Приложение 1 ПОГОДИНСКИЙ ЛЕТОПИСЕЦ

[2]

Повесть летописная, откуду начяся царство бисерменское в Сибири и чесо ради наречеся Сибирь, и како Божиим повелением взята бысть православными хрестьяны, и како в Сибири бусорменская вера умалилась, а православная крестьянская вера распространилась.

О Сибирской стране

Сия убо Сибирская страна полунощие, отстоит же от Росийского государства от царствующаго града Москвы многое растояние, яко до двою тысящ и трехсот верст до перваго сибирскаго града Верхотурья, а ходу зимним путем з болшими возы семь недель; а стоит город Верхотурье на реке на Туре на левой стороне. Суть же промеж Московскаго государства и Сибирские земли облежит Камень превысочайши, яко инеми холми блиско досязати облак небесных. И сего же Камени многие рекии истекоша, овии поидоша к Росийскому государству, а инии поидоша в Сибирскую землю; в них же рыбы различные; по тем же рекам дебрь и пространная места зело.

Первая ж река в Сибирскую изыде землю, словущая Тура. По той же реке жителства имеет люди, глаголемыя вог[у]личи, глаголют своим языком, а поклоняютца идолом бездушным. В сию же реку Туру вниде с правой стороны река Салдавада Тагил, как плывучи Турою рекою от Верхотурья к Туринскому острогу; а Туринской острог стоит на той же реке Туре на правой стороне. А река Тура ниже города Тюмени многими поприщи пала в реку в Тоболу; да на той же реке Туре стоит город Тюмень на правой же стороне; а река Тобол пала в реку Иртищ, а на Иртище реке стоит город Тоболеск; а выше Тоболска многим растоянием на той же реке Иртише стоит город Тара. А река Иртищ пала в реку в Обь великую ниже урочища Самаровых гор единым плесом. А Обь великая пала в окиян море розными своими устьи.

Первое начало Сибирской земле, как было мочно изыскать писмяны и старейшинами людми о начале тое Сибирские земли: река, глаголемая Ишим, вниде в реку Иртищ. На сей же реце Ишиме бе царь Мааметова закону именем Он. И воста на него по некоих летех его ж державы от простых людей именем Чингис, яко ж бысть в Великой орде и в Руском государстве в некоторое время наименовася Темир-Аксак от простых же людей; пишет про то инде в московских летописцех. Чингис же со инеми нашед напрасно на царя Она и уби его, а царство Она царя приим Чингис. Некто ж от слуг царя Она соблюде от Чингисова убийства сына царя Она, ему ж имя [Т]айбуга. По неколикех же летех уведано бысть царю Чингису про Тайбугу, яко он, Тайбуга, сын есть царя Она, и приемлет его Чингис, и честью великою потчти его, и нарече его пот собою первым князем, и дарует ему в людех своих власть.

Князь же Т[а]йбуга прося у царя Чингиса воинских людей на войну иттить на иных людей, где он хочет. Царь же Чингис собра воинство многое и вооружено и отпусти Тайбугу с войском по реце Иртишу вниз к Обе реке, и тут живяше люди, именовася чють. Князь же Тайбуга, шед с войском, многие царю Чингису покорны учини, которые жили по реце Иртишу и по великой реке Оби живущих, и прииде ко царю Чингису с радостию. Царь же Чингис наипаче князю Тайбуге честь дарует. Князь же Тайбуга просися у царя Чингиса, чтоб ему повелел быть, где он хочет, тут да пребывает. Царь же Чингис отпусти его и рече: «Хде хощеш, тут пребываеши». Изыде ж князь Тайбуга со всем своим домом на реку Туру, и тамо созда себе град Чимги князь же Тайбуга, на том месте град Тюмень. Жил же Тайбуга во граде Чимги много лет и умре ту.

По нем княжил сын его Ходжа, по сем Ходжин сын Мар. Маровы дете Адер, Абалак. Мар женат был на сестре казанского царя Упака. Сей же казанской царь Упак зятя своего Мара уби и градом облада и владе много лет. А Маровы дети Адер да Обалак умре своею смертью. А у Адера остася сын Мамет, и по сем Адеров сын Мамет казанского царя Упака уби, и град Чинги разруши, и отойде оттуду внутрь Сибирские земли и постави себе град на реке Иртише и назва его град Сибирский, [си]речь началный, что ныне словет Старая Сибирь, от города Тоболска вверх рекою Иртишем 12 верст. Царь же Чингис живе много лет и умре. И оттоле пресецеся царство на реце Ишиме.

О Сибире, чесо ради Сибирь та вся страна Сибирь наречеся

Да егда убо [Ма]мет Адеров сын казанского царя Упака победи и повелел поставити град сего ради, яко царя победи, храбрость свою показа и ославя, и повеле тот град звати началным градом. Оттоле ж и вся та страна прозвася Сибирь. Гради ж сибирстии имянуеми кождо их по прилучаю; а опчея ж Сибирь имянуется, подобна яко и Римская страна Италия нарицается ото Итала некоего, обладавшаго странами вечерними, яко ж свидетелствует краника латышская. Гради ж Римския страны разньство имян имеют, общее же Италия нарицаетца. А прежде сего како та Сибирская земля нарицашеся, не ведомо, понеже как град Сибирь создан, тому много лет преиде. А преж того живяше ту по всей Сибирской земле, а како нарицашеся, того испытати не возможно: в память никому не вниде, ни писания обретох.

Княжение прочих сибирских царей и князей

По князе ж Мамете княжил на Сибири Абалаков сын Агиш. По нем же Маметев сын Казый. По нем же Казыевы дети Едигер, Бекбулат, которых побил царь Кучюм. Бекбулатов же сын Сейдяк.

О царе Кучюме

Прииде же степью ис Казачьи орды царь, зовомый Кучюм Мурзазелеев сын, со многими воинскими людми и доиде града Сибири, и град взя, и князей Гедегера и Бекбулата уби, и прозвася сибирский царь. И многи языцы тое Сибирской земли повинны себе сотвори и возгордися, мыслию превознесеся и сего ради погибе. Бекбулатов же сын Сейдяк ото убиения царя Кучюма жив бысть и изведен в Бухарскую землю. Царь же Кучюм царствова в Сибири лет доволно во многом богатьстве, в своей бусурманской славе и дани и оброки со многих людей иноязычных имяше. И по сем царь Кучюм посла сына своего Алея с ратью воевать в Чюсовую, и доходили до реки Камы и до города до Соли Камской, и многое дурно над православными християны починили. А как Кучюмов сын Алей пришел войною на Чюсовою, и в тое ж пору прибежал с Волги атаман Ермак Тимофеев с таварыщи, пограбили на Волге государеву казну и погромили нагайских татар и Чюсовой сибирским повоевать не дали. И с тех мест учали оне, Ермак с товарыщи, мыслить и збираться, как бы им доитти до Сибирской земли до царя Кучюма. А за год до того времени, как Кучюмов сын дошол на Чюсовую, нехто был в Сибири ж пелымской князь Аплыгарым, воевал своими татары Пермь Великую в лето ж повеленья Гос[подня], в не ж Бог восхоте царство его разрушити и дати православным крестьяном.

Об вере царя Кучюма

Вера же и закон бысть у царя Кучюма Маометя проклятого. Святии же апостоли написаша во своих святых правилех: аще кто и прилежит Мааметевы заповеди и внемлет ученью его, анафема да будет, сиречь проклети.

О пришествии Ермакове в Сибирь

В лето 7089-го (1581), при державе великаго государя царя и великаго князя Ивана Васильевича, всеа Русии самодержьца и обладателя, посла Бог очистити место идолское и победита царя Кучюма и безерменство его. И охрабри Бог не от славных мужей, ни царска повеленья воевод, и вооружи Бог славою и ратоборством атамана Ермака Тимофеева сына, прозвище ему было у казаков Токмак, а с ним собрася 540 человек казаков волских. И как Ермак с товарыщи, погромя государеву казну, пришел на Чюсовую, и тои и выше сего именовахом. А приход Ермаков с товарыщи в Сибирскую землю с Еика на Иргинские вершины да вниз по Иргизу, а Иргиз река пришла в Волгу с левые стороны; а Волгою шел Ермак вверх, а из Волги в Каму реку и Камою рекою вверх же; а из Камы реки поворотил направо в Чюсовую реку и Чюсовою вверх же; а ис Чюсовой реки в Серебреную реку, а Серебреная река пришла от Сибирской страны в Чюсовую реку с правой стороны, и Серебреною рекою вверх же; а и[с] Серебреной реки шел до реки до Борончюка волоком, и суды на себе волочили, а рекою Баранчюком вниз в реку в Тагил; а Тагилом рекою плыли на низ же в Туру реку, что ныне по той реке Тагилу в Верхотурской уезд; и от Тагилу поплыл Ермак с товарыщи Турою рекою вниз и догребли […] до Епанчина, что ныне словет Туринской острог. И тут у Ермака с татары с Кучюмовыми бой был, а языка тотарского не изымаша. И царю Кучюму то стало ведомо, а приходу на себя Ермакова не чаял, а чаяху, что он воротитца назат на Часовую.

И сь Епанчина погребли на нис же Турою рекою в Тобол реку, а Тобол река пришла с правые стороны и[с] степи, и Тура река пала в Тобол реку. И Тоболом рекою доидоша до реки до Тавды, а Тавда река пришла в Тобол реку с левой стороны от Пелынского города, за сто верст от города от Тоболска. И на устье ж той реки Тавды изымали татарина именем Таузак, царева Кучюмова двора. Поведа же им про царя Кучюма и про его воинство. Слыша ж царь Кучюм пришествие в Сибирь руских воин и мужество и храбрость их и о сем оскорбись зело. И посла вскоре во въсю свою державу, дабы ехали к нему все люди во град Сибирь и против руских людей ополчились. В мале же времени собрашась к нему множество татар и остяков, вогулич и инии языцы, яже под его властию. Посла же царь Кучюм царевича на встречю руским людем Мамекула со множеством вои и повеле устройно ополчитись. Сам же повеле засеку учинити подле реки Иртиш под Чюващевом, засыпати землею и многими крепостьми утвердити, яко ж есть достойно на боевое утвержение. Маметкул же с вои своими иде до некоего урочища, иже Бабачани имянуетца, на реке на Тоболе. Ермак же и воинство его, видевше таково собранье поганых, нимало того устрашишась. Бысть же ту брань велика, и побиша поганых множество, а досталные побегоша ко граду, ко царю Кучюму. Казацы ж поплыша в стругах своих по реке Тоболу к реке Иртишу. Татаровя ж начаша стреляти из-за гор на струги их. И то место проидоша ничем не врежены.

О Карачине улусе

Доидоша ж казацы до Карачина улусу. Се ж Карача думной бе царя Кучюма и любим ему был, делал царю пансыри и колчюги и всякую ратную збрую. Сотворишася ж с Карачею брань, и улус ево взяша, и множество богатства приобретоша, и царева имения тут взяша много. И доплыша ж до реки Иртиша. Погании ж на берег приидоша, овии на конех, овии ж пеши. Казацы ж на берег выскакаша, мужески и храбро на них наступиша. И в то время бысть поганым смертное поражение, и вдашася погании невозвратному бегству.

О собрание царя Кучюма и о розмышлении казаков

Царь же Кучюм, виде своих людей паденье, и изыде со многими людми и ста на горе, на высоце месте, зовом Чювашеве. А у засеки брат его царевичь Маметкул со многими людми и с великим ополчением. Казацы [ж] поидоша по Иртишу реке вверх и взяша городок Атик мурзы, и седоша в нем. Нощи ж пришедши, и быша вси в размышлении, видевше поганых многое таковое собрание, яко битись единому з дватцатью поганых. И убояшась и пристрашни бысть. И восхотеша тое нощи бежати назад, инии же не восхотеша, яко уже осень бе, возвратиться мало мошно, но уповаша на Бога, утвердишася и протчих уповати на Бога, яко да идут заутра противу поганых.

О бою под Чювашем у засеки

Месяца октября в 23 день, на память святого апостола Якова, вси рустии люди из городка вышли на бой, и вси глаголаху молящеся: «С нами Бог, сотворитель наш! Да поможет нам, созданию своему!» И паки приложиша: «Боже, помози нам, рабом своим, и прослави свое великолепое имя святое, где было безбожие!» И начаша приступати к засеке, и бысть брань велика. Тии же погании зверие поиде дерзостно, показовахуся, яко копейны сулицы во [утро]бах, и бьющеся с обою стран крепко. Погании же пустиша тмочислено стрел, а сами одеяны железом и меднощитницы; казацы ж противу их изо огненнодыщущих пищалей стреляху. И бысть бой и сеча зла, за руки емлющесь сечахуся. Божиею же помощию рустии креплящуся, а погании помалу начаша оскудевати и слабети. Казацы ж погнаша и вослед их побивающе, и ногами их попирающе. И очервленишась тогда поля кровми и трупием послаша ту, яко ж древле бысть от телес у Троинского града близ Скомандры реки пленующу Акилесу. Тако бо тогда победиша окаянных бесермен за их идоложертвие и кумирослужение. Царевича ж Маметкула уязвиша руские вои, тогда убо и поиман был, но свои его увезоша на он пол реки Иртиша. Царь же Кучюм учал быть зело страшен от православнаго воинства.

О побе[г]е царя Кучюма

Царь же Кучюм, стояще на горе высоке, зовомые Чюваша, и веде своих падение, повеле мурзам своим кликати скверную свою молитву и призывати на помощь скверные и проклятие свои идолы. И не бысть ему помощи от них и никоего успеха. В то ж время князцы остяцкие своими людми с остяки отоидоша от царя Кучюма кождо во своя улусы по юртам. Царь же Кучюм, виде руским людем поможение всесилнаго Бога, сотворшаго небо и землю, а свое видя божество и царство своего видя лишение, рече сущим с ним: «Побежим не медлюще, сами видим всему лишение; были силнии, а ини изнемогоша». И скорбен бысть зело, рече: «Что сотворю и где скрытись?» Покры срамота лице его, и еще рече к своим: «Хто мя победи, из царства отгна? Ведаем, от простых бо людей Ермак и не со многими прииде и толико зло сотвори, воя моя изби и меня посрами». И потом глаголя: «Яз победи во граде Сибири князей Едингара и Бекбулата и многое богатство приобретох, також ни от кого послан, а ныне обратились мои дела противу мне». И прибеже царь Кучюм во град, и взя мало нечто от сокровищ своих, и вдашась невозвратному бегству со въсеми людми. Град же свой Сибирь остави пуст.

О пришествии во град Сибирь атам[а]на Ермака и прочих с ним казаков

Да егда убо под Чювашем преста бранное ополчение, рустии ж [людие] утрудишась, и уж бе нощи приспевши. Отоидоша оттуду и обначеваше ту, стражи ж утвердивше крепцыи от поганых, да не яко окоянни ухапят аки змеи.

И не ведаще, яко погании от града изыдоша. На утрии ж вси рустии люди помолившесь Господу Богу и молитву сотворше ко всещедрому создателю своему Богу и к Пречистей его Богоматере, и ополчишась поидоша ко граду Сибири небоязнено. Да яко ж приближишась близ града, и не бе слышати в граде ни гласа, ни послушанья, мняше ж себе, яко скрышась погании з бойством во граде. Но уповаша на Бога, приидоста во град. Приидоста ж Ермак с товарыщи своими во град Сибирь в лето 7089-го октября в 26 день, на память святаго великомученика Христова Дмитрея Селунскаго. И прославиша и благодариша Бога, давшаго такову победу на окаянных идолопоклонник, на огарян, яко бежаша множество их поганых от малочисленаго [воинства; и вси] радостию великою радующеся рустии люди, славяще Бога и Пречисту[ю] его Богоматерь. Достойно бо во истину воспоминати сию на поганых победу, а дараванну[ю] милость Божию к роду крестьянскому и преидушая времена, яко немногими вои таковое пресловущее царьство взято бысть.

