Кондак 1-й

Избранней от человеческого рода и рождшейся от неплодове, Пречистей Деве Марии составим похвалу, яко Рождеством Ея начало спасения нашего бысть и пришествие в мир Избавителя возвестися. Темже радостно Ей возопиим: Радуйся, Пречистая Дево, Материю Спасителя мира от века предъизбранная.

Икос 1-й

Ангел небесный предстояй пред Богом, послан бысть к праведным Иоакиму и Анне возвестити им радость велию, яко по неплодствии своем имут родити Дщерь Преблагословенную, от Неяже всему миру радость произыдет. Темже и мы, радости сея причастницы, похвальная песни Деве воспоем: Радуйся, в Троичном Совете Материю Сына Божия от века предъизбранная; радуйся, древними пророками с патриархи многообразне в образех и сенех прообразованная. Радуйся, вящшие пяти тысящ лет от создания мира рабы Божиими, яко Матерь Избавителя, ожиданная; радуйся, в видении Иакову лествицы, яко Божие к человеком снизшествие, предуказанная. Радуйся, неопалимою купиною в пустыни Синайстей Моисеом виденною, предвозвещенная; радуйся, Чермным морем Израилю сух путь давшему, фараона же потопившему, образне преднаписанная. Радуйся, написатися нам в книзе Живота Вечнаго пособствующая; радуйся, Царствия Небеснаго невозбранный вход нам ходатайствующая. Радуйся, Пречистая Дево, Материю Спасителя мира от века предъизбранная.

Кондак 2-й

Видяще праведнии Иоаким и Анна явльшагося им Ангела, возвещающа Рождество Твое, Пресвятая Дево, возблагодариша Бога, призревшаго отъяти поношение безчадия их, и всем сердцем тепле возопиша: Аллилуиа.

Икос 2-й

Разум Божественнаго строительства и на землю снизшествия Своего Всеблагий Господь исполнити начиная, посланием Ангела Своего возвестити Иоакиму и Анне о Рождестве Твоем, Пресвятая Дево. Темже вопием Ти хвалебно: Радуйся, разума Божественнаго проявление; радуйся, дивнаго смотрения Его исполнение. Радуйся, древле предуставленная послужити воплощению Сына Божия; радуйся, от всех родов в жилище всех Царя избранная. Радуйся, еще в раи изречением искусителю змию о положении вражды между тем и Женою и Семенем Ея предуказанная; радуйся, по исполнении времен от неплодове изволением Божиим славне произшедшая. Радуйся, род человеческий Рождеством Своим возвеселившая; радуйся, сетование чаявших утехи Израилевы на радость преложившая. Радуйся, Пречистая Дево, Материю Спасителя мира от века предъизбранная.

Кондак 3-й

Сила Вышняго разреши неплодство заматоревшия во днех своих праведныя Анны: зачат бо Тя, Пречистая, и, чая Твоего рождения, радостно пояше Богу Израилеву хвалебную песнь: Аллилуиа.

Икос 3-й

Имущая безмужно родити Спасителя душ и телес наших, Ты и Сама, яко чудо пред велиим и непостижимым чудесем, от неплодных родителей славно родися, Пресвятая Дево. Темже воспеваем Ти сице: Радуйся, от корене Иессеова и Давидова произшедшая; радуйся, от неплодных ложесн праведныя Анны дивно прозябшая. Радуйся, пророчеством Исаии прежде лет древних Дева-Матерь явленная; радуйся, по обетованию Ангела рожденная. Радуйся, скиниею свидения и Ковчегом завета прообразованная; радуйся, процветшим жезлом Аароновым образне предзнаменованная. Радуйся, прежде Рождества Твоего в Матерь Богу Слову освященная и предуготованная. Радуйся, Пречистая Дево, Материю Спасителя мира от века предъизбранная.

Кондак 4-й

Бури поношений человеческих о неплодствии своем избавльшеся в зачатии Твоем, Пресвятая Дево, праведнии родителие Твои радовахуся, и в честь Рождества Твоего учреждение велие творяху сродником и знаемым, и тии срадовахуся им, вопиюща Богу, сотворшему милость Свою, хвалебную песнь: Аллилуиа.

Икос 4-й

Слышавше окрестные людие, яко дщи Иоакима и Анны наречена бысть Мария, сиесть Госпожа, разумеваху, Пречистая, велику и славну Тя быти не токмо в людех, но и у Бога. Мы же, сбытие сего добре ведуще, величаем Тя сице: Радуйся, Пресвятая Дево, не от человека, но от Ангела имя Себе еще прежде зачатия приявшая; радуйся, по имени сему Госпожею всея твари быти сподобльшаяся. Радуйся, яко праведнии родителие Твои воздающе Богу благодарение за Рождение Твое, великия дары в жертву Тому принесоша; радуйся, яко сродником и знаемым, купно же и убогим вечерю любве сотвориша. Радуйся, яко от священников, в дом родителей Твоих на торжество званных, благословенна еси; радуйся, яко от всех на веселие оно собравшихся, похвалена и прославлена была еси. Радуйся, выше всякия чести и похвалы явльшаяся; радуйся, Материю Бога Слова быти сподобльшаяся. Радуйся, Пречистая Дево, Материю Спасителя мира от века предъизбранная.

Кондак 5-й

Боготечная звезда, возвещающая пришествие Солнца Правды, Христа Бога нашего, в Рождестве Твоем явися, о Пресвятая Дево; темже людие Божии, пришествия Избавителя верою чаявшии, видяще Тя чудно от неплодове рождшуюся, таинственно возвеселишася и возопиша: Аллилуиа.

Икос 5-й

Видевши праведнии Иоаким и Анна рождшуюся от них Богоотроковицу Марию, о Нейже Ангел Божий некая чудная и дивная тем провозвести, яко Кивоту Божию, Той послужиша, питающе и храняще Ю, якоже зеницу ока. Темже и мы похваляюще Богоотцев, сподобившихся родительми быти таковыя Дщери, Деве Марии радостно воспеваем: Радуйся, Пречистая Дево, яко по Рождестве Твоем родителие Твои вельми возликоваху; радуйся, яко в явлении Твоем в мир Ангели и человецы согласно возрадовахуся. Радуйся, яко о Тебе вси пророцы многообразне предглаголаху; радуйся, яко един от них Вратами затворенными, ин же Горою приосененною Тя именоваху. Радуйся, яко вся преславная древле таинственно о Тебе предглаголано быша; радуйся, яко градом и селением Божиим псаломская уста Тя наименоваша. Радуйся, седмосвещным светильником, яко седмию дарами Святаго Духа исполненная; радуйся, позлащенною трапезою с хлебами предложения, яко Хлеб Жизни, Христа, родити имевшая. Радуйся, Пречистая Дево, Материю Спасителя мира от века предъизбранная.

