ГЛАВА 31

КАК ВСЯКОЕ ПЛАТЬЕ КРОИТИ И ОСТАНКИ И ОБРЕЗКИ БЕРЕЧИ

В домовитом обиходе коли лучится какое платье кроити себе, или жене, или детям, или людям; комчато, или тафтяно, или изуфрено, или кушачно[2] или зенденинное[3], или сукняное, или армячное, или сермяжное, или кожи[4], или сагадок[5], или на седло, или ометюк[6], или сумы, или сапоги, или шуба, или кафтан, или терлик, или однорядка, или картель[7], или летник, или каптур, или шапка, или нагавцы[8], или какое платно не буди, и сам государь или государиня смотрит и смечает; остатки обрезки живут; и те остатки и обрезки ко всему пригожаются в домовитом деле: и поплатити ветчанаго тогож портища, или к новому прибавити, или какое ни буди починити, а остаток или обрезок как выручити; а в торгу устанешь прибираючи в то лицо, во три дорога купиш[9], а иногды и неприбереш. А коли лучится какое платно кроити молоду человеку, сыну или дочери, или молодой невестке: летник или кортель, или шуба с паволокою, или опашень изуфрян[10], или комчат, или обяр[11], или атлас, или бархат, или терлик, или кафтан и что ни буди доброе, и, кроячи да загибати вершка на два и по три на доле, и по краем, – и по швам, и по рукавом; и как выростит годы в два или в три, или в четыре и распоров то платно, и загнутое оправити, опять платно хорошо станет лет на пять и на шесть. Кое платье не всегда носить, то так кроити.

 

ГЛАВА 41[1]

СЕБЕ НА ОБИХОД КУПАТИ ВСЯКОЙ ТОВАР ЗАМОРСКОЙ, И ИЗ ДАЛЬНЫХ ЗЕМЕЛЬ

А бобр у гостя купити целой, купить и два или три, или сколько хочеш; да и сделати даш дома, на все пригодится, а у рубля полтина избудется[2]. А тафты косяк, или сукна постав, или разных поставцов; или шелку цветнаго литра или болши, золота и серебра потому же, или белки[3] или всякаго запасу, коли чему навоз, по своему обиходу смотря, и по промыслу, и по рукоделию и по своей семьи, и по мастерицам, и по рукодельникам, и по своему прожитку, так и покупати и запасати, коли чего много и дешево, ино и споро и прибылно. Да только лучится мастерок свой, портной, и сапожной и плотник: ино во всяком запасе и в остатках и в обрезках прибыль будет: или к новому портищу остатки пригодятся, или ветчанаго починити, а ты того не прикупаешь. А лес, и дрова, и бочки, и мерники, и скалы, и дубник, и лубы, и липняк, и доски, и желобы, коли тому навоз в зиме на возе[4], а в весне[5], на плотех и в лодьях на год запасеш, у всего недодаш; а у рубля четверть[6] сбудется; а у просола коли занадобится, не любое купиш, а денег слишком даш. А всякой товар и запас, коли ему навоз всякому товару; а дешево, хоти не надобе, а в ту пору купи и свою нужду исполниш, а чего запасено слишком, на том деньги будут[7] с прибылью.

 

ГЛАВА 46

КАК ЧЕЛОВЕКУ ЗАПАСНОЕ ПИТИЕ ДЕРЖАТИ ПРО СЕБЯ И ПРО ГОСТЬ И УСТРОИТИ ТО ПРИ ЛЮДЕХ

А коли одинокой человек, а небогатой, а запасистой[1] держит про гость пивцо в запасе, переварки на марте сварив ячной и подсытив. А обычное пивцо есть же, а медку разсытив к празднику: и в даль поблюдет в леду засечено, медок и мартовское пивцо. Аще когда праздник, или имянины, или свадба, или родины, или крестины, или по родителях память, или лучится гость из нивесть[2] любо приезжий[3], или избранной человек, или игумен честной и, одново часу из одной бочки в пять оловянников меду нацыдят, или погодят смотря, в бочки в малыя, да запаснаго мушкатцу в мешечке, а гвоздики в другом мешечке держут; а в третьем мешечке всяких благовонных зелей: в печи поджарив[4], в оловянники покласти, или в бочки и в горячее вино; а вишневаго морсу и малиноваго в два оловянника; патоки готовой, ино в одном часе[5] шесть[6] медов про гость, да два вина, да вишневаго морсу и в переварку в оловеничок подает, ино два пива. И кто запасом живет, и у порядливой жены ества запасная же, ино всегда гостя не сором, хотя пир, нужного чего прикупит, а то дал Бог всего дома полно[7].

 

ГЛАВА 47[1]

ТОМУ ЖЕ ПИВОВАРЕНОЙ НАКАЗ: И КАК ПИВО ВАРИТИ И КАК МЕД СЫТИТИ, И ВИНО КУРИТИ

А в пивоварнюю поварню[2], на пиво, и на брагу, и на кислые шти, солоду, и муки, и хмелю отдати; то б было все в писме, и смерено, и в счете. А коли пиво затирают, – ячное, или овсяное, или ржаное, или хмель парят, и у квашня[3], и у сливная[4]дозирати самому, все было бережно и чисто, и не разкрадено, и неизпрокужено, и за посмех не выпито[5]. А коли пиво варят, – ино отпарив пиво, и силен толко солод, ино бочку и болши другова пива нарядят[6], а после всякаго пива водою на гущу поливают; воды взогрев ведер с тридцать и с сорок на ячную гушу, и с пятдесят и шестдесят взогрев взлити, или болши по вари[7] смотря; и тот исток приквасишь, – добре хорошо семье пити; а исперва, последу приквасив, на кислые шти пригодится. А уксус ставити из добраго сусла, и в бережении, и в тепле держати, и в чистоте приходити к нему. А хмелины пивные копити на винную брагу, и беречи лете на леду с суслом, чтобы не испортити, а дрожи такожде копити на винную брагу, и в перепуск, и бережно держати; а на тот запас ветчаные суды пригожаются, толко б были в запасе, даи перекреплены. А мед сытити самому[8], а как кишит хоромина та запечатати, самому толко назирати, и ни кто б тут не ходил; а сливати самому же; а на сливанье не были. А вино курити, самому неотступно же быти, или кто верен[9] и приказати; и у перепуска потому же[10]; да смечать по сколку из котла ораки, первой и другой, и последу уточат; а у перепуску потому же смечать: колко из котла укурит, – перваго, и средняго, и последу. И на погреб, и на ледник, и в сушило и в житницы, – без себя никого не пускати; и везде самому отдавати, и отмерити, и отвесити; и сколко кому чего даст, то все записати.