О пришествии татар, остяков во град Сибирь к Ермаку с товарищи

По взятии ж Сибири в четвертый день прииде к Ермаку во град Сибирь остяцкой князец имянем Бояр со многими остяки, принесоша ж Ермаку с товарыщи многие дары, мяхкие рухлядь и запасы, яже на потребу. По сем же начаша ту приходити татары многие з женами и [з детми] и начаша жити в первых своих домех, видяш[е], яко покори их Бог православъным крестьяном.

О убиении казаков от татар

Того ж лета месеца декабря в 5 день Ермакове дружине без опа[сения?…] Иртишем к урочищу, именуется Абалак, а ходит для рыбной ловли ясаул казачей имянем Брюзга с товарыщи. И поставили стан свой, почиша бе[с] стражей, не чаяше на себя нашествия безбожных. Брат же царя Кучюма царевич Маметкул со многими людми пришед на них тай и поби их. Слышано же бысть во граде у Ермака о убиении есаула Брюзги с товарыщи. Ермак же з дружиною своею погнаша вослет поганых и достигоша их. И бысть с погаными брань велика на многь час, погании же на бежание устремишась. Ермак же с товарыщи во град Сибирь возвратися.

О послании к государю к Москве сь сеунчем

Егда ж изволи Бог предати православным крестьяном Сибирскую землю, по взятии, того ж лета Ермак с товарыщи послаша к государю царю и великому князю Ивану Васильевичю всеа Русии к Москве сь сеуньчем атамана и казаков, тут же послан был казак Черъкас Александров потому […] не малой, всего 25 человек. И писали Ермак с товарыщи благочестивому государю царю и великому князю Ивану Васильевичю, всеа Русии самодержцу, что изволением всемилостиваго в Троицы славимаго Бога и Пречистой его Богоматери и великих всеа Русии чюдотворцов молитвами, а его, государя царя и великаго князя Ивана Васильевича, всеа Русии, праведною ко всещедрому Богу молитвою и его царским счастием, его государевы люди, атаман Ермак Тимофеев с товарыщи, царъство Сибирское взяша и многих живущих ту иноязычных людей под его государеву царъскую высокую руку подвели и к шерти их привели, а сибирскаго царя Кучюма и с его детми с Алеем да са Алтынаем да с Ышимом и сь его вои победита и брата царя Кучюмова царевича Маметкула розбиша ж. А иноязычных многих людей татар и остяков и вагуличь привели к шерти по их верам на том, что им быть под его царъскою высокою рукою до веку, покамест […] стояти, и ясак им государю давати по вся годы, а на руских людей зла никакого не мыслить. А которые похотят к государю в его государеву службу, и тем служити его государева служба прямо, недругом его государским не спущать, елико Бог помощи подаст, и самим им не изменить, к царю Кучюму и в ыные орды не отъехать и зла никакого на всяких руских людей не думать, и во всем стоять в прямом постоянстве.

Посланнии ж от Ермака атаман и казаки к Москве приехеша. Поведано ж бысть о том благочестивому государю. И благочестивый государь царь и великий князь Иван Васильевичь всеа Русии слыша сия и повеле отписку принять и вычесть перед своим царским лицем. И егда государь услыша Божию помощ и силу, яко снабдит Господь государство ево и пространство ему дарует и непокоривыя покоряет и повинных сотворяет, и неповинныя и непослушливые повинны бысть, и тогда благочестивый государь царь прослави Бога и Пречистую его Богоматерь и великих московских и всеа Русии чюдотворцов, яко яви ему, государю, таковую превеликую богатую милость: немногими вои таковое царство достиже, а на поганых победа бысть. Ермака же заочно своим государевым жалованным словом пожаловал и похвалил, також и всех ево таварыщей атаманов и казаков. А тех сеуншиков пожаловал государь своим царским многим жалованьем, денгами и сукны. И паки государь отпусти их в Сибирь к Ермаку с товарыщи. И посла государь Ермаку с товарыщи многое свое государево жалованье, сукна и золотые. С ними же государь послал воевод своих князя Семена Волконскаго да голов Ивана Киреева да Ивана Васильева сына Глухова, а с ними казанских и свияских стрелцов сто человек, да пермичь и вятчан сто ж человек, и иных ратных людей 100 человек. А Ермаку указал государь быть к Москве. И Ермак в тое пору убит, покамес сеуншики ездили к Москве.

О убиении Ермакове речется после сих. А как Ермак был жив еще в Старой Сибири до убиения своего:

О взятии царевича Маметкула и как пришол к Ермаку татарин Сенбахта

По сем же прииде во град Сибирь к Ермаку татарин именем Сенбахта и пове[да] Ермаку, что царевичь Маметкул, Кучюма царя брат, стоит на реке на Вагае вверх по Иртишу реке, от града Сибири поприщ 100, а Сибирь город от града Тоболска 15 верст по нынешнему содержанию. Ермак же посла некоторых резвых и искусных ратному делу. Поидоша ж сии воини, и дошедше агарян, и на станы их нападоша нощию, а им спящим, а иным еще убужающимся, и многих поганых побиша. Царевича ж Маметкулова шатра доидоша, и обойдоша его, и яша его жива и со всем богатеством. Приведоша его во град Сибирь к Ермаку с товарищи. Ермак же рад бысть зело, и прият его честно, и поведа ему про государьское величество, и росказывает государево жалованье, и уласкает его ласкосердыми словесы. Царь же Кучюм ожидая к себе брата своего царевича Маметкула многое время, приидоша ж к нему вестницы и поведаша ему, царю, яко пленен бысть царевичь Маметкул. Слыша ж то царь Кучюм, и болезнова о том, и плакася со всем домом своим на много время.

О государевых воеводах с Москвы

Князь Семен Волконской пришел в Ст[ару]ю Сибирь, что был царя Кучюма город. А Ермак уже убит до князя Семенова приходу. А царевич Маметкул у казаков, у Ермаковых таварыщей И князя Семена Волконского не стало тут в Сибири вскоре, и многие руские люди померли от скудости хлебные. А голова Иван Киреев повез к Москве царевича Маметкула к государю, а с ним Ермаковы казаки. А в Сибири остался один голова Иван Глухов, а с ним осталцы Ермаковы казаки да которые люди присланы были с воеводою со князем Семеном Волконским и з головами, казанские и свияжские стрелцы да пермича и вятченя. А запасу у них не было никакого. И те все присылные люди, казанские и свияжские стрелцы и пермские и вяцкие люди, померли в Старой Сибири з голоду, а осталось толко Ермаковских казаков девяносто человек. И зимовал и Иван Глухов в Сибири, а на лето, как вода вскрылась, пошел ис Сибири черес Камень Собью рекою и вышел в Пустоозеро, а с ним Ермаковъских казаков девяносто человек. А Сибирь город оста[ви|л пуст, руские люди вышли въсе.

О пришествии князя Сейдяка из Бухар и отшествии от царя Кучюма думного его Карачи, яко же прежде именовахом, как улус того Карачи Ермак възял, не доходя царя Кучюма

Приидоша ж вестницы к царю Кучюму и поведаша ему, яко идет на него с войском многим князь Сейдяк Бекбулатов сын из Бухарския земли, еже от убиения царя Кучюма скрыясь там, и воспомянув отечество свое, и наследити восхотех, и хощет отмстить кровь отца своего Бекбулата и кровь дяди своего Гедегера. Царь Кучюм слыша сия от поведающих ему и убояся страхом велиим зело, еще бо изообилно в нем страху первого, еже бысть от руских людей. Тогда думной его Карача своими людми, иже весть вьсю дума его, отоиде от царя Кучюма и не восхотеша быть в повиновении пред ним. Слыша ж сия царь, печален бысть зело, и восплакася плачем велиим, и рече: «Его ж Бог не помилует, того и любимии его друзи оставляют и бысть ему, яко враги». Карача ж прииде к Ялымскому езеру, еже есть вверх реки Иртища, промеж реки Тары и реки Оби, и ту пребываше.

О взятии городков и улусов

Храбровшу ж Ермаку з дружиною своею по всей Сибирстей земли, ходиша ни от кого ж устрашающесь, страх бо Божий ко всем бысть живущим тамо, яко меч обоюду остр идый пред лицем рускаго полка, потиная многих, устрашая всех. Повоева ж многие городки и улусы по реке Иртищу и по великой Оби, Назымской же городок на Иртише реке взяша со князем их и со всем улусом и богатеством. И возвращахусь во град Сибирь з богатеством велиим и с радостью.

О послех от Карачи во град Сибирь, как еще Ермак жив бысть, до государевых воевод приходу

Перед воеводцким приходом, того ж лета, приидоша к Ермаку от Карачи послы и просиша людей оборонити их от Казачь орды. И даша на том шерть по своей безбожной вере, что казаков не побить и никакова зла на казаков не мыслить. Ермак же с товарыщи посоветова и повериша их лукавому безбожному шертованию, отпустиша к нему атамана имянем Ивана Колца, с ним же 40 человек казаков с вогненым боем. Егда ж приидоша сии воини к нечестивому Караче, и вънезапу оманом вси избиени быша от нечестиваго Карача. Слышано ж бысть Ермаку во граде, яко тии воини, Иван Колцо с товарыщи, побиени быша от нечестиваго Карачи, и плакахусь зело. Ведомо ж бысть поганым, яко атамана Ивана Колца с товарыщи Карача убил, и начаша по многим местам, по волостям и по улусам казаков погании побивати.

О пришествии Карачи с татары под град Сибирь

Того ж лета во время великаго поста прииде Карача со многими воинскими людми и облегоша град Сибирь, и станы поставиша. Сам же Карача ста в некоем месте, зовом Саукъсан, от града яко три поприща по реке Иртишу, многую ж гражаном тесноту деяше. Тогда же стояще до пролития воды, до месеца июня. Тогда ж изыдоша из града казаки тай и приидоша к станом Карачиным в Саукъсан и нападоша на нь нощию, онем же спящим безо всякаго опасенья, и побиша множество нечестивых татар Карачиных, двух же Карачных сынов убиша. А иные татаровя розбегошась врознь от страха без веданья. Сам же зломысленной Карача с невеликими людми убегоша за озеро. И прииде ж вси татаровя, кои стояще около града, в Сауксан, надеяхусь казаков всех смерти предати, и нападоша на нь, много бо их, безбожных, собрано бяху. Казацы ж крыяшесь в кустех и на выласку хожаше ис кустов, и бияшесь с погаными до полудьни. Татарове ж отступиша от них; казацы ж во град возвратишася. Карача ж виде, яко казаков не возмогох одолети, отъиде восвояси срамом велиим.

О убиении Ермакове и протчих казаков от царя Кучюма

Лета 7092-го (1584) посланием Божиим уготовись час, прииде на воинов смерть. Приидоша от бухар от торговых людей весницы к Ермаку во град Сибирь и поведаша, яко царь Кучюм их в Сибирь не пропусти. Ермак же слыша то и со многими воинскими людми поиде на встречю к ним по реке Иртишу в стругех. Дошетщу ж им до реки Вагая, бухарцов не обрете и паки поидоша по Вагаю реке въверх до места, иже зовомо Атбаш, и ту не обрете их, оттоле возвратись. Пришедши ж нощи, казаки ж утрудишась от многаго пути. Доидоша ж до перекопи и ту обначевашесь и поставиша станы своя. Стражи ж крепки не утвердиша, ослабеша умы своими, яко приходит смертный час их. Царь же Кучюм узрев их, повеле тое нощи крепко стерещи и многих татар по многим местом розосла. Тогда же тое нощи бысть дождь велик, в полунощи ж приидоша множество поганых, казаком же спящим безо всякаго опасеннья. И нападоша на нь погании, и побиша всех, толко един казак утече. Ермак же виде своих воинов от поганых побиваемых, а помощи ни от кого чающе, побеже един в струг свой, а струг отплы от брегу, и не много доити, понеже одеян бе железом в пансыре тягче; и не доплы струга, утопе. Бысть се послание на воинов Божиим произволением месяца августа в 5 день. Слышав же сия во граде оставшая казаки, яко Ермак и прочие казаки убиени бысть, и плакахусь горце зело на много время.

А после того въскоре пришли от государя с Москвы с ратными людми воевода князь Семен Волконской да головы Иван Киреев да Иван Глухов, а с ними казанские и свияжские и пермские и вятцкие стрелцы. И о князь Семенове приходе Вол[конскаго] впреди рекохом, и как князя Семена Волконскаго во граде Сибири не стало. И многие Ермаковы казаки, и которые с Руси люди пришли, померли в городе з голоду. А Иван Киреев пошел с царевичем Маметкулом к Москве. И как Иван Киреев с царевичем Маметкулом пришел к Москве 92-м (1584) году, и в то время, Богу изволщу, царя Ивана Васильевича не стало. А по своем преставлении повеле на царской престол возвести сына св[о]его, благочестиваго государя царя и великаго князя Федора Ивановича всеа Русии. Привезоша ж царевича Маметкула, и по государеву указу въстреча ему была честна, и пожаловал его государь царь и великий князь Феодор Ивановичь всеа Русии многим жалованьем, потом же и служилых людей.

А в Сибири только остался во граде Иван Глухов, а толко с ним Ермаковых казаков девяносто человек. И убояшась тут жити и беззапасны до конца, изыдоша из града Сибири и поплыша по Иртишу реке вниз и по великой Оби вниз же, и черес Камень прошли Собью же рекою в Пустоозеро; тута ж казак Черкас Александров. А куды ныне ходят черес Камень, тогда того пути не бывало. А ис Пустаозера пришли к Руси. А град Сибирь оставиша пуст.

О царевиче Алее Кучюмове сыне и о князе Сейдяке, как пришел из Бухар

Егда же из града Сибири казаки побегоша, тогда то уведа царевичь Алей, царя Кучюма сын, яко град пуст остася. Прииде с воинскими людми и вниде во град, и нача ту жи[т]и. Слышано ж бысть о том князю Седяку Бекбулатову сыну, яко Ермак с товарыщи на перекопи от царя Кучюма убиени бысть, а прочии же бежаша из града, а градом обладоша царевич Алей Кучюмов сын. И собрася своими воинскими людми и со всем домом своим, и прииде из Бухар ко граду Сибири, и град взял, а царевича Алея взял и прочих Кучюмовых сынов смер[тью] убил и из града изгна. А отчину отца своего Бекбулата Казыева приемлет и пребываше во граде.

На Москве ж чающе Сибирь за государем, и живут в ней государевы люди. И послаша с Москвы воеводу Ивана Мансурова, а с ним семсот человек служилых людей розных городов, казаков и стрелцов. По Ермакове ж убиении и по смерти князя Семена Волконскаго во второе лето прииде с Москвы в Сибирь воевода Иван Мансуров с воинскими людми и доидоша в судех рекою Тоболом до реки Иртиша. Тогда ж татар собрашась множество во уреченом месте у реки Иртиша на брегу. Государев же воевода Иван видя таково собрание поганых и слыша, яко град Сибирь пуст, а казаки бегоша к Руси, и убояся поганых, и не приста ко брегу, и поплыша вниз по реке Иртищу, доплыша же до великии Оби. И бе бо тогда уж осень, и лед в реках смерзаетца. И видя то, яко наставаше зима, и повеле на реке Оби на другой стране против иртишъскаго устья постави городок, и зимова тут с войском.

[О пришествии остяков к городку]

По неколиких же днех, зимним временем приидоша под городок множество остяков, живущии по великой Оби и по Иртишу. Начаша ж к городку приступати со всех стран. Людие ж из городка противляхуся им, також стояще и биющеся у городка день весь. Нощи ж приспевшу, погании ж отступиша от городка.