Кондак 6-й

Проповедник богоносных вещания и глаголы исполняяй, изволением Зиждителя твари на земли явилася еси, Пресвятая Дево, естества нашего цвете, Адама же и Евы воззвание и на первую доброту возведение. Темже вси вернии в Рождестве Твоем радость обретши, духовне торжествуем, дивному в Совете Своем Богу поюще: Аллилуиа.

Икос 6-й

Возсия в Рождестве Твоем, Пречистая, заря спасения нашего, во исполнение Божественнаго Смотрения, имже Ты едина еси от всех родов достойна явилася плоть заимодати Зиждителю Твоему, пришедшему спасти род наш от древния праотеческия клятвы. Сего ради взываем Ти сице: Радуйся, Адама и Евы воззвание; радуйся, древния клятвы разрешение. Радуйся, сеновнаго закона конец и новыя благодати начало; радуйся, промышления Божественнаго Таинница. Радуйся, едина Материю Бога Слова быти достойна обретшаяся; радуйся, и нам новым во Христе людем Мати явльшаяся. Радуйся, Матерним Твоим попечением николиже нас оставляющая; радуйся, в чада Сыну Твоему благоугодны нас приуготовляющая. Радуйся, Пречистая Дево, Материю Спасителя мира от века предъизбранная.

Кондак 7-й

Хотяще обеты своя Господеви воздати, праведнии родителие Твоя, Пресвятая Дево, трилетствующую Тя отроковицу приведоша в храм Господень со славою и радостию многою. Первосвященник же Захария, Духом Божиим объятый, введе Тя во Святая Святых, яже быша прообразом Твоея Святыни: Ты бо вместила еси в Себе святых Святейшаго Сына Божия. Емуже с лики девическими воспевала еси: Аллилуиа.

Икос 7-й

Новое и преславное Промышление Божественное бысть о Тебе, Дево, яко в храме Божии пищу от рук Ангельских принимала еси, Пресвятая. Темже молим Тя: напитай нас пищею благодатною, да возрастем духовно и Тебе, Всецарице, похвальная возопием: Радуйся, преукрашенная добродетельми, Отроковице, в храме Божии жити и Ангелом Собеседницей быти сподобльшаяся; радуйся, от Ангелов пищу небесную во Святая Святых приявшая. Радуйся, во храме Божественным хлебом чудесно напитанная; радуйся, к великому таинству воплощения Сына Божия тамо предуготованная. Радуйся, яко повелением Божиим Ангели на земли Тебе усердно служаху; радуйся, яко тии на небесех ныне Тебе яко Царице благоговейно пояху. Радуйся, яко и мы недостойнии песньми хвалебными присно Тя величаем; радуйся, яко и рождших Тя Богоотцев всегда ублажаем. Радуйся, Пречистая Дево, Материю Спасителя мира от века предъизбранная.

Кондак 8-й

Странное Рождество Пречистыя Девы видевше, устранимся суетнаго мира, ум на небеса преложше, идеже Богоматерь во славе предстоит Сыну Своему и Богу, ходатайствующи пред Ним о всех верных, всеславное Рождество Ея любовию празднующих и вопиющих Богу: Аллилуиа.

Икос 8-й

Вся тварь в Рождестве Твоем, Пречистая, обрете радость, печаль праотеческую потребляющую: произшедшим бо от Тебе Христом Богом, падшее во грех преслушания естество наше от падения воста и паки любезно Зиждителю сотворися. Темже умильно Ти взываем: Радуйся, всемирныя радости предвозвещение; радуйся, таинство от века сокровеннаго явление. Радуйся, Еюже от падения мы возведошася; радуйся, Еюже, прежде отриновенное, естество наше Богу принесошеся. Радуйся, Еюже Иоаким и Анна поношения безчадия свободившася; радуйся, Еюже безплодие сердец наших в благоплодие применишася. Радуйся, Еюже обилие благ вечных верным от Господа подается; радуйся, Еюже благодарение Господеви от верных приносится. Радуйся, Пречистая Дево, Материю Спасителя мира от века предъизбранная.

Кондак 9-й

Вси Ангели Божии, не ведяху тайны Божия Воплощения в Триипостасном Совете от века сокровенныя и напоследок Девою Мариею явленныя, вельми удивляхуся, зряще, како Дщи Иоакима и Анны противу естеству женску, во Святая Святых введеся. Темже недоумением объяти бывше, благоговейно вопияху: Аллилуиа.

Икос 9-й

Вития древнейший, во царех Израилевых всемудрый Соломон, провидя Рождество Твое, Пречистая, в Песни Песней со удивлением возглашаша: кто Сия, проницающая, аки утро, добра яко луна, избранна яко солнце? Темже Церковь, во празднице Твоем ликовствующи, весело Тебе вопиет: Радуйся, невечерняго дне Боговедения утро светлейшее, в законней сени, яко во мраце, возсиявшее; радуйся, солнцеобразная Дево, истиннаго Солнца Христа девственным воплощением вся просветившая. Радуйся, световидная стихия, существенно приявшая Бога, живущаго во свете неприступнем; радуйся, Своим малым чревом объявшая Безпредельнаго, вся концы вселенныя объемлющаго. Радуйся, полная луно, Свет Божественный восприемлющая и нас тем озаряющая; радуйся, чистейшее зерцало, многая совершенства Божия отображающее. Радуйся, совершенством Твоих нас к добродетелей стяжанию побуждающая; радуйся, немощныя силы наши в творении добрых дел укрепляющая. Радуйся, Пречистая Дево, Материю Спасителя мира от века предъизбранная.

Кондак 10-й

Спасти хотя род человеческий от первородныя клятвы, дивное Смотрения Своего таинство сотвори Господь: избра бо Тя, Пречистая, от рода Авраамля и Давидова, и от Тебе безсеменно воплотитися благоизволи, уставы естества побеждая. Темже Рождество Твое днесь празднующи и рождших Тя восхваляющи, вопием Богу: Аллилуиа.

Икос 10-й

Царь Небесный, спасения нашего ради, хотя на земли явитися и с человеки пожити, чертог свят Тя, Пречистая, предуготова, подав плод безчадной Анне, слезно с супругом Своим молившейся о разрешении неплодства. Темже молим Тя, Богомати: разреши неплодие душ наших, да возможем принести Богу плоды благих дел, взывающе Ти сице: Радуйся, пресветлый чертоже безсеменнаго Божия воплощения; радуйся, одушевленная палато, в жилище всех Царя предуготованная. Радуйся, светлейший облаче, имже Седящий на Престоле Божества к нам сниде; радуйся, Посреднице закона и благодати, Ветхаго и Новаго Заветов запечатление. Радуйся, неувядаемая лозо, прекрасный цвет, Спасителя миру, произрастившая; радуйся, благовонный плоде, от неплодове произростший и Христу благоугодно явльшийся. Радуйся, певцев Твоих благоугодны Христу представляющая; радуйся, и нас, дел благих безплодны сущих, утешения не лишающая. Радуйся, Пречистая Дево, Материю Спасителя мира от века предъизбранная.