 

ГЛАВА 48[1]

У ПОВАРОВ, И У ХЛЕБНИКОВ И ВЕЗДЕ ВСЯКОЙ ПОРЯДНИ КЛЮЧНИКУ ДОЗИРАТИ

А у поваров бы, и у хлебников, и у всяких приспешников, была б вся порядня: и котлы, и сковороды; и горшки медные, и железные, и таганы, и решотки[2], и чюмичи[3] и корцы, все б чисто, и цело[4], и звары: всеб было в счете и в писме, а медяное, и оловянное и в весу; а по вся дни у ключника то б было все пересмотрено; чтоб было все по числу и перекреплено, и вымыто, и в суши, и на месте лежало замкнуто; а бочка и всякия суды перемыты, и переклеплены и лежало б в суши и замкнуто.

 

ГЛАВА 49[1]

МУЖУ С ЖЕНОЮ СОВЕТОВАТИ, КАК КЛЮЧНИКУ ПРИКАЗАТИ О СТОЛОВОМ ОБИХОДЕ, И О ПОВАРНЕ, И О ХЛЕБНЕ

По вся дни, и по вся вечеры, исправя си долг душевный во утрии вставати по звону; и, после пения, мужу с женою советовати о устроении домовнем: на ком что положено, и кому которое дело приказано ведати, и тому наказати: что кому устроити ести и пити, про гости, или про себя. Или ключник по государеву наказу прикажет, что купити на обиход; и купив, что принесут, то сметити и правды[2]смотрити[3]; а повару отдаст что варити, и хлебнику, и на приспехи на всякие потому же отдаст. А всегда б то было в памяти, что государю сказати. А в поварню ества мясная, и рыбная и печи, и варити отдавати в число; – колко чего государь велит, и колко блюд; да и печено и варено у повара взяти в число же. А на стол всякая ества стави по государеву наказу, по гостем смотря; а хлебечнои приспех, потому же дати в число и взяти в число же. И всякой ествы, что у стола останется, и цело, и неедено[4], и ух, приспеху всякаго и целую еству перебрати; а початое о себе и мясное, и рыбное, и покласти в блуды[5] чистые, и твердые, и покрыти, и в леду засечи; а початая ества, и всякие остатки, давати на обиход, как пригоже; а целое блюсти про государя и про государыню и про гости. А питие в стол давати по приказу, по гостям смотря и без гостей. А государыне брага[6] и квас. А суды б всякие столовые, и поваренные, всегда после стола в горячей воде перемыти, и переполоскати, и перетерти, и высушить; все, собрав, и счести, и устроити за замком; где что живет, и у кого на руках. А столовые суды оловянники, и братины[7], и ковши, и судки столовые всегда беречи; уксусницы, и перешницы, росолники, салоницы, ложки, блюда, ставцы, и скатерти, и фаты всегда б было чисто и готово на стол[8]; и стол бы был чист, и скамьи, и лавки и у избы[9]; и образы на стене уставлены; а изба мятена и устроена[10]. А уксус и огуречный расол, и лимонной, и сливной все бы цежено в ситце; и огурцы, и лимоны, и сливы такожде бы очищено и перебрано, и на столе б было чисто и искусно. А рыба прутовая, и всякая вялая, и всякая студень постная или мясная, и икра, и капуста, очищено и по блюдам раскладено[11], изготовлено. А питие б всякое чисто, в ситцо б цежено; а ключник, и повары, и хлебники, и всякие стряпчие[12], сами б к столу, при людех, устроились чистенко; а руки б были мыто чисто во всякой стряпни. А всякие суды, и всякая порядня у ключника, и у всех стряпчих, все б было измыто[13], и чисто, и бережно; и у государыни и у ея слуг потому же[14].

 

ГЛАВА 50[1]

КЛЮЧНИКУ ПРИКАЗ КАК ПИР ПРИЛУЧИТСЯ

А коли пир болшой, ино всюду[2] самому дозирати, и в поварне[3], и в хлебне; а за столом, ества отдавати приставити добра человека; а у поставца, у пития, и у судов, бережной же человек надобно[4]. А в стол питие подавати по государеву наказу, кому что велено, а на сторону никому не давати без веления[5]. И как пир минет: и весь запас серебрянной, и оловянной[6], такожде и хлебной: и ества перебрати, и питие дозрети[7], початое дополнивати. А в пир на дворе бережной[8] человек надобе, – всего б смотрил и берег, и домашние всякие порядни: не украли б чего, и гостя б пьянаго беречи, чтоб не истерял чего[9], и брань бы не была[10]. А как стол отойдет[11], ино суды сметити всякие, и перемыти велети; и всякая ества перебрати, мясная, или рыбная[12], и студень, и ухи; и устроити по прежеписанному. А котораго[13] дни пир[14], того вечера, или по рано, самому государю пересмотрити: все ли по здорову; и сметати, и перепытати у ключника подлинно: колко чего седено, и испито, и кому что отдано, и кому что послано; и всякой бы расход, во всяком обиходе, был в ведоме; и судыб всякие[15] в счете; и умел бы государю сказать про все прямо[16]: что разошлось[17]. И толко, дал Бог, все по здорову, и неистеряно, и не испорчено ничто; ино гусударю ключника[18] и иных служек потому же, и поваров, и хлебников, которые вежливы и бережно стряпали, а не пили: ино всех[19] и накормити, и напоити[20].

