне в пениих почитающе, светло веселящеся, вси вернии, совершаем честный Твой праздник.

Светообразных Ангел и Херувим вышшую, и Небес пространнейшую, и Матерь Деву славословяще воистину, и Тя величающе, Всенепорочная, честней Твоей иконе с любовию покланяемся благочестно.

К священному образу всепречистаго лика Твоего, Чистая, Всеблаженная, благочестно припадающе, честнии патриарси и весь причт, и лицы дев, и людие, покланяемся и славим всех Творца.

Апостоли богоноснии, Твое тело погребающе, мир ароматы чистыми помазаша древле, икону же Твою, Чистая Дево, Всецарице, Ангели, стояще незримо, божественными песньми почитают благоговейно.

Троичен: Прежде век сый Зиждитель всех, Боже, Безначальне Отче, Сыне и Душе, Едино Божество истинное, Троице Единосущная и Сопрестольная, молитвами Всечистыя соблюди верныя люди Твоя.

Славословим, Дево, Твое нетленное рождество и благочестно покланяемся честней Твоей иконе, да избавимся искушений и благодать всегда сущую почерпем; сего ради Твоими мольбами покрый, соблюди на Тя уповающия.

Светилен

Ангельски Тя поем, Богородице Дево, яко Христа родила еси, Спасителя миру. Яко Матернее убо дерзновение к Нему имущая, непрестанно моли со всеми святыми о нас, Твое торжество совершающих и покланяющихся честней иконе Твоей, Всечистая.

 

Канон Пресвятой Богородице пред иконой «Всех Скорбящих Радость»

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Ку́ю Ти́ досто́йную пе́снь принесе́т на́ше неможе́ние? то́чию обра́довательную, е́йже на́с Гаврии́л та́йно научи́л е́сть: ра́дуйся, Богоро́дице Де́во, Ма́ти Неневе́стная.

Ра́дуйся, благода́ти исто́чниче; ра́дуйся, ле́ствице и две́рь небе́сная; ра́дуйся, све́щниче, и ста́мно злата́я, и горо́ несеко́мая, Я́же Жизнода́вца Христа́ ми́рови ро́ждшая.

Всея́ моея́ жи́зни предста́тельнице, от бе́д мно́гих изба́ви мя́, да благода́рственный гла́с воспева́ю Ти́, Богоневе́сто Пречи́стая, и бу́дущия мя́ исхити́ му́ки.

Я́же все́м удо́бь послу́шная в ско́рби и в печа́ли помога́ющая, Богоро́дице блага́я, благода́ть пода́ждь пе́ти Тя́ дерза́ющим, Влады́чице, скорбя́щих ра́досте.

Многобога́тную благода́ть стяжа́вши, Влады́чице, дерзнове́нною Твое́ю моли́твою пресла́вно изми́ мя́ от напа́стей, убо́гаго раба́ Твоего́, скорбя́щих ра́досте.

Я́же еди́на в напа́стех и ско́рбех защища́ющая, под кро́в Тво́й, Пречи́стая, прибега́ющих те́пле, приими́ я́ко Преблага́я, я́же от се́рдца моле́ния.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Утвержде́ние бу́ди, и прибе́жище, и покро́в, Де́во Богороди́тельнице, ве́рою к Тебе́ прибега́ющим и Бо́жию Тя́ Ма́терь испове́дающим.

Кре́пость моя́, и ра́дость, и весе́лие, и стена́ тве́рдая, и предста́тельница Ты́ еси́, Всенепоро́чная, искуше́ний и бе́д избавля́ющи мя́.

Ми́лостивным и кро́тким Твои́м о́ком, Богороди́тельнице, зря́щи мя́ во обстоя́нии и ско́рби одержи́ма, вско́ре свободи́: Тя́ бо призыва́ю на по́мощь.

Кропи́ши исцеле́ний струи́ боля́щим, Де́во, всю́ду, Тя́ бо исто́чника показа́ милосе́рдия, Влады́чице, И́же ми́лости Госпо́дь, из Тебе́ рожде́йся па́че ума́.

Исто́чник ми́лости, подая́й скорбя́щим утеше́ние, Ты́ еси́, те́мже, Влады́чице, и мне́ моли́твенных Твои́х во́д исто́чник источи́, и угаси́ страсте́й пе́щь.

Отча́явся по́мощи вся́кия, к Тебе́, Пренепоро́чная, держа́вней храни́тельнице и покро́ву, притеко́х: не отри́ни у́бо мене́ от боже́ственнаго покро́ва Твоего́.

Седа́лен, гла́с 7:

Ра́дуйся, Со́лнца о́блаче мы́сленнаго и неизрече́ннаго, Влады́чице; ра́дуйся, всесве́тлая свеще́; ра́дуйся, све́щниче всезлаты́й; Тобо́ю, Пресвята́я, Е́ва изба́вися от кля́твы. Но я́ко иму́щая дерзнове́ние ко Благопреме́нному Сы́ну Твоему́ и Бо́гу, ма́тернею моли́твою не оскуде́й о на́с моли́тися, Пречи́стая.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Наде́ждо ненаде́жных, помо́щнице ни́щих, пла́чущих утеше́ние, согреша́ющих очище́ние, руководи́тельнице заблу́ждших, боля́щих целе́бнице и исправле́ние па́дающих, Влады́чице, спаси́ рабы́ Твоя́.

Не неприча́стни есмы́, Влады́чице, Твоего́ заступле́ния в ско́рбех; те́мже и ны́не на́м помози́ вско́ре, лю́те обурева́емым, ру́ку простира́ющи, Чи́стая; бу́ди ми́лостива боле́знем на́шим, Ма́ти Бо́жия, ра́дость ско́рую подаю́щи.

Вся́ блага́я и те́плая засту́пница су́щи гре́шником и смире́нным, Богороди́тельнице Пречи́стая Влады́чице, от бе́д и скорбе́й, и грехо́в спаса́й рабы́ Твоя́.

Пресла́вную Твою́ Ма́терь, Христе́, приими́ моля́щуюся о ми́ре, ми́лостивно Тебе́ зову́щую: Сы́не Мо́й, приими́ мольбу́ Мою́ и ути́ши гне́в, належа́щий земли́.

Кро́в и заступле́ние, и прибе́жище бу́ди ми́, Де́во, рабу́ Твоему́, и изба́ви мя́ от безме́рных зо́л, воспева́ти Тя́, Пречи́стая: сла́ва неизрече́нному Рождеству́ Твоему́.

Наде́жда и щи́т, и утвержде́ние Ты́ мне́ еси́, Блага́я, и лю́тых избавле́ние, и просвеще́ние души́ мое́й, и хвала́, и стена́, и держа́ва.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Ты́ кре́пость моя́, Ты́ похвала́, и ра́дование, и храни́тельница ми́ еси́, и заступле́ние, и прибе́жище, и предста́тельница непобеди́ма, Пресвята́я Богоро́дице Де́во, те́мже спаси́ раба́ Твоего́.

Спаси́ мя́, Влады́чице, из глубины́ напа́стей, и скорбе́й, и печа́лей, и страсте́й теле́сных и в тишине́ боже́ственней сохрани́ ду́шу мою́.

Моли́твеннице нело́жная, упова́ние христиа́н, Обра́дованная, приими́ мольбы́ от на́с, приле́жно призыва́ющих и моля́щихся Тебе́.

Покро́в мо́й еси́ Ты́ и при́сное хвале́ние, о Влады́чице Богоро́дице, ника́коже бо презира́еши к Тебе́ прибега́ющих.

До́м Тя́ сла́вы, го́ру Бо́жию святу́ю, Чи́стая, неве́сту, черто́г, хра́м освяще́ния Сы́н Бо́жий, в Тя́ всели́выйся, и ра́й сла́дости присносу́щныя на́м соде́ла.

Сте́ну необори́му, Чи́стая, моли́тву Твою́ стяжа́вше, вопие́м Ти́: умилосе́рдися, о Влады́чице, и ви́димыя и неви́димыя враги́ прожени́.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Боля́щих цели́тельницу, па́дающих воста́ние, согреша́ющих очище́ние, Богоро́дице, Тебе́ молю́, со слеза́ми припа́даю и зову́ Ти́: я́ко сильна́ Сама́ мя́ спаси́, погиба́ющаго.

Ты́ еси́ стена́ неруши́ма, Ты́ еси́ покро́в тве́рд, Богоро́дице Блага́я, Ты́ еси́ предста́тельница крепка́ рабу́ Твоему́: сего́ ра́ди призыва́ю Тя́ при́сно и притека́ю к покро́ву Твоему́.

Ми́рови ра́дость су́щи, Богоро́дице Чи́стая, ра́дуйся, Тебе́, Де́во, зове́м со а́нгелом ве́рно: Твоея́ ра́дости сподо́би ны́, и печа́ль на́шу разори́.

Сла́дость а́нгелов, скорбя́щих ра́дость, христиа́н предста́тельница Ты́ еси́, Де́во Ма́ти Госпо́дня: заступи́ на́с и изба́ви ве́чных му́к.

В де́нь печа́ли, егда́ и́мам теле́сных соу́з разреши́тся, предста́ни ми́, Богороди́тельнице, и обдержа́ния бесо́вскаго исхити́.

При́зри, Влады́чице, на мя́, смире́ннаго, и па́че наде́жды спаси́ мя́: Ты́ бо еси́ упова́ние и покро́в ми́, жи́знь и све́т се́рдцу моему́, Богоро́дице, и утвержде́ние.

Конда́к, гла́с 6:

Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице, Ты́ на́м помози́, на Тебе́ наде́емся и Тобо́ю хва́лимся, Твои́ бо есмы́ раби́, да не постыди́мся.

И́кос:

Простри́ дла́ни Твоя́, и́миже все́х Влады́ку я́ко младе́нца прия́ла еси́, за мно́жество бла́гости; не оста́ви на́с, всегда́ наде́ющихся на Тя́, бо́дренною Твое́ю моли́твою и неисче́тною просты́нею уще́дри на́с, и пода́ждь душа́м на́шим милосе́рдие Твое́, во ве́ки источа́ющи: Тебе́ бо и́мамы, гре́шнии, Засту́пницу от находя́щих на ны́ бе́д и зо́л. Но, я́ко иму́щи милосе́рдия щедро́ты, ускори́ на моли́тву, и потщи́ся на умоле́ние, предста́тельствующи при́сно, Богоро́дице, чту́щих Тя́.

Пе́снь 7.

Ирмо́с: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Страстьми́ престаре́вся и неосла́бными напа́стьми, и скорбьми́, и доспе́в к за́падом жития́ моего́, доброде́телей неприча́стен, ле́ностию снеде́н бы́в, вопию́ Ти́, Влады́чице: утеше́ние земны́м, поми́луй мя́.

Ра́дуйся, исто́чниче присноживо́тныя воды́; ра́дуйся, раю́ пи́щный; ра́дуйся, стено́ ве́рных; ра́дуйся, Неискусобра́чная; ра́дуйся, всеми́рная ра́досте, Е́юже на́м возсия́ хвали́мый отце́в Бо́г и препросла́влен.

Все́м, су́щим в ми́ре, засту́пница еси́ и стена́ христиа́ном, и прибе́жище непосты́дно, Чи́стая Мари́е. Те́мже ве́рою Тя́ чту́ще, вопие́м Христу́: оте́ц на́ших Бо́же, благослове́н еси́.

О, благоутро́бия Твоего́, Де́во Чи́стая! Реши́ши бо безме́рныя печа́ли и напа́сти, призыва́ющим в ну́жде и обстоя́нии: те́мже и ны́не помози́, Благослове́нная, Тя́ восхваля́ющим.

Еди́но упова́ние и по́мощь ве́рным су́щи, Богороди́тельнице, потщи́ся помощи́ рабо́м Твои́м, погружа́емым скорбьми́ и в боле́знех су́щим, и прибега́ющим к Тебе́ с любо́вию души́.

Ра́дование благода́рственное Тебе́ прино́сим, Ма́ти Бо́жия, я́ко вои́стинну Тобо́ю изба́влени вся́каго зла́го начина́ния, и согла́сно Тебе́ пое́м: благослове́на еси́.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Ра́дуйся, престо́ле сла́вный Бо́жий; ра́дуйся, ве́рных стено́, Е́юже су́щим во тьме́ возсия́ Све́т — Христо́с, Тебе́ блажа́щим и вопию́щим: вся́ дела́ Госпо́дня, Го́спода по́йте и превозноси́те во вся́ ве́ки.

Пое́м Тя́, Пречи́стая и Ма́ти Бо́жия, и кто́ не сла́вит Тя́, вои́стинну Благу́ю, су́щую наде́жду ду́ш на́ших? те́мже, Пречи́стая, и мою́ мольбу́ приими́.

Ты́ еси́ спасе́ние все́х челове́к, Я́же Бо́га ро́ждшая неизрече́нно; Ты́ еси́ ве́рных спаси́тельница, Богоро́дице, и слепы́х наста́вница, и па́дающих исправле́ние, Те́мже Тя́ восхваля́юще, Христу́ зове́м: благослови́те вся́ дела́ Го́спода, по́йте и превозноси́те Его́ во вся́ ве́ки.

Струи́ исцеле́ний на́м всегда́, ве́рным, Чи́стая, источа́еши: те́мже незави́стную благода́ть взе́млюще, воспева́ем Рождество́ Твое́, Чи́стая, и превозно́сим во вся́ ве́ки.

На Тя́ возложи́х, Влады́чице, се́рдце, и ду́шу, и те́ло: не и́мам бо ины́я наде́жды, ра́зве Тебе́, е́юже получу́ ми́лость. Те́мже пода́ждь ми́ бога́тую Твою́ благода́ть.

На мольбу́ мою́ ны́не умилосе́рдися и ра́дость в печа́ли ме́сто да́руй ми́, да пою́ Тя́, Влады́чице, и вопию́ Сы́ну Твоему́: благослови́те, вся́ дела́ Госпо́дня, Го́спода.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Ра́дуйся, Мари́е, вели́кое всея́ тва́ри чу́до; ра́дуйся, Дщи́ у́бо Дави́дова, Госпо́дня же Ма́ти; ра́дуйся, пе́ние Гаврии́лово; ра́дуйся, прибе́жище и утвержде́ние, и по́мощь все́м, Пресвята́я, су́щим на земли́ гре́шником.

Ю́же изво́лил еси́, Влады́ко, приими́ ми́лостивно Моли́твенницу — Ма́терь Твою́, о на́с, и Твоея́ бла́гости вся́ческая испо́лнятся: да Тя́ вси́ я́ко Благоде́теля велича́ем.

О, Де́во Блага́я! О, ми́ра ра́досте и прибе́жище! О, храни́лище ве́рных и избавле́ние скорбе́й! Ты́ предста́ни ми́ в ча́с сме́рти и изба́ви от бесо́в, и́щущих поглоти́ти мя́.

Ты́ еси́ а́нгелов ра́дость, Ты́ еси́ пра́ведников добро́та, Ты́ еси́ ве́рных наде́жда, Ты́ еси́ соблюде́ние на́ше, Ты́ еси́ мо́ст, к жи́зни нестаре́ющейся преводя́й ве́рою и любо́вию Тя́ велича́ющия.

О, Ма́ти вся́ческих Творца́, всесве́тлая печа́льных уте́хо, оскорбля́емых предста́тельнице и немощны́х засту́пнице, сохрани́ мя́, Блага́я, от бе́д и прило́г вра́жиих.

Еди́на боля́щих посеще́ние, еди́на па́дших исправле́ние, Влады́чице, еди́на к Бо́гу руководи́тельнице и вхо́де, еди́на хода́таице ве́чных бла́г, поми́луй мя́ еди́наго, па́че все́х согреши́вшаго.

Свети́лен.

Под кро́в Тво́й, Де́во Госпоже́, прибега́ем вси́ ро́ди челове́честии: просвети́ ны́ све́том Рождества́ Твоего́, гре́шныя рабы́ Твоя́, моля́щияся приле́жно и покланя́ющияся Тебе́, и прося́щия умире́ния ми́рови и душа́м на́шим ве́лия ми́лости.

 

Канон Пресвятой Богородице пред иконой «Геронтисса»

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Припев: Пресвятая Богородице, спаси нас.

Христе, Свете истинный, подаждь ми просвещение восписати похвальная Пресвятей Матери Твоей, и воспою Тоя великое к рабом Твоим благоутробие.

Пресвятая Богородице, спаси нас.

Горе, выну славимая, благоволила еси, Госпоже, и низу среди бедных прославити имя Свое благодатию чудес от святыя иконы Твоея, Избавительнице.

Пресвятая Богородице, спаси нас.

Егда обитателие веси, отчаявшеся от истреблявшаго труды их пружия, притекоша со слезами ко образу Твоему, Дево, абие улучиша избавление и, радующеся, прославиша милость Твою.

Пресвятая Богородице, спаси нас.

Десница Твоя, Владычице, прославися в крепости, и множеством милости Твоея явилася еси Покровительница и Избавительница во спасение бедствовавших.

Слава: Упование христианом, Помощнице сущим в скорбех, моли Сына Твоего избавитися всяких бед празднующим святому образу Твоему, Избавительнице.

И ныне: Радуйся, богатство неистощимое нищих и сирых Заступнице, радуйся, спасающая верою имя Твое, Дево, призывающих, радуйся, уныния отгнание и радости Подательнице.

Песнь 3

Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.

Пресвятая Богородице, спаси нас.

Господь мертвит, егоже хощет, и живит Тобою, Мати Живота, исполняя молитвы молящихся Тебе, низведенных во ад возводит и от гноища страстей воздвизает Твоим всемощным предстательством.

Пресвятая Богородице, спаси нас.

Замедлившу иерею напутствовати умирающа отрока, егда о умершем помолишася к Тебе, Всеблагая, и осениша иконою Твоею, Избавительнице, внезапу отроча оживе и воста здраво Твоею и Сына Твоего животворною силою.

Пресвятая Богородице, спаси нас.

Живоносный Тя и всецелебный источник, Богоневесто, познахом, раби Твои: образом бо Твоим, Избавительнице, жизнь и здравие подаеши душевное и телесное и от бед избавляеши просящих Твоего заступления.

Пресвятая Богородице, спаси нас.

Начало Христовых чудес Ты еси, Пречудная Дево, темже чудеса образа Твоего славяще днесь, Избавительнице, молимся Тебе: посети рабы Твоя благодатию Твоею, недугов, зол и вечныя смерти изымающи ны.

Слава: Грехами умерщвляемую душу мою оживотвори, Владычице, яко по Бозе вся могущая, и обдержащих мя страстей избави, да пленения страстнаго свобожден, благодарственно Тя величаю.

И ныне: Направи, Чистая, к тишине безстрастия во глубину зол влекома раба Твоего и не попусти ми погибнути, просящему Твоея, Избавительнице, милости, Тобою бо вернии, покрываеми, спасаются.

Господи, помилуй (трижды). Слава, и ныне:

Седален, глас 3-й

Пресвятеи руце Твои, имиже носила еси Носящаго вся, простри к Нему, Приснодево Избавительнице, и молитвами Твоими избави ны гнева Его, грех ради движимаго, отводящи лютая наведения и тех ради бывающую людем тугу и уныние, и спаси в мире души наша.

Песнь 4

Ирмос: Седяй в Славе на Престоле Божества на облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Пресвятая Богородице, спаси нас.

Разумеша вернии дела благости Твоея, Владычице, и вниде радостный трепет в сердца их, внегда бо смутитися душам их от бед и недугов, милость Свою, Благословенная, помянувши, иконою Твоею изшла еси на избавление людей Твоих.

Пресвятая Богородице, спаси нас.

Уведевшии о преславном чудеси могущества Твоего, Богородице, во оживлении отрока, устремишася от различных мест к образу Твоему, Избавительнице, и, приемлюще исцеления, с веселием Тя величаху.

Пресвятая Богородице, спаси нас.

Милосерда сущи, Чистая, яко Всеблагое Слово на спасение наше воплотившая, помощи и избавления Твоего не лиши нас, с верою притекающих к чудотворней иконе Твоей, Избавительнице.

Пресвятая Богородице, спаси нас.

Ты похвала верных, Мати Всепетая, Ты кивот святыни, освящение подающая, Ты целеб источник неисчерпаемый и от бед Избавительница молящихся Тебе пред святым образом Твоим.

Слава: Недугами угнетаемых и искушений борителя, избавляй нас от сих, Богородительнице, и в час исхода не предаждь душ наших на одоление супостатом, да воспеваем величия Твоя.

И ныне: Непобедимая Воеводо вождей и воинств христианских, христолюбивое воинство, щитом веры и Креста вооруженных, победоносны являй, избавляющи от всех наветов вражиих.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Пресвятая Богородице, спаси нас.

В скорби мале наказание Сына Твоего бысть обитателем веси, и, поболевше, призваша Тя, Матерь щедрот, и Тобою возсташа от отчаяния и возвеселишася, роса бо благодати, яже от иконы Твоея, исцеление им бысть.

Пресвятая Богородице, спаси нас.

Благодать точащую икону Твою, Избавительнице, верному Твоему рабу, с собою всегда носившу, возбранила еси, Госпоже, скрывати ю от верных, да избавляются от бед и недугов прибегающии к Тебе.

Пресвятая Богородице, спаси нас.

Тобою, Всемилостивая Владычице, свобождение от лютых ниспослася, притекшим с верою ко святому образу Твоему, надежда же, покров и нерушимо веселие даровася скорбящим, Богорадованная.

Пресвятая Богородице, спаси нас.

Ужасошася бедствовавшии о богатстве даров Твоих, Дево, в чудесех от образа Твоего, к немуже припадающе, радостно взываху: воистинну Ты еси Избавительница от всех бед.

Слава: Радосте Ангелов и человеков, свободна мя печалей житейских сотвори и будущия тесноты избави и вечнаго огня матерним дерзновением Твоим, Всеблагая, от бед Избавительнице.

И ныне: Богоизбранная Приснодево, в руне орошенном предвиденная древле, окропи росою благодати изсохшую землю сердца моего и плодоносну соделай душу мою благим деянием и зрением.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Пресвятая Богородице, спаси нас.

Кий ум постигнет, Госпоже, державу крепости Сына Твоего, изведша люди Своя из земли, еяже вереи заклепи вечнии, и Тебе, Матерь Свою, соделавша врагом страшну, из чрева адова избавляющую призывающия Тя.

Пресвятая Богородице, спаси нас.

Кий язык изъяснит всепобеждающую силу Твою Владычице! Едино бо точию подобие лица Твоего, яко огнь, опаляет злобныя духи, люди же Твоя врачует и радует, егоже благоговейно лобызаем, раби Твои.

Пресвятая Богородице, спаси нас.

Кое слово изобразит величие чудес Твоих, Всемилостивая от бед Избавительнице! Точию бо принесеся святая икона Твоя к люте мучимей бесом, абие исчезе мучитель, и исцеленная велегласно прослави силу Твою.

Пресвятая Богородице, спаси нас.

От обилия благодати, присущия образу Твоему, Богоневесто, колико беснуемых и иных недужных Тобою исцелеша, колико скорбящих на веселие приложися, с верою притекших ко иконе Твоей.

Слава: О, великаго милосердия Твоего, Богородительнице, благоволившая чудотворным образом Твоим пребывати у нас! Что воздадим Ти за благодать, юже явила еси нам, даровавши храму сему толико священное богатство?

И ныне: О, Всепетая Мати, державный покрове мира! Храни от всех бед чтущия Тя, спобори им на враги христианския необоримою силою Твоею.

Господи, помилуй (трижды). Слава, и ныне:

Кондак, глас 8-й

Ко иконе Твоей, Пресвятая Госпоже, бедствовавшии с верою притекше, заступлением Твоим избавишася от злых, но яко Матерь Христа Бога, и нас свободи от лютых обстояний, временных и вечных, да зовем Ти: радуйся, Избавительнице наша от всех бед.

Икос

Сошедшиися во храме сем, прославим преславный храм Божества, Пресвятую Деву, пред образом Ея со благоговением вопиюще: радуйся, Божественныя славы селение; радуйся, Владычице Небесе и земли. Радуйся, неистощимый источниче чудес; радуйся, всемощное врачевание недужных. Радуйся, прогонительнице демонов; радуйся, мертвецев оживление. Радуйся, обителей Горы Твоей покрове; радуйся, иноков теплое предстательство. Радуйся, верных Заступнице; радуйся, спасение рода христианскаго. Радуйся, Еюже возсиявает радость; радуйся, Еюже печаль престает. Радуйся, Избавительнице наша от всех бед.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Пресвятая Богородице, спаси нас.

Сотвори с нами по множеству милости Твоея, Богородице, и изми нас по чудесем Твоим, и да постыдятся от всякия силы, и крепость да сокрушится являющих злая рабом Твоим, о Тебе поющим: отцев Боже, благословен еси.

Пресвятая Богородице, спаси нас.

Тебе, Дево, халдейская пещь прообраз имущи, отроки росою прохлаждаше посреде пламене. Темже и нас, образ Твой имущих, во огни искушений прохлади и неопалимы соблюди благодатию Сына Твоего, да поем Ему: отцев Боже, благословен еси.

Пресвятая Богородице, спаси нас.

Седмерицею разжигаемыя стрелы седми смертоносных страстей, яже испускает возстающий на ны седмиглавый змий диавол, угаси и сокруши, Владычице, да, якоже отроцы неврежденнии, поем: отцев Боже, благословен еси.

Пресвятая Богородице, спаси нас.

Седмисвещный светильник разумеем Тя, Богоблагодатная Марие, седмию дарами Духа светящий верным, облагодати убо и ущедри поющих о Тебе, Подателю благих: отцев Боже, благословен еси.

Слава: Тя, Госпоже, имуще милосердия неиждиваемое сокровище и святую икону Твою, Избавительнице, в покров обители и во избавление от бед, Сыну Твоему о Тебе поем: отцев Боже, благословен еси.

И ныне: Яко Царя царствующих Матерь, молим Тя, Владычице: отечеству нашему и христолюбивому воинству буди несокрушимая крепость, подающи им благая, поющим: отцев Боже, благословен еси.

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Пресвятая Богородице, спаси нас.

Якоже трие отроцы, хранимии во огни, пояху и благословляху Бога, тако и вернии, Тобою, Благословенная, избавльшеся от огня, бед и недугов, вся дела, – взываху, – Господа пойте и превозносите Его во веки.

Пресвятая Богородице, спаси нас.

Якоже от зловредных пругов избавила еси прежде к образу Твоему притекших, Богородице, тако и ныне не престай от тех и всякаго вреда избавляти обитель сию, Гору, Россию и повсюду православныя, да славим Тя во веки.

Пресвятая Богородице, спаси нас.

Якоже умерша, осененна иконою Твоею, Дево, оживила еси, оживотворяй и нас, отводящи от смертоноснаго пути и наставляющи на стезю вечнаго живота, да, спасаеми Тобою, превозносим Тя во веки.

Пресвятая Богородице, спаси нас.

Якоже повелела еси рабу Твоему не скрывати от верных благодати, точащияся от святаго образа Твоего, Всеблагая Избавительнице, источай сию и нам, рабом Твоим, да прославляем Тя во веки.

Слава: Якоже многих исцелила еси, Госпоже, от мучительства демонскаго и иных недугов, и нас свобождай болезней душевных и телесных и от всех сетей вражиих, да воспеваем Тя во веки.

И ныне: Якоже Ангел воодушеви Гедеона на побеждение мадиамлян, воодушевляй, Всецарице, и славящия Тя, всякое шатание врагов низлагающи, да благословляем Тя во веки.

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Пресвятая Богородице, спаси нас.

Иночествующии сея обители, к Матери Господа Вышняго притецем днесь, молящеся пред чудотворною иконою Ея, еюже посети скорбящия и сотвори избавление людем Своим.

Пресвятая Богородице, спаси нас.

Щедраго рождшая и Милостиваго Владыку и Избавителя всех, покажи, Всеблагая, щедроты Твоя на нас, празднующих честному образу Твоему, и сотвори избавление от бед людем Своим.

Пресвятая Богородице, спаси нас.

В Тебе, Богородице, воздвиже Сын Твой рог спасения нам, укрепи убо рабы Твоя служити Ему преподобием и правдою пред Ним вся дни живота нашего и твори избавление от бед людем Своим.

Пресвятая Богородице, спаси нас.

Призри, Дево Избавительнице, на молитвенныя воздыхания наша, не остави ны безпомощны во искушениих и буди Молитвенница ко Господу, да подаст грехом нашим прощение и избавление от бед людем Своим.

Слава: Госпоже Всемилостивая, не престай Гору Твою и обитель сию, Россию и вся православные посещати благодатию и творити избавление от бед людем Своим.

И ныне: Ходатаицу о нас, Слове Божий, предлагаем Матерь Твою, от Неяже воплотился еси на спасение наше, молитвами Ея прости и помилуй нас, Незлобиве, согрешающих Тебе, и сотвори избавление от бед людем Твоим.

 

Канон Пресвятой Богородице пред иконой «Грузинская»

Песнь 1

Ирмос: Коня и всадника в море Чермное сокрушаяй брани мышцею высокою Христос истрясе, Израиля же спасе, победную песнь поюща.

Взятся кивот Божественный почити в Горе Божии, яко одушевлен, Безсмертнаго Бога Родительницы образ в честнем храме пребыти, егоже торжество светло праздновати стецемся, вернии.

Гласы, яко трубы, возшумите, благочестивых мужей множества, и воззовите вельми, священных уста, и приимите икону Царицыну, пришедшую во спасение наше.

К горе, Девы Пренепорочныя приимшей икону, приступим, вернии, и благоухания Божественнаго прияти потщимся, в сей бо излияся миродыхающее и души облагоухающее благовоние.

Гора явленнейшая Ты бысть, Пречистая Владычице, на Нюже Господь возшед, явися, к Нейже прибегающе, спасаемся.

Песнь 3

Ирмос: Водрузивый на ничесомже землю повелением Твоим и повесивый неодержимо тяготеющую на недвижимем, Христе, камени заповедей Твоих, Церковь Твою утверди, Едине Блаже и Человеколюбче.

В песнех тимпанских ныне воспоем Чистей Богородительнице и со освященных соборы чудотворный Той образ окружим, радующеся, яко Престол есть Божий Святый.

Живоподательный Божественный источник видяще, приидите, верными сердцы слезы точаще, Чистыя Богоматере иконе прикоснемся, исцеления точащей.

Якоже цвет прекрасный и воня пищная, икона Твоя, Владычице, и спасает всех притекающих к ней, и от различных недуг избавляет с верою призывающих Тя.

Божественное и благородное Жилище, подаждь согрешением нашим оставление памятию Твоею, Владычице, и от бед спаси ны, Мати Божия.

Кондак, глас 6

Аще попущением Божественным от рук неверных честная Твоя, Владычице, икона поруганию подвержеся и копием варвар прободена бысть, обаче во стране нашей Православней любочестно всеми прославляется и благоговейно почитается, сего ради Тобою являет слепым зрение, глухим слышание, немым глаголание, хромым хождение, разслабленным укрепление, скорбным утешение и отраду. Сих ради молим Тя, Милосердная Мати, до конца пробави милости Твоя на нас, яко Благая.

Седален

Хотящих всех с верою входити в храм Твой святый, Владычице, присно спасай и сохраняй, в нем Тя славящих, от всяких напастей и бед свобождай и на противныя победы даруй, ко спасению прошения присно нам подающи.

Песнь 4

Ирмос: Божественное Твое разумев истощание прозорливо, Аввакум, Христе, со трепетом вопияше Тебе: во спасение людей Твоих спасти помазанныя Твоя пришел еси.

Гора, добродетельми присенная, из Неяже Владыка раболепно прииде, человеки от работы вражия избавляя, явилася еси, Пречистая Владычице.

Гора, юже виде Божественный Аввакум, присенная и чистая Ты явися, Пречистая Богородице.

Гору превелию, юже Даниил виде, именуем Тя, Владычице, от Неяже Камень отсечеся Нерукосечный и вся соблазны истни, верныя же просвети.

Гору Тя усырену и тучну именует Давид, праотец Твой, от Неяже Бог явися, спасая всех поющих Тя и покланяющихся Тебе.

Песнь 5

Ирмос: Одеяйся светом, яко ризою, к Тебе утренюю и Тебе зову: душу мою просвети омраченную, Христе, яко Един Благоутробен.

Небеснии лицы веселятся с человеки днесь и уготовляются прияти честную икону Чистыя Богоматере, яко воистину Царицы тварем, преподобно владычествующия.

Да уклонятся днесь воздушнии дуси, да отступит же и самый миродержец и да падет посрамлен, покланяему видя икону Богоматере.

Не якоже ктому образно в гаданиих священный ковчег Завета носим есть, икона бо Божия Матере священными руками днесь честно в церковь вносима есть.

Голубице Соломоня, яко воистину добра же, и красна, и всечестна, помяни нас в Небесных селениих Сына Твоего, празднующих день пришествия честныя иконы Твоея.

Песнь 6

Ирмос: Неистовствующееся бурею душетленною, Владыко Христе, страстей море укроти и от тли возведи мя, яко Благоутробен.

Воистину безценный есть бисер, Владычице, икона Твоя, нам даровася, якоже Сама рекла еси, обогащая вся верою приходящия к Тебе.

Светится днесь православных собор, еретический же полк да посрамится, видя икону Богоматере покланяему, плотию нам Избавителя рождшия.

Слепым свет уже пришествова, и немощным люте врачевство отверзеся, и всем спасение днесь приближися пришествием честнаго образа Богоматере.

Гора, яже прежде бяше мрачна, ныне же честна и свята есть, на нейже дом Твой, Богородице, верху ея уведехом, Владычице, истинное сбытие Твоея честныя иконы пришествием. Тем верою и любовию вопием Ти: избави от бед рабы Своя.

Кондак, глас 8

Тебе, Избранней от всех родов, Божией Матери, благодарственная пения приносим, пришествием честныя Твоея иконы, раби Твои, Богородице, озаряеми, но, яко имущая державу непобедимую, от всяких нас бед свободи, да зовем Ти: радуйся, Невесто Неневестная.

Икос

Архангельский глас приносим Ти, Богородице, недостойнии раби Твои, умильно стояще пред честною иконою Твоею, сице зовем Ти: радуйся, Обрадованная Мати Царева; радуйся, Небесная Царице, Мати Христа, Бога Небеси и земли; радуйся, предпочтенная величеством чистоты пришествием Сына Твоего и Бога; радуйся, возвеличенная Ангеловым сошествием к Тебе; радуйся, от всех родов избранная Богом; радуйся, святое Вместилище Божия Слова; радуйся, пророческаго проповедания и проречения сбытие; радуйся, апостолом пречестный венче; радуйся, мучеником увязение и благоверным державо; радуйся, святителем украшение и священником доброто; радуйся, любомудрецем иноческаго лика возведение к Горнему Царствию; радуйся, отверзающая рая двери, христианскому роду, присно блажащему Тя, Помощнице; радуйся, Невесто Неневестная.

Песнь 7

Ирмос: Превозносимый отцев Господь пламень угаси, отроки ороси, согласно поющия: Боже, благословен еси.

Священничестии собори и людей составления, отроковицы вся и девицы, воспойте Девы честнаго образа пришествие, веселящеся.

Светится днесь Божия Церковь, славы бо свет в ней возсиял есть, плоти подобозрачное обличие Божия Матере, на спасение людей христоименитых.

Яко пресветлое солнце от незаходимых, икона Твоя, Богомати, от земли поганския преславно предстала есть на спасение людем верным.

Свет Невечерний рождши, Владычице, просвети нас светом лица Твоего и светлости святых сподоби молитвами Твоими.

Песнь 8

Ирмос: Тебе, Вседетелю, в пещи отроцы, всемирный лик сплетше, пояху: дела всякая, Господа пойте и превозносите во вся веки.

Царице всем женам, Дево, мольбу принеси Христу в памяти пришествия иконы Твоея о иже тоя совершающих торжество и превозносящих Тя во вся веки.

Яко световидно и освященно добротою Божества лице Твое, Пренепорочная, славою сияюще Божественнаго девства, преукрашеннаго во вся веки.

Давидски воспеваем Ти песнь, гору Божию именующе Тя, Владычице, источник бо приснотекущий нам источи, чудную икону Твою, тем чтим Тя во веки.

Глаголати не могу, изнемогаю же, и трепещу, и весь преклоняюся к Твоим превеликим чудесем, но любовь, Дево, зрящи, Божественными возмезди даровании непрестанно.

Песнь 9

Ирмос: Исаие, ликуй, Дева име во чреве и роди Сына Еммануила, Бога же и Человека, Восток имя Ему, Егоже величающе, Деву ублажаем.

Вернии елицы, свещи вжегше, светом обложенную икону Чистыя Богоматере, приидите, усрящем сию, с песньми проводим, веселищеся.

Се убо вопияше Давид древле, глаголя: лицу Твоему помолятся богатии людие, воистину ныне мы обогатихомся, Владычице, пришествием честнаго образа Твоего.

Победы подаждь на сопротивныя иже честное пришествие святыя иконы Твоея почитающим, Богомати, Ты бо враги побеждаеши.

Славу по достоянию Тебе, яко Бог, подаде воплотивыйся из Тебе без семене, Владычице, мы же, худии, что Ти принесем, но точию приими усердие иже Тя любовию чтущих, яко Богородица, сохраняй и спаси нас.

Светилен

О пресветлый облаче, Мати Божия, нас побеждающия победи державною Твоею и всесильною десницею, и сущим в скорбех предстани, обидимыя заступи, и грехи очисти молитвенник Твоих, можеши бо, елико хощеши.

 

Канон Пресвятой Богородице пред иконой «Державная»

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

От земноро́дных возра́стши и Зижди́теля ро́ждши, ра́дуйся, на́ша похвало́, Богоро́дице Чи́стая, Тя́, я́ко облада́ющую тва́рьми, велича́ем.

Своего́ прие́мши Соде́теля, я́ко Са́м восхоте́, от безсе́меннаго Твоего́ чре́ва па́че ума́ воплоща́ема, Чи́стая, тва́рей вои́стинну яви́лася еси́ Влады́чица.

Пречи́стая Богоро́дице, Тобо́ю спасе́ние нетле́нно дарова́ся и неразруши́мо весе́лие и наде́жда, покро́в и держа́ва, и душа́м на́шим прибе́жище.

Цари́ца еси́ все́х еди́на, Бо́гу, Богороди́тельнице Чи́стая, святы́й престо́л и пала́та Христа́ Бо́га, Его́же моли́ о чту́щих ико́ну Твою́ честну́ю, пода́ти грехо́в оставле́ние.

Бу́ди на́м по́мощь, Твои́м рабо́м, Влады́чице Чи́стая, ве́рно моля́щим Тя́, я́ко ми́лостива, и держа́вны на́с воздви́гни, во е́же пе́ти Тя́.

Спаса́еши, я́ко мо́жеши, при́сно все́х, я́ко ро́ждши Влады́ку, влады́чествия мя́ сла́стнаго и страсте́й свободи́, да пою́, ра́дуяся: ра́дуйся, Престо́ле Вы́шняго, Благослове́нная.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Наде́ждо ми́ру держа́вная, покро́ве и предста́тельство, Всесвята́я Де́во, не пре́зри, Блага́я, моле́ния рабо́в, от любве́ Тя́ при́сно ублажа́ющих.

Вопло́щся от утро́бы Твоея́ Госпо́дь, госпо́дствуя тва́рию, и Тебе́, Де́во, Госпожу́ показа́в ви́димым же все́м и неви́димым, я́ко Ма́терь прославля́я Непоро́чную.

Мари́е, честно́е Влады́ки прия́телище, возста́ви ны́, па́дшия в про́пасть лю́таго отча́яния, и прегреше́ний, и скорбе́й, Ты́ бо еси́ гре́шных спасе́ние, и по́мощь, и держа́вное предста́тельство и спаса́еши рабы́ Твоя́.

Су́щая Влады́чица на́ша, Всесвята́я Де́во, моля́щи не преста́й, Его́же родила́ еси́, Бо́га, Ца́рствия Своего́ на́с сподо́бити.

Кня́зь ми́рный прии́де на престо́л Дави́дов, ца́рствуя из Тебе́, Богоро́дице, Бо́г воплоща́емь. О, чу́до! и, бра́нь разре́ш, почте́ кня́зи моави́тския, и Тебе́, Ро́ждшую, Цари́цу показа́.

Цари́це Де́во, ро́ждшая Царя́ Христа́, уще́дри и спаси́ мя́, страстьми́ преклоне́ннаго, ве́рою утверди́ и наста́ви мя́ ко спасе́ния стези́, ве́рных спасе́ние.

Седа́лен, гла́с 4:

Да откры́еши на́м все́м мно́жество Твоея́ ми́лости и бла́гости безпреде́льную пучи́ну, грехи́ рабо́в Твои́х вся́ изгла́ди. И́маши бо, Всенепоро́чная, я́ко Ма́ти Бо́жия, вла́сть над созда́нием и си́лою Твое́ю изво́диши вся́, я́ко хо́щеши, и́бо благода́ть Ду́ха Свята́го, я́ве все́льшаяся в Тя́, соде́йствует Ти́ во все́м, при́сно Всеблаже́ннейшая.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Тя́, Богоневе́сто, похвалу́ все́м Христо́с яви́ и держа́ву, пою́щим ве́рно Твое́ та́инство.

Ста́нем благогове́йно в дому́ Бо́га на́шего и возопии́м: ра́дуйся, ми́ру Влады́чице, ра́дуйся, Мари́е, Госпоже́ все́х на́с; ра́дуйся, еди́на непоро́чная в жена́х и до́брая; ра́дуйся, сто́лпе о́гненный, вводя́щий в Вы́шнюю жи́знь челове́чество.

Прибе́жище, Засту́пницу и си́льный покро́в Тя́ иму́ще, Благослове́нная Пречи́стая Ма́ти Бо́жия. Твое́ю по́мощию и покро́вом Боже́ственным сохрани́ на́с.

Де́во господоимени́тая и Цари́ца всея́ тва́ри, мно́гими проро́ки пронарече́нная и ро́ждшая Царя́ Небе́сных си́л, Ца́рствия Небе́снаго, Госпоже́, все́х на́с сподо́би моли́твами Твои́ми.

Чи́ны а́нгельския удивля́ет, Богоро́дице, та́йны Твоея́ глубина́, бе́сы же смуща́ет Твоя́ ико́на, е́йже мы́ кла́няемся, чту́ще Тя́, Бо́жию Ма́терь.

Вы́сшую херуви́м и всея́ тва́ри восхва́лим, еди́ну, ро́ждшую Зижди́теля и Го́спода и отве́рзшую две́ри ра́йския на́м.

К Тебе́ прибега́ю, еди́ней держа́вней, ве́рных покро́ву, на Тя́ наде́жду возлага́ю спасе́ния моего́, Пресвята́я Влады́чице Богоро́дице, не пре́зри мене́.

Пе́снь 5.

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Богоро́дице, все́х Цари́це, правосла́вных похвало́, ерети́чествующих шата́ния разори́, ми́р же пода́ждь чту́щим, Пречи́стая, честны́й Тво́й о́браз.

Держа́вным Твои́м кро́вом от вра́г наве́та на́с, Чи́стая, Твоя́ рабы́, сохрани́ вся́ невре́дны, Тя́ бо стяжа́хом еди́ну прибе́жище в ско́рбех.

Скоре́йшею моли́твою, бо́дрым Твои́м покро́вом, держа́вною Твое́ю, Влады́чице Чи́стая, по́мощию, ны́не соблюди́ ве́рныя Твоя́ рабы́ от вся́каго сопроти́внаго прило́га и страсте́й, и прегреше́ний, и напа́стей спаси́.

Цари́ца еси́ Царя́ Христа́ и Го́спода, па́че сло́ва ро́ждши Разо́ршаго а́дова ца́рствия, Его́же приле́жно моли́, Отрокови́це, Вы́шняго Ца́рствия сподо́бити вся́, чту́щия Тя́.

Избавля́ющи яви́ся, Пречи́стая, от страсте́й наведе́ния и бесо́в лука́вых Твоего́ раба́, стяжа́вшего Тя́ держа́вное заступле́ние и Предста́тельницу Непосты́дную.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Преукраше́на сла́вою Боже́ственною, Честна́я Цари́ца Сы́ну Своему́ и Бо́гу предстои́т, спасе́ние душе́вное на́м прося́щи.

Благоде́теля ро́ждши, до́брых Вино́внаго, благодея́ния бога́тство все́м источи́: вся́ бо мо́жеши, я́ко си́льнаго в кре́пости Христа́ ро́ждши, Богоблаже́нная.

Да прии́дет ны́не на ны́ держа́вная Твоя́ дла́нь, Влады́чице, и ча́емыя челове́ческия ско́рби да изба́вит на́с.

Влады́чице, Ма́ти Изба́вителя, приими́ моли́твы Твои́х непотре́бных ра́б, и́мже возда́ждь избавле́ние грехо́в и богоуго́дныя жи́зни прия́тное исправле́ние.

Цари́ца еси́ все́х еди́на, Бо́гу, Богороди́тельнице Чи́стая, святы́й престо́л и пала́та Христа́ Бо́га, Его́же моли́ о чту́щих честну́ю ико́ну Твою́, пода́ти грехо́в оставле́ние.

Ра́б, ны́не прихожду́ к Тебе́, Ма́тери все́х Бо́га, от все́х изба́витися напа́стей моля́ся. Но, о, Богороди́тельнице, ца́рствующи с Сы́ном Твои́м, христиа́нский ро́д сохраня́й.

Держа́вный Тво́й покро́в, Богороди́тельнице, я́ко Засту́пница су́щи, да́ждь ми́ вско́ре, напа́стьми одержи́му, и невре́дна от си́х сохрани́ мя́.

Конда́к, гла́с 8:

Взбра́нней Воево́де, Засту́пнице на́шей Держа́вней, пе́сни благода́рственныя прино́сим о дарова́нии на́м ико́ны Ея́ святы́я, е́юже огражда́еми, ничесо́же устраши́мся, не от челове́к бо спасе́ние на́ше, но Преблагослове́нныя Влады́чицы милосе́рдием. Те́мже дне́сь ра́дуемся и пра́зднуем све́тло, я́ко прии́де Держа́вная на стра́жу земли́ Своея́.

И́н конда́к, гла́с то́йже:

Избра́нней от все́х родо́в Засту́пнице ро́да христиа́нскаго, покро́вом Своея́ бла́гости покрыва́ющей страну́ на́шу правосла́вную, благода́рственная пе́ния прино́сим Ти́, Влады́чице, о явле́нии на́м чу́дныя ико́ны Твоея́ Держа́вныя. Ты́ же, я́ко Всеми́лостивая Засту́пница все́х, с ве́рою к Тебе́ притека́ющих, от вся́ких на́с бе́д свободи́, да зове́м Ти́: ра́дуйся, Ма́ти Бо́жия Держа́вная, Засту́пнице Усе́рдная ро́да христиа́нскаго.

Пе́снь 7.

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Богооте́ц у́бо Дави́д Твою́ сла́ву напису́ет, Де́во, и Тебе́ тва́рей Цари́цу я́вленно проро́чествует, предстоя́щую одесну́ю, Всенепоро́чная, Бо́га оте́ц на́ших.

Цари́ца Де́ва, злато́ю оде́ждою украше́на, Сы́ну Царю́ ны́не предстои́т, Я́же без сравне́ния а́нгел превы́шши.

Ро́дове Тя́ вси́ блажа́т, Чи́стая, Иису́с бо еди́н, рожде́йся от Твоея́ утро́бы, То́й, я́ко ве́сть, сотвори́, Отрокови́це Де́во, с Тобо́ю вели́чия, Его́же моли́ спасти́ся ста́ду и лю́дем Твои́м.

Цари́ца все́х, прише́дши свято́ю ико́ною Свое́ю, небе́сный кро́в на сла́ву на́м уста́ви, и́мже спаса́емся от неви́димых вра́г нахожде́ния, к Сы́ну Ея́ вопию́ще: благослове́н Бо́г оте́ц на́ших.

Я́ко жениха́ Тя́ кра́сный черто́г, я́ко Влады́чню пала́ту одушевле́нну, я́ко порфи́ру всезлату́ю, я́ко красне́йшее оби́телище Христо́во, Влады́чице все́х, умоля́ющаго Тя́ спаси́ мя́.

Отча́явся по́мощи вся́кия, к Тебе́, Пренепоро́чная, держа́вной Храни́тельнице и Покро́ву, притеко́х: не отри́ни у́бо мене́ от Боже́ственнаго покро́ва Твоего́.

Пе́снь 8.

Ирмо́с: Царя́ Небе́снаго, Его́же пою́т во́и а́нгельстии, хвали́те и превозноси́те во вся́ ве́ки.