На утрии ж паки приидоша остяки под городок и принесоша с собою кумира своего, понеже в земли их кумир словутен бе и почитаху они, погании, себе вместо Бога. Его ж поставиша под [д]ревом и начаша жрети пред ним, надеяхусь, яко помощью его християн взяти и смерти предати. В то же время, егда иже жруще, стрелиша из горотка ис пушки и древо оно, под ним же бе кумир, розби на многи части. И сего погани устрашишась зело, не ведующе, что се есть, и мняху, яко хто из лука стрелил, и реша друг ко другу: «Силнии убо сии стреляти, яко таковое древо разби». И с того страха отоидоша восвояси, а Иван Мансуров в том городке жил многое время и до весны.

О пришествии государевых воевод в Сибирь и о поставлении градов в Сибири

В лето 7094-го (1586) по государеву цареву и великаго князя Феодора Ивановича всеа Русии указу приидоша с Руси воеводы Василей Борисов сын Сукин да Иван Мясной, с ними ж многие руские люди и Ермаковы казаки, Черкас Александров с товарыщи. И поставиша на реке Туре град Тюмень, иже преже бысть град Чимги, и домы себе поставиша, и воздвигоша ж церковь во имя живоначалные Троицы в прибежище всеправославным крестьяном. Того ж лета пришел государев воевода князь Федор Горчаков и пелымскаго князя Аплыгарыма, призвав в город, поимал.

О граде Тоболске, о здании и о поставлении святых Божиих церквей, и яко началный град той наречеся

В лето 7095-го (1587), при державе великаго благочестиваго государя царя и великаго князя Феодора Ивановича всеа Русии, по его царскому повеленью послан в Сибирь с ратными со многими людми его государев воево[да] Данило Чюлъков. И по повеленью государскому доидоша до реки Иртиша, от града ж Сибири вниз 12 поприщ. И обрете место на той реке Иртише усть речки Курдюмки, против мало пониже устья реки Тоболу, яко единыи версты, на велице горе и красно велми, а под горою по реке Иртишу луги великие и озера все благополучные, Богом строенное место, плавающим же защита ту бури и пристанище тихо и покойно. И на сем же прекрасном месте поставишася град и нарекошася имя ему Тоболеск реки ради Тоболы. Се же и доднесь государева вотчина посреде всее Сибирской земли, богоспасаемы град Тоболеск. Туто ж во граде Тоболске создашася храм во имя Пресвятыя живоначалные Троицы, понеже ту в Троицы славимому Богу прославляему быти от православъных крестьян; аще бы не благоволи Бог создатись ту граду и воздвигнутись святым [Божиим] церквам, мощен бо есть Бог наставити крестьян и помощи им, дабы шедши, помощию его взяша град Сибирь и князя Сейдяка, иже бе в нем господин, победити. Ныне же благоизволи ту и просвети место во славословие живоначальной Троицы Отцу и Сыну и Святому Духу: вместо преже имянитаго града Сибири Старой сей именовася. И начало градовом бысть град Тоболеск, понеже еще ту победа и одоление на окаянных бесермен бысть, и началный царствующаго града Старой Сибири Сейдяк ту в Тоболске взят бысть Божиим праведным промыслом. И паче же сей Тоболеск вместо царствующаго града Старой Сибири именовася и препрослыся началным градом.

О взятии князя Сейдека и царевич[а] Казачьи орды Салтана и Карачи

То был думной у царя Кучюма, а побил он обманом Ермаковых казаков Ивана Колца с товарыщи, призва к себе оманом, бутто на спомочь от Казачьи орды людей.

По поставлении же града Тоболска при воеводе Даниле Чюлъкове изыде и[с] Старой Сибири, из града, что от Тоболска 12 верст, князь Сейдяк, с ним же бысть и из града изыде царевич Казачьи орды Салтан, туто ж бысть царя Кучюма думной Карача, с ними же воинских людей пятьсот человек. И доидоша Иртишем, гуляючи близ Тоболска, яко за 2 поприша, имянуетца ж место то Княжой луг, позать того места, что ныне Знаменской монастырь, и нача тешитися ястребы за птицы. Увидев их из града Тоболска воевода Данило Чюлков и посоветовал, отпусти ко князю Сейдяку посланников и приказа им говорить князю Сейдяку, что он приехал в город советовать о мирном поставлении, тогда еще яко им, безбожным, злом дышащу на православных крестьян. Посланныцы пришедше ко князю Сейдяку и возвестиша ему сия въся, яко же повеле им глаголати воевода Данило Чюлков. Князь же Сейдяк слыша от послалников сия с[л]овеса и учал советовать с царевичем Салтаном и с Карачею, и абие совету бывшу, и поиде князь Сейдяк и с ним царевичь Салтан и Карача, а с ними по их веленью поиде воинских людей сто человек, [про]чих же оставиша вне града. Приидоша ж во град Тоболеск. Воевода ж Данило Чюлков с воинскими людми встретиша их во градцких вратех, оружия же их повеле положити вне града. Приидоша ж вси во двор воеводцкой и седоша ж за стол, уже бо вся уготовлена суть ести и пити. Глаголаше ж много о мирном поставлении. Князь же Сейдяк седяше задумався, ничто же пия, ни брашна вкуси. Видев же сие Данило Чюлков и рече князю Сейдяку: «Князь же Сейдяк, что зло мыслиши на государевых людей, на провословных християн, ни пия, ни брашна вкушая?» Рече ж князь Сейдяк: «Аз не мышлю на вас никакого зла». Данило ж прием чашу питья и рече: «Понеже, Сейдяк, аще ты не мыслеши зла, и с тобою царевичь Салтан и Карача, на нас, православных християн, и выпей сию чашу за здравие». Прием же чашу князь Сейдяк и нача пити, и поперхнув в гортани. По нем же приим чашу царевич Салтан, нача пити, також поперхнув. Потом же нача пити Карача, також поперхнув же в гортани, яко ж оне зло мысляще, Богу бо обличающе их яве. Видевьше ж сие Данило Чюлков и служивые государевы люди и познаша, яко князь Сейдяк и прочии с ним зло мыслят на государевых людей, на православных християн, и помаяв рукою Данило своим, воинские ж люди начаша поганых побивати. Князь же Сейдяк кинулся в окошко и за ним царевичь Салтан и Карача, но абие поиманы быша, связани бысть, прочии ж побиени быша. Слыша ж стояще погании вне града, яко князь их Сейдяк побежен бысть, и на бегство устремишась, яко от страха, и во град свой не возвратишась. Слышавше же во граде Сибири такое побеждение, и всии из града побегоша, ни един же остася.

О послании князя Сейдяка и царевича Салтана и Карачи к государю к Москве

По неколице ж времени послаша князя Сейдяка Старые Сибири, и Казачьи орды царевича Салтана, и бывше зломысленъного Карачю в царьствующий град Москву со многими воинскими людми.

О всех благих, яже от Бога подаваемая

Оттоле же солнце Евангилия землю Сибирскую осия и псаломский гром огласи; а егда не было в Сибири веры християнския, тогда ж не было во всей Сибирской стране грому, и нихто отнюдь не слыша. И Божиим повелением на мнозех местех поставишась гради и села, веси, в них же множество внутрения жителя, православъных пребывания быша, паче ж просиявающе в велелепную славу Отцу и Сыну и Святому Духу. Мнози ж невернии, видевще истиную православную крестьянскую веру, крестишась во имя Отца и Сына и Святаго Духа и от неверия верни бысть. Всюду ж по той земли благодать Божия излиясь по писаному, глаголющему Давиду: «Посетил еси землю и упои ея, умножил еси и обагатити ея». И мнози от неверия бысть вернии. Паче же и чюдеса Божия ту содеяшась, еже есть избавлении недугом, и свобоженью страстем, и различным болезнем исцеленье, и прочая благая, подаваемая нам, православъным крестьянем, от всемогущаго Бога. Аминь.

А у царя Кучюма было всех десеть сынов. И семи сынов у царя Кучюма убил князь Сейдяк, которой пришел из Бухар, в Старой Сибири, выше сего то рекохом же. А три сыны у Кучюма, царевич Алей да царевичь Алтынай, при прежних государех были на Москве; а как оне взяты, тому писмо есть в Посолском приказе. И брат царя Кучюма Маметкул был на Москве же, а как он взят в Сибири и привезен к Москве Иваном Киреевым.

 

Приложение 2

СЕМЕН УЛЬЯНОВИЧ РЕМЕЗОВ. ИСТОРИЯ СИБИРСКАЯ. ЛЕТОПИСЬ СИБИРСКАЯ КРАТКАЯ КУНГУРСКАЯ

[5]

История сибирская

Искони Всевидец християнский наш Бог, Творец всея твари, зижьдитель дому Своего и снабдитель винограду и мысленных овец, судебно предповеле проповедати ся чрез Сибирь Евангелие в концы вселенныя на край гор Тобольску граду имениту.

Велий Господь Бог наш християнский, еже подает рабом Своим от рождения, яко жь Самсону, исполинство, тако Ерману Тимофееву сыну Поволскому даде силу, спех и храбрость смлада во единство сердца и вседушно храбръствовати.

И в таковой храбрости Герман, в дружине своей Ермаком прослыв и атаманом наречен, яко зрачен, воюя бусы по Хвалынскому морю и по Волге со многими своеволными вои, яко и царскую казну шарпал.

Слышав благочестивый царь Иоан Васильевич на таковых взыскание, посла силных своих вои, повеле вся избити, а началных, поимав, скончати, да не имут казны его разбивати и пути запирати.

Слыша Ермак от многих чюсовлян про Сибирь, яко царь владелец: за Каменем реки текут надвое, в Русь и в Сибирь; с волоку реки Ница, Тагил, Тура пала в Тобол. И по них живут вогуличи, ездят на оленях. По Туре же и по Тоболу живут татара, ездят в лотках и на конях. А Тобол пал в Ыртыш, и на Иртыше царство близ устья и многие татара. И Иртыш пал в Обь. А Обь река пала в море двема устьи, а по ней живут остяки и самоедь, ездят на оленях и псах и кормятся рыбами. А по степи калмыки и мунгалы и Казачья орда, ездят на вельбудах, а кормятся скотом.

Собрании вои в лето 7086 и 7 (1578—79) с Ермаком с Дону, с Волги и с Еику, из Астрахани, и с Казани, ворующе, разбиша государевы казенные суды послов и бухарцов на усть Волги реки. И сълыша посланных от царя с казнью, овии от них разыдошася, другии от многаго числа разбегошася в различные грады и веси.

Ермак побеже вверх по Волге и по Каме и дошед Орла городка, и ту многие запасы у Строгановых, ружье и вожей взял, и бежа по Чюсовой и речкою Серебреною до волоку. И переволокли суды на Тагил, волоку бе 2 дни ходу, инии жь суды на волоку покинуша.

И приехав на стан Тагила реки в урочище речки Абугая в лето 7088 (1580) году со единомысленною дружиною, с 3000 человек, и ту плениша многих вогуличь, улусы и плен взяша, овии же доброволно покоришася до Тавды; и воеваша во всю зиму Пелымские уезды до весны.

Весне же пришедши водополью, овии жь не похотеша с Ермаком воевать и язвленными вспять в Русь возвратишася, инии же на станех умроша, инии же в походех избиени. И остася плыти вниз с Ермаком 1636 человек и приемше запасы на пропитание свое.

Весне же пришедши, яко храбрии казацы видевше и разумевшие, что Сибирская страна богата и всем изообилна, и живущии люди в ней не воисты, и поплыша вниз по Тагилу маия в 1 день, разбиваше суды по Туре до перваго князя Епанчи, идеже ныне Епанчин Усениново стоит. И ту собрашася много агарян, и бои починиша по многи дни, яко лука велика, вверх ходу 3 дни, и в той луке биюшеся велми до выезду; и ту казацы одолеша.

И воеваша все лето, и августа в 1 день взяша град Тюмень, еже Чингида, и царя Чингыза убиша и многие припасы и богатства взяша, и ту зимоваша, яко видя множество бусурманского языка по Туре, и не смеяше плыть до Тобольска.

Первоначалные с начала века цари бусурманские именем: Онсом хан, кочюя по Ишиму и живше на усть Ишима реки, град на Красном Яру Кызыл-Тура и трои окопи; по Онсоме хане Иртышак царь, тем именем Иртыш река, конца не имать, то и ево царство безконечно будет, его жь Чингыз, царь тюменской, войною преодолев; и по Иртышаке Саргачик царь до Кучюма, его жь Кучюм пленив. Ишимские жь татара и доднесь именуются саргачики. Тюмень слыла Онцимки.

Маметь царь казанскаго царя Алима победил и на усть речки Сибирки град Кашлык учинил, царство в Сибири распространив и поддани учинил. И оттоле нача славнее зватися Сибирь и цари, их же бусурманская история поведает.

По сих в Сибири в Кашлыке граде царствовали Агиш царь, Абалак Агишев и по нем Маметь, тажь Маметевы дети. При сих во вся лета видеша царь и князи, агуны, муллы и абызы и протчие бусурманы на том месте, идеже ныне град Тоболеск и соборная церковь, до колоколни видешася христианский со светом град в воздухе и церкви и звон велий, яко ими дивитися и ужасно недоумея, что будет се. Сие ими видение начатся видетись, яко примером бусурманских историк, с 7060 (1552) году во вся зори и праздники им и до приходу Ермакова.

При Маметеве сыне царе Сенбахте и видешася в летное время воды и земля, и травы окрововлены и черны, на градском же месте по горе и долу искры златы и сребрены блещашеся. Место жь то, идежь ныне град, мыс той зовом Алтын Яргинак.

При Саускане царе на градском месте, идежь соборная церковь, видешася всем бусурманом огненный столб от земли и до небеси, и в том огне многи видения различны. И бусурманы и доднесь видению тому и ужасу возвестить по летописцу своему не умеют, точаю един звон слышан.

Поблизу жь городоваго места, за речкою Курдюмкою, на мысу город и окопи, зовом Бицик-Тура, живяше мурза Девлетим Бай. Людие ж видеша в толпе ужасное видение различное, и битвы, и взук, побегоша во град Кашлык вне ума, овии жь решишась ума и умроша. Ныне словет Паней Бугор.

Царь Кучюм прииде от Казачьи орды со многими вои, и побив царя и князи Етигера и Бекбулата, и прославишася сибирской царь, и дани со многих низовых язык взяша, и городки свои разпространиша, по многим местом названми своими владеша.

Кучюм бе веры бусурманские, кланяшася кумиром и жруще скверно, и пребываше безаконно, яко имети ему 100 жен и юнош, тожь девиц, тако жь и протчим агаряном безазорно, елико числом хощут. Бог же всевидец пресече царство его вскоре.

Во второе лето ехав Кучюм в Казань и дочь казанского царя Мурата взят в жену, и с нею многих чюваш и абыз и рускаго полону людей, и приехав на Сибирку, пребываше славно.

Розсадив царь Кучюм жен своих болших во блиских местех, взят дочь у Девлетима мурзы и пребывать ей устроив близ градскаго места, на Паньине Бугре; другой же на Сузгунъском мысу, именем Сузге, по той жене и город зовом Сузга. Ныне ж словет Сузгун место то. И ездиша к ним по пятницам.

При Кучюме же предиреченные знамение начасте; видешась бусурманом всегда, яко им от таковых видений велми во ужасе быти. И начаша волховски пытати, что имать быти, и пленник вопрошати, что руски видение се. Их же волхвы и пленники согласно к Кучюму провозвестиша, яко Бог отдает место то християном вскоре и тебе изгонит, и скончаешись в злом пребывании. И бысть тако. Он же повеле за се многих казнити.

Царь Иван Грозный приказывает казнить воровских казаков: «Слышав благочестивый царь Иоан Васильевич на таковых взыскание, посла силных своих вои, повеле вся избити…»

Ермак собирает сведения о Сибири: «Слыша Ермак от многих чюсовлян про Сибирь, яко царь владелец: за Каменем реки текутъ надвое, в Русь и в Сибирь…»

При Кучюме же видение бысть: на усть великих рек Иртыша и Тобола велик бе остров пещаной, и много во многое время видеша в полдни с агареном два зверя, исходяще со сторон острова из Ыртыша и Тобола на среду, и битву учиняше между собою велию. Иртышной же бел и велик, волосистой, с вола, подобие волку. Тоболной же мал и черн, подобен псу гончему, яко жь в битве одолевати болшаго, и мертва излагати, и в воду уходити. И болшей оживаше и в воду уходя.