Кондак 11-й

Песнь хвалебную Рождеству Твоему приносящих не отрини, Владычице Благая, но рождших Тя ради, благоуветлива нам буди, молящи о нас Сына Твоего и Бога нашего, да подаст грехов прощение и жития исправление, еже в покаянии слезном выну благодарно воспеваем Ему: Аллилуиа.

Икос 11-й

Светоприемная и премирная Божественнаго света Свеща, единородная Дщерь Иоакима и Анны, предъизбранная Матерь Единороднаго Сына Божия, днесь от неплодове преславно произыде и просвещает Рождеством Своим верно празднующих и благоговейно взывающих: Радуйся, светозарная свеще, Божественным пламенем сияющая; радуйся, и нас тем благодатно согревающая и просвещающая. Радуйся, таинственная клеще, угль Божественный, Христа Господа, во утробе и на руках Твоих носившая; радуйся, и нас в Таинстве Причащения приимати Того сподобляющая. Радуйся, храме Господень, Давидом воспетый, скиния благодатию возсиявшая; радуйся, кадильнице святая, рождением Сына Своего всю тварь облагоухавшая. Радуйся, престоле превознесенный, одушевленное седалище Великаго Царя, с Нимже царствующая; радуйся, Царице небесе и земли, нас, убогих, не забывающая. Радуйся, Пречистая Дево, Материю Спасителя мира от века предъизбранная.

Кондак 12-й

Благодати действо проявися в Рождестве Твоем, Пречистая; молитву бо безчадных родителей Твоих Господь услышав, подаде им Тя в утешение, якоже Аврааму и Сарре Исаака, восхотев таинство Своего Смотрения совершити и уготовати Тя в Матерь обетованному Искупителю, Емуже благодарно поем: Аллилуиа.

Икос 12-й

Поюще славное Твое от неплодове Рождение, хвалим Тя Пречистая, яко Таинницу Божия о нас спасительнаго Смотрения, и вопием Ти сице: Радуйся, чистая Ноева Голубице, рождеством Твоим престание потопа смертнаго возвестившая; радуйся, ветвь благовестия Христова роду человеческому принесшая. Радуйся, едина блаженная в женах, послушанием Твоим Богу преслушание праматери Евы исправившая; радуйся, печаль Адама и праотцев Рождеством Твоим на радость преложившая. Радуйся, яко Рождество Твое радость возвести всей вселенней; радуйся, яко о Рождестве Твоем матери радуются и неплоды веселятся. Радуйся, Рождество Твое верно и благочестно празднующих веселия сподобляющая; радуйся, с Сыном Твоим во славе Его нас спосадити Отца умоляющая. Радуйся, Пречистая Дево, Материю Спасителя мира от века предъизбранная.

Кондак 13-й

Всепетая и Пречистая Мати, приими сие хвалебное пение наше, в честь преславнаго Рождества Твоего приносимое, возроди в нас желание благ вечных, и избави Церковь Святую и отечество наше от всяких бед и напастей, от врагов видимых и невидимых, и будущия изми нас муки, и Небеснаго сподоби Царствия, да во веки веков Тебе вопием к Богу: Аллилуиа.

(Этот кондак читается трижды, затем Икос 1-й и Кондак 1-й)

Молитва

О Пресвятая Владычице Богородице! Призри с благосердием на моление нас грешных и смиренных рабов Твоих и умоли Бога Сына Твоего да низпослет нам и всем притекающим к Тебе здравие душевное и телесное, и вся к вечней и временней жизни потребная, да простит нам всякая согрешения вольная и невольная, да избавит нас от всяких скорбей и болезней, и напастей, и всякаго злаго обстояния. Ей, Царице наша, Преблагая, Надеждо наша несокрушимая и Заступнице необоримая! Не отврати лица Твоего от нас за множество прегрешений наших, но простри нам руце Матерняго милосердия Твоего и сотвори с нами знамение во благо. Яви нам богатую помощь Твою и благопоспешение во всяком деле блазе, от всякаго же начинания греховнаго и помышления лукаваго отврати нас, да всегда славим пречестное имя Твое и, благодарне Рождеству Твоему покланяющеся, величаем Бога Отца, и Единороднаго Сына Его, Господа нашего Иисуса Христа, и Святаго Духа, со всеми святыми, во веки веков. Аминь.

Кондак 1-й

Приидите, христоименитии людие, составим похвалу Честному Кресту, на немже Христос, Царь Славы, руце распростер, возведе нас на первое блаженство, из негоже низпадохом прелестию змиевою. Ты же, о Пресвятый Кресте, яко имеяй присущую тебе силу Распятаго Христа, спасай и сохраняй от всяких бед любовно зовущия ти: Радуйся, Честный Кресте, всерадостное знамение нашего искупления.

Икос 1-й

Ангелов лицы, яко Божии служителие, Крест обстояще, вольную страсть Христа Жизнодавца прославляют. Мы же страданьми Того вечныя смерти избавльшеся, подражая горним Силам, радостно взываем: Радуйся, Кресте, яко на тебе Христос Бог наш, волею руце распростер, спасение наше содела; радуйся, яко распростершимся на тебе Христом преступление Адама и Евы, простерших руце ко древу запрещенному, упразднися. Радуйся, яко воздвижену бывшу на тебе, аки преступну, Законодавцу, древняя клятва, яже на нас бывшая, потребися; радуйся, яко содеявшимся на тебе, странным таинством род человеческий от тли смертныя свободися. Радуйся, яко Пострадавшим и Умершим на тебе жало смерти сокрушися; радуйся, того ради страданиями Бог с человеки примирися. Радуйся, Честный Кресте, всерадостное знамение нашего искупления.

Кондак 2-й

Видя падших человеков, Господи, Ты вочеловечився, крест и смерть вольно плотию претерпел еси за род наш, да от смерти вечныя избавиши исповедающия Тя, Сына Божия и вопиющия Ти: Аллилуиа.