Кто́ не воспое́т Тя́ от земноро́дных, Нескве́рная, Чи́стая Голуби́це? Ты́ бо родила́ еси́ на́м Све́т вели́кий, жи́зни бога́тство, Иису́са Спа́са, Его́же пое́м, хва́ляще я́ко Го́спода, и превозно́сим во вся́ ве́ки.

Тебе́, све́тлому Изба́вителя све́щнику, прекра́сный спле́тше ли́к, пое́м: вся́ дела́ Госпо́дня, по́йте непреста́нно Де́ву Мари́ю и превозноси́те Ю́ во ве́ки.

Тро́ицы яви́лася еси́ честны́й хра́м, в Не́мже Оте́ц — любо́вию, Сы́н — пло́тию, Ду́х Святы́й наше́ствием оби́тель Себе́ сотвори́, Еди́н и́стинный Бо́г на́ш, Его́же умоли́ о на́с, Предста́тельнице всемо́щная.

Позлаще́нною ри́зою, я́коже Цари́цу, Сы́н Тво́й просвети́в заре́ю Ду́ха, Тебе́ одесну́ю Себе́ поста́ви, Пречи́стая, Его́же превозно́сим во вся́ ве́ки.

Ты́ — две́рь Царя́ небе́с и хра́м сла́вы Его́, Де́во Всепе́тая, отве́рзи на́м две́ри милосе́рдия и введи́ ны́ моли́твами Твои́ми в жили́ще небе́сныя сла́вы.

Ма́ти Пресвята́я, Ея́же моли́твами ро́д челове́ческий при́сно соблюда́ется, поклони́ся Отцу́, умоли́ Сы́на, призови́ Свята́го Ду́ха и уми́лостиви Бо́га, в Тро́ице Еди́наго, о мно́жестве грехо́в на́ших, да, Тобо́ю поми́ловани бы́вше, Творца́ и Тебе́ благослови́м отны́не и до ве́ка.

Пе́снь 9.

Ирмо́с: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Рече́м Твои́х усте́н, Всечи́стая, после́дующе, Тя́ ублажа́ем, с Тобо́ю бо вои́стинну вели́чия сотвори́вый Госпо́дь возвели́чи Тя́ и и́стинную Бо́жию Ма́терь, рожде́йся из чре́ва Твоего́, показа́.

Приклони́вый небеса́ в Тя́, Де́во, всели́ся и ны́не на моли́тву Твою́ зри́т, Богоро́дице Чи́стая, Твое́, Цари́це, исполня́я проше́ние, Ему́же за ны́ усе́рдно помоли́ся, на Тя́ бо наде́емся, Благослове́нная.

Святы́х Свята́я, Де́во Чи́стая, святы́х Свята́го родила́ еси́, все́х освяща́ющаго, Христа́ Изба́вителя. Те́мже Тя́, Цари́цу и Влады́чицу все́х, я́ко Ма́терь Зижди́теля тва́рей пропове́дуем.

Предъизбра́нная от все́х родо́в, услы́ши гла́с на́ш и да́руй проще́ние ду́ш на́ших, избавле́ние страсте́й и боле́зней, вся́ могу́щая, я́ко Ма́ти Бо́жия.

Цари́цу Де́ву Тя́ пропове́дует Дави́д, Пречи́стая, Чи́стую, те́мже мо́лим Тя́: Небе́снаго ны́ Ца́рствия сотвори́ насле́дники, да ублажа́ем Тя́.

Приими́ е́же от души́ моле́ние мое́, Пречи́стая Влады́чице, Я́же Бо́га ро́ждши пло́тию, к Тебе́ бо прибего́х, к держа́вней по́мощи, да не погрешу́ наде́жды моея́.

Свети́лен, гла́с 1:

Влады́чице, все́х Влады́чица и все́х вы́шшая, все́х же превосходя́щая го́рних во́инств, простри́ ру́ку держа́вну и сохрани́ ми́р, свяще́нники благослови́, Тебе́ священноде́йствующия, мона́хи же прости́, моля́щияся Тебе́, оте́чество на́ше соблюди́, Свята́я Богоро́дице. И ны́не на́с сподо́би ви́дети Небе́сное Ца́рство и ра́йскую две́рь, егда́ ся́дет Судия́ суди́ти вселе́нней во второ́м и стра́шном Суди́лище, Влады́чице а́нгелов.

Сла́ва, и ны́не: Да и́мя Твое́, Богоро́дице, на земли́ славосло́вится, И́же из Тебе́ просия́в гре́шником держа́вную наде́жду и сте́ну Тя́ дарова́, Тобо́ю бо вся́кое дыха́ние к Бо́гу притека́ет.

 

Канон первый Пресвятой Богородице пред иконой «Донская»

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Отверзи слух мой, Богоизбранная Дево, воеже разумети словеса откровения и познати путь спасения, да веру иму твердую Избавителю Богу и воспою предивное Его о нас промышление.

Отверзи, душе моя, очи веры, и узриши многая благодеяния Божия Матере, во дни тяжких обстояний отечеству нашему издревле являемая, и воспой, радующися, милостивое Тоя заступление.

Немощных здравие, разслабленных исцеление, обидимых защищение, от насилия и злобы спасение, скорбных в нуждах Помощнице, не престай молитися о чтущих Тя.

Познай, душе моя, силу Честнаго и Животворящаго Креста Господня, сим бо присно побеждаем полки враг видимых и невидимых, молитвами Богородицы и всех святых, в земли Российстей просиявших.

Грозное Божественное прещение врази разумеша пришествием чудотворнаго образа Твоего, Небесная Царице, страхом бо одержимии, в бегство внезапное обратишася, силою свыше гонимии.

Глас хвалы и благодарения приносим Ти, Владычице, и покланяемся пречистому образу Твоему, имже многажды на агаряны победу даровала еси и рог наш вознесла еси, Защитнице скорая рода христианскаго.

Песнь 3

Ирмос: Твоя песнословцы, Богородице, живый и независтный Источниче, лик себе совокупльшия, духовно утверди, в Божественней Твоей славе, венцев славы сподоби.

Житейскими попечении и сластьми искушаемии, Тебе, источнику тишины и богомыслия, песни приносим: утоли жажду духовную, ум наш к Небу возведи, превышшая Горних Сил.

Ума моего просвещение, воли слабыя укрепление, сердца унылаго радование Ты еси, Преблагословенная, молю Тя усердно: вся силы души моея обнови.

Слава Тебе, Всенепорочная, любящим Тя девам неотъемлемое сокровище, целомудрия источниче, Небесныя сладости откровение, уныния и печали истребление, смиренных и боголюбцев венчание и постников удобрение.

Изглади грехопадения юности, приими покаяние старости моея, Царице Небесная, се бо от чрева матере моея даже доныне враг не отступает, не попусти мя творити похоти его, но узы греховныя разреши и помилуй мя.

Како умолю Тя, Богоневесто, усты, злословия исполненными, или кую песнь вознесу, совестию обличаемь? Возмогу ли познати истину, лжи сослужитель, сосуд гнева Божия сый? Но, Жизнедательнице, страстьми умерщвленную душу мою оживи.

Врагу лютому подступающу, многое множество старцев и жен простирают Ти немощнеи руце с воплем крепким: прииди, Мати Милосердия, прииди, от лютыя смерти избавляющая, ускори спасти град и люди Твоя.

Седален

Блажим Тя, вси роди, Богородице Дево, в Тя бо Невместимый Христос Бог наш вместитися благоволи. Блажени есмы и мы, предстательство Тя имуще, день бо и нощь молишися о нас, и роди христианстии Твоими молитвами утверждаются. Тем, воспевающе, вопием Ти: радуйся, Благодатная, Господь с Тобою.

Песнь 4

Ирмос: Седяй в славе на Престоле Божества во облаце легце, прииде Иисус Пребожественный, Нетленною Дланию, и спасе зовущия: слава, Христе, силе Твоей.

О, великая сила слез! О, незлобие Владыки! За мене, падшаго, Сам страждет! Ты же, Богомати, у Креста Сына Своего стоявшая, неизследную глубину Божия снизхождения нам покажи и неосужденно причаститися святых и страшных Таин сподоби.

Мати чада злонравнаго побеждается сердоболием и не может его презрети, темже паче Ты, Благоутробная, преукрашенное жилище Божия снизхождения, мене, последнейшаго, не оставляеши и друг друга тяготы носити нас научаеши.

Облистай мя светом Божественнаго лика Твоего, Отрадо моя Пречистая, да ночная вознесу Ти моления, услыши воздыхания немолчная и памятию смертною от прелести греха спаси.

Плачет старость моя, лишися бо сынов и дщерей, несть опоры в жизни одиноцей, но буди мне столп и крепость, свобождение печалей, Благая Утешительнице, и до конца дний моих сохрани мя от зла.

Неизреченною силою благодати возбрани скверным помыслом, обуревающим мя, Дево Чистая, запрети им, и далече отгони, и Божественных песнопений делателя мя сотвори, да неленостно послужу Богу моему.

Воинств благопоспешение, борцев мужество, храбрых споборнице, Воеводо Возбранная, молим Тя крепость оружию нашему даровати, да низложены будут востающии на ны, Тобою бо победы воздвижутся.

Песнь 5

Ирмос: Ужасошася всяческая о Божественней славе Твоей, Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя, мир подавающая.

Прамати Ева, в раю согрешивши, мук рождения содела мя причастну, но Ты, Благодатная, неболезненно Христа рождшая, чадородия ради душу мою спаси.

Яко цвет сельный, явися чадо мое в мир скорбей и дыханием смерти уже опалися, но по слову Господню воспою: блаженно детство, ибо Царство Небесное наследит, Ты же, Владычице, прекращение воздыханий, Сама, якоже веси, скорбь мою облегчи.

Очи Твои светлеи с любовию на нищих призирают, и рука всегда сиротам и вдовицам простерта, славим неусыпное о них ходатайство и, образ Твой честный лобызающе, просим: не отврати лица Твоего от нас, в нужде ожесточенных.

Тайны грех моих обличение ужасает мя, Пречистая, но ничтоже возможно утаити от Всевидящаго Ока, се прибегаю к Твоему милосердию, даждь ми силу к покаянию и Твоими молитвами покрый мою наготу.

Гнев, ревнование и злоба в души моей гордей и тщеславней гнездятся, сам падаю и падших осуждати дерзаю, к Тебе прибегох, обуреваемых Спасительнице, страстей моих смрадное море изсуши.

Ужасает мя день Суда Божия, Господу бо ведома вся помышления, не надеюся на добрая дела моя, несть бо тех у мене, но прошу молитв Твоих, грешных Споручнице.

Песнь 6

Ирмос: Божественное сие и всечестное совершающе празднество, богомудрии, Богоматере, приидите, руками восплещим, от Нея рождшагося Бога славим.

Окаянную мою душу, влекомую лукавыми страстьми, свободи из плена, падших востание, радуется бо Владыка Твоему о грешных предстательству, прошения Твоя, яко Сын, исполняяй.

Воздыхания тяжкая слышиши, Преблагословенная, скорбь сердца моего ведущи, миро утешения и вино веселия возлей на раны душевныя, мрак уныния прогоняющи.

Помышляю труды подвижников: пост непрестанный, слезы сокрушения, молитвы всенощныя, послушание нелицемерное, терпение поношений, ужасаюся, Мати Судии Праведнаго, моему нерадению о спасении, от сна безчувствия мя пробуди.

Сущии во аде не могут Господа молити, Ты же, Всемощная Предстательнице, яко Мати, дерзновение к Сыну имаши, молим Тя о сродницех наших и всех преставльшихся, испроси им грехов разрешение.

В смертный час слышу глас Господа, пророком вещающ: предостави Ми чад твоих, Аз поддержу и препитаю сирых твоих. И Ты, Мати Божия, буди чадом моим прибежище в день скорби.

На поли брани смерть царствует, Ты же, Владычице, верным воином молитвою матере жизнь сохраняеши, убиенных же души в Царство света незаходимаго вселяеши и тако от вечныя смерти избавляеши.

Кондак, глас 8

Взбранной Воеводе победительная, яко избавльшеся от злых, благодарственная восписуем Ти, раби Твои, Богородице, но, яко имущая державу непобедимую, от всяких нас бед свободи, да зовем Ти: радуйся, Невесто Неневестная.

Икос

Ангел Предстатель с Небесе послан бысть рещи Богородице: радуйся! И, со безплотным гласом воплощаема Тя зря, Господи, ужасашеся, и стояше, зовый к Ней таковая: радуйся, Еюже радость возсияет; радуйся, Еюже клятва исчезнет. Радуйся, падшаго Адама воззвание; радуйся, слез Евиных избавление. Радуйся, высото, неудобовосходимая человеческими помыслы; радуйся, глубино, неудобозримая и ангельскима очима. Радуйся, яко еси Царево седалище; радуйся, яко носиши Носящаго вся. Радуйся, звездо, являющая Солнце; радуйся, утробо Божественнаго воплощения. Радуйся, Еюже обновляется тварь; радуйся, Еюже покланяемся Творцу. Радуйся, Невесто Неневестная.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Аще вся веси, Бога же не веси, ничтоже веси, ищущим мудрости вития возвещает. О Мати Божия! Неизследимая глубина Божиих откровений Тобою явися, просвети мой ум, воеже Господа Искупителя познати, Бога отец наших.

Чего ради оскверняются путие грешника? Отвещает пророк Давид: того ради, яко несть Бога пред ним. Открой очи мои омраченнеи, Чистая, да познаю вездесущие Творца всяческих, Бога отец наших.

Вижду покаяние Давидово: во вретище облекается, душу постом смиряет, питие плачем покаяния растворяет, полунощи встает на молитву, моя же молитва Богом отвергается, понеже не являю трудов, ни подвигов, имже мя, Благодатная, научи.

Небесных Сил Царице, разсей облаки печали, смятения и бурю помыслов укроти, даруй ми дух сокрушения и смирения, да из глубины сердца моего принесу чистую молитву Богу отец наших.

Сердце услаждается, егда благодать Твоя является, мир, умиление и слезы раждаются, о Дево, радосте моя неизреченная, не презри мя, ожесточеннаго, но Сама посети, да мук томления избавит мя Бог отец наших.

Никтоже избавит мя от смерти, ни родителие, ни чада, не спасет дар, ниже приношение, знаемии проводят токмо до гроба, греси же мои останутся, услыши, Милосердая, вопль мой, да спасет мя огня вечнаго Бог отец наших.

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Возраст юности и жажда наслаждения пленяют мою душу, Благодатная, но к вечному блаженству и славе святых обрати моя помышления, да славословлю Господа моего и превознесу Его во вся веки.

Волны неверия и скорбей лютых покрывают мою душу, но слышу глас Господа, глаголюща: маловерный, почто усумнился еси? К Тебе прибегох, Мати Божия, спаси мя и чада моя, в Тебе бо утверждение веры имамы, да превозносим Господа Творца во веки.

Чревоугодию, нечистоте служу прилежно, за обиды местию воздаю, обличаемь, гневаюся напрасно, злословлю не оказавших ми помощи, сам же немощных презираю, о Споручнице грешных, яви долготерпение и от греха свободи мя во веки.

Невозможно есть малою слезою великия скверны омыти и огнь геенский угасити, о Всемилостивая Мати, вижду ожесточение мое и молюся Ти: даждь ми слезы покаяния, да убелю одеяние души моея.

С мольбою неотступною, надеждою крепкою припадаю Ти, Державная Владычице: зриши врага лютаго приближение, услыши в слезах притекших, востани скоро и, яко Благая, защити, да славлю Тя, Мати Бога моего, во веки.

Плач мой в радость обрати и сетование в веселие, Мати Милосердия, и гордыя замыслы враг моих сокруши, да благословит Тя всяк язык и всяка плоть отныне и до века.

Песнь 9

Ирмос: Всяк земнородный да взыграется, Духом просвещаемь, да торжествует же безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Призри на нищету душевную и всякую горечь услади, непостыдная надеждо наша, скорбящих ободрение, плачущих скорое утешение, неистощима бо сокровища Твоя и, радующися, даеши я всем, помощи требующим.

Вкусите и видите, яко благ Господь, за любовию бо следует Господа познание. О, Трапезо таинственных дарований! Сподоби мя неосужденно Животворящих Таин причащатися, во очищение грехов моих.

Пред иконою Твоею, зри, Владычице, житейское море волнуется, спаси погибающих в волнах неверия и злобою истощенных, волною Твоего милосердия изнеси на брег спасения, да зовут Ти: радуйся, от вечныя смерти избавление.

Самомнением ослеплен, навыкох укоряти брата моего. Како сообщу свет ближнему, тьмою лжи покрыт сый? Даруй ми, о, Мати света, зрети моя прегрешения и брата моего согрешения терпети и с любовию исправляти.

Ангел смерти нападе на мя, презирает моления, плачу не внемлет, разлучает мя безжалостно со чады, влечет мя насильно. О, Богомати, с Сыном Твоим крестныя муки разделившая, матернюю скорбь о ближних утоли.

Землю Российскую в достояние Себе избравшая и утвердившая нас во благочестии, под покровом Твоим соблюди, Всепетая, образом Твоим честным от всех напастей сохрани, да зовем Ти: радуйся, Всемилостивая, в напастех скорая Заступнице.

Светилен

Торжествуем днесь, правовернии, во храме Твоем, Владычице, и Ты, Пречистая, приими любовию приносимыя Тебе песни благодарственныя.

 

Канон второй Пресвятой Богородице пред иконой «Донская»

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Откуду начну похвалы или кое положу начало нынешняго песнопения Царице Матери? Недоумением содержуся, обаче, языку умолкшу, вся кости моя рекут Тоя преславная чудеса.

Милосердия ради Бог Человек бывает, Имже и преестественная вся содеяшася; тем, Дево, и наше приими с любовию приносимое песнопение, воспевающих Твоя преславная чудеса.

Гряди к славословию, Небо, и радуйся, земле, свет бо велий возсия на вы от лица Матере Господни, освящаяй и просвещаяй всю тварь преславными чудесы.

Собираются пред иконою Твоею, Богородице, чинове святых невидимо, предстоят же и ангельская вся воинства, трепетно благоговеюще. Приими же с ними и нас, воспевающих радостно чудеса Твоя.

Песнь 3

Ирмос: Твоя песнословцы, Богородице, живый и независтный Источниче, лик себе совокупльшия, духовно утверди, в Божественней Твоей славе венцев славы сподоби.

Из начала великая о Тебе прообразоваше и в последняя преславная совершаше от всех родов предызбравый в Матерь Себе Тебе Владыка, Чистая.

Синайская гора, огнепалимая иногда, и разделяющаяся воды Чермнаго моря, егда наставляхуся людие, супостатом потопляемым, точию быта проображение, Чистая, чудес Твоих.

Пламенем купины в Синаи и росою пещи халдейския Девы рождество прообразивый, из Неяже воплотитися благоизволи, спасаяй тварь премудростию, Иисусе, и закон и пророки исполняя.

Радуйся, храме Господень, радуйся, кивоте, радуйся, стамно, радуйся, горо приосененная, радуйся, лествице и двере Небесная, пророки проповеданная, и всея святыни вместилище и носило, Пречистая.

Седален

Блажим Тя, вси роди, Богородице Дево, в Тя бо Невместимый Христос Бог наш вместитися благоволи. Блажени есмы и мы, предстательство Тя имуще, день бо и нощь молишися о нас, и роди христианстии Твоими молитвами утверждаются. Тем, воспевающе, вопием Ти: радуйся, Благодатная, Господь с Тобою.

Песнь 4

Ирмос: Седяй в славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Седяй на Престоле славы Царствия Твоего, Царю высокий, от смиреннаго естества земнородных престол свят Себе предуготовал еси, утробу Девы Матере. Слава неизреченному Твоему совету.

Превознесеннаго именем паче всякаго имене, Егоже всяк язык исповедает, Божию Силу и Премудрость, Единороднаго Сына в славе Бога Отца, Дево, плотию родила еси, Бога и Человека.

Смирившаго Себе даже до рабия образа послушанием Богу Отцу и даже до страстей и Креста преклонившагося, Того за ны смотрению, о Дево, и непостижимым тайнам послужила еси.

Дает Тебе преестественная, Богородице, Иже паче естества Сын Твой, рождеством бо Твоим от тли яко воззва человечество, и ныне Тобою призывает люди отриновенныя во язык избранный и именитый по всей земли.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Блаженно чрево, носившее Тя, Спасе, и честнейшая воистину сосца, воздоившая Тя, нас ради младенствовавшаго. Темже молим Тя: слышащим слово Твое и хранящим е блаженство уготови безконечное Рождшия Тя молитвами.

Марие Преблагословенная, благую истинно часть избрала еси и Едина Благодатная явилася еси. В Тебе Отец благоволи, Слово Всевиновное в Тя вселися, и Дух осени Святый, пребываеши нетленная и нам, любовию поющим Тя, спасение подавающая.

Единородный Сын Божий, снизшедый на землю за человеколюбие избавити человечество, единое на земли покоище обрет Тя, Чистую и Пренепорочную, вселитися и жити в Тебе благоволи, освятив, украсив и прославив. И нас ходатайствы Твоими храмы чистыя Тому, Богородице, соделай.

Храме всеосвященный Бога нашего, в храме Твоем ныне торжествующая, Богоневесто, с высоты призри и осени Божественною иконою Твоею, верою кланяющиися ей освящающи: с нею бо Твоя благодать во веки пребывает, спасительная всем подающи.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Праздник празднуем, празднолюбцы, Девы и Богоматере, благодаряще за велие милосердие Ея, и в нас действуемая преславная чудеса прославим.

Благодарственная приносим Тебе, Дево, и молимся: да не оскудеет вера чтущих Тя, и да не похвалятся врази, глаголюще: где есть Бог их? Твоя бо чудесная икона и всесвятая помощь с нами есть.

Устнами воспеваем Тя, умом же и языком моление приносим и сердца с колены преклоняем пред чудотворным образом Твоим, Пречистая, да милость Твою низпослеши на град и люди Твоя.

Ты еси пророков главизна, Ты еси святых похвала, Богоотроковице, и всех христиан упование, к Тебе прибегающе, спасаемся, уповающе же, не посрамимся, Тобою бо хвалится, Богородице, всякое дыхание.

Кондак, глас 2

В Небесныя обители преселившаяся с плотию, сущия на земли никакоже оставила еси, Богородице, образ Божественный и многочудесный Пречистаго Лица Твоего зрети любящим Тя и покланятися даровала еси, яко знамение Твоея благодати; чтим его, лобызающе.

Икос

Являющи человеком Пречистая неизглаголаннаго Своего милосердия сокровище, любящим Ю независтныя дары подавает, благословение, и молитвы, и мир, всяк ум превосходящий. И еже преславное от пречистыя Своея иконы, яко от источника, источает миру оставления воды, в Божественнейшем Ея храме. Тамо бо очи Ея отверсте день и нощь и уши, внемлющии молитве всех. Сего ради покланяемся сей всечестней иконе и чтим ю, лобызающе.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Тварь вся празднует, и стихии Тебе повинуются, Матери всяческих Содетеля, радуются Ангели в Божественнем торжестве Твоем, мы же из Тебе Рождшемуся зовем: препетый отцев Боже, благословен еси.

Дивная чудеса, Благая, слышана сотворила еси по всей земли, мы же, благолепие красоты Твоея от Сиона зряще, доброте дивимся и из Тебе Рождшемуся зовем: препетый Боже, благословен еси.

Монашествующих собори Наставницу Тя ублажают, Дево, множества же немощствующих излиянием милосердия Твоего благодать приемлют и, общницы бывше чудес Твоих, вопиют: Пречистая, благословенна еси.

Источник еси умный, живоприемный и приснотекущий, струи жизни источивший человеком, даждь ми от воды Твоея, Дево, во изсушение моих согрешений и ороси, молюся, мой ум, сердце и помысл, Едина Всепетая и Благословенная.

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Ужасу обдержащу иногда Российскую страну нашествием агарян, печали умножившейся людем Твоим, тогда, не на лук уповающе, ниже оружием спасаеми, но на Тя Едину надеющеся, с рыданием моляхуся: виждь бед належание и востани, Богородице, в помощь нашу.

Обыдоша иногда, яко пси мнози, стадо Твое, Чистая, оскверниша жилище имене Твоего и совещаху на ны лукавная; мы же возведохом очи наши на икону Твою, да ущедриши ны; и разумеша языцы, яко Ты, Госпоже, с нами еси во вся веки.

Взбранная Воевода явилася еси царствующаго града Москвы, языки побеждающая, христолюбивое же воинство укрепляющая, военачальники силою Твоею препоясующая; темже Твоя торжествующе победительная, раби Твои, воспеваем Сына Твоего во вся веки.

Богородице, теплая христианом Предстательнице, приими моление недостойных раб Твоих, призри милостивно на немощи наша и всем полезная даруй, немощствующим исцеление, грешным спасение, вся бо можеши, Мати сущи Зиждителя Всемилостивая.

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Величит Тя душа моя, и радуется дух мой о Тебе, Мати Господа нашего, яко призрела еси на смирение раб Твоих, сильныя со престолов низложила еси, смиренныя вознесла еси и Россию всю Твоих даров исполнила еси.

Се ныне ублажаем Тя, вси народи великороссийстии, Дево, с нами бо величие сотворила еси и славу Твою показала еси всем языком; свято имя Твое, Богородице, велия и неизреченная милость Твоя на всех, призывающих Тя.

Восприят ны от падения нашего Господь, помянув милость Свою от века, и древняя чудеса отец наших обнови нам, чадом их, иконою Твоею, Богомати; еюже хвалимся, спасшиися, и живота неразрушимаго наследие приемлем.

Богородице Владычице, Приснодево, неложно спребывати с нами обещавшая до скончания века, испроси нам на будущем Суде Сына Твоего деснаго Ему предстояния верою и любовию Тебе поющих, умильно припадающих и со страхом тепле молящихся.

Светилен

Торжествуем днесь, правовернии, во храме Твоем, Владычице, и Ты, Пречистая, приими любовию приносимыя Тебе песни благодарственныя.

 

Канон Пресвятой Богородице пред иконой «Достойно есть»

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Афон, иже наречеся Святая Гора, Всенепорочная, Чистая, якоже прорекла еси, ныне светло празднует Тебе, Святей воистину Горе сущей, и Божественное совершает днесь Тебе торжество.

Божественным присно Гавриил тайнам Твоим изрядным служит чудно, о Всенепорочная, темже и ныне, Дево, Твоея песни, радуяся, поет предначатие.

Не престаеши, Всенепорочная, совершати присно рабом Твоим преславная чудеса, Мати Чистая, и во вся времена изливати благодеяния, Пресвятая, яко Благодетельница наша.

Како изреку величайшее, совершенное тобою, Архангеле, близ скита Карейскаго чудо, егда научил ны еси твоим явлением песни достоиней Богоматере?

Песнь 3

Ирмос: Твоя песнословцы, Богородице, живый и независтный Источниче, лик себе совокупльшия, духовно утверди, в Божественней Твоей славе венцев славы сподоби.

Приспе время собратися всем отцем в храме Протатстем, всенощную совершити хвалу, тогда Божественную песнь Твою, Чистая, воспевает Архангел.

Прииде со иными и старец онаго послушника инока, и сему единому оставшуся Гавриил Архангел явися в подобнем образе, предначиная песнь Твою.

Приложение творяше к песни Твоей, яко предначатие, Чистая, тоя, юже прежде воспе Косма, Божественный Твой служитель, глаголя, яко тако обычай есть им начинати песнь Твою.

О, чудес Твоих страшных, Архангеле Божественный Гаврииле! Како во иночестем образе песнь воспел еси Богоматери днесь и, яко подобаше, возвеличил еси?

Седален, глас 4

Удивися инок Ангела песни, странно поющаго тую пред Твоею песнию, о Чистая, явльшуся сему во образе подобнем, а понеже инок написатися желаше оней, на дщице каменней рукою чудно начерта, и невидим бысть. Оттоле проповедася всем песнь сия, еже Богородицу Тя славити, Всенепорочная.

Песнь 4

Ирмос: Неизследный Божий совет, еже от Девы воплощения Тебе, Вышняго, пророк Аввакум усмотряя, зовяше: слава силе Твоей, Господи.

Достойно, предначинаше, яко воистину есть блажити Тя, Пречистая, Богородицу, Присноблаженную и воистину Пренепорочную и Бога Матерь Всенескверную.

Предначинательную сию песнь Божественному Гавриилу странно поющу, удивляшеся слушаяй инок, а понеже вопрошаше, тако пети, рече, обыкохом.

Глаголати и ему тако повелеваше Гавриил сие предначатие, таже пети песнь Космы Божественную и всех научити сему, Божественный рече Архангел.

Занеже проси инок, Гаврииле Божественне, написати песнь, юже услыша, ты начертал еси абие на дске каменней, Архангеле. Слава неизреченней силе твоей.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Ужасеся человек дивным чудесем, егда чудо узре, яко дска каменная начертася и внезапу собеседующий ему невидим бысть, Гавриил, славный и честный Архистратиг.

Старец, егда во утрие в келлию свою возвратися и егда странная сия услыша, дску же каменну узре, рукою начертанну, взем же абие с учеником сию, принесоша Горы начальствующим.

Знаемы и всем известны быша сия чудеса, Дево, понеже дску каменную абие в царствующий град торжественно отслаша Горы начальствующий, во еже славити Тя всем.

Стекошася вси во убогое обиталище, в немже странное чудо содеяся, и Твоей иконе, пред неюже воспета бысть песнь, Всечистая, благоговейне покланяющеся, единогласно уставиша в Протате той хранитися.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

С неизреченною вси стекошася радостию и веселием, еже взяти честную икону Твою, иереи, и монашествующии, и все Горы множество, Пречистая.

Божественную Твою икону сию со всяким благоговением держаще отцы вси, плещуще, с песньми и пеньми внесоша в Божественный храм Твой, Пречистая.

Дево! Стояние всенощное совершиша, любовию Тебе чтуще и Архангела, песнь Твою возвестивша, и ныне мы такожде вас вкупе почитаем.

Отцы Божественнии, с песньми, по таинодействии, вземше Божественную Твою икону, внутрь храма, в невходимая, со многим благоговением поставиша.

Кондак, глас 4

Празднует днесь весь Афон, яко песнь прият от Ангела чудно Тебе, Чистей Богоматери, Юже вся тварь чтит, славящи.

Икос

Ныне да веселится множество отцев Афона: се бо Деве прежния песни, юже чудно воспе Ей Косма, Божественный песнопевец, Гавриил ныне поет предначатие, иже: Достойно есть яко воистину,— глаголаше иноку,— блажити Тя, Богородицу, Присноблаженную и Пренепорочную и Матерь Бога нашего; сему повелеваше, да тако вси предначинают Твою песнь. И, сию начертав рукою на дске каменней, внезапу бысть невидим. Инок же, дивяся, воспеваше, якоже научися, чистую Богоматерь, Юже вся тварь чтит, славящи.

Песнь 7

Ирмос: Не послужиша твари Богомудрии паче Создавшего, но, огненное прещение мужески поправше, радовахуся, поюще: препетый отцев Господь и Бог, благословен еси.

Преизрядную честь воздаяху вси отцы, и прежнии и нынешнии, сей иконе Твоей Божественней, Пренепорочная, праведнейше: чести бо премногия удостоися преславно.

Велия благодати удостоися Божественная икона Твоя, Пренепорочная, ясно бо пред нею Твоей песни предначатие первее возгласися благоволением Твоим. Темже по долгу ныне сей с любовию покланяемся.

Не боготворим икону Твою, Пречистая, якоже на ны клевещут, но относительне чтим, Пренепорочная, сию, радующеся, лобызаем чествовательно, раби Твои, ныне же и во веки.

С Тобою, Пресвятая, не престаем чтити и славнаго Гавриила, нас ныне песни Твоей научившаго, иже и прежде, Тебе возглашая, взываше: радуйся, Благодатная.

Песнь 8

Ирмос: Отроки благочестивыя в пещи Рождество Богородичо спасло есть: тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Отроком благочестивым подражающе, Богородице, о чудесех Твоих, яже творит Господь во славу Твою, Пречистая, воспевающе, поем: Господа пойте, дела, и превозносите во вся веки.

Воистину благословен, иже сподобися услышати Божественныя хвалы Твоя от Ангела, Пресвятая Дево Пренепорочная, якоже Сын Твой благоволи, имже всех научи пети Тя достойно и превозносити Тя во вся веки.

«Пение»—по достоянию уставися именовати место оно, идеже совершися сие чудо, якоже нарицание удержася до нас и навсегда, на память, Пречистая, чудесе, яко да воспеваем Тя и превозносим во вся веки.

«Достойно есть» — даже до ныне нарицается ясно и келлия та, в нейже и Божественная Твоя икона, пред неюже первее воспето бысть песни Твоея, Дево Чистая, предначатие, яко да поют Тя вси достойно и превозносят Тя во вся веки.

Песнь 9

Ирмос: Всяк земнородный да взыграется, духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Вси раби Твои, стекаемся во храм Твой Божественный и празднуем, светло совершающе ныне торжество, в летную днесь память чудесе Твоея песни восполнения, Богородице, Чистая Приснодево.

Достойно есть,— не престаем, радующеся, глаголати,— блажити Тя, Присноблаженную же яко воистину и Пренепорочную и Матерь Бога нашего,— от Ангела сим ныне научившеся, Богородице, Чистая Приснодево!

Вкупе славнаго и Божественнаго Архангела Гавриила днесь, радующеся, прославляем, благодарственная пения приносяще, дивным чудом всех научившаго Божественней песни Чистыя Богоматере, радуйся, таинниче неизреченных, взывающе.

Радуйся, храм Протата преславный, хвалящийся сокровищем всечестныя, Божественныя и благодать точащия иконы единыя Богоматере и Предстательницы Афона: Гора бо сия избранный жребий Ея соделася.

Светилен

Соберитеся, взыграйте, светло торжествуйте, Гавриил бо Божественный монашествующему ныне предста в иночестем образе, песнь Богоматерню первый провещав в Горе Афонстей, стяжавшей Ю Предстательницу.

 

Канон Пресвятой Богородице пред иконой «Елецкая-Харьковская»

Песнь 1

Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.

Припев: Пресвятая Богородице, спаси нас.

Радуйся, Богородице Всепетая! восклицаем вернии, на чудотворную Твою икону взирающе, яже радость первее преподобному Антонию Печерскому видением Твоим даровала еси, и поныне подобием видения того, на дщице написанном, всем молящимся радость подаеши, моления их благостно приемлющи.

Пресвятая Богородице, спаси нас.

Антоний преподобный во изгнании неправеднем томяся, видением же Богородицы совершенное приемый утешение, сие на дщице написати повелевает и, во святую Лавру возвращаяся, икону Ея обители Черниговской вручает, яже и до днесь во граде Харькове от всех со благоговением зрится и чудеса исцелений источает.

Слава: Древле злым татаром, на град Чернигов нашедшим, икона Матери Божия чудесне в стене сокрывается и, многим летом прошедшим, паки христианом на поклонение открывается. Зрите убо, о людие, Богоматере великую силу, Ей же не возмогут невернии противостати.

И ныне: Угодника Твоего, Владычице, видением утешила еси, нас же, грешных, не лиши Твоего заступления, аще и недостойни сего являемся: покаяние бо теплое пред святынею Твоею возносяще, аки жена хананейская, неотступно Твоея просим помощи.

Песнь 3

Ирмос: На камени мя веры утвердив, разширил еси уста моя на враги моя, возвесели бо ся дух мой, внегда пети: несть свят, якоже Бог наш, и несть праведен, паче Тебе, Господи.

Пресвятая Богородице, спаси нас.

Инии, Православныя веры врази на пределы Черниговския чрез много лет нашедше, подвигоша воеводу града того икону Елецкую с собою во царствующий град пояти, предану бывшу Черниговскому пределу языку чуждему.

Пресвятая Богородице, спаси нас.

Сия беды, о Владычице, род наш избави, да святыня Твоя во граде Харькове утвердившися, в том непоколеблена пребудет во веки и сердца наша умилением исполняти не престанет.

Слава: Яже в роде воеводы того яко сто лет икона Владычицы пребывши, завещанием внука его в соборную церковь града Харькова поставляется и оттоле молитвы людей Божиих сию, аки крыла Херувимов, присно окружают.

И ныне: Богородице Пречистая, аще и многогрешни суть людие, в Твой святый храм притекающии, но якоже Сын Твой спасения ради грешник от Небес к нам пришел есть, тако и Ты от Небесных кругов на моления наша призри и прошений людей Твоих не презри, Всепетая.

Господи, помилуй (трижды). Слава, и ныне:

Седален, глас 8-й

Воистинну близ есть Господь сокрушенным сердцем, воистинну смиренныя духом Всеблагий Твой, о Владычице, Сын спасает, понеже аще и единому Антонию угоднику видение Твое явити сподоби, но того подобием и до днесь раби Твои упования на Бога исполняются, и утверждение в Православной вере обретают, и о правде ревностию озаряются.

Песнь 4

Ирмос: Пришел еси от Девы не ходатай, ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи.

Пресвятая Богородице, спаси нас.

Людие Божии, милости от Матере Господней приемлющии, души своя похвалами Пречистей насыщают, но насытити не могуще, радуйся, Благодатная, паки к Ней взывают и, тако творяще, искушения греховная от себе отгоняют.

Пресвятая Богородице, спаси нас.

Аще и премного укрепися на христианы диавол, овогда убо враги на ня посылаяй, овогда же обычаи растленныя посреде нас разсееваяй, но мы на Твое заступление, Владычице, уповающе, сего дерзости противлятися не престанем.

Слава: Горе вам, злочестивии, от почитания Матере Божия и от Церкве Христовой отпадшии еретицы, себе бо самех сия радости лишили есте, еже Пречистую Богоматерь прославляти и тем сердца своя умилением исполняти. Покайтеся убо и к нашему лику сопричтитеся.

И ныне: Оле еретиков безумия, от Святаго Евангелия научитися не хотящих, како Христос первое чудо милосердия Своего предстательством Матере Своея яви, верныя же научи, да моления своя к Ней несомненною верою возносят.

Песнь 5

Ирмос: Угль Исаии проявлейся, Солнце из девственныя утробы возсия во тьме заблуждшим, Богоразумия просвещение даруя.

Пресвятая Богородице, спаси нас.

Да утверждается Православная вера умножением исцелений от Твоея чудотворныя иконы, о Владычице, бываемых, да прославляется в людех Твое предстательство, паче же над страстьми победою увенчай наша зде возносимыя Тебе молитвы.

Пресвятая Богородице, спаси нас.

Аще и не вскоре услышана будет молитва ваша, братие, якоже Павла об отступлении сатанина ангела молившагося, но сию долготерпеливно повторяюще, сице восклицайте: О Владычице, грешнаго раба Твоего не возгнушайся, но отпущение грехов мне у Сына Твоего испроси.

Слава: Твоей чудотворней иконе, Пречистая, покланяяся, и сию благоговейно лобызая, о своих же грехопадениих ужасаяся, сице реку: аще подобает мне их ради скорби приимати, негли терпения дар молитвою Твоею мне ниспосли.

И ныне: На сие убо, о братие, скорбями испытуются души наша, да не гордыне житейстей, ни жестосердию поработимся, но да смиренномудрию преподобнаго Антония подражающе, утешения от Матере Божия, яко радости всех скорбящих да исполнимся.

Песнь 6

Ирмос: Во глубине греховней содержимь есмь, Спасе, и в пучине житейстей обуреваемь, но, якоже Иону от зверя, и мене от страстей возведи и спаси мя.

Пресвятая Богородице, спаси нас.

Аз недостойный ни благим делом, ниже терпению навыкох окаянный, увы мне и молитва моя не исправися по достоянию пред Тобою, но Владычице, Твоея милости бездна мое да покрыет неможение и благодатнаго покаяния дар да ниспослет ми.

Пресвятая Богородице, спаси нас.

Языки ангельскими и человеческими аще бы возмог аз глаголати, но и тогда Твоих щедрот множества, праведным и грешным человеком дарованнаго, воспети несть возможно: душам бо и телесем здравие подаеши, Благая, и кающияся милуеши тепле.

Слава: Господи, Господи, се милосердия Твою бездну в том познахом, яко не точию род человеческий от клятвы законныя искупил еси, но и Предстательницу теплую тому даровал еси, Твою Пречистую Матерь, Ей же днесь благодарное приносим поклонение.

И ныне: Оному поклонению да приобщатся языцы, Твоего Сына до днесь не уведевшии, или от молитвы, яже к Тебе, отпадшии, да всем человеком уверовавшим Твоя ниспосылается благодатная помощь.

Господи, помилуй (трижды). Слава, и ныне:

Кондак, глас 5-й

На неувядаемом древе угоднику явившися, Твое же предстательство всем молящимся присно являющи, Владычице, и нашего не отврати смиреннаго моления, но прегрешений наших прощения испроси и, скорби душ наших отъемши, благодарственное наше приими поклонение, да любовию Тя во веки славим, Всепетая.

Икос

Якоже древле видением Пресвятыя Богородицы прият утешение преподобный Антоний и от горькаго изгнания паки во святую Лавру свою радостно вселися, тако и образ Владычицы, сего видения память являяй, от татарскаго пленения волею Ея спасен бысть. Днесь же в великом граде Харькове посреде соборныя церкве водруженный, силу молитв Божия Матере исцеленьми многими свидетельствует, к Ней же возопиим: О Всеблагая, изгнанных и скорбящих Заступнице, прошения наша во благих исполни, да любовию Тя во веки славим, Всепетая.

Песнь 7

Ирмос: Да преславное Рождество Твое, Христе, еже от Девы прообразиши яве, неопалимы в пещи отроки сохранил еси, песньми поющия Тебе: отцев Боже, благословен еси.

Пресвятая Богородице, спаси нас.

Се, прииде, Владычице, время Твоего о верных заступления, зане отвсюду от врагов благочестия тесними бывают, таже и от демонских искушений зле обуреваются, угодника же Твоего Антония крепости не имуще, озарений свыше недостойни являются. Имиже убо веси судьбами, помощь Божию нам испросити потщися.

Пресвятая Богородице, спаси нас.

Помощи Богородицы Пречистыя, о братие, мнози свидетелие зде обретаются, нашему же нерадению обличителие, тем же чудотворней иконе Владычицы предстояще, к покаянию теплому устремим душ наших шествие.

Пресвятая Богородице, спаси нас.

Огнь Небеснаго света объемлет Тя, Богородице, в видении Антонию Печерскому явльшуюся, аз же себе огню геенскому грехми своими предуготовах, но в скорби души моея вопию Ти: помилуй мя, Пречистая, и покаянию теплому научи мя, о мне милосердовавши.

Слава: Делом благим ревнителя покажи мя, Пречистая, гнев на страсти греховныя вложивши в мою душу, да тыя возненавидев, ближния же своя возлюбив, стезям Господним последую неуклонно.

И ныне: Святослав, Чернигова князь, на месте явления Владычицы церковь благолепную создати потщася и икону Пречистыя, от преподобнаго Антония устроенную, тамо постави, ей же во град Харьков днесь пренесенней, предстояще молимся, да и нас храмы Сына Своего быти устроит.

Песнь 8

Ирмос: В купине Моисею Девы чудо на Синайстей горе Прообразившаго иногда пойте, благословите и превозносите во вся веки.

Пресвятая Богородице, спаси нас.

Трие отроцы, во огни неопальны пребывающе, Богородицы прообразиша таинство, яко Огнь Божества во чреве понесшей, ныне же Сами во огни на зеленеющем древе святому явльшися, в долготерпении того и тем нас утверждает.

Пресвятая Богородице, спаси нас.

Отечество наше, Владычице, паче всех стран земли чудотворными иконами Твоими просветила еси, яже, аки звезды небесныя, нощь земнаго жития нашего освещают и по пути правому ходити нас научают.

Пресвятая Богородице, спаси нас.

Блажени есмы воистину Предстательницу Тя, Владычице, имуще, но вящшему осуждению повинни будем, аще, о толицем спасении Божием небрегше, жития нашего исправити не потщимся.

Слава: Онаго нашея о святыне сей радости виновника, князя Даниила Барятинскаго, древлему же Святославу правнука, иже икону Владычицы от деда прием, сию пред кончиною своею зде храму с молитвою вдаде, Господи, душу упокой, нам же пребывание святыни сия сотвори на пользу.

И ныне: Юноши в Вавилонстей пещи спасый, Господи, Ангелом во огнь сошедшим, нас молитвами Матере Твоея от огня страстей свободи, поющих: благословен еси в храме славы Твоея, Господи.

Песнь 9

Ирмос: От земнородных кто слыша таковое или кто виде когда, яко Дева обретеся во чреве имущая и безболезненно Младенца порождшая? Таковое Твое чудо, и Тя, Чистая Богородице, величаем.

Пресвятая Богородице, спаси нас.

Ангели Твоему, Богородице, заступлению о нас радуются, беси же Твоими молитвами далече от нас отгоняются, аз же еда глух сердцем пребуду, Твоей покланяяйся святыне; сего да не будет, но умилением душа моя да растворится.

Пресвятая Богородице, спаси нас.

Множеству людей, семо притекающему, многия дарования от чудотворныя иконы Божия Матере подаются, от них же лучшее есть, еже в чувство покаяния себе привести и на деяния благая устремитися. В сем убо помощь Твою яви мне, Пречистая.

Слава: Искупил ны есть Господь наш, Твой же, Богородице, Сын от власти диавола, Твоя же молитва нападения сего врага нашего отгонит, убо и ныне о душах наших предстательствуй, да приближения святыни Твоея достойны явимся.

И ныне: Никтоже возможет достойно Матерь Господа нашего прославити, но мы слезами теплыми скудость словес наших восполним, красоте добродетелей Владычицы нашея дивящеся, и тако Сию достойно возвеличим.

 

Канон первый Пресвятой Богородице перед иконой «Знамение»

Песнь 1

Ирмос: Волною морскою Скрывшаго древле гонителя, мучителя, под землею скрыша спасенных отроцы, но мы, яко отроковицы, Господеви поим, славно бо прославися.

Да радуется радостию Божественною множество Новаграда днесь, зряще теплую Заступницу, странну победу дарующу на противныя, и да поет Божественными песньми.

Якоже лествицу превысоку, зрим днесь икону Твою, Дево всенепорочная, юже сопротивнии зряще, конечней слепоте предашася, мы же, к ней верне взирающе, от бед избавляемся.

В рождестве тли не приимши, тления всех нас, Дево, измени, печали уставляющи матерним пременением, Богорадованная.

Песнь 3

Ирмос: Тобою, Христе, Небеса утверждаема вся, Слово Божие и сила, исповедают славу неизреченну и вседетельныя руки Твоея сотворение, несть бо пресвят, разве Тебе, Господи.

Яко звери, устремившеся на стадо Твое, Пречистая, но Ты тех челюсти сокруши и сих немощны до конца показа.

Общаго пастыря, Владыку Христа рождши, Дево Неискусобрачная, Тому молися настоящаго гнева избавити нас и противных обстояния, Владычице.

Милостивая, Милостиваго рождши Спаса, виждь озлобление и воздыхание людей Твоих, ускори, Пречистая, и ущедри ны.

Седален, глас 8

Яже древле пророки проповедася, дверь небесная, неопалимая купина, свещник многосветлый, златая кадильница, ручка и жезл преславно днесь чудному святителю является, народом дерзати повелевает и дивную победу показует. Темже благодарная Той возопиим: Дево Богородительнице, моли Христа Бога грехов оставление даровати нам, Тебе бо имамы надежду, раби Твои.

Песнь 4

Ирмос: Удивися Твой разум от мене, услышавшу преславная веления смотрения Твоего, укрепися же возлюблением Твоего схождения, Ты бо моея нищеты не отверглся еси.

Почитающий Тя град, Пречистая, и по долгу славящий, ограждай от безбожных, Чистая, иноплеменник, Ты бо тому, Пречистая, богатство неотъемлемо еси, покров же и слава.

Мнящиися, якоже древле Иерихон, разорити град Твой, пречистая Мати Слова, сами конечней погибели предашася силою из Тебе Воплощеннаго, Владычице.

Призри, Чистая, спаси поющия Тя, потребитися хотяща от сопротивных, темже нашедшаго прещения избави, Богородительнице.

Песнь 5

Ирмос: Союзом любве связуеми апостоли, владычествующему всеми себе Христу возложше, красны ноги очищаху, благовествующе всем мир.

Теплая заступница к Тебе прибегающим и ненадеющимся надежда, виждь озлобление людей Твоих и подаждь помощь, Пречистая.

