«Послание Геннадия собору епископов» по времени и содержанию непосредственно примыкает к его же «Посланию Зосиме». Отрывок из «Послания епископам» был опубликован еще в 1863 г. в «Православном собеседнике» (ч. I, стр. 476—481) по Соловецкому списку, в котором содержится только начальная часть послания. Полностью «Послание» было опубликовано А. С. Павловым в «Памятниках древне-русского канонического права» (РИБ, т. VI, № 115, II) по списку из собрания Толстого. Соловецкий список не был привлечен А. С. Павловым, и ряд исправлений и добавлений в тексте носил характер собственных конъектур издателя и при этом весьма произвольных. Так, например, фраза Геннадия о еретике Захаре «А чему тот стригольник великому князю?» была исправлена следующим образом: «А чему тот стригольник ведом великому князю?». А. С. Павлов указывал (стлб. 780, прим. 1), что это дополнение сделано им «по смыслу и согласно с таким же оборотом речи о еретике Самсонке». Между тем, никакого «такого же оборота речи» о еретике Самсонке в грамоте нет; здесь говорится не о том, что кто-то «ведает» Самсонку, а о том, что Самсонка ведает, «что ся у Курицина чинит» (стр. 381). Между тем, исправления Павлова искажают смысл весьма острого замечания Геннадия: тот писал, что за Захара «нехто печаловался» и далее, раскрывая это инкогнито, спрашивал: «А чему [т. е. зачем] тот стригольник великому князю?». Точно так же «тому уже веры не имут, что тот ни врет» (стр. 380) произвольно исправлено на «н е врет»; «ему как по мене послати» (стр. 381) исправлено на «как по мене не послати»; «Христу поругаются» (стр. 382) прочитано, как «хулят, поругаются», и т. д. Для издания «Послания епископам» мы используем те же списки, что и для «Послания Зосиме»: 1) ГПБ, Q.XVII.15 (собр. Толстого, отд. II, № 254); 4°; перв. пол. XVI в. «Послание епископам» — лл. 377—380; 2) ГПБ, Сол. № 962/852; 4°; нач. XVII в. «Послание епископам» начинается на л. 341 об., обрывается на л. 342 об. Текст издается по списку Q.XVII.15 (Г); исправления и разночтения по списку Сол. № 962/852 (С). Произвольные исправления А. С. Павлова не используются.