Се же видение многаши видев и сам Кучюм с людми, и вопрошаше агунов и абыз, и волхвов, и абыз своих: «Что се видитца?» Они ж возвестиша: «Болший зверь — твое царство, а малый — руский воин, имать быти вскоре, и тако тя умершвляти, и пленити, и в разхищение отгнати, и грады твои взяти». Кучюм же таковых повеле по лугу конми развлачити.

Паки на предиреченное возвратимся, о нем же слово належит. Ермаку же пребываюшу в Чингиде, и воем его времено умаляюшеся цынгою и недугом чрева, Кучюм жь изходяще в походы на Камыш со всеми вои пребываше, благодариша Бога, яко рыб сухих, и ячменя, и полбы множество обретоша.

Весне же близу приспе время Кучюму ясак с подданных своих збирати; соболи и лисицы и прочих зверей и рыб. Посла в Тарханской городок к Тархану мурзе дворецкаго своего Кутугая. Он же пришед для збору. В то время казацы плениша его в Тарханах, Тарханской же бе заставной таможной Кучюмов городок, а не Чингызов, и привезоша его к Ермаку и с есаком.

Ермак же вопрошаше его с великою честию о царе Кучюме и о всем житии его, похваляюше их, глаголаше ему, яко в гости приехал, показуюше казацы храбрость свою и стрелбу огненную и 5 человек атаманов. Они ж казаков и прежь сего не имуще видети, дивишася, возвести ему вся подробну о Кучюме и жителех. Ермак же отпустив е к Кучюму чесно и подарив и: Кучюму и челобитье, и трезуб, гостинца всем женам, челобитье князем и мурзам и протчим людем посла, и сказа, яко вспять возвратися в Русь.

Кутугаю же, едушу санми, по пути своем возвещаюше во всех кучюмовых городех, яко гость славный и храбрый приехал с пятью казаками, яко стреляют невидимыми стрелами, и дары свои от Ермака кажуше многи, возхваляюшу Ермакову добродетель, Кучюму челобитье и женам ево всем, и князем, и мурзам, и проччим возвещаше.

Пришедшим же Кутугаю до Кучюма и вниде в ургу в руском платье цветном; ясаку же не привезе, возвещая, како поиман Ермаком и вопрошен, и невидимое стреляние пяти казаков видев, и челобитье посланное и трезуб ему и женам всем, челобитье князем и мурзам и протчим сказа со удивлением и страхом велиим.

Слышав же се Кучюм и прият трезуб и челобитье всем чесно, и оскорбе, зело печален бысть. И посла во вся пределы своя собрати вся живущия подданные по градом своим. Сам же с волхвы нача гадати: «Что хошет над нами быти?» И уразумеша вси, яко воин Еръмак князь не поедет в Русь, но будет к нам вскоре и разхитит всех.

Ермаку же тогда пребываюшу в Чингыде-граде. Внегда ж приспе путь струговой, майя в 9 день 7089 (1581) году, поплыв вниз по Туре со всяким искусом неспешно. Доехав до усть Туры-реки, ту ожидаше 6 князьков, Маитмаса, Каскара, Варваринны, и бишась по многи дни.

Вой же с Ермаком остася 1060 человек, и многих бусурман побиша, и Божиею помощию одолеша, и множество имению взяша, яко стругом их не подняти. И погребоша то имение в земли на усть Туры реки.

По первой брани с кучюмляны, июня 8 дня, поплыша вниз по Тоболу реке, воююще и живуще делно. Доплывше до урочиша Березоваго Яру; ту бе велии бои по многи дни быша. Бусурманы жь, яко овцы из гнезд своих стрекаше, казацы жь, Божиею помощию и явлением стратих силы Господни, и тех побиша.

Оттоле поплыша вниз по Тоболу июня в 29 день, и доплы до урочища Караулнаго Яру. Ту бе на Тоболе место уское. Кучюмляне же оградиша чрез цепми железными, яко да удержит вся струги и казаков убиют. Бе же тут город опасной Кучюмов, есаула Алышая, и ту бишась 3 дни, день и нощь нещадне. Казацы жь одолеша и цепи разломаша, и проплыша с кусты таловыми.

И проплыв до усть Тавды реки и стояше неделю, размышляйте, яко да идут с вожами вспят, по Тавде вверх и чрез Камень вогуличами да возвратятся.

К Кучюму же весницы непрестанно возвешаще о многом собрании казаков и о побивании своем, яко разорены, кажуше сечение бердышей и палашей, раны своя. Кучюм же плакашеся их и паче ярняшеся на казаков.

Ермак же со единомысленники своими, надеяся на Божию помощь, поплыв вниз по Тоболу июня в 8 день и доплыв до Бабасана мурзы. И ту Ермаков ертаулной струг предний похитиша бусурманы, пред ними с версту. Казацы жь велми грянута и удариша таково предивно, яко противных многих вдруг в один раз убиенным быти; овии жь вскоре разбегошась в различные места, и ту своих выручиша вскоре, но и вредных.

Собрание ж вои, чюваши, Казачьи орды, вогуличи, остяки и вси татарове, отпустив Кучюм из города своего с сыном своим Маметкулом по Тоболу навстречю Ермаку. Сам ж учинив засеку под Чюваши на Иртыше реке, и грады окопъми укрепив, и на усть Тоболу крепкую стражу поставив.

Таковая высылка с царевичем Маметкулом стретоша Ермака июля в 21 день в Бабасанах на усть озера на Тоболе. И сразишася нещадно, и за руки взяшеся, тако секущеся, яко конем по чрево бродити в крови их и в трупу поганском. И бишеся 5 дней, стояще, не пропущая стругом вниз. Посем з Богом казацы одолеша и протчих прогнаша, и царевичь беже. И по явлению святителя Николы чюдотворца, дерзати повеле, и поплыша вниз.

И доплыша до усть Турбы, конец Долгаго Яру, июля в 26 день на всходе солнца. И видеша безчисленное бусурманское множество стояше, ждуще приходу Ермакова. Казацы жь вси убояшася и присташа к острову выше Яру, размыслиша, помолишася Святей Троице, Пресвятей Богородице и всем святым с желанием.

И по явлению Спасителеву, его жь образ, знаме любезное казаком, самовластна с места и поиде преди вниз по левому брегу Тоболу реки, видевше Ермак и казацы единодушно за нем погребоша по брегу тому. Погании жь пустиша безчисленно стрел, аки дожда с горы на струги. И сие место, спасени Богом, яко и власу их неврежьдену бывшу, проплы. Егда жь проплы, знамя само на свое место ста.

В то время видеша бусурманы вси, яко по брегу тому на облацех царь велий и прекрасный зело во свете велице и мнози вооружении воини летяще на крылех и несущаго престол его на плешу свою дивне; и грозяше им царь, в левой же обнаженный мечь имуще на ня. О дивное чюдо Божиим судьбам! По их же бусурманским повестям, яко коим силным на даль стреляющим в него, таковым руце околевше и луки их сокрушишася.

И се видевше бусурманы, яко с казаками царь велий и страшен грядет с вои на разорение и запустение их, зелне убояшася и ослабеша, яко не помыслити, ни зрети на казаков за сие не могуше. И Кучюмови и сущим с ним возвестиша бывшее, и от сего видения Кучюм и бусурманы велми убояшася.

Августа в 1 день, видя раб Божий Герман с предоброю и единодушною дружиною своею, пребываше в посте, и з Божиею помощию устремишася на город Карачин думного Кучюмова боярина Карачи; и в той час сражение их паки видеша бусурманы и сами Герман и казаки самообразно Спаса помогаюша и отврашающа летяша стрелы на ня, вяшее вооружишася, секуще, вконец бусурман умершвляше, видевше на себе явную Божию милость и помощь тверду.

И тот град Карачин взяша и в нем безчисленное богатства: злата и сребра, и камения драгаго, и жемчюгу, и меду доволно, и скота. И седоша ту 2 недели Госпожина поста, пребываше зелне в посте и в молитвах, со всусердием моляшеся Богу, чтоб сохранил живых рук и подал победу на вся бусурманы, да с ним возвыситца и прославитца в концех християнскиий род и Божия десница царю верну прострется.

Кучюм же от великаго ужаса с бусурманы по всем дорогам до Карачина караулы несводные поставил, чтоб никто от казаков ни птицою мимо их не пролетел, мнев: зряще твердость, казаки возвратятся в Русь, яко бояшеся многосилства, и множицею подзираше казаков, чтоб убити, и како живут крепцы. И видевше на пути отъезжей казачей караул крылатии воини, бояшеся их.

Кучюму же и всему бусурманскому воинству предиреченные знамения над местом, идежь ныне святый град Тоболеск и соборная церковь, видеся образне во облаке светле, и взуки, и звоны, и видение многое, яко и побиении видяти кучюмлян своих изо огненнаго столпа, и велми бояшеся руских вой по первым пророкам, их же сам казнил, разумея, яко напрасно и без вины неслушне их. Знамения видеся убо пред приходом Ермака вседневно, не яко ж прежь в празники и в зборы.

И предиреченных же восходящих зверех из рек на остров <…> и близ пред приходом Ермаковым не за многи дни видеша поставленный караул на усть Тоболу, да и удержат казаков и убиют, яко по обычаю в полдни зверем изшедшим от рек на остров и зелне устремишася дратись, яко и телам их изорваным быти вяще перваго. И умертвив малый зверок белаго зверя, и виде умерша, и побеже от него на стрелку в луг, и не виден бе.

Белому зверку, убиену лежашу на острову в виду бусурманом 3 дни мертву, на четверътый же хотяше в малой лодийце видети бывшее чюдо, зверя, каков лежит, умре. Егда же быша среди Иртыша, хотя приближитися к брегу, внезапу мертвой зверь скочил и рыкънул велми, и кинулся в воду, и утопе, и тии зрети поидоша, вси утопоша. И посему проклятии бусурманы о Сибири велми блазнятца, понеже шихи их в повестех истолковаша им, яко малой зверок — Ермак, бусурманство — яко болшаго зверя. И 3 день мертвой оживя, то по времени паки возмут Сибирь бусурманы во владение не надолго. И о сем блазнятся в Тоболску до дне сего и покушаются взять, и многие споны сибирским жителем чинят по своей истории.

Взятие города Карачина: «Августа в 1 день… з Божиею помощию устремишася на город Карачин…»

Взятие города Карачина: «И тотъ град Карачинъ взяша, и в немъ безчисленное богатства: злата и сребра, и камения драгаго, и жемчюгу, и меду доволно, и скота…»

Ермаку же пребывающу в Карачинском горотке во всегдашном посте и с дружиною сентября до 8 дне 7090 (1581) году, и с Воздвиженьева дни пустишася по явлению на град Кучюмов. И доплывше усть Тоболу на Иртыш реку, и виде белые воды, и усумнешася. Кучюмовых же вой толикое множество на усть Иртыша, яко горы и лесы, яко песку умножение. Ермаковы же вой остася от боев 45 человек. И погребоша по Иртышу вверх по правому берегу оборонскою рукою. Бусурманы же гоними невидимою Божиею силою, бежаша невозвратно от него, яко огнем палимы.

Поиде Ермак и с казаками до Заостровных юрт, и ту взяша городок Атика мурзы, и со всем имением своим убрашася в городок в осаду. И тоя нощи, всю безо сна пребываше, в велицем размышлении быша. Овии хотяше и покушашеся бежати в Русь, овии же реша: «Единаче воруюше в Руси, своих християн убиваше на Волге, умрети хотяще, единодушно хотяше и умираше. Ныне же камо идем, яко зима близ суть? Ермак и старейшины, довлеет нам умрети християнски храбро за веру християнскую, яко да прославит Бог и впредь род наш».

И пребываше вси в Атинском городе с великим опасением, яко видеша множество бусурман, яко битись единому против десети и дватцати ратных; и городок той вкруг облежаша, аки облак темный. На городовом месте, идежь ныне церковь соборная, ту видеша Ермак же и сущим видение, се видеша огненный столб и град, и звон до облак, и указующаго перстом на место. И разумеша, яко хошет Бог прославити место се именем своим святым и славным.

Октября в 1 день изыдоша с кучюмляны на брань до засеки в стругах и ту приступища, крепце бияхуся с самем Кучюмом, хотяше взяти Чювашский град на горе Чювашской и ту засясти на зиму, да пребудем в сидении сохранно, яко крепок бе Чювашский град окопми. И того дни бишася и невредимы помощию великаго Бога проплыв вспять, в Атинской городок возвратишася и седоша ту.

Седяше в Атинском городке долгое время дней, доприступая к засеке и паки возврашаяся в Атинский городок, размышляйте, яко зима бе и потребы ясти себе напромыслиша, точию мало, ячмени, и полбы, и овса.

Умыслиша жь вси казацы на совершенный удар, и се брань 4 с кучюмляны. Кучюму жь стоящу на горе и с сыном его Маметкулом у засеки. Егда жь казацы по воли Божии изыдоша из города, единогласно глаголюше: «С нами Бог! Разумейте языцы и покаряйтеся, яко с нами Бог!» И разишася вси воедино, и бысть брань велия октября в 23 день, емлюшесь за руки, секуще противныя своя. Кучюму же с горы стреляйте. Казацы жь огнем поганых множество попаляше, без исцелений убиваше. Погании же нудими Кучюмом, от казаков велми оскудеваше, плакашеся, неволно биюшесь, умираюше.

Оружия же не бе у кучюмлян, точию луки и стрелы, копия и сабли. Бе же 2 пушки у чюваш, казацы ж умолвиша голк их, они ж бросиша их с горы в Ыртыш. Стояше Кучюм на Чювашской горе и, видев многое падение своих, зелно плакашеся сам и вси погании, повеле агуном и абызам своим вопити велми кумиром молитву свою, спяше бо боги их, и безпомошен пребыв и безчестен, нудим невидимою Божиею силою, и помышля бежати. И бишася 3 дни без опочиву, неотступно.

Октября 24 день первее всех низовые остяки князки от Кучюмова повеления и раменту отступиша и бегу яшася безвозвратно бежати восвояси вскоре и пребывати, яко скот, в диких лесех, да невидими будут человеком руским. Бысть же сей их обычай и доднесь при родех наших, еже бежать и незнатным быть.

Октября в 25 день Кучюму от труда и от печали возлежашу на одре его нощию и видение от Бога виде: внезапу отверзеся на небеси в четырех краех вселенныя, изыдоша идуше на него исътребити воини светлыи, вооружени, крылати и страшни, и дошед до урги его, облежа весь полк его, глаголюше: «Поганий сыне темнаго демона Бахметя, отступи от земли сея, Господня бо земля и исполнение ея и вси живущеи на ней християны благословени, ты же бежи в жилиши своя до близу пропасти треклятаго демона Бахметя». И восстав Кучюм, трепета всем телом, и сем глаголюшу: «Бежим отсюду, велми место страшно, да не умрем». И ангел Господен погоняя их, яко путь им тма и ползок.

Того же числа вечеру бывшу, тако же и вогуличи тайно от заступления Кучюмова убегоша во своя жилища за Яскалбинские непроходимые болота и озера, да взыскани Ермаком будут и зле умрут, но да з домы своими забежавше в непроходимые места, в скрыте пребудут, яко видимо и поднесь зарослые болота и озера, идушему на лыжах, валы бывают напреди и созади.

