Молитва приносимая с началом дня о сохранении от диавола
Тебе, Бóгу и Творцу моему, в Трóице Святóй слáвимому Отцу, и Сыну, и Святóму Духу, поклоняюся и вручáю душу и тéло моé и молюся. Ты мя благослови, Ты мя помилуй, и от всякаго мирскáго, диáвольскаго и телéснаго зла избави. И даждь в мире без грехá прейти день сей, во слáву Твою, и во спасéние души моéй. Аминь.
Молитва ко Господу о прощении, заступлении и помощи
В руце Твоегó превеликаго милосéрдия, о Бóже мой, вручáю душу и тéло моé, чувства и глагóлы моя, совéты и помышлéния моя, делá моя и вся тéла и души моея движéния. Вход и исхóд мой, вéру и жительство моé, течéние и кончину животá моегó, день и час издыхáния моегó, преставлéние моé, упокоéние души и тéла моегó. Ты же, о Премилосéрде Бóже, всегó мира грехáми непреодолевáемая Блáгосте и Незлóбиве Гóсподи, менé, пáче всех человéков грешнéйшаго, приими в руце защищéния Твоегó и избáви от всякаго зла, очисти мнóгое мнóжество беззакóний моих, подáждь исправлéние злóму и окаянному моему житию и от грядущих грехопáдений лютых всегдá восхищáй мя, да ни в чéмже когдá прогнéваю Твоé человеколюбие. Имже покрывáй нéмощь мою от бесóв, страстéй и злых человéков. Врагóм видимым и невидимым запрети, руковóдствуя мя спасéнным путéм, доведи к Тебé, пристáнищу моему и желáний моих крáю. Дáруй ми кончину христиáнску, непостыдну, мирну, от воздушных духóв злóбы соблюди, на Стрáшном Твоéм Судé милостив рабу Твоему буди и причти мя одесную благословéнным Твоим овцáм, да с ними Тебé, Творцá моегó, слáвлю во вéки. Аминь.