Знамение 5
Чудеса хотящая быти тогда Енохом и Илиею скорбию размешена
О чудесех убо хотящих быти Енохом и Илиею пророкома во время антихристова пришествия, во Апокалипсисе во главе 11-й свидетельствуется тако: «И дам двема свидетелема Моима, и будета пророковати дний тысящу двести шестьдесят, облеченна во вретища». Ниже: И аще кто хощет их обидети, огнь исходит из уст ею, и снедает враги ею. И аще кто хощет я обидети, сице подобает ему убиену быти. Сия имата власть затворити небо, да не снидет дождь во днех прорицания ею: и область имата над водами обращати я в кровь, поразити землю всякою язвою, елижды аще восхощета. Толкование. И аще кто хощет их обидети: оле божественныя дивныя благости и благодательства, яко равномощную на язву приносит цельбу. Понеже бо во всяких знамениих и чудесех ложных, от всех чаровных отравников и обаятелей лжехристос будет объявленнейший, аки всякое диаволе действо приемляй. В силе истинных знамений же и чудес святая сия вооружит Бог приложением истины и света, ложь и тму хотяща обличити. И прельщенных убо обращающа, словом же учительным, жезлы же казнительными, бездождием и огнем и изменением стихий, и подобными. Лестьцаже изобличающа, и ничтоже ниже от онаго, ниже от другаго постраждут, даже до конца своего си прорицания» (Толковый Апокалипсис Андрея Кесарийскаго). И паки во главе 15-й, зачале 45-м, глаголет: «И по сих видех и се отверзеся храм скиния свидения на небеси. И изыдоша седмь ангели, имущии седмь язв». Ниже: «И едино от четырех животных даде седмим ангелом седмь фиал златых, исполненных ярости Бога, живущаго во веки веком. И никто же можаше внити в храм, дондеже скончаются седмь язв седми ангелов. Толкование. Отсюду умышляем, яко донележе негодование божественное на нечестивых не разлучит праведники от неправедников, никакоже святии получат жребий в небеснем Иерусалиме, и священнодейство и покой в храме Божии. Подобает бо скончатися, глаголет, язвам, ими же мздовоздаяния греховная достойным подаются, и сии изволенный им получат ответ, посем сице дано будет обитание святым в горней митрополии. Куюждо же язв обретающимися в кончине примиряяй, кто не погрешил бы мню подобающаго. Человеколюбец бо сый Бог, ко еже умалити безконечныя муки в будущем и в настоящей жизни, достойным попустит, да наведены будут чрез Еноха и Илию пророка мучительныя язвы, и чрез припадающия болезненныя от браний противомерному согрешенных возмездию». И паки во главе 16-й, зачале 47-м: «И вторый ангел излия фиалу свою на море, и бысть кровь аки мертвеца. И всяка душа живая умре в мори. Толкование. Не велие есть божественней силе, и на обличение немощи антихристовы, и на удобство прельщаемых, святыма пророкома Енохом и Илиею преложити море в кровь аки мертваго, сиречь, аки закланнаго, и тлю содеяти сущих в нем, якоже древле во Египте чрез Моисея сотвори на обличение жестоты фараоновы и на указание Своея силы». Ипполит святый в Соборнике глаголет: «И убо полседмицы возмут оба пророка со Иоанном, еже проповедати во всем мире о антихристове пришествии, сиречь дней 1260, оболчена во вретища: иже и сотворят знамения и чудеса, во еже тако умолити и обратити человеки в покаяние за пребезмерное тех беззаконие и нечестие. И иже восхощет тех озлобити, огнь изыдет от уст их, и пояст враги их. Тии имут власть удержати небо, да не снидет дождь во дни пришествия антихристова, и воды обратят в кровь, и поразят землю всякою язвою, якоже аще хотят».
О сих язвах, хотящих тогда быти от пророков, вышеписанное сие речение, елико аще восхощета, нецыи ныне не в силе писания разумеют, но мнят якобы и не восхощут тогда сии пророцы язвы сия навести.
Аще же кто истиннолюбно разсмотрити желает, тем известно да будет, яко неотрочно наведены будут оныя язвы от сих пророков, понеже во Апокалипсисе в той же 11-й главе ясно сказуется, яко по убиении сих пророков людие возрадуются и возвеселятся, яко оба сия пророка мучиста живущия на земли. И аще речеся мучиста, зде яве есть, яко язвы сия наношаста. А еже речеся, елико аще восхощета, или якоже аще хотят, сиречь еюже язвою колико восхотят наказати, столько и накажут. Ведят бо время и потребу, качество и количество, яко раби Бога вышняго, и вся послушна им, якоже речеся. Сего ради вонмем, где убо ныне, или от кого таковыя вышереченныя знамения и чудеса совершаются? Воистину ни от кого же и нигде же. Темже и от сего знамения показуется, яко антихрист не прииде в мир: в самое бо то время пришествия его сия истинная чудеса от сих пророков будут действоватися, противу мечтательных знамений и ложных чудес антихристовых, о нихже изъявится ниже в шестом знамении.