Решающая битва с Кучумом: «Умыслиша жь вси казацы на совершенный удар, и се брань 4 с кучумляны…»

Карача осаждает город Сибирь: «Того же 92 году марта в 12 день в Великий пост пришед Карача под Сибирь со многими вои…»

Видев же Кучюм царства своего конечное лишение и разорение всем, бежав из града своего Кашлыка, еже Сибирь зовома, октября в 26 день по явлении, нощию восстав тайно и всем своим рече: «Бежим немедленно, донеле же вси зле не умрем от казаков наглою смертию». И вси из града невозвратно бегоша на степ в Казачью орду на прежнее свое селение. Грады жь Чювашской и Кашлык, Сузгун, Абалак и протчие, гоним невидимою Божиею силою, оставиша пусты.

Вечеру бывшу 25 день, и преста подчювашская брань, казаки отидоша за реку и обначеваша со стражею. Во утрии же восташе, помолишася Богу и прославиша явлыпагося им заступати во граде их великомученика Димитрия Селунского, и поидоше без боязни во град Сибирь, еже Кашлык, и внидоша во град лето 7090-е (1581) октября в 26 день.

Егда же внидоша во град в Сибирь, и видев оставшаго имения и богатства множество, и хлеба, глаголюше: «С нами Бог!» Тогда нападе на ня велие веселие и тайная радость, яко сохранени Богом живым, и пристанища достигоша, и желаемое получиша. И слыша самообразно во услышание всем велий звон, яко время светлаго Христова воскресения, радости всего мира и ликования. Вси же единодушнии друзи мирная друг другу вешаще и полезная глаголаше, на многи дни славяще и моля Бога.

Промчеся слых о Ермаке и о казацех во всю сибирскую страну, и нападе Божий страх на вся живущие бусурманы во всей стране той. И в 4 день по взятии Сибири демьянъский князь Бояр со многими дары прииде к Ермаку, и потребные запасы принесоша и ясак даша. Ермак же, чесне жалуя, отпустил их. По нем же начаша приходити всегда во близу живущие татаровя с женами и з детми и с родичи даюше дань. И повеле им Ермак жити в домех своих по прежьнему, яко же жиша при Кучюме.

Казаком же ездяшим по жильям татарским и по промыслам смело, не бояшеся ничего. Ехавшим 20-ти казаком на Абалацкое озеро для ловления рыб ноября в 5 день и без опасения спяшим, нощию от Маметкула царевича убиени быша. Един же притече, возвестив Ермаку, яко избиени умроша.

Ермак же с дружиною гнав немедленно вослед Маметкула и постиже в урочиши Шаншинъском, и починив бой велий и многих поганых убиша, и протчии бегу яшася невозвратно от него. Ермак же возвратився вспять и погребе своих на Саусканском мысу на царском кладбище, на край мысу, для признаки. Се первое убиение казаком в Сибири.

Декабря в 6 день Яскалбинских заболотных волостей от непроходимых мест и из Суклему приидоша княжцы Ишбердей и Суклем со многими дары и есаком, и потребным запасом поклонишася Ермаку и дружине его. Ермак же приим ясак, отдарив их, отпустил на свое жилища и наказал, да служат. И Ишбердей князь тако радея и служа, яко первее многих взыска князков и приведе в ясак, и ясак принесе, и пути многи сказа, и на немирных казаком вожь изрядной был и верен велми.

По совету Ермак с дружиною своею единомысленною написаша послание благочестивому государю царю и великому князю Ивану Васильевичи) всеа Русии, принося вину свою, изъявляя службы: яко низложил Кучюма царя прегордаго и вся грады его поят, и многих князей и мурз татарских, вогульских и остяцких с протчими языки под державную руку его привел, и ясак собрал, и послал к тебе, государю, с атаманом Иваном Колцовым и служилыми декабря 26 день волчьею дорогою, нартами и лыжы на оленях, им же вожь бе яскалбинской князь Ишбердей со своими вогуличи в Великую Пермь, и оттоле к Москве доидоша.

Егда же доидоша Московского царства к благочестивому государю царю и великому князю Ивану Васильевичю всеа Русии, и отписку и есак вручиша. Егда жь начаша чести, и слыша государь, яко взят царство Сибирское и царя победив, и языки — татар, вогуличь и остяков — под руку его привед, и ясак собрал, и послал с атаманом и протчими, велми возрадовался и прославил Бога, и Ермаку послав великие дары: 2 пансыря, и сосуду, и шубу свою, атаманов же кормом и выходом одарив, и вскоре к Ермаку возвратив с жалованною и похвалною грамотою тоею же дорогою, ею же приехав.

Верный же человек слуга царев, аки слуга Христов и пернат, прелетев к Ермаку того же 90 году марта в 1 день, принесе от государя радосные и похвалные грамоты Ермаку и атаманом, 5 человеком, и протчей дружине. Ермак же прият царское жалование: 2 пансыря, кубок, шубу и сукно, прославив Бога и велми возвеселился, тако жь атаманы и казаки сукна и денги — радовашеся, ликуюше похвално.

Прииде к Ермаку февраля в 20 день ближний мурза ясашной Сенбахта Тагин с отъповедью во град лесно, бутто царевичь Маметкул стоит на Вагае, от города верст со сто. Ермак же отпустив искусных юнных мужей, 64 человек ратных, и дошед Куларово, нападоша на спяших и множество поганых избиша, и царевича жива в шатре взяша, и с богатством приведоша к Ермаку во град февраля в 28 день.

Ермак же приим царевича и показа ему царское жалованье и протчим бусурманом. Кучюм же приим весть о сыне, яко пленен, и болезненно плакашеся с домом. И втории весницы реша, яко Ермак с вои идет на него. Ему же стояшу в Агитской луке, и паки прииде весть: «Бухарские земли князь Сейдяк Бекбулатов идет против тебе и хощет отмъстити кровь отца своего». Тогда думной князь Карача со своими отъехав от Кучюма на озеро Чюлымское и кочева меж Тары и Барабы и Оми. Кучюму же пребываю на дорогах, на урочищах Вагаю, Куларова и Тархан в крепких местех.

91-м (1582) году ехал Ермак вниз Иртыша реки, воевал Кодские городки. Князей Алачевых с богатъством взял и все городки Кодские и Назымский городок со многим богатством князя их взят, и ясак с них собрали, и те платят и до днесь, и возвратився во град свой июня в 20 день. Июля в 1 день того же году ездили воевать по Тавде, взял Лабутинской городок, князка Лабуту с богатством, и Паченку. И на Паченке бой велий бе, яко Поганое озеро наполнил трупами; тожь и Кошуки и Кондырбай и Табары. И собрав ясак, вспять возвратился во град свой.

91 (1582) году ноября в 21 день послал Ермак к Москве царевича Маметкула и собранной ясак. И привезоша его ко царю Федору Ивановичю. И по цареву повелению была ему стреча, и на приезде пожалован и служилые все, велию честь приял и жалованье, и похвалу.

Того же 91 (1583) майя с 10 числа посланы воеводы с Москвы к Ермаку по указу вликаго государя Василья Ивановича Шуйскаго, князь Семен Болховской да Иван Глухой с 500 человеки Волгою чрез волок. Егда жь доехаша до Сибири ноября в 1 день, зиме же пришедши и гладу велию припадшу, яко понудитися и телы человеческие ясти, и от гладу мнози изомроша и воеводы. Весне же приспевше, татара и остяки от новин своих рыбы, и овощи, и запасы принесоша, и казаки от гладу насытишася.

92 (1583) году сентября в 10 день прииде от Карачи оманшик посол и на посольстве шерстовал по своей вере, прося у Ермака на оборону людей от Казачьи орды. И по совету, поверя безбожию их, отпустил атамана Ивана Колцова с 40-ю человеки. Егда же приидоша до Карачи, и внезапу избиени быша. Доиде слых до Ермака, яко избиени, восплакася велми. Видев же нечестивыи, яко Колцов убиен, начаша во многих местех, в волостех и в улусех побивати руских.

Того же 92 (1584) году марта в 12 день в Великий пост пришед Карача под Сибирь со многими вои и облеже град обозами и табары. Сам же ста в Саусканской луке, от града 3 поприща, и стоя до пролетая, и многую гибелную поруху казаком нанесе гибелно.

Того же 92 (1584) майя в 9 день моляся Ермак и казаки Богу и святителя Николу чюдотворца на помощь призва, изыдоша из града тайно. И дошедше ко станом Карачиным, и нападоша на них нощию, онем же живушим без всякаго опасения, и 2 сына Карачиных убиша, овии жь врознь разбегошася, и Карача с треми человеки за Езеро убежал.

Обьстоящим же град весть доидоша. Они жь скоро в Саускан прибегоша и учиниша с казаками бой с утра до полудне, и много попроша, казацы жь крыющеся в кустех, а казаков одолеть не могоша. Видев же Карача погибель своих, что казаков одолеть не мошно, и побегоша безвозвратно. Казаки же с Божиею помощию возвратишася во град, радостно славя Бога.

Нощию же тоя явися Ермаку молящуся и 5 человеком в нощи святый Николае Можайский, повелевая в чистоте жити и прилежный пост имети, и всякие с братолюбием добродетели проходити, и прорече: «Будет на Красной горе дом в жилище Богу и мне впредь; вы же аще не послушаете мене, престану помогати вам, и вскоре скончаетеся за грехи свои, не внемлюще в добродетели, в злобы впадаете». И сие видение Ермак всем возвестив.

По попущению Божию в лето 7092 (1584) августа в 1 день весницы из степи приидоша, яко Кучюм бухарцов не пропустит в Сибирь. Ермак же вскоре востав с 50 человеки и поиде вверх по Иртышу на стречю бухарцом в стругах, и в Агитской луке чрез волок перекопь учинил, и до усть Вагая реки дошед, а бухарцов не обрет, и вверх по Вагаю до Адбашу доиде, и оттоле возвратишась до перекопи. И на усть Вагаю и перекопи розставиша стан и обначеваше, а стража не поставиша, и без опасения крепце спяху. Кучюм же их злобне тайно назираше, всюду татар розсылаще.

Бе бо у Кучюма татарин в смертной казни, и сего посла проповедати Ермака и броду чрез перекопь. Татарин же перебред и виде казаков всех спяших, возвестив Кучюму, и неверно бе, и паки посла, веле унести что. И пришед второе, взят 3 пишали и 3 лядунки и принесе. Бе же нощи тоя дождь умножен, яко судбами Божиими постиже рок, и прииде на воинов смерть.

92 (1584) году августа в 6 день в полунощи нападе на Ермака с дружиною Кучюм со множеством вои, яко спя без опасения; час прииде смертный, и побиша их, точию един казак утече во град и возвестив бывшим.

Посольство атамана Ивана Кольцо отправляется к царю Ивану Грозному: «По совету Ермак с дружиною своею единомысленною написаша послание благочестивому государю царю и великому князю Ивану Васильевичю всеа Русии…»

Царь Иван Грозный принимает посольство Ивана Кольцо: «Егда же доидоша Московского царства к благочестивому государю царю и великому князю Ивану Васильевичю всеа Русии, и отписку и есакъ вручиша…»

Ермак же, видя своих убиение и помощи ниоткуду животу своему, бежа в струг свой и не може скочити: бе одеян двема царскими пансыри. Струг же отплы от брега, и не дошед, утопе месяца августа в 6 день. Егда же приемше протчие казаки во граде весть, горко плакашеся об нем, бе бо велми мужьствен, и разумен, и человечен, и зрачен, и всякой мудрости доволен, плосколиц, черн брадою и власы, прикудряв, возраст средней, и плоск, плечист.

Видевше оставшие казаки, яко наставника своего и з дружиною убиенных, плакаше в разлучении, осташася всех 150 человек, и против бусурманских сил стоять некем, а живяше, помрут гладом, седоша в струги своя августа в 15 день и погребоша вниз по Обе и с воеводою и по Иртышу и по Собе, и чрез Камень приидоша в Русь на свои жилища; град же оставиша пуст.

И ведев се Кучумов сын Алей, кочюя Абугиновых городки, оставль же казаки град пуст, пришед, вселися во граде Кашлыке с вои своими. Услышавше про се, Сейдяк князь Бекбулатов сын, яко Ермак убиен на перекопе с вои и протчии бежаша в Русь, а сын Кучюмов Алей град засел, собрався с домашными вои и пришед во град и победив Алея и воинство его, и кровь отца своего Бекбулата отмстил, и прием отчину отцову, и пребываше во граде.

Ермаку от утопления августа в 13 день восплывшу, и принесе его иртышною водою под Епанъчинские юрты к брегу. Татарину жь Якышу, Бегишеву внуку, ловящу рыбу и наживляющу перемет, и видев, у брега шатаюшесь, человеческие ноги, и накинув петлею переметною веревку за ноги, извлече на брег, и виде одеяна пансыри, и разумев не просту быти, а знающе, яко казацы утопоша мнози, и тече на гору в юрты, возвестив жителем и созва всех вскоре, да видят бывшее.

Уразуме вси по пансырем, яко Ермак, и знающе, что государь прислал ему два пансыря, и каковы видеша. Егда жь начаша снимать Кайдаул мурза с него, тогда поиде кровь из рота и из носа, что из жива человека. Зря жь Кайдаул, понеже стар, течение крови живой не замерло, и разумев, что человек Божий, и положиша его нага на лабаз, и послаша послов во окрестные городки, да снидутся видети нетленнаго Ермака, точащаго кровь живу, и отдаде, ругаяся, на отмщение своей крови. И о сем диво, да разумеют христианскаго Бога и пребываюшаго во веки и прославляюшаго Бога.

Егда же начаша сходити по завету всех, аще кто приидет, да вонзит стрелу в мертвое ермаково тело. Егда же унзоша, кровь свежа течаще. Птицы же облеташе, не смея прикоснутися ему. И лежаше на лабазе 6 недель ноября по 1 день, донележе от конец приидоша Кучюм с мурзами и кондинские и обдаринские князи и унзоша стрелы своя, и кровь его течаше, яко из живаго, и многим являся в видении бусурманом и самому Сейдяку царю, да погребут. Овии жь от него решишася ума и именем его и до днесь божатся и кленутся. И тако чюден и страшен, егда глаголати им и в повестех, между собою, без слез не пробудут.

И нарекоша его богом и погребоша по своему закону на Баишевском кладбише под кудрявую сосну. И пансыри его разделиша надвое: един отдаша в приклад Белогорскому шайтану, и той князь Алачь взял, той бо во всех городах славен; 2-й отдаше Кайдаулу мурзе <…>. Кафтан же взят Сейдяк царь, пояс же и с саблею даша Караче. И собраша абызом на поминки 30 быков, 10 баранов и учиниша жрение, по своему извычаю, поминающе реша: «Аще ли жива тя, учинили бы себе царя, и се видим тя, мертва, безпаметна рускаго князя».

Бе бо от ермакова тела и от платья чюдотворение: болезненным исцеление, родителницем и младенцем на отгнание недугом, на войне и в промыслех удача. Се же виде абызы и мурзы, что закон их сквернен и престает чюдотворение, запретиша всем от мала и до велика не поминать имя Ермаково, да задлитца честь и слава, и могила его неявлена будет. Бе же видитца бусурманом и доднесь во вселенские суботы огненной столп до небеси, а по простым — свеща велия горяща над главою его. Се же Бог своих проявляет.

В лето 129 (1621) году великий государь Михаил Федоровичь с патриархом по совету, воспомянул Еръмака, каков бе и где, и како живе и скончася, и указал по грамоте первому архиепископу Киприяну сибирскому розпрашивати во 2-е лето священства его, испытоваше руских и татар, кто что знает, паче жь ермаковых казаков. Бусурманы по Курану своему потаиша, казаки на писме принесоша. Архиепископ же повеле их имены в сенодик вписати и историею прославляти.