Икос 2-й

Разум человечь изнемогает в постижении велия тайны Твоего, Христе, воплощения и вольнаго за ны страдания: како Ты, Бог сый безстрастный, страсть крестную, яко человек, претерпел еси и сие орудие смерти Твоея соделал еси источником жизни и спасения всем благочестно в Тя верующим и хвалебно воспевающим: Радуйся, Кресте, на немже содеяся таинство, от века предопределенное; радуйся, яко на тебе совершися наше искупление, многообразне во образех и сенех предъявленное. Радуйся, яко умерый на тебе Жизнодавец, Кровь и воду источи, имиже грехи наша омываются; радуйся, яко каплями Святейшей Крове Его греховныя струпы душ наших очищаются. Радуйся, Кресте, якоже древо животное, еже есть посреде рая Божия, христианом вожделенный; радуйся, плодами безсмертия умно нас питающий и надеждою жизни вечныя малодушие наше ободряющий. Радуйся, Честный Кресте, всерадостное знамение нашего искупления.

Кондак 3-й

Крест Твой, аще и древо видимо есть существом, но Божественною одеяно есть силою, и чувственное миро выявляемо, умно наше чудотворит спасение, подвизая пети Тебе: Аллилуиа.

Икос 3-й

Имуще пред очима нашима Крест Пресвятый, святолепным поклонением той почитаем распеншагося ради на нем Спаса Христа, и, лобызая, взываем: Радуйся, Кресте, прославленный послушанием и страданием Христовым; радуйся, возвеличенный возвышением на тебе Сына Божия, Иже весь мир от падения Адамля воздвиже. Радуйся, яко сбывшагося на тебе ужаснаго таинства земли ужасеся и вострепета, аки бы хотящи поглотити законопреступныя; радуйся, яко заклавшуюся на тебе Агнцу Божию завеса храма раздрася и жертва ветхозаветная упразднися. Радуйся, Кресте, яко распадшуюся под тобою камню, каменносердечнии роди еврейстии неверием от Бога отпадоша, благодати же священства и царства лишишася; радуйся, яко омрачившуся солнцу в страсти Христовой нощь многобожия прейде и свет веры возсия. Радуйся, Честный Кресте, всерадостное знамение нашего искупления.

Кондак 4-й

Бурею злобы дышуще и завистию движими, первосвященницы иудейстии скрыта в землю Крест Твой, Христе Боже, да не будет обличением безумие их; но той, яко сокровище драгое, из недр земли возсия, тщанием благочестивыя царицы Елены обретенный и на радость всему миру явленный, с богокрасною песнию: Аллилуиа.

Икос 4-й

Видевше тогда христианстии людие Честнаго Креста обретение, прославляху распеншагося на нем Христа Бога: Господи, помилуй, взывающе. Мы же ныне, подражающе им, прославляем Крест Его Святый хваленьми сицевыми: Радуйся, Кресте, в землю сокровенный и оскверненное грехами наше естество земное освятивый; радуйся, явлением своим из недр земных хулителей воплощения и Божества Христова посрамивый. Радуйся, яко Пострадавый на тебе плотию прия всяку власть на небеси и на земли, да всех и вся к Богу Отцу приведет; радуйся, яко Умерый на тебе яко человек силою Божества Своего сокруши заклепы ада и изведе оттуда души праведных. Радуйся, Кресте, яко разбойник благоразумный, Христу сраспявыйся, Того исповедавый, тобою, аки лествицею, на небеса взыде; радуйся, яко и всех отсечением страстей Христу сраспинающихся возводиши в Царствие Небесное. Радуйся, Честный Кресте, всерадостное знамение нашего искупления.

Кондак 5-й

Господи, при Моисее иногда пророце точию образ Креста Твоего являем побеждаше врази Твоя, ныне же самый Крест Твой имуще, помощи просим: укрепи Церковь Твою и даруй ей победы на враги, да расточатся вси врази Твои, не вопиющии Ти: Аллилуиа.

Икос 5-й

Честнаго Креста, Христе, действо прообразив Амалика в пустыне Синайстей: егда бо простираше руце, креста образ творя, укрепляхуся людие; ныне же все вещей сбытие в нас исполнися: днесь крест воздвизается, и демони бегают, днесь тварь вся от тли свободися, яко вся Креста ради возсияши нам дарования. Темже, радующеся, вопием: Радуйся, Кресте, оружие Христово страшное, егоже демони трепещут; радуйся, яко силою на тебе Распятаго Христа бесовстии полчища далече прогоняются. Радуйся, яко силою действующия в тебе Божественныя благодати победы на сопротивныя христолюбивым людем даруются; радуйся, яко от тебе, яко высокоросленнаго и многоплодовитаго древа Христова на тебе страдания, плоды жизни и спасения нам произрастают. Радуйся, Честный Кресте, всерадостное знамение нашего искупления.

Кондак 6-й

Проповедником силы и Божества Христова явися иногда животворящее древо Крестное, егда прикосновением своим воскреси мертваго и к жизни возведе его, еже видевше, мнози от иудей и язычников познаша велию благочестия тайну: яко спасения ради человеческаго, Бог во плоти явился и страсть крестную претерпе, да спасет вопиющия Ему: Аллилуиа.

Икос 6-й

Якоже древо райское превелие, возвысися на Голгофе Честный Крест Христов, отонудуже во всю вселенную распростре мысленный ветви благодати и Распеншагося на нем: под егоже сению обретают прохладу палимии зноем страстей и хотящий благочестно жити о Христе Иисусе. Темже и мы, благодати Того причастницы, весело взываем: Радуйся, святый Кресте, древом жизни, Адама ради в Едеме насажденным, преображенный; радуйся, новым Адамом, руце на тебе распростершим, миру явленный. Радуйся, яко под сень благодатнаго защищения твоего вси вернии прибегают; радуйся, яко милосердием Даровавшаго нам тебе кающийся грешницы огня геенскаго избегают. Радуйся, Кресте, утешение наше в скорбех и печалех; радуйся, живительная отрадо и помощь изнемогающим в борьбе с прилогами страстей, мира и диавола. Радуйся, Честный Кресте, всерадостное знамение нашего искупления.

Кондак 7-й

Хотя явити роду человеческому благости и милосердия Своего неизследимую пучину, Крест Твой, Господи, дал еси нам тверда блюстителя и прогонителя демонов. Темже вси мы, иже в Тя верующии, прославляем величие страсти Твоея, благодарно поюще Тебе: Аллилуиа.

Икос 7-й

Дивны дела явил еси, Господи, Крестом Твоим Честным: распеншуся бо Ти на том плотию, вся тварь изменися: солнце лучи своя сокры, основания земли восколебахуся, ад сокрушися державою власти Твоея и изведе юзники, яже от века содержал есть. Сего ради увязаем той сими песненными цветы: Радуйся, Кресте, яко пострадавшему на Тебе вся тварь сострадаше, яко Творцу своему и Владыце; радуйся, яко силу Того и Божество свидетельствоваху солнце помрачением и земля колебанием. Радуйся, яко Умерый на тебе не удержан бысть в мертвых, но, разрушив державу смерти, в третий день воскресе; радуйся, яко воскресшу Тому проповедь евангельская, от лика апостольскаго наченшаяся, во вся концы земли изыде. Радуйся, Кресте, яко тобою кумирослужение и многобожие языческое упразднися; радуйся, яко тебе ради правая вера во Единаго Бога, в Троице славимаго, по всей земли утвердися. Радуйся, Честный Кресте, всерадостное знамение нашего искупления.