Яже огнь рождшая Божественный, Дево, противных, Пречистая, молитвою Твоею огнем попали, яко Мати сущи Зиждителя, Всепетая.

Чистая Богоневесто, недоуменныя люди ущедри матерними Твоими мольбами и яже на ны противных обстояния разори вскоре молитвами Твоими.

Песнь 6

Ирмос: Ят бысть, но не удержан в персех китовых Иона, Твой бо образ нося, страдавшаго и погребению давшагося, яко от чертога, от зверя изыде, приглашаше же кустодии, хранящии суетная и ложная, милость сию оставили есте.

Избави ратных нашествия рабы Твоя, Пречистая, и не предаждь до конца погибнути наследию Твоему, Всепетая, но силою из Тебе Рожденнаго противныя низложи.

Многосогрешших Тебе не презри, но приими мольбу Матере Твоея о нас, Щедре, да не похвалятся сопротивнии,—где есть Бог их? — глаголюще, но да разумеют вси, яко Ты, Избавитель, с нами еси.

Ныне помощи прииде время, ныне пременения потреба, Чистая. Молися Сыну Твоему и Богу, яко да ущедрит согрешившия и належащаго гнева избавит.

Кондак, глас 4

Честнаго образа Твоего знамение празднующе людие Твои, Богородительнице, имже дивную победу на сопротивныя граду Твоему даровала еси. Темже Тебе верою взываем: радуйся, Дево, христиан похвало.

Икос

Разреши тьму моих согрешений, во уме моем лежащую, и Твоим мя светом просвети, Дево, яко да возмогу Тебе похвалу принести, Юже Отец восхвали, и Дух Святый осени, Сын же и Слово Божие, вселився и нетленно от пречистою Твоею боку прошед, с человеки поживе. Темже мы, грешнии и недостойнии раби Твои, днесь совершающе священное торжество знамения, бывшаго честною иконою Твоею, еюже преславную победу на противныя граду Твоему даровала еси, и, от всех чудес исполнившеся, вместо благовонных аромат, елико возможно нам, земным, похвальная Тебе приносим, глаголюще: радуйся, Богородице, радосте Ангелов и человеков; радуйся, твердая надежда и покрове граду Твоему; радуйся, яко противныя силою Твоею низлагаем; радуйся, умнаго Солнца Мати, верныя просвещающаго, неверныя же помрачающаго; радуйся, Дево, христиан похвало.

Песнь 7

Ирмос: Неизреченное чудо! в пещи Избавивый преподобныя отроки из пламене, во гробе мертв, бездыханен полагается во спасение нас, поющих: Избавителю Боже, благословен еси.

Воистину сокровище честно граду Твоему, икона Твоя, Пречистая, даровася, юже и сами зряще, чудеси удивляемся и Сыну Твоему вопием: Избавителю Боже, благословен еси.

Якоже иногда Ниневитяны покаяния ради пощадил еси, Слове Божий, проповедию Ионы пророка, такожде и зде показал еси образом Пречистыя Твоея Матере, Христе, вопиющим: Избавителю Боже, благословен еси.

Храм Тя Божий, Владычице, ведуще, во святем храме Твоем руки наша возносим на молитву: виждь озлобление наше и подаждь нам помощь.

Песнь 8

Ирмос: Ужаснися бояйся, Небо, и да подвижатся основания земли: се бо в мертвецех вменяется в Вышних Живый и во гроб мал странноприемлется. Егоже, отроцы, благословите, священницы, воспойте, людие, превозносите во вся веки.

Собезначальное Слово Отчее, Дево пречистая, нетленно родила еси и от сосцу питала еси. Того моли, Богородительнице, от обстояния вражия спасти поющия Тя и превозносящия во веки.

Егоже провиде на Престоле превзятем Исаия, Сего в ложеснах, Дево, вместила еси и нетленно родила еси. Егоже моли спастися рабом Твоим, поющим: дети, благословите, священнии, пойте и превозносите Его во веки.

Едина сущи благая, преблагое Слово моли прилежно настоящаго гнева рабом Твоим избавится, несомненною верою Сыну Твоему поющим: дети, благословите, священнии, пойте и превозносите Его во веки.

Песнь 9

Ирмос: Странствия Владычня и безсмертныя трапезы на горнем месте высокими умы, вернии, приидите, насладимся возшедша Слова, от Слова научившеся, Егоже величаем.

Милосердым оком свыше призри на град и люди Твоя, Пречистая, иныя бо помощи не имамы, токмо Тебе, Всенепорочная, да Тя вси, Матерь Божию, непрестанно величаем.

Едина, рождшая Слово воплощенное, Дево всепетая, приснотекущий источник исцелений изливаеши верою притекающим храму Твоему, Пречистая.

Се, раби Твои, вопием Ти, Мати Божия: обычныя милости Твоя на град и люди Твоя милостивно показующи, противных обстояний нас измени, да Тя вси непрестанно величаем.

Светилен

Возжелев Твоея доброты Иисус, Пречистая, в Тя вселися и Тебе заступницу граду Твоему Слово Божие дарова, егоже сохраняй заступлением Твоим присно, яко да Тя ублажаем, пренепорочная Отроковице.

 

Канон второй Пресвятой Богородице перед иконой «Знамение»

Песнь 1

Ирмос: Посеченый несекомаго пресече, и виде солнце землю, юже не виде, лютаго врага вода потопи, и непроходимое пройде Израиль, песнь же воспевашеся, Господеви поим, славно бо прославися.

Божественныя силы жезл днесь приоблистая благодатию и светом безмерным Божие свято жилище, чудо паче естества образа Твоего, Пречистая.

Видехом преславное днесь знамение бывшее Божественнаго Твоего зрака, Мати Божия, паче же и сопротивнии они, яко видяще со образом и силу отвращающу, абие телесныма очима ослепоша.

Надежду имуще на Тебе, Богородительнице, и несумненну веру Новаграда народи, Тебе граду забрала положиша, Дево Неискусобрачная.

Якоже живу Матерь Слова видевше Тя суемудренных многочисленное воинство, якоже бодреннаго блюстителя, на забралех обстоиму верными, абие руце их с прочими уды ослабеша.

Песнь 3

Ирмос: Утверждей в начале Небеса разумом и землю на водах основавый, на камени мя, Христе, заповедей Твоих утверди, яко несть свят, паче Тебе, Едине Человеколюбче.

Первее убо вседержительная Твоя десница, Господи, Моисеем чудодействуя, помрачаше Египет, такожде и зде пришедшия разорити град Твой образом Матере Твоея помрачаеши.

Якоже услыша чудный архиепископ обещание Твое, Богородительнице, благовествоваше народом радость, глаголя: дерзайте, Мати бо Бога нашего с нами есть.

Преславную победу, исполнену ужаса, видевше, иже тогда народи на сопротивныя ополчившеся и абие до конца тех победиша.

Ныне наста день веселия—Знамения иконы Твоея, Дево Богородительнице, и праздник светел, егоже совершающе, вопием: несть пречистыя, паче Тебе, Богоневесто.

Седален, глас 8

Яже древле пророки проповедася, дверь небесная, неопалимая купина, свещник многосветлый, златая кадильница, ручка и жезл преславно днесь чудному святителю является, народом дерзати повелевает и дивную победу показует. Темже благодарная Той возопиим: Дево Богородительнице, моли Христа Бога грехов оставление даровати нам, Тебе бо имамы надежду, раби Твои.

Песнь 4

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче.

Егда услышаша народи чудное обещание победы, радостию неизреченною исполнившеся, и, якоже крепка некоего хранителя имуще, сопротивныя побеждаху.

Многобогатный дар и неистощимое сокровище даровал еси граду Твоему—икону Матере Твоея, Слове, и Сея помощию противныя низлагаем.

В божественнем храме Твоем, Богорадованная, идеже чудотворная Твоя икона положена бысть, исцеления верою приходищим подавает.

Собори верных и всяко состояние человеческое веселится, совокупльшеся в честнем храме Твоем, зряще в нем, якоже пресветлое солнце, честный образ Твой, Владычице.

Песнь 5

Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма, окаяннаго, но обрати мя и к свету заповедей Твоих пути моя направи, молюся.

Якоже иногда в царствующем граде неистовящаго и хулителя, хотящаго образ Твой низложити, того абие конечне уязви, такожде и ныне показала еси, Богородительнице.

Яко щитом, ограждаеми непобедимою Твоею силою, Дево, противных побеждают неизреченное множество на Тя надежду имущии людие Твои, Всепетая.

Тя богатство неистощимое имуще и исцелений источник верою прибегающии храму Твоему, идеже пребывает честный образ Твой, Владычице.

Песнь 6

Ирмос: Молитву пролию ко Господу, и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Сущему тогда чудному архиерею явилася еси страшным образом, на дерзость подвизающи, народи же, неизреченныя радости исполнившеся, оружныя побеждаху, Владычице.

Знамение страшно, и вещь преславну, и чудное одоление днесь празднующе, людие Твои, Богородице, похвальная яко достойной похвалы приносим, глаголюще: радуйся, Обрадованная.

Честную икону Твою радостным сердцем и душею облобызаем, веселящеся, и, теплою верою прикасающеся, исцеление почерпаем.

Кондак, глас 4

Честнаго образа Твоего знамение празднующе людие Твои, Богородительнице, имже дивную победу на сопротивныя граду Твоему даровала еси. Темже Тебе верою взываем: радуйся, Дево, христиан похвало.

Икос

Разреши тьму моих согрешений, во уме моем лежащую, и Твоим мя светом просвети, Дево, яко да возмогу Тебе похвалу принести, Юже Отец восхвали, и Дух Святый осени, Сын же и Слово Божие, вселився и нетленно от пречистою Твоею боку прошед, с человеки поживе. Темже мы, грешнии и недостойнии раби Твои, днесь совершающе священное торжество знамения, бывшаго честною иконою Твоею, еюже преславную победу на противныя граду Твоему даровала еси, и, от всех чудес исполнившеся, вместо благовонных аромат, елико возможно нам, земным, похвальная Тебе приносим, глаголюще: радуйся, Богородице, радосте Ангелов и человеков; радуйся, твердая надежда и покрове граду Твоему; радуйся, яко противныя силою Твоею низлагаем; радуйся, умнаго Солнца Мати, верныя просвещающаго, неверныя же помрачающаго; радуйся, Дево, христиан похвало.

Песнь 7

Ирмос: Божия снизхождения огнь устыдеся в Вавилоне иногда, сего ради отроцы в пещи радованною ногою, яко во цветнице ликующе, пояху: благословен еси, Боже отец наших.

Виждь, Пречистая, озлобление раб Твоих и не отрини в конец, Твое бо есмы достояние и Твоею надеждею крепимся, да вси вопием Ти: радуйся, Обрадованная.

Светоносная благодать и исцеления дарование дадеся граду Твоему образ Твой, Пречистая, егоже любезно облобызающе, веселимся.

Песнь 8

Ирмос: Седмерицею пещь халдейский мучитель богочестивым неистовно разжже, силою же лучшею спасены сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.

О всех народи недоумевшеся, к Тебе прибегают, вопиюще: не предаждь нас врагом нашим, Владычице Богородице, но державною Твоею рукою тыя низложи, да Тя непрестанно поем и превозносим во веки.

Яко нерушимое забрало имуще раби Твои икону Твою, Пречистая, противящияся низлагаем и Сыну Твоему вопием: дети, благословите, священницы, воспойте, людие, превозносите Его во веки.

Чудному иерарху явилася еси, Пречистая, он же со многим народом, чудеси удивлься, абие с радостию ко образу Твоему прибегает,— подаждь помощь, Владычице,— глаголющим: дети, благословите, священницы, воспойте, людие, превозносите Его во веки.

Что Ти принести, Пречистая, от всея твари славимей, недоумеемся, Владычице, точию еже Гавриил нас научи: радуйся, Обрадованная.

Песнь 9

Ирмос: Ужасеся о сем Небо, и земли удивишася концы, яко Бог явися человеком плотски и чрево Твое бысть пространнейшее Небес. Тем Тя, Богородицу, Ангелов и человек чиноначалия величают.

Се время благоприятно и день спасения, в немже знамение иконы Твоея, Пречистая, показася, еже празднующе светло, духовне торжество совершаем.

Яко Божественною светлостию озаряему, зрим днесь, Пречистая, икону Твою честную, ейже верою покланяющеся, Тя величаем.

Мысли очистивше, празднолюбнаго Новаграда собори со архиерейским ликом, восхвалите, паче надежди помощь на сопротивныя даровавшую.

Девства Твоего знамения невредимо сохранив, Слово Божие, из Тебе прошед, сохрани град Твой невредим, Дево всепетая, да Тя непрестанно величаем.

Светилен

Возжелев Твоея доброты Иисус, Пречистая, в Тя вселися и Тебе заступницу граду Твоему Слово Божие дарова, егоже сохраняй заступлением Твоим присно, яко да Тя ублажаем, пренепорочная Отроковице.

 

Канон Пресвятой Богородице перед иконой «Избавительница»

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Христе́, Све́те и́стинный, пода́ждь ми́ просвеще́ние восписа́ти похва́льная Пресвяте́й Ма́тери Твое́й, и воспою́ Тоя́ вели́кое к рабо́м Твои́м благоутро́бие.

Горе́, вы́ну сла́вимая, благоволи́ла еси́, Госпоже́, и ни́зу среди́ бе́дных просла́вити и́мя Свое́ благода́тию чуде́с от святы́я ико́ны Твоея́, Изба́вительнице.

Егда́ обита́тели ве́си, отча́явшеся от истребля́вшаго труды́ и́х пру́жия, притеко́ша со слеза́ми ко о́бразу Твоему́, Де́во, а́бие улучи́ша избавле́ние и, ра́дующеся, просла́виша ми́лость Твою́.

Десни́ца Твоя́, Влады́чице, просла́вися в кре́пости, и мно́жеством ми́лости Твоея́ яви́лася еси́ Покрови́тельница и Изба́вительница во спасе́ние бе́дствовавших.

Упова́ние христиа́ном, Помо́щнице су́щим в ско́рбех, моли́ Сы́на Твоего́ изба́витися вся́ких бе́д пра́зднующым свято́му о́бразу Твоему́, Изба́вительнице.

Ра́дуйся, бога́тство неистощи́мое ни́щих и си́рых Засту́пнице, ра́дуйся, спаса́ющая ве́рою и́мя Твое́, Де́во, призыва́ющих, ра́дуйся, уны́ния отгна́ние и ра́дости Пода́тельнице.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный Исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би.

Госпо́дь мертви́т, его́же хо́щет, и живи́т Тобо́ю, Ма́ти Живота́, исполня́я моли́твы моля́щихся Тебе́, низведе́нных во а́д возво́дит и от гно́ища страсте́й воздвиза́ет Твои́м всемо́щным предста́тельством.

Заме́длившу иере́ю напу́тствовати умира́юща о́трока, егда́ о уме́ршем помоли́шася к Тебе́, Всеблага́я, и осени́ша ико́ною Твое́ю, Изба́вительнице, внеза́пу отроча́ оживе́ и воста́ здра́во Твое́ю и Сы́на Твоего́ животво́рною си́лою.

Живоно́сный Тя́ и всецеле́бный исто́чник, Богоневе́сто, позна́хом, раби́ Твои́: о́бразом бо Твои́м, Изба́вительнице, жи́знь и здра́вие подае́ши душе́вное и теле́сное и от бе́д избавля́еши прося́щих Твоего́ заступле́ния.

Нача́ло Христо́вых чуде́с Ты́ еси́, Пречу́дная Де́во, те́мже чудеса́ о́браза Твоего́ сла́вяще дне́сь, Изба́вительнице, мо́лимся Тебе́: посети́ рабы́ Твоя́ благода́тию Твое́ю, неду́гов, зо́л и ве́чныя сме́рти изыма́ющи ны́.

Греха́ми умерщвля́емую ду́шу мою́ оживотвори́, Влады́чице, я́ко по Бо́зе вся́ могу́щая, и обдержа́щих мя́ страсте́й изба́ви, да, плене́ния стра́стнаго свобожде́н, благода́рственно Тя́ велича́ю.

Напра́ви, Чи́стая, к тишине́ безстра́стия во глубину́ зо́л влеко́ма раба́ Твоего́ и не попусти́ ми́ поги́бнути, прося́щему Твоея́, Изба́вительнице, ми́лости, Тобо́ю бо ве́рнии, покрыва́еми, спаса́ются.

Седа́лен, гла́с 3:

Пресвяти́и ру́це Твои́, и́миже носи́ла еси́ Нося́щаго вся́, простри́ к Нему́, Присноде́во Изба́вительнице, и моли́твами Твои́ми изба́ви ны́ гне́ва Его́, гре́х ра́ди дви́жимаго, отводя́щи лю́тая наведе́ния и те́х ра́ди быва́ющую лю́дем тугу́ и уны́ние, и спаси́ в ми́ре души́ на́ша.

Пе́снь 4.

Ирмо́с: Седя́й в сла́ве на Престо́ле Божества́ на о́блаце ле́гце, прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й.

Разуме́ша ве́рнии дела́ бла́гости Твоея́, Влады́чице, и вни́де ра́достный тре́пет в сердца́ и́х, внегда́ бо смути́тися душа́м и́х от бе́д и неду́гов, ми́лость Свою́, Благослове́нная, помяну́вши, ико́ною Твое́ю изшла́ еси́ на избавле́ние люде́й Твои́х.

Уведе́вшии о пресла́вном чудеси́ могу́щества Твоего́, Богоро́дице, во оживле́нии о́трока, устреми́шася от разли́чных ме́ст к о́бразу Твоему́, Изба́вительнице, и, прие́млюще исцеле́ния, с весе́лием Тя́ велича́ху.

Милосе́рда су́щи, Чи́стая, я́ко Всеблаго́е Сло́во на спасе́ние на́ше воплоти́вшая, по́мощи и избавле́ния Твоего́ не лиши́ на́с, с ве́рою притека́ющих к чудотво́рней ико́не Твое́й, Изба́вительнице.

Ты́ похвала́ ве́рных, Ма́ти Всепе́тая, Ты́ киво́т святы́ни, освяще́ние подаю́щая, Ты́ целе́б исто́чник неисчерпа́емый и от бе́д Изба́вительница моля́щихся Тебе́ пред святы́м о́бразом Твои́м.

Неду́гами угнета́емых и искуше́ний бори́теля, избавля́й на́с от си́х, Богороди́тельнице, и в ча́с исхо́да не преда́ждь ду́ш на́ших на одоле́ние супоста́том, да воспева́ем вели́чия Твоя́.

Непобеди́мая Воево́до вожде́й и во́инств христиа́нских, христолюби́вое во́инство, щито́м ве́ры и Креста́ вооруже́нных, победоно́сны явля́й, избавля́ющи от все́х наве́тов вра́жиих.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

В ско́рби ма́ле наказа́ние Сы́на Твоего́ бы́сть обита́телем ве́си, и, поболе́вше, призва́ша Тя́, Ма́терь щедро́т, и Тобо́ю возста́ша от отча́яния и возвесели́шася, роса́ бо благода́ти, я́же от ико́ны Твоея́, исцеле́ние и́м бы́сть.

Благода́ть точа́щую ико́ну Твою́, Изба́вительнице, ве́рному Твоему́ рабу́, с собо́ю всегда́ носи́вшу, возбрани́ла еси́, Госпоже́, скрыва́ти ю́ от ве́рных, да избавля́ются от бе́д и неду́гов прибега́ющии к Тебе́.

Тобо́ю, Всеми́лостивая Влады́чице, свобожде́ние от лю́тых ниспосла́ся, прите́кшим с ве́рою ко свято́му о́бразу Твоему́, наде́жда же, покро́в и неруши́мо весе́лие дарова́ся скорбя́щим, Богора́дованная.

Ужасо́шася бе́дствовавшии о бога́тстве даро́в Твои́х, Де́во, в чудесе́х от о́браза Твоего́, к нему́же припа́дающе, ра́достно взыва́ху: вои́стину Ты́ еси́ Изба́вительница от все́х бе́д.

Ра́досте А́нгелов и челове́ков, свобо́дна мя́ печа́лей жите́йских сотвори́ и бу́дущия тесноты́ изба́ви и ве́чнаго огня́ ма́терним дерзнове́нием Твои́м, Всеблага́я, от бе́д Изба́вительнице.

Богоизбра́нная Присноде́во, в руне́ ороше́нном предви́денная дре́вле, окропи́ росо́ю благода́ти изсо́хшую зе́млю се́рдца моего́ и плодоно́сну соде́лай ду́шу мою́ благи́м дея́нием и зре́нием.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Ки́й у́м пости́гнет, Госпоже́, держа́ву кре́пости Сы́на Твоего́, изве́дша лю́ди Своя́ из земли́, ея́же вереи́ закле́пи ве́чнии, и Тебе́, Ма́терь Свою́, соде́лавша враго́м стра́шну, из чре́ва а́дова избавля́ющую призыва́ющия Тя́.

Ки́й язы́к изъясни́т всепобежда́ющую си́лу Твою́, Влады́чице! Еди́но бо то́чию подо́бие лица́ Твоего́, я́ко о́гнь, опаля́ет зло́бныя ду́хи, лю́ди же Твоя́ врачу́ет и ра́дует, его́же благогове́йно лобыза́ем, раби́ Твои́.

Ко́е сло́во изобрази́т вели́чие чуде́с Твои́х, Всеми́лостивая от бе́д Изба́вительнице! То́чию бо принесе́ся свята́я ико́на Твоя́ к лю́те мучи́мей бесо́м, а́бие исчезе́ мучи́тель, и исцеле́нная велегла́сно просла́ви си́лу Твою́.

От оби́лия благода́ти, прису́щей о́бразу Твоему́, Богоневе́сто, коли́ко бесну́емых и ины́х неду́жных Тобо́ю исцеле́ша, коли́ко скорбя́щих на весе́лие приложи́ся, с ве́рою прите́кших ко ико́не Твое́й.

О, вели́каго милосе́рдия Твоего́, Богороди́тельнице, благоволи́вшая чудотво́рным о́бразом Твои́м пребыва́ти у на́с! Что́ воздади́м Ти́ за благода́ть, ю́же яви́ла еси́ на́м, дарова́вши хра́му сему́ толи́ко свяще́нное бога́тство?

О Всепе́тая Ма́ти, держа́вный покро́ве ми́ра! Храни́ от все́х бе́д чту́щия Тя́, спобори́ и́м на враги́ христиа́нская необори́мою си́лою Твое́ю.

Конда́к, гла́с 8:

Ко ико́не Твое́й, Пресвята́я Госпоже́, бе́дствовавшии с ве́рою прите́кше, заступле́нием Твои́м изба́вишася от злы́х, но я́ко Ма́терь Христа́ Бо́га, и на́с свободи́ от лю́тых обстоя́ний, вре́менных и ве́чных, да зове́м Ти́: ра́дуйся, Изба́вительнице на́ша от все́х бе́д.

И́кос:

Соше́дшиися во хра́ме се́м, просла́вим пресла́вный хра́м Божества́, Пресвяту́ю Де́ву, пред о́бразом Ея́ со благогове́нием вопию́ще: ра́дуйся, Боже́ственныя сла́вы селе́ние; ра́дуйся, Влады́чице Небесе́ и земли́. Ра́дуйся, неистощи́мый исто́чниче чуде́с; ра́дуйся, всемо́щное врачева́ние неду́жных. Ра́дуйся, Прогони́тельнице де́монов; ра́дуйся, мертвеце́в оживле́ние. Ра́дуйся, оби́телей Горы́ Твоея́ покро́ве; ра́дуйся, и́ноков те́плое предста́тельство. Ра́дуйся, ве́рных Засту́пнице; ра́дуйся, спасе́ние ро́да христиа́нскаго. Ра́дуйся, Е́юже возсиява́ет ра́дость; ра́дуйся, Е́юже печа́ль престае́т. Ра́дуйся, Изба́вительнице на́ша от все́х бе́д.

Пе́снь 7.

Ирмо́с: Не послужи́ша тва́ри Богому́дрии па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Сотвори́ с на́ми по мно́жеству ми́лости Твоея́, Богоро́дице, и изми́ на́с по чудесе́м Твои́м, и да постыдя́тся от вся́кия си́лы, и кре́пость да сокруши́тся явля́ющих зла́я рабо́м Твои́м, о Тебе́ пою́щим: отце́в Бо́же, благослове́н еси́.

Тебе́, Де́во, халде́йская пе́щь проо́браз иму́щи, о́троки росо́ю прохлажда́ше посреде́ пла́мене. Те́мже и на́с, о́браз Тво́й иму́щих, во огни́ искуше́ний прохлади́ и неопали́мы соблюди́ благода́тию Сы́на Твоего́, да пое́м Ему́: отце́в Бо́же, благослове́н еси́.

Седмери́цею разжига́емыя стре́лы седми́ смертоно́сных страсте́й, я́же испуска́ет возстаю́щий на ны́ седмигла́вый зми́й диа́вол, угаси́ и сокруши́, Влады́чице, да, я́коже о́троцы неврежде́ннии, пое́м: отце́в Бо́же, благослове́н еси́.

Седмисве́щный свети́льник разуме́ем Тя́, Богоблагода́тная Мари́е, седмию́ дара́ми Ду́ха светя́щий ве́рным, облагодати́ у́бо и уще́дри пою́щих о Тебе́, Пода́телю благи́х: отце́в Бо́же, благослове́н еси́.

Тя́, Госпоже́, иму́ще милосе́рдия неиждива́емое сокро́вище и святу́ю ико́ну Твою́, Изба́вительнице, в покро́в оби́тели и во избавле́ние от бе́д, Сы́ну Твоему́ о Тебе́ пое́м: отце́в Бо́же, благослове́н еси́.

Я́ко Царя́ ца́рствующих Ма́терь, мо́лим Тя́, Влады́чице: оте́честву на́шему и христолюби́вому во́инству бу́ди несокруши́мая кре́пость, подаю́щи и́м блага́я, пою́щим: отце́в Бо́же, благослове́н еси́.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть; тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Я́коже трие́ о́троцы, храни́мии во огни́, поя́ху и благословля́ху Бо́га, та́ко и ве́рнии, Тобо́ю, Благослове́нная, изба́вльшеся от огня́, бе́д и неду́гов, вся́ дела́,— взыва́ху,— Го́спода по́йте и превозноси́те Его́ во ве́ки.

Я́коже от зловре́дных пруго́в изба́вила еси́ пре́жде к о́бразу Твоему́ прите́кших, Богоро́дице, та́ко и ны́не не преста́й от те́х и вся́каго вреда́ избавля́ти оби́тель сию́, Го́ру, Росси́ю и повсю́ду правосла́вныя, да сла́вим Тя́ во ве́ки.

Я́коже уме́рша, осене́нна ико́ною Твое́ю, Де́во, оживи́ла еси́, оживотворя́й и на́с, отводя́щи от смертоно́снаго пути́ и наставля́ющи на стезю́ ве́чнаго живота́, да, спаса́еми Тобо́ю, превозно́сим Тя́ во ве́ки.

Я́коже повеле́ла еси́ рабу́ Твоему́ не скрыва́ти от ве́рных благода́ти, точа́щияся от свята́го о́браза Твоего́, Всеблага́я Изба́вительнице, источа́й сию́ и на́м, рабо́м Твои́м, да прославля́ем Тя́ во ве́ки.

Я́коже мно́гих исцели́ла еси́, Госпоже́, от мучи́тельства де́монскаго и ины́х неду́гов, и на́с свобожда́й боле́зней душе́вных и теле́сных и от все́х сете́й вра́жиих, да воспева́ем Тя́ во ве́ки.

Я́коже А́нгел воодушеви́ Гедео́на на побежде́ние мадиа́млян, воодушевля́й, Всецари́це, и сла́вящия Тя́, вся́кое шата́ние враго́в низлага́ющи, да благословля́ем Тя́ во ве́ки.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

И́ночествующии сея́ оби́тели, к Ма́тери Го́спода Вы́шняго притеце́м дне́сь, моля́щеся пред чудотво́рною ико́ною Ея́, е́юже посети́ скорбя́щия и сотвори́ избавле́ние лю́дем Свои́м.

Ще́драго ро́ждшая и Ми́лостиваго Влады́ку и Изба́вителя все́х, покажи́, Всеблага́я, щедро́ты Твоя́ на на́с, пра́зднующих честно́му о́бразу Твоему́, и сотвори́ избавле́ние от бе́д лю́дем Свои́м.

В Тебе́, Богоро́дице, воздви́же Сы́н Тво́й ро́г спасе́ния на́м, укрепи́ у́бо рабы́ Твоя́ служи́ти Ему́ преподо́бием и пра́вдою пред Ни́м вся́ дни́ живота́ на́шего и твори́ избавле́ние от бе́д лю́дем Свои́м.

При́зри, Де́во Изба́вительнице, на моли́твенныя воздыха́ния на́ша, не оста́ви ны́ безпомо́щны во искуше́ниих и бу́ди Моли́твенница ко Го́споду, да пода́ст грехо́м на́шим проще́ние и избавле́ние от бе́д лю́дем Свои́м.

Госпоже́ Всеми́лостивая, не преста́й Го́ру Твою́ и оби́тель сию́, Росси́ю и вся́ правосла́вныя посеща́ти благода́тию и твори́ти избавле́ние от бе́д лю́дем Свои́м.

Хода́таицу о на́с, Сло́ве Бо́жий, предлага́ем Ма́терь Твою́, от Нея́же воплоти́лся еси́ на спасе́ние на́ше, моли́твами Ея́ прости́ и поми́луй на́с, Незло́биве, согреша́ющих Тебе́, и сотвори́ избавле́ние от бе́д лю́дем Твои́м.

Свети́лен.

Ма́ти Све́та у́мнаго, просвети́ песносло́вящыя Тя́ пред лучеза́рною ико́ною Твое́ю, мра́к страсте́й на́ших прожени́ и осия́ния пра́ведных прича́стники ны́ сотвори́ Твои́м предста́тельством, Преблагослове́нная.

 

Канон Пресвятой Богородице перед иконой «Избавительница», певаемый во святую Пятидесятницу

Песнь 1

Ирмос: Воскресения день, просветимся, людие, Пасха, Господня Пасха: от смерти бо к Жизни и от земли к Небеси Христос Бог нас преведе, победную поющия.

Воскресения день, славим ныне Господа Христа. Приидите, и Пресвятую Матерь Его прославим, пред святою иконою Ея благодарственная поюще.

Очистим чувствия и узрим воскресшаго Христа и Всеблагую Деву, Избавительницу от бед, блистающуюся и озаряющую верныя благодатию.

Очистим чувствия и узрим мысленными очесы промышление о нас Владычицы: честным бо образом Своим избави от бед христоименитыя люди.

Небеса убо достойно да веселятся, земля же да радуется воскресшему Христу, да торжествует же сия обитель, обогатившаяся Избавительницы иконою.

Небо и земля достойно да веселятся во Христовом востании, да празднуют же Богоматери монаси и бельцы, чудотворный Ея образ почитающе.

Умерщвления предел сломила еси, вечную Жизнь рождшая — Христа, из гроба возсиявшаго днесь, Дево Всенепорочная, и мир просветившаго.

Песнь 3

Ирмос: Приидите, пиво пием новое, не от камене неплодна чудодеемое, но нетления источник, из гроба одождивша Христа, в Немже утверждаемся.

Приидите, пиво пием новое от источника целительнаго недугом душевным и телесным, егоже источи Богоблагодатная с верою притекшим ко иконе Ея.

Приидите, весны умныя в видимой весне насладимся, неувядаемый бо Цвет — Христа — израстившая Дева благоуханием благодати живит и утешает скорбящия.

Ныне вся исполнишася света воскресением Христовым, да празднуем и мы светло Избавительнице, лучи испущающей радости о Бозе Спасе в нощи искушений.

Ныне обитель сия озаряется светом от Матере Света в нарочитом дни празднества чудотворному Тоя образу и благодатию Сына Ея утверждается.

Вчера погребено бе селение верных в смертоносном отчаянии, днесь же оживотворися скорым от бед избавлением Богоневестныя Марии, надежды безнадежных.

На нетленную жизнь прихожду днесь, благостию Рождшагося из Тебе, Чистая, и всем концем свет облиставшаго.

Песнь 4

Ирмос: На Божественней стражи Богоглаголивый Аввакум да станет с нами и покажет светоносна Ангела, ясно глаголюща: днесь спасение миру, яко воскресе Христос, яко всесилен.

На Божественней стражи ставше во Христе, братие, и воспоминание творяще чудес Избавительницы, со благоговением рцем: днесь спасение Богородицею бысть скорбящим, яко вся могущею.

Яко непорочную Агницу, пречистаго Агнца рождшую, венчаем Тя, Благословенная, песненными цветы: покрый от зол рабы Твоя, воскресшаго Сына Твоего о всех умилостивляющи.

Богоотец убо Давид пред сенным ковчегом скакаше, играя, раби же Твои, Госпоже, пред иконою Твоею ликующе, веселимся божественне о Твоем милосердом заступлении к Тебе прибегающих.

Яко в краснейший храм, вселися в Тя, Чистая, Иисус, всех Царь, снитием же во ад жилище мрачное упраздни и воскресением совоскреси человеки, оживляя Тобою умершия, яко всесилен.

Святых Святаго паче ума Мати явилася еси, Владычице, освящение и избавление от бед подающи верным, славящим Его воскресение и Тебе, Всеблагую Избавительницу, призывающим.

Создавый Адама, Твоего праотца, Чистая, зиждется от Тебе, и смертное жилище разори Своею смертию днесь, и озари вся Божественными блистаньми воскресения.

Песнь 5

Ирмос: Утренюем утренюю глубоку, и вместо мира песнь принесем Владыце, и Христа узрим, Правды Солнце, всем жизнь возсияюща.

Утренююще во святем храме Твоем, Чистая, Сына Твоего воспеваем, из гроба возсиявшаго, и Тя, Избавительнице, величаем, от Солнца Правды, умершему отроку жизнь возсияющу.

Утренюем утренюю глубоку и с пением деяния принесем богоугодная, Деве вопиюще: храни, Всецарице, Гору, и Россию, и вся православныя необоримы от враг видимых и невидимых.

Безмерное Твое благоутробие, Владычице, узами вражиими содержимии зряще, ко иконе Твоей избавленный идяху веселыми ногами, Твою и Сына Твоего хваляще Божественную силу.

Приступим, свещеноснии, исходящу Христу из гроба, яко жениху, и спразднуим Богородице любопразднственными чинми, в честь святыя иконы Ея, прославленныя чудесы многими.

Облиста Тя и возвесели, Богорадованная, Спас всех, из гроба возсиявый, Правды Солнце, Егоже моли озарити и утешити сердца любовию песнословящих Тя, Избавительнице, пред Твоею иконою.

Просвещается Божественными лучами и живоносными воскресения Сына Твоего, Богомати Пречистая, и радости исполняется благочестивых собрание.

Песнь 6

Ирмос: Снизшел еси в преисподняя земли и сокрушил еси вереи вечныя, содержащия связанныя, Христе, и тридневен, яко от кита Иона, воскресл еси от Гроба.

Снидохом во тьму греховную и праведное на ся негодование Божие привлекохом,— вопияху вернии, но, о Госпоже Всемилостивая, Ты избавила еси нас от рова отчаяния.

Сохранив целы труды рук наших и невредимы от всепоядающаго пружия, предстательством Твоим, Избавительнице, отверзла еси нам милосердия двери.

Спасе наш, живое же и нежертвенное от всех заколение, бедствующим даровал еси Матерь Твою Избавительницу от бед молитвами убо Ея избави нас от всякия нужды и печали.

Явилася еси, Богоневесто, вышши Ангел, Бога воплощши, распеншагося за ны, и погребена, и мертвым нетление из гроба источивша, чтущих же Тя тли греховныя избавляюща.

Видевши Сына Твоего, из мертвых возставша, райския сладости исполнилася еси, Приснодево, Того убо моли, Благословенная, да отверзет молящимся Тебе райския двери.

Возведеся древле держимое смертию и тлением Воплотившимся от Твоего пречистаго чрева к нетленней и присносущней жизни, Богородице Дево.

Песнь 7

Ирмос: Отроки от пещи избавивый, быв Человек, страждет, яко смертен, и страстию смертное в нетления облачит благолепие, един Благословен отцев Бог и Препрославлен.

Отроки от пещи избавивый, презрев, яко Милосерд, прегрешения наша, соблюди ны невредны от пещи искушений Пресвятыя Матере Твоея мольбами, отцев Боже Препрославленный.

Жены с миры Богомудрыя вслед течаху Христа, обитателие же веси, вместо мира слезы Деве приносяще, поклонишася, радующияся, Ея иконе и избавление от бед зде благовестиша.

Жены с миры вслед Христа течаху, да течем и мы усердно, добрый подвиг иночества совершающе и радующеся живому Богу, да сподобимся молитвами Богоматере пасху тайную вкушати.

Смерти празднуем умерщвление воскресением Христа и избавление от бед милосердием Владычицы, темже, пред иконою Ея ликующе, поем Виновнаго, единаго Благословеннаго отцев Бога и Препрославленнаго.

Яко воистину священный и радостный сей праздник Богородицы, провозвестник сущий чудес от честнаго Тоя образа, от негоже благодать исцелений явственно всем возсия.

Умертвив Сын Твой смерть, Всенепорочная, днесь, всем смертным пребывающий живот во веки веков дарова, един Благословенный отцев Бог и Препрославленный.

Песнь 8

Ирмос: Сей нареченный и Святый День — един суббот царь и господь, праздников праздник и торжество есть торжеств, в оньже благословим Христа во веки.

Сей нареченный и Святый День, в оньже славим Всепетую Владычицу, яко избави от бед притекших к Ея образу, и благословим Сию во веки.

Приидите, обители сея иночествующии, с любовию благодарение Деве принесем, Хранительнице Горы и Избавительнице нашей, поюще Ю яко Богоматерь во веки.

Возведи окрест очи Твоя, Чистая, и виждь рабы Твоя, пред иконою Твоею молящияся Тебе, и прошения исполни о Тебе благословящия Христа во веки.

Всесильный Господь родися из Тебе, Марие, и Крестом Своим умерщвление аду содела, избавляя смертоносных бед к образу Твоему притекающих и поющих Его яко Бога во веки.

Отче Вседержителю, и Слове, и Душе, ходатаицу о нас Пресвятую Деву Тебе предлагаем: молитвами Тоя помилуй и спаси нас, в Тя крестившихся, да Тя благословим во вся веки.

Прииде Тобою в мир Господь, Дево Богородице, и, чрево адово расторг, смертным нам воскресение дарова, темже благословим Его во веки.

Песнь 9

Ирмос: Светися, светися, Новый Иерусалиме, слава бо Господня на тебе возсия, ликуй ныне, и веселися, Сионе. Ты же, Чистая, красуйся, Богородице, о востании Рождества Твоего.

Светися, Русская обителе, веселися и красуйся, святая бо в тебе Избавительницы икона чудесы прославися многими, от бед свобождением и недугов исцелением.

Благоутробие Твое к верным и дары Твои суть паче постижения, Всеблагая Госпоже, сподобляй убо сих рабы Твоя, благодарственная Тебе поющия и радующияся о востании Рождества Твоего.

О, Божественнаго, о, любезнаго Твоего, Богомати, гласа! Яко повелела еси не скрывати чудотворную икону Свою, да притекающии к ней многих лютых избавляются милостию Твоею.

О, паче словесе Твоих чудес, Избавительнице! Ты бо осененна иконою Твоею отрока воскресила еси, Мати сущи Живота, воскресением Своим всех оживотворившаго.

О Пресвятая Владычице, о Всемилостивая Избавительнице от бед, не престай милосердовати о бедствующих и сподобляти благодатнаго присещения обитель, образ Твой почитающую.

Согласно, Дево, Тебе блажим, вернии: радуйся, двере Господня; радуйся, граде одушевленный; радуйся, Еяже ради нам ныне возсия свет из Тебе Рожденнаго из мертвых воскресения.

Светилен

Светильниче светлый, Пресветлаго Света мира, от гроба возсиявшаго, просвети, Благословенная, души наша светом благодати, да сподобимся зрети воплотившееся из Тебе Солнце Правды и Тебе, Просветительницу нашу, присно величати.

 

Канон Пресвятой Богородице пред иконой «Казанская»

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Благогове́ют Ти́, Богоро́дице, а́нгелов нача́льницы, и святы́х чи́ни че́стно слу́жат, пра́веднии красу́ются, небе́сных Хода́таицу блажа́т Тя́. Ку́пно же и земля́ и не́бо в весе́лии све́тло восхваля́ют Тя́, и мы́, гре́шнии, ми́лости про́сим: озари́ на́ша сердца́, Влады́чице, воспе́ти пе́снь святы́я Твоея́ ико́ны явле́нию.

Прииди́те, собери́теся, христоимени́тии лю́дие, умы́ та́йно очи́стившеся, во святу́ю це́рковь Ма́тере Христа́ Бо́га на́шего: источа́ет бо на́м неоску́дно от святы́я ико́ны исто́чник духо́вен, целе́бен душа́м и те́лом, пе́снь вопию́щим: благослове́н из Тебе́ рожде́йся Бо́г на́ш.

Диви́т, Пренепоро́чная, и ужаса́ет вся́к слу́х стра́нно чу́до боже́ственнаго Твоего́ Рождества́: ка́ко херуви́мскаго Творца́ зачала́ еси́? ка́ко О́гнь нестерпи́мый во утро́бе носи́ла еси́? ка́ко су́щую Жи́знь пло́тию облекла́ еси́ и Живо́т всему́ ми́ру родила́ еси́, Бо́га ку́пно и челове́ка?

Под кро́в Тво́й, Де́во Госпоже́, прибега́ем вси́ ро́ди челове́честии: просвети́ ны́ све́том Рождества́ Твоего́, гре́шныя рабы́ Твоя́, моля́щияся приле́жно и кла́няющияся пречи́стей Твое́й ико́не, прося́ще от Тебе́ прия́ти вели́кия ми́лости.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Ку́ю Ти́ досто́йную похвалу́ на́ше принесе́т коне́чное неможе́ние? Я́ко явле́нием пречи́стыя Твоея́ боже́ственныя ико́ны незави́стныя исто́чники целе́бныя источа́еши, ве́рно прибега́ющим к Тебе́ рабо́м Твои́м.

Боже́ственныя Твоея́ ико́ны свято́е явле́ние, Богоро́дице Де́во, я́ко светоза́рное возсия́ на́м со́лнце, пресла́вных чуде́с лучи́ пуща́ющи, тьмы́ лю́тых обстоя́ний отгоня́ющи свяще́нными Твои́ми, Влады́чице, предста́тельствы.

Испо́лнила еси́ благода́ти иногда́ первопи́санную Твою́ ико́ну, Госпоже́ Де́во Богоро́дице, и ны́не та́ же благода́ть и́стинствует сия́нием ве́ры чуде́с, я́ко тоя́ ра́ди первопи́санныя, ко спасе́нию ве́рно к Тебе́ по Бо́зе прибега́ющим.

Покланя́емся, Богоро́дице, Твоему́ пречи́стому о́бразу и пресла́дкому Твоему́ Младе́нцу, преве́чному и незаходи́мому Све́ту, Христу́, И́мже спасла́ еси́ от лю́тых зо́л и тле́ния сме́ртнаго все́ челове́ческое естество́.

Седа́лен, гла́с 8.

Боже́ственнии Сло́ва апо́столи, Ева́нгелия Христо́ва велегла́снии вселе́нныя благове́стницы, боже́ственную це́рковь созда́вше в пресвято́е Твое́ и́мя, Богоро́дице, и к Тебе́, Госпоже́, прихо́дят, моля́ще Тя́ приити́ на тоя́ освяще́ние. Ты́ же, о Богома́ти, рекла́ еси́: иди́те с ми́ром и А́з с ва́ми та́мо е́смь. Они́ же, ше́дше, обрета́ют та́мо на стене́ це́ркве Твоего́, Влады́чице, о́браза подо́бие, Боже́ственною пи́сано си́лою шаро́вными подо́бии, и, ви́девше, поклони́шася Ти́ и просла́виша Бо́га. С ни́миже и мы́ боже́ственней Твое́й покланя́емся ико́не, прося́ще от Тебе́ вели́кия ми́лости: да́руй согреше́ний оставле́ние рабо́м Твои́м, еди́на Благослове́нная.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Почти́м, лю́дие, Чи́стыя в чистоте́ ико́ну Де́вы Богоро́дицы и Тоя́ Боже́ственнаго Младе́нца, Христа́ Бо́га на́шего, и лобыза́ем и прославля́ем со стра́хом и тре́петом: почита́ем бо ико́ну благоче́стно, па́че же почита́ем Са́мую Ту́ю су́щую Чи́стую Богома́терь.

Дави́д, боже́ственный и чу́дный проро́к, издале́ча прови́дя, глаго́ла: лицу́ Твоему́ помо́лятся бога́тии лю́дие. Мы́ же, ве́рнии, покланя́емся и лобыза́ем честну́ю ико́ну, душа́ми ку́пно и телесы́ освяща́ющеся.

Ева́нгелия Христо́ва богогла́сный списа́тель Лука́, Бо́жиим манове́нием всенепоро́чный Тво́й напису́ет о́браз, Богоро́дице, и Младе́нца Преве́чнаго на рука́х Твои́х вообрази́в, к нему́же притека́ющия напа́стей и бе́д избавля́еши, и вся́ покрыва́еши, и спаса́еши Твое́ю ми́лостию.

Ты́ еси́ похвало́ и вене́ц святы́м все́м, о Цари́це! Ты́ упова́ние на́ше и Помо́щница по Бо́зе, и на Тя́ наде́жду спасе́ния на́шего возложи́хом вси́. Тебе́ мо́лимся, я́ко Бо́жией Ма́тери: одожди́ гре́шным рабо́м Твои́м бога́тыя Твоя́ душеспаси́тельныя ми́лости.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Вся́ко, Пречи́стая, существо́ воспе́ти недоуме́ет Тя́, па́че бо го́рних умо́в превозвы́силася еси́, ро́ждши непристу́пнаго и стра́шнаго Всецаря́ и Бо́га, но, я́ко Ми́лостива и ско́рая челове́ком Помо́щница, вонми́ моле́нию ра́б Твои́х и да́руй Твою́ по́мощь.

Иде́же осени́т благода́ть Твоя́, Богоро́дице, стра́хом исчеза́ют де́мони и разруша́ется злоко́зненное те́х мечта́ние, бе́гают ду́си те́мнии, ра́дуется же ве́рных все́ мно́жество, Тебе́ пе́снь хва́льну от се́рдца вопию́ще: ра́дуйся, боже́ственный Покро́ве ду́ш на́ших.

Безоче́сным сла́дкое зре́ние дае́тся, глухи́м слы́шание, немы́м благоглаго́лание, хромы́м хожде́ние, прокаже́нным очище́ние, де́монствуемым целому́дрие и в боле́знех су́щим разли́чных исцеле́ние, осене́нием Пречи́стыя Твоея́, Богоро́дице, ико́ны.

Не умолчи́м никогда́же, Богоро́дице, псалмы́ и пе́сньми воспева́ти вели́чия Твоя́, Обра́дованная: Бо́га бо вои́стинну воплоти́вшагося родила́ еси́, во спасе́ние на́ше всеми́рное и избавле́ние.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Боже́ственнаго Твоего́ Рождества́, Де́во Госпоже́, пребога́тая благода́ть, ю́же дре́вле изглаше́нием предала́ еси́ пречи́стому Твоему́ о́бразу, неоску́дне де́йствовати вели́кая же и пресла́вная, во спасе́ние на Тя́ наде́ющимся.

Иде́же прославля́ется свято́е и́мя Обра́дованныя Богоро́дицы, та́мо вся́ческих благи́х исто́чницы пролива́ются; прииди́те в чистоте́, челове́цы, се́ бо явле́ние боже́ственныя Де́вы ико́ны сказу́ет Цари́цы прише́ствие, во спасе́ние все́х ве́рных.

Целе́ния боле́зней, отгна́ние же страсте́й и душепита́тельное спасе́ние, грехо́в проще́ние и ве́чное избавле́ние от пречи́стыя Твоея́ ико́ны, Влады́чице, ве́рно приходя́ще, прие́млем, Богома́ти Всенепоро́чная.

К Тебе́, Госпоже́, прибега́ют ро́ди правове́рных, про́сят вели́кия ми́лости и прие́млют неоску́дно су́щии в неду́зех исцеле́ние, в страсте́х премене́ние, в печа́лех утеше́ние. Источи́ и мне́, Влады́чице, ка́плю душеспаси́тельную, да со все́ми и а́з пою́ Твое́ вели́чие.

Конда́к, гла́с 8.