 

ГЛАВА 51

НАКАЗ ОТ ГОСУДАРЯ КЛЮЧНИКУ: КАК ЕСТВА ПОСТНАЯ И МЯСНАЯ ВАРИТИ, И КОРМИТИ СЕМЬЯ В МЯСОЕД И В ПОСТ

А и то б было от государя в наказе ключнику: в мясоед какая ества отдавати в поварню, про государя, и про домашней обиход, и про гость; а в постные дни потому же. А о питьи потому же, наказ надобет от государя ключнику: какое питие носити про государя, и государыне[1], и про семью, и про гость. И то все чинити, и делати, и отдавати по государеву наказу; а о всяком обиходе[2], как государь накажет, так и творити. И государю с женою о том, о всяком обиходе, в домашнем, советовати, и ключнику наказывати, как челядь кормити по вся дни[3]; в мясные дни: хлеб решотной, и шти да каша с ветчиною житкая, а иногда густая, с салом, переменяя что[4] мяса[5], как лучится дадут к обеду. А в неделю, и в праздники: иногды пироги, а иногда кисель, а иногда блины, или иная[6] ества; а у[7] ужены шти, да молоко, или каша. А в постные дни: шти да каша житкая, – иногда с соком, иногда сущ, иногда репия[8]; а у ужины[9]: иногда шти, капуста, толокно; иногда расол, иногда ботвинья. По неделям, по праздникам: к обеду[10] пироги какие, или гуща, или яглы, или селедовая кашка[11], и что Бог лучит; а у ужены[12]: капуста, росол, ботвинья, толокно. А у жен, у челядиных, и у девок, и у робят потому же; а страдным[13], людем ества таже, да прибавь остатков столовых государевых и гостиных; а лутчие люди, которые торгуют[14], тех государь в столе у себя сажает. А коли гости едят, и они стряпают; а после стола едят ествы, с прибавкою из столовых остатков. А у государыни мастерицам и швеям потому же: сама за столом их кормит и подает им от себя. А челяди[15] исток пивной; а в неделю, и в праздники, и браги дадут, а торговым всегда брага; а питием[16] государь[17] жалует, или[18] прикажет; а в прохлад и самим пивца дадут[19].

 

ГЛАВА 52

В ЖИТНИЦАХ И В ЗАКРОМЕХ О БЕРЕЖЕНИИ

В житницах бы у ключника было всякое жито и всякои запас: солод и рожь, и овес, и пшеница, незгноено, и не накапалоб, и не навяло, и не проточено от мышей, не слеглося бы, и не затхлобы ся. А что в бочках[1], или в коробях[2], и всякой запас, и горох, и конопли, и греча, и толокно, и сухари, и ржаные, и пшеничные то б было все покрыто, и судно твердо, и не намокло б, и не гнило[3], и не затхлося. А всему бы тому была мера и счет: и сколко чего из села, и с торгу привезут, – записати; а что весовое, то взвесити; и колко и коли отдаст чего на расход, или взаимы, и на всякой обиход, или кому государь велит, что дати, то все записати же. И сколко чего сделают, то б было ведомо же: и хлебы, и колачи, и пиво, и вино, и брага, и квас, и кислые шти, и уксус, и высевки, и отруби, и гуща всякая, и дрожи, и хмелины; то б было у ключника все в мере и записано, а хмель, и мед, и масло, и соль вешено.

 

ГЛАВА 53

В СУШИЛЕ ТАКОЖ СМОТРИТИ

А в сушиле мясо полтево, и солонина ветрена, полотки, и языки, и прутовая рыба, и пласти, и всякая рыба, вялая, и ветреная, и в рогожах, и в коротнях, и вандыши, и хохолки: чтобы было все в счете и в письме: сколко чего куплено и вывешено, и провялено, и положено; и держено бы то бережно[1] и не изгноено, и не измочено, и не измято; убережено б от всакой пакости[2] и всегда замкнуто[3].

 

ГЛАВА 54

В ПОГРЕБЕ И НА ЛЕДНИКЕ ВСЕГО БЕРИЧИ

А в погребех, и на ледниках, и на погребицахе[1], хлебы, и калачи, сыры, и яйца, забела, и лук, чеснок, и мясо всякое свежее, и солонина, и рыба свежая, и просолная, и мед пресной, и ества вареная, и мясная, и рыбная, и всякой запас естомой[2], и огурцы, и капуста, соленая и свежая, и репа, а всякие овощи, и рыжики, и икра, росолы ставленые, и морсы[3], квасы яблочные; и воды брусничные, и вина фряские[4], и горючие[5], меды всякие, и пива, – сыченые, и простые, и брага, – и всякаго того запасу ключнику ведати; и сколко чего на погребе[6] поставлено, и на леднике, и на погребце, – всеб то сочтено было, и перемечено: что в полне и что не в полне; и перемечено[7], и записано: и сколко куды чего отдаст по приказу государеву, – и сколко чего разойдется; то б было все в счете, – было б что государю сказати, и отчет во всем дати; а всеб то было чисто, и в покрыте, и не затхлося, и не заплесневело[8], и не прокисло; а вина фряские, и сыченые, перевара, всякое лутчее питие, в оприченном[9] погребе, за замком держати; а сам бы тамо ходил.