В лето 7158-е (1650) приидоша в Тоболеск послы от калматского Аблая тайши и просив государевых вышеписанных пансырей в жалованье, и Кайдаула мурзу именовах и кондинского князя, что у них пансыри те. И по такому посольству в лето 7159 (1651) году указал великий государь Алексей Михайлович у Алачевых князей и у Кайдауловых детей взять пансыри и послать к Обрею. И в то лето боярин князь Иван Ондреевичь Хилков с великим пристрастием пансыри у Кайдауловых детей взят, а низоваго у Алачевых не верят и доднесь не слышится; и послали из Тоболска июля в 18 день с тобольским сотником стрелецким Ульяном Мосеевым Ремезовым с товарыщи.

Татары находят тело Ермака, прибитое к брегу: «Уразуме вси по пансырем, яко Ермак…»

Тризна татар по Ермаку: «И нарекоша его богом и погребоша по своему закону…»

Егда жь Ульяну доехавшу до Урги, и по чину Аблаеву учинена с честию стреча и корм. Егда ж дары понесоша по наказу, Аблай же спросив у Ульяна: «О честь ли пансырь Ермаков, ему жь в дарах не ряд поднесену быти?» Ульян же поведа послань. Аблай же по росписи чин весь оставил: «Подайте ми пансырь». И подаша. Он же прият вселюбезно, облобыза и на главу свою поднял, хваляше царское величество и любов, како б ему утеху надежну подал. Пансырь же бит в 5 колец мудростно, долиною в 2 аршина, в плечах с четью аршин, на грудех и меж крылец — печати царские, златые орлы, по подолу и рукавам опушка медная на 3 верьшка.

И паки Аблай вопрошаше: «Знаешь ли, Ульян, где ваш Ермак лежит?» Ульян же снискателен бе и хитр о делех, к вопросу отвеща: «Не вемы до дне сего и како погребен, и скончася». И нача Аблай повести деяти о нем по своей истории: как приехал в Сибирь, и от Кучюма на перекопе побежа, и утопе, и обретен, и стрелян, и кровь течаше, и пансыри разделиша и развезоша, и как от пансырей и от платья чюдес было, и как татара смертной завет положиша, что про него русакам не вещати. Аблаю же, приемшу пансырь, и Ульяну стояше, глаголаше о Ермаке. Ульян же испросив у Аблая сказку за его знамены и печатью; он же обещася о Ермаке подробну возвестити.

Прият же и протчие подарки, седя, и сконча посольство. Радошен бе и со своими, что любезно великий государь послуша его, послал лета 7159 (1650) году сентября в 4 день, поведа о Ермаке все подробну: како живе по своему писму, и како скончася, «соглазно нашим историям», точию как обретен и чюдотворяше <…>. Аз, де, много лет доступал. «Егда же я был мал и утробою болен, и даша мне з земли, с могилы его, пить, здрав явихся доныне. Егда же земли с могилы взятой, еду с нею на войну, побиваю; егда жь нет земли, тощь возврашаюсь; и того ради просив пансырей у государя, да пойду на Казачью орду. Ермак жь ваш лежит на Баишевском кладбище под сосною, и родителници ваша дни столбы огненнеи над ним и в ыные свеча кажется татаром, руским же не кажетца». В том и печать свою приложил.

Во второе лето по смерти посланы воеводы с Москвы Иван Мансуров с таварищи, с ним сто человек ратних. Егда плыша по Иртышу и видеша по Иртышу по брегу, яко песка, поганскаго войска, ждуше на побиение, по ведомости, яко в малости посланнаго войска; и стужившеся и проплыша за страх и до Оби реки. Видев же смерзение лда, поставиша град над Объю против устья реки и седоша зимовати.

Собрашася с Ыртыша и с Оби множество остяков и обступиша городок, и бишась день, вон же погании в вечер отступиша. Во утрии жь принесоша с собою болшего белогорскаго болвана и поставиша под древо березу, и молясь, и жряху, да возмут град. И во время жрения их стрелиша из города в цель ис пушки и кумира их с древом на многие части раздробиша. Погании же зело устрашишася, не знаше, мня же, что из лука такой человек розбил, и вси разыдеся по своим. И по сем ясак принесоша, и в весне чрез Камень проидоша.

Лета 7093 (1585) посланы воеводы с Москвы Василей Борисовичь Сукин да Иван Мясной, да писменой голова Данило Чюлков с тремясты человек. Поставиша град Тюмень июля в 29 день, еже Чинги слыл, и церковь воздвигоша Всемилостиваго Спаса, первую в Сибире, и ясак со многих татар собраша по Туре и по Тоболу, и Исете, и Пышме.

Лета 7095 (1587) при царе Федоре Ивановиче указ воеводе Данилу Чюлкову: прислано 500 человек поставити град Тоболеск. И по промыслу Божию доплыв воевода Данило Чюлков и против устья Тоболу поставил град именем Тоболеск на горе, первый столной во всех городех, и церковь первую воздвиже во имя Святые Троицы и другую, Всемилостиваго Спаса на Звозе.

Князь Сейдяк владелец бе, и Салтан царевичь Казачьи орды, и думной Кучюмов пущаше за птицами ястребов. И воевода послаше послов к Сейдяку, чтоб жити им в мире и приехал бы к нему во град любезно, да советуют и живут побратски, заедино.

Егда жь доидоша послы к Сейдяку, он же советова с Салтаном и Карачею; и по совету взя с собою 100 человек и приидоша к воеводам во град. И седоша за столом, и бояшеся, глаголя, оману в слове. Сейдяк же задумалъся, ни пъет, ни ест. И воевода глаголя Сейдяку: «Что на нас мыслиши зло?» И взят чашу, поднесе ему и рече всем трем: «Аще не мыслите на нас зла, выпейте чашу сию во здравие». Егда жь Сейдяк приим, нача пити, и поперхнуло в гортани его; посем и Салтану, таж и Караче. Обличи бо их зломыслие Бог.

Воевода жь и вои видят, что мыслят зло, и с тихостию махнув рукою казаком, и нача бить поганых. Видев же Сейдяк убийство своих, кинулся в окно, за ним Салтан, таж и Карача, и поиманы быша и связаны быша. А стояшеи вне града слыша, яко побежден Сейдяк и вси с ним, от великаго страха побегоша и во град свой Сибирь не внидоша, но мимо. Протчии жь слыша во граде и на бежание устремишася на Вагай до Кучюма.

Лета 7097 (1588) сентября в 10 день послал воевода Данило Чюлков Сейдяка, Салтана и Карачю ко государю к Москве. Егда же привезоша казаки их к Москве, и повеле их государь крестити и указал им корм и вотчины на прожив. Есть же род тот на Москве и доднесь.

Кучюм жь в побегах место жительству своему, скитаясь, нигде не обрете, и всегда покушаяся на Тоболеск и за страхом не смеяще. Единою же собра вся вои своя, 98 (1590) году июля в 23 день, итти хотяще под Тоболеск, и подошед под полки агарен своих тайно, и побил своих, и побеже в степь скоро, и паки покушаяся на град. И нападе на него страх, и трепет, и ужас, и не поиде на град, и побив агаренские веси Каурдацкую и Салинску.

В лето 7099 (1591), слыша жалобу тобольской воевода князь Володимер Васильевичь Масальской Колцов, собрався с ратными и с тарскими и с татары июля в 8 день, и гна вслед Кучюма, и изшедша его на степи близ Ишима реки на озере Чиликуле, и нападоша на нь августа в 1 день, и побиша многих и взяша полону: сына его и две жены, и возвратишась з Богом здрави, з богатством и с конми и со многим пленом, славя Святую Троицу.

Кучюм же от убиения с протчими не со многими татары и с женами и с детми своими, от неначаяния рати руской утече на калмытской рубежь на вершины рек Ишима и НорИшима, Оши и Камышлова, между озер в крепкие места, и ту живяше скрыто и пакостяше руским и ясачным зелне поблизу Тарского города; и множицею покушашеся на Тоболской на отмщение, и бояшеся страхом велиим зело, еже бо изобилне страху перваго в нем бысть от рускаго полку, яко его самоволне друзи оставляют и врази бывают. Ту живя Кучюм со своими до лета 105 (1597), скитаяся. Проповеда тарской воевода ясашными Кучюмовы станы и кочевья, писал к Москве ко государю о походе на него.

И в лето 7106 (1598) году майя в 9 день по указной грамоте великаго государя Бориса Федоровича тарской воевода князь Иван Масалской ополчением ходил на кучюмлян. Изошли его во станех, и множество кучюмлян побиша, и взяша кучюмовы 3 сына, 2 дочери, 6 жен и многой полон взяли, и з досталным имением и со скотом возвратишася здрави. И немнози ранены быша и не убиен ни един человек от 700 конных и 300 татар. На Тару приидоша августа в 23, славяще Святую Троицу.

Ис Тары, ис Тобольска полон домовых кучюмовых детей — трех сыновей, 2 дочери и 6 жен — послаша к Москве со служилыми людми воевода Ефим Варфоломеевич Бутурлин. Егда же привезоша к Москве тот полон того жь 106 (1598) году к царю Борису Федоровичю, государь же прият и прославив Святую Троицу и Пречистую Богородицу и московских чюдотворъцев, яко таковая покорив, сибирцов же велми похвалив и комуеждо за службу их золотыми и выходом и кормом пожаловал и протчим в Сибирь послал золотыми же послугу.

Кучюм же житию своему скитаяся и места не обрете, яко обнажен всего дома своего, имения и скота и жителей лишен от живущих сибирян, и не со многими людми убежа в Канскую землю к вершинам Иртышу реки на озеро Зайсан Нор. И похитил у калъмыков коней многое число, и побежа на ино место со своими. Калмыки же гнаша вослед его и достигоша на Нор Ишиме у озера Кургальчина, и ту многих кучюмлян побиша, и коней, свои стада, отъяша, и досталное имение его пограбиша. Кучюм же убежа от них с малыми людми в Нагайскую землю жити и кормитца нищетою.

Егда же Кучюм со своими к нагаям приходом явился, тогда нагаи нимало потерпеша, собрався с роды своими, убиша Кучюма и протчее имение отъяша, а людей его похолопиша, глаголаше ему: «Ведомой ты и славной вор, Муртазелеев сын, и отец твой нам много зла соделал, и ты, хотя и нищь, то же и нам учиниш, что и протчие твои люди, от тебя же убиты напрасно и озлоблены».

Протчие бусурманы кучюмляна, живущеи по степи, егда жь виде, яко Кучюм зле убиен, приидоша ко граду Тобольску и приложишася ясак платити, яко же и до сего дни: овии же крестишася во християнство и поверстаны в службу в новокрещеной список, овии же мурзы и мурзичи, 300 человек, поверстаны в службу и оклад им учинен по 15 рублей и по 7-ми, И поставиша рускаго голову, чиновника. И тако служат и доселе. И по крещении многих бусурман, по сем Сибирь распространися, и поставиша грады и монастыри со всяким превольством.

В лето 7129 (1621) февраля 16 число советом освященного собора, святейшим патриархом Филаретом и государем царем Михаилом Федоровичем всеа Русии указано правилно по грамоте первому Киприану, архиепископу сибирскому, Ермаку Тимофееву сыну Повольскому, идеже кийждо убиени быша, кликати вечную память. В лето 88 (1579) году октября 23 день 107 человеком, под Чюваши от Кучюма убиени, вечная память болшая. Во второе лето, 89 (1580), ноября в 5 день 20 человеком, на ловление рыб на Абалацком озере без опасения спящим, убиенным, вечная память меншая. В лето 89 (1581) июля — июня месяцех воюющим вниз Иртыша по Обе, по Тавде, взяша Назымские, и Кодские, и Лабутинские городки, вечная память средняя. В третие лето по взятии, 90 (1582) году, апреля 17 день оманом Карачи льстиваго побиеным: атаману Ивану Колцову с 40 человеки вечная память болшая. В четвертое лето, 91 (1583), августа в 6 день Ермаку Тимофееву с 300 человеки вечная память, возглас болшей. И оттоле уставися и до нынешнаго лета помяновение вселенское на Москве и зде в Тоболску Ермаку и подобным ему, ныне верно служаще, вечная память, убиваемым за православие, возглас болшей.

О проречении древле. О сем Кучюме сбыстся пророчество Исаино и християнским воином Ермаком со единодушною дружиною в Сибири исполнися, глаголаше им же образом, рекох: «Тако будет, и еже совеща, тако уставися. Не веселитеся, вси иноплеменные, сокруши бо ся ярем веселящаго вас: от семени бо змиина изыдут внучата аспидом, и внучата их изыдут змия летящая. И упасутся нищии Господем, и убозии человецы в мире почиют, потребит Господь гладом семя твое, аспиде, и останок твой. Возрыдают врата градов и возмут гради тверди иноплеменских всех, яко дым от севера грядет, и несть пребывати в числех его». И се завещание скончается на турках в совершенство.

Молебная сибирян. Егда же возвратишася от плена в Тоболеск августа в 23 день, от радости благосоветно общеначалные и церковницы единогласно глаголюще: «Поем, Господеви, славно бо прославися отец наших, Боже в Троицы благословен еси. Ты, Господи, сокрушил главы змием в воде, яко же и кучюмляном злым». И всенародне Святей Троице и Богоматере и всем святым молебно от сердца благодарение воздаша со звоном, и сим бусурманом наипаче ужасиша, правоверных же сердца возвеселишася, и все уповающе вседушно на Бога и на Пречистую его Богоматерь, заступницу всего мира, надежду возложиша, глаголюще вси: «Тишину и мир подати рабом своим, и милость прияти, и сущая посреде нас распри и мятежи умирити, расточити належащий на ны страх и трепет. Да ко многим благодеянием и сибирское приложим взятие». Проповедующе явление, заступление и великую милость и чюдеса от древле, 88 (1579) году ноября в 28 день, всегда и доднесь.

Благословение жизни с небеси сибиряном. Имать Сибири действия дело. И благослови Бог Ноя и сынов его, и рече им: «Раститеся и умножитеся, и исполните землю, и обладайте ею, и страх и трепет ваш да будет на всех зверех земных, и на всех скотех земных, и на всех птицах небесных, и на всех движущихся по земли, и на всех рыбах морских. И всяк гад под руки ваша дах. Яже сотворих в жизнь вся дни на земли, сеяние и жатву, зиму и зной, лето и есень, день и нощь не престанут».

Явление возсия Сибирь и прославися. Древле Сибирь идоложертвием омрачена бе, ныне же сибирская земля и страна, паче же богоспасаемый началнейший град Тоболеск, наполнися божественныя святыя славы явлении в лето 96 (1588) году самого Вседержителева образа в славу имени своего. Таже во 144 (1636) году июля в 20 день Пречистые Богородицы, заступницы всего мира, таже Иоанна Предтечи на Шамъталыке, Михаила архангела Ермаку с дружиною, святителя Николы чюдотворца во 110-м (1602) году, и в приходе Ермака — великомученик Димитрий в 89-м (1580) году ноября в 23 день. И таковым озарися светом неизреченнаго веселия сибиряном во исцеление и просветися просвещением всесвятаго и животворящаго духа во образе орли; яко орел покры гнездо свое, Сибирь, со птенцы своими и на вся веси и град даде перо славы своея, благодать возсия везде сый и вся исполняя и прославися во всех сибирских концех. Имать же в мало явлении некой ради тайности и мощи угодивших Богу святых молебники о сибирстем снабдении; еще же священством и воинством, христолюбием и братолюбием пребывает злата светлейша и света полнейше, источающе благодать духовную, концем бо наставник божественная являя, собирая пресветло православных лики союзом духовным.

Древле християне, страшни языком, и Ермак. В прежная лета везде и повсюду, аможе идут правоверныи християне, в пути своя и на войну, страшни бусурманом и протчим незнающим Бога, понежь святая наша християнская вера, возлюбленная благоверным царем и великим князем Владимером всеа росийским, егда твердыни нашей Спасителя святое Евангелие во огни не сгоре, и таковая нам, християном, оттоле даде Бог вышний власть, силу, храбрость и спех над всеми, наступати на змию, и на скорпию, и на всю силу вражию, и горы преставляти. И сицеваго ради повеления Господня един християнин гонит тысящу бусурман, а два двигнета тмы. И се быста деле благообразно сибиряном пример.