Притеце́м, лю́дие, к ти́хому сему́ и до́брому приста́нищу, ско́рой помо́щнице, гото́вому и те́плому спасе́нию, покро́ву Де́вы, ускори́м на моли́тву и потщи́мся на покая́ние: источа́ет бо на́м неоску́дныя ми́лости Пречи́стая Богоро́дица, предваря́ет на по́мощь и избавля́ет от вели́ких бе́д и зо́л благонра́вныя и богобоя́щияся рабы́ Своя́.

И́кос.

Смы́сл очи́стивше и у́м, притеце́м к Богоро́дице, све́тло пе́сньми ублажа́юще Ю́, и пречи́стую ико́ну Ея́ прославля́ем и чти́м, и, припа́дающе, покланя́емся я́ко Само́й су́щей О́ной: че́сть бо ико́ны на первообра́зное восхо́дит, и почита́яй и покланя́яйся е́й почита́ет са́мое первообра́зное, я́коже боже́ственнии отцы́ реко́ша. И а́ще кто́ не чти́т Пресвяты́я Богоро́дицы и не покланя́ется ико́не Ея́, ана́фема да бу́дет: посрамля́ет бо и погубля́ет не чту́щия ю́, избавля́ет же от вели́ких бе́д и зо́л благонра́вныя и богобоя́щияся рабы́ Своя́.

Пе́снь 7.

Ирмо́с: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Прииди́те, почерпе́м отпуще́ние от неистощи́маго исто́чника, точа́щаго святы́ню — Пречи́стыя Де́вы, и Тоя́ Пречи́стаго Младе́нца, Бо́жия Сло́ва, на́с ра́ди вочелове́чшагося. К Нему́ же возопии́м: Тво́рче Изба́вителю, препросла́вленный со Отце́м и Ду́хом, Бо́же, благослове́н еси́.

Неусы́пную, Чи́стая, и богоприя́тную иму́щи моли́тву, и непреодоле́емую держа́ву кре́пости, враго́в на́ших де́рзость, я́же на ны́, разори́, и вы́я и́х под но́зе ве́рному Импера́тору на́шему низложи́, да возвесели́мся о Тебе́, раби́, Сы́ну Твоему́ вопию́ще: оте́ц на́ших Бо́же, благослове́н еси́.

Ра́дуемся и весели́мся, ве́рнии лю́дие, чу́дному явле́нию ико́ны Пречи́стыя Влады́чицы Богоро́дицы, река́ бо яви́ся неисчерпа́ема, целе́бную во́ду точа́щи: слепы́м бо ви́дети дае́т и глухи́м слы́шание, хромы́м хожде́ние и все́м су́щим в неду́зех безме́здное исцеле́ние.

Неиспы́тана глубина́, недове́домо та́инство, непостижи́м о́браз, Де́во, зача́тия Твоего́: зача́тие без се́мене, без му́жа рождество́, Безпло́тный воплоти́ся, Преве́чный младе́нствует, Сы́н Бо́жий, Сы́н Тебе́, Де́вы, быва́ет. Ему́же вопие́м: Бо́же, благослове́н еси́.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

У́м а́нгельский и челове́ческий ужаса́ется, Богоро́дице, ка́ко Бо́га небе́снаго, ложесна́ми объе́мши, воплоти́ла еси́? ка́ко, Младе́нца ро́ждши, я́ко Сы́на на руку́ но́сиши? Его́же ужаса́ется тва́рь и трепе́щут го́рнии престо́ли, вопию́ще непреста́нно: Свя́т, Свя́т, Свя́т еси́, Бо́же, препе́тый и превозноси́мый во ве́ки.

Ра́дуйся, су́щая ра́досте всего́ ми́ра, со арха́нгелом Гаврии́лом вопие́м Ти́, Богоро́дице: ра́дуйся, вмести́лище Невмести́маго; ра́дуйся, Благода́тная, носи́ло Божества́ всего́; ра́дуйся, Ада́мово воззва́ние, с Тобо́ю Госпо́дь, и Тебе́ ра́ди с на́ми, спаса́я на́с. Его́же пое́м и превозно́сим во ве́ки.

Ко́рень Иессе́ев освяще́нный — ко́рень греха́ на́шего исто́ргнула еси́; же́зл Ааро́нов процве́тший — Жизнода́теля цве́та израсти́вши Христа́; ста́мно манноприе́мная — сме́рти всю́ си́лу сокруши́ла еси́ и в поро́ду жи́зни возвела́ еси́ ро́д челове́ческий. Те́мже Тя́ пое́м, до́брых вино́вную.

Ты́ похвала́ христиа́ном еси́, Влады́чице, Ты́ ору́жие на враги́ и стена́ к Тебе́ прибега́ющим. Тя́ и ны́не на по́мощь призыва́ем, Госпоже́, не да́ждь враго́м вознести́ся на лю́ди Твоя́, и́же Тебе́ не хва́лят, ни Сы́на Твоего́, Богоро́дице, и Твое́й ико́не не кла́няются: си́х победи́ и ду́ши на́ша спаси́.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Тебе́, тве́рдую помо́щницу ро́ду челове́ческому, Богоро́дице Мари́е, ли́к проро́ческий многообра́зно провозвести́, се́нь святу́ю, небе́с простра́ннейшую, скрижа́ль богопи́санную и купину́ неопали́мую, две́рь богопрохо́дную, го́ру же и ле́ствицу, и мо́ст, и же́зл процве́тший; мы́ же вои́стину Богоро́дицу Тя́ велича́ем.

Та́йна глубины́ Рождества́ Твоего́ у́м а́нгельский ужаса́ет, Де́во, и пречи́стая ико́на де́моны прого́нит, и ли́ца нечести́вых омрача́ет, и в сту́д порева́ет: не терпя́т бо взира́ти на си́лу ея́, бе́гают же и исчеза́ют. Мы́ же любе́зно покланя́емся и лобыза́ем, и Тя́, Богоро́дицу, велича́ем.

Предста́тельница су́щи неотсту́пна к Вы́шнему Царю́, я́ко иму́щи ма́терне дерзнове́ние непосты́дно, в ми́ре глубо́це правосла́вных житие́ утверди́ и Благове́рнаго Импера́тора на́шего возвы́си, и вся́ поле́зная да́руй всегда́ рабо́м Твои́м, да Тя́, Богоро́дице, велича́ем.

О, Всеми́лостивая христиа́ном помо́щнице! Не мо́жет Тя́ воспе́ти досто́йно у́м челове́ческий и а́нгельский, я́ко всея́ тва́ри честне́йши, небе́сных и земны́х сла́внейши: все́х бо родила́ еси́ Творца́ и Бо́га. Но, о Влады́чице! приими́ ми́лостивно ю́же Тебе́ от се́рдца возложи́хом пе́снь, спаса́й на́с всегда́, на Тя́ бо наде́емся.

Свети́лен:

Да почти́тся Всепе́тая Ма́ти Бо́жия, жи́знь су́щую ро́ждши — Христа́ Бо́га на́шего, ра́йских двере́й отверзе́ние, и всего́ ми́ра очище́ние, к животу́ возведе́ние. Се́й е́сть проро́ком глаго́лавый, Тому́ поклони́мся, Бо́гу и Спа́су ду́ш на́ших.

Сла́ва, и ны́не: Прииди́те, ве́рнии, с чистото́ю, возвели́чим Пречи́стыя Ма́тере Бо́га на́шего чу́дную ико́ну, и Боже́ственнаго Младе́нца Спа́са Христа́, Его́же, я́ко ро́ждшая, на руку́ носи́вши, и ма́терне дерзнове́ние к Нему́ иму́щи, непреста́нно мо́лит за ны́ и подае́т рабо́м Свои́м бога́тыя ми́лости.

 

Канон Пресвятой Богородице пред иконой «Козельщанская»

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся све́тло торжеству́я, и воспою́, ра́дуяся, Тоя́ чудеса́.

А́нгел вопия́ше Тебе́, Де́во Чи́стая: ра́дуйся! Мы́ же, что́ Ти́ принесе́м, Блага́го Царя́ Блага́я Ма́ти, я́ко яви́ла еси́ на́м в сия́ после́дняя времена́ сокро́вище неоску́дное — чудотво́рную ико́ну Твою́ на освяще́ние и исцеле́ние ду́ш и теле́с на́ших.

Ты́ бу́ди на́м утвержде́ние и в беда́х ско́рое заступле́ние, Цари́це Небесе́ и земли́, на Тебе́ наде́емся, непреста́нно моля́ще Твою́ благосты́ню.

Я́ко стра́ждущей Мари́и ско́ро яви́ла еси́ ве́лию ми́лость Твою́, Пречи́стая Де́во, та́кожде не отступа́й, Милосе́рдая Богома́ти, и от на́с, благода́тное утеше́ние в беда́х и злоключе́ниих су́щим подаю́щи, да Тя́ при́сно велича́ем.

Я́же Бо́га Сло́ва челове́ком пресла́вным Твои́м Рождество́м соедини́вшая, Де́во Богоневе́сто, утоли́ церко́вныя собла́зны и пода́ждь ми́р ми́рови, я́ко Блага́я.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшия духо́вно утверди́, в Боже́ственней Твое́й сла́ве венце́в сла́вы сподо́би.

Бога́тство духо́вное неиждива́емое дарова́ла еси́ рабо́м Твои́м, Жи́знь ро́ждшая, Пренепоро́чная Чи́стая Де́во, ико́ну Твою́ свяще́нную, ея́же прославле́ние све́тло пра́зднующе, ве́рнии, избавля́емся от вся́ких бе́д и ско́рбных обстоя́ний.

Свята́я Влады́чице Пречи́стая Бо́га на́шего Ма́ти, все́х Творца́ неизрече́нно ро́ждшая, моли́ всегда́ бла́гость Его́ страсте́й на́с изба́вити и оставле́ние грехо́в на́м дарова́ти.

Не оскуде́й, Пренепоро́чная Де́во, моли́твами Твои́ми и сохрани́ ста́до Твое́, е́же собра́ти благоизво́лила еси́, Ма́ти Пастыренача́льника Го́спода Иису́са Христа́, да ни еди́на поги́бнет от ове́ц Твои́х.

О, Богоблаже́нная Де́во, простри́ всеблагомо́щную десни́цу Твою́, во е́же помощи́ на избра́ннем пути́ жития́ и́ноческаго, вве́рившим спасе́ние свое́ оби́тели Твое́й и моли́ся приле́жно Сы́ну и Бо́гу Твоему́ спасти́ся ста́ду Твоему́ невреди́му.

Седа́лен

Ри́торов глаго́лы не довле́ют воспе́ти по достоя́нию, о, Ма́ти Бо́га на́шего, ди́вная чудеса́ и неисчисли́мая благодея́ния Твоя́ от ико́ны сея́ явля́емая, мы́ же во смире́нии се́рдца та́йно веща́ем Ти́, А́нгелов Честне́йшей: ра́дуйся, Благода́тная, пребу́ди, Милосе́рдая, с на́ми неотсту́пно во ве́ки.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й.

Ки́й у́м пости́гнути возмо́жет си́лу благода́тных исцеле́ний, исходя́щую от ли́ка Твоего́ свята́го, в Боже́ственнем се́м хра́ме пребыва́ющаго, слепе́ц бо Иоа́нн, подо́бно ева́нгельскому слепцу́, ве́рою кре́пкою и моли́твою непрестаю́щею взыва́ше к Тебе́, Многоми́лостивой Цели́тельнице, да отве́рзутся о́чи его́, и исцеле́н бы́в а́бие и узре́в све́т, умиле́нно возопи́: сла́ва си́ле Твое́й, Го́споди.

Озари́, Всепе́тая Де́во, чи́стшая све́тлостей со́лнечных, слепотству́ющий у́м на́ш ра́зумом и́стиннаго Богове́дения, да не поги́бнем лю́те во гресе́х на́ших: по́мыслы благоче́стия сердца́ на́ша просвети́, да, спа́сшися Тобо́ю, ра́достно возгласи́м: сла́ва си́ле, сла́ва и милосе́рдию Твоему́, Го́споди, Благоде́телю Всеблаги́й.

Чу́до бя́ше зре́ти, ка́ко и́нокиня оби́тели сея́, зело́ разсла́блена, сподо́бися лобыза́ти цельбоно́сную ико́ну Твою́, Ма́ти Бо́жия, во мгнове́ние о́ка ощути́вши кре́пость теле́сную и соверше́нное здра́вие, со умиле́нием вопия́ше: сла́ва си́ле, сла́ва снизхожде́нию Твоему́, Го́споди Преми́лостиве.

Мо́лим Тя́, я́же пре́жде ве́к избра́нная в Ма́терь Го́спода, исцели́ разсла́бленныя грехо́м ду́ши на́ша, оживи́ росо́ю покая́ния серде́чнаго и моли́твы сле́зной, укрепи́ в сердца́х рабо́в Твои́х ве́ру и́стинную и любо́вь нелицеме́рную, да сподо́бимся по́двигом до́брым подвиза́тися, ве́ру непоро́чну соблюсти́, житие́ ми́рно сконча́ти, хва́ляще Го́спода: сла́ва долготерпе́нию Твоему́, Спа́се на́ш.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ безле́тнаго Сы́на, все́м воспева́ющим Тя́ ми́р подава́ющая.

Ни у́м А́нгельский, ниже́ язы́к челове́ческий возмо́жет изрещи́ мно́жества зна́мений ди́вныя по́мощи Твоея́, Пренепоро́чная Влады́чице, подава́емыя ро́ду челове́ческому в ну́ждах душе́вных и теле́сных: благодея́ния Твоя́ па́че зве́зд небе́сных сия́ют во все́м ми́ре Твое́м. Те́мже у́бо приими́ благода́рственная моле́ния сия́ недосто́йная, непреста́нно сла́вимая Го́рними Си́лами, Богоневе́стная Де́во.

Ко́ль чу́дны дела́ Твоя́, Го́споди, се́ бо, я́ко со́лнце, ми́рови возсия́ пречестна́я ико́на Преблагослове́нныя Ма́тере Твоея́, ве́рных мы́сли просвеща́ющи велича́ющих Тя́, Христе́, при́сно.

Се́й святы́й де́нь ра́достный, Богому́дреннии, прииди́те пе́сньми и пе́нии духо́вными воспое́м све́тло, ны́не всеблаголе́пно зря́ще хра́м Пречи́стыя ико́ною светови́дною украша́емь, я́ко пребыва́ние сла́вы Присноде́вы зде́ яви́ся. Мо́лим Ти́ ся́ приле́жно, Богороди́тельнице, я́ко су́щей с на́ми Твое́ю благода́тию озари́тися на́м.

Ны́не Не́бо и земля́ весели́тся и чи́ни А́нгелов и челове́ков собра́ние, изря́дно пра́зднующе, воспои́м Христа́, дарова́вшаго на́м Боже́ственное наслажде́ние — о́браз Сво́й свяще́нный и Пречи́стыя Ма́тере Своея́.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ Ро́ждшагося Бо́га сла́вим.

Досто́йно е́сть велича́ти Тя́, Богоро́дицу, дарова́вшую пречи́стый о́браз Сво́й в по́мощь и Боже́ственное заступле́ние святе́й оби́тели се́й от вра́г ви́димых и неви́димых.

Досто́йно е́сть велича́ти Тя́, Я́же в Вы́шних Престо́лу Живонача́льныя Тро́ицы в моли́твах о на́с предстоя́щая, от А́нгел воспева́емую Де́ву Пречи́стую и от земны́х я́ко Богоневе́стную Ма́терь при́сно прославля́емую.

Велича́ем Тя́, Пресвята́я Де́во, и почита́ем светоно́сный о́браз Тво́й, его́же во утвержде́ние оби́тели сея́ положи́ла еси́, да пребу́дет непрекло́нна в ве́к ве́ка от смяте́ния ересе́й.

Все́й земли́ Росси́йстей возсия́ свы́ше да́нный благоче́стно покланя́емый о́браз Тво́й честны́й, Богоизбра́нная Отрокови́це, и Боже́ственною благода́тию покрыва́ется оби́тель Богома́терня, ве́рно Бо́га прославля́ющая.

Конда́к, гла́с 3.

Боголе́пно во смире́нии красу́ется оби́тель Красного́рская, осеня́емая и спаса́емая преди́вным о́бразом Влады́чицы Пречи́стыя, Небесе́ и земли́ Цари́цы Богоро́дицы, от него́же исто́чники благода́ти и ча́ша чуде́с оби́льно излива́ются, и усе́рдно притека́ющии исцеле́ния ве́рою прие́млют, и неве́рнии ве́рою кре́пкою се́рдца исполня́ют и мы́, раби́ Твои́, Богома́ти, благода́рне вопие́м Ти́: ра́дуйся, Предста́тельство христиа́н непосты́дное и оби́тели Твоея́ красото́ и ра́дование.

И́кос.

Высоту́ Небе́снаго жития́ и сла́вы присносу́щныя Боже́ственное осия́ние да́руй рабо́м Твои́м, любоблагоутро́бная Ма́ти Де́во Мари́е, и сподо́би соверши́ти пресла́вное торжество́ во све́те добродея́ний и помышле́ний, духо́вно сия́ющих, свы́ше бо облагода́тствовала еси́ живоно́сный о́браз Тво́й, Богоизбра́нная Неве́сто, и, я́ко луча́ми со́лнечными, чуде́сными зна́мениями согрева́еши сердца́ благоче́стно почита́ющих и ве́рою покланя́ющихся, я́коже Тебе́ Само́й су́щей с на́ми, святе́й ико́не Твое́й, ю́же неви́димо со стра́хом окружа́ют от Небе́с ли́к А́нгел святы́х: сия́ у́бо, я́коже луна́ по́лная пресве́тлая в нощи́, отго́нит тьму́ боле́зней и скорбе́й, и́же жела́нием серде́чным умиле́нно притека́ют ко благосе́рдию Твоему́, ра́дующеся о Боже́ственней благода́ти, велича́ют Тя́, зову́ще: ра́дуйся, предста́тельство христиа́н непосты́дное и оби́тели Твоея́ красото́ и ра́дование.

Пе́снь 7.

Ирмо́с: Не послужи́ша тва́ри Богому́дрии па́че Созда́вшаго, но о́гненное преще́ние му́жески попра́вше, ра́довахуся пою́ще: препе́тый отце́в Госпо́дь и Бо́г благослове́н еси́.

Да сликовству́ет церко́вной све́тлости любо́вию Боже́ственною А́нгельское во́инство, Богому́дренно воспева́юще: благослове́н еси́ в хра́ме сла́вы Твоея́, Го́споди.

Па́че вы́шних ликостоя́ний вознесла́ся еси́, Влады́чице, еди́на бы́вши Ма́ти Вседе́теля, те́мже у́бо ра́дующеся, взыва́ем: благослове́нна Ты́ еси́ в жена́х, Всенепоро́чная Влады́чице.

Це́рковь земноро́дных торжеству́ющи ра́дуется, зря́щи Боже́ственную ико́ну Ма́тери Госпо́дней, и единому́дренно воспева́ет: благослове́нна еси́ Ты́, Влады́чице Пречи́стая, просвети́ ны́ све́том Сы́на Твоего́.

По́честь и поклоне́ние вознося́щи Тебе́, де́вственная Похвало́, о Тебе́ ра́дуется, Благода́тная, вся́кая тва́рь, А́нгельский собо́р и челове́ческий ро́д, досто́йно взыва́ющи: благослове́нна еси́ Ты́, Влады́чице, Де́во Неискусобра́чная.

Пе́снь 8.

Ирмо́с: О́троки благочести́выя в пещи́, Рождество́ Богоро́дичо спасло́ е́сть: тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Луча́ми све́та у́мнаго освеща́емь, Боже́ственный до́м Тво́й осеня́ет ны́не все́х о́блаком Ду́ха Свята́го и освяща́ет ве́рныя, согла́сно пою́щия: благослови́те, вся́ дела́ Госпо́дня, Го́спода.

Че́сть и сла́ву стяжа́вше священнопи́санный о́браз Богоро́дицы и Предве́чнаго Богомладе́нца Христа́ Жизнода́вца, со благогове́нием притеце́м, ве́рнии, воспева́юще: благослови́те, вся́ дела́ Госпо́дня, Го́спода.

Умиле́нно про́сим Тя́, Влады́чице, освяти́ Боже́ственною благода́тию Твое́ю, на́с, моля́щихся, и ополче́ньми непобеди́мыми А́нгел Свои́х огради́ оби́тель Твою́, враго́в свире́пство покаря́ющи, да благослови́м Го́спода во ве́ки.

Це́рковь Свою́ обручи́вшаго Себе́ Кро́вию честно́ю Боже́ственнаго Младе́нца Иису́са Христа́ и Пречи́стыя Ма́тере Его́ свяще́нное изображе́ние любе́зно лобыза́ем и мо́лим, сподо́би на́с, Христе́ Спа́се, воскресе́ние улучи́ти вопию́щих: благослове́н еси́, Го́споди, во ве́ки.

Пе́снь 9

Ирмо́с: Вся́к земноро́дный, да взыгра́ется Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Богонача́льным манове́нием свята́я ико́на Твоя́, Влады́чице, от ле́т дре́вних храни́мая, ны́не, я́ко ча́ша, благода́ть Твою́ оби́льно излива́ющая, е́сть достоя́ние оби́тели Твоея́, те́мже благоче́стно прославля́юще Тя́, Богоро́дице, досто́йно велича́ем.

Я́коже дре́вле во́лны морски́я и бу́рю уста́вила еси́, Богоро́дице, егда́ чу́дный о́браз Тво́й, ше́ствоваше по Ру́сскому мо́рю ко бре́гу Оте́чества на́шего, та́ко и ны́не мо́лим Тя́, Богоневе́сто, укроти́ во́лны неве́рия, ересе́й и раско́лов, да Тя́, Бо́жию Ма́терь, испове́дающе, Це́рковь во ве́ки велича́ет.

Из ро́да в ро́д храни́мая святы́ня — о́браз се́й честны́й, мо́лим Тя́, Цари́це Преблага́я, да бу́дет во освяще́ние и исцеле́ние и спасе́ние ду́ш и теле́с на́ших, да Тя́ во ве́ки велича́ем.

При́зри благосе́рдием Твои́м, Всепе́тая Де́во, на лю́ди Твоя́, цельбоно́сному о́бразу Твоему́ покланя́ющияся, я́коже Тебе́ Са́мой, на не́м изображе́нной, Ма́тери Госпо́дней и Преве́чному Младе́нцу Твоему́, Его́же любо́вию объя́ла еси́ на пречи́стых ру́цех Твои́х, моли́, да сохрани́т оби́тель сию́ неврежде́нну, да Тя́ во ве́ки веко́в велича́ем.

Свети́лен

Де́нь светлопра́зднственный и весе́лия испо́лненный яви́ся дне́сь: воспо́йте Го́сподеви пе́снь хвале́бную в це́ркви преподо́бных, я́ко благоволи́ Госпо́дь в лю́дех Свои́х просла́вити чу́дную ико́ну Ма́тере Своея́, исцеле́ния все́м источа́ющую, ко́ль страшна́ дела́ Твоя́, Христе́, и кто́ возмо́жет изрещи́ милосе́рдие Твое́.

 

Канон Пресвятой Богородице пред иконой «Коневская»

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Сияние славы Отчия, Сый от Света, Свете Присносущный, озари, молю, ум и сердце мое, Иисусе, и наполни мя Духа, да воспою, радуяся, Тебе Рождшия дивная чудеса.

Пою сердцем и усты не древнюю златую стамну, в ней же бе манна, но пою Деву Богородицу, носившую Христа во чреве, и славлю Тоя образа богосовершаемая чудеса.

Ты, по Соломону, источник вертограда и кладязь воды живы, истекающия от Ливана, о Мати Жениха Церкви, от иконы бо Твоея, Владычице, благодатныя струи присно на нас лиются.

Сердца наша привлекла еси, Дево Чистая, и тайным образа Твоего благолепием, и боголепными онаго чудесы. Темже, поюще, молим Тя: и наша души благообразны соделай, Владычице.

Песнь 3

Ирмос: Твоя песнословцы, Богородице, живый и независтный Источниче, лик себе совокупльшия, духовно утверди, в Божественней Твоей славе венцев славы сподоби.

Якоже Богоотец древле пред Божиим кивотом ликоваше, сице Арсений из Афона со образом Кивота одушевленнаго, в мысленнем ликовствовании грядый в Россию, моляшеся Первообразней, да чтущих Ю вечныя славы сподобит.

Якоже новая луна, явися на Российстей тверди Твоя, Владычице, икона, озаряющи сущия во тьме и приводищи ко свету богоразумия. И нас, грешных, молим Тя со слезами, спаси от тьмы неразумия и Твоя певцы вечныя славы сподоби.

Утверди, прослави Церковь Сына Твоего, верных Помощнице, обитель сию, и вся грады, и страны в мире сохрани и всех, любящих славити честный образ Твой, венцев славы сподоби.

Расторгни пленицы наших грехопадений, избави от рова страстнаго жития и даруй свободу рабом Твоим, Богородице, да скончаем прочее живота нашего в мире и покаянии, уповающе наследити вечную славу.

Седален, глас 4

Исполнение закона и пророков рождшая, Христа Бога, исполни радости и веселия всех, чтущих святую икону Твою, Владычице, да, светло днесь празднующе, Тя радостно воспоем и любовию имя Твое прославим, яко Ты еси едина от всех родов избранная, Благословенная и Препрославленная.

Песнь 4

Ирмос: Седяй в Славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Зряще на Твою, Богородительнице, икону, молим Тя, яко Матерь Света Незаходимаго: отжени от нас мрак страстей Того светлостию, да, просвещшеся, воспоем: слава силе Твоей, Господи.

Ты тихое обуреваемым, Богородице, пристанище, Ты радость печалию погруженным, болящим Ты исцеление и покров всем, к Тебе прибегающим, Владычице, едина Чистая и Благословенная.

Не надеемся на князи, ни на сыны человеческия, но все наше упование на Твоего Сына, Богородице, возлагаем, и веруем непреложно, яко Той есть спасение наше, и не постыдимся.

Тя, Богоневесто Чистая, недостойнии раби, славим, лобызающе бренными устны образ Твой святый, и Тебе молимся со слезами: спаси нас от лютых грехопадений, да избавимся от вечныя муки.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Неисповедимое чудес море вемы Тя, Богородице: паче бо ума и слова оными Ты прославилася еси. Тем ныне, яко Матерь Божию, в песнех Тя славим, раби Твои, благодарственно.

Дивный в чудесех Бог дивен и во святых Своих, Тобою без сравнения дивен показася, Богородице, яко во утробе Твоей вместитися благоволи и сотвори Тя Честнейшую и Славнейшую Серафимов.

Тобою возстают разслабленнии, недугующии исцеляются, слепии прозирают, от бесов томимии свобождаются, радуйся, Источниче дарований, Богоблагодатная Дево.

Слово Отчее Ипостасное рождшая, Дево Пренепорочная, избави от безсловесия душу раба Твоего и даруй ми слезы сердечныя, да ныне плачевныя пролию струи, прежде нежели постигнет плач неутешный.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Светлый составляет лик икона Твоя, Владычице, к ней же мы взирающе, сердцем и устны благословим, поем и величаем Твое к нам матернее благоутробие и купно от Тебе рождшагося Бога славим.

Торжествующе ныне радостно во храме Твоем, Пречистая, и Твоему припадающе честному образу, молим Тя умиленно: сотвори нас достойны быти лика празднующих в торжестве избранных Сына Твоего рабов.

Да рыдают демони, жегоми суще невещественным огнем от святыя иконы Девы Чистыя, и да бежат от человек в бездну, им уготованную, мы же, веселящеся, в песнех Богородицу величаем.

Живоносный Источниче, Богородице Дево, зноем страстей палимую душу мою напои благодатными струями Сына Твоего и услади горесть сердца моего зрением святаго образа Твоего.

Кондак, глас 8

Препрославленная Вышняго Мати созывает к песнопению нас Своего образа пришествием от Новаграда и возбуждает зрением того на подвиг, побеждати сопротивных силу, и к Ней, яко нашея радости виновней, пети: радуйся, Невесто Неневестная.

Икос

Како отверзу бренная уста и воспою Небо одушевленное, Деву Марию, от Неяже нам возсия Солнце мысленное, Христос, просвещаяй всякаго человека? Недоумеет бо ум мой, безгласием язык связуется. Но к чудес виновней Той иконе зряще, ангельски воспоем, глаголюще: радуйся, неистощимое сокровище благодати; радуйся, чудес неизследимая пучино. Радуйся, всем верным Божественное услаждение; радуйся, скорбящим всерадостное веселие. Радуйся, обидимым скорое избавление; радуйся, в житейстем мори спасительное окормление. Радуйся, обуреваемым страстьми тихое пристанище; радуйся, оружие, во брани мысленней противныя поражающее. Радуйся, молние, попаляющая диавола; радуйся, врачевство, болезни вся исцеляющее. Радуйся, миро благовонное всему миру; радуйся, горо, вся осененная Божеством. Радуйся, Дево, всех благих виновная верным; радуйся, Невесто Неневестная.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Не твари преклоняем колена, падоша бо истукани, но Тебе, во огни Спасшаго дети родившая; Тебе и, образ Твой лобызающе, молимся: спаси ны от огня страстей, от бед и напастей рукою отцев Бога Благословеннаго.

Кумирослужения умнаго избави мя, Богородице, истребляющи от души страстная помышления, и сердца моего олтарь освяти всегда имени Сына Твоего, Господа Иисуса, да воспою Ему: отцев Боже, благословен еси.

Похвалу святому Арсению составляет и нас, раб Твоих, радостотворит чудотворная Твоя, Владычице, икона, еяже ради ныне мы торжествуем и Тя в песнех, Всепетая, величаем, славяще отцев Бога Благословеннаго.

Исполни, о Дево Благодатная, благими Твою обитель и всякому граду и стране потребная свыше низпосылай: Ты бо еси Мати Небесе и земли Царя и вся от Него, елика просиши, восприемлеши в пользу рабом Твоим.

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

В пещи отроки орошает древле и посреде огня, о, чудесе! сохраняет неопально Сын Твой, Дево Богоотроковице, и ныне Тя, Матерь Свою, чудес творительну показует. Темже Тя чтим и превозносим имя Твое во веки.

Рачителие чистоты, пустынное сословие, монашествующии лицы, воспойте похвальная Деве Чистей, Богоизбранней и, зряще велие чудес сокровище, икону Ея святую, превозносите имя Девы во веки.

Триипостаснаго Божества Един Сый от Тебе, Богоблагодатная, воплотися и Тя главизну спасения нашего показа, темже спаси, молим Тя со слезами, поющих и превозносящих имя Твое во веки.

В премирном ликующи свете, не презри нас, долу сущих во тьме земной, но, ликом Твоим призирающи, призри и матерним благоутробием на рабы Твоя и светом Сына Твоего, Владычице, отжени от нас мрачныя прилоги лукаваго.

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Радости виновна Ты еси и торжества нашего, Богородице, икона бо Твоя озаряет смысл наш к славословию и возбуждает пети Тебе: радуйся, Хранительнице наша; радуйся, твердое ограждение и спасение душ наших.

Собери разстоящая во едино, мир мирови рождшая, Православие утверди непоколебимо и вся ны соблюди непреткновенны быти во исповедании Сына Твоего, яко едина верных Помощница.

Тя, едину в женах Благословенную, мы, грешнии, поюще, молим: избави нас, Пречистая, от страстей греховных благодатию Сына Твоего и укрепи ны в заповедех Его ходити время прочее непорочно, спасающи в мире души наша.

Сердцем моим горя, пою Деву Богоотроковицу и недоумеваюся, благоволит ли пению устен грешника? Но, о Владычице Всеблагая, смиренно молю Тя: приими сию жертву хваления раба Твоего.

Светилен

Кто Сия, проницающая, аки утро, добра, яко луна, избранна, яко солнце? Сия храм одушевленный Небеснаго Царя, Сия палата Слова, Сия едина Чистая и Благословенная Мати Божия, Юже, поюще, величаем.

Тропарь, глас 1

Возсия нам, яко солнце светозарное от востока в велелепии, Твоя, Владычице, икона, озаряющи чудес сиянием преславно всех, выну приходящих к ней с верою и любовию и молящихся усердно Твоему, еже о Сыне Твоем и Бозе, величию. Слава Богу, Арсением сию давшему нам, слава возвратившему от Новаграда, слава действующему тою всем исцеления.

 

Канон Пресвятой Богородице пред иконой «Максимовской»

Тропарь, глас 4-й

Днесь светло красуется славнейший град Владимир, радостно совершая, Владычице, праздник явления Твоего святителю Максиму, в нем бывшаго, о немже ныне воспоминающе и молящеся Тебе, взываем сице: о, Пречудная Владычице Богородице, молися Превечному Архиерею – Сыну Твоему да непоколебиму утвердит Церковь Православную, град наш Владимир и всю Русскую землю в мире сохранит и спасет в правоверии души наша.

Песнь 1

Ирмос: Воскресения день, просветимся, людие, Пасха, Господня Пасха: от смерти бо к Жизни и от земли к Небеси Христос Бог нас преведе, победную поющия.

Припев: Пресвятая Богородице, спаси нас.

Торжества день, просветимся, людие! Царица бо Небесная преславно святителю Максиму явися. Темже ликуем вси в радости, победную поюще.

Пресвятая Богородице, спаси нас.

Очистим чувствия и узрим в неприступном свете Матерь Света, ко святителю пришедшую, и, радующеся, Ей вопием: радуйся, Мати Господня.

Слава: Небеса убо достойно да веселятся, земля же да радуется, да празднует же град Владимир и вся Русская страна да торжествует, почитающи заступление Богоматере.

И ныне: Да ликуют согласно Небо и земля в праздник Пречистыя Богоматери, Та бо всем верным освящение подает. Сию, восхвалим, душевно радующеся.

Песнь 3

Ирмос: Приидите, пиво пием новое, не от камене неплодна чудодеемое, но нетления источник, из гроба одождивша Христа, в Немже утверждаемся.

Пресвятая Богородице, спаси нас.

Приидите благодать вси почерпем, не от камене неплодна истекающую, но от Пречистыя Богоматере, яко от неистощимаго источника, от негоже вси освящаемся.

Пресвятая Богородице, спаси нас.

Приидите, песнь нову поем, торжество Богоматери совершающе, со псалмами и пением ликующе и Деве Пречистей с любовию покланяющеся.

Слава: Ныне вси исполнившеся радости, архиереи же и священницы, монахи и мирстии. Празднуем светло явление Богоматери, имже утешаемся.

И ныне: Течет благодать изобильная от Твоего, Богородице, образа, всем источающи зол избавление, и здравие, и милость.

Господи, помилуй (трижды). Слава, и ныне:

Седален, глас 6-й

Владычице Преблагословенная, услыши нас, смиренных, верно Тебе покланяющихся и славящих державу Твою, Всечистая: иныя бо, кроме Тебе, помощи, не имамы. Темже возопий поющим Тя: Аз есмь с вами, и никтоже возможет на вы.

Песнь 4

Ирмос: На Божественней стражи Богоглаголивый Аввакум да станет с нами и покажет светоносна Ангела, ясно глаголюща: днесь спасение миру, яко воскресе Христос, яко всесилен.

Пресвятая Богородице, спаси нас.

На Божественней стражи, в молитвеннем бдении станем и, яко светоносную свещу, Святую Деву узрим, из Неяже возсия Избавитель и Господь, спасаяй всех, яко Всесилен.

Пресвятая Богородице, спаси нас.

Богоотец убо Давид пред сенным ковчегом скакаше, играя, людие же Божия святии, чудеса Богоматере зряще, веселимся Божественне, ибо реки милости источает нам Владычица, яко Преблагая.

Слава: Что Ти принесем, Богомати, яко град наш Владимир освятила еси Твоим дивным явлением? Егоже ныне воспоминающе, благодарно славословим Тя.

И ныне: Днесь верным радость велия: изливает бо Пречистая милости всем, с любовию притекающим к Ней. Темже стецемся, братие, и чудес Богоматери насладимся.

Песнь 5

Ирмос: Утренюем уренюю глубоку, и вместо мира песнь принесем Владыце, и Христа узрим, Правды Солнце, всем жизнь возсияюща.

Пресвятая Богородице, спаси нас.

Утренююще, воспеваем Тя, Владычице, песней похвалы плетуще, по Твоему ходатайству надеющеся Свет узрети невечерний, присносияющий.

Пресвятая Богородице, спаси нас.

Безмерное Твое, Богомати, милосердие нуждами житейскими содержимии зряще, радуемся светло, весело вопиюще: радуйся, Радосте наша.

Слава: Приступим, свещеноснии, к Божией Матери днесь и спразднуем любопразднственными чинми явление Ея преславное.

И ныне: Просвещается Твоими светолучными лучами и ликует днесь в Твоем празднице, Богомати Всенепорочная, благочестивых собрание.

Песнь 6

Ирмос: Снизшел еси в преисподняя земли и сокрушил еси вереи вечныя, содержания связанныя, Христе, и тридневен, яко от кита Иона, воскресл еси от Гроба.

Пресвятая Богородице, спаси нас.

Сниди к нам Твоим милосердием, Пречистая, разреши скорби наша, виждь обстояния, обдержащия нас, покрой и заступи всех, Твоея помощи тепле ищущих.

Пресвятая Богородице, спаси нас.

Ликующе в песнех Божественных, вернии, воскликнем Деве, праздник Ея совершающе, освещения бо источник изливает всем, с любовию к Ней притекающим.

Слава: Спасе мой Преблагий и всяческих Творче, Чистыя Богоматере Богоприятными мольбами соблюди Твоих певцев невредимыми от всех бед.

И ныне: Тя поем, Богомати, и Тебе покланяемся. Не презри моления рабов Твоих, заступи в бедах наших, яко сущи Милостива.

Господи, помилуй (трижды). Слава, и ныне:

Кондак, глас 6-й

Призри на нас, Всепетая Богородице, возсияй просвещение сердцем помраченным и озари стадо Твое, Пречистая, елика бо хощеши и можеши, яко Мати сущи Зиждителя, и возопий молящим Тя: Аз есмь с вами, и никтоже возможет на вы.

Икос

Земная на земли оставльше и мысли от страстей очистивше, приидите ныне, вернии, дивное явление Богоматери святителю Максиму воспомянем: како омофор тому подаде и пасти словесныя овцы во граде Владимире повеле. Вперим зрение, вкупе и чувства ко Пречистей Богоматери и к Ней молитву усердную вознесем: не остави нас, стадо Твое, Владычице, утеши нас, яко Мати, настави нас, яко сынов, и возопий молящим Тя: Аз есмь с вами, и никтоже возможет на вы.

Песнь 7

Ирмос: Отроки от пещи избавивый, быв Человек, страждет, яко смертен, и страстию смертное в нетления облачит благолепие, Един благословен отцев Бог и препрославлен.

Пресвятая Богородице, спаси нас.

Отроки от пещи Избавльшаго нетленно родила еси, Пречистая, по Рождестве, яко и прежде Рождества, сохраньшаго Тя. Егоже молящи не престай с любовию чтущих Тя.

Пресвятая Богородице, спаси нас.

Вси ныне, Богомудрии, соберитеся, светлое празднество совершающе, Владычицу верно от души восхвалим: радуйся, Благословенная, Мати Божия Препрославленная.

Слава: Воистинну священное ныне, Богомати, сие торжество, егоже святитель Максим учреди во свидетельство всем неусыпнаго Твоего о стаде Твоем промышления. Темже Тя с любовию величаем.

И ныне: Вси ныне со благоговением поклонимся Пречистей Деве Богоматери, молящеся со святителем Максимом и – радуйся – Гавриилово принесем Благодатней.

Песнь 8

Ирмос: Сей нареченный и Святый День – един суббот царь и господь, праздников праздник и торжество есть торжеств, в оньже благословим Христа во веки.

Пресвятая Богородице, спаси нас.

Сей нареченный и Святый день всех во граде Владимире и во области его сущих созывает на веселие. Снидемся убо в радости и возопиим Богородице: радуйся: Чистая, во вся веки.

Пресвятая Богородице, спаси нас.

Приидите, вернии, исполнимся Божественнаго благоухания в праздник Божия Матери и Сию прославим, поюще во вся веки.

Слава: Троичен: Отче Вседержителю, и Слове, и Душе, Едино в Триех Лицех Существо, сохрани град сей и землю нашу от всякия скорби и беды, мольбами Девы Богородицы, святителя Максима и всех святых Владимирских.

И ныне: Возведи очи Твоя, Чистая, и виждь: се бо приходят к Тебе от запада, и севера, и юга, и востока чада Твоя, Тя прославляюще во вся веки.

Песнь 9

Ирмос: Светися, светися, Новый Иерусалиме, слава бо Господня на Тебе возсия, ликуй ныне и веселися, Сионе, Ты же, Чистая, красуйся, Богородице, о востании Рождества Твоего.

Пресвятая Богородице, спаси нас.

Светися и радуйся, славный граде Владимире, ибо Богоматерь тя градом Своим наименовала, ликуйте ныне и веселитеся, вернии, красуйся же, и вся Русская земля, заступлением Владычицы хранимая.

Пресвятая Богородице, спаси нас.

О Божественнаго, о любезнаго, о сладчайшаго Твоего гласа, егоже святителю Максиму изрекла еси! Присно убо, о, Богомати, промышляй о стаде Твоем, да, Тя Помощницу во всем имуще, радуемся о Твоем заступлении.

Слава: О, Мати Божия и Дево! в молитву приводим Тебе чудотворцев Владимирских, ихже предстательством присно покрывай нас в житии сем, сподоби же и нас невечерняго дне во Царствии Сына Твоего.

И ныне: Согласно, Дево, Тебе блажим, вернии: радуйся, Мати Бога нашего Преславная, Присноблаженная и Пренепорочная, едина, честнейшая Херувим и славнейшая без сравнения Серафим.

 

Канон Пресвятой Богородице пред иконой «Млекопитательница»

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Водою молитв Твоих, Дево, ороси нас к плодоносию духовному и воспламени хладное наше сердце Божественною любовию, да Тебе, Млекопитательнице Питателя нашего, пение хвалебное воспоим достойно, Чистая.

Воды страстных помышлений обуревают нас, Госпоже Всеблагая, но инаго пристанища ко спасению не имамы, токмо Тебе, Всенепорочная, млекопитавшая Спаса душ наших и от иконы Твоея святыя всем дарующая утешение.

Воду непостоянную житейских треволнений прейти безбедно помози нам, Чистая, и от лютых недугов исцеление нам подаждь, Млекопитательнице Святая, и покажи причастники нас быти наследия Небеснаго, Богоневестная.

Воды целебныя источает нам икона Твоя всечестная, Богородице Дево, и страсти многоразличныя исцеляет, и помощь в бедах верным от Тебе подает, да славим чудеса Твоя и поем Тя, благих виновную, воплотившую и доившую Богомладенца Иисуса.

Песнь 3

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.

Небесных радование и земных упование еси, Богородице Дево, светлая палато Царя царей, млекопитавшая Его от сосцу Твоею. Того убо моли прилежно с великим Предтечею Иоанном и чудотворцем Николаем спасти и просветити души наша, Едина Всеблагословенная.

Небес превышшая, и землю рождеством Твоим освятившая, и млекопитавшая Зиждителя Твоего, Богоневесто Марие, иконою сладкаго подобия Твоего нас утешаеши и недужным исцеление подаеши, Едина Пречистая.

Небесная Царице, Всемилостивая Владычице, нетленно родившая и доившая святых Святейшее Слово, кую достойную похвалу принесем Ти, недостойнии, аще не Сама Ты научиши нас неосужденно славити Тя и пети Твоя чудеса, Едина Всеблаженная.

Небесное ангельское славословие слышиши, Госпоже, в Сионе Горнем, отонудуже нас, дольних, матерним Твоим оком назираеши и выну молиши за нас Сына Твоего и Бога, да вечнаго избегнем осуждения, Едина Пренепорочная.

Седален, глас 8

Величия Твоя кто исповесть, Богородице? прославлением бо чудотворныя иконы Твоея Млекопитательницы возвеселила еси души православных, многия недуги тою врачующи и от всяких бед избавляющи, иже по Бозе упование на Тя возлагающих, о Владычице Всемилостивая, и нас Твоего заступления не лиши, обитель же нашу от всякаго зла сохрани, да, Тобою хвалящеся, не постыдимся во веки.

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Услыши гласы наша хвалебныя, Богородице Преблагая, и наше поклонение приими, пред святою иконою Твоею днесь приносимое: видим бо Тя на иконе, Спаса Христа млекопитающую, и радуемся, грешнии, рождшагося от Тебе Бога славяще.

Услышала еси, Пречистая Владычице, благовещение Архангелово: радуйся, Благодатная, Господь с Тобою, и зачала еси во утробе Твоей предвечнаго Бога, Егоже нетленно рождши, млеком Твоим яко Младенца питала еси во спасение наше.

Услыша первосвятитель Сербский Савва завет великаго во отцех Саввы Освященнаго о святей иконе Твоей Млекопитательнице, Богородице Дево, и прият ю со благоговением, яко залог Твоего благоволения, Преблагая.

Услышаши иноцы Святыя Горы Афонския, яко святая икона Твоя Млекопитательница от Иерусалима к ним приносится, о Мати Слова и Дево, и, радостию славяще и поюще многопетое Твое имя, потекоша во сретение ея.

Песнь 5

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Просвети нас, грехами потемненных, Владычице, сиянием Божией благодати и сподоби чисто зрети святую Твою икону и на ней чудо чудес благоговейно созерцати, сие есть Творца вселенныя яко Младенца, от сосцу Твоею питаемаго.

Просвещение и спасение на Тя надеющихся, Богородице Дево, облагодати наш помысл достойно славити Тя и пети Твоя чудеса, яже от иконы Твоея, Млекопитательница именуемыя, явила еси и присно являеши во утешение и спасение наше.

Просветивый небо солнцем и земли основание утвердивый Словом Своим, Зиждитель всяческих во утробе Твоей, Пречистая, не тесновместися и от сосцу Твоею яко Младенец питашеся, нам же святую икону Твою источник чудес дарова, Преблагая.

Просветися Божественною благодатию обитель великаго пророка и Боговидца Илии, икону Твою, Богомати Владычице, в наследие себе приемши, сию убо и мы достодолжным поклонением почитаем и Тя, Предстательницу нашу, в песнех немолчно ублажаем.

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Молитвы множайшия здесь, пред иконою Владычицы, возносятся, егда сия в православную Россию от Святыя Горы иноками обители Ильинския принесеся, верным во утешение и в радость нескончаемую.

Молитву всяк приносяй Тебе с верою и любовию пред пречистым образом Твоим, Богородице Преблагая, не неуслышан от Тебе отыдет, всем бо вся благая даруеши, яко Бога и Питательнице Питателя вселенныя.

Молитвенно Тя славим, Пречистая Млекопитательнице, и, с любовию припадающе к многоцелебному Твоему образу, сердцем и усты сей целуем, видяще в нем залог благодатный Твоего к нам матерняго благоволения.

Молитися всегда усердно желание подаждь нам, Преблагая Владычице, вся бо можеши яко Мати и Млекопитательница воплотившагося Бога, Егоже милостива нам сотвори всесильным предстательством Твоим и не попусти до конца погибнути рабом Твоим.

Кондак, глас 5

Душ наших чувствия очистивше, узрим на иконе таинство преславное, Творца Вселенныя и Господа вышних сил, во объятиих держима и от сосцу Твоею яко Младенца питаема, и, со страхом и радостию покланяющеся Тебе и рождшемуся от Тебе Спасу нашему, воззовем: радуйся, Владычице, жизни нашея Питательнице.

Икос

Архангельское целование услышала еси, Приснодево, и в чистоте девственней Бога зачала и Христа безболезненно родила еси, Егоже яко Младенца от сосцу Твоею млеком питала еси, Ангелы и человеки величием Твоих добродетелей удивила еси. Темже ублажаем Тя, истинную Богородицу, возвеличившую наше естество и милосердием неизреченным на род христианский призирающую. Темже умиленно зовем Ти: радуйся, Владычице, Питательнице жизни нашея.

Песнь 7

Ирмос: От Иудеи дошедше, отроцы в Вавилоне иногда верою Троическою пламень пещный попраша, поюще: отцев Боже, благословен еси.

От святаго чудотворнаго образа Твоего, Богородице Дево, Млекопитательнице Спаса нашего, струи исцелений истекают и воня животная благоухает, еюже мертвость греховная душ наших потребляется и плодоносие духовное подается зовущим: отцев Боже, благословен еси.