Кондак 8-й

Странно Бога вочеловечшася и на Кресте распята бывша мысленно видяще, устранимся суетнаго мира, ум на Небеса преложше. Сего ради Бог на землю сниде и на Крест взыде, да тем, аки лествицею, на небеса возведет вопиющия Ему: Аллилуиа.

Икос 8-й

Днесь Адам со Евою веселится, предлежащий видяще Крест, имже поражен бысть супостат, иже древле в раи вкушением запрещеннаго плода тех прельстивый и пленники себе сотворивый. Темже и мы, срадующеся праотцем нашим о избавлении от пленения нашего душевнаго, благоговейно воспеваем: Радуйся, Кресте, яко на тебе Пастырь добрый душу Свою положи за овцы Своя и даже до ада сниде, ища заблудших; радуйся, яко Той не презре дело руку Своею, Адама со Евою, но со инеми праведники исхити я из ада, яко из челюстей зверя крепкаго, и в рай всели их. Радуйся, яко на тебе пригвожденному Христу пламенное оружие плещи даде и Херувим, Едем хранящий, отступи от Древа Жизни; радуйся, яко мы, ныне крещением возрожденнии, во Христе новые людие, невозбранно причащаемся райския пищи. Радуйся, Кресте, жезле силы Христовы, от Сиона посланный, имже мы пасемся на пажитех евангельских учений; радуйся, яко тобою невредими сохраняемся от волков душегубных, яко львове рыкающих и ищущих, кого поглотити. Радуйся, Честный Кресте, всерадостное знамение нашего искупления.

Кондак 9-й

Всяких бед и козней вражиих избави ны, Кресте треблаженный, яко приемый благодать и силу от пригвожденнаго на тебе Христа, Емуже яко Богу и Избавителю нашему благодарственно и хвалебно поем: Аллилуиа.

Икос 9-й

Витийство всякое земнородных не довлеет к прославлению Креста Твоего, Господи, на немже спасение наше соделал еси; темже, недоумевающе восхвалити той по достоянию, взываем сице: Радуйся, Кресте, яко вознесенный на тебе Спас мира мнози люди в познание Свое призва и до ныне призывает; радуйся, яко возсиявый на тебе, аки на свещнице, Свет истинный вся концы земли светом боговедения озаряет. Радуйся, яко ныне Восток и Запад Пострадавшаго на тебе прославляют; радуйся, яко и тя, яко подножие Христово, вси вернии, возносяще, прославляют. Радуйся, яко от тебе, яко от неизсякаемаго источника, христоименитии людие обилие благ вечных почерпают. Радуйся, Честный Кресте, всерадостное знамение нашего искупления.

Кондак 10-й

Спастися хотящим нам и под сень защищения твоего прибегающим, буди помощник, пресвятый Кресте, сохраняя ны от всех зол силою на тебе Распятаго Христа, Емуже яко Богу и Избавителю нашему благодарственно и хвалебно поем: Аллилуиа.

Икос 10-й

Стена еси, ограждающая нас от бед и напастей, Кресте Всечестный, и столп крепкий противу лица вражия, к немуже невидимии борителие приступити не смеют, боящеся взирати на силу Твою. Сего ради с верою ограждаемся святым твоим знамением и весело воспеваем: Радуйся, Пречестный Кресте Христов, от нападения духов злобы нас защищаяй; радуйся, от различных стрел их невредимы ны сохраняяй. Радуйся, яко от знамения твоего, с верою благочестно творимаго, вся силы ада, яко дым от ветра, исчезают; радуйся, яко тобою вся крепость их, яко воск от лица огня, истаивает. Радуйся, яко святии мученицы, знамением твоим ограждашеся и имя Христово призвавше, всякий вид мучений мужественно претерпеша; радуйся, яко преподобнии отцы помощию силы Божества, знамению твоему присущия, бесовская страхования и страстей возстания победиша. Радуйся, Честный Кресте, всерадостное знамение нашего искупления.

Кондак 11-й

Пение всеумиленное приносим Ти, Всечестный Кресте, и смиренно молимся распятому на тебе Христу Богу нашему, Иже дарова нам тебе во отраду и утешение в скорбех, да страстию Своею избавит нас от страстей душевредных и научит благоверно воспевати Ему: Аллилуиа.

Икос 11-й

Светом благодати Божия, таинственне ти присущия, просвети наша душевная чувствия, Кресте Пресвятый, да тою озаряеми и наставляеми, не поткнемся о камень соблазна, но да возможем путем заповедей Божиих правошествовати во всей жизни нашей, воспевающе ти сице: Радуйся, непрестающих чудес Христовых вестниче и милосердия Его к роду человеческому проповедниче; радуйся. Кресте, рода человеча обновление и Новаго Завета Христова печать и утверждение. Радуйся, торжество веры христианския и благонадежный якорю упования нашего; радуйся, святых храмов Божиих украшение и домов благочестивых ограждение. Радуйся, полей и вертоградов благословение; радуйся всех стихий освящение. Радуйся, Честный Кресте, всерадостное знамение нашего искупления.

Кондак 12-й

Благодать Твою всемощную подаждь нам, Господи, да последуем Тебе, Владыце нашему, вземше крест наш, не гвоздьми пригвождающеся тому, но трудами, воздержанием и смирением. Да тако причастницы будем страданий Твоих, от нихже истекают потоцы жизни вечныя, напаяющия вся правоверныя, благочестно поющия Ти: Аллилуиа.

Икос 12-й

Поюще величие твое, всечестный Кресте, восхваляем тя вси, яко победоносный скипетр Царя Небеснаго, нашего же спасения всерадостное знамение, темже и вопием: Радуйся, Кресте, православных христиан державо и несокрушимое их ограждение; радуйся, святителей украшение и всех подвижников веры и благочестия сила и подкрепление. Радуйся, Кресте, от колыбели и до гроба на всех путех жизни нас ограждаяй и по смерти на воздушных мытарствах от духов злобы нас защищаяй; радуйся, яко под знамением твоим почивающии, умершии в вере и благочестии, в последний день воскреснут в жизнь вечную. Радуйся, Кресте, явлением своим на Небеси предварити имый славное второе пришествие Христово; радуйся, яко распеншии Христа и вси невернии узрят тя тогда и горце возрыдают, любящии же Господа, зряще тя, вельми возрадуются. Радуйся, Честный Кресте, всерадостное знамение нашего искупления.