О скверных бегунах роксолянех. Сквернии роксоляне бегуны возгордешася на Бога, прияша мерзость латынскую от сатаны, а не Божию помощь, уповаша на луки оружия своего, падаше аки снопы во время жатвы с несмысленною мудростию, а не духовную, и аки неплодная смоковь отметаше пупы своя от ветра велика, движима зелно, и бежаша храбро с пыхою своенравне в зиму. И попущением за грехи мерзостей реченных, от вышняго Бога прияша казнь: един агаренин гоняще 1000, а два двигнета тмы. И се во историях их яве написано: аще праведник едва спасется, нечестивый же и грешный где явится?

Бытия воином воздаяние, с коня да в рай. О предивное чюдо! Дело великих Божиих глубоких чюдес! Древле на поли сшедшеся, хотящи языцы бранем, многочисленные полки благочестивых же християн, Христовым словом надежне дерзающих, малое стадо во обстоянии, аки овцы посреде волков. Егда же сразившеся в велией сечи со обоих стран, обои видевше в противенстве небесный рай отверзен, и бездна открыта. Егда жь час умерщвленну от бусурман Христову рабу, приемлюще душу его святии ангели с коня да в рай. Егда бусурман исчезаше, приемлюще демоны с коня да во ад к своему сатане. За се бусурманы престаша от сечи, християна же видя свое знамя, паче дерзаша за веру християнскую и за святые Божие церкви, за самодержца и за сродство свое агарен посекая, и умершвляя, и низлагая.

Пример о покорении язык християном. От плода правды сибиряном древо жизни растет. Уроженцы, творящие доброе, ищут благодать благу. Пришельцы, ищуще зла, не яко злая постигнет их, аще бы стрегли себе от приидущаго зла, но яко Адаму в раи вся тварь покарялася, тако яве и всякому християнину приятии Богу всинепорочнии путем. Корение благочестивых твердостне и не отимутся от них; сеяй правду, приимут мзду верну. Сын праведен раждается в живот, желание праведных всеблаго, неугодно праведну ничто же неправедно и лутче обрести благодать от Господа Бога, служити верно. Творяй же веру, приятен ему есть.

О мирном поставлении. О мирности упражняяся в пример словес в народ владении делнаго розговора, понеж благоухишренну мужу подобает ведати различныя обыкновения и разные сонмов уставы и законы, дабы могл лутши искуство прияти грады, и тверды, и похвалный устав о чинех установити, крест в мире, верность и ангелом радость.

Философие довлеет правду во всех делах хранити, от сего велия любовь межь всеми роды добре живет. И новых вещей не вносити, а пришлецов за рубежь высылати, обаче попечение имети должни есмы, да нашему сибирству во веки пребывати, дабы отчизна наша, когда тогда ныне требует совета и мудрости и подлинным советом здравым, а не спыльчивым что исцелити добрыми обрасцы, которыми мочно междуусобные и градские ухишрения и злобы утишити, ниже сокрушатися. От повестей не искуства смотрети подобает. Ведомо мирное поставление крепце в мире чисте, ини же не согласни, ине стоят крестопреступне, леть лесть в сердци, делаюшем злая; хранящеи мира возвеселятца. Конь познавается в день брани, от Господа же помощь.

О несчастии воинском. Истинная и пригодная мудрость: место дати иногда времени, а нужде всегда пособляти, паче в писание разум прилагати, зане ухищренный мужь не имать противитися нещастию, но парусы свои отпустивше, стояти до времени потребна, дабы возмогл после выправить якори и по той воде надежно плавати, которая прежде необычно волновалася. Хотя нагло, невинне потонет, ибо в разуме противитися ветром противным и зелным бурям и по небу ничего иного не бывает, токмо самовольне заранее в тихость стати и подлинному опасению вдати. Да по сем искусни доволне будем и изберем мудре сущим посредняя, и когда ни есть сызнова в тиски свое учение воинъское справлено буди, да от несоветов наших посторонные не смеялися, паче жь неприятели да не радовалися. И несуменно тщателно, разумно, конечно в совете и в любви пребывати.

Положение святых отец о верных слугах. Во время видевше святии отцы греческую честь в тесноту достигше и пасти хотяще, советующе самодержцем о верном слуге, глаголюще: «Лутче един праведен, нежели 1000 прошаков, и лутче мудре укрепити единем, неже многим неразумством, той бо не лютым оружием посполитым плоти низлагая, но словом от Бога враги вскоре низлагаются и грады и многи тысящи своих спасены содевают». Яко мужь мудр, паче крепкаго мудрость имея и лутше тяжателя велика, с разумом сила, мужество глаголется; крепость душевная мудрость есть, побеждаяй видимыя враги, всячески победит и невидимы. Аще свой дом добре строит, то и все добре устроит. Прилепивыйся с Господем един дух имать. Мудрость укрепляет мудраго паче силных и лутче храбрых, храбръствующе без ума, мудраго дума паче многих рек, и тою просветитца лице его. Сего ради самодержцем мудрствовати подобает или мудрым последовати, похваляюще святии отцы, на них же воистину, яко на престоле, Бог почивает. Мудрость надо всеми добродетелми царствует и паче силных во граде обладает, и в сем царствует.

О храбрости воинской. Еще на подвиги привед, оружия предлежит златая требе есть, взяти сия в руку и действовати ими. Ты хощеши не славне спастися и ничто же благо соделати, рцы ми, аще брань стояла бы и царь был бы ту и овех убо видев, еже в самыя в полки супостат впадших и посекающих и ратная соделовающих тмами, друзих же на особь с собою борющихся. Инех на конех урышущих и похваляемых от царя, чюдимых, соплескуемых, венчаемых, других паки любезно вещь мнящим, аще ничто пострадавших зло и последний чин хранящих и в безмолвии седяших. Таже по скончании брани видим овых убо призывающих и почитающих великими дарми и проповедуемых, онех же ниже имени явленну бывшу. Зри, от коих чина служебник хощеши быти воздаяния? Аще бы и каменносердечен и нечювствен и бездушевных гнуснейше, паче жь ленив не бы вожделел тмами благих бо дарованну быти при очию похвално всенародне воздаяния благая и похвалу в роды, яко не обладают елени лвом, но лвы еленем.

Не влаятися семо и авамо, но царским путем идем. «Суета суетствий, всяческая суета, — глагола мудрец, видех бываемое под солнцем, — и се суета». На рати железо дражайше злата, а при животе нашем паче богатства, и сего ради лепо не уклонятися ни на десну, ни на шую, но царским путем да тецем жително, понеже в житии нашем ничто же стоятелно и ничто же утверженно, но все прелагателно: от утра до вечера день пременяет, горняя бо не суть долу, а долняя горе. И сего ради довлеет ни во благопослушных веселитися, ни в неудобных испадати, паче быть во обоих кротку, ко единому солнцу тщатися. И нерастленное житие присвояет к Богу. Аще велик хощеши быти пред Богом и пред человеки, посему смирися, ино во всем прославишися. Небесная ради красоты, мирские хранится слепоты, понеже с премудростию зиждется храм, с разумом исправляется. Действием исполняются сокровища, от достигшаго богатства всекрасная слава. А неразумным юность и доброту телесную изменяет старость, а печаль — славу, а богатъство разоряет смерть и тля, и всякое веселие века сего с плачем скончается.

Правда же пребывает во веки. Тать ненавидит солнца, а гордый смиреннаго. Мудрый мужь смысленным друг, а несъмысленным враг. Идеже бо свары и рвения, оттоле удаляется Бог. Брате, буди слепым око, хромым нога, алчущим пища, нагим одежда, болным посетитель, от бед свободитель, от всех чести не ищи. И о сем дозде кончаем.

Се дозде доплывше, ветрила словес спустивше, в твердем пристанище истории охотне почием. Никто жь себе тако милует, яко жь всех нас Бог. Ты же, читателю, зря вышеписанное, вспоминай Бога паче дыхания, чти его делом, а хвали его словом и помыслы бойся его. Душу имей аки воеводу, тело аки воина, дабы воин воеводе во всем благопокорен, а не воевода воину, яко ества здравая из глинянаго блюда есть вкусна.

Аз же в Сибирьстей быти о единодушных казацех вкратце глаголал, налично всположих в Тобольске граде всенародному зрению нескрытно, аще и языка светлоречиваго не стяжах, еже железным ключем отверзох, а златый впредь уготовах ко утешней всенародной ползе. Имя же мое знаком сим зовом, с природными прослытий в Сибирьсьтей стране в начальном граде.

Летопись Сибирская краткая Кунгурская

Начало заворуя Ермака Тимофеева сына Поволскаго. В 7085 и 6-м (1577—78) годех воевал и разбивал на Оке и Волге и на море суды и катарги, торговых караваны в скопе с 5000 человек, хотя итти в Кызылбаши для своей власти з донскими и еицкими. И прежде в те лета промчеся воровской слух его в Русии, в Казане и в Астрахане, и что кызылбашских послов пограбили Ермачко именем со многими людми, у него ж было в скопе на море 7000 человек. И то ж 86-го октября 1 день послан указ от великого государя со столником Иваном Мурашкиным по дороге и в Астрахань: где тех воров ни застанет, тут пытать, казнить и вешать.

Ермак же советом з дружиною услыша грозное слово и дело августа з 29 числа, и с возвратом здумали бежать в Сибирь разбивать, обратя струги по Волге и по Каме вверх. И тот их государев указ на станах не застал, а коих схватали, тех и приказнили, и кои с ними думали. Ермака же и собрание воеводы не толико взяти, но и подумать — сами бежали прочь. И сентября 26 день объмишенилися, не попали по Чюсовой в Сибирь и прогребли по Сылве верх и в замороз дошли до урочища, Ермакова городища ныне словет; и идучи у жителей обира хлебы и запасы и тут зимовали, и по за Камени вогуличь воевали и обогатели, а хлебом кормилися от Максима Строганова. И в поход ходиша на вогуличей 300 человек и возвратишася з богатством в домы своя и на подъем в Сибирь и к тому приправиша вдоволь легких струг с припасы.

Монограмма («знак») авторов и иллюстраторов «Истории Сибирской» .

И маия в 9 день доспели обещанием часовню на городищи том во имя Николы чюдотворца. Овии же поплыша с Ермаком вниз по Сылве до усть Чюсовой, овии ж остася на городиши том с женами и з детми, вечно оселишася. Ермак же з дружиною у усть Чюсовой, взявши у Максима запас на проем 5000 человеком и ружье, и молитъствова. В 87 (1579) июня 12 день поидоша по Чюсовой вверх до Тагилскаго волока з боем, и вожи ему были зыряне — добрии змерли, а иные бежали, а не знающие не попали в Серебренку в устие, прошли выше в вершину и многие мешкоты в повороте до самой осени. И дошед Серебренки идоша и тежелые суды покинуша на Серебренке и легкие струги таскали чрез волок на Тагил реку; и на Бую городище зимовали и кормилися вогуличами птицею, рыбою и зверием, яко ж и они. И многие бои улусы их погромили и рухледи много взяли, и многие суды легкие вновь доспели доволно. И те старые, где они лежат, сквозь их дна дерева проросли.

И в 87-м вниде в слух к самодержцу государю Иванну Васильевичю, что Максим Строганов тех пресловущих воров Ермачка Поволскаго с товарищи з запасы и с ружьем отпустил, и о том к Максиму об отъпуске воров слово писано в грамоте сице: «Мужик, помни, да как ты с таким великим и полномочным соседом ссоришь, и какая несостоятелная спона меж нами учинится, и не ведаешь, что я тебе за то учиню; а ежели доброе что в таком случае учинится безпорочно, не ведаешь, чем ты со своими пожалован будешь в твоем опасении». И то писание Максим радостно с печалию принял и прочел слезно, а к Ермаку в кровопролитии его невместно писать и не смел. Точно слыхом от приходящих пренесеся слово, како в воинстве и о всем слышно ему в удаче, и о том веселяшеся ему не всуе туне: запас, и ружье, и подмог, и пушки дал в отъпуск. А в поход Ермак на струги дружине своей у Максима взимая с пристрастием, а не вовсе в честь или взаимы, но убити хотеша и жита его разграбить, дом его и при нем живущих разорити в конец, и приступи к Максиму гызом. Максим же увещеваше их Богом и государем, что числом им запасов дати и о том прося у них кабалы — егда возвратитеся, на ком те припасы по цене взяти, и кто отдаст точно или с лихвою. Из них же войска паче всех Иван Колцев сь есаулы крикнуша: «О мужик, не знаешь ли — ты и тепере мертв, возмем тя и ростреляем по клоку, дай нам на росписку по имяном на струги, поартелно 5000, по именом на всякаго человека по 3 фунта пороху и свинцу и ружья, три полковые пушки, по 3 пуда муки ржаной, по пуду сухарей, по два пуда круп и толокна, по пуду соли и двум полоти, колико масла пудов, и знамена полковые с ыконами, всякому сту по знамени».

Максим же страхом одержим и с подданными своими отворил анбары хлебные, и по именом полковых писарей и весом успевающе, дающе день и нощь коемуждо по запросу числом на струги. И струги их грузу знимать не стали и под берегом тонути. Они же приправили набой, излегчили приимать запасов помене по стругам, и управишася вси по совету в путь свой июня в 13 день смиренно, и обещася вси Максиму: «Аще Бог управит путь нам в добыче и здравии имать быти, заплатим и наградим по возвращении нашом; аще ли же избиени будем, да помянет нас любовь твоя в вечном успении; а чаем возвращеня ко отцам своим и матерям». На городище же Ермакове с женами зыряне и книги их писарей и память жилья их, кто имены и отчеством домов, и доныне у Строганова в казне взыскуется.

Было у Ермака два сверсника — Иван Колцев, Иван Гроза; Богдан Брязга и выборных есаулов 4 человека, тож и полковых писарей, трубачи и сурначи, литавръшики и барабаншики, сотники и пятидесятники, и десятники с рядовыми и знаменшики чином, да три попа, да старец бродяга, ходил без черных риз, а правило правил и каши варил, и припасы знал, и круг церковный справно знал. И указ на преступление чинили жъгутами, а хто подумает ототти от них и изменити, не хотя быти, и тому по-донски указ: насыпав песку в пазуху и посадя в мешок — в воду. И тем у Ермака вси укрепилися, а болши 20 человек с песком и камением в Сылве угружены. Блуд же и нечистота в них в великом запрещении и мерска, а согрешившаго объмывши 3 дни держать на чепи.

87 году, бывше Ермаку з дружиною и виде многое собрание кучюмовьское стояще на Карачине озере обще и в зборе, аки вода колыбащеся, и згониша с острова мурзу Карачю августа в 1 день. И восхотеша возвратитися въспять в Русь, и погребоша вверх по Тавде реке, воюя с устия вверх обои Красноярскую и Калымскую волости и Лабутана со княжцы, и со всеми безотъступно бишася и безвозвратно до Паченки. И ту великий бой бысть, и раниша многих казаков, их же татар прибиша до единаго, и Печенега княжца убиша, и наполниша трупом езеро, и то словет и до ныне Банное Поганое, полно костей человеческих.

И оттоле погребоша вверх по Тавде, августа 6 день в Кошуни. Приидоша х Кошуку княжцу Ворлякову, и поимали перваго есаула Ичимка и допросиша: «Есть ли боевые люди?» Он же вся возвестил Ермаку. Ермак же овых из них убил и есак взял. Нападе же на них страх велий, и приходяще кланяхуся с есаком, и все те волости и с Чандыри покорил боем и доброволно со старейшинами их.

И в Чандырском городке великое болванское моление, что их абыз шейтаншик могуще демоном чинити дива призыванием жертв их: проклятаго связавше крепко и уткнут саблею или ножем в брюхо скрозь и держат связана, дондеже по вопросу всем скажет. И тогда выдернут из него нож или саблю, шейтаншик же став, наточит пригоршни крови своей, выпьет и вымажется, будет весь цел, что и язв не знать.