От Иерусалима на Святую Гору Афонскую икона Твоя благодатная, именуемая Млекопитательница, Богомати Владычице, принесеся во изъявление благоволения Твоего к избранному Тобою жребию на земли, егоже насельницы гласы немолчными воспевают Сыну Твоему: отцев Боже, благословен еси.

От глубины зол многих к Тебе припадаем, о Мати, Млекопитательнице Слова и Дево, и молимся прилежно, Твою благодатную помощь нам подаждь и не попусти погибнути нам до конца, но спаси нас десницею Твоею и воздвигни пети всех Творцу: отцев Боже, благословен еси.

Песнь 8

Ирмос: Царя Небеснаго, Егоже поют вои Ангельстии, хвалите и превозносите во вся веки.

Царя Небесе и земли воплотила еси, Богородице, от девственных кровей Твоих багряницу плоти Ему исткавши и яко Младенца от сосцу Твоею Того млекопитавши, истиннаго Бога и Человека, хвалимаго и превозносимаго во вся веки.

Царице наша Преблагая и Заступнице, Пресвятая Мати Господа Вышних сил, с ними моли Его прилежно мир мирови даровати, плодоносие земли и всем нам здравие и спасение, да хвалим и превозносим Его во вся веки.

Царство и Господство дарова Тебе, Богородице Марие, Сын Твой и Бог, царствуеши бо с Ним вечно и покрываеши люди, честною Его кровию искупленныя, иже славят многопетое имя Твое и с верою поклоняются чудотворному Твоему образу, Млекопитательнице, хваляще и превозносяще прославльшаго Тя Господа во веки.

Царя Небеснаго безплотныя слуги ужасает, Богородице, тайны Твоея глубина, бесы же смущает Твоя икона, именуемая Млекопитательница, ейже мы кланяемся, чтуще Тя, Божию Матерь.

Песнь 9

Ирмос: Воистину Богородицу, Тя исповедуем, спасеннии Тобою, Дево Чистая, с Безплотными лики Тя величающе.

Воистину никтоже, притекаяй к Тебе молитвенно, тощ от Тебе исходит, Пречистая Богородице Дево, всех бо Ты милуеши и ущедряеши, яко любоблагоутробная Мати, Млекопитательнице Спаса нашего, темже, вси роди земнии, благодарно Тя величаем.

Воистину залог благодатный явися святая Твоя и чудотворная икона, Богородице, Млекопитательнице Преблагая, на нюже взирающе, сияние Божиея благодати в души наша невидимо приемлем и по долгу песньми хвалебными Тя величаем.

Воистину щит и покров обители нашей святая икона Твоя дадеся, Преблагая Дево, Млекопитательнице, сию убо с любовию объемлюще, сердцем и усты целуем и Тя, Благодетельницу нашу, непрестанно величаем.

Воистину всех святых вышше еси, Богородице Дево, рождшая Святейшее Слово и млекопитавшая яко Младенца воплощеннаго Бога, нас ради Человека бывша, да избавит падший род человеческий от погибели вечныя. Темже Тя, яко Виновницу спасения нашего, немолчно величаем.

Светилен

Пречистаго образа Твоего явление, Мати Божия, празднуем светло, ибо в нем познаваем знамение Твоего к нам благоволения, Преблагая, покрываеши и спасаеши на Тя уповающия, Богородице Всепетая и Неискусобрачная.

 

Канон Пресвятой Богородице пред иконой «Неопалимая Купина»

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Ум помраченный мой просвети, Дево, огненосным сиянием Твоея славы, память в славословии изнемогающую укрепи и воспламени хладное мое сердце Божественною любовию, да Тебе, Купине Неопалимей, пение хвалебное воспою достойно, Чистая.

Храм Трисолнечнаго Света прекрасный, украси моя чувства, молюся, да целомудренною мыслию и нескверными усты огнезрачныя иконы Твоея явление воспою достойно, Чистая.

К Твоей пресветлаго зрака иконе припадаю, окаянный: душу мою озари благодатно, яви и тело нескверно и, от лютых мя недугов свободивши, покажи причастника наследия Небеснаго, Богоневестная.

Недугующа страстьми многоразличными от иконы Твоея Божественныя исцеления сподоби мя, о, Богомати Владычице. Да славлю чудеса Твоя и пою Тя, благих Виновную, Вечную Благость Воплотившую, мира Благую Заступницу.

Песнь 3

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний Краю, верных Утверждение, Едине Человеколюбче.

Низложи налоги бесовския, стужающия мне, Владычице, гордость в добродетели, лицемерие в святости, тщеславие во бдении, высокоумие в благоговении и неблагодарность в благодеяниих Сына Твоего, Едина Всепетая Дево.

Странна мя любочестия сотвори, молю Тя, Дево, и чужда любопытства о человеческих согрешениих, дерзость и излишнее на милость Сына Твоего упование отдали от мене, да достойны Ему плоды принесу, Едина Пречистая.

Начало от земли приемшую худость моего естества познавая, молю Тя, Дево, даждь ми презрение славолюбия, бегство человеческия хвалы, познание собственнаго греха и собственныя немощи, Едина Богоблаженная.

Краткий всех вещей и всего мира конец, смертный час и мучение будущее за суету деяний тщеславных помышляти сподоби мя, Дево. Да благодатию Сына Твоего к пути истиннаго покаяния наставлен, вечнаго избегну проклятия, Пренепорочная.

Седален, глас 8

Величия Твоя кто исповесть, Богородице, явлением бо огнезрачныя иконы Твоея возвеселила еси души православных, многим недуги ею врачующи, от огня же и грома защищающи, иже по Бозе на Тя упование возлагают. О, Всемилостивая Владычице, не лиши убо и нас Твоего заступления, спаси православных христиан от всякаго зла, да Тобою хвалящеся, не постыдимся во веки.

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Жестокосердием отягченнаго мя облегчи, немилосердием к требующим окамененную утробу мою умягчи, бурею сребролюбия объятаго мя утиши, во огни неопалимыя купины Прообразованная Владычице.

Во уповании тленных и временных вещей не остави мя и пламень хищения неправеднаго угаси во мне пламенем огня Божественнаго, Неопалимая Купино явльшаяся, Богоневестная Владычице.

Идолослужение в лихоимении и заблуждение от истиннаго благочестия и православныя веры потреби от мене, Владычице, и не попусти мя пасти падением еретическим, да восхваляю имя Твое благословенное до кончины живота моего в Православии непорочно, Едина Приснодево.

Ум мой, молю Тя, Богородице, благоустрой к познанию вечных истин Христова Евангелия, к разсмотрению тленности временных благ направи мой помысел и щедролюбие даруй ми неоскудное, да благодатию Христовою украшен, пою Тя, Едина Приснодево.

Песнь 5

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Огнь нечистоты и всякия скверны во мне, безстуднем, морем благости Твоея потопи, и мглу греховную разжени, и сердце мое радости исполни, Всенепорочная.

Срамословию безобразному не даждь во мне места, Владычице, селение соблазнов замени в души моей зрением собственных грехов, храм мя чистоты и целомудрия соделай, да нескверными усты величаю Тя выну, Всенепорочная.

Смерть, суд и мучения вечная грешником уготованная в памяти моей углуби, Владычице, да поне последняя сия в памяти содержа, лютая беззакония оставлю и плоды покаяния истиннаго принесу, величая Тя присно, Едино души моея Упование.

Любовь сея жизни излишнюю и плотскаго покоя рачение отложи от мене, молю Тя, Дево Чистая. Да суетных попечений избег, Тобою получу нетленное на Небеси богатство, Едина души моея Покровительнице.

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися, и живот мой аду приближися, и молюся, яко Иона: от тли, Боже, возведи мя.

Радости суетныя, к преогорчению ближняго приводящия, чужда мя соделай, Купино Неопалимая верными именуемая, Пречудная Царица. Даждь ми сопечаловатися искреннему моему в бедствиях, Человеколюбивая Владычице и памятозлобия избави мя, прилежно молю Тя, Всенепорочная Дево.

Зависти в помысле моем не даждь вкоренятися, видением несгараемыя купины Прообразованная Моисею, и Рождшаяся от корене свята, Дево, и братоненавидения избави мя, Чистая. Да не злобою мрачною осквернен быв, лишуся Божия благодати и жизни вечныя, Всенепорочная Владычице.

Терпение в бедах утверди во мне, Всечистая, с радующимися духовную радость, к сетующим сожаление даруй ми, Пресвятая, и братолюбие низпосли мне свыше, любве пучину Рождшая Дево, и любовь велию присно Являющая роду христианскому.

Желание крайнее согрей во мне всякому ближнему от души благотворити, Благая, да не како злоб лютых душа моя исполнится, и живот мой аду приближится, и предан буду без милости яко не сотворивый милости, во тьму кромешнюю, Всенепорочная Богоневесто.

Кондак, глас 8

Предочистим чувствия душ и телес наших, да видим таинство Божественное, образно явленное древле великому во пророцех Моисею купиною, горевшею огнем и не сгаравшею, в нейже Твоего безсеменнаго Рождества, Богородице, предвозвещение исповедуем и, благоговейно покланяющеся Тебе и Рождшемуся от Тебе Спасу нашему, со страхом вопием: радуйся, Владычице, Покрове, и Прибежище, и Спасение душ наших.

Икос

Провидя дивный Моисей в неопалимей купине на Синаи тайну от века утаеную, Безлетнаго в лете родитися Восхотевшаго, Рождение от Чистыя и Неискусобрачныя Девы, ужасом содержим вопияше: сия земля воистину свята есть, яко Плод спасительный миру из нея произыдет, Имже горесть падения Адамова усладится. Сего послушая, и мы, таинства Божия событие познавшии, ублажаем Тя, Богородице, Возвеличившую падшее человечество и милосердием неизреченным Призревающую на род христианский, темже и зовем Ти: радуйся, Владычице, Покрове, и Прибежище, и Спасение душ наших.

Песнь 7

Ирмос: От Иудеи дошедше отроцы, в Вавилоне иногда верою Троическою пламень пещный попраша, поюще: отцев Боже, благословен еси.

Веселие мирское пресецы и душетленное пристрастие умертви во мне, Дево, презрение временных, желание вечных благ и нетленную радость подаждь ми, с поющими: отцев Боже, благословен еси.

Безчинное веселие и излишество, ум вредящее, душе скверну раждающее, отлучи от мене, Дево, и сподоби во здравии душевнем и телеснем духовнаго утешения наслаждатися с поющими: отцев Боже, благословен еси.

Грехом, смерть лютую раждающим, оскверних душу мою, но Ты, Пречистая Владычице, огнезрачная и неопалимая купино явльшися, тину страстей моих изсуши огнем Божия благодати и настави мя на богоугодное житие. Украси же воздержанием и целомудрием и даждь ми чистым сердцем пети: отцев Боже, благословен еси.

К Твоей огнезрачной иконе взирая, молю Тя, Владычице, омраченнаго мя самолюбием светом зрака Твоего просвети и, похоти плотския укротивши во мне, огнем Божия любве хладное сердце мое воспламени, да Рождшемуся от Тебе достойно возмогу пети: отцев Боже, благословен еси.

Песнь 8

Ирмос: Царя Небеснаго, Егоже поют вои Ангельстии, хвалите и превозносите во вся веки.

Возмущение души моея утоли, Всенепорочная, от клеветы наветующих избави мя, вражду греховную во мне укроти и ненависть мрачную отврати от мене, Дево, да прославляю Тя, Чистая, во веки.

Огнь ярости во мне зело разнеженный, росою благодатныя молитвы Твоея угаси, хулу, умножающую души моея озлобление и всякий вид злобы, гнездяйся в сердце моем, искорени, Дево, да Тя прославляю, Чистая, во веки.

Образ Христов Евангельскими добродетельми напиши в души моей, Богоблагодатная, укрепи и утверди мя во всяком деле благом, от всякия же злобы отврати сердце мое, да мирными усты прославляю Тя, Чистая, во веки.

Кротким оком Твоим виждь мое смирение, Пренепорочная Богоневесто, и приклони ухо Твое к молитве сердца моего, кротостию и незлобием благоукраси мя, помраченнаго безобразием злобных страстей, и сотвори причастника блаженства, кротким обетованнаго, да радуяся прославляю Тя, Чистая, во веки.

Песнь 9

Ирмос: Воистину Богородицу Тя исповедуем, спасеннии Тобою, Дево Чистая, с безплотными лики Тя величающе.

Скорби сердца моего утиши, Радосте скорбящих, уныние душегубительное отъими от мене, Утолительнице печали, и леность ко взысканию добродетелей искорени во мне, Взыскание погибших, да Тебе, Дево Чистая, непрестанно величаю.

Малодушием болезнующаго мя оживи, Целительнице болящих, отчаянием падшаго мя возстави, Одигитрие заблуждших, грехами умерщвленнаго мя воскреси, Споручнице грешных, да Тебе, Дево Непорочная, непрестанно величаю.

Усердие во мне творити волю Божию возбуди и ревность ко славе Божией воспламени в сердце моем, Купино Огнезрачная и Неопалимая, и благоговейна служителя Христова соделай мя, Дево, Предводительнице моего спасения.

Слезами покаяния и умиления изсохшую в знои страстей душу мою умягчи, яко руно орошенное Гедеона, и сокрушение к исправлению даждь ми, Дево, да вечныя блага унаследую, и с лики избранных Божиих воспою Тя, Ходатаицу моего спасения.

Светилен

Икону Твою всечестную в залог благоволения Твоего верным даровала еси, Владычице, покрывающи и сохраняющи ею от огненнаго запаления на Тя уповаюшия. О, Мати Царя Христа Бога, буди и нам, грешным, Прибежище спасения в нечаянных бедах и Ходатаица вечныя жизни.

 

Канон Пресвятой Богородице пред иконой «Неупиваемая Чаша»

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Ангел вопияше Тебе, Дево Чистая: радуйся! Мы же что Ти принесем, благаго Царя благая Мати, яко явила еси нам в сия последняя времена сокровище неоскудное – чудотворную икону Твою на освящение и исцеление душ и телес наших.

Ты буди нам утверждение и в бедах скорое заступление, Царице Небесе и земли, на Тебе надеемся, непрестанно моляще Твою благостыню.

Богатство духовное неиждиваемое даровала еси рабом Твоим, Жизнь рождшая, Пренепорочная Чистая Дево, икону Твою священную, еяже прославление светло празднующе, вернии, избавляемся от всяких бед и скорбных обстояний.

Святая Владычице, Пречистая Бога нашего Мати, всех Творца неизреченно рождшая, моли всегда благость Его страстей нас избавити и оставление грехов нам даровати.

Озари, всепетая Дево, чистшая светлостей солнечных, слепотствующий ум наш разумом истиннаго Боговедения, да не погибнем люте во гресех наших: помыслы благочестия сердца наша просвети, да, спасшеся Тобою, радостно возгласим: слава силе, слава и милосердию Твоему, Господи, Благодетелю всеблагий.

Молим Тя, яже прежде век избранная в Матерь Господа, исцели расслабленныя грехом души наша, оживи росою покаяния сердечнаго и молитвы слезной, укрепи в сердцах рабов Твоих веру истинную и любовь нелицемерную, да сподобимся подвигом добрым подвизатися, веру непорочну соблюсти, житие мирно скончати, хваля Господа: слава долготерпению Твоему, Спасе наш.

Песнь 3

Ирмос: Твоя песнословцы, Богородице, живый и независтный источниче, лик себе совокупльшия, духовно утверди, в Божественней Твоей славе, венцев славы сподоби.

Достойно есть величати Тя, Богородицу, даровавшую пречистый образ Свой в помощь и Божественное заступление святей обители сей от враг видимых и невидимых.

Богоначальным мановением святая икона Твоя, Владычице, от лет древних хранимая, ныне, яко чаша, благодать Твою обильно изливающая, есть достояние обители Твоея, темже благочестно прославляюще Тя, Богородице, достойно величаем.

Не остави нас, Богородице, нечистыми страстьми влаятися, не остави в беззакониях наших погибнути, но молящихся Тебе житие свое исправити научи и Твое милосердие воспети достойно.

Человеков молитвы и Ангелов славословие, Владычице, приемлющи, и моего убогаго не отврати моления, скорбь души моея утоляющи, паче же терпение в скорбех присно мне подающи.

Владычице Пречистая, елика просим днесь от Тебе прияти, сия от чудотворныя Твоея иконы нам подаждь, и немощное наше произволение утверди, и небесных благ желание в сердца наша всели.

Нашему спасению буди, Богородице, ходатаица и наставница, но и телесныя нужды и болезни наша исцели; зане маловерни и нетерпеливи суще, помыслом уныния в бедах наших вдаемся и наипаче терпения дар у Бога просити требуем.

Седален

Яко воистину Божественное украшение Церкви и залог милости Твоея к христоименитым людем икона Твоя, Богородице Дево, показася: всяк бо, с верою к ней приходяй, в недузех исцеление, в скорбех утешение, в бедах вспоможение от Тебе скоро приемлет, всемилостива бо сущи, милости Твоея источник в чудотворнем образе Твоем нам зде являеши, да славим имя Твое преблагословенное во веки.

Песнь 4

Ирмос: Седяй в славе на Престоле Божества во облаце легце, прииде Иисус Пребожественный нетленною дланию и спасе зовущия: слава, Христе, силе Твоей.

Иже в бедах сущии человецы, ведите, яко близ вас избавление верное обретается, аще токмо с верою сие призывати будете, сице глаголюще: о, Владычице, помози и прости нас грешных, о нас милосердовавши.

Вемы, Владычице, вемы, яко веры исполненная молитва Тобою не отщетится; но сицевыя веры лености ради нашея не стяжахом, аще и стяжати возжелехом. Темже и вопием: веруем, Пречистая, помози нашему маловерию.

Широкий путь жития зле возлюбихом, Богородице, к погибели сыны своя влекущий и веру их сокрушающий; но пред святою Твоею иконою предстояще, покаяние о сем приносим и помощи Твоея смиренно просим, во еже на путь спасения обратитися.

Еже ко временному житию потребное вмале полезно есть, но паче сих о сухости сердец наших восплачем, о братие, и исцеления страстей наших просити потщимся, греховное житие свое окаявше и горних даров тепле возжелевше.

Ядом страстей извращена ми душа, и нозе мои по пути спасения ходити не возмогут, аще не Твоим, Пречистая, предстательством благодатную обрящу помощь, во еже на путь правый устремити души моея шествие.

Церковь, в нейже икона Твоя пребывает, Богородице, врачебница недугов телесных и душевных является, веры же учительница и неверия явная обличительница.

Песнь 5

Ирмос: Ужасошася всяческая о Божественней славе Твоей: Ты бо, неискусобрачная Дево, имела еси во утробе над всеми Бога и родила еси безлетнаго Сына, всем воспевающим Тя мир подавающая.

Людей мольбы и славословия, пред чудотворным Твоим образом и на всяком месте возносимыя, благоутробно, Владычице, приими, и, узами Твоея любве души наша пророчески связавши, сия в Небесное привлецы Царство, и тамо Твоему лицу поклонится сподоби.

Благочестно отвсюду, о Богомати, к чудотворней иконе Твоей притекающим и усердно покланяющияся милостей Твоих и щедрот не лишаеши, от бед сия спасаеши, от недуг избавляеши, духи лукавыя от них прогоняеши, утешение же и здравие всем подающи, яко всеблагая.

К Твоей, Дево, прибегаем благости, и очи сердец наших к Тебе, Чистая, возводим: не презри воздыханий наших молитвенных, но буди нам покров и помощница в день судный.

Освящение, здравие и спасение душам и телесем нашим, Мати Божия, от святыя Твоея иконы подаеши, ейже благочестно покланяемся и усты и сердцем благоговейно сию целуем, Твоя чудеса и неисчетную милость к христианскому роду присно славяще.

Известная верных еси помощница и всяких благ подательница, Пречистая Дево, иконою бо Твоею чудотворною неисчетныя милости просящим подаеши и вся спасаеши, иже Тебе верно вопиют от души: помилуй и спаси нас, Владычице.

Мати Божия всеблагая, милосердых щедрот Твоих не лиши нас, обнищавших во гресех, и от челюстей мысленнаго волка исхити души наша, да не погибнем до конца, но приносим присно плоды покаяния Богу.

Песнь 6

Ирмос: Божественное сие и всечестное совершающе празднество, богомудрии, Богоматере, приидите, руками восплещим, от Нея рождшагося Бога славим.

О, преславных чудес Твоих, Владычице, и многаго Твоего к человеком сострадания: единым бо прикосновением к иконе Твоей немощныя врачуеши, и издалече, в сониих и видениих, к ней требующих Твоего заступления призываеши.

Вода освященная и елей от лампады иконы Твоея святыя недуги неисцельныя, Богородице Дево, врачуют и оныя с верою приемлющим во исцеление и спасение бывают; сего ради Тя, Целительницу, ублажаем, и чудеса Твоя, от иконы Твоея явленная и присноявляемая, славим.

Расторгни пленицы наших грехопадений, избави от рова страстнаго жития, и даруй свободу рабом Твоим, Богородице, да скончаем прочее живота нашего в мире и покаянии, уповающе наследити вечную славу.

Зряще на Твою, Богородительнице, икону, молим Тя, яко Матерь Света незаходимаго, отжени от нас мрак страстей Того светлостию, да, просвещшеся, воспоем: слава силе Твоей, Господи.

Ты тихое обуреваемым, Богородице, пристанище, Ты радость печалию погруженным, болящим Ты исцеление и покров всем, к Тебе прибегающим, Владычице, едина Чистая и Благословенная.

Тя, Богоневесто Чистая, недостойнии раби, славим, лобызающе бренными устны образ Твой святый, и Тебе молимся со слезами: спаси нас от лютых грехопадений, да избавимся от вечныя муки.

Кондак, глас 6

Бысть чрево Твое святая Трапеза, имущая Небеснаго Хлеба, Христа Бога нашего, от Негоже всяк ядый не умирает, якоже рече всех, Богородительнице, Питатель.

Икос

Како отверзу бренная уста и воспою Небо одушевленное, Деву Марию, от Неяже нам возсия Солнце мысленное, Христос, просвещаяй всякаго человека? Недоумеет бо ум мой, безгласием язык связуется. Но к чудес виновней Тоя иконе зряще, ангельски воспоем, глаголюще: радуйся, неистощимое сокровище благодати; радуйся, чудес неизследимая пучино. Радуйся, всем верным Божественное услаждение; радуйся, скорбящим всерадостное веселие. Радуйся, обидимым скорое избавление; радуйся, в житейстем мори спасительное окормление. Радуйся, обуреваемым страстьми тихое пристанище; радуйся, оружие, во брани мысленней противныя поражающее. Радуйся, молние, попаляющая диавола; радуйся, врачевство, болезни вся исцеляющее. Радуйся, миро благовонное всему миру; радуйся, горо, вся осененная Божеством. Радуйся, Дево, всех благих виновная верным; радуйся, Невесто Неневестная.

Песнь 7

Ирмос: Не послужиша твари Богомудрии паче Создавшаго, но огненное прещение мужески поправше, радовахуся поюще: препетый отцев Господь и Бог, благословен еси.

Неисповедимое чудес море вемы Тя, Богородице, паче бо ума и слова оными Ты прославилася еси. Тем ныне, яко Матерь Божию, в песнех Тя славим, раби Твои, благодарственно.

Живоносный источниче, Богородице Дево, зноем страстей палимую мою душу напои благодатными струями Сына Твоего, и услади горесть сердца моего зрением святаго образа Твоего.

Непостыдную предстательницу нам дарова, икону Матери Своея, иже Ея зряще, веселимся и умильно зовем: помози, Владычице, всем, и от всех злых спаси, и Царствию Небесному сподоби.

Тобою вси спасаемся и от нахождений диавольских свобождаемся. Тя Бог показа нам заступницу и Твою честную икону нам дарова, Ейже вопием: Владычице, помози, и от всех злых человек спаси, и Царствию Небесному сподоби.

Не умолчим, Владычице, чудеса Твоя, яко Своею честною иконою всех спасаеши и страждущих от бед избавляеши, недужным цельбы подаеши, и нас от всех злых спаси и Царствию Небесному сподоби.

Пение от недостойных раб приими, Мати Христа Бога, и не отрини мене от Своего пречистаго лица, но спаси от злых всех и Царствию Небесному сподоби.

Песнь 8

Ирмос: Отроки благочестивыя в пещи Рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Приидите, вси вернии, воспоем Пречистую Деву Марию и честному Ея образу поклонимся, вопиюще от сердца: радуйся, Гавриилово благовещение; радуйся, Царя Христа восприимши и на руку Своею держа, яко солнце. Того моли, Чистая, от злых спасти душу мою.

Божественныя Твоея иконы святое явление, яко солнце, возсия в сердцах, луча всечестная просвещает светом Своим всех, вопиющих Ей: радуйся, благая наша предстательнице и скорая помощнице, славословящих Тя, Пречистая, помилуй нас.

Правоверно чтущи Тя, Царицу всех Бога, и Твоей чудней иконе святей любезно покланяюся, вопиющи: о, Божия Мати, спаси от клеветы злых человек и избави мя, славословящаго Тя, и помилуй.

Божественней Твоей иконе покланяемся, Богородице Дево, просяще от Тебе великия милости, юже даруй рабом Своим, едина Чистая, и от всякия злобы избави, и славословящих Тя, Пречистую, помилуй.

Взираю на Божественный образ Твой, и чту Владычню Божию Матерь, и взираю на подобия пречистаго Ея лица зрак, покланяюся и вопию: Дево Богородице, чтущих Тя, Многопетую, во веки сохрани.

Приими песнь исходную, Мати Живаго Бога, и спаси всех, верно покланяющихся святей Твоей и чудотворней иконе и вопиющих Тебе, Богородительнице: молися, Пречистая, Сыну Своему, помиловатися от всех злых.

Песнь 9

Ирмос: Всяк земнородный да взыграется, Духом просвещаемь, да торжествует же безплотных умов естество, почитающее священное торжество Богоматере, и да вопиет: радуйся, всеблаженная Богородице, Чистая Приснодево.

Богородице Пречистая, аще и многогрешни суть людие, в Твой святый храм притекающии, но якоже Сын Твой спасения ради грешник от небес к нам пришел есть, тако и Ты от небесных кругов на моления наша призри и прошений людей Твоих не презри, Всепетая.

Да утверждается Православная вера умножением исцелений от Твоея чудотворныя иконы, о Владычице, бываемых, да прославляется в людех Твое предстательство, паче же над страстьми победою увенчай наша зде возносимыя Тебе молитвы.

Твоей чудотворней иконе, Пречистая, покланяяся и сию благоговейно лобызая, о своих же грехопадениих ужасаяся, сице реку: аще подобает мне их ради скорби приимати, терпения дар молитвою Твоею мне низпосли.

Отечество наше, Владычице, паче всех стран земли чудотворными иконами Твоими просветила еси, яже, аки звезды небесныя, нощь земнаго жития нашего освещают и по пути правому ходити нас научают.

Множеству людей, семо притекающему, многая дарования от чудотворныя иконы Божия Матере подаются, от нихже лучшее есть, еже в чувство покаяния приити и на деяния благая устремитися. В сем убо помощь Твою яви мне, Пречистая.

Помощи Богородицы Пречистыя, о братие, мнози свидетелие зде обретаются, нашему же нерадению обличителие, темже чудотворней иконе Владычицы предстояще, к покаянию теплому устремим душ наших шествие.

 

Канон первый Пресвятой Богородице пред иконой «Нечаянная Радость»

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Отверзшая двери милосердия Божия архангельское приветствие Тебе приносившему, не затвори и от нас утробы человеколюбия Твоего, Тя воспевающих.

Чудно бысть житие Твое на земли, Преславная Мати Дево, но Небесное Твое жительство чуднейше есть: непрестанно бо являеши чудеса матерняго Твоего милосердия Тя воспевающим.

Сына, от Отца безлетно раждающагося в последняя лета, зачала еси осенением Духа Святаго, вечную радость миру родивши.

Радуйся, море, потопившее фараона мысленнаго — диавола. Радуйся, каменю, напоивший жаждущих жизни духовныя, даровала бо еси роду человеческому Избавителя плененных и Наставника заблуждших.

Песнь 3

Ирмос: Твоя песнословцы, Богородице, живый и независтный Источниче, лик себе совокупльшия, духовно утверди, в Божественней Твоей славе венцев славы сподоби.

Тя усердно песнословящих утверди в житии добродетельнем и Рождшагося от Тебе усердно моли, да не лишени будем венцев славы грех ради наших.

Паче всякаго беззаконна человека в житии своем Сына Твоего грехи прогневляем, но, о, Мати милосердая, буди о нас Ходатаица.

Да сподобит нас венцев славы в Божественней Своей славе седяй со Отцем и Святым Духом Иисус Человеколюбец, рождейся от Тебе и власть имеяй человеком оставляти грехи.

Радуйся, Дево, невместимаго Бога во чреве вместившая, и Того яко Младенца носившая, и сосцы Твоими питавшая.

Песнь 4

Ирмос: Седяй в славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Спаса всему миру рождшая, и Сама спасаеши, Мати, от бед и печалей житейских Богородицу Тя исповедающих.

Исцели вся лютыя и неудобь исцельныя болезни наша, Мати Сына и Избавителя, на Крест грехи наша вознесшаго.

Ипостасная Премудрость, Бог Слово избра Тя в жилище Свое, Сего усердно моли, да спасет нас имиже весть судьбами.

Радуйся, Невесто прекрасная, добрая. Радуйся, Голубице Чистая. Радуйся, Мати Еммануилева, Богородице Приснодево.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Небо и земля удивляются, зряще милосердие Твое к роду христианскому, преславная Мати Дево, и к самым долу поверженным грешником нисходиши, Всеблагая.

Спаси от зол и скорбей рабы Твоя, Богородице, и мир Божий, превысший всякаго мира земнаго, подаждь рабом, Тя воспевающим.

Родила еси умиротворившаго Горняя и дольняя и сего ради на землю Сошедшаго, от Отца же и Духа Святаго не разлучившагося.

Радуйся, Царице Небесе и земли. Радуйся, превысшая Ангел и Архангел. Радуйся, яко Тобою Иаковом предвозвещенный к нам Примиритель сошел есть.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Священное торжество ныне духовно совершающе, приидите, празднолюбцы, воспоим песньми Богоматерь, прославляюще Сына, даровавшаго толикую благодать Матери Своей.

Призри на пение рабов, Богородительнице, врагов видимых и невидимых смиряя вознесенную гордыню и на смиренныя изливая высокия милости Твоя.

Ты еси корень, от негоже произыде жезл Иессеев, Христос, Человек от дому Давидова и Бог, Отцу и Духу Соприсносущный.

Радуйся, Мати Обрадованная. Радуйся, прекраснейшая всех дщерей человеческих. Радуйся, благородная отрасль Богоизбраннаго рода Давидова.

Кондак, глас 6

Не имамы иныя помощи, не имамы иныя надежды, разве Тебе, Владычице. Ты нам помози, на Тебе надеемся и Тобою хвалимся, Твои бо есмы раби, да не постыдимся.

Икос

Не ввери мя человеческому предстательству, Пресвятая Владычице, но приими моление раба Твоего: скорбь бо обдержит мя, терпети не могу демонскаго стреляния, покрова не имам, ниже где прибегну, окаянный, всегда побеждаемь, и утешения не имам, разве Тебе, Владычице мира. Упование и предстательство верных, не презри моление мое, полезно сотвори.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Презрела еси вся красная мира, Чистая, Единому Богу возжелавши послужити, Емуже воспевала еси: отцев Боже, благословен еси.

Нас, всесовершенно благочестивым отроком не последующих, но прилепляющихся твари паче, неже Творцу, настави, Владычице, единому Богу служити и воспевати: отцев Боже, благословен еси.

Даниил умныма очима предузре Тя, Христе, в камени нерукосечнем, разрушившем суетная царства человеческая, во спасение поющих Тебе со Отцем и Духом: отцев Боже, благословен еси.

Радуйся, Горо, благодатию Божиею приосененная, от неяже отсечеся камень, Богом Отцем положенный во главу угла Церкве Своея, Христос, Емуже поем: отцев Боже, благословен еси.

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Слыши, Отроковице Дево Чистая, глагол, Гавриилом Тебе вещанный: родиши Сына, спасающаго воспевающих: Господа пойте, дела, и превозносите Его во вся веки.

Плотию от Тебе происшедый спасл есть от огня отроков, верою зревших Его. Того моли и нас спасти, пламенем страстей жегомых, Сыну же Твоему воспевающих: Господа пойте, дела, и превозносите Его во вся веки.

В пещи Вавилонстей виден был еси, Христе, яко Ангел светоносный, зраком же Сыну Божию подобный. Тебе со Отцем и Духом поем: Господа пойте дела и превозносите Его во вся веки.

Радуйся, купино, Моисеем виденная, в последняя же лета от корене Давидова происшедшая и Спаса всех неизреченно рождшая, Емуже поем: Господа пойте, дела, и превозносите Его во вся веки.

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Бог, от Тебе воплотивыйся и к нам пришедый, содела чрево Твое Небес пространнейше. Дивное чудо: Невместимый во утробу Девы вмещается, да Сию поем во вся веки.

Неизреченно в последняя лета от Тебе Заченшагося моли, Богородице Дево, вся наша печали на радость преложити и света невечерняго нас сподобити, да Сию поем во вся веки.

Ты еси Престол славы Божия, Иезекиилем тайно узренный, яко Сына Божия, Отцу и Духу Сопрестольна, во Твою Пречистую утробу восприяла еси и Твоима матернима рукама носила еси.

Радуйся, храме одушевленный, в немже Бог плотию обита. Радуйся, кивоте, славою Сына Божия приосененный. Радуйся, Всеблаженная, Богородице Чистая, Приснодево.

Светилен

Посетил ны есть Восток с высоты и дарова нам, яко пресветлую зарю, Тебе, Богородице, в скорбных обстояниих нечаянную радость нам подающую, грешных Ходатаицу.

 

Канон второй Пресвятой Богородице пред иконой «Нечаянная Радость»

Песнь 1

Ирмос: Моисейскую песнь восприимши, возопий, душе: Помощник и Покровитель бысть мне во спасение, Сей мой Бог, и прославлю Его.

Работы вражия избавила еси весь род человечь, Спаса всему миру родивши, Егоже моли от наветов лукаваго и нас спасти.

Буди в напастех наших Ходатаица и Предстательница о нас к Сыну Твоему, Пресвятая Дево, да, тех избывше, прославляем Его со Отцем и Святым Духом.

Ангел и Архангел превысшая и всея твари честнейшая, Ты еси великая Предстательница рода христианскаго.

Песнь 3

Ирмос: Утверди мя, Господи, Боже мой, да не похвалится враг мой о мне: Ты бо еси, Господи, утверждение мое, и прибежище, и сила.

Моления наша услыши, Мати Дево, и вонми воздыханиям нашим, и о нас молитву к Сыну Твоему сотвори.

Яко милосердая, вонми молитвам нашим и даруй нам от злых и лютых обстояний и печалей избавление.

Бурю житейских треволнений наших утоли и злыя страсти наша прожени, Пречистая, да в тишине и безстрастии Тя прославляем.

Людие Божии, приидите, ныне восхвалим Небесную Царицу, с Небесе святаго Своего на ны призирающую и нас к Небесным возводящую.

Песнь 4

Ирмос: Пою Тя, слухом бо, Господи, услышах и ужасохся: до мене бо идеши, мене ища, заблуждшаго. Тем многое Твое снизхождение, еже на мя, прославляю, Многомилостиве.

Аще и недоумеет язык наш восхвалити Тя по достоинству, обаче, любовию к Тебе движимы, от всего сердца и от всего помышления нашего славим и хвалим Тя, всех благих Ходатаицу.

Глубины морския кто изследит? Кто же возможет исчислити и Твоя великия нам милости и щедроты?

Отче, Господи Небесе и земли! коликое благодарение принесем Тебе, зане благую и сильную Ходатаицу роду христианскому даровал еси.

Длани Твоя простерши к Рождшемуся из Тебе, Премилосердая Мати, не престай о нас моляся, да молитвами Твоими Небесных и земных дарований сподобимся.

Песнь 5

Ирмос: Просвещение во тьме лежащих, спасение отчаянных, Христе, Спасе мой, к Тебе утренюю, Царю мира, просвети мя сиянием Твоим, иного бо, разве Тебе, бога не знаю.

Архангел Гавриил, с Небесных слетев кругов, принесе Тебе радость Благовещения, сему неизреченному Божию совету послуживши, дивная в женах, и Сама приносиши радость всем, верно Тя песнословящим.

Радость воистину нечаянную всему дольнему и Горнему миру даровала еси, зане от Тебе происшедый умиротвори и соедини Горняя с дольними, Егоже ныне моли вражды и нестроений нам избавитися.

Яд греховный от древняго праотца во весь род человечь привниде, но от Тебе Рождейся вся очисти, освяти и спасе, Егоже ныне моли греховных страстей и безместных дел нам избавитися.

Щедроты Твоя к нам неисчетны, и благости Слова и Сына Твоего подобятся, и сие вемы и добре вемы, но что воздадим Тебе о них, Премилосердая Мати Дево?

Песнь 6

Ирмос: Во глубине греховней содержимь есмь, Спасе, и в пучине житейстей обуреваемь, но, якоже Иону от зверя, и мене от страстей возведи и спаси мя.

Ада, и смерти, и тления Рождеством Твоим спасла еси род человечь, тем Тя всяко колено Небесных и земных по долгу ублажает, яко Матерь Разрушителя ада и смерти Свободителя.

Грех ради наших не отвратися от нас, Дево Пресвятая, но молитвами Твоими свобождение от ада и вечныя смерти нам исходатайствуй.

О, в колицей лености, коликом нерадении о спасении нашем все житие наше иждиваем! Кая мука, кий пламень предлежит нам! Но, о, Мати, данною Тебе благодатию и нас спаси.

Огнь Божественный, Христа, неопально на руку Своею носила еси, сего ради, ныне предстоящи пред Престолом огнезрачным славы Его, моли, да воспламенит нас к благих деланию.

Кондак, глас 6

Не имамы иныя помощи, не имамы иныя надежды, разве Тебе, Владычице. Ты нам помози, на Тебе надеемся и Тобою хвалимся, Твои бо есмы раби, да не постыдимся.

Икос

Не ввери мя человеческому предстательству, Пресвятая Владычице, но приими моление раба Твоего: скорбь бо обдержит мя, терпети не могу демонскаго стреляния, покрова не имам, ниже где прибегну, окаянный, всегда побеждаемь, и утешения не имам, разве Тебе, Владычице мира. Упование и предстательство верных, не презри моление мое, полезно сотвори.

Песнь 7

Ирмос: Купина в горе огненеопальная и росоносная пещь халдейская яве предписа Тя, Богоневесто: Божественный бо Невещественный в вещественнем чреве Огнь неопально прияла еси. Темже из Тебе Рождшемуся поем: благословен еси, Боже отец наших.

Творец и Зиждитель всех, Бог Слово в последняя лета во утробу Твою вселися, Преславная Богоотроковице, и вся научи воспевати: благословен еси, Боже отец наших.

Скорби, беды, болезни от многаго множества грехов наших, яко воды морския, внидоша до глубины душ наших, но на Твою надеющеся, Богомати, помощь, не отчаяваемся, Сыну Твоему взываем: благословен еси, Боже отец наших.

Кто возглаголет силу Твою на Небеси, юже дарова Ти от Тебе Происшедый? Кто и на земли слышаны сотворит вся хвалы Твоему великому покрову и заступлению земнородных, воспевающих: благословен еси, Боже отец наших.

Отроковице Чистая, Неискусобрачная! очисти наш ум от помыслов суетных и сердце наше от похотей лукавых, да чистыми душами и нескверными устнами Сыну Твоему воспеваем: благословен еси, Боже отец наших.

Песнь 8

Ирмос: Велению мучителеву преподобнии трие отроцы не повинувшеся, в пещь ввержени, Бога исповедаху, поюще: благословите, дела Господня, Господа.

Руно орошенное, Гедеоном виденное, тайно прообрази Тя, Деву Матерь, осенением Духа Святаго Бога Слова неискусомужно родившую, Емуже поем: благословите, дела Господня, Господа.

Безумная ярость мучителя вверже благочестивыя отроки в пещь, огнем разжженную, но Сын Твой росою таинственною силу огня угаси. Сего умоли, Пресвятая, и нас огня вечнаго избавити и росоноснаго Царства славы не лишены сотворити, да тамо поем: благословите, дела Господня, Господа.

Егоже неизреченней тайне воплощения послужила еси, Егоже всею матернею любовию возлюбила еси, о Немже, на Кресте висящем, матерски рыдала еси, Сего моли и самых отверженных грешников не отринути, да и тии поют: благословите, дела Господня, Господа.

Славим и воспеваем Тя по долгу, Премилосердая Мати, Ты бо великая Заступница рода христианскаго и наша Преблагая и Скорая Помощница.

Песнь 9

Ирмос: Невместимаго Бога во чреве вместившая и Радость всему миру родившая, Тя поем, Богородице Дево.

Пастыря Добраго, взыскавшаго овцу заблуждшую, миру даровала еси, с Нимже ныне соцарствующи, приведи к Нему и вся заблуждшая овчата.

Агнца, вземлющаго грехи всего мира, яви Тобою Отец, превосходяй всяк ум любовию к падшим во Адаме, пред Ним не престай моляся Кровию Сына Его нам освятитися и очиститися.

Со Отцем спрославляемый, с Духом сославимый, Сыне Божий, молитвами Рождшия Тя не остави нас, погибающих.

Иже от Тебе воплотивыйся и вочеловечивыйся постави Тя превыше всякаго ангельскаго чиноначалия, идеже предстоя, возведи и нас к Небесным высотам, греха всякаго изымающи.

Светилен

Посетил ны есть Восток с высоты и дарова нам, яко пресветлую зарю, Тебе, Богородице, в скорбных обстояниих нечаянную радость нам подающую, грешных Ходатаицу.

 

Канон Пресвятой Богородице пред иконой «Одигитрия»

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Радостно, Чистая, ныне наставшее хваление приношаю, радуяся, и тихим гласом, Одигитрие, вопию Ти: радуйся и исполни мя разума, пети начинающа.

Христа родившая, радость нам вечную, о, радуйся, Всепетая, православным надежда, Одигитрие, всепетая Девице, радости исполни мя мирови желанныя.

Ликуют вси человецы и Ангели всегда, согласно вопиюще на Небеси и на земли, Одигитрие: радуйся, Девице, радости бо Рождеством Твоим всяческая исполнила еси.

Радуйся, Одигитрие, со страхом Ти вопиющих радости сподоби, Мати сущия радости, избавляющи скорбей всяческих, и всех помилуй, к Тебе прибегающих.

Песнь 3

Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.

Христа, Вышняго Царя, о, радуйся, непоколебимая чистая и одушевленная палато! Радуйся, Одигитрие, радуйся: Тобою нерушим наш град сохраняется.

Вместити Егоже не возможе тварь, во утробу неискусобрачную, Одигитрие Девице, телесно вместила еси, темже Ти, радуйся, поем, по долгу величающе.

Радость многопетая мирови, радостно Ти поюще присно, вечнующия, Чистая, радости сподобляемся Твоими Матерними молитвами к Рождшемуся из Тебе, Одигитрие.

Златую Тя стамну, и свещник, и жезл, и трапезу, Чистая, призываем, Одигитрие, и глас, еже радуйся, Тебе присно привношаем с сими же имены.

Седален

Моление теплое и стена необоримая, милости источниче, мирови прибежище, прилежно вопием Ти: Богородице Владычице, предвари и от бед избави нас, Едина вскоре предстательствующая.

Песнь 4

Ирмос: Седяй в Славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Радуйся, чудо чудесем, Одигитрие Владычице. Радуйся, всем радосте градовом, и весем непобедимое христианское в бедах хранилище, и предградие, и на враги побеждение.

Радуйся, радуйся, людем православным похвало, и христолюбивым воинством покров пребываеши всем, Царице. Радуйся, Одигитрие, прибежище всем нам и утверждение.

Радуйся, всем скорое в бедах избавление. Радуйся, готовое всем скорбящим утешение. Радуйся, Всепетая, радуйся, Одигитрие всеблагословенная, всем немощным Целительнице.

Радуйся, Еяже величия вся тварь славити убо спешит по достоянию, но не возмогает, Одигитрие, и сего ради зовет Ти: радуйся, Владычице, Боговместимое жилище.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Благостыни бездно и щедротам еси, радуйся, Одигитрие Девице, радуйся, всем радость творящи верным. О, радуйся, сущим в бедах и скорбящим пребыстрая Заступнице.

Радуйся, от исполнения величия чудес Твоих зряще, исполняемся, вси незрящии, слышаще же, вернии. Темже, радуйся, Тебе присно всюду и вси, Одигитрие, поем.

Христа Бога нашего, о, радуйся, Одигитрие, жилище и дом неизреченныя и Пребожественныя, Дево, славы Его. О, радуйся, палато преукрашенная, радуйся, граде одушевленный, присно царствующий!

Радость неоскудную Тя разсмотряюще, яко море, Отроковице, Одигитрие Девице, радующеся вси, радуйся, вопием Ти; и поюще, Божественных даров невидимо присно от Тебе ожидающе.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Христа, Чистая, приемлющи, глас, еже радуйся, Одигитрие Девице, слышаше, Егоже неизреченно рождши, радуйся, от всех слышиши всегда.

Радости вся исполнила еси, вышния и нижния Ты совокупила еси, Одигитрие, темже радостно и согласно ныне небо и вся земля зовет Ти.

Вдовам, о, радуйся, Всепетая, и всем сирым, Одигитрие, утешение; радуйся, всем источающи нищим богатство неистощимое.

Злата всякаго блистаема и утра солнечнаго светлейши, жилище Христово, радуйся, Одигитрие, радуйся, Девице, радуйся, Невесто Неневестная.

Кондак, глас 6

Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.

Икос

Простри длани Твоя, имиже всех Владыку яко Младенца прияла еси, за множество благости; не остави нас, всегда надеющихся на Тя, бодренною Твоею молитвою и неисчетною простынею ущедри нас и подаждь душам нашим милосердие Твое, во веки источающи: Тебе бо имамы, грешнии, Заступницу от находящих на ны бед и зол. Но, яко имущи милосердия щедроты, ускори на молитву и потщися на умоление, предстательствующи присно, Богородице, чтущих Тя.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Радуйся, радуйся, Богородице Одигитрие, всех и всегда наставляющи верных шествовати ко всякому пути спасительному; радуйся, Владычице, Тобою бо присно избавляемся настоящия варварския беды.

Радуйся, радуйся, Одигитрие, бдящи и молящися о нас к Богу, и всякия злобы ходатайством Твоим, всяческих скорбей, Богородительнице, всех людей избавляющи.

Радуйся, радуйся, Пресвятая Одигитрие, Яже прошения наша к пользе нам исполняющи и хотящи всем присно всегда любодружное благое единство, спешное же во изящных.

Радуйся, радуйся, кораблем, Одигитрие, нуждно плавающим, избавляющи верных и всем избавление от всякия скорби и недуги пестротныя и медленныя разрешающи вскоре.

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Радуйся, Всеблагословенная Марие, из Тебе бо Всеблагословенный Бог одеяся во всего мя, человека, и, одеявся, соедини Своему Божеству неизреченным соединением, Дево Одигитрие, радуйся, Обрадованная, радосте всего мира.

Радуйся, лукавых духов Прогонительнице; радуйся, Богородице Одигитрие. Радуйся, яко Тебе Небесная невидимая воинства славословят всегда и величают яко Матерь Божию бывшую; радуйся, Яже нижняя сочтавши с Вышними.

Радуйся, всех Небесных сил без разсуждения превосходящая; радуйся, Одигитрие. Радуйся, всякия твари Бога рождшая, господствующи ей, Владычице Всепетая; радуйся, яко пребываеши Девою, Чистая, и по рождестве.

Радуйся, женам всем славо, храме преосвященный Бога нашего; радуйся, Одигитрие, радуйся, душеспасительная всей вселенней; радуйся, покрывающий облаче, небес ширшая; радуйся, мироположнице, Божественнаго мира полна.

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Радуйся, свеще, Свет невечерний понесшая, и в рождестве Твоем многобожия тьму разрушившая, и адовы пропасти избавльшая люди. Радуйся, Одигитрие Богородице, доброт всех Предходатаице.

Радуйся, земле, из неяже клас прозябший Небесный верным, и мира всего душегубнаго глада избави, разумная и одушевленная. О, радуйся, винограде, иже грозд животный рождшая, Богородице Чистая Одигитрие!

Радуйся, тайных цветов прекрасный сущий раю; радуйся, Мати Дево, невидимых разум чистотою страннолепно побеждши, Богородительнице. Радуйся, Отроковице, радуйся, Одигитрие, всемирное чудо и слышание.