 

ГЛАВА 55

А В КЛЕТЕХ, И В ПОДКЛЕТЕХ, И В АНБАРАХ УСТРОИТИ ВСЯКАЯ ПОРЯДНЯ КЛЮЧНИКУ ПО ГОСУДАРЕВУ НАКАЗУ

А в клетех, и в подклетех, и в анбарех, устроити по государеву наказу, ключнику, всякая порядня, платье ветчаное, и дорожное, и служне[1], и полсти, и епанчи, и кепеняки[2], и шляпы, и руковицы, и медведны, и ковры, и попоны, и войлоки, и седла, и сайдаки[3] и с пики[4], и стрелами, и сабли, и топорки, и рогатины, и пищали, и узды, и оброти, и морхи лысины; и похви, и остроги, и плети, и кнуты, и возжи: моржовые, ременные, и шлеи, и хомуты, и дуги, и оглобли, и миндеры[5], и мехи дымчаты, и сумы, и мехи холщевые, и припоны, и шатры, и пологи; и лен, и поскони, и веревки, и ужица; и мыло, и зола, и ветчаной[6] запас всякой; и обрезки, и остатки, и ветчаное, и новое, и платяные, и кожаные, и железныя обломки всякие, и гвоздье, и чепи, и замки, и топоры, и заступы, и всякой железной запас, и всякая рухлядь, и все то разобрати, что пригоже в коробях положити, или в бочках, иное по грядкам, иное по спицам, иное в коробех где что пригоже, туто и устроити в сусе[7], и в покрыте, от снега беречи, и от всякия пакости; и все б было в счете и в писме; – и сколко чего надо, и сколко ветчанаго; а что по портилося, то починивать; а всегда бы было готово, всякий запас как спросят[8]. А в иных подклетех, или в подсении, или в анбаре, устроити: сани, дровни, телеги, колеса, одры страдные, дуги, оглобли, хомуты, рогожи[9], лыка, мочала, веревки лычные, оброти, тяжи, шлеи, попоны и иной дворовой запас конской, – где что поставити, или положити, или повесити. А лутчие сани[10], коптана, калымага, укрыти на подкладках, – и все б было бережно и в суше, за замком. А в в ином анбаре: бочки, и мерники, и цепники, высытки[11], корыта, жолобы, и звары, корцы, фляги, сита, решота и всякая порядня поваренная и погребная. Которые бочки, и всякое судно попортилось; – или обручи огнили, или свались, и то велети окрепити, или уторы переделати, или дно покрывати[12], и обручи новые наколотити; все б то было готово, и выпарено, и вымыто, и высушено; – чтоб ни гнилью, ни плеснью и затхлою не пахнуло[13]: ни дрожжи б, ни хмелины, не засушены, не загнились. Как которое судно понадобится, ино б было готово. А дубник в запасе держати: что починити, или сделати. А ветчаная бочка и звара, и высыток, донце, дощечки бочечные, и всякое судно всеб было припрятано; а все то ся пригожает на худую потребу, и ты добраго не портиш.

 

ГЛАВА 57[1]

В ПОВАРНЯХ И В ХЛЕБНЯХ И В ДЕЛОВЫХ ИЗБАХ УСТРОИТИ ДЕЛАНОЕ[2]

А в[3] поварнях и в хлебнях и в деловых избах и гуща, и дробина, и отроби всякие и капустное коренье, и хренье, и листье свекольное и репное и плюсное[4] и дражня гуща, и винная и из котлов и кисельные обжины[5] и в поварне, от мяса и от рыбы что очищают, и кислых штей опара, всего того не метати: все обрати[6] и в ветчаные суды класти, которые ни в поварне, ни в погребе не пригодятся; да ставити то в опричной хоромине, и тем страдные лошади кормити или чем подмешиваючи и невейницы, или овсяной муки, или сено резаное, или чего иного; а иное коровам давати, и свиньям, и гусям, и уткам, и курам и собакам; и что как пригоже и мукою посыпают. И помывки[7] судовые, и горшечные, и котельные и всякие ествы и пригарны, все животине копят: животина тем сыта бывает. А в деревне такой корм животине ссылают же.

 

ГЛАВА 58

НА ПОГРЕБЕХ И НА ЛЕДНИКЕХ, И В ЖИТНИЦАХ, И В СУШИЛЕХ, И В АНБАРЕХ И В КОНЮШНЯХ ЧАСТО ГОСУДАРЮ СМОТРИТИ

А на погребех, и на ледникех, и в житницах и в сушилех, и в клетех, и в анбарех, и в конюшнях по вся дни в вечере в кой любо день: пересмотрити самому государю всякого пития и ествы, и всякаго обиходу, и всякаго запасу, и всякой рухляди; и в конюшне, и в хлебне, и в поварне, и в чьем приказе или у ключника, или у повара, или у хлебника, или у конюха всего пересмотрити самому, по тому чину и стройно[1], как в сей памяти[2] писано; и перепытати колько чего есть; и всему ли есть счет и мера, и писмо; да все то сметити и сгадати самому: и сколько чего сделано и сколько чего разошлося, и кому что отдано[3], и все бы то умели сказати именно. Иного вечера повара и хлебника, иного вечера[4] пивовара и конюха смотрити и сметити во всем, а ключнику туто же быти. И, только везде стройно, по наказу и все соблюдено, и счет сойдется; и устроено хорошо и счет отдаст подлинно и памятной прямо, ино того, за его службу жаловати; а кто небережением или истерял, или испортил, или сломал, или покрал, ино посмотря по вине: наказывати и пеня чинити[5]. И в поварнях, а в хлебнях и во всяких хоромех, и в конюшне у всякой животины, и в сенниках; у мастеров, и у мастериц, и учеников[6], и у торговцев, и у всяких своих прикащиков, всегда всего пересматривати и пытати; только все по наказу, ино добро, а не потому наказание, по вине смотря, по прежеписанному. А за доброе устроение и брежение любити и жаловати всячески доброму была б честь, а худому гроза[7].