И про возврат Ермаку тот же шейтаншик сказал, что воротится на Карачино езеро зимовать и доидет до пелымского княжца, а «чрез Камень, де, хотя и думаешь, не пойдешь, и дороги нет, а поворотишься и победишь Кучюма и царство возмешь». И о том идолское пророчество збылося, а о смерти его не сказал. И взял есак, ехал. И идоша до городка Табаринца Бия, и ту бой на малые часы, потому что Ермак не становился долго и ворочатся за ясаком — что мимоходом урвал, то и наша добыча. И ту убиша багатыря две сажени высоты, и хотеша жива свести с собою, но не далъся — ухватом человек десять загребет и давит, и того застрелиша на чюдо.

И доидоша до Пелымскаго княжца Патлика и с ним велий бой починиша за многолюдство и пустой шум, ибо толико отобралися одне мужики на бой, а жены их и дети свезены в разстояние на Конду реку в урочище неприступное, и едины бойцы осташася у рыбиных ловль. И тех Ермак с таварищи прибили до единаго. И по допросом пути нет за Камень в Русь. Возвратишася вниз по Тавде октября 4 день, обирающе хлеб в ясак, провадиша в зимовье Карачинское со многими припасы сушеными и привозшиков, отпустиша их восвояси. И тот збор — первой ясачной хлеб в Тоболску. И доныне хлеб и денги и куны те — в месте Ермакова прибору.

И приехали на Карачино ноября 8 день и всегда покушашеся напустить на Кучюма, и час воли Божии по урадом не дошел, вси беша во опасении, и тако в помыслех и в походах озимеша, беруще ясак, рыбу и мяса на пропитание, скрывающее в улусех.

90 (1582), марта 5 день, послаша Ермак вниз по Иртышу реке в Демьянские и в Назымские городки и волости пятидесятника Богдана Брязгу с пятьюдесятью человеки все Назымские волости пленить и привести к вере, и собрать ясак вдоволь розкладом поголовно. И приехав в первую Аремзянъскую волость, и городок крепкий взял боем, и многих лутчих мергеней повесил за ногу, и розстрелял, и ясак собрал за саблею, и положил на стол кровавую, и велел верно целовати за государя царя, чтоб им служить и ясак платить по вся годы, а не изменить. И взяли у них в Сибирь ясак, и запас хлеба, и рыбы, и отослали в город. И того страху вси иноземцы ужаснулися. И за страх грозы не смели не токмо руки поднять, ниже слова молвить во всей волости Надцынской. И добралися до Тургайскаго городища, и собранные ту учинили с ними бой, и того же часа побеждены суть, и с князьков их и с началных со всех ясак взят вскоре.

И доехали конми до усть Демьянки реки, до болшево их зборнаго княжца Демаяна. И город их велик и крепок, и в зборе 2000 татар и вогуличь и остяков. Приступали по три дни, не могли попасть в крепость горы, и хотяше возвратитися и думали: «Как взять, и се роспутица ходу и голод близ». И спрашивали у тех, кои приехали с ними в подводах и с есаком, како молятся. Един же в них, чювашенин, был у Кучюма рускаго полону, сказал: «Молятся де они рускому богу, и тот де руской бог литой золотой в чаше седит. И в ту де чашу наливши воды, пьют и зовут его Христом, а сказывают де, привезен от Владимерова крещения, и для того живут смело. Отпустите де меня к ним, и я де могу его унести, и что они думают, скажю вам все».

И в вечер дни пошел, и по утру рано в табары пришел, сказал: «Ворожат де и говорят: лутче де нам здатся живым, — и на том де у них и положено. А бога де их взять не мог, против де его вси сидят и молятся и стоят, а он де поставлен на стол и кругом горит жир, и курятся серою, аки в ковше».

Егда же начахом приступати ан на косогор, они же видя, мнози разбегошася с роды в домы своя, иных князей Романа Славнаго; и ту в городке шерстовали и есак взяли и весновали, а мольбища не сыскали.

И по поле воде доспели себе легкие струги, и поплыша вниз, с покорных беруще ясак. Роман же, князець их лутчей, бежал с жилья своего вверх по Ковде к Пелыми с родом своим лыжами и нартами. Егда же доплыша Рачева городища, и ту котелние шейтанъшики — збиратели со всех юрт на молбише к шейтану Рачю, и в зборе их многое, — вси утекоша в лес до единаго, в частой ельник, и жертву покинуша всю; и ждаша сутки и не дождався, ехали, собирающи ясак.

Прочие же скопишася между дву мысов горы Иртыша выше Цыньялы реки, злобящеся в уском месте, мняще, что Бог их, казаков, стругами не пропустит дале ехать вниз, ту остановит, да побьют всех. И умыслиша в ущине оружье себе коварно, крюки и укрюки, засеку и веревки, да удержат. Богдан же с товарищи, слыша скоп их зле, остановишася и молебъствоваша. И на всходе солнца пустишася напоплав и доплыша ту быстрины; остяцы же крюками своими и укрюками хотя хапати, они ж удариша вкруг из ружья на обе стороны, и повалишася, собою мятуще друг друга. И проплыша до Цыньялы и Нарымъскаго городка, а в городке точию жены их и дети и от страха омертвеша, плача, крыча и бегая. Тии же вымышленники в вечеру приходяще един по единому, оглядаяся и виде, яко не бьют жен их и детей, точию ласкают, во утрии собрашася с вси. Овии же разыдошася, оставшие же любезно данью и есаком поклонишася.

Прияше же ясак майя в 9 день и поплыша вниз до Колпуховы волости и сотника их и молбища шейтанскаго, и учиниша бой часа с три, и видеша убиенных, и здашася, и ясак даша доволно. И того числа поплыша до Колпухова городка, беруще ясак з боем и без бою. И маия в 20 день доплыша до Самара княжца, и ту в сборе 8 княжцов, ждуще побити силою. Богдан же с таварищи, моляся Богу, в день неделный приплыша протокою под самой Самар, и засташа многих остяков на карауле спящих твердо без опасения. Егда же на стоящих удариша из ружья и убиша княжца Самару и с родом его, прочие же в собрании в разбех разлучишася по своим жильям. А жителей осталося малое число, и принесоша ясак с поклоном и шерстоваша ту. Богдан же поживе неделю и поставиша князя болшего Алачея болшим, яко богата суща, и отпустиша со своими честно.

И оттоль поидоша на Обь и виде много пустово места и жилья мало, и присташа на Белогорье; ту бо у них молбище болшее богыне древней: нага с сыном на стуле седящая; приемлюще дары от своих, и дающе ей статки во всяком промысле, а еже кто по обету не даст, мучит и томит, а хто принесет жалеючи к ней, тот пред нею пад умрет, имяше бо жрение и съезд великии. Егда же вниде им в слух приезд Богдана, велела спрятатися и всем бежати, и многое собрание кумирское спряташа и до сего дни.

Богдан же виде пустоту жилья, и размыслиша с таварищи ехать дале не по што, а возвратишася, пождав на месте три дни, в Сибирь град. А кои бои и были по дороге, на низ пловучи, и тех всех описать трудно подробну: вои убитых нет, а раненых — кажной многаши. И приехали в радости маия 29 день сь есаком, и едучи по погромленным городкам, смотря. Мнози утвердишася жити постоянно во всем покорни, стречаше и провожающе казаков и с провожатыми — честно, а егда же приносяще ясак, и приемъшики вси в наряде — в цветном платье, чтуще честь, царскаго величества славу. И со зборщиками доехавши к Ермаку здраво и в честности, в радости вси прославиша Бога.

По взятии Сибири 92-го (1584), августа 6 день, по ведомости оманшиков, поехали Ермак с казаки с тремя сты человек стретить прикочевных бухарцов со многими тавары, а Кучюм де стоит далече в урочище Вагая реки. Егда же поидоша вверх по Иртышу, и все волости покорни беша во всем, а слыху никакова о Кучюме и бухарцах не обретоша. И прогребли вверх по Иртышу до Сартезеря и до болшего князя Бегиша Княжева городка и ту учиниша великий бой со зборными тотары и с карачинцы; у Бегиша же две пушки железные из Казани привезены, их же казаки умолвиша, и не могоша лунуть на казаков вдругорядь, и спехнуша их прямо в Ыртыш под гору; и ту прибиша всех с ярости без остатку, а малое число утекли; и взяша имения много и закопаша в погребы с пожитки. И погребоша к Шамше и Крянчикам, и в Салахе беша малой бой; и погребоша в Каурдак, ту бо татара вси спряташася в темной елник и болота; и догребоша до старости древняго поставления царя Саргачика Ишимскаго, и з боем взяша его, смиряюще.

И оттоль до Тебенди, словет нижной городок князка Елыгая, и тут есаул в малолюдстве; и слыша и виде, что Ермак покорных не убивает, принесли дары и есак, что яко прежде требовал что доброе в честь; и привел ему прекрасную дочь свою в честь и в дар, Ермак же не приял и отверг и прочим запретил, ея же доступал Кучюм за сына своего взяти, та бо девка роду ханска Саргачика царя прекрасна. И оттоль погребли до усть Ишиму, и на усть Ишиму бой великой, яко не оружьем, но руками, кто кого может, и в том бою убито ермаковых казаков 5 человек, и одолеша бусурман, а своих погребоша. И от тех пяти человеках татара поют с плачем при беседах в песнех, припеваючи: «Яным, яным, бишь казак, бишь казак», — сиречь: «Воины, воины пять, пять человек победиша и разориша». И сия песня их словет царицын плачь.

И оттоль ехаша в городок Кулары, и той опасной крайной кучюмовской от калмык, и во всем верх Иртыша крепче его нет. И того Ермак, приступающе 5 дней, взяти не мог, и оставил, говоря: «Назад де воротяся приберем». И погребоша к Ташатканскому городку. И в том городке спал камень с небеси, величество как бы воз с санми, видом багров, и от него де временем возходит стужа, дождь и снег; и о сем Ермак с таварищи дивилися Божию деянию. Сущи же жители во всем покорны и, еже требовал Ермак, всё отдали, потому что застращаны и бои вси на Сибири и под Чюваши видели, и бежали к сродичем, ту живущим. И размышляюще вси, яко не слыхали о Кучюме и бухарцах николи, и где бы весть перенять.

И поидоша до усть Шиштамаму и ту конечно обретоша беглецов и карачинцов, и кои беглецы были у Ермаку в полону, узнали его, что у него в стану жили. И та словет волость жителей — туралинцы. И видеша вси, яко зело скудни, и ничим их вредиша. И оттоле возвратишася на низ вскорости. И в Ташаткане сказали им, что пришли бухарцы в Сибирь, погребаючи все городки и волости до усть Вагаю реки. И погребоша вверх по Вагаю реке с поспешением до Агитъскаго городка в трудности, и ничто же обретоша, ни слыху, ни виду видеша. И изождав, поворотилися вниз до устия и остановится, не внимая назирателя Кучюма и Карачи, ведомых воров, стояще в прикрыте за речкою в трех верстах и менши, в темном диком суземье, при речке крутой и топкой велми. По ней же Кучюм учинил брод широкой, как в три или в четыре телеги проехать, в одном месте каменьем и песком засыпал плотно, а хто не угодает, утопает.

 

Приложение 3 СИНОДИК ЕРМАКОВЫМ КАЗАКАМ

[7]

В лето 7089-го (1581), при державе благочестиваго царя и великаго князя Ивана Васильевича всеа Росии, еже избра Бог и посла не от славных муж, ни от царьскаго повеления воевод очистити место святыни и победити бесерменскаго царя Кучюма, и разорити их богомерская и нечестивая капища, но и еще быша вогнеждение зверем и водворение сирином. Но на тех местех поставишася грады и соделашася святыя Божия церкви в прибежище православным христианом, а во славословие Отцу и Сыну и Святому Духу. Но от простых людей избра и вооружи Бог славою и ратоборьством и волностию отомана Ермака Тимофеева сына Поволъскаго со единомысленою и с предоблею дружиною храбръствовавьшею. Забыша века сего всю земную честь и славу и плотскую сладость, но подвигшеся и крепко вооружившеся сердцы своими на волныя раны и излияти кровь свою, и смерть в живот предложити. Но восприемше щит истинныя веры и утвердишася мужествено, и показаше храбръство свое пред нечестивыми, но вси глаголюще: «Достойни умрети за святыя Божия церкви и за православъную истинную християнъскую веру пострадати, и благоверному царю послужим, и всю надежду свою на Господа тверда положим, яко не во множестве воин победа бывает, но свыше от Бога, и может безспомощным помощи на противляющихся агарян». И вся сия совершишася Божиим промыслом.

И приидоша сии воини бестрашни в Сибирскую землю, в их нечестивыя улусы, и противнии собрашася агаряне и безбожныя татарове во уреченном месте у реки Иртиша на брегу под Чювашею. И насеяшеся множеством их, яко травы селныя. И бысть с ними первой бой охтебря в 26 день, и жнуще православное воинство Божиею помощию нечестивых, яко ж класы. И на том деле убиенным Околу, Ивану Карчиге, Богдану Брязге и с их дружиною веч[ная память] б[ольшая].

Тое же зимы бысть бой с нечестивыми под Обалаком декабря в 5 день. И на том деле убиенным Сергею, Ивану, Андрею, Тимофею и с их дружиною веч[ная память] с[редняя].

Тое же зимы Ермакове и дружине, безо опасения им идущим к рыбной ловле под Обалак декабря в 5 день. И внезапу приидоша на них нечестивыя воинством и побиша на том деле Окула, Ивана Карчигу, Богдана Брязгу и с их дружиною веч[ная память] м[алая].

Во второе же лето Сибирскаго взятья Божиею помощию еще храбръствовавши Ермаку своею дружиною и обнаживше мечи на нечестивыя, воеваше по Иртишу и по великой Оби, их нечестивыя улусы и городки татарския и остяцкия до Назима воеваше, и Назим, городок остяцкой, взяша со князком их и со многими их остяками, поплениша и в плен поимаша. И на тех делех в хождении Ермаковым тов[а]рыщем отоману Никите, Тимофею, Ивану, Ананье, Анцыфору, Ивану, Григорию, Андрею, Алексею, Никону, Михаилу, Титу, Феодору, Ивану, Артемия, Логину и прочей дружине их, пострадавшим и избиенным и всячески нужно скончавшимся от нечестивых веч[ная память] с[редняя].

В третие же лето по сибирском взятье присылал нечестивый Корача, думчей царев, послов своих к Ермаку с товарыщи по люди, обороняти я от Казачьи орды. И по приговору всего товарства, а повериша их нечестивому безверному шерстованию и отпустиша к тому Кораче с приговору отомана Ивана Кольца, а с ним 40 человек товарства. И предашеся неволне судом Божиим в руки нечестивых. Отоману Ивану Колцу, Владимеру, Василию 2, Лукияну со всею дружиною своею, единокупно вси главы своя под меч положиша и живот свой скончаша в плену, вечная па[мять] б[ольшая].

В четвертое же лето по сибирском взятье августа в 6 день приидоша вестницы от бухарцев торговых людей к Ермаку с товарыщи, что их Кучюм не пропустит в Сибирь. И Ермак собрашася с невеликою своею дружиною навстречю бухарцев. И доидоша близ Вагайскаго устья и обночевашесь на перекопи; и подсмотриша нечестивыя, и нападоша на станы их нощию. Но посланием Божиим оготовавшися день и приближишася на воинов внезапная смерть, на Ермока и с его дружиною. Ужаснушася от нечестивых и в бегство предложишась, а инем на станех побитым и кровь свою пролияша. Якову, Роману, Петру 2, Михаилу, Ивану, Ивану и Ермаку, еже изволи Бог живот свой скончати и кровь свою пролияти от нечестивых з дружиною своею безвестно, ве[чная память] б[ольшая]. Конец.