Лето живота нашего прочее сохрани невреждено поможением Твоим, Дево Отроковице, и сподоби конец благий получити нам, воспевающим Тя и взывающим: радуйся, Всеблаженная Богородице, Чистая Одигитрие.

Светилен

Да почтится Всепетая Мати Божия, жизнь сущую рождшая, Христа Бога нашего, райских дверей отверзение, всего мира очищение, к животу возведение. Сей есть пророки глаголанный, Тому поклонимся, Богу и Спасу душ наших.

 

Канон Пресвятой Богородице пред иконой «Отрадо» или «Утешение»

Пе́снь 1

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Бо́жиею благода́тию озари́ мя́, Богоблагода́тная, благогове́йно пе́ти пред свято́ю ико́ною Твое́ю Тебе́, необори́му Засту́пницу и держа́ву неразруши́му ста́да Твоего́.

Тя́, Всенепоро́чная, и́мамы предста́тельство, Отра́ду же и Утеше́ние. Сего́ ра́ди, сла́вяще бла́гость Твою́, мо́лимтися: поми́луй на́с.

Храни́тельница су́щи Горы́, наше́дшим разбо́йником на оби́тель Ватопе́дскую не предала́ еси́, Госпоже́, рабо́в Твои́х в ру́ки вра́жия.

Кто́ подо́бен Тебе́, Де́во, сла́вно творя́щая чудеса́? Наста́вив бо и́ноки пра́вдою Сы́на Твоего́, е́же боя́тися Его́, изба́вила и уте́шила еси́ и́х кре́постию Твое́ю.

Сла́ва: Врачевско́ е́сть е́же ре́зати и жещи́, здра́вия вино́вное, но Ты́ на́с, Сы́не Бо́жий, мя́гкими лечба́ми щедро́т Твои́х уврачу́й, Ма́тере Твоея́ мольба́ми.

И ны́не: Услы́ши, Блага́я, мольбы́ христоимени́тых люде́й, при́зри на озлобле́ние утесня́емых, ви́ждь сле́зы су́щих в ско́рбех и умилосе́рдитися потщи́ся на рабы́ Твоя́.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Под кро́в Тво́й притека́ем, лю́дие Твои́, Засту́пница бу́ди на́м, Влады́чице, подаю́щи отра́ду и утеше́ние пою́щим Тя́.

Возвесели́шася ватопе́дцы о спасе́нии Твое́м, Де́во, немощству́ющих бо препоя́сала еси́ си́лою на прогна́ние разбо́йников.

Не преста́й, Всеми́лостивая Госпоже́, спаса́ти рабы́ Твоя́ от неча́емых напа́стей, да благода́рственно сла́вим Тя́.

Моли́, Богороди́тельнице, е́же изба́витися на́м вся́каго гне́ва и преще́ния Бо́жия, Тебе́ почита́ющим.

Сла́ва: Хода́таица благоприя́тная и си́льная к Бо́гу, прегреше́ний оставле́ние испроси́ на́м у Него́, Богоневе́сто.

И ны́не: Смертоно́сных неду́гов душе́вных и теле́сных изми́ ны́, Влады́чице, ве́чнующую Жи́знь ми́ру ро́ждшая.

Седа́лен.

Ви́димыми и неви́димыми враги́ окружа́емии, к Тебе́, Де́во, прибега́юще, зове́м: не удали́ по́мощь Твою́ от на́с, я́коже от и́ноков ватопе́дских не удали́ла еси́, но держа́вною си́лою Твое́ю побори́ борю́щыя ны́, ми́рное и Богоуго́дное житие́ на́м устроя́ющи.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Убоя́ся се́рдце игу́мена в моли́тве усте́н его́ от гла́са Твоего́, Богома́ти, и преще́ния Сы́на Твоего́, и смяте́ся кре́пость его́ возвеще́ну бы́вшу нападе́нию от разбо́йников.

Внегда́ смути́тися Ватопе́ду во гне́ве Твое́м, Го́споди, ми́лость Твою́ помяну́л еси́ предста́тельством Присноде́вы, от Нея́же яви́лся еси́ на спасе́ние люде́й Твои́х.

Не преда́ждь в ру́ки враго́в насле́дие Твое́, Чи́стая, да не когда́ реку́т: где́ е́сть Богороди́тельница, на Ню́же упова́ша? но не вре́дно и ненаве́тно соблюди́ ста́до Твое́.

Сла́ва: Свято́му о́бразу Твоему́ припа́дающе, мо́лим Тя́: разори́ сове́ты хотя́щих на́м зла́я и живо́т на́ш напра́ви твори́ти в ми́ре Боже́ственную во́лю Сы́на Твоего́.

И ны́не: Во искуше́ниих бу́ди на́м, Влады́чице, спаси́тельное прибе́жище, в боле́знех врачева́ние, во обурева́нии ти́хое приста́нище и в ско́рбех Отра́да и Утеше́ние.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́, окая́ннаго, но обрати́ мя́ и к све́ту за́поведей Твои́х пути́ моя́ напра́ви, молю́ся.

Сте́ну тве́рду и сто́лп непоколеби́м Тя́ и́мать Гора́ в наше́ствиях ва́рварских: студа́ бо исполня́еши вра́жия ли́ца и возвраща́тися твори́ши и́м вспя́ть тще́тным и безде́льным, Влады́чице.

Ма́тернее промышле́ние о су́щих в Горе́ иму́щей Ти́, стра́ха ра́ди Сы́на Твоего́, Де́во, поболе́ Ватопе́д, уве́дев о разбо́йницех, и роди́ ду́х спасе́ния предста́тельством Твои́м, Преблагослове́нная.

Я́ко же настоя́теля Ватопе́дскаго, по у́трени бде́вша и моли́вшася, наста́вила еси́, Блага́я, ка́ко спасти́ся от напа́сти, та́ко и на́м пода́ждь тща́ние от но́щи у́треневати к Бо́гу и ко спасе́нию наста́ви ны́, избавля́ющи от все́х бе́д.

Я́коже запрети́ла еси́, Госпоже́, отверза́ти врата́ гото́вой су́щей поги́бели от враго́в, та́ко положи́ в на́с благода́тную две́рь огражде́ния, да не обря́щется вхо́да всезло́бным губи́телем и и́х пле́велом.

Сла́ва: Я́ко же повеле́ла еси́, Влады́чице, возше́дше на сте́ны, разгна́ти разбо́йники, та́ко укрепи́ бы́ти на́м на четверосте́нии му́жества и пра́вды, му́дрости и целому́дрия, да отража́ем борю́щыя ны́.

И ны́не: Я́ко же уми́лостивила еси́, Де́во, Сы́на Твоего́, прогне́вавшася на су́щия в Ватопе́де, та́ко умилостивля́й Его́ о на́с, во мно́гия грехи́ впа́дающих, мно́го бо мо́жет моле́ние ма́тернее ко благосе́рдию Влады́ки.

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Возвеща́юще Ти́ печа́ли на́ша, мо́лимтися, Ма́ти Бо́жия: обвесели́ благода́тию Твое́ю скорбя́щих сердца́, все́х Ра́досте, и от тли́ возведи́ ны́.

Не стяжа́хом на земли́ ино́го утеше́ния и кре́пкаго заступле́ния, ра́зве Тебе́, Всеблага́я, покры́й у́бо от вся́каго зла́ любо́вию воспева́ющих Тя́.

Благосты́ню и ми́лость прие́млем от Сы́на Твоего́, Де́во, моли́твами Твои́ми: от молвы́ бо храни́ши ны́, смуще́ния, лови́твы и вся́каго кова́рства вра́жия, Всепе́тая.

Сла́ва: Ми́ру Спаси́тельнице, необори́мою си́лою Твое́ю не преста́й соблюда́ти ста́до Твое́, зову́щее: Отра́да и Утеше́ние на́ше Ты́ еси́, Благослове́нная.

И ны́не: Все́х благи́х вина́, сме́ртных оживле́ние, поги́бших взыска́ние, изба́ви, Госпоже́, рабы́ Твоя́ от напра́сныя сме́рти и от тли́ грехо́вныя возведи́ ны́.

Конда́к, гла́с 8-й.

Взбра́нной Воево́де победи́тельная, я́ко изба́вльшеся от злы́х, благода́рственная воспису́ем Ти́, раби́ Твои́, Богоро́дице, но я́ко иму́щая держа́ву непобеди́мую, от вся́ких на́с бе́д свободи́, да зове́м Ти́: Ра́дуйся, Неве́сто Неневе́стная.

И́кос.

А́нгели Тя́, Ма́терь Бо́га на́шего, пе́сньми славосло́вят, и мы́ земни́и воспева́ем ра́достно Тебе́ вопию́ще: ра́дуйся, Светода́вца селе́ние, Е́юже лучи́ спасе́ния ми́рови возсия́ша; ра́дуйся Обра́дованная, Е́юже исполня́емся Боже́ственнаго весе́лия. Ра́дуйся, две́ре Восто́ка, от вра́т смертоно́сных греха́ на́с отводя́щая; ра́дуйся, свети́льниче пресве́тлый, просвеща́яй омраче́нных. Ра́дуйся, бе́здно Бо́жия к на́м человеколю́бия; ра́дуйся, цены́ вся́кия превы́сший да́р, на́м от Бо́га дарова́нный. Ра́дуйся, я́ко и́маши ве́лие к Нему́ дерзнове́ние; ра́дуйся, стра́же Афо́на и та́мо обита́ющих Храни́тельнице. Ра́дуйся, всекре́пкая стено́, Е́юже сохраня́емся необори́мы враги́ христиа́нскими; ра́дуйся, я́зво неви́димых враго́в и от ни́х уязвля́емых врачева́ние. Ра́дуйся, безси́льных си́ло и по́моще безпомо́щных; ра́дуйся, Отра́до и Утеше́ние скорбя́щих. Ра́дуйся, Неве́сто Неневе́стная.

Пе́снь 7.

Ирмо́с: От Иуде́и доше́дше, о́троцы в Вавило́не иногда́ ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Вопло́щся от утро́бы Твоея́ Госпо́дь, госпо́дствуяй тва́рию, и Тебе́, Де́во, Госпожу́ показа́ ви́димым же все́м и неви́димым, я́ко Ма́терь Свою́ прославля́я Тя́.

Согреши́хом, Го́споди, но не отступи́хом от Тебе́ и ино́го не ве́мы, ра́зве Тебе́, не преда́ждь на́с до конца́ Ма́тере Твоея́ мольба́ми, отце́в Бо́же благослове́нный.

Гора́ Бо́жия осене́нная, Всечи́стая, покры́й су́щия в Горе́ се́нию Твои́х моли́тв и от се́ти ловя́щих изба́ви пою́щия: оте́ц на́ших Бо́же, благослове́н еси́.

Сла́ва: Непобеди́мая еси́ кре́пость, Госпоже́, и несокруши́мое огражде́ние с ве́рою призыва́ющих Тя́: разруша́еши бо сове́ты вооружа́ющихся на сла́вящия Тебе́.

И ны́не: Уныва́ющим Отра́до, печа́льным Утеше́ние, заблужда́ющим Наста́внице, соблюди́ на́с, Де́во, от вся́каго зла́, чту́щих святы́й о́браз Тво́й.

Пе́снь 8.

Ирмо́с: Царя́ Небе́снаго, Его́же пою́т во́и А́нгельстии, хвали́те и превозноси́те во вся́ ве́ки.

Преблагослове́нная Ма́ти Всеще́драго Бо́га, уще́дри ны́, недосто́йныя, дара́ми милосе́рдия Твоего́, да превозно́сим Тя́ во ве́ки.

Кре́пость и держа́ва бу́ди рабо́м Твои́м, Всецари́це, си́ла, ору́жие и ме́ч, враги́ спасе́ния секу́щий, да сла́вим Тя́ во ве́ки.

Сия́ющая па́че А́нгел святы́нею, храни́ на́с, Всенепоро́чная, от грехо́вных дея́ний, глаго́ланий и помышле́ний, да благословля́ем Тя́ во ве́ки.

Освяти́, Всесвята́я, благогове́йно лобыза́ющих святу́ю ико́ну Твою́ и Твои́м ма́терним дерзнове́нием ми́лостива на́м твори́ Сы́на Твоего́, да пое́м Его́ во ве́ки.

Сла́ва: Отра́до и Утеше́ние моля́щихся Тебе́, вре́менных и ве́чных лю́тых изба́ви ны́, да хва́лим Тя́ и Сы́на Твоего́ превозно́сим во вся́ ве́ки.

И ны́не: Пу́ть и Живо́т, Де́во, ро́ждшая, стопы́ на́ша напра́ви по словеси́ Бо́жию, да, живо́т ве́чный насле́довавше, пое́м Тя́, Сы́на Твоего́ превознося́ще во вся́ ве́ки.

Пе́снь 9.

Ирмо́с: Проявле́нное на горе́ законополо́жнику во огни́ и купине́ Рождество́ Присноде́вы в на́ше, ве́рных, спасе́ние пе́сньми немо́лчными велича́ем.

Весели́ся, Ватопе́де, неусы́пная бо Афо́на Назира́тельница я́же на Тя́ кова́рство вра́жие ма́нием Свои́м разруши́ и изгна́ны сотвори́ разруше́ние Тебе́ угото́вавшия.

О, вели́каго дерзнове́ния Твоего́, Де́во, к Бо́гу и благоутро́бия к рабо́м Твои́м! Возвеща́ющи бо о вразе́х, уклони́ла еси́ лице́ Свое́ от руки́ Сы́на Твоего́, я́коже до ны́не зри́шися на ико́не Твое́й.

Пото́к све́тлости, отра́ды и утеше́ния неистощи́мый Ты́ еси́, Богора́дованная Ма́ти Све́та, тьму́ у́бо страсте́й прожени́ от на́с, обстоя́щих све́тлое подо́бие лица́ Твоего́, и несвети́маго огня́ изба́ви.

Спасе́ние бу́ди при́сное, Госпоже́, от вра́г на́ших и из руки́ все́х, ненави́дящих на́с, и напра́ви но́ги на́ша на пу́ть ми́рен милосе́рдия ра́ди ми́лости Сы́на Твоего́ и Бо́га на́шего, Преблагослове́нная.

Сла́ва: Влады́чествующая все́ми я́ко Всецаря́ Ма́терь, стране́ на́шей пода́ждь благоде́нствие, ми́р, спасе́ние и на сопоста́ты побе́ды и одоле́ние.

И ны́не: Моле́бное пе́ние от души́ принесо́х со стра́хом Тебе́, Де́во, ро́ждшей Христа́ Бо́га, Его́же моля́щи, благоприя́тна сотвори́ моле́ния на́ша, да Тя́ пе́сньми немо́лчными велича́ем.

Тропа́рь, гла́с 4-й.

К Богоро́дице приле́жно ны́не притеце́м, гре́шнии и смире́ннии, и припаде́м, в покая́нии зову́ще из глубины́ души́: Влады́чице, помози́, на ны́ милосе́рдовавши, потщи́ся, погиба́ем от мно́жества прегреше́ний. Не отврати́ Твоя́ рабы́ тщи́, Тя́ бо и еди́ну наде́жду и́мамы.

 

Канон Пресвятой Богородице пред иконой «Почаевская»

Пе́снь 1

Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Бо́жию Ма́терь воспои́м, ве́рнии, моле́ния к Не́й принося́ще и чудотво́рному Ея́ о́бразу покланя́ющеся ве́рою и любо́вию.

О, Влады́чице, убо́гия хвалы́ на́шея не отве́ржи и грехо́вныя нищеты́ не возгнуша́йся, но припа́дающия лю́ди приими́, я́ко Блага́я, Блага́го же Роди́тельница.

Гора́ Поча́евская, пре́жде те́мная и безве́стная, явле́нием Твои́м, Влады́чице, Сина́ю уподо́бися: та́мо бо о́гнь, купину́ не опаля́яй, Тебе́ прообразова́ше, зде́ же Сама́, во огни́ зри́мая, христиа́ном яви́лася еси́.

О́чи ва́ши блаже́ни, о, па́стырие о́вчии, Влады́чицу на горе́ Поча́евстей узре́вшии и те́м ча́сти вифлее́мских па́стырей сподо́бльшиися. Те́мже у́бо блаже́ни су́ть христиа́не, сего́ не ви́девшии, но ве́рою ме́сту тому́ покланя́ющиися.

Ро́ди росси́йстии и от вся́каго язы́ка ве́рнии, соше́дшеся к ме́сту явле́ния Влады́чицы, чудотво́рному Ея́ о́бразу поклони́мся и о свои́х согреше́ниих воспла́чем, о милосе́рдии же Госпо́дни возра́дуемся.

О́гненный сто́лп, Влады́чице, Тебе́ и́ноком и па́стырем явля́ше, на́м же о́гнь ре́вности вложи́ в ду́шу, е́же ве́ру и́стинную храни́ти, от вся́каго же глаго́ла ерети́ческаго отвраща́тися и грехо́вную отрева́ти пре́лесть от серде́ц на́ших.

Пе́снь 3

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Да́р свяще́нный, страннопри́имства мзду́, прия́т христолюби́вая А́нна ико́ну Твою́, Влады́чице, руко́ю святи́теля, от нея́же исцеле́ние бра́ту своему́ сле́пу рожде́ну ви́девши, сию́ во оби́тель Поча́евскую на о́бщую по́льзу да́рствует.

Ико́ну Поча́евскую Пречи́стыя Богоро́дицы лобыза́им, ве́рнии, и, покая́ние о гресе́х на́ших прине́сше, здра́вия, и от ну́жд избавле́ния, и во все́х благи́х начина́ниих по́мощи от Влады́чицы воспро́сим.

Цве́т прекра́сный на дре́ве благосенноли́ственнем яви́ся чудотво́рная ико́на Богоро́дицы на святе́й горе́ Поча́евстей: проси́те, ве́рнии, и да́стся ва́м, по глаго́лу Христо́ву, милосе́рдия да́р, житию́ ва́шему потре́бный.

Е́же вре́менному житию́ потре́бно быва́ет, о, бра́тие, вма́ле поле́зно е́сть, и сия́ да́рствует на́м Госпо́дь, по моли́тве Ма́тере Своея́. Оба́че терпя́щия па́че си́х блажи́т и ве́чною ра́достию на Небеси́ награжда́ет, ю́же на́м дарова́ти, Влады́чице, помоли́ся.

Поча́евская це́рковь, чудотво́рный сле́д стопы́ Твоея́, Богоро́дице, покрыва́ющая и ико́ну Твою́ храня́щая, а́ки Небе́сный вхо́д ве́рным явля́ется, в не́йже моля́щимся помози́, о, Влады́чице, земна́я попече́ния отложи́ти, и еди́наго, е́же на потре́бу, жела́ти, и в моли́тве те́пле проси́ти.

О́ле безу́мия иконобо́рцев, и́же ико́ну Твою́, Влады́чице, от Поча́евския оби́тели плени́ша и, поруга́нию предаю́ще, ка́ру Бо́жию а́бие на ся́ наведо́ша, беснова́нием же обличе́нней бы́вшей жене́, у́жасом мно́гим содержа́хуся.

Седа́лен

Река́, оби́льно теку́щая, поко́ю не навы́че, ниже́ преста́ти от тече́ния во́днаго возмо́жет, та́ко и моле́ния Твоя́, Влады́чице, о лю́дех при́сно возноси́мая, не престаю́т, но пра́ведныя от паде́ний храня́т, па́дшия же на покая́ние возставля́ют. На́м же, Твоему́ о́бразу покланя́ющимся, сугу́бую умиле́ния благода́ть да́руют и вопи́ти Тебе́ со Арха́нгелом и Елисаве́тою воздвиза́ют: благослове́на Ты́ еси́ в жена́х, и Твоего́ чре́ва Пло́д благослове́н е́сть.

Пе́снь 4

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Часу́ и дни́ прише́дшу возвраще́ния ико́ны Твоея́ во оби́тель Поча́евскую от иконобо́рцев, сию́ плени́вших, возра́довася преподо́бный И́ов со бра́тиею, ту́ю лобыза́юще; ны́не же на вся́к де́нь и ча́с приходя́щии во оби́тель Твою́ христиа́не ту́юже ра́дость и ве́ру пред не́ю свиде́тельствуют.

А́з, гре́шный, ле́ностию порабоще́н, о, Влады́чице, блага́го Бо́га при́сно грехи́ свои́ми прогневля́ю, ниже́ о́чи свои́ возвести́ к Нему́ дерза́ю, но ко Твоему́ припа́даю чудотво́рному о́бразу, пред ни́мже ка́ющиися проще́ние от Тебе́ прия́ша, и вопию́: Го́спода, Сы́на Твоего́, уми́лостиви и мне́ предста́тельством Твои́м.

Еда́ обря́щется толи́ко окамене́нный се́рдцем и безу́мен му́ж, и́же не умили́тся, в це́ркви Поча́евстей предстоя́й и святы́ням Твои́м, Влады́чице, покланя́яйся, чудеса́ же, от ни́х бы́вшая, помышля́яй и ве́рою моля́щияся ви́дяй наро́ды?

Ви́дени бы́ша мно́зи, исцеле́ннии пред ико́ною Твое́ю, Влады́чице, слепи́и и хро́мии, слы́шани бы́ша глуси́и и неми́и, возглаго́лавшии: та́мо бе́сныя, во́ды от стопы́ Твоея́ пию́ще, от бесо́в свобожда́хуся. Те́мже и мою́ приими́ моли́тву, е́же от бесо́вских страсте́й свободи́тися и све́т спасе́ния Христо́ва вы́ну созерца́ти.

Сы́й во узи́лищи земли́ ту́ркския плене́н, и́нок Твое́ю си́лою, Влады́чице, на возду́се в го́ру Поча́евскую принесе́ся, у́бо и мене́, во у́зах страсте́й су́ща, ны́не, в де́нь сла́вы Твоея́, от те́х свободи́ и ли́ку ве́рою и любо́вию пою́щих Тя́ сопричти́.

Ко Твоему́ чудотво́рному о́бразу прите́к, Влады́чице, и водо́ю от сле́да стопы́ Твоея́ омы́вся, сля́ченный неду́гом ю́ноша а́бие исцеле́, слепа́я же отрокови́ца, зде́ принесе́нная, прозре́, и предуме́рый младе́нец воскре́се, у́бо и мене́, припа́дающа, от смертоно́снаго уны́ния воздви́гни и душе́вныя мои́ отве́рзи о́чи.

Пе́снь 5

Ирмо́с: У́тренююще, вопие́м Ти́: Го́споди, спаси́ ны́, Ты́ бо еси́ Бо́г на́ш, ра́зве Тебе́, ино́го не ве́мы.

А́ще и все́х грешне́йший е́смь от те́м люде́й, ко Твое́й, Влады́чице, ико́не припа́дающих, а́ще и вси́ ве́рою свое́ю мя́ превзыдо́ша, оба́че и мене́, окая́ннаго, не отри́ни от Твоего́ заступле́ния, ми́лостей бе́здну лю́дем во оби́тели Твое́й яви́вшая.

Я́коже ко все́м призыва́ющим Тя́ ми́лостива явля́ешися, издале́ча ико́не Твое́й мы́сленно покланя́ющияся слы́шиши, и та́ко о́трочища не́коего, по моли́тве пра́бабы его́, воскреси́ла еси́, и ны́не, о, Влады́чице, ко все́м, от конца́ земли́ Тебе́ моля́щимся, благоуве́тлива бу́ди.

Се́, Влады́чице, люде́й мно́гая мно́жества, на святу́ю го́ру Твою́ притека́юще, ми́лости Твоея́ получи́ти и́щут, ве́рнии вку́пе с малове́рными, пра́веднии и гре́шнии, с ни́миже и Це́ркви Святе́й чужди́и примета́ются, все́х у́бо поми́луй, все́м све́т и́стинный ве́ры яви́ во спасе́ние.

Почто́ а́з, гре́шный, Пречи́стей Богома́тери покланя́яся и испра́вити житие́ свое́ обещава́я, па́ки на пре́жняя прегреше́ния обраща́юся? Увы́ мне́! Еда́ зле́йший е́смь неве́рных ага́рян, и́же на горе́ Поча́евстей покая́ние прине́сше, до́брии христиа́не соде́яшася?

А́ще и лю́ти бы́ша ага́ряне ту́ркстии, святу́ю оби́тель Твою́, Влады́чице, осажда́юще, а́ще и стре́лы в Тя́, на Небеси́ я́вльшуюся, пуща́ти дерзну́ша, но си́м на главы́ и́х возвраща́ющимся, се́рдцем сокруше́нным пока́яшася и си́лу Твою́ испове́даша.

Со И́овом преподо́бным на Небесе́х Тебе́ зря́ще, Влады́чице, ага́ряном смяте́нным и бежа́щим, и́ноцы Поча́евстии пе́снь воспе́ша Ти́ досто́йную, со уго́дником Тебе́ благодаря́ще те́пле.

Пе́снь 6

Ирмо́с: Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш.

И́же от ага́рян Тя́, Влады́чице, на Небесе́х узре́ша, дру́г дру́га вопроша́ху: что́ е́сть виде́ние сие́ ужа́сное? И о́ви, смяте́ни бы́вше, дру́г дру́га убива́ху, о́ви же, ве́ру в се́рдце свое́ прие́мше, Креще́ния тре́боваху, по си́х же и́ноцы бы́ша чрез все́ житие́, си́лу Твою́ воспева́юще.

И́ноки и мирски́я лю́ди, Твоему́ заступле́нию ве́рующия, Влады́чице, обогати́ духо́вными дарова́ньми, малове́рныя же просвети́ и озари́, я́коже тогда́ неве́девшия Христа́ ага́ряны в позна́ние Его́ привела́ еси́.

Сохрани́ша па́мять Твоего́ заступле́ния, Влады́чице, ага́ряне, в зе́млю ту́ркскую возвра́щшеся, и ча́дом свои́м о явле́нии Твое́м па́мять преда́ша. Кольми́ па́че на́м, христиа́ном, чудеса́ Твоя́, на горе́ Поча́евстей бы́вшая, па́мятовати подоба́ет?

О́бразу Твоему́ мы́сленно припа́дая, во глубо́кий кла́дязь впады́й му́ж от несумне́нныя сме́рти спасе́ся и, невреди́м из глубины́ подъя́т бы́в, Твое́ пропове́даше милосе́рдие.

Хоте́л бы́х и а́з, Влады́чице, ве́ре спасе́нных Тобо́ю люде́й подража́ти, хоте́л бы́х и а́з Твое́ заступле́ние в житии́ мое́м улучи́ти, но за мно́жество прегреше́ний мои́х оскудева́ет моя́ ве́ра. Сию́ у́бо укрепи́ во мне́, Влады́чице, вопию́щем: ве́рую, помози́ моему́ неве́рию.

Ро́в прельще́ний лати́нских чрез сто́ и де́вять ле́т поглоти́ оби́тель Поча́евскую, но Твои́м, Богоро́дице, заступле́нием па́ки та́я к высоте́ Правосла́вия изъе́млется и ла́вра имену́ется. Сию́ у́бо в Правосла́вней ве́ре непоколеби́му соблюди́ да́же до часа́ втора́го прише́ствия Сы́на Твоего́ и Бо́га.

Конда́к, гла́с 1

Исто́чник исцеле́ний и ве́ры Правосла́вныя утвержде́ние Поча́евская Твоя́ ико́на, Богоро́дице, яви́ся, те́мже и на́с, к не́й притека́ющих, от бе́д и искуше́ний свободи́, ла́вру Твою́ невреди́му сохрани́, Правосла́вие во о́крест стоя́щих страна́х утверди́ и грехи́ разреши́ моли́твенник Твои́х: ели́ка бо хо́щеши, мо́жеши.

И́кос

Воста́ните от гро́б ва́ших, и́ноцы поча́евстии, и рцы́те на́м: коли́ких чуде́с Пресвяты́я Богоро́дицы бы́сте зри́тели и свиде́тели, ка́ко ме́ртвии пред Тоя́ ико́ною воскреса́ху, ка́ко де́мони от му́чимых люде́й отбега́ху, ка́ко неду́жнии та́мо исцеля́хуся, ка́ко неве́рнии ве́роваху, ка́ко хули́тели та́мо ка́яхуся? Сия́ бо ди́вная быва́ху челове́ком и А́нгелом. Мы́ же, вся́ сия́ бы́вшая и додне́сь быва́емая воспомина́юще, со стра́хом и умиле́нием ко святе́й ико́не Пречи́стыя Богома́тере моли́твенно припа́даем и глаго́лем си́це: о, ми́лостей бе́здно и благодея́ний сокро́вище, грехи́ разреши́ моли́твенник Твои́х: ели́ка бо хо́щеши, мо́жеши.

Пе́снь 7

Ирмо́с: От Иуде́и доше́дше, о́троцы в Вавило́не иногда́ ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Ака́фистово пе́ние возноша́ху пред ико́ною Твое́ю, Пречи́стая, правосла́внии лю́дие, егда́ оби́тель Поча́евская Це́ркви возвраще́на бы́сть, те́м у́бо оставле́ние грехо́в испроси́, на́м же, моля́щим Ти́ ся́, на враги́ посо́бствуй.

Наро́да правосла́внаго ду́ши упоко́ити моли́ся, Влады́чице, вку́пе же и все́х, о возвраще́нии ла́вры Твоея́ из ерети́ческаго пле́на потруди́вшихся, на́м же, к Тебе́ прибега́ющим, пода́ждь единомы́слие и ми́р.

И ны́не наро́ду на́шему ми́лостива бу́ди, Влады́чице, и ми́р пода́ждь, покаря́ющи противобо́рствующия враги́ и супоста́ты.

Пред Твое́ю ико́ною, Богоро́дице, правосла́вным христиа́ном возвраще́нною, па́ки исцеле́ния приима́ти ве́рнии навыко́ша: не у́ исте́кшу бо еди́ному ле́ту от того́ дне́, уже́ четы́рми чудесы́ Це́рковь Христо́ву просла́вила еси́ во утеше́ние лю́дем.

Рая́ Небе́снаго сподо́би ны́, Влады́чице, святу́ю ла́вру Твою́ а́ки земны́й ра́й почита́ющия и Твоя́ ми́лости те́плою ве́рою воспева́ющия.

Авраа́м Госпо́день де́нь издале́ча ви́де, и ра́довася, и ча́янием того́ дне́ живя́ше; узре́вши же издале́ча Твою́ Поча́евскую це́рковь не́кая хрома́я жена́ и упова́нием Твоея́ по́мощи испо́лнившися, а́бие исцеле́ и, а́ки еле́нь, воспряну́вши, ко оби́тели Твое́й поспеша́ше.

Пе́снь 8

Ирмо́с: Царя́ Небе́снаго, Его́же пою́т во́и А́нгельстии, хвали́те и превозноси́те во вся́ ве́ки.

Во гра́д Ки́ев от преде́л ура́льских прише́дшей жене́ бе́сней яви́ся Богоро́дица со преподо́бным И́овом и на го́ру Поча́евскую ту́ю призыва́ше, иде́же здра́вие е́й пода́вши, сла́вити научи́ Свое́ заступле́ние.

Омы́в очеса́ свои́ в купе́ли Силоа́мстей, прие́млет слепорожде́нный зре́ние Христо́вым веле́нием; омы́вшися же от воды́ сто́пныя в це́ркви Поча́евстей, исцеле́ слепа́я отрокови́ца. У́бо и на́ше стра́стное ослепле́ние исцели́, Влады́чице, водо́ю от сле́да стопы́ Твоея́ с ве́рою кропя́щихся.

Сию́ отрокови́цу исцеле́ну узре́вши, пра́баба ея́ а́бие прельще́ния уни́тскаго отрица́ется и Правосла́вную испове́дует ве́ру, в не́йже утверди́ и ны́, рабы́ Твоя́, о, Влады́чице.

Лю́дие Бо́жии, на го́ру Твою́, Влады́чице, притека́ющии, обе́ты по́двиг благочести́вых та́мо прино́сят, я́же де́лы испо́лнити помози́ и́м, Богоро́дице.

А́нгели на Небеси́ Твою́ сла́ву непреста́нно воспева́ют, Богоро́дице, на земли́ же челове́цы ко Твоему́ заступле́нию притека́ти не престаю́т, и́хже воздыха́ния не отри́ни, я́ко Блага́я, па́че же на ме́сте явле́ния Твоего́ те́х моле́ния услы́ши.

Ве́лия Твоего́ заступле́ния си́ла, о, Влады́чице, его́же ра́ди Сы́н Тво́й и Бо́г на́ш гре́шным проще́ние да́рует, подвиза́ющимся же кре́пость и уныва́ющим утеше́ние.

Пе́снь 9

Ирмо́с: Вои́стину Богоро́дицу, Тя́ испове́дуем, спасе́ннии Тобо́ю, Де́во Чи́стая, с Безпло́тными ли́ки Тя́ велича́юще.

Не то́чию еди́н по еди́ному подвиза́ются христиа́не на го́ру Поча́евскую, но и от сугу́бо свяще́ннаго гра́да Ки́ева совоку́пльшеся ве́рнии, по́мощь от сея́ чудотво́рныя ико́ны в годи́ну бы́вшаго губи́тельства испове́даша и, подо́бие ея́ написа́вше, во святу́ю ла́вру сие́ принесо́ша.

У́бо и во гряду́щая ле́та спаса́й на́с, Влады́чице, от губи́тельства и междоусо́бныя бра́ни, от гла́да же и о́гненнаго запале́ния, зане́ оскуде́вшей кре́пости ду́ш на́ших, уны́ния исполня́емся в беда́х, неразу́миви су́ще.

Ю́жский преде́л земли́ росси́йския Поча́евскую ико́ну Влады́чицы и святу́ю ла́вру Ея́, я́ко диади́му ца́рствия, храни́т и си́ми хва́лится; оба́че же и Се́верский, во гра́де тобо́льстем, чудотво́рное подо́бие тоя́жде Поча́евския ико́ны моли́твою и́ноков себе́ испроси́.

Ру́сскую зе́млю, о, Влады́чице, я́ко безпреде́льное горы́ Твоея́ подно́жие, от бе́д и искуше́ний свободи́ и во благоче́стии ту́ю сохрани́ до сконча́ния ве́ка.

Уже́ несты́дно подня́вшимся ху́льным гла́сом посреде́ христиа́нскаго жи́тельства, не оста́ви, Богоро́дице, ра́б Твои́х в те́х прельще́ния впа́сти, но ве́ру несумне́нну возгрева́й в сердца́х на́ших вы́ну.

Се́ вре́мя заступле́ния Пресвяты́я Богоро́дицы прии́де, умно́жившимся собла́зном, се́ вре́мя на́ших к Не́й воздыха́ний. О, бра́тие! Рце́м у́бо от всего́ се́рдца на́шего: Влады́чице! Помози́ лю́дем Твои́м.

 

Канон Пресвятой Богородице пред иконой «Себежской», называемой «Умиление»

Песнь 1

Ирмос: Волною морскою Скрывшаго древле гонителя мучителя — под землею скрышна спасенных отроцы, но мы, яко отроковицы, Господеви поим, славно бо прославися.

Приидите, верных благочестивая множества, духовно лик совокупльше, Пречистую Матерь Слова Божественными песньми воспоим, зряще Теплую Заступницу, от Пречистаго образа Ея преужасное знамение показующую.

Якоже лествицу высокую, зрим Тя, Дево Всенепорочная, еюже к Небесней высоте восходим, и, Тя Предстательницу и утверждение непобедимое стяжавше, Пречистая, навет и сетей вражиих избавляемся, да явимся и спасемся, верою к Тебе притекающии.

В рождестве Сына Твоего тли не приемши, от тления всех нас избави и печали, просвещающи матерним Своим дерзновением, Богорадованная.

Надежду имуще Тя, Богородительнице, и несумненну веру, града сего народи Тебе, яко забрало, граду положше, Дево Неискусобрачная.

Песнь 3

Ирмос: Тобою, Христе, Небеса утверждаема вся, Слово Божие и Сила, исповедуют славу неизреченну и вседетельныя руки Твоея сотворение, несть бо пресвят, разве Тебе, Господи.

Умилосердися на стадо Свое, Пречистая, и смирение граду Твоему даруй, сопротивных челюсти сокруши и тех до конца немощны покажи.

Общаго Пастыря и Владыку порождши Христа, Дево Неискусобрачная, Тому помолися, настоящаго гнева избавитися нам, истиннаго обстояния, Владычице.

Милостива еси, Владычице, Милостиваго рождши Спаса, виждь озлобление и воздыхание людей Своих, ускори, Пречистая, ущедрити ны.

Поют Тя, Богородице, Ангельстии чини и празднуют патриархи со святители, с ними же тогда и Боголюбивии народи текуще во святую Твою Церковь, видеша Тя, Царице, за ны, грешныя, молящуюся к Сыну Своему, помиловати град Твой и люди, в нем живущия, от Твоего образа предивным знамением.

Седален, глас 8

Юже древле лик пророческий проповеда — дверь Небесную и неопалимую купину, свещник многосветлый, златую кадильницу, ручку и жезл, преславно днесь и дивно знамение показа, темже благодарственное пение возсылаем Ти, раби Твои, Богородице, моли Христа Бога нашим согрешением оставление даровати, Тебе бо надежду имамы, раби Твои.

Песнь 4

Ирмос: Удивися Твой разум от мене, услышавшу преславная веления смотрения Твоего, укрепися же возлюблением Твоего схождения, Ты бо моея нищеты не отверглся еси.

Почитающия Тя граждане, Пречистая, и по долгу славящия ограждай от безбожных, Чистая, иноплеменник, Ты бо тем еси, Пречистая, богатство неотъемлемо, покров же и держава.

Не может язык и слово человеческое похвалити Тя достойно, от Тебе бо без семене Жизнодавец Бог воплотитися, Пречистая, благоизволи.

Призри, Пречистая, спастися рабом Твоим, поющим Тя, и избави от сопротивных и нашедшаго гнева, Богородительнице.

Богатный дар и неотъемлемо сокровище даровала еси граду Твоему, образ Твой, Пречистая и Мати Слова, и сего помощию противных низлагаем.

Песнь 5

Ирмос: Союзом любве связуеми, апостоли, владычествующему всеми себе Христу возложше, красны ноги очищаху, благовествующе всем мир.

Теплая Заступнице к Тебе притекающим и ненадеющимся надеждо, виждь озлобление людей Твоих и подаждь Свою помощь, Пречистая.

Иже Огнь рождши Божественный, Дево, противных, Пречистая, молитвою Твоею — огнем — попали, яко сущи Зиждителя умоляющи, Всепетая.

Великий преднаписует во пророцех Моисей Тя ковчег, и трапезу, и свещник, и ручку, образне являя воплощение еже от Тебе Вышняго, Мати Дево.

Ты богатство неистощимое, исцелением источник еси верою притекающим к храму Твоему, идеже пребывает образ Твой, Владычице.

Песнь 6

Ирмос: Ят бысть, но не удержан в персех китовых Иона: Твой бо образ нося, Страдавшаго и погребению давшагося, яко от чертога, от зверя изыде. Приглашаше же кустодии: хранящии суетная и ложная, милость сию оставили есте.

Избави языческаго нашествия град Твой, Препетая, и не предаждь до конца погибнути наследию Твоему, Пречистая, но силою Рождшагося из Тебе, Владычице, противных низложи.

Многосогрешивших к Тебе, Господи, не презри, но приими мольбу Матере Твоея о нас, Щедре, да не хвалятся сопротивнии,— где есть Бог их? — глаголюще, но да разумеют вси, яко Ты, Избавителю, с нами еси.

Честную икону Твою радостно сердцем и душею облобызаем, веселящеся и теплою верою прикасающеся, исцеление почерпаем неоскудно.

Кондак, глас 4

Притецем, людие, богатии и убозии, сирии и вдовицы, старии и юнии, в тихое пристанище, под покров цельбоноснаго источника Богоматере. Слезы бо, яко реки, источает из обою оку чудотворнаго образа Себежския о находящем гневе за наша злая согрешения и укрепляет град, егоже возлюбила еси, на сопротивныя, утверждает веру православных христиан и избавляет от всякаго зла молитвами Своими.

Икос

Разреши тьму моих согрешений, юже во уме моем лежащую, и Твоим мя светом просвети, Дево, яко да возмогу Тебе похвалу принести, Юже Отец восхвали и Дух Святый осени, Сын же и Слово Божие в Нюже вселися нетленно, от Пречистую Твоею боку произыде и с человеки поживе, темже мы, грешнии и недостойнии раби Твои, днесь совершающе священное торжество — знамение, бывшее от честныя иконы Твоея, в немже предивное чудо показала еси, и, Твоему чудеси удивльшеся и Твоих богатых даров исполньшеся, вместо благовонных аромат, елико возможно нам, земным, похвальная пения приносим Ти, глаголюще: радуйся, радосте Ангелом и человеком; радуйся, покрове, и утверждение, и надеждо граду Твоему; радуйся, противных силою Твоею низлагающая; радуйся, Разумнаго Солнца Мати, верных просвещающая, неверных же помрачающая. Радуйся, христианом похвало.

Песнь 7

Ирмос: Неизреченное чудо: в пещи Избавивый преподобныя отроки из пламене во Гробе мертв, бездыханен полагается, во спасение нас, поющих: Избавителю Боже, благословен еси.

Воистину сокровище честно граду Твоему, икона Твоя, даровася, Пречистая, юже сами зряще, о чудеси удивляемся, Сыну Твоему вопиюще: благословен Бог отец наших.

Во храм Боголепнаго Преображения, Владычице, притекающе, людие, руце простирающе, на молитву движем Тя: виждь озлобление наше и подаждь Твою помощь, Богородице.

Светоносная благодать, исцеление граду Твоему дадеся, образ Твой, Пречистая, егоже любезно облобызающе, веселящеся, вопием: благословен Бог отец наших.

Свеща Божественнаго сияния и Незаходимаго Света явися, свещник, светосияющ и мир весь озаряющ зарею чистаго девства, Тя поющия спасаеши, Благословенная, Яже Бога плотию рождшая.

Песнь 8

Ирмос: Ужаснися, бояйся, Небо, и да подвижатся основания земли: се бо в мертвецех вменяется в Вышних Живый и во Гроб мал странноприемлется. Егоже, отроцы, благословите, священницы, воспойте, людие, превозносите во вся веки.

Собезначальное Слово Отцу Дева породи Пречистая нетленно, Того моли, Богородительнице, от сопротивных напастей спастися граду Твоему и в нем людем, поющим: Господа воспевайте, дела, и превозносите Его во веки.

Едина сущи Благая, Преблагаго Слова умоли прилежно настоящаго гнева граду Твоему избавится, да несумненною верою Сыну Твоему зовем, поюще: дети, благословите, священницы, воспойте, людие, превозносите Его во веки.

Сопротивных разжжения и пламенновидныя стрелы, испущаемии на нас, угаси, Владычице, яко да Тя поем и превозносим, Чистая, во веки.

Яко нетленное зерцало, имея во граде Твою чудотворную икону, Пречистая, сопротивляющихся низлагаем и Сыну Твоему вопием: благословите, вся дела Господня, Господа пойте и превозносите Его во веки.

Песнь 9

Ирмос: Странствия Владычная и Безсмертныя Трапезы на Горнем месте высокими умы, вернии, приидите, насладимся, возшедша Слова, от Слова, научившеся, Егоже величаем.

Оком милосердным свыше призри на град и в нем люди Твоя, Пречистая, иныя бо помощи не имамы, токмо Тя, Всенепорочную, темже вси яко Матерь Божию величаем.

Раби Твои, вопием Ти, Пречистая Мати Божия: обычныя милости Твоя на град и люди милостивно покажи и сопротивных обстояний нас изми, да Тя непрестанно величаем.

Мысли очистивше и ум, празднолюбнаго града Опочки соборы со священным чином и всех верных благочестивое множество, восхвалите Матерь Слова, яко от Тоя образа бысть предивное знамение, емуже со страхом кланяющеся, Тя величаем.

Якоже Божественною светлостию озаряему зрим днесь, Пречистая, икону Твою честную, ейже кланяющеся, Тя величаем.

Светилен

Возжелев, Пречистая, Твоея доброты, Иисус в Тя вселися, и Заступницу Тя Твоему граду Слово Божие дарова, егоже сохраняй заступлением Твоим присно, яко да Тя ублажаем, Пренепорочная Отроковице.

 

Канон первый Пресвятой Богородице перед иконой «Скоропослушница»

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Чуде́с Твои́х боже́ственных мно́жество благохвали́ти предпринима́я, Тя́ молю́, Де́во, от се́рдца, Скоропослу́шнице, благода́ть пода́ждь ми́.

Кто́ не изуми́тся Твоего́ о́браза чудесе́м, Де́во? От него́ бо служи́телю трапе́зы возгласи́ла еси́ три́жды, Скоропослу́шница наре́кшися.

Ка́ко чудодея́ние Твое́ изрещи́ возмогу́, Отрокови́це? Ты́ бо пре́жде непоко́рнаго и́нока безо́чна соде́лала еси́ и па́ки сего́ устро́ила еси́ ви́дяща.

Ра́дуйся, свяще́нная оби́тель Дохиа́рская, ты́ бо и́маши все́х Госпожу́ Предста́тельницу и покро́в, я́коже Сама́ Она́ я́сно возвести́.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Безча́дных благоча́дных Ты́, Мари́е, показа́ла еси́ и непло́дных же́н соде́лала еси́, Скоропослу́шнице, веселя́щихся о ча́дех. Кто́ у́бо не изуми́тся, Де́во, вели́чию Твоему́?

Булга́рия пропове́дует Твоего́ о́браза чудеса́, о Скоропослу́шнице, восто́к же и за́пад. Исто́чник бо соде́лалася еси́, точа́щий благода́ти все́м призыва́ющим и́мя Твое́.

Ра́ка боле́знь от руки́ исчеза́ет честны́я жены́, Де́во, посеще́нием Твои́м, те́мже стра́ждущая, от неду́га свободи́вшися, ра́дующися, пропове́да благода́рственная.

Чу́дно украси́ся ико́на Твоя́, Скоропослу́шнице, и па́че луче́й со́лнечных освеща́ет все́х благода́тию Твое́ю, Пречи́стая. Кто́ у́бо не восхва́лит Тя́, на небеси́ и на земли́ сла́вимую!

Седа́лен:

Влады́чицу Тя́ ми́ра ве́мы, Мари́е Всепе́тая, я́ко родила́ еси́ на́м все́х Творца́, Спаси́теля ми́ра, И́же и просла́ви Тебе́, Пречи́стую Ма́терь Свою́, подая́ Тобо́ю благода́ть и ми́лость чту́щим Тя́ и моля́щимся Тебе́, Богоро́дице.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Во все́х конце́х чудотво́рный Тво́й о́браз просла́вися, и ны́не вси́ уста́ми Скоропослу́шницу произно́сят.

И во сне́, Всецари́це, и я́ве, Скоропослу́шнице, явля́яся, чудеса́ соверша́еши в ми́ре пресла́вная.

Кто́ Твое́, Де́во, и́мя в ну́жде вся́кой призыва́ше, и ско́ро того́ не услы́шала еси́, я́ко Скоропослу́шница су́щая?

Блаже́нна еси́ Дохиа́рская оби́тель сла́вная, ико́ною бо обогати́лася еси́ Скоропослу́шницы всечестно́ю.

Пе́снь 5.

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Ка́ко на Тво́й пречи́стый о́браз а́з, недосто́йный, воззрю́, Скоропослу́шнице, нечи́стыми очесы́ мои́ми?

Мо́ре и земля́, Всецари́це, Твоея́ ико́ны чудеса́ пропове́дуют: Твои́х бо благода́тей сия́ обоя́ наслади́шася.

Та́тя явля́еши, пе́нязи похи́тивша бли́жняго, Матероде́во, и возвраща́еши пра́ведно сия́ иму́щему.

Что́ воздади́м Тебе́, Всеблага́я, за благода́ть мно́гую, ю́же яви́ла еси́ на́м, дарова́в ико́ну Твою́, бога́тство свяще́нное?

Пе́снь 6.

Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́.

Я́ко любвеоби́льная Ма́терь я́вльшися, призыва́ла еси́ о́трока к Себе́, до́ндеже изба́вила еси́ от руки́ разбо́йников, Матероде́во. Но да обрете́м Тя́ и мы́, Ма́терь любвеоби́льную!

Не и́мамы раби́ Твои́ ино́го, ра́зве Тебе́, предста́тельства и покро́ва. Те́мже, Чи́стая, от се́рдца вопие́м: вся́кия беды́ свободи́ ста́до Твое́ и ве́рных, к Тебе́ прибега́ющих.