 

ГЛАВА 59

СЛУГАМИ ГОУДАРЮ СМЕТЯСЯ ВО ВСЕМ ПОТОМУ ИХ ЖАЛОВАТИ[1]

А которой служка в которой службе[2] бережен и по приказу[3] живет, в котором приказе и в службе чисто ходит безхитросно: за посмех не отдаст и сам не украдет, а везде ества и питие и всякая потреба покрыта, и не сгнило, и не поплесневело, и не прокисло, и везде подметено, и вытерто, и не намочено, и не налито, и не нагрязнено, и не насорено; и суды всякие чисты, и перемыты, и устроено хорошо; и ества остатки перебрано цело и в предь блюсти про государя и про гость, а початое в расход давати и в стол, кому что достойно и как ему велено от государя; и во всякой службе добро и бережно служит, и по приказу чинит и того пожаловати, и добрым словом привечать, и ести и пити подати и нужда его всякая исполнити; а чего безхитросно, или недогадкою, или неразумием не гораздо сделал, или попортил что, и в том словом наказати передо всеми, все б того береглись и вины отдати; а в другие и в третие проступить, или ленится ино, по вине и по делу смотря, по разсуждению наказати и побити доброму; была б честь, а худому и наказание, а всему тому наук. А государыня женок и девок в своем обиходе такожде сзирает, и смечает[4] и наказует такожде, как выше сего[5] писано.

 

ГЛАВА 60

О ТОРГОВЫХ И О ЛАВОЧНЫХ ЛЮДЕХ, ПОТОМУ ЖЕ СЧЕТ С НИМИ ЧАСТО ДЕРЖАТИ[1]

А которые в лавках торгуют, и на домовной обиход покупают всякую потребу и всякой запас, ино с теми в вечере и на упокое, на всякую неделю самому государю надобно смечати с ними и в приходе и в расходе, и в купле и в продаже: с тем вечер, а с иным иной вечер; и кто бережен и памятлив, радеет[2] о своем деле, и все в счете живет у него, и хитрости в нем нет никоторые и прибыточек от него есть, и того примолвити и пожаловати еством[3] и питием и нужда его пополнити во всем; а за доброй промысл на выймок своим платьем пожаловати; а кто безхитросно что учинит, или ленив, или позно в лавку ходит, или спит долго, или с товаром не ходит к гостем[4], или какое его ни буди небрежение и нерадение, ино его наказывати и бранити, и, по вине смотря, такова ему пеня учинити. А за добрую службу тех у себя за стол сажати, и от себя подавати, и жаловати и во всем их беречи. А во всякой службе, и в домашнем обиходе, и в торговле кто ленив, и сонлив, и крадлив, и упъянчив и наказание и побои неймут, и того от дел оставити и по нем работа дати[5]. А кто груб, и крадлив, и ленив, и ни во что не пригодится, и наказание, ни удар неймет: ино накормив, да с двора спустити[6]: и иные на такого дурака глядя, не испортятся.

 

ГЛАВА 61

КАК ДВОР СТРОИТИ, ИЛИ ЛАВКА, ИЛИ ДЕРЕВНЯ ИЛИ АНБАР

Всякому человеку домовитому[1], у кого Бог послал свое подворейцо, или деревенку, или лавочку[2] в торгу, или амбар, или домы каменные, или варницы, или мелницы, ино б было по прежеписанному, всякой запас куплен в пору, когда коли дешево[3]. Да везде на дворе всегда у себя смотрити, или ключник или кому приказано: или тын попортился, или горотба в поле, или в огороде, или ворота, или замки попортилися, или которой хоромины кровля погнила или обветщала[4], или желобы засорилися: все то смывати, и мести, и желобы вычищати, и перекрывати и перекрепливати; кое поветшало, или поломилось, или прокапало, или ветром подрало; или в избе или в которых хоромех стол, лавка, или скамья[5] попортилася; или на погребе, или на леднике, или в мылне, или мост и где что ни буди попортилося: или порядня домовитая, какая нибуди дворовая или повареная, или конюшенная, или погребная; или всякое платно и сапог: всеб было ветшаное поплачено, а порченое покреплено[6]; а всеб было твердо, и крепко, и неизгнило, и не нагрязнено, и в кровли и в суше.

 

ГЛАВА 64[1]