* * *

Святейшим и боголюбивым братии нашей архиепископом и епископом: Тихону, архиепископу Ростовскому и Ярославьскому, Нифонту, епископу Суздальскому и Торускому, Васьяну, епископу Тферьскому, Прохору, епископу Сарскому и Подонскому, Филофею, епископу Прьмскому. О сем вам воспоминаю, братии нашей: прислал князь великый ко мне грамоту, а митрополит другую, о поставлении коломенского владыки, а безъименно[1] кого; а велят ми отпись дати безъимяно же такову, какову Геронтею митрополиту взяли у мене. Да прислали ко мне митрополит и епископи с тех грамот, и яз не дал такой отписи; да о том есми отписал к великому князю да и митрополиту, а вам то братии нашей ведомо же будет, как митрополит велит чести пред вами ту грамоту. А о коломенском владыце да и о иных, коли прилучится, посылали бы ко мне именно, кого ставити, и яз отписи даю такие законные, как иные братия наши давали. А не изспешили бы есте ставити владыку: преже бы есте стали накрепко о том, чтобы еретиков обыскали накрепко, да тех бы велел казнити князь великий. А Захар чернець пишет в своих грамотах, что на мене послал по всем градом грамоты: зовет мя еретиком, а яз не еретик.[2] А и писано: «Аще тя кто назовет еретиком, да не приимеши; аще ли приал еси, отврьгъся еси Христа». И аз с его грамоты к вам список послал. А по Захара есми посылал того для: жаловались мне на него чрьнци: перестригл их от князя Федора от Вельского, да причастиа три годы не давал, а сам, деи, не причащал же ся. И как яз его призвал да почал его спрашивати: «О чем ты так чинишь, что еси три годы не причащался?». И он ми молвил: «Грешен есми». И яз ему млъвил: «Ты о чем же еси перестригл детей боярьскых, да от государя еси их отвел, а от бога отлучил, что еси им причастиа не дал три годы?». И он ту свою ересь явил: «А у кого, деи, ся причащати? Попы, деи, по мзде ставлены, а митрополит, деи, и владыкы по мзде же ставлены». И яз молвил: «А се митрополита ставят не по мзде». И он молвил: «Коли деи, вь Царьград ходил есть митрополит ставитися, и он, деи, патриарху денги[3] давал; а ныне, деи, он бояром посулы дает тайно, а владыкы, деи, митрополиту дают денги: ино, деи, у кого причащатися?». И аз познал, что стригольник,[4] да велел есми его послати в пустыню на Горнечно. И потом князь великий прислал ко мне грамоту о нем, чтобы мне наказати его духовне, да отпустити его в свой манастырь в Немчиново. А на него запись взял его рукы, да велел есми ему отца духовнаго приняти, да и причастие имати; а чрьнци бы с ним же жили в манастыре, да также причащались И он клятву преступил, да в манастырь не поехал, да ступил к Москве. А ведь то о нем нехто печаловал ся: а чему тот стригольник великому князю? Да здесь Алексейко подьячей на поместив живет да напився пиян, влез в чясовну, да сняв с лавици икону — Успение Пречистые, да на нее скверную воду спускал, а иные иконы вверх ногами переворочал. А что пакы безъименных, ино и числа нет, кое иконы резаны, а не весть. А ныне на меня лжу сшивает,[5] моему обыску веру не имут. А то ведь чье печалованье? Еретиком ли было облыгати наше святительство? А которой так на собя скажет? А коли сказал, и они доискиваются иных, а тот уже готов — в руках, да тому уж веры не имут, что тот ни врет. А се аз святитель, да два боярина великого князя, да мой боярин, да опрочь того неколико детей боярьскых великого же князя, да к тому игумены да священникы: ино тому не верят, да мимо тех всех, да на мене со лжею. А яз ли того Самсонка мучил? Ведь пытал его сын боярьской великого князя, а мой толко был сторож, чтоб посула никто не взял. А что сказывал Самсонко, что в подлинники писано, то было уметь ли так сказывати, толко бы того не делал сам? Спросили мы Самсонка, Юрьй Захарич да аз: «Были есте на Москве, с ким ся есте въдворяли? Ведаешь ли, что говорят на Москве?». И Самсонко молвил: «Ведаю, деи, господине, как ми, деи, не ведати? Ходили, деи, есмя завсе к Федору к Курицину, диаку великого князя, а приходит, деи, к нему Олексей протопоп, да Истома, да Сверчек, да Ивашко Чрьной, что книгы пишет, да поучаются, деи, на православных». И коли бы тот смерд того не действовал, да к Курицину не ходил: почему было то ему ведати, что ся у Курицина чинит, кто ли к нему приходит? «Да приехал, деи, с Федором с Курициным из Угорской земли угрянин, Мартынком зовут»: то он почему уведал того Мартынка, толко бы он у Курицина не водворял ся? А потому ино Курицин началник тем всем злодеем. А не собя для то яз вам, своей братии, пишю, — въспоминаю того для: православнаа бы вера изъяснилась, а митрополит бы с вами, с моею братиею, тех всех еретиков проклял, да и тех, к кому они приходили в соглашение, или кто по них поруку дрьжал, или кто о них печалник, и кто ни буди последовал их прельсти, — тех бы всех отець нашь митрополит, да и вы, наша братья, проклятью предали. Да чтобы есте отцю нашему митрополиту поговорили, да с ним и великому князю, чтобы по мене однолично прислал; а толко князь великий хотя не хочет по мене прислати, а вы без мене не имете дела делати никакова. Ино ему как по мене послати, а доколе ересь не докончяется, да от Захара мене не оборонят; и мне отписи нелзе дати. А как еретиков прокленете, митрополит бы отець, да и вы, наша братия, и ко мне прислали, и аз бых и здесе соборне также тех проклятию предал. А владыкы бы есте не спешили ставить, доколе ереси не искорените. А толко ныне о тех еретицех конца не учините, ино то уже явьствено вере нашей попрание; а иного чего части, что толь долго еретиком управы не учинят? А писано ведь в правилех святых апостол, како владыку поставити. А ваши архимандриты, и игумены, и протопопы, и попы соборные сь еретикы служили: ино ведь иному отлучение, а иному извержение писано. В правилех святых апостол сами найдете: глава 10, 11, 45, 70, правило святаго апостола Павла 12. Ино те сретици все то действовали, да и хулу на самого Христа говорили. А то пространно узрите в подлиникех. А однова въсхотят собору быти о вере, и вы бы на то не дрьзнули: занеже изложена нам православнаа вера на прьвом соборе, да и на втором о святем дусе, да и прочии собори вси прьвому собору последовали, я на седмом соборе запечатлели, еже в троици единаго бога славити научиша, таже единаго от троица, бога же и человека, сугуба естеством, а не составом; тем же соврьшена того бога и соврьшена человека воистину проповедающе, исповедаем Христа бога нашего. Да того ради иконоборьцовь проклятью предаша. Якоже иконоборьцев проклятию пре даша, такоже и ныне иконоборьци появились: коли щепляет иконы, режет, безчествует, — ино проклятье ему тоже, а любо и сугубо подобает их проклята. А и казнь им не ровна же с сущими еретикы: понеже от еретика человек бережется, а от сих еретиков как ся уберечи? А они ся зовут христиане, да человеку разумному — и они ся не явят, а глупого — и они сьели: того для им казнь вдвое надобе, да и проклятье. А о вере не велено приложити, или уложити, по апостолу: «Аще аггел благовестит вам паче, егоже благовестихом, анафема да будет». Да еще люди у нас простые, не умеют по обычным книгам говорити: таки бы [6]о вере никаких речей с ними не[6]плодили; токмо того для учинити собор, что их казнити — жечи да вешати! Занеже еретики необратно взяли у мене покаание да опитемью, да оставя то все, да збежали. Да пытати бы их накрепко о том, кого они прельстили, чтобы было вестно: занеже их искоренят, а уже отрасли есть. Да не плошитеся: станьте крепко, чтобы гнев на нас не пришол, да не како человекоугодници обрящемся и со Июдою Христа предающе: они иконы щепляют, режут, Христу поругаются, а мы их учрежаем, да их воле сходим! Однолично бы ныне и казнены и прокляты.  А милость господа бога вседрьжителя, и пречистые его матере и святых чюдотворець молитва, и нашего смиренна молитва, купно же и благословение, да есть всегда с вашим святительством и боголюбием. Аминь.

Примечания

[1] Так С: Т божеименно.  [2] Т далее вписан и зачеркнут отрывок соборного приговора 1503 г. (ААЭ, т. I, № 382).  [3] С дань.  [4] С стригольник еретик; на этом кончается С.  [5] Т в слове сшивает е написано по подскобленному  [6-6] Т переправлено; было они речей никаких