Я́коже спасла́ еси́ от морски́я бу́ри призва́вших боже́ственное и́мя Твое́, та́ко и на́с от чу́вственнаго круше́ния и мы́сленнаго, Де́во, спаси́ и в ти́хия приста́нища спасе́ния упра́ви.

Ми́р Тя́ прибе́жище стяжа́ и спасе́ние, те́м, Чи́стая, к честне́й Твое́й ико́не отвсю́ду притека́ют лю́дие, и вси́ ско́ро и́х слу́шающую обрета́ют Тя́.

Конда́к, гла́с 8:

В мо́ри жите́йстем обурева́емии, треволне́нию подпа́даем страсте́й и искуше́ний. Пода́ждь у́бо на́м, Госпоже́, ру́ку по́мощи, я́коже Петро́ви Сы́н Тво́й, и ускори́ от бе́д изба́вити ны́, да зове́м Ти́: ра́дуйся, всеблага́я Скоропослу́шнице.

И́кос:

Иде́же осени́т благода́ть Твоя́, Влады́чице, та́мо неду́жнии здра́ви быва́ют, бе́дствующии во благополу́чие прихо́дят, и вся́к скорбя́щий ра́дости исполня́ется. Те́мже благода́тию Твое́ю осени́ и на́с, сицева́я ра́достная Тебе́ глаго́лющих: ра́дуйся, Богоблагода́тная, непристу́пнаго Божества́ селе́ние; ра́дуйся, свята́я трапе́зо, Хле́бом жи́зни на́с снабдева́ющая; ра́дуйся, ми́ро многоце́нное, облагоуха́ющее ве́рных; ра́дуйся, ма́слино, еле́ем милосе́рдия на́с умаща́ющая; ра́дуйся, неистощи́мое сокро́вище даро́в; ра́дуйся, приснотеку́щий исто́чниче чуде́с; ра́дуйся, оби́димых заступле́ние; ра́дуйся, обурева́емых благоути́шное приста́нище; ра́дуйся, глухи́х слы́шание и све́те слепы́х; ра́дуйся, разсла́бленных укрепле́ние; ра́дуйся, свобожде́ние плене́нных; ра́дуйся, ми́ра всего́ упова́ние; ра́дуйся, всеблага́я Скоропослу́шнице.

Пе́снь 7.

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Слепы́м дарова́ла еси́ де́йствие очесе́м, Де́во, е́же ви́дети, но и на́ша зе́ницы души́ и телесе́ просвети́, да пое́м при́сно вели́чия Твоя́.

Глухи́м слы́шание дарова́ла еси́, Мари́е Скоропослу́шнице, но и на́с все́х отве́рзи ушеса́ души́ и телесе́, я́ко да пое́м при́сно вели́чия Твоя́.

Я́коже дре́вле от пруго́в изба́вила еси́ прибе́гших к Тебе́, Пречи́стая, та́ко и на́с от си́х и вся́каго вре́да изба́ви, да пое́м при́сно вели́чия Твоя́.

Я́ко испра́вила еси́ пре́жде разсла́бленнаго, та́ко и на́с, по обою́ разсла́бленных, те́плым Твои́м предста́тельством испра́ви, да пое́м при́сно вели́чия Твоя́.

Пе́снь 8.

Ирмо́с: Царя́ Небе́снаго, Его́же пою́т во́и а́нгельстии, хвали́те и превозноси́те во вся́ ве́ки.

От вся́ких боле́зней, Скоропослу́шнице, на́с изба́ви, я́коже от си́х мно́гих изба́вила еси́.

Ико́на Твоя́, Де́во, показа́ся исто́чник чуде́с, от него́же жа́ждущии снабдева́ются изоби́льно.

Поги́бшаго Ты́ явля́еши, Госпоже́, и подае́ши ра́дость обре́тшим. Ко́ль мно́гая е́сть о́браза Твоего́ благода́ть!

Повеле́нию Твоему́, Влады́чице, повину́ются вся́ стихи́и, от ни́хже вре́да да избавля́еши Тя́ призыва́ющих.

Пе́снь 9.

Ирмо́с: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Собери́теся усе́рдно в оби́тель боже́ственную арха́нгелов, боля́щии: Вра́чь бо в не́й пребыва́ет безме́здный.

Свяще́нная ико́на Твоя́ друга́я показа́ся Силоа́мская купе́ль, Де́во, очища́ющая и целя́щая боле́зни души́ и телесе́.

Воспламеня́ет мя́ раче́ние зре́ти Твоего́ о́браза благода́тную ле́поту, и насыще́ния не и́мам велича́ти Тя́!

Да уви́жду Тя́, всеблага́я Скоропослу́шнице, во вре́мя сме́рти утеша́ющую мя́ и зра́ки де́монов отгоня́ющую!

Свети́лен:

Зря́щии Тя́ ны́не на ико́не с Предве́чным Младе́нцем, про́сим Тебе́, Богоневе́сто: не лиши́ на́с и в бу́дущем ве́це всеблаже́ннаго лицезре́ния Твоего́ и воплоти́вшагося от Тебе́ Сы́на Бо́жия, да со благоугоди́вшими Ему́ и́мя Его́ и Твое́ велича́ем.

 

Канон второй Пресвятой Богородице перед иконой «Скоропослушница»

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Ма́ти Присносу́щнаго Све́та и О́тчия Прему́дрости, умудри́ неразу́мие мое́ и просвети́ мя́ на пе́ние и моли́тву пред свято́ю ико́ною Твое́ю, Скоропослу́шнице.

Обре́тшии сокро́вище ра́дуются. Те́мже и мы́, иму́ще Тя́, Всецари́це, милосе́рдия сокро́вище небе́сное и неиждива́емое, воспева́ем, ра́дующеся, Твоя́ чудеса́.

Лицу́ Твоему́, — предрече́ Дави́д, — помо́лятся бога́тии лю́дстии; исполня́ющуся сему́, вку́пе с бога́тыми и мы́, доброде́тельми убо́зии, мо́лимся Тебе́, Де́во, пред ли́ком Твои́м.

Я́коже о́чи ра́б в руку́ госпо́дий свои́х, та́ко о́чи на́ши устремле́ни су́ть к Тебе́ и к о́бразу Твоему́, Всеблага́я Влады́чице, до́ндеже уще́дриши рабы́ Твоя́.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Воззри́ Твои́ми очесы́, Мари́е, и ви́ждь благоутро́бно пред ико́ною Твое́ю предстоя́щих и Тя́ с ве́рою призыва́ющих, и услы́ши си́х, Скоропослу́шнице.

Кре́пость да́руй на́м, Чи́стая, да твори́м во́лю Сы́на Твоего́ со стра́хом и любо́вию, укрепля́еши бо рабы́ Твоя́ я́ко Ма́терь Всеси́льнаго Бо́га на́шего.

Страстьми́ бори́мии и неви́димыми се́ятелями зо́л, при́сно нужда́емся в Твое́й, Влады́чице, необори́мой по́мощи, ея́же не лиши́ на́с, Богоблагода́тная.

Спаси́тельный щи́т пода́ждь на́м, Госпоже́, Твое́ держа́вное заступле́ние, и́мже началозло́бнаго побежда́юще кова́рства, венце́в сла́вы сподо́бимся.

Катава́сия: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Седа́лен:

Влады́чицу Тя́ ми́ра ве́мы, Мари́е Всепе́тая, я́ко родила́ еси́ на́м все́х Творца́, Спаси́теля ми́ра, И́же и просла́ви Тебе́, Пречи́стую Ма́терь Свою́, подая́ Тобо́ю благода́ть и ми́лость чту́щим Тя́ и моля́щимся Тебе́, Богоро́дице.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припа́дая ко святе́й ико́не Твое́й, Де́во, вопию́ Ти́ от се́рдца сокруше́нна: не попусти́ ми́ поги́бнути, Всеми́лостивая Госпоже́, житие́ мое́ во гресе́х ижди́вшему.

Грехолюби́в сы́й, удали́хся, Влады́чице, Сы́на Твоего́, и лише́н е́смь дерзнове́ния к Нему́. Те́мже к покая́нию мя́ напра́вив, сподо́би получи́ти, е́же погуби́х.

Богоизбра́нная Отрокови́це, в руне́ ороше́нном предви́денная, окропи́ росо́ю благода́ти изсо́хшую зе́млю се́рдца моего́ и благопло́дну соде́лай ду́шу мою́.

Ра́дуйся, Богоневе́сто, доброде́тельми, я́ко ря́сны златы́ми, преукра́шенная; ра́дуйся, сосу́де ми́ра, и́мже врачу́ются зову́щии: сла́ва, Христе́, си́ле Твое́й.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Не́сть, Всеми́лостивая Госпоже́, такова́го, и́же бы лиши́ся щедро́т Твои́х, прибе́г с ве́рою к Твоему́ благоутро́бию. Те́мже приле́жно мо́лим Тя́: сподо́би и на́с гре́шных ми́лости Твоея́.

Умилостивле́ние о все́м ми́ре су́щая, умоли́, Де́во, Сы́на Твоего́, все́х Судию́, да не помяне́т грехо́в на́ших, и да изба́вимся Тобо́ю вся́каго преще́ния Его́, находя́щаго на лю́ди согреши́вшия.

Го́ру Твою́ и сию́ оби́тель, иму́щих о́браз Тво́й, всеблага́я Скоропослу́шнице, покры́й от вся́каго зла́, соблюда́ющи рабо́в Твои́х в едине́нии ду́ха, во вся́кой благосты́ни и и́стине.

Примири́теля вся́ческих ро́ждшая, всемо́щным предста́тельством Твои́м, Влады́чице, умиротвори́ на́с к Нему́, к бли́жним и к себе́ сами́м, я́ко воспева́ющим Тя́ ми́р подава́ющая.

Катава́сия: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Ты́ — рабо́в Твои́х утеше́ние, Всеблаже́нная; Ты́ — све́т, удобре́ние и наде́жда спасе́ния; Ты́ у́бо промышле́нием Твои́м вся́кия ну́жды и ско́рби изба́ви на́с.

Ве́дущи не́мощи на́ша, Богороди́тельнице, восполня́й духо́вную и веще́ственную ску́дость на́шу, да подаю́щаго на́м Тобо́ю вся́ блага́я Бо́га сла́вим.

Не оста́ви на́с, Всеще́драя, внегда́ оскудева́ти кре́пости на́шей, не отступи́ от упова́ющих на Тя́ во исхо́де и по исхо́де яви́ на́м бла́гости Твоея́ си́лу.

Преблагослове́нная Мари́е, кни́га Бо́жия запечатле́нная, в кни́зе живота́ ве́чнаго написа́тися на́м сподо́би, да от Тебе́ ро́ждшагося Бо́га сла́вим.

Конда́к, гла́с 8:

В мо́ри жите́йстем обурева́емии, треволне́нию подпа́даем страсте́й и искуше́ний. Пода́ждь у́бо на́м, Госпоже́, ру́ку по́мощи, я́коже Петро́ви Сы́н Тво́й, и ускори́ от бе́д изба́вити ны́, да зове́м Ти́: ра́дуйся, всеблага́я Скоропослу́шнице.

И́кос:

Иде́же осени́т благода́ть Твоя́, Влады́чице, та́мо неду́жнии здра́ви быва́ют, бе́дствующии во благополу́чие прихо́дят, и вся́к скорбя́щий ра́дости исполня́ется. Те́мже благода́тию Твое́ю осени́ и на́с, сицева́я ра́достная Тебе́ глаго́лющих: ра́дуйся, Богоблагода́тная, непристу́пнаго Божества́ селе́ние; ра́дуйся, свята́я трапе́зо, Хле́бом жи́зни на́с снабдева́ющая; ра́дуйся, ми́ро многоце́нное, облагоуха́ющее ве́рных; ра́дуйся, ма́слино, еле́ем милосе́рдия на́с умаща́ющая; ра́дуйся, неистощи́мое сокро́вище даро́в; ра́дуйся, приснотеку́щий исто́чниче чуде́с; ра́дуйся, оби́димых заступле́ние; ра́дуйся, обурева́емых благоути́шное приста́нище; ра́дуйся, глухи́х слы́шание и све́те слепы́х; ра́дуйся, разсла́бленных укрепле́ние; ра́дуйся, свобожде́ние плене́нных; ра́дуйся, ми́ра всего́ упова́ние; ра́дуйся, всеблага́я Скоропослу́шнице.

Пе́снь 7.

Ирмо́с: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Наста́внице ко спасе́нию рабо́в Твои́х, души́ трича́стное, Госпоже́, испра́ви, да благода́ти безстра́стия сподо́бльшеся, пое́м: препе́тый отце́в Госпо́дь и Бо́г, благослове́н еси́.

Жела́тельную си́лу души́ к боже́ственному раче́нию напра́ви, да то́ю Бо́га всеце́ло возлю́бим и к Нему́ при́сно стреми́мся, я́ко всеблаже́нному жела́ний кра́ю.

Я́ростную си́лу души́ помози́ на́м, Де́во, обраща́ти на неви́димыя враги́ спасе́ния на́шего и спаси́тельныя любве́ испо́лни сердца́ на́ша к бли́жним и к Бо́гу.

Слове́сное души́ к богоуго́дному созерца́нию воскрыли́, Влады́чице, богопроти́вных помышле́ний избавля́ющи, и все́х на́с благо́е мы́слити, глаго́лати и твори́ти укрепи́.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Па́жить плодоно́сну обрета́ет ста́до под Твои́м, Богома́ти, управле́нием, и душетле́ннии во́лцы не мо́щны расхи́тити слове́сных ове́ц, храни́мых благода́тию Сы́на Твоего́ и Бо́га.

Блаже́н челове́к, ему́же е́сть заступле́ние его́ от Тебе́, Богоневе́сто, при́сно бо полага́ет таковы́й восхожде́ния в се́рдце свое́м, до́ндеже у́зрит себе́ спасе́нна и воспое́т: Го́спода по́йте дела́ и превозноси́те Его́ во вся́ ве́ки.

Седмисве́щный свети́льниче, седмию́ дара́ми Ду́ха светя́щий, сподо́би и на́м украси́тися духо́вными плода́ми, да, уще́дреннии чрез Тебе́ Бо́гом, пое́м: Го́спода по́йте дела́ и превозноси́те Его́ во вся́ ве́ки.

Горо́ Бо́жия, в Не́йже благоволи́ жи́ти Бо́г, моли́ся к Нему́ о на́с, да по́мощию Его́ благо́е творя́ще, сподо́бимся узре́ти преми́рныя го́ры и та́мо пе́ти: Го́спода по́йте дела́ и превозноси́те Его́ во вся́ ве́ки.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Помяни́, Госпоже́, рабы́ Твоя́, любо́вию сла́вящия Тя́, услы́ши моля́щихся к Тебе́ и моли́твами Твои́ми благоуве́тлива на́м соде́лай Сы́на Твоего́ и Бо́га, зде́ и на стра́шном Суде́ Его́, Всеблаже́нная Богоро́дице, Чи́стая Присноде́во.

Ра́досте а́нгелов и челове́ков, свобо́дны на́с печа́лей жите́йских сотвори́ и хода́тайством Твои́м несконча́емых му́к изба́ви, да вре́менных и ве́чных бе́д Тобо́ю избы́вше, вопие́м: ра́дуйся, Всеблаже́нная Богоро́дице, Чи́стая Присноде́во.

Ви́димо пред о́бразом Твои́м предстоя́ще, неви́димо же к Тебе́, одесну́ю Сы́на Твоего́ стоя́щей, у́м возводя́ще, мо́лим Ти́ ся́ приле́жно: сподо́битися на́м ра́йскаго блаже́нства умоли́, Всеблаже́нная Богоро́дице, Чи́стая Присноде́во.

Блага́го Царя́ Блага́я Ма́ти, осени́ ны́ необори́мым покро́вом Твои́м, Всеблаже́нная Богоро́дице, Чи́стая Присноде́во.

Свети́лен:

Зря́щии Тя́ ны́не на ико́не с Предве́чным Младе́нцем, про́сим Тебе́, Богоневе́сто: не лиши́ на́с и в бу́дущем ве́це всеблаже́ннаго лицезре́ния Твоего́ и воплоти́вшагося от Тебе́ Сы́на Бо́жия, да со благоугоди́вшими Ему́ и́мя Его́ и Твое́ велича́ем.

 

Канон Пресвятой Богородице пред иконой «Споручница грешных»

Песнь 1

Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть, препрославленный Господь славно бо прославися.

В нарочитый день праздника нашего отверзем, людие, уста своя и новыми песньми величия Приснодевы воспоем. Се бо явлением святыя Своея иконы — грешным Споручницы — множеством чудес от нея славно прославися.

Якоже светозарное Солнце, от горы Синайския возсиявшее, облиста нас образ Споручницы грешных, имже благодати залог миру даровася и спасение на земли возвестися, покров и прибежище верным, любовию почитающим Его.

Рукою крепкою люди Своя от горькия работы Избавльшему и из глубины морския Изведшему простри руце Твоя, Дево Чистая, и молися прилежно, да изведет из плена греховнаго души верных, празднующих светло заступление Твое.

Всех падших востание, заблуждающих Наставнице, унывающих радование, болящих исцеление и всех грешных спасение, соблюди и сохрани нас, Госпоже, Божественным к Сыну за ны ходатайством Твоим.

Песнь 3

Ирмос: Неплодствовавший мой ум плодоносен, Боже, покажи ми, Делателю добрых, Насадителю благих, благоутробием Твоим.

Свыше данною Ти благодатию обновила еси, Споручнице мира, многими грехми обветшавшия сердца наша, и, воздеющи руце, молишися к Сыну Твоему за люди согрешившия: спаси, Дево, нас молитвами Твоими.

Яко облак дожденосный, видим образ Твой, Владычице мира, воду бо спасительную чудес от Него испущающи, грехми изсохшия сердца благодатию напаяеши и приводиши нас к творению добродетелей плода, сего ради любовию ублажаем Тя.

Жезл Ааронов процветший именова Тя древле Моисей, Цвет бо живоносный — Христа — прозябла еси, Емуже простерши длани, молися, Богомати, страстьми умерщвленныя души наша оживити плодоносною благодатию Своею.

Ороси нас росою молитв Твоих, Богородительнице, и неплодная в пустыне греховней увядающая сердца наша плодоносны ныне соделай всесильным к Богу ходатайством Твоим.

Песнь 4

Ирмос: Пришел еси от Девы, не Ходатай, ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи.

Пришла еси в мир за грешники Ходатаица, и яко Ангел утешаяй и ко исправлению вся подвизаяй; темже убо, Мати Божия, Споручница буди ми во благо, яко да обращуся и прежде согрешенных разрешение прииму, радостно вопиюще: слава силе Твоей, Господи.

Сокровище безценное обретохом — светоносный образ Твой, Богородице, мироточный и многоцелебный, благодати Божия обильно преисполненный, Емуже покланяющеся, источити просим освящение душам и телесем нашим.

Лествица явилася еси образно Иакову, от земли к высоте утвержденная, еюже сниде Владыка Неба и земли, да Тою путь правый покаяния покажет нам и к чертогам Небесным возведет люди согрешившия.

Едина надежда несумненная и грешным Споручница Ты еси, Пречистая, Тобою бо Христос Бог, преклонь Небеса, на землю сниде обновити падшее создание Свое; темже, проси, Дево, грехов прощение даровати нам, верою поющим Ему: слава силе Твоей, Господи.

Песнь 5

Ирмос: Ходатай Богу и человеком был еси, Христе Боже: Тобою бо, Владыко, к Светоначальнику, Отцу Твоему, от нощи неведения приведение имамы.

Ходатай Богу и человеком, Христос Бог, Ходатаицу Тя миру показа и грешным Споручницу. Егоже милостива соделай нам, Пресвятая Мати Дево, теплым заступлением Твоим.

Паче солнца светлеется образ Твой, Богоневесто, всю страну нашу осиявающий знамении и чудесы, тьму же греховную разгоняющий и благое всем источающий Небесное миро во спасение верных и миру христианскому во обновление.

Руно Тя Гедеон вообрази орошенное, на негоже, яко роса, Христос Бог сниде, да, росою молитв Твоих орошеннии, грешницы к покаянию подвигнутся и к вечным обителем Светоначальника Отца Небеснаго приведение да имут.

Се плачу и рыдаю горце, егда от нощи нерадения во ум прииду от многих моих злых прегрешений. Темже молю Тя, Мати Благая: Споручница буди ми и настави мя на путь, еже ходити во истине, слезы приносяще о своих согрешениях.

Песнь 6

Ирмос: В бездне греховней валялся, неизследную милосердия Твоего призываю бездну: от тли, Боже, мя возведи.

Радости нам вечныя и жизни нетленныя Ходатаица явилася еси, Богородительнице, приносяще за ны руце к Сыну Твоему и Спасу всех, всяку слезу от лица земнаго отъемшему и неизследную милосердия Своего бездну Тобою миру показавшему.

Святителя Николая, предстояща образу Твоему, благоговейный муж узрети сподобися и благоволения Твоего глаголы от Тебе, Царице, услыша, яже верным быша во утверждение и о людех промышления Твоего во свидетельство.

Свиток нов Тебе Исаия, Дево, предвидев, на немже написася живое слово Отчее, Егоже моли, Чистая, Всеблаженная, в книзе мне живых написатися и многих зол моих разтерзати свиток покаяния предобрыми образы.

Из глубины бездны греховныя к Тебе руце простираю и сквернии устне мои к молению отверзаю, подножию же ног Твоих, Владычице, припадаю и, рыдающи, вопию Ти: молися, Заступнице, Сыну Твоему, прощение улучити ми и милость в День судный.

Кондак, глас 1

Честное жилище бывшее неизреченнаго естества Божественнаго выше слова и паче ума и грешным еси Споручница, подаваеши благодать и исцеление, яко Мати всех Царствующаго: моли Сына Твоего получити нам милость в День судный.

Икос

Светоноснаго явления и преславнаго Твоея иконы, Споручницы грешных прославления, чудес же многих пучины и мира многоцелебнаго излияния витийствующих уста не возмогают исповедати достойно; мы же, грешнии и смиреннии, что возглаголем Ти, Богоневестная Дево? Токмо: помилуй нас. Едину бо Тя жизни нашея стяжахом Хранительницу и Надежду крепку спасения. Темже молим Тя, о, Благосердная: Споручница нам покаяния явися и ходатайствуй к Сыну Твоему: да будущих истязаний избавимся и милостива Его обрящем в День судный.

Песнь 7

Ирмос: Богопротивное веление беззаконнующаго мучителя высок пламень вознесло есть. Христос же простре благочестивым отроком росу духовную, Сый благословен и препрославлен.

В нощи, и во дни, и во всяких обстояниих спасение твердо имамы Тя, Богородице, христианом покров и прибежище, выну бо руце ко Господу простерши, росою молитв Твоих, якоже отроки благочестивыя, охраняеши от напастей верныя, зовущия: благословенна еси, Мати Дево, и препрославлена.

Не терпя муж благочестивый зрети неизреченнаго от образа Твоего осияния, на землю ниц паде, моляся; мы же, грешнии, благодатную икону сию зряще, любовно вопием Ти: благословенна буди, Споручнице спасения нашего, и препрославлена во веки.

Серафим древле, клещами угль носяй горящий, во уста коснуся Исаии, попаляя грехи его. Ты же, клеща светозарная сущи, Богородице, Угль Божественный носившая, Христа Иисуса, прикоснися Его милосердию, да опалит грехи наша и беззакония лютая.

Не отвержи мене от лица Твоего, Всенепорочная, егда к Пречистому образу Твоему воззрю, стеняще о гресех тяжких, но милостива буди ми Заступница к Сыну, милосердием бо преклоняется и спасение грешников соделывает ходатайством Твоим.

Песнь 8

Ирмос: В пещь огненную ко отроком еврейским снизшедшаго и пламень в росу преложшаго Бога пойте, дела, яко Господа и превозносите во вся веки.

В пещь огненную страстей мира снизшедшую и пламень греховный в росу покаяния спасительнаго преложшую Богородицу, прекрасный лик весело сплетши, пойте, дела, яко Заступницу мира Деву Чистую, и превозносите во вся веки.

Света Небеснаго в нощи многообразными играньми славят всечестную икону Твою, Владычице, Горнии чини и Тебе, Богоневестную Матерь, ублажают радостно. Юже, яко Световодительницу из тьмы греховныя, людие, превозносите во вся веки.

От древле до ныне Саму Матерь Царя Христа Утешительницу тверду в напастех имущи, в скорбех же и печалех присное избавление, в бедах помощь и в покаянии Споручницу, благословите, сынове человечестии, пойте Сию и превозносите во вся веки.

Даждь рабом Твоим, Всеблагая Царице, прошения спасительная в храме сем, в немже источник преславных чудес показала еси, токи мира источая от святаго образа Твоего, имиже страсти душ и телес врачуеши неизреченным милосердием Твоим.

Песнь 9

Ирмос: Безначальна Родителя Сын, Бог и Господь, воплощся от Девы, нам явися, омраченныя просветити, собрати расточенная, тем Всепетую Богородицу величаем.

Не возмогает слово человеческое, ниже язык всяк похвалити Тя достойно, но Ты, Пресвятая, благодать неоскудную от Господа приимшая и грешным Споручница свыше преднареченная, вретище прегрешений наших расторгни и омраченныя просвети ны, веселием же добродетелей препоясующи, не остави нас заступлением Твоим, да Тя, Всепетую Богородицу, величаем.

Светом невещественнаго светолития сияя, образ Твой, Отроковице Непорочная, омраченныя грехми просвещает и расточенная вся под кров спасительный храма Твоего собирает, тем, веселящеся, Тя, Всепетую Богородицу, величаем.

Якоже Давид праотец древле пред сенным ковчегом взыграше радостно, сице и мы Царице Неба пришедшей песньми взыграем немолчными, славяще образа Ея многоцелебнаго всечестное прославление.

Срадуемся днесь и свеселимся неизреченному Божию дарованию — дивному образу Приснодевы, радость бо вечную от Него источает нам, напастей и печалей свобождая. Темже благодарственныя песни воспеваем веселия Ходатаице и верно любовию вси яко Богоматерь величаем.

 

Канон первый Пресвятой Богородице пред иконой «Тихвинская»

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

О Троице Вседержительная и Единице Трисолнечная! Душу мою, и сердце, и ум, молю, просветивши и благодатию освятивши, к Божественней Твоей любви, Преблагая, возведи и настави благочестно пети благосердие Приснодевы Благословенныя.

Благаго Царя Благая Мати, Яже всем благопослушная в прошениих и всесильная в благодеяниих, благодать света Твоего и нам возсияй и облагодати днесь, о Богоблагодатная, песнь Тебе пети начинающия.

Ликом Ангельским виновно есть радости Твоего, Владычице, настоящаго торжества славословие: сии бо днесь движутся к похвалению; мы же, бреннии, что Ти принесем? Точию усердная благодарствия.

Архангельский глас поем Ти: радуйся, Чистая, аще и недостойни есмы. За благость убо сей приими, Владычице, светом милости Твоея нас просвещающи и благодать всем подающи.

Песнь 3

Ирмос: Утверждей в начале небеса разумом и землю на водах основавый, на камени мя, Христе, заповедей Твоих утверди, яко несть свят, паче Тебе, едине Человеколюбче.

Грядите, вернии, на преславное видение, зрите на высоте благолепно сияющу пречистым Своим образом Деву Пречистую, нас благодатно посещающу, благоверно поющих: несть пречисты, паче Тебе, Владычице.

Освящается, Богородице, Твоею благодатию всяк ум верных и возвышается чудным иконы Твоея пришествием, юже благочестно почитающих и Тебе верно славящих, сподоби, Владычице, нас, рабов Твоих, Вышняго причастия.

Даждь нам ненаветно Небесную шествовати стезю, Богоневестная, на Божественная деяния нас укрепляющи, яко да Твоим, Дево, заступлением злокозненнаго путей уклоньшеся, присносущныя славы будем общницы.

Ангелов Творца, истиннаго Света Христа, неизреченно из Тебе, Богомати, возсиявшаго лучами, омраченныя наша души и сердца просвети и благодатию Твоею, о Благодатная, освяти, к Горняго света рачению наставляющи.

Седален

Яко древняго воистину кивота честнейший Твой пречистый образ, Владычице! Паче бо илектра блистаяся, повсюду неоскудно лучи милости Твоея всем, являя, простирает и чтущия преславное пришествие его благодатию Божиею милостивно соблюдает. О немже, Владычице, мы, радующеся, усердно празднуем и матернее Твое к нам милосердие прославляем.

Песнь 4

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче.

Творец всех и Создатель, вседержительною силою носяй всяческая, образом Своим Божественным и Твоим, Дево, днесь чудоносным преславно прииде, на руку Твоею, Чистая, носим, на спасение человеком и исцеление.

Неизреченному Божию дарованию, иконе Света Христа и Пречистыя Девы, приидите, вернии, поклонимся и с любовию припадем, вопиюще: низпосли, о Благодателю, рождшия Тя ради Приснодевы Благосердыя, благодать и милость нам, рабом Твоим.

Ангелов Царице, мысленный кивоте, законнаго паче кивота пречистый Твой образ неизреченными чудесы и благодатьми Бог украси и прослави и Ангелом почитати того повеле: с нимиже о нас Ему, о Всепетая, молися, славящих спасительное Его смотрение, и Твое еже бы нам спасение улучити.

Яже по благодати дарованная от Бога Помощнице нам всем, христианом, Того моли, Всеблагая и Всенепорочная, яко да презрит наша безчисленная согрешения и избавит пламеннаго томления, и тьмы кромешния, и муки всякия.

Песнь 5

Ирмос: Утренюет дух мой к Тебе, Боже, от Отца рожденному неизреченно и воздвигнувшему рог спасения нам.

Ты, о Благодатная, в милостивом Твоем днесь благоволении боголепным явлением страну нашу благодатно просветила еси и таинственное света Твоего просвещение миру низпослала еси, к свету Вышния славы, Богородице, верныя возводящи.

Омрачихомся помыслы, отягчихомся грехи, недоумеем светоносныя благодати и милости Твоея исповедати, Владычице, но, о Пресвятая Дево, просвети нас и обогати таинственными Твоими даровании Божественных желаний, к свету праваго пути направляющи.

Благочестно отвсюду, о Богомати, к пречестней Твоей иконе притекающия, и усердно покланяющияся, и верно везде Тя призывающия предвари, от бед всяких спасающи, и лютых недуг избавляющи, и духи лукавыя прогоняющи, тишину и здравие подающи всем, Владычице.

Лютыми помышлении и скверными воспоминании от лукавых врагов стужаемых зельне, не остави нас, ниже презри, Богородительнице, но осени Твоею благодатию, покрывающи от сих, и заступающи, и спасающи от всех их навет, о Богоблаженная!

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Аер пространный и земля наша, Царице, в преславном Твоея иконы пришествии чудес и Божественных даров благодатию Твоею исполнися, во утверждение благочестия и всех верных, Всепетая, еюже днесь и супостаты низлагаются и славящии Тя крепце утверждаются.

Граде Божий, селение Святое, Дево Богоневестная, сохрани от сопротивных нахождения и от всех навет вражиих святый дом Твой и вся грады и страны христианския, любовию поющия Тя и верно почитающии пречистый образ Твой.

Освящение, здравие и спасение всегда подавай душам же и телесем нашим, о Мати Божия, благочестно покланяющимся иконе Твоей Божественней, и усты и сердцем благоговейно ю со страхом целующим, и верою от души Тя песнословящим.

Державный покров и стену необориму стяжавше Тя, Приснодево Богородице, упование на Тя с Богом возлагаем, вернии, и прилежно молим: силою Твоею стрелы вражия и козни вся бесовския немощны, яко младенчески, покажи и недейственны, крепкая наша Помощнице.

Кондак, глас 8

Притецем, людие, к Деве Богородице Царице, благодаряще Христа Бога, и, к Тоя чудотворней иконе, умильно взирающи, припадем и возопием Ей: о Владычице Марие, присетивше страну сию Твоего честнаго образа явлением чудесно, спасай в мире и благовременстве отечество наше и вся христианы, наследники показующи Небесныя жизни, Тебе бо верно зовем: радуйся, Дево, мира спасение.

Икос

Пречудное явление Богоматере видяще, на высоту добродетелей взыдем и ум на Небо возведем. Сего бо ради небошественне прииде, да привлечет к высоте вопиющия Ей сице: радуйся, благословенная Дево, от всех родов Богом избранная; радуйся, Небесная Царице, Господа Бога Мати и Творца всяческих. Радуйся, всерадостное Ангелом пение; радуйся, всежелательное всего мира зрение. Радуйся, неподвижимое веры благочестия основание; радуйся, всесветлое благодати познание. Радуйся, Божие к земным благоволение; радуйся, земных к Богу возведение. Радуйся, озлобленным душам утешение; радуйся, всем верным скорое поможение. Радуйся, дарованная от Бога Предстательнице роду христианскому, егоже и соблюдай прилежно от всяких бед и зол, да зовем Ти: радуйся, Дево, верным спасение.

Песнь 7

Ирмос: Божия снизхождения огнь устыдеся в Вавилоне иногда, сего ради отроцы в пещи, радованною ногою, яко во цветнице, ликующе, пояху: благословен еси, Боже отец наших.

Ангелом говейный образ Твой, Владычице, неизреченною присно благодатию сияет и силою: днесь бо того даровании земныя просвещаеши, и к Небесным наставляеши, и к вечному животу устрояеши за неизглаголанную Твою благость, Богоблагодатная.

Твоего боголепнаго явления, и преславнаго иконы пришествия, и чудес пучины, Чистая, витийствующих уста никакоже возмогают исповедати; мы же, грубии, что возглаголем? Точию: помилуй и спаси нас, о Всемилостивая Владычице!

Известная верных Помощнице и всех благих Подательнице, приими нас, верно припадающих и любовию вопиющих Ти: помилуй нас, Госпоже, помилуй нас, якоже днесь, тако и во оный век, буди нам Помощница и Заступница.

Мати Божия Милосердая, милости Твоея двери днесь отверзи нам и от уст мысленных волков исхити, хотящих нас поглотити и до конца погубити; помилуй, молим Тя, о Владычице, помилуй, не отврати посрамленных раб Твоих.

Песнь 8

Ирмос: Покрываяй водами превыспренняя Своя, полагаяй морю предел песок и содержай вся, Тя поет солнце, Тя славит луна, Тебе приносит песнь вся тварь, яко Содетелю всех во веки.

Изряднии чинове Небеснии благочестно благоговеют пречистому Твоему образу, Всечистая, и пречудному Его пришествию, под солнцем преславну показавшуся и род правоверный воздвигшу пети и славити Сына Твоего, яко Содетеля всех во веки.

Преславная днесь поюще, любезно Ангелом говейной Твоей иконе покланяемся, благоговеюще, о Госпоже Царице! Славящее Тя отечество наше Божественною Твоею благодатию осени, и на враги укрепи, и мирно соблюди.

Радости вина Всеблагословенная, радуйся, Всенепорочная, радуйся, Благодатная, держава наша и ограждение и спасительное прибежище, спаси ны, рабы Твоя, не имущия паче Тебе к Богу помощи, на Тя бо надеемся и Тебе поем во веки.

Едину Тя жизни нашея стяжахом с Богом Хранительницу и крепку надежду спасения: молим Тя, о Благосердая, и по кончине ходатайствовати о нас, яко да будущих стязаний избавимся и милостива обрящем Сына Твоего и Бога в День судный.

Песнь 9

Ирмос: Ужасеся о сем небо и земли удивишася концы, яко Бог явися человеком плотски и чрево Твое бысть пространнейшее небес Тем Тя, Богородицу, Ангелов и человек чиноначалия величают.

Проста пути по аеру светоприятному икона Твоя, Владычице, стезю проходящи, богодвижимо и светолепно неизследимы стези творящи, верныя в поднебесней благодатию озари, верою вопиющия: воистину честнейши всех еси, Дево Чистая.

Слова витийством превысоких Твоих, Чистая, чудес никакоже по достоянию украсити удобни есмы, точию усердне молим Тя, Царице: да молиши Сына Твоего, Владыку и Царя всех, даровавшаго нам Тебе, преславную Помощницу, сподобити нас Небеснаго Своего Царствия.

Песнь благодарственно пения за неизреченное Твое милосердие, о Богоблагодатная, от нас приими, прошения наша в пользу исполняющи, и к высоте горней всех возведи, верно бо Ти зовем: воистину вышши всех еси, Дево Всенепорочная.

Роди вси, радостно блажим Тя, Богородице, яко радости вся ны исполнила еси преславным пришествием иконы Твоея, Пречистая. Ейже днесь покланяющеся, умильно молим Тя: не забуди, Владычице, Твоих рабов сподобити в будущем веце избранных радости.

Светилен

Пречистый образ Твой, имже присетила еси нас, Богоотроковице Дево, чтуще, празднуем сего ныне пришествие, от него благодатию Сына Твоего и Твоею приемлюще скорбей, и бед, и напастей избавление, Мати Бога Вышняго.

 

Канон второй Пресвятой Богородице пред иконой «Тихвинская»

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Даждь ми, Светодавче Христе, в нарочитый день преславнаго явления иконы, Рождшия Тя, светло торжествовати и весело во страсе и радости воспевати присно Тоя чудеса.

Слово Божие Светодательное и Премудрость Отчую плотию, Дево, рождшая, просвети глубокую тьму моего неразумия и слово ми подаждь воспети Твоя чудеса.

Днесь верных собори просвещаются, еретическая же ополчения посрамляются, видяще икону Твою, Владычице, яко солнце, по воздуху шествующу, нечестия мглу потребляющу и верныя просвещающу.

Едина еси Ты величие наше и похвала с Богом, Богоневестная, Тобою бо от бед спасаемся, и к Тебе прибегаем, и прилежно молимся: избави, Владычице, рабы Твоя вечнаго мучения, воспевающия Твоя чудеса.

Песнь 3

Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.

Христе Иисусе, Превечный Царю и Многомилостиве, пречестнаго Твоего образа и рождшия Тя Приснодевы просвети нас явлением и подаждь нам согрешений оставление и от бед избавление.

Егда Ангелами невидимо носиму пречестную Твою икону, Владычице, и светозарно стоящу на воздусе людие видеша, тогда, просветившеся светом Твоея милости, радости неизглаголанныя исполнишася.

О Боголюбивии святителие и священницы, монаси и простии и народи вси, светло ликовствуйте днесь, яко возсия на высоте Заря светоносная, держащи истиннаго Света, изображена плотию, с Нимже сниде к нам, подающи всему миру просвещение.

Твоею, Дево, всечестною иконою древле Творец всех чудодействова, спасе Царский град от иноплеменных нахождения; сице и Российстей стране буди, Госпоже Царице, покров и заступление, спасающи ю от всех навет вражиих.

Седален

Яко древняго воистину кивота честнейший Твой пречистый образ, Владычице! Паче бо илектра блистаяся, повсюду неоскудно лучи милости Твоея всем, являя, простирает и чтущия преславное пришествие его благодатию Божиею милостивно соблюдает. О немже, Владычице, мы, радующеся, усердно празднуем и матернее Твое к нам милосердие прославляем.

Песнь 4

Ирмос: Седяй в славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Земля убо вся днесь да возвеселится, вкупе же и воздух, и море да кропит радование, яко всечестнаго образа Богоматере чудесным шествием Российская страна преславно озарися.

Раболепно служат и Ангельстии чинове Тебе, всех Царице, и благоговейно почитают всечестную Твою икону, воспевающе Тя, Пресвятую Деву, мы же, смиреннии, како Тебе, Всечистую, достойно пети возможем?

Архангельскую песнь, еже радуйся, Тебе зовем, Богоневесто, Господь с Тобою, радуйся, радосте Ангелов и всех человеков, славящих Тя, воистину веселие, спаси души поющих Тя, Богородице Чистая.

О Богородительнице, радости Подательнице, верою славящия Тя и от души поющия радости неизреченныя исполни и Света невечерняго сподоби, Дево Благодатная, Владычице.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына всем воспевающим Тя мир подавающая.

В пустыни явленно Тебе, Богомати, со святителем благоговейный узрети муж сподобися и благоволения Твоего глаголы от Тебе, Царице, восприят, на большее утверждение и в пользу миру спасения.

Окаянен убо аз, Всечистая, и недостоин таковыя ныне благодати, еже Тя видети, но поне в будущем сподоби мя узрети Тя, и Сына Твоего усрести, грядуща во славе, и глас Божественный услышати, зовущ во Царство Небесное.

Прибегаем к Твоей, Дево, благости, и очи сердец наших воспущаем к Тебе, Чистая, и, с плачем колена преклоняюще, молим Тя: не презри нашего воздыхания и буди нам покров и Помощница в День судный.

Едина еси всех Предстательница христиан, Богомати Пречистая, услыши наше моление, воззри на ны, Всепетая, спаси град и обитель Твою и озари стадо Твое зарею благодати Твоего заступления.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

О, предивнаго Твоего чудесе, Владычице! Яко за преслушание Твоего повеления ужасно человек с главы церковныя восхищен быв, на земли невредим обретеся, милостию Твоею, Всемилостивая.

Никтоже тако преслуша Божественная повеления, якоже аз, окаянный. Тем, Ти припадая, молюся, Владычице: прежде даже до конца не погибну, настави мя на истинный путь и спаси мя, Чистая.

Ты, о Богомати, рождшая Претерпевшаго нас ради на Древе Крестнем распятие, умоли присно нам, страдание Его святое помнящим, волю Его Божественную творити и вечных благ наследниками быти.

Владычице, Дево Чистая, избави нас лютых всех, умоляющи Пригвоздившаго на Кресте грехи наша, и сподоби нас достойно одесную Его стати, егда приидет во славе Своей.

Кондак, глас 8

Притецем, людие, к Деве Богородице Царице, благодаряще Христа Бога, и, к Тоя чудотворней иконе, умильно взирающи, припадем и возопием Ей: о Владычице Марие, присетивше страну сию Твоего честнаго образа явлением чудесно, спасай в мире и благовременстве отечество наше и вся христианы, наследники показующи Небесныя жизни, Тебе бо верно зовем: радуйся, Дево, мира спасение.

Икос

Пречудное явление Богоматере видяще, на высоту добродетелей взыдем и ум на Небо возведем. Сего бо ради небошественне прииде, да привлечет к высоте вопиющия Ей сице: радуйся, благословенная Дево, от всех родов Богом избранная; радуйся, Небесная Царице, Господа Бога Мати и Творца всяческих. Радуйся, всерадостное Ангелом пение; радуйся, всежелательное всего мира зрение. Радуйся, неподвижимое веры благочестия основание; радуйся, всесветлое благодати познание. Радуйся, Божие к земным благоволение; радуйся, земных к Богу возведение. Радуйся, озлобленным душам утешение; радуйся, всем верным скорое поможение. Радуйся, дарованная от Бога Предстательнице роду христианскому, егоже и соблюдай прилежно от всяких бед и зол, да зовем Ти: радуйся, Дево, верным спасение.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Единочадый Твой Сын и Бог всех, Богомати, пречистый Твой образ невредим сохрани во пламени, о, чудесе! Благодатию паче солнца обретеся сияющ, и верныя просвещающ, верою поющия: Боже, благословен еси.

Небеснии чинове веселятся с земнородными, Богородице, в светлом торжестве Твоем, еже совершающия ны и со страхом предстоящия пред пречистым Твоим образом просвети светом сияния Твоего, Пречистая, и вся спаси.

Единаго от Троицы Бога Слова, Царя Небеснаго, плотию, Царице, родила еси, Того моли, Владычице, воинству нашему подати одоление на противныя и всем верным помощь, грехов оставление и душам спасение.

Рабы Твоя, Чистая, поющия Тя и верою несумненною молящияся Тебе, светодательною Твоею и Божественною осени благодатию, яко Благодетеля всех рождшая, и покрый и сохрани от всех навет вражиих.

Песнь 8

Ирмос: Отроки благочестивыя в пещи Рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

О, преславных чудес Твоих, Чистая! Яко здатели святыя церкве Твоея, под камением тридневно бывшии, обретошася живи и безвредни, покровом соблюдены, Тебе, всех Царице, возсылающе гласы похвальныя.

Жизнь вместо смерти даровала еси, Богородице, мертвенному существу. Темже и нас, умерщвленных грехи многими, Богоневесто, неврежденны от враг соблюди и к жизни лучшей возведи, спасающи души наша.

Днесь исполнишася радости и веселия вси вернии о иконе Твоей, Богородице, яко в челюстех смерти бывшим явилася еси Жизни Виновница и источник приснотекущий, целебныя дары всем точащий и спасение подающий.

Изрядно воспети пречистаго Твоего образа и рождшагося из Тебе Младенца, истинна же Бога, чудныя иконы преславное пришествие совокупльшихся людей отвсюду, Всепетая, моление приими и прошения исполни.

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Явлению, Владычице, всечестныя Твоея иконы кто не удивится или кто не почудится? По воздуху бо сию, яко некий дар светоносный, низпослала еси земли Российстей, радостно поющей Тя и верно величающей.

Радость миру, Дево, неизглаголанную даровавши явлением пречистыя Твоея иконы, избави, Владычице, от всякия печали верою покланяющияся ей и со страхом целующия ю: о Пресвятая! вся спаси и помилуй и Царствия Небеснаго сподоби.

Рождшая, Владычице, Человеколюбца Бога, за человеколюбие посетила еси нас Божественною Твоею иконою, к нейже всегда притекающе и благолепие ея зряще, Тебе умильно вопием: спасай присно, Богородице, достояние Твое.

Устнами смиренными принесох Ти препростое сие, Всепетая, пение: понеже груб есмь, многогрешный, и недостоин по достоянию воспети Тя, но от усердия на Твоя щедроты надеяся, яко Спасителя всего мира родила еси, не возгнушайся, Царице, приими сие и спаси мя.

Светилен

Пречистый образ Твой, имже присетила еси нас, Богоотроковице Дево, чтуще, празднуем сего ныне пришествие, от него благодатию Сына Твоего и Твоею приемлюще скорбей, и бед, и напастей избавление, Мати Бога Вышняго.

 

Канон Пресвятой Богородице пред иконой «Толгская»

Песнь 1

Ирмос: Воду прошед, яко сушу, и египетского зла избежав, израильтянин вопияше: Избавителю и Богу нашему поим.

Припев: Пресвятая Богородице, спаси нас.

Ум мой, многими напастьми помраченный, просвети, Дево, Свет рождшая Божественный, волю, в добродетели унывающую, воспламени священною любовию, память, в славословии изнемогающую, укрепи, да пресветлое Твое на Толге явление воспою достойно, Чистая.

Пресвятая Богородице, спаси нас.

Храме Трисолнечнаго Света прекрасный, украси моя чувства, молюся, да, всеми чувствы целомудрен сый, честное Твое на Толге явление целомудренно воспою, Чистая.

Слава: К Твоей пресветлаго зрака иконе припадаю, окаянный: душу мою просвети, яви и тело нескверно и, от лютых мя недугов свободивши, покажи причастника наследия Небеснаго, Богоневестная.

И ныне: Якоже столпом огненным зарю Твоего зрака явила еси Богоносному святителю, тако и ныне светом благодати являеши верным Твое скорое предстательство и заступление. Призри убо на рабы, призывающие Тя и требующия Твоея помощи, Благодатная, даруй стране Российстей на враги державное одоление, виновна бо еси всех благих, вечную благость нам воплотившая, Небеси хвало и миру Помощнице.

Песнь 3

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.

Пресвятая Богородице, спаси нас.

Низложи во мне налоги бесовския, гордость в добродетелех, лицемерие в святости, тщеславие во бдении, высокоумие в благоговении и неблагодарность в благодеяниих Сына Твоего, Едина Всепетая Дево.

Пресвятая Богородице, спаси нас.

Странна мя любочестия сотвори, молю Тя, Дево, и чужда любопытства о человеческих согрешениих, дерзость и излишнее на милость Сына Твоего упование отдали от мене, да достойны Сыну Твоему плоды принесу, едина Пречистая.

Слава: Начало и худость моего естества познавая, молю Тя, Дево, даждь ми презрение самолюбия, бегство человеческия хвалы, познание собственнаго греха и собственныя немощи, едина Богоблаженная.

И ныне: Краткий всех вещей и всего мира смертнаго конец и мучение будущее за суету деяний тщеславных помышляти сподоби мя, Дево, да, благодатию Сына Твоего к пути истиннаго покаяния наставлен, вечнаго избегну проклятия, Пренепорочная.

Господи, помилуй (трижды).