ПОСЛАНИЕ И НАКАЗАНИЕ ОТТО ОТЦА К СЫНУ

Благословение от благовещенскаго попа Силиверста[2], возлюбленному и единородному моему сыну, Анфиму. Милое мое чадо, дорогое! послушай отца своего наказания, рождьшаго тя, и воспитавша в добре наказании и в заповедех Господних; и страху Божию, и божественному писанию изучену, и всякому закону християнскому; и промыслу доброму во всяких торговлях, и во всяких товарех наказану; и святительское благословение на себе имееш, и царьское Государево жалование, и Государыни царицы, и братии его, и всех боляр; и с добрыми людями водишся; и со многими иноземцы великая торговля и дружба есть; все еси доброе получил, умей сие[3] совершити о Бозе: яко же начато при нашем попечении, и по нас такожде бы Бог соблюл по тому жити. И законному браку сочтах тебе, и добру родителю благородную[4] дщерь; и благословил есми тебя всякою святынею, и честными кресты, и святыми образы, и благословенным стяжанием, яко же мню от праведных трудов; а в неведании Бог правитель. И ныне убо, сыну Анфим, предаю тебе и поручаю, и оставляю Создателю нашему, доброму блюстителю, Исусу Христу, и его матери причистыя Богородоцы заступницы нашея, помощницы и всем Святым: яко же рече писание: «потщися дети оставити наказаны заповедем Господним, лутче неправеднаго богатства; аще и в праведном убожестве нежели в неправеднем богатстве». И ты чадо блюдися неправеднаго имения, а твори добрая дела. Имей, чадо, великую веру к Богу; все упование возлагай на Господа; ни кто же надеяся на Христа не погибнет. И прибегай с верою к святым Божиим; заутрени не просыпай; обедни не прогуливай; вечерни не погреши и не пропивай; повечерница, и полунощница, и часы в дому своем всегда, по вся дни, пети: то всякому христианину Божий долг. Аще возможно по времени правила прибавить[5], – на твоем произволении; болшую милость от Бога приобрящеши. А в церкви Божии, и в дому, на правиле, и на всяком пении и молении сам, и жену, и детей учи и всех домочадцев со страхом стояти, Богови молитись и со вниманием слушати, отнюдь в те поры ни о чем не беседовати, ни обзиратись, разве великия[6] нужды. А говорити правило келейное и церковное единогласно, чисто, а не в двое. Священнический и иноческий чин почитай: те бо суть Божии слуги, теми очищаемся от грехов, те имеют дерзновение молитися Господу о гресех наших и Бога милостива сотворят. Повинуйся, чадо, отцу духовному, и всякому священническому чину во всяком духовном наказании; а жена такожде. В дом свой их призывай молитися о здравии, за Царя и Государя, и за Царицу, и чада их, и за братию его, и за вся хрестияне; и о своем согрешении, и о своих домочадцах молебная совершай; и воду бы святити с животворящаго креста и со святых мощей, и с чюдотворных образов; аще болезни ради, за здравие и масло свещают. И в церквах Божиих такожде твори; приходи с милостынею, и с приношением, и за здравие, и породителех преставльшихся, память твори, со всякою чистотою: и сам воспамяновен будеши от Бога. Церковников, и нищих, и маломожных, и бедных, и скорбных, и странных, и пришельцев призывай в дом свой, и по силе накорми, и напои, и согрей, и милостыню давай, от праведных своих трудов, и в дому, и в торгу, и на пути, – тою бо очищаются грехи, те убо ходатаи к Богу о гресех наших. Имей, чадо, истинную правду и любовь нелицемерную ко всем; не осуждай никого ни в чем: свои грехи разсуждай, како избыти их. Чего себе[7] не любиш, того и другу не твори, и храни чистоту телесную паче всего; да наступи на совесть свою, на лютаго врага; и возненавиди, якоже милаго душетленаго друга, хмельнаго пития; Господа ради, отверзи от себя пиянство, – в сем недуге и вся злая рождаются обычаи от него. Аще от сего сохранит тя Господь, вся благая и полезная от Бога получиш, и от человек честен будеши, и души своей просвет сотвориши на вси добрая дела. Воспомяни, чадо, апостольское слово: «не прельщайтеся ни пияницы, ни блудницы, ни прелюбодеи, ни содомлянине, ни тать, ни клеветник, ни хищник царствия Божия не наследяты». Аще которою страстию победился еси, чадо, или в которое грехопадение впал, о сем прибегни к Богу, с теплою верою, и ко отцу духовному, с горкими слезами; и плачися грехов своих[8], и кайся истинне, еже таковая не творити; и заповедь отца духовнаго храни, и епитимию держи: милостив Господь, праведных любит, грешных всех зовет ко спасению. И паки храни и блюди себе в христианском праведном законе жити; удержи язык свой от зла, и устне свои, еже не глаголати льсти; храни себя от лжи, и похвалы, и от клеветы; и сам ни в чем не величайся; уничижи себе всех паче[9], узриши славу Божию; всякаго, чадо, не презри во всякой нужди; помятуй, чадо како мы жихом век: ни кто же изыде от дому нашего тощ или скорбен; по силе, вся потребная, всякому человеку, Бога ради, давано и скорбнаго словом пользовано и аще кому, в чем возможно, и мы помогали, Бога ради, и ссужали всячески; а нам не видимо Христос изобильно посылал милость Свою всяких благих. А не помыслихом ни на кого да ни кому[10] на зло разве не доразумия, без лукавства. Чадо, люби монашеский чин, и странники, и пришельцы, всегда в дому твоем питались; и в монастыри с милостынею и с кормлею приходи; и в темницах и убогих и больных посещай, и милостыню по силе давай. А домочадцев своих одевай и корми довольно. А жену свою люби, и в законе живи и по заповеди Господни. В неделю и в среду, и в пяток, и в праздники Господни, и в великий пост в чистоте пребывати, в посте и в молитве и в покаянии, и во всяких добродетелех. Законно жительство в славу Богу и в живот вечный[11]; а любодеем и прелюбодеем судит Бог. Да сам, чадо, что твориши, того и жену учи: всякому страху Божию, и вежеству, и промыслу, и рукоделию, и всякому домашнему обиходу и всякой порядне; умела б[12] и печи, и варити, и всякую домашную порядню умела, и всякое б женское рукоделие знала; и коли сама все знает и умеет, ино умеет детей и слуг всему научити[13], и наказати во всем; а сама бы хмельнаго пития отнюдь не любила, и дети, и слуги у ней того не любили же. А всегда б жена без рукоделия сама, ни на час не была, кроме[14] немощи, а слуги у ней такожде. А в гостях будет, или у ней гости, отнюдь бы сама пьяна не была, а а с гостьями беседовала о рукоделии, и о домашней порядне, и о законном христианском житии; а не пересмеивала б[15] ни о ком ни чего. В гостях, и в дому песней бесовских, и всякаго срамословия, и блядливых речей, и блудных пословиц, сама, и слуги, не говорила, и не творила б того бы, и ни у кого не слушала. И волхвов, и кудесников и всякаго чарования не знала бы; и в домы не пущали ни мужиков ни жинок.