Кондак 13-й

О Пречестный и Животворящий Кресте Господень, всех христиан утешение! Тя ныне предлежаща видяще, возводимся мыслию к распятому на тебе Христу, Емуже и молимся смиренно, да тебе ради помилует нас, грешных, и сподобит в селениих райских воспевати Ему: Аллилуиа.

(Этот кондак читается трижды, затем Икос 1-й и Кондак 1-й)

Молитва

О Пречестный и Животворящий Кресте Господень! Древле убо был еси казни позорныя орудие, ныне же знамение спасения нашего присно почитаемое и прославляемое! Како достойне возмогу аз, недостойный, воспети тя и како дерзну преклонити колена сердца моего пред Искупителем моим, исповедая грехи свои? Но милосердие и неизреченное человеколюбие Распеншегося на тебе смиренное Дерзновение подает ми, да отверзу уста моя, во еже славити тя; сего ради вопию ти: радуйся, Кресте, Церкве Христовы красота и основание, всея вселенныя утверждение, христиан всех упование, царей держава, верных прибежище, Ангелов слава и воспевание, демонов страх, губительство и отгнание, нечестивых и неверных посрамление, праведных услаждение, обремененных ослаба, обуреваемых пристанище, заблудших наставниче, одержимых страстьми раскаяние, нищих обогащение, плавающих кормчий, слабых сила, во бранех победа и одоление, сирых верное покровение, вдов заступниче, дев целомудрия охранение, ненадеянных надежда, недужных врач и мертвых воскресение! Ты, прообразованный чудотворящим жезлом Моисея, животворный источник, напаяющий жаждущия духовныя жизни и услаждающий наши скорби; ты – одр, на немже царственно почил тридневно Воскресший Победитель ада. Сего ради и утро, и в вечер, и полудне прославляю тя, треблаженное Древо и молю волею Распеншегося на тебе, да просветит Он и укрепит Тобою ум мой, да открыет в сердце моем источник любве совершенней и вся деяния моя и путие мои тобою осенит, да выну величаю Пригвожденнаго на тебе, грех моих ради, Господа Спасителя моего, аминь.

Кондак 1-й

Избранней Предвечным Царем Богоотроковице Марии, Ангелов и человеков Царице, пришедшей иногда в храм Господень во Святая Святых на обручение девства Своего Жениху Небесному воспитатеся в Божие Жилище, достойное поклонение усердно Тебе приносим, Ты же яко многомощная Заступница наша, от всяких нас бед и скорбей свободи, да с любовию и умилением Тебе вопием: Радуйся, Богоизбранная Отроковице, вхождением во храм двери райския нам отверзающая.

Икос 1-й

Архангелов и Ангелов лики от небесных высот стекошася видети преславное Твое, о Богомати, во храм Господень Введение и вкупе с земным ликом чистых дев невидимый лик безплотных умов с веселием идяше, Тя, Пречистая Дево, провождающе, и яко сосуд избранный Богу повелением Господним, окружающе, и яко Госпоже своей служаще, аще не видесте тайны Твоея силу, видяще же Тя небесныя чистоты неизреченно исполнену, и вся бывшая о Тебе зряще, ужасахуся и со страхом многим воспеша Тебе тако: Радуйся, прерадованная Дево, Мати Царева имущая быти; радуйся, предпочтенная Царице, в храм Царев грядущая жити. Радуйся, Бога Отца Дщерь избранная и превознесенная; радуйся, Бога Сына Матерь от века предреченная. Радуйся, Богу Духу Всесвятому Невесто неискусобрачная; радуйся, всея Твари видимыя и невидимыя Владычица превожделенная. Радуйся, Богоизбранная Отроковице, вхождением во храм двери райския нам отверзающая.

Кондак 2-й

Видяще праведнии родители Твоя, Пресвятая Дево, яко три лета исполнишася от рождества Твоего, восхотеста совершити делом обетование свое, еже первее словесы изрекоша, да принесут Тя в дар Богу. Сего ради созваша в Назарет вся сродники своя от царскаго и архиерейского рода, и священники многия, пригласиша же и лик чистых дев, да со свещи горящими провождают Тя, яко же предрече Писание: «приведутся Царю девы в след Ея, искренния Ея приведутся Тебе, приведутся в веселии и радовании, введутся в храм Царев». И тако совокупльшеся вси и помолившеся о Тебе Богу, воспеша Ему: Аллилуиа.

Икос 2-й

Разум Небесный открывая, Богоотроковице, благоволила еси, яко да не в нищетных рубищах предстанеши ко храму Царю Небесному, сего ради преодеяна была еси со славою и красотою многою, да исполнится на Тебе Давида праотца Твоего предречение: Предста Царица одесную Тебе, в ризах позлащенных одеяна, преиспещрена. Егда же, яко Невеста Божия преукрашена была еси и вся ко всечестному Введению Твоему достойна устроишася, поведоста Тя родителя Твоя, яко трехлетнюю агницу во Иерусалим, воспевше Тебе тако: Радуйся, преодеянная в рясны златыя девства и чистоты; радуйся, преукрашенная во вся доброты небесныя красоты. Радуйся, Дщи Царева всю славу девственную внутрь Себе имущая; радуйся, Невесто Божия, предстати одесную Небесному Жениху грядущая. Радуйся, одушевленный Кивоте Божий, посреде дев тимпанниц шествия своя устрояяй; радуйся, пречистый Храм Спасов, ко храму законному пути Своя направляяй. Радуйся, Богоизбранная Отроковице, вхождением во храм двери райския нам отверзающая.

Кондак 3-й

Сила Вышняго осени Тя и Дух Святый найде на Тя, и бысть Предводитель Твой, егда по триех днех пути достигла еси града Иерусалима, и яко Кивот Божий ведома была еси ко храму Господню, Богородице Дево, да сбудется слово псаломское, еже глаголет: Видена быша шествия Твоя, Боже, шествия Бога моего Царя, Иже во Святем. И тако за премногую небесную чистоту Твою, храм Божий удостоилася еси быти, да паки исполнится на Тебе другое Писание, еже глаголет: Освятил еси Селение Свое, Вышний, Свят храм Твой, Господи, дивен в правде. Сего ради да воспоим вси Богу: Аллилуиа.