Седален, глас 4-й

Столп Твой огненный едину печать благодати Твоея сильнейшую мним, Всенепорочная, сею бо в соблюдение заповедей Сына Твоего и Бога печатаеши верных сердце прекрепко, да не враг, хулящий имя Твое, преодолев лестию, поработит ны, рабы Твоя, в погибель кромешнюю. Но поспешеством благости Твоея, с Твоим знамением покажемся имениты наследницы Царствия Нетленнаго, Пречистая Дево.

Слава, и ныне: Возбранное нам и дивное избавление даровася, образ Твой честный, Преблагословенная Госпоже Дево Богородице, к немуже мы взирающе, сице к Тебе зовем: радуйся, святителем благолепие; радуйся, прибежище наше, и упование, и спасение; радуйся, красото и славо обители Толгския и всея России прибежище и защищение; радуйся, Невесто Неневестная.

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

Пресвятая Богородице, спаси нас.

Жестокосердием отягченнаго мя облегчи, немилосердием к требующим окамененную утробу мою умягчи, бурею сребролюбия объятаго мя утиши, Богоневестная Владычице.

Пресвятая Богородице, спаси нас.

Во уповании тленных и временных вещей не остави мя и пламень хищения неправеднаго, бездною милосердия Твоего покрывши, угаси во мне, Едина Приснодево.

Слава: Идолослужение в лихоимании и безбожность в заблуждении истиннаго благочестия и Православныя веры потреби от православных, Владычице, и вконец разори от единоверных, да единодушно восхвалим Тя, Едина Приснодево.

И ныне: Ум мой, молю Тя, благоустрой к познанию Единаго Сущаго Бога, к разсмотрению вечных благ, и щедролюбие даруй ми, якоже Тавифе, и благодатию Христовою украси мя, якоже Корнилия сотника, Едина Приснодево.

Песнь 5

Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Пресвятая Богородице, спаси нас.

Огнь нечистоты и всякия скверны во мне разжизательный морем благости Твоея потопи, и мглу греховную разжени, и сердце мое радости исполни, Всенепорочная.

Пресвятая Богородице, спаси нас.

Срамословию безобразному не даждь во мне места, Владычице, селение соблазнов разори, храм мя чистоты и всякаго благочестия соделай, да чистыми усты величаю Тя выну, Всенепорочная.

Слава: Смерть, суд, геенну, Царствие Небесное в памяти моей углуби, Владычице; да, поне последняя сия в памяти содержа, налоги лютых беззаконий оставлю и по смерти моей получу Тобою Царство Небесное, ныне же величаю Тя присно, Едино души моея упование.

И ныне: Любовь сея жизни преизлишнюю и временнаго плотскаго покоя рачение отложи от мене, молю Тя, Чистая, да, суетнаго помышления избег, Тобою получу нетленное на Небеси богатство, Едино души моея упование.

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Пресвятая Богородице, спаси нас.

Радости, к преогорчению ближняго низвлекущия, чужда мя соделай, Пречудная Царице, о нестроениих искренняго без печали быти не допущай мене, Человеколюбивая Владычице, и врагов злодействия избави мя, прилежно молю Тя, Всенепорочная.

Пресвятая Богородице, спаси нас.

Зависти в помысле моем не даждь вкоренятися, рождшаяся от корене свята, Дево, и братоненавидения избави мя, Чистая, да не завистию диаволею, принесшею смерть в мир, помрачен быв, лишуся Божия благодати и жизни вечныя, Всенепорочная.

Слава: Равнодушие в бедах положи во мне, Всечистая, с радующимися в благополучии духовную радость, к сетующим в злоключении сожаление даруй ми, Пресвятая, и братолюбие по томужде естеству и по приобщению тояжде благодати Христовы, низпосли ми свыше, любве пучину рождшая Дево.

И ныне: Желание крайнее согрей во мне всякому по естеству и по имени Христову от души благотворити, Благая, да не како злоб лютых душа моя исполнится, и живот мой аду приближится, и предан буду без милости, яко не сотворивый милости, во тьму кромешнюю, Всенепорочная.

Господи, помилуй (трижды). Слава, и ныне:

Кондак, глас 8-й

Чудное и Богоприятное светоноснаго зрака Твоего явление, Пречистая Дево, с верою взирающим бывает известное чаяние спасения, столпом бо огненным являющи предстательство, неусыпное и теплое за ны к Богу возсылаеши моление, имже страну Российскую от всяких бед избави, молимся, да радостными усты вопием Ти вси: радуйся, Предводительнице вечнаго блаженства.

Икос

Лучезарная Твоего явления на Толге светлость дивно блистанием своим всех осиявает, Божиею бо в Тебе сущею благодатию ближайшая Богу бывши, всем познавшим Тя истинную Богородицу земнородным подаеши независтную исцеления радость, еюже вся земля Российская преизобильно обогатившися ныне, веселится непрестанно и вопиет Тебе с единоверными: радуйся, Предводительнице вечнаго блаженства.

Песнь 7

Ирмос: От Иудеи дошедше, отроцы в Вавилоне иногда верою Тройческою пламень пещный попраша, поюще: отцев Боже, благословен еси.

Пресвятая Богородице, спаси нас.

Веселие мирское пресецы и душетленное пристрастие умертви во мне, Дево, презрение временных, желание вечных благ и нетленную радость подаждь ми с поющими: отцев Боже, благословен еси.

Пресвятая Богородице, спаси нас.

Безчинное утешение и излишество, ум вредящее, душе скверну раждающее, отлучи от мене, Дево, и сподоби, телу здравие нуждное подавающи, житию же утешение довольное, предвкушением вечных благ наслаждатися купно с поющими: отцев Боже, благословен еси.

Слава: Грехом, смерть лютую раждающим, оскверних и окалях душу мою, но Ты, Пречистая Владычице, очисти мя от сего, и настави на Богоугодное житие, украси же воздержанием и благоговением, и даждь ми чистым сердцем пети: отцев Боже, благословен еси.

И ныне: Обнови мя, омраченнаго самолюбием, просвети светом зрака Твоего Владычице, и, похоти плотския укротивши во мне, сподоби мя Рождшемуся от Тебе непрестанно чистыми усты пети: отцев Боже, благословен еси.

Песнь 8

Ирмос: Царя Небеснаго, Егоже поют вои Ангельстии, хвалите и превозносите во вся веки.

Пресвятая Богородице, спаси нас.

Возмущение души моея утоли, Всенепорочная, от клеветы наветующих избави мя, вражду греховную во мне укроти и ненависть с памятозлобием отврати от мене, Дево, да прославляю Тя, Чистая, во веки.

Пресвятая Богородице, спаси нас.

Огнь ярости, во мне зело разжженный, росою благодати Твоея угаси, хулу, умножающую души моея озлобление, и всякий вид злобы, гнездящийся в сердце моем, искорени, Дево, да прославляю Тя, Чистая, во веки.

Слава: Образ благодати Божия напиши, Всечистая, в души моей и печатию милости Твоя укрепи и утверди мя, да, всех злоб избавлен, мирными усты прославляю Тя, Чистая, во веки.

И ныне: Кротости и незлобия Твоего не отыми от мене, Пренепорочная Дево, терпение ми даруй твердое во искушении, да, радуяся, прославляю Тя, Чистая, во веки.

Песнь 9

Ирмос: Воистинну Богородицу Тя исповедуем, спасеннии Тобою, Дево Чистая, с безплотными лики Тя величающе.

Пресвятая Богородице, спаси нас.

Скорби сердца моего отложи, уныние, презирающее благодати, отыми от мене и леность ко взысканию добродетели потреби огнем благодати Твоея, Чистая.

Пресвятая Богородице, спаси нас.

Малодушием унывающаго мя оживи, отчаянием падшаго возстави, лишением и нерадением добрых мертваго воскреси, Дево, Жизнь безсмертную рождшая.

Слава: Усердие во мне к Божией воли созижди благодатию Сына Твоего, ревность ко славе Божией воспламени в сердце моем, благоговение ко святыни Божией устрой и постоянство в благодеянии даруй ми, Дево, Предводительнице моего спасения.

И ныне: Любовь Небесныя сладости в недра души моея всади, попечение вечных благ свыше посли ми, умиление к покаянию и сокрушение к исправлению даждь ми, Дево, лучезарным сиянием чудесне явльшаяся.

 

Канон Пресвятой Богородице пред иконой «Троеручица»

Песнь 1

Ирмос: Несть Тебе подобен, Препрославленный Господи: рукою бо крепкою избавил еси люди, яже стяжал еси, Человеколюбче.

Просвети душу мою, ум и сердце, Премилостивая Мати Божия, и даждь ми дар воспети Тя, крепкую Предстательницу, благих Ходатаицу и в печалех сладкое утешение.

Облак светозарный явилася еси преподобному Иоанну Дамаскину, егда молитву его скоро услышала еси и отсеченную десницу его здраву сотворила еси.

Днесь согласно торжествуют вси концы земли, вкупе Тя воспевающе, твердую Помощь и Хранительницу жизни нашея.

Твою всечестную и чудотворную икону Троеручицу стяжавши, святая обитель Хиландар вопиет Ти: радуйся, стено нерушимая и крепкое заступление обители сея.

Песнь 3

Ирмос: Свят еси, Господи Боже наш, утверди и наша сердца непрестанно вопити Тебе: праведен несть, паче Тебе, Господи.

Верных собори совокупляются днесь к прославлению Твоего благосердия, еже явила еси преподобному Иоанну Дамаскину, исцеливши отсеченную десницу его.

Очи сердец наших воспущаем к Тебе, Владычице, егда взираем на чудотворную икону Троеручицу, буди нам держава и ограждение и Вышняго причастия сподоби нас.

Юже славословят силы Небесныя, поем Тя, Всепетая Дево, спаси ны от греховнаго пленения и всякия скорби, находящия на ны.

Моли, Егоже родила еси, Мати Безневестная, о всех, притекающих к честней иконе Твоей, яко да защитит их и просветит.

Седален

Егда иноцы Хиландарстии видеша пречестную икону Твою, Владычице, на осляти, никимже водимем, ко вратом обители Хиландарския принесенную, радостию велиею возрадовашася и, покланяющеся ей, прославляху Твое к ним благоволение.

Песнь 4

Ирмос: Услышах слух Твой, Господи, яко явился еси на земли, и прославих Твою силу.

Источника Приснотекущаго источила еси, Пречистая Дево, вся удолия напаяюща, погрузи и вся наша соблазны и до конца потреби.

Лествицу Иаковлю, Гедеоново руно, радости Ходатаицу, крепость и похвалу всех верных, приидите, вси воспоим, глаголюще: радуйся, Дево Чистая.

Образ Твой честный целующе, Всечистая, к Твоей благости прибегаем и, колена преклоняюще, с плачем молим Тя: не презри нашего воздыхания, но в День судный буди нам покров и Помощница.

Слово Божие рождшая, посети нас благодатию Твоею, и омраченныя наша души и сердца просвети, и подаждь нам от бед избавление и всех грехов оставление.

Песнь 5

Ирмос: Законом заповедей Твоих, Едине Человеколюбче, просвети сердце мое, молюся, Господи, и помилуй мя.

Твоя всечестная икона Троеручица ясно всем свидетельствует, яко Ты крепость наша и сила еси, сего ради прославляем матернее Твое к нам милосердие.

Преподобный Иоанн Дамаскин слезно моляшеся Тебе пред честною иконою Твоею, Ты же молитву его скоро услышала еси и усеченней руце его исцеление даровала еси.

Радости Ходатаице, мольбы раб Твоих приими, вся противных врагов советы разжени и стадо Твое невредимо сохрани и от всех скорбей спаси.

Избавляемы прегрешений Твоими святыми молитвами, Благословенная Богородице, благоразумно Тя вси ублажаем.

Песнь 6

Ирмос: Вечер, и утро, и полудне хвалим Тя, Господи Боже наш, услыши глас наш.

Блажим Тя и славим, Богородице Дево, ибо Ты, о Благодатная, благодатию Твоею всегда нас осеняеши, покрывающи, и заступающи, и от лукавых врагов избавляющи.

Ездяй на Херувимех и Певаемый от Серафим из Твоих ложесн явися, и все человечество спасено бысть, сего ради славим Тя, яко Заступницу нашу Непостыдную.

Грядите, людие, на поклонение Божией Матери, благодать бо света Ея и нам возсия и научи пети: сподоби нас, о Благодатная, Вышняго причастия.

Ангелов радость Ты еси, Богородице, и всех человеков воистину веселие; спаси души всех, поющих Тя, Чистая.

Кондак, глас 3

Дева днесь благоволение к нам являет, Гора же Афон благодарение Ей приносит, Ангели и иноцы славословят, Троеручица из Сербии чудесно путешествует: нас бо ради прииде и вселися во святую обитель Хиландарскую.

Икос

Воистину пречудное явление: преславная икона Твоя Троеручица, юже первосвятитель сербский, Савва, от святыя Лавры Саввы Освященнаго, со благоговением, яко многоценен дар, в страну Сербскую принесе, на безсловеснем осляти от Сербии на Афон чудесно приносится и ко святей обители Хиландарстей прииде. Иноцы же обители сея, восприимше сию с радостию, яко дар Небесный, поставиша ю в олтари соборныя церкве обители, ибо разумеша сбытие сие яко явное Твое к ним благоволение. Сего ради с радостию и любовию покланяхуся всечестней иконе Твоей, целующе ю и Тебе воспевающе: радуйся, святую икону Твою залогом милости нам даровавшая, всем верным скорое поможение.

Песнь 7

Ирмос: В начале Безначальное Слово, со Отцем и Духом Сын Единородный, благословен еси, и превозносимый Боже отец наших.

Едину Тя обрете Чистую Содетель всех и вселися в Тя, яко в храм прекрасный, сего ради поем Ти: Христа Бога нашего Мати, благословенна еси.

Милостию Твоею весь мир обогащаеши и души просвещаеши, Едина Всепетая, темже воспеваем Ти: Христа Бога нашего Мати, благословенна еси.

Безневестная Дево, многоплодное древо явилася еси, снедию Небесною вся насыщающее, добродеяния всем источи, да вси поем Ти: Христа Бога нашего Мати, благословенна еси.

Образа Твоего пришествием от злых избавляемся и посрамляются вси, рабом Твоим злая являющии, сего ради вопием: благословенна еси, Мати Христа Бога нашего.

Песнь 8

Ирмос: Во образе Ангела, явльшагося в пещи огненней песнословцем, Христа Бога пойте, отроцы, священницы, благословите, людие, превозносите во вся веки.

Гласы молебными, приидите, вси воспоем Чистую Деву, се бо ныне веселие приближается, вернии спасаются, и воскликнем в веселии: Богородицу пойте и превозносите во вся веки.

Очима ангельскима глубина неудобозримая, человеческими помыслы высота неудобовосходимая прииде к нам во образе Троеручицы, поклонимся убо честному образу и возопиим: Богородицу пойте и превозносите во вся веки.

Радующеся, приступаем образу Твоему честному и, умильно молящеся, из глубины души взываем: Богородицу пойте и превозносите во вся веки.

Огнем возгарашеся гора Синайская, не терпяше бо снития славы Божия, Ты же, весь Божественный Огнь сущ, Божие Слово во чреве Твоем неопально носила еси, сего ради поем: Богородицу пойте и превозносите во вся веки.

Песнь 9

Ирмос: Безсеменное Рождество Твое, Богородице Чистая, Христа Бога нашего песньми немолчными величаем.

Днесь радуется Православная Сербия и вся Гора Афонская, изряднее же обитель Хиландарская, ибо прииде и вселися в ню всечестная икона Троеручица, являющи к нам благоволение Божия Матере.

Имеющи святую икону Твою Троеручицу во игумена себе, Твоя воля бысть, Богородице, обитель Хиландарская благоуханием святыни исполняется и непрестанно славословит имя Твое.

Цвете прекрасный, облагоухаяй вся, противных нахождения отгоняяй и веселия всех исполняяй, буди нам стена, и ограждение, и спасительное прибежище.

Егоже воспевают Ангели, родила еси, но и Девою пребыла еси, сего ради вопием Ти: радуйся, скорая Помощнице и крепкая Заступнице всего мира.

Светилен

Светом благосердия Твоего всех озаряющи, всякую болезнь и недуг исцеляеши, не забуди и нас, верных раб Твоих, но да знаменается на нас свет лица Твоего во вся дни живота нашего.

 

Канон Пресвятой Богородице пред иконой «Умиление» Серафимо-Дивеевской («Всех радостей Радость»)

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло, торжествуя, и воспою, радуяся, Тоя чудеса.

Припев: Пресвятая Богородице, спаси нас.

Умилися, умилостивися, умилосердися, Владычице, на мя, грешнаго и недостойнаго раба Твоего, дерзающаго воспети Твоя чудеса.

Пресвятая Богородице, спаси нас.

Мати Божия Пречистая, не отрини мене, окаяннаго и нечистаго, дерзающаго пети Твоя чудеса, Умиление.

Слава: Инаго прибежища и теплаго предстательства к Сыну Твоему и Богу нашему не имам, Всепетая, темже сподоби мя, многогрешнаго, восхвалити Твоя чудеса.

И ныне: Леностию одержимь и страстьми обуреваемь есмь аз, неключимый раб Твой, Владычице, недоумею по достоянию восхвалити и прославити Твоя чудеса.

Песнь 3

Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.

Пресвятая Богородице, спаси нас.

Един аз, окаянный, житием согреших паче всех человек, Пречистая, но, на щедроты Твоя уповая, зову: душевнаго мя умиления сподоби.

Пресвятая Богородице, спаси нас.

Никтоже, прибегаяй с верою под Божественный Покров Твой, Владычице, тощь от Тебе исходит, темже и аз, многогрешный, дерзая, зову: Божественнаго мя умиления сподоби.

Слава: Иаков, лествицу Божественную видев, рече: степень Божия сия, Яже еси Ты, Препетая; темже молю Тя: благаго восхождения к добродетели и мене, люте недостойнаго, сподоби.

И ныне: Юже всем благопослушную в скорбех и обстояниих душевных и телесних яви Тя Господь, Богородице Благая, тако и мне, люте обуреваемому страстьми безместными, слезы умиления подаждь и Твоего, Дево, Матерняго заступления сподоби.

Господи, помилуй (трижды).

Седален, глас 5-й

Превзыдоша главу мою греси мои, Владычице, осквернен ими есмь, и несть исцеления в плоти моей, но Ты, Многоблагоутробная, даруй души моей слезы покаяния на очищение скверн греховных и телесныя недуги уврачуй, Врача всяческих и Господа рождшая.

Слава, и ныне: Раны душевныя привлекоша на мя и болезни телесныя, Владычице, но Ты, яко Премилостивая, обоя исцели, подавающи мне неоскудный дар духовнаго умиления, и да непрестанно славлю Твое всемощное заступление.

Песнь 4

Ирмос: Седяй в Славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Пресвятая Богородице, спаси нас.

Идеже осенит благодать Твоя, Владычице, тамо всякая скорбь потребляется, веселие же водворяется, еяже и мене, недостойнаго, сподоби, вопиюща: радуйся, Богородице, всех радостей Радосте.

Пресвятая Богородице, спаси нас.

Слез не имам, окаянный аз, ниже душевнаго умиления, но Сама, яко Милосердая, сия ми подати благоволи, да взываю: радуйся, Дево Пречистая, всех радостей Радосте.

Слава: Немощна мя суща и окаянна струпы греховными, уврачуй, Пречистая, милосердия Твоего елей изливающи, и воздвигни пети Тебе: радуйся, Владычице, всех радостей Радосте.

И ныне: Омрачихся умом в житейских сластех, но Ты, Владычице, свете помраченныя души моея, разгони тьму страстей моих, да просвещся Тобою, вопию: радуйся, Невесто Неневестная.

Песнь 5

Ирмос: Ужасошася всяческая о Божественней славе Твоей, Ты бо, Неискусобрачная Дево имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Пресвятая Богородице, спаси нас.

Доколе поносит враг и низлагает долу мя, немощнаго и разслабленнаго люте душею и телом: умилися, Владычице, и низложи борющих мя врагов, Всепетая, души моей мир подавающи.

Пресвятая Богородице, спаси нас.

Вышши всех Ангел и Архангел явилася еси, Чистая Богоотроковице, темже молю Тя, стрелы вражия, на мя изощренныя, сокрушити, душе мир подавающи.

Слава: Доколе, душе моя, пребываеши в прегрешениих, конца не имущи греховному обычаю, возникни из глубины зол, взирающи державному заступлению Пречистыя, всегда на помощь тебе скорыя и благодатию Своею мир души и телу подавающия.

И ныне: Радость, и веселие, и радование Божественное, Дево Неискусомужная, нам умножися Божие: се бо, плачущиися люте, радуемся молитвами Твоими.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Пресвятая Богородице, спаси нас.

Радости Божественного величия, яко от начала нам веселия, благодарения гласы приносим, прилежно почитающе Ю, яко Предстательницу нашу.

Пресвятая Богородице, спаси нас.

Достойно Ти песнь радования, Чистая Дево, веселящеся, приносим, избавльшеся от бед Твоими молитвами.

Слава: Ангельстии языцы достойно Твоя хвалы воспети не могут, Чистая, мы же ныне, рабски вземшеся, радование Гавриилово приносим Ти.

И ныне: Яко Божественное прибежище, мы покров Твой вси стяжавше к Богу, в напастех, и в гонениих, и гресех к Тебе прибегаем и Тобою изменение приемлем, Пречистая.

Господи, помилуй (трижды). Слава, и ныне:

Кондак, глас 3-й

Юже подражая неплодную смоковницу, аз, окаянный, умиления плода отнюд не приношу и посечения страшуся, но, взирая к чудотворней иконе Твоей Умиления, Владычице, стеню от сердца и вопию: умилися, Благосердая, и мне, окамененному сердцем, благоволи подати душевное и сердечное умиление.

Икос

Превзыдох грехи моими блудницу, и блуднаго, и мытаря, и разбойника, и ниневитяны, аз един, окаянный паче всех человек, и, лишився благодати и дерзновения ко Господу, стеню от сердца и вопию: Тя Ходатаицу и Споручницу спасения многогрешней души моей благосотвори, подающи ми душевное и сердечное умиление.

Песнь 7

Ирмос: Не послужиша твари Богомудрии паче Создавшего, но, огненное прещение мужески поправше, радовахуся, поюще: препетый отцев Господь и Бог, благословен еси.

Пресвятая Богородице, спаси нас.

Реку неисчерпаемую милости Твоея к грешным всем, Владычице, изливаеши, темже молю: напои мою жаждущую душу и иссохшее грехи сердце мое ороси, да, благословя, воспою: препетый отцев Господь и Бог, благословен еси.

Пресвятая Богородице, спаси нас.

Яже всем благопослушная в скорбех и обстояниих душевных и телесных, Владычице, не отвержи и мене, недостойнаго, но сподоби пети: отцев Господь и Бог, благословен еси.

Слава: Не отрини, Богородице, мене, уязвленнаго советом змииным, не возгнушася мене, смраднаго грехи многими, но сподоби всегда пети: отцев Господь и Бог, благословен еси.

И ныне: Егда престоли на Суд поставятся и Судищу Христову предстанут вси земнороднии, тощи яви мне, Владычице, Матернее Твое заступление и неоскудную помощь, вопиющу: отцев Господь и Бог, благословен еси.

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела и превозносите Его во вся веки.

Пресвятая Богородице, спаси нас.

Страха мя избави, о Владычице, злобы и воздушных мытарств. Покажи на мне, недостойнем, велию милость Твою, воспевающем: Господа пойте, дела, и превозносите Его во вся веки.

Пресвятая Богородице, спаси нас.

Избави мя, Пренепорочная, озлобления злых человеков и лукавых бесов, трепещут бо имене Твоего великаго, яко дым исчезают; мене же в умилении сердца сподоби пети: Господа пойте, дела, и превозносите Его во вся веки.

Слава: Темныя власти князя, всегда борющаго мя, немощнаго и унылаго, разжженныя стрелы угаси, Всепетая, и сподоби мя благодарственно воспевати: Господа пойте, дела, и превозносите его во веки.

И ныне: Пение мое приими убогое, Всемилостивая Госпоже Дево, Владычице Богородице, Матерним Твоим милосердием покрывающи поющия: Господа пойте, дела, и превозносите Его во вся веки.

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Пресвятая Богородице, спаси нас.

Егда изнемогати крепости моей во исходе души моей грешней от окаяннаго и сквернаго сего телесе, тогда наипаче яви на мне, недостойнем, крепкую мышцу Твою, Всеблагая, даждь в час смерти моея радостно взывати Тебе: радуйся, Всеблаженная Богородице, Чистая Приснодево.

Пресвятая Богородице, спаси нас.

Нищ и убог есмь от дел благих, не имый умиления душевнаго, Премилостивая, Ты Сама дарствуй ми, да благодарственно вопию: радуйся, Всеблаженная Богородице, Чистая Приснодево.

Слава: Иссопом милосердия Твоего окропи мя, Пречистая, да очищуся от тяжких и лютых беззаконий моих и во умилении души да взываю от сердца: радуйся, Всеблаженная, Чистая Приснодево.

И ныне: Еже помыслих в души моей, по силе принесох пение Тебе, Владычице, не отрини убо обычным Твоим милосердием и не омерзи мною, многогрешным и нечистым, но сподоби всегда во умилении пети Тебе: радуйся, Всеблаженная Богородице, Чистая Приснодево.

 

Канон Пресвятой Богородице пред иконой «Утоли моя печали»

Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Пресвята́я Богоро́дице, спаси́ на́с.

Я́же все́м удо́бь послу́шная в ско́рби и в печа́ли помога́ющая, Богоро́дице Блага́я, благода́ть пода́ждь пе́ти Тя́ дерза́ющим, Влады́чице, скорбя́щих Ра́досте.

Многобога́тную благода́ть стяжа́вши, Влады́чице, дерзнове́нною Твое́ю моли́твою пресла́вно изми́ мя́ от напа́стей, убо́гаго раба́ Твоего́, скорбя́щих Ра́досте.

От вра́г ви́димых и неви́димых изба́ви, мо́лимся, к Тебе́ прибега́ющих, Богоро́дице, и разори́ вся́к сове́т борю́щих на́с.

Отыми́ поноше́ние челове́ческое и клеветы́ наве́тник от мене́, Богоро́дице, молю́ Тя́, да усе́рдно сла́влю Го́спода, Его́же пита́ла еси́.

Пе́снь 3.

Ирмо́с: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Враго́в наве́ты разори́ су́етныя, Всепе́тая Богоро́дице, и не оскуде́й моли́твами Твои́ми, снабдя́щи на́с, восхваля́ющих Тя́.

При́зри, Чи́стая, ми́лостивным Твои́м о́ком и изба́ви мя́ вся́каго наве́та ви́димых и неви́димых враго́в, ослепи́вши зе́ницы оче́с и́х.

Зло́е нападе́ние враго́в, я́ко о́гнь, паля́щее, и́щущих всегда́ погуби́ти на́с, Де́во, росо́ю моли́тв Твои́х угаси́.

Неугаси́мая лампа́до, заря́ присносия́тельная, но́щию мя́ скорбе́й одержи́ма просвети́ моли́твами Твои́ми, ро́ждшая Со́лнце сла́вы — Христа́.

Седа́лен, гла́с 2:

Моле́ние те́плое и стена́ необори́мая, ми́лости исто́чниче, ми́рови прибе́жище, приле́жно вопие́м Ти́: Богоро́дице Влады́чице, предвари́, и от бе́д изба́ви на́с, Еди́на вско́ре предста́тельствующая.

Пе́снь 4.

Ирмо́с: Услы́шах, Го́споди, гла́с Тво́й, его́же ре́кл еси́, гла́с вопию́щаго в пусты́ни, я́ко возгреме́л еси́ над вода́ми мно́гими, Твоему́ свиде́тельствуяй Сы́ну, ве́сь бы́в соше́дшаго Ду́ха, возопи́: Ты́ еси́ Христо́с, Бо́жия му́дрость и си́ла.

Моли́тву неусы́пну, заступле́ние тве́рдо мо́лим: умилосе́рдися, и ви́ждь на́шу нестерпи́мую печа́ль, боле́зни, ско́рби, стра́сти, и благопреме́нно посети́, Ма́ти Бо́жия, ра́дость ско́рую подаю́щи.

Не неприча́стни есмы́, Влады́чице, Твоего́ заступле́ния в ско́рбех, те́мже и ны́не на́м помози́ вско́ре, лю́те обурева́емым, ру́ку простира́ющи, Чи́стая. Бу́ди ми́лостива боле́знем на́шим, Ма́ти Бо́жия, ра́дость ско́рую подаю́щи.

Не упова́ша, Влады́чице, на Тя́ беззако́ннующии, но упова́ша на язы́к челове́чь, при́сно зави́стно излия́вшийся, непра́ведно пролия́ти кро́вь и́скренняго, рыка́юще, Ты́ же, Чи́стая, че́люсти и́х сокруши́.

Смири́, Влады́чице, враго́в вознесе́нную вы́ю велере́чующих, сове́ты, и злонра́вия, и сердца́, поуча́ющаяся злы́м, на мя́ по вся́ дни́, кре́пость же и побе́ду пода́ждь призыва́ющим Тя́, Ма́ти Бо́жия, ра́дость ско́рую подаю́щи.

Пе́снь 5.

Ирмо́с: У́гль Иса́ии проявле́йся, Со́лнце из де́вственныя утро́бы возсия́, во тьме́ заблу́ждшим, Богоразу́мия просвеще́ние да́руя.

Моли́твеннице нело́жная, упова́ние христиа́н, Обра́дованная, приими́ мольбы́ от на́с, приле́жно призыва́ющих и моля́щихся Тебе́.

Исто́чник Тя́ жи́зни су́щий, Чи́стая, безсме́ртия источа́ющий во́ды, земноро́днии, позна́вше, ублажа́ем.

Вооружи́ся на ны́ лука́вно вра́г, язы́ком, я́коже мече́м, погуби́ти хотя́, но Твое́ю, Богороди́тельнице, кре́постию предвари́.

Пучи́ну, Чи́стая, заступле́ний кто́ изочте́т си́лы Твоея́? Те́мже на́с, су́щих в ну́жде, ско́ро предвари́.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Целому́дрия су́щи хода́таица, призыва́ющим Тя́ ны́не яви́ся и от вся́ких изба́ви напа́стей и бе́д, Богоневе́сто.

Злоде́йства вра́жия разори́ и клеветы́ непра́ведныя уста́ви, Благослове́нная Пречи́стая, избавля́ющи непови́нныя от ско́рби.

Лю́тыми грехи́ окруже́ни и напа́стными беда́ми потопля́еми, под боже́ственный покро́в Тво́й прибега́ем, Ма́ти Христа́ Бо́га.

Неискусому́жно ро́ждши Го́спода, яви́ся по рождестве́ па́ки де́вствующи. О, пресла́внаго чудесе́, в Тебе́ соде́ланнаго, Богоневе́сто!

Конда́к, гла́с 6:

Не вве́ри мя́ челове́ческому предста́тельству, Пресвята́я Влады́чице, но приими́ моле́ние раба́ Твоего́: ско́рбь бо обдержи́т мя́, терпе́ти не могу́ де́монскаго стреля́ния, покро́ва не и́мам, ниже́ где́ прибе́гну, окая́нный, всегда́ побежда́емь, и утеше́ния не и́мам, ра́зве Тебе́, Влады́чице ми́ра, упова́ние и предста́тельство ве́рных, не пре́зри моле́ние мое́, поле́зно сотвори́.

И́кос:

Простри́ дла́ни Свои́, и́миже все́х Влады́ку я́ко младе́нца прия́ла еси́, не оста́ви на́с, всегда́ наде́ющихся на Тя́, бо́дренною Твое́ю моли́твою и неисче́тною бла́гостию уще́дри на́с, и пода́ждь душа́м на́шим милосе́рдие Свое́, в ве́ки источа́ющи: Тебе́ бо и́мамы, гре́шнии, Засту́пницу от находя́щих на ны́ бе́д и зо́л. Но, я́ко иму́щая милосе́рдия щедро́ты, ускори́ на моли́тву, и потщи́ся на умоле́ние, заступа́ющи при́сно, Богоро́дице, чту́щих Тя́.

Пе́снь 7.

Ирмо́с: Да пресла́вное рождество́ Твое́, Христе́, е́же от Де́вы, прообрази́ши я́ве, неопали́мы в пещи́ о́троки сохрани́л еси́, пе́сньми пою́щия Тебе́: отце́в Бо́же, благослове́н еси́.

О, благоутро́бия Твоего́, Де́во Чи́стая! Реши́ши бо безме́рныя печа́ли и напа́сти призыва́ющим в ну́жде и обстоя́нии. Те́мже и ны́не помози́, Благослове́нная, Тя́ восхваля́ющим.

Покажи́ ско́рое твое́ заступле́ние, покажи́, я́ко мо́жеши я́ко Ма́ти Бо́га, призыва́ем Тя́ от се́рдца, со слеза́ми припа́дающе, ско́рбь укроти́ и боле́знь рабо́в Твои́х вско́ре.

Уста́ челове́ков, я́ко льво́в лю́тых, гро́ба тяжча́йше отверзо́шася го́рько поглоти́ти мя́, но Ты́, Богоро́дице, яви́ся наде́жда ненаде́ющимся и низложи́ кре́пость и́х, Благослове́нная.

Да у́зрят врази́ и постыдя́тся, да уразуме́ют и ви́дят Твою́, е́же по на́м сопроти́в борю́щую си́лу, и в про́пасть преиспо́днюю низложи́ и́х, Благослове́нная, Наде́ждо ненаде́ющихся.

Пе́снь 8.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Прибе́жище на́ше и ми́ру ра́дование, Богороди́тельнице, умилосе́рдитися потщи́ся и спе́шно благода́ть Твою́ пода́ждь на́м, оскорбле́нным, и заступи́, Блага́я, Твоя́ рабы́.

Сове́т су́етен совеща́ша лю́те на ны́ безбо́жных со́нмища, я́коже пре́жде Ахитофе́л. Но вопие́м: Твои́ми моли́твами се́й разори́, низло́жши си́х кре́пость, Богоро́дице.

Призыва́ющих Тя́, Богоро́дице, от души́ нело́жно во вся́кой ско́рби, и в боле́знех разли́чных, и беда́х лю́тых спе́шно услы́ши, Влады́чице, си́х избавля́ющи при́сно моли́твами Твои́ми.

Да и́мя Твое́, Богоро́дице, на земли́ славосло́вится, И́же, из Тебе́ возсия́в, гре́шником держа́вную наде́жду и сте́ну Тя́ дарова́: Тобо́ю бо вся́кое дыха́ние к Бо́гу притека́ет.

Пе́снь 9.

Ирмо́с: Недоуме́ет вся́к язы́к благохвали́ти по достоя́нию, изумева́ет же у́м и преми́рный пе́ти Тя́, Богоро́дице: оба́че Блага́я су́щи, ве́ру приими́, и́бо любо́вь ве́си Боже́ственную на́шу, Ты́ бо христиа́н еси́ Предста́тельница, Тя́ велича́ем.

Да загради́тся вся́к язы́к, лука́вым поуча́яйся, да молча́т устна́ льсти́вая и уста́, непра́ведно глаго́лющая на пра́веднаго беззако́ние, горды́нею и за́вистию вражде́бною вку́пе, Богоро́дицы моли́твою и святы́х Христо́вых.

В моли́твах бо́друю, Чи́стую Богоро́дицу призыва́ем вси́, боле́знию и ско́рбию одержи́ми, взыва́юще: Влады́чице Чи́стая, ско́ро изба́ви от обдержа́щих боле́зней рабы́ Твоя́ при́сно, я́ко по Бо́зе Засту́пницы ины́я не и́мамы.

Отча́явшихся ве́лие прибе́жище, обурева́емых ти́хое приста́нище, Ты́ еси́, Богоро́дице. Те́мже и мы́ притека́ем, взыва́юще: да не постыди́мся, Ма́ти и́стиннаго Живота́, но да, благодаря́ще, усе́рдно Тя́ велича́ем.

Приими́, Отрокови́це Пречи́стая, боже́ственную пе́снь, воздава́ющи благода́ть на Тя́ наде́ющимся, и ми́р испроси́ Це́рквам при́сно посла́ти и Оте́честву на́шему одоле́ния и побе́ды, да христиа́нский вся́к язы́к Тя́ велича́ет.

Свети́лен:

Те́плое заступле́ние в беда́х, в печа́лех утеше́ние, и к Бо́гу примире́ние, Е́юже тли́ изба́вихомся, Богоро́дицу, ве́рнии, ублажа́ем.

Сла́ва, и ны́не: Тя́ Предста́тельницу и́мамы, гре́шнии, о, Пресвята́я Де́во, Ты́ ми́лостива к на́м сотвори́ Сы́на Твоего́ и Бо́га на́шего ма́терними Твои́ми моли́твами.

 

Канон Пресвятой Богородице пред иконой «Феодоровская»

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

Отверзый ум разумети Писания учеником Твоим, Господи, отверзи ныне и наша сердца к разумению величия Твоего и Матери Твоея, да с Нею боголепно прославим Тя.

Отверсти толкущим двери милосердия Твоего обетовавый, Владыко наш, отверзи нам утробы человеколюбия Твоего, имея на сие молящую Тя Ходатаицу.

Отверсто иногда бысть молитвою Илииною небо, ради беззаконновавшаго Израиля заключенное, отверст да будет и нам, грешным, вход в Небесная предстательством Твоим, Богородительнице.

Отверзшая рождеством Твоим врата вечная, Богородительнице Пречистая, отверзи предстательством Твоим заключенныя сердец наших двери, да Сын Твой и Бог наш внидет и освятит я.

Песнь 3

Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди в Божественней Твоей славе венцев славы сподоби.

Твоего плотскаго еже на земли смотрения да незабвенно устроиши воспоминание, дал еси нам, Владыко, икону Твою и Рождшия Тя, темже, взирающе на оную, молим Тя: руководи нас к познанию и люблению Тебе, воплощеннаго Бога и Спаса душ наших.

Твоея Пренепорочныя Матере всечестный образ любовию объемлюще, из глубины души взываем к Тебе, живущему на Небесех: начертай на сердцах наших красный образ добродетелей Ея, да величаем Тя, Господа и Спаса нашего.

Твой всечестный образ, Владычице, любезно на земли приемлюще, зовем к Тебе, сущей во славе Небесней, да присно ходатайствуеши нам благодать мыслити и творити достойная Твоего величия, еже сотвори Тебе Сильный.

Твоих благодеяний воспоминание, творимое днесь, движет сердца наша со устнами к благохвалению Твоему, Владычице, но сотвори, да и красный лик Твоих добродетелей привлечет сердца наша к люблению и подражанию оных.

Седален

Сии людие устнами чтут Мя, сердце же их далече отстоит от Мене,— рече иногда Господь Вседержитель ко иудеем, един внешний вид благочестия являющим. Но да и мы не туюжде с ними часть и осуждение восприимем, братие, всячески блюдемся дел, подобных лицемерию. Сего ради празднующе и всечестный сей праздник, да не явимся извне точию благоговейны, внутрь же уду зли и нечестивии пред Испытующим сердца и утробы, в простоте сердца поклонимся Ему, якоже Сам рече, Духом и истиною, да тако будем подражатели Пресвятей Деве, в Нейже не глас точию, но паче душа величаше Господа и Дух радовашеся о Бозе, Спасе Своем.

Песнь 4

Ирмос: Седяй в славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

Седяй одесную Престола величествия на высоких, снизшел еси к дольнейшим странам земли и, вселився во чрево смиренномудрыя Матере Девы, явил еси мирови, яко Ты призираеши на смирение рабов Твоих и даеши им благодать Твою, еяже да и мы сподобимся, даруй нам быти ревнители смиренномудрыя Твоея Матере.

Седяй на рамех Херувим и Серафим, благоволил еси плотию седети на объятиих Чистейшия Отроковицы, да сим покажеши нам, яко Ты, Святе святых, обитаеши в сердцах единых любителей чистоты и целомудрия, егоже рачители и нас покажи молитвами рождшия Тя.

Седящему во славе на Престоле Божества сподобилася еси Матерь быти, ради изящнейшия чистоты и смиренномудрия, ихже любители и нас покажи молитвами Твоими, да и мы сподобимся части, уготованной рачителем чистоты и смиренномудрия Твоего.

Седети во славе Сына Твоего сподобившаяся, Пренепорочная Дево, не престай молящи благость Его, да и мы, взирающе на образ святыя жизни Твоея и оному нашим жительством сообразующеся, тояжде славы на Небесех будем причастницы.

Песнь 5

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Ужасахуся и смущахуся костромстии жителие, мневше знамение Твоего о них промысла, икону Матере Твоея, во пламени сгоревшу, но сие смущение пременил еси в радость, Господи, показав им абие образ сей, от огня и пепела невредим. Сице да и мы, по обуревающих нас искушениях и напастех, присно радуемся о Твоем, еже о нас благоволении, молим Тя, Человеколюбче.

Ужасошася иногда полки нашедших на град Кострому супостатов, егда от воображения зрака лица Твоего, Господи, и Пресвятыя Твоея Матере пустил еси на сих стрелы молниины, но сей ужас да вложиши в сердца и всех, стремящихся ратоборствовати достояние Твое, молим Тя с Ходатаицею нашего избавления.

Ужасни и скорбни бывше жителие Городца, узревше икону Твою, Богомати, пренесену во град Кострому: мняху бо себе сим пренесением лишенных быти Твоего о них Матерняго благоволения, но да не и мы, таковою же иногда скорбию объяти, будем лишени знамений Твоего покровительства, не престай, Владычице, пребывающи с нами Твоею милостию.

Яко очи рабыни в руку госпожи своея, тако очи наши всегда к Тебе возводим, о, Многоблагоутробная Госпоже наша и Спасительнице Всесвятая Богородице! Призри убо на ны милостивно, царствующая на Небеси с Сыном Твоим и Богом, и ущедрити ны, грешныя, потщися, яко вся Тебе возможна суть.

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Божественное Твое разумеем истощание, Иисусе, Боже наш, егда, взирающе на образ Матере Твоея, зрим Тя с Нею яко Младенца, руками Ея держима, темже благодаряще сему Твоему еже к нам снизхождению, молим Тя, нас ради младенствовавшаго, быти нам милостива о гресех наших.

Божественнаго Твоего воплощения еже от Девы, да присно славится таинство, даровал еси нам, Христе Царю, всечестную Матере Твоея икону с воображенным на ней видом Пречистаго лица Твоего, темже и молим Тя, Вседаровитый Господи, да даси нам присно славити воплощение Твое, имже человецы Божеству соединихомся.

Божественнаго Духа нашествие бысть на девственную утробу Твою, Богомати, егда Сына Превечнаго плотию зачала еси, Егоже да и мы в сердцах наших присно имамы, ходатайствуй нам благодать Тогожде Всесвятаго Духа, еюже бывают человецы таинственною обителию Отца и Сына.

Божественных писаний любомудрое рачение с присным во храме Господни пребыванием сотвори Тя избранный ипостасныя Божия премудрости Храм, но да и мы устроимся храмы Тогожде Бога Жива, исходатайствуй нам благодать усердно внимати и последовати Сына Твоего гласу, Иже присно во храмех Его проповедуется.

Кондак, глас 8

Благодарственная приносяще Ти, раби Твои, Богородительнице, о всех, имиже благодеяла еси граду нашему, из глубины души взываем к Тебе и мили ся деем: не престани, Владычице, Матерними к Сыну Твоему и Богу нашему молитвами подавати вся благая и спасительная всем, верою и любовию вопиющим Ти: радуйся, Дево, христиан похвало.

Икос

Стена еси девам, Богородице Дево, и всем, к Тебе прибегающим, ибо Небесе и земли Творец устрои Тя, Пречистая, вселься во утробе Твоей и вся приглашати Тебе научив: радуйся, столпе девства; радуйся, дверь спасения. Радуйся, Начальнице мысленнаго наздания; радуйся, Подательнице Божественныя благости. Радуйся, Ты бо обновила еси зачатыя студно; радуйся, Ты бо наказала еси окраденныя умом. Радуйся, тлителя смыслов упраждняющая; радуйся. Сеятеля чистоты рождшая. Радуйся, чертоже безсеменнаго уневещения; радуйся, верных Господеви сочетавшая. Радуйся, добрая Младопитательнице девам; радуйся, Невестокрасительнице душ святых. Радуйся, Невесто Неневестная.

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

Не служити твари паче Творца законоположивый человеком, Спасе наш, сотвори, усердно молим Тя с Богородицею, да, Духом Твоим просвещаеми, не к рукотворенным изображением относим Боголепное служение, но чрез образ Твой возносимся умы и сердцы, к Единому Тебе, отцев Богу благословенному.

Не послужиша бывшии в пещи Вавилонстей мудрии юноши бездушному истукану, но Единому Тебе, во образе Ангела посреде пламене явльшемуся Сыну Божию, поклонишася, ихже лику и части сопричти и всех, изображением сладчайшаго зрака Твоего движимых к прославлению Тебе, отцев Бога благословеннаго.

Не послужила еси Богу нравом плотских иудеев, Пренепорочная Дево, но духом и истиною, яко истинная Раба Его, покланялася еси Ему. Темже да и мы с Тобою истиннии будем поклонницы Его, ходатайствуй нам благодать, еже не в суеверном Богопочитании, но во истинном благочестии и вере служити отцев Богу благословенному.

Не послужила еси миру и суете его, Богородительнице, но, всему предпочетши единаго Бога и закон Его, была еси усерднейшая всех Раба Господня, темже и сподобилася еси послужити велией тайне Божия воплощения, яко Богоматерь, но сотвори, да и мы, отвергшеся мира и яже суть в мире, вседушно прилепимся и послужим Единому Отцев Богу благословенному.

Песнь 8

Ирмос: Отроки благочестивыя в пещи Рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

Отроча младо нашего ради спасения был еси, Безлетный Боже наш Иисусе, Егоже воображение зряще на священней иконе, усердною в Тя верою вопием Ти: буди Воспитатель, Наставник и Покровитель младенцем и отроком нашим, да и вси во истинней вере навыкнут глаголати Тебе: Господа пойте, дела, и превозносите Его во вся веки.

Отрок дванадесятолетен бывый, Иисусе, посреде старец и учителей во святилищи пребывая, послушал еси их и, совопрошася с ними, являл еси святую ревность к Божественному закону, да сим и наша отроки наставшии тщатися во время юности стяжавати духовную, яже от закона Твоего премудрость, да и они научатся сердцы и усты, словесы же и делы превозносити Тя во вся веки.

Отроки от пещи Вавилонския избавльшему Господу молися прилежно, Богоневестная Отроковице, да дарует всем, под кров Твой прибегающим, неврежденным быти от огня искушений и пламене похотей, да, тако Тобою избавльшеся, чистыми душами и нескверными устнами благословим с Тобою Единаго Избавителя Господа и превозносим Его во вся веки.

Отроковицам Твое целомудрие и чистота да будет красота и слава, чревоносящим Твое безболезненное и святое рождество да будет сладкое утешение и отрада, всем же, всякаго пола и возраста чтущим Тя, Богоневесто, добродетели Твоя да будут единым упражнением их, яко сими токмо достойне от человека прославляется Господь, живый во веки.

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

Всякое колено Небесных, и земных, и преисподних да покланяется Тебе, яко носящему в Себе неизменный Преблаженнаго Отца Твоего образ, Иисусе. С нимиже и мы, верою просвещаеми, Тя, Истиннаго Бога, образ человеч от Девы приимшаго, боголепно величаем.

Всяка уста да заградятся суесловящих, яко несть достойно чествовати Твою и Пречистыя Матере Твоея икону, Владыко: се бо, прославив сию чудесами, научил еси достояние Твое Тебе и во образе плоти Твоея с Пренепорочною Твоею Материю прославляти и величати.

Вси роди верных, по проречению Твоему, блажат Тя, Благословенная, Христа Бога нашего Мати. С ними же и мы, верою совокуплени, благоговейно чтуще священное лица Твоего изображение, прославляем Твоя величия, иже сотвори Тебе Господь сил, с Ним же Тя величаем.

Всяк язык смертных, по достоянию, изнемогает величати Тя, над всеми превознесенную, о, Богоневесто! Темже и мы, прославляюще Тя днесь, исповедуем наше крайнее неможение, но, сие исповедующе, молим Тя, да по множеству щедрот Твоих, приимеши малое сие приношение, во знамение многия любве и усердия нас, величающих Тя.

Светилен

Свет Лица Твоего и Пресвятыя Твоея Матере явивый нам, Владыко, во всечестней иконе сей, сотвори нас, яко чада света ходити во свете заповедей Твоих, да, егда явишися во славе с Рождшею Тя, сообразны будем светлейшему солнца образу Твоея славы.