Аще не внимает сего, всячески наказуй[16] на едине, да наказав и примолви, и жалуй люби ея. Такожде и детей и домочадцев своих учи страху Божию и всяким добрым делом; понеже тебе ответ дати о них в день страшнаго суда. Аще по нашему наказанию и по сему писанию учнете жити, велию благодать от Бога обрящете, и жизнь вечную наследити и домочадцы своими: да держится, чадо, добрых людей во всяких чинех и ревнуй добрым делом; внимай словеса добрыя и твори я. Почитай часто божественное писание, и влагай в сердце себе на пользу. Видел еси, чадо, како в житии сем жихом во благословении и страсе Божии, и в простоте сердца и церковном прилежании со страхом божественным писанием ползуючися всегда; и како были Божиею милостию от всех почитаем, и всеми любим, и всякому и в потребных уноровил: и рукоделием и службою и покорением; а не гордынею, ни прикословием; не осуждах никого, не просмеивал, ни укаривал ни кого, ни бранивался ни с кем, а пришла от кого обида, и мы, Бога ради, терпели и на себя вину полагали; и тем и врази друзи[17] быша; и аще которою виною, душевною или телесною согреших пред Богом и пред всеми человеки, и вскоре о том плакахся к Богу греха своего; и у отца духовнаго каяся со слезами, и умилне прощение прося, и заповеди его духовныя с любовию хранях, якоже повелит ми; и аще кто мя в моем прегрешении, или в какове невежестве обличит, или кто духовне накажет, или кто в посмех поносит мя и укоряет, все сия с любовию приимах, и себе внимах; аще по делом, о сем каяхся и от таковых дел удаляхся, Богу поспешествующу ми; аще, что неповинио, и не по делу, молва или поношение, или посмех, или укоризна, или ударение, – во всем том винихся и не оправдахся пред человеки: Бог сие праведным своим милосердием исправит. Воспоминах Евангельское слово: «любите враги ваша, творите добро ненавидящим вас, благословите клянущая вас[18] молите за творящая вам пакости и изгоняющая вы; бьющему тя в ланиту обрати ему и другую, и от взимающаго ти ризу и срачицу не возбрани; всякому просящему у тебя дай; и от взимающаго твоя не истязай; и аще кто тя поимет по силе поприще едино, иди с ним или два. И паки еще воспоминая и причастную молитву:» Господи, даждь ми милость, ненавидящим мя, и враждующим ми[19] такожде и оклеветающим мя; да ни кто же ни какоже, от них меня ради нечистаго и грешнаго, зло некако постраждет, ни в нынешнем веце ни в будущем; но очисти их милостию своею и покры их благодатию своею благии. Тем же утешах себе. Непогреших никогда же церковнаго пения от юности своея и досего времени, кроме немощи; ни нища, ни странна, ни убога, ни скорбна, ни печальна никогда же не презрех, кроме неведения. И в темницы, и больна, и пленена, и из работы, и должна[20] и во всяких нуждах, по силе окупих, и гладных по силе накормих. Работных своих всех свободих и наделих; и иных окупих из работы на свободу попущах. И все те работные наши свободны, и добрыми домама живут, яко видиши, молят за ны Бога и доброхотают нам всегда, а кто забыл нас, – Бог его простит во всем. А ныне домочадцы наши все свободны, живут у нас по воли. Видел еси чадо[21]: многих пусточных сирот и работных и убогих, мужеска поду и женска, и в Нове граде и здеся[22] на Москве вскормих и вспоих до совершенна возраста; и изучих кто чего достоин; многих грамоте, и писати, и пети, и иных иконнаго писма, инех книжнаго рукоделия, овех серебрянаго мастерства, и иных всяких рукоделий, а иных всякими многими торговли изучих торговати. А мати твоя многия девицы и вдовы пустошныя и убогия воспитала в добре наказании, изучила рукоделию и всякому домашнему обиходу и, наделив, замуж повыдавала[23], а мужеский пол поженили у добрых людей. И всем тем, дал Бог, свободны: домами своими живут; много в священническом и в дьяконском чину, и в дьяцех, и в подячих, и во всяких чинех, кто чего дородился и в чем кому Бог благословит быти: ови рукоделничают всякими промыслы; а многие торгуют в лавках; мнози гостьбу деют в различных странах всякими торговлями. А Божиею милостию, во всех тех наших вскормленникех[24] и в послуживцах ни соромота, ни убыток, ни какая продажа от людей не бывала, ни людям от нас ни тяжба ни с кем не бывала, во всем Бог соблюдал по ся места; а от кого нам от своих скормленников досада и убытки многи и велики бывали, ино то все на себе понесено, ни кто того не слыхал, а нам Бог исполнил. И ты, чадо, тому же ревнуй и тако твори: на себе всякую обиду претерпи, – Бог сугубо исполнит. Не познах другии жены, разве матери твоея, а еже с нею и обещахове, то и сотворих о Бозе. Соверши[25], христиански скончати живот мой в заповедех твоих. Живи, чадо, по христианскому закону, во всяких обычаях без всякия хитрости ко всем. А не всякому слуху веруй: доброму ревнуй, лукавых и законопреступных во всяких обычаях, отнюд не люби; а законный брак со всяким опасением храни: до кончины живота своего; чистоту телесную храни; кроме жены своей незнай никого. И пьянственнаго недуга такожде берегись; в двух сих главизнах – вся злая свидятся, до ада преисподняго; и дом пуст, имению тщета и от Бога непомилован будет, и от людей безчестен и посмеян и укорен и от родителю проклят. Аще, чадо, тебя от сего злаго Господь сохранит закон сохраниши по заповеди Господни, от хмельнаго пития воздержися, и во всяких добродетелех поживеши, якоже есть богобоязливии людие, и ты от Бога помилован будеши, а от людей честен; и исполнит Господь дом твой всякою благодатию. И еще воспомяну ти: гостей приезжих у себя кормити; а на соседстве и знаемыми любовно жити[26] о хлебе и о соли, и о доброй сделке и о всякой ссуде. А поедеш куды в гости поминки недороги вози за любовь. А в пути от стола есть подавай домашним государем, и приходящим, и их с собою сажай за стол, а маломожным милостыню давай. Аще сия твориши, то везде тебя ждут и встречают[27], и от всякаго лиха берегут; не стану не подадут, и на дороге не разобьют; того ради кормят добраго за добро, и лихаго от лиха; тот ся на добро обратит, во всем в том убытка не будет[28]; в добрых людех хлеб соль заемное дело, а поминки такожде, а дружба в век, а слава добрая. А на дороге, и в пиру, и в торговле, отнюдь сам брани не зачни; а кто излает терпи, Бога ради, от брани уклонись; добродетель злобу преодолевает. Господь гордым противится смиренна Бог любит, а покорному Бог благодать даст. Аще людем твоим лучится брань с кем где ни буди и ты на свои[29] брани; а кручиновато дело и ты удари, хоти твои и правы тем брань утолиши, такожде убыток и вража не будет. Да еще недруга напоити и накормити хлебом и солью, ино вместо вражды дружба. Воспоминай сыну великое Божие милосердие к нам и заступление: от юности и до сего времени, на поруку не давывал ни кого, ни меня не давал ни кто, во всяких вещах, и на суде не бывал ни с кем, ни искивал, ни отвечивал.