Икос 3-й

Имуще леты три, Пресвятая Дево, приведена была еси ко храму, святыя же родители Твоя, ов от единыя страны, ова же от другия, вземше за руки Тя, Богодарованную им Дщерь свою, кротко и честно ведоша Тя ко храму, глаголюще: Начните Девы свещеносныя, предшествуйте Богоотроковице. Все же множество сродник и соседов знаемых и священник с веселием последоваху, свещы в руках держаще и окружающе Тя, якоже звезды луну светлую. Стечеся же и весь Иерусалим, новое сие превождение со удивлением зряще, Отроковицу трехлетнюю толикою славою облачаемую и таковым светоношением почитаемую и воспеша Тебе таковая: Радуйся, трилетствующая телом, неба небеси ширшая; радуйся, многолетствующая духом, горних сил превысшая. Радуйся, Агнице Непорочная, девство Свое Богу в жертву чисту принесшая; радуйся, Голубице Нескверная, чистотою Своею Ангелы удивившая. Радуйся, с девственными лики ко Господу приведенная; радуйся, с горящими светильники ко храму препровожденная. Радуйся, Богоизбранная Отроковице, вхождением во храм двери райския нам отверзающая.

Кондак 4-й

Бурю внутрь имея помышлений сумнительных, первосвященник Захария смятеся, зря Твое, Пречистая, ко храму Господню со славою многою превождение и ко вратом на востоки зрящим затворенным сущим, приближение. Егда же воспомяну Иезекииля предречение древнее: Врата сия затворена будут и никтоже пройдет сквозе их, яко Господь Бог пройдет ими, и будут заключена, исполнися Духа Святаго и откровение свыше получив, да отверзет приведенной Богоотроковице заключенная врата, возопи Богу: Аллилуиа.

Икос 4-й

Слыши, Дщи, и виждь, и приклони ухо Твое, и забуди люди Твоя и дом отца Твоего, и возжелает Царь доброты Твоея. Тако глаголаху Тебе, Пресвятая Дево, родители Твоя, егда приведена была еси ко храму Господню. Священницы же, службы совершающия, видеша пришествие Твое, изыдоша во сретение славному введению Твоему, и с песньми прияша Тя, яко Матерь имущую быти Архиерея Великаго небеса Прошедшаго, глаголюще: Радуйся, благоволения Божия предображение, пророки предвозвещенная; радуйся, человеков спасения проповедание, нам ныне явленная. Радуйся, Ангелы небесными со славою провождаемая; радуйся, иереи Божиими с радостию сретаемая. Радуйся, дом Отца Твоего и люди Твоя оставльшая; радуйся, дом Божий явлением Своим освятившая. Радуйся, Богоизбранная Отроковице, вхождением во храм двери райския нам отверзающая.

Кондак 5-й

Боговместимый храм бывши, Богородице Дево, ко храму законному со славою многою провождена была еси, да исполнится Аггея пророка предречение: И исполню храм сей славою, зане велия будет слава храма сего последняго паче перваго, глаголет Господь Вседержитель. Мати же Твоя приведе Тя к церковному входу, глаголющи: Гряди, Дши, ко Иже Тебе мне Даровавшему. Гряди, Кивоте освящения, к благоутробному Владыце. Гряди, Двере Жизни, к Милосердому Дателю. Гряди, Кивоте Слова, ко храму Господню. Вниди в Церковь Господню, мира радосте и веселие, да воспою о Тебе Богу: Аллилуиа.

Икос 5-й

Видевши Мати Твоя, Богородице Дево, иереи Божии из храма изшедшия, и святителя великаго Захарию, во сретение Твое грядущаго, рече к нему: Приими, Захарие, Сень Нескверную; приими, священниче, Непорочный Ковчег; приими, пророче, Кадильницу невещественнаго Угля; приими, праведниче, Кадило Духовное. Приими, о пророче, Богом дарованную Дщерь мою и введи в храм Зиждителя твоего, и введ, насади Ю в горе святыни, в готовом жилище Божием, ничтоже испытуя, Тоя бо ради будет избавление, с Нею же и мы возопием Тебе таковая: Радуйся, небесныя лики возвеселившая Твоим вхождением; радуйся, иереи Божии обрадовавшая Твоим явлением. Радуйся, Селение Небесное, храм законный паче перваго освятившая благодатию; радуйся, небо земное, Сама Себе в жилище Христово приуготовившая чистотою. Радуйся, Невесто Божия, яко велико и дивно предшествие Твое; радуйся, Дево Чистая, яко страшно и преславно во храме обитание Твое. Радуйся, Богоизбранная Отроковице, вхождением во храм двери райския нам отверзающая.

Кондак 6-й

Проповедник вхождения Твоего во храм Господень праведный Захария удивися зело, видев Твое, Богородице Дево, по лествице церковней, пятнадесять степень имущей, дивное восхождение: поставлена бывши родители Твоими на первом степени, Сама взошла еси на высочайший степень, укрепляема невидимою силою Божиею. Святый же Захария, видев сие, объят бе Духом Святым, рече матери Твоей: благословен Плод чрева твоего, о жено, Жизни бо Матерь истинную вводиши: како храм вместит Ю?» Темже благодаряще Бога, воспел Ему: Аллилуиа.

Икос 6-й

Возсия радость велия всем, храму законному предстоящим, егда святитель великий Захария, Духа Святаго исполненный, прият Тя, о Богомати, пред враты церковныя, рукама своима держа и вводя Тя во Святая Святых, глаголаше тако: о Отроковице Нескверная! О Дево Неблазная! О Девице Прекрасная! О женам украшение! О дщерям удобрение! Ты Благословенна в женах, Ты препрославлена чистотою, Ты запечатленна девством, Ты Адамовы клятвы разрешение. Гряди, исполнение моего пророчества. Гряди, совершение обетований Господних. Гряди, печате Того завета. Гряди, изъявление Того совета. Гряди, исполнение Того таинств. Гряди, пророков всех зерцало. Гряди, обновление обветшавших. Гряди, свете во тьме лежащих. Гряди, дарование новейшее и Божественнейшее. Вниди в радость, в Церковь Господа Твоего, ныне убо в дольнюю, человеки входную, не по мнозе же в горнюю и неприступную. С ним же и мы воспоем Тебе сице: Радуйся, Лествице одушевленная, ко храму Господню по степенем лествицы высокия востекшая; радуйся, Двере, непроходимая человеческими помыслы, во двери храма вошедшая. Радуйся, яко по степенем добродетелей возвысилася еси до высоты Небеснаго Алтаря; радуйся, яко на крылех девства и чистоты достигла еси града Великаго Царя. Радуйся, Дом Божий на версе горы достигшая; радуйся, врата заключенная прошедшая. Радуйся, Богоизбранная Отроковице, вхождением во храм двери райския нам отверзающая.

Кондак 7-й

Хотя Человеколюбец Господь спасти род человечь, избра Тебе едину в Матерь Себе и введе Тя во святый храм Свой, да тамо в уединении и тишине глубоцей далече от соблазнов мира сего воспитаешися во святыне Господней в Божие жилище. Ты же, играющи и зело радующися, яко в чертозе, в дому Господни шествовала еси, аще и мала была еси возрастом, триех лет сущи, обаче совершенна была еси благодатию, яко предуведенная и предызбранная от Бога прежде сложения мира, и тамо воспевала еси Ему: Аллилуиа.

