Сия книга о антихристе, показующая чувственное его пришествие, хотящее быти на кончине мира сего: и во утверждение таковаго разумения предлагает 12 знамений, в них же на священное о сем писание обретается светлоявленное святоотеческое толкование, паче же Самого Бога духновение.

Темже убо, благочестивый читателю, да не соблазнит тя своемненное неких о сем размышление, сице глаголющих: «Не возможно есть антихристу чувственно быти: ибо аще бы чувственно приити тому надлежало, то како речено, яко мечтательну плоть приимет? И аще мечтательну, то како человек быти может? Но аще и человек будет и царем чувственным три лета и шесть месяцей, то како в таковое краткое время проповедатися ему, прельстити же и возобладати толь великим всего мира царствием? Да и начто же ныне таковому проповедатися в мире, понеже вмале уже не весь мир прельщен и соблазнен, и во всяком нечестии заблужден погибает? И паки: аще чувственно приидут на землю пророцы Илия и Енох обращати человеков от нечестия, и еже бы не веровали антихристу: то паки в толико краткое время, сиречь в три лета с половиною, как можно двум или трием человеком проповедати благоверие во всю вселенную, толиким пространством одержимую? Аще же сия вся чувственно будут, то и второе Христово пришествие могло бы от человек познатися, егоже Господь никому не сказа, дня же и часа того явити не изволи».

Сия же и прочая подобная сим таковии мудрствуют и глаголют, чрез которая антихристово и пророков Илии и Еноха пришествие, и прочих действ сбытие хотящее быти, тогда в нечувственное обращают. Ты же аще будеши о сих истиннолюбно священное писание разсуждать и безпристрастно толковать, и внимательно разсматривать, и смиренномудренно с Божиею помощию испытовать, то обрящеши, яко сия всячески станут и в чувственном смысле, якоже антихристово, тако и пророков пришествие, и прочая при них быти изъявленная действа. Сия же тя да не соблажняет, ниже невозможностию коею да покрывает. Веруй божественному писанию, егоже и в книге сей отчати собрахом, яко неотрочно по сему будет и будет. Понеже «не изнеможет от Бога всяк глагол», по речению ангелову. И «невозможная от человек, возможна суть от Бога». И Богу хотящу удобь совершаются преславная. И идеже хощет Бог, тамо побеждается естества чин.

Нам же на вся вышереченных оных смышления и противоглагольная речения, аще чинить пространная ответословия и божественным писанием возражения, то сия книжица всячески обтяжется величеством и многословием. Аще же и при чувственной трапезе многая брашна и пресыщения враг сладости бывает: сице подобно и при духовной трапезе священнаго писания бывати обыче: ибо зело пространная беседа и долговременное разглагольствие, и многословное повествование духовную сладость многим многажды не столь приятну приносит. Темже и мы малейшую сию скративше книгу, яко истинно кого спастися хотящаго вразумити могущу: понеже имеет она священное писание богоносных отец любомудрым сказанием протолковано и изъяснено. По немуже мы последующе зде вчинихом, имже и вышереченная действа чувственно быти имущая изъявихом. Прочее неизмеримую бездну судеб Божиих своим малоумием мерити не дерзаем, слышавше глаголющаго: «О глубина богатства и премудрости и разума Божия, яко не испытани судове Его, и не изследовани путие Его. Кто разуме ум Господень? Или кто советник Ему бысть» (Апостол, зач. 107).

Точию о сем извещаваемся, яко яже бывают и яже быти имут, вся на полезная нам от Бога устрояются. Темже убо со оным неисчетным небесным народом должни есмы и мы сице воспевати: «Спасение и слава и честь и сила Господу Богу нашему, яко истинни и праведни суди Его» (Апокалипсис, гл. 19), всегда и ныне и присно и во веки веком аминь.