А видел еси сам: в рукоделиях, и во многих во всяких вещех: мастеров всяких было много: иконники, книжные писцы, серебренные мастеры, кузнецы, и плотники, и каменщики, и всякие рукоделники; деньги им даваны на рукоделье наперед, по рублю, по два, и по три, и по пяти, и по десяти и болше; а многи были чмуты и бражники; и со всеми теми мастеры, в сорок лет, дал Бог, разлелнося без остуды, и без пристава, и без всякия кручины. Все то мирено хлебом да солью, да питьем, да подачею, и всякою добродетелью, да своим терпением. А сам у кого что купливал, ино ему от меня милая разласка: без волокиты платеж, да еще хлеб да соль, сверх. Ино дружба в век; ино всегда мимо меня не продаст, и у всего недоймет. А кому что продавывал, все в любовь, а не в оман, – не любит кто моего товару, и аз назад возму, а денги отдам; а о купли и о продаже, ни с кем брани ни тяжи не бывало; ино добрые люди во всем верили, и здешнии[30], и иноземцы. Никому ни в чем, ни слыгивано, ни манено, ни пересрачивано, ни в рукоделии, ни в торговле, ни кабалы, ни запись на себе, ни в чем не бывала; а видел еси сам, какии и великии сплетки со многимя людми были; да все, дал бы Бог, без вражды скончалось; а ведаеш сам, не богатством жити с добрыми людьми, правдою, да ласкою, да любовию, а не гордостию, и без всякия лжи. Чадо мое любимое, Анфим! Еже тя поучах, и всячески наказывах, о всяком добродетелном и богодохновенным житием[31], и грубое сие писание худаго моего учения предах[32], молю тя, чадо, Господа ради, и Пресвятыя Богородицы, и великих чюдотворцов, почитай себе, с любовию и со вниманием, и напиши на сердцы своем, и прося у Бога помощи, и разума, и крепости, и вся предиреченная сия с любовию и делом твори; такожде, посему писанию, жену поучай и наказуй; такожде и детей своих и домочадцев; всех учи страху Божию и добродетелному житию. И аще вся сия сам твориши, и жену, и дети, и раб, и рабынь, и всех ближних своих, и знаемых такожде научи, и дом свой добре устроиши, вся благая от Бога обрящеши, и жизнь вечную наследиши, со всеми одержимыми тобою. Аще, сыну, моего моления и поучения не внемлеши, и по сему писанию не учнеш жити, яко и прочие добрые люди, и богобоязнивии мужие, и отца духовнаго заповеди не учнеш хранити, и от богодухновенных мужей не пользуешися поучением, и почитанием святаго писания, и христианскаго праведнаго закона не храниши, и о домочадцех своих не радиши, и аз твоему греху не причастен: сам о себе, и жене, и о домочадцех своих, ответ даси в день страшнаго суда. Аще чадо мое возлюбленное, и малые сия заповеди, худаго моего учения сохраниши, и по нашему пути поидеши, и словес моих послушаеши, и делом творити начнеши[33], и наследник небесному царствию; и будет на тебе милость Божия, и Пречистые Богородицы заступницы нашея, и великих чюдотвордев: Николы, Петра, Алексия, и Сергия, и Никона, Кирилла, и Варлаама, и Александра, и всех Сватых, и родительская молитва, и мое вечное на тебе благословение, от ныне и до века. И благословляю тебя чада своего и прощаю в сем веце и в будущем; и буде на тебе Божия милость, и на жене твоей, и на чадех ваших[34], и на всех доброхотах ваших, от ныне и до века.

Чадо мое, единородное и любимое, Анфим! произволил Бог, и благочестивый, православный Царь Государь велел послужити тебе в своей царьской казне, да у таможних дел; и ныне молю тя, чадо, и со слезами глаголю: Господа ради, памятуй царьское наказание, прося у Бога помощи и разума, от всей души и от всего помышления; служи верою и правдою, без всякия хитрости, и без всякаго лукавства; во всем Государьском: другу не дружи, недругу не мсти, и волокита б людем ни в чем от тебя не была; всякаго отделай с любовию, без брани; а не поспеется и добрым словом отвещай, и присрочив не изволоча отпусти.

А в торговле прямую розласку чини: душевредная бо твоя служба государю не была ни в чем; а сам благословенным государьским уроком сыт буди; и все бы у тебя государьское было всегда в счете, и в смете, и в писме и приходе и расходе; к казначеем буди послушен, а с товарищами советен, а и подъячим, и к мастером и к сторожем, грозен и любовен и ко всяким людем приветен, а победных, и скорбных, и нужных, и полонеников отнюдь безволокитно управляй[35] и от себя по силе накорми, напой и милостыню дай, по человеку смотря; а и случится суд: всякому человеку богату и убогу, другу и недругу, и аще свое дело истинно и праведно, безволокитно, и без всякия хитрости соверши: по евангельскому словеси: «и не на лица судите, сынове человечестии, но праведен суд судите, им же бо судом судите, судится вам; в ню же меру мерите, возмерится».