Икос 7-й

Новая, дивная и ужасная сотвори о Тебе Господь, Богоблагодатная, егда святитель великий Захария, по таинственному откровению Божию, введе Тя, паче закона, во внутреннюю скинию, идеже не точию женскому полу, но ниже священником подобаше входити, но токмо архиерееви единою в лето. Подобаше бо Тебе, яко одушевленному Божию кивоту, паче всякаго естества преисполненней чистоты, стати на месте кивота Божия, Иеремием сокровеннаго, да исполнится паки славою храм Господень. Сие пречудное вхождение Твое зряще, вопием Тебе таковая: Радуйся, во Святое Святых, яко на небо земное взошедшая; радуйся, Святаго Святых большая, яко к Престолу Божию представшая. Радуйся, Ангелы удивившая, како во Святое Святых преславно взошла еси; радуйся, человеки возвеселившая, яко храм Господень славою исполнила еси. Радуйся, Чертоже Краснейший, в немже жилище Святыя Троицы содевает Пресущественный; радуйся, Престоле Святейший, на негоже готовится взыти плотию Пребожественный. Радуйся, Богоизбранная Отроковице, вхождением во храм двери райския нам отверзающая.

Кондак 8-й

Странно Твое зачатие и рождество. Странен образ возростания Твоего. Странно и преславно, Богоневесто, Твое еже внутрь Святилища Введение, и на молитве пребывание присное, и вся, яже суть Твоя: от утра бо даже до третьяго часа стояла еси по вся дни на молитве внутрь Святилища, посем с прочими девы в притворе в рукоделии упражнялася еси, от девятаго же часа паки в храме во Святая Святых предстояла еси Богу на молитве, в Богомыслии и в поучении Божественных Писаний, дондеже Ангел Господень явльшеся препитати Тя небесною пищею. Таковому равноангельскому житию Твоему чудящеся, вопием тако благоволившему о тебе Богу: Аллилуиа.

Икос 8-й

Всю Тебе освяти Всесвятый Дух, внутрь храма пребывающую, Пресвятая Дево. Сего ради да не коснется Ти ничто от земныя скверны, небесною и нетленною питаема была еси пищею, подаваемую же земную пищу раздавала еси нищим и странным. И тако приемлющи по вся дни от Ангела хлеб небесный, преуспевала еси мудростию и благодатию, телом и духом радующися, да невместимое Слово Божие непорочно вместиши. И бе Архангел Гавриил неотступный хранитель девственныя чистоты Твоея и со иными Ангелы Божиими часто Тебе являшеся, укрепляше Тя в подвизех духовных, в молитве и посте, в кротости и смирении и любезно беседоваше с Тобою, Превечный Совет Вышняго о Тебе раскрывая, да будеши готова к приятию Божию, вопия к Тебе таковая: Радуйся, неизреченных таин Божиих предивное исполнение; радуйся, Предвечнаго Совета Вышняго всечудное совершение. Радуйся, небесным хлебом от Ангела неизреченно воспитанная; радуйся, благодатию Божией с небесе несказанно укрепленная. Радуйся, Юже во Святое Святых сретают многоочитии Херувими; радуйся, с Неюже непрестанно собеседуют шестокрылатии Серафими. Радуйся, Богоизбранная Отроковице, вхождением во храм двери райския нам отверзающая.

Кондак 9-й

Всякое естество Ангельское удивися о превелицей красоте девства Твоего, Всесвятая Дево. Ты бо со Ангелы во Святом Святых пребывающи, Сама вожделела еси в чистоте ангельской пожити. Сего ради обручилася еси присному служению Богови и уневестилася еси Ему, да Духом Святым приуготована будеши в нетленное селение Слову Божию, поющи Ему день и нощь: Аллилуиа.

Икос 9-й

Витии богоглаголивыя не могут изрещи тайну девственнаго жития Твоего, Богородице. Ты бо день от дне укрепляшеся духом и растяше, с трудолюбием умножала еси молитву, дондеже Сила Вышняго осени Тя. Сего ради со удивлением зовем Тебе таковая: Радуйся, Святая Святых Святейшая Дево, в жертву чистую девство Свое Богу принесшая; радуйся, чистейшая Святаго Духа Палато, в Жилище Христово Себе воспитавшая. Радуйся, Двери Небесная, в храме, яко на небеси пребывшая; радуйся, Горо усыренная Духом, во Святилище всеми добродетельми процветшая. Радуйся, Юже Ангели Божии дориносят верно; радуйся, Юже вси вернии благодарственно славословят присно. Радуйся, Богоизбранная Отроковице, вхождением во храм двери райския нам отверзающая.

Кондак 10-й

Спасения нашего весна радостная возсия всем концем земли, преславнаго бо ради Твоего Введения во храм, Богородице. Писание мимоиде и оскуде закон вшедшей Тебе во храм Божий, Дево Чистая. Сего ради да радуются небо и земля, Небо Умное зряще, и Ангелов чини, и человеков множество да вопиют Богу: Аллилуиа.

Икос 10-й

Стена еси девам во обителех подвизающимся, Богородице, Ты бо девство дивно сохранила еси и достигши двунадесяти лет, егда прочия девы, при храме живущия, по закону супружеству сочетовахуся, отдана была еси на хранение девства старцу Иосифу, возлетением голубицы от жезла его Богом указанному. И тако во всецелую доброту девства облекшися, яко Невеста Божия, подаеши смирение и неизглаголанную чистоту, да вси Тобою спасаемии благодарно воспевают Тебе сице: Радуйся, в молитвах во храме Господнем неусыпающая, не даждь нам во грехе уснути; радуйся, в безмолвии во Святая Святых пребывающая, сподоби нас в тишине животней пожити. Радуйся, со Ангелы во Святилище присно собеседнице, научи нас безплотных глаголам внимати; радуйся, с чистыми девы при храме сожительнице, помози нам в девстве и чистоте житие свое совершати. Радуйся, одушевленный Храм Бога Живаго, храмы Духа Святаго нас сотвори; радуйся, Чертоже Вседрагий всякаго доброделания, во всех дарах Духа Святаго нас утверди. Радуйся, Богоизбранная Отроковице, вхождением во храм двери райския нам отверзающая.

Кондак 11-й

Пения всеумиленныя приношаху Тебе, Пресвятая Дево, святии Ангели, девическому Введению Твоему служаще, небеснии припеваху гласы. С ними же на земли от песней человеческих девственнии лицы Господеви поют, чтуще Тебе, Матерь Божию. С ними же и нас сподоби чистыми усты и нескверными умы воспети Богови о честнем Введении Твоем: Аллилуиа.

Икос 11-й

Светоприемная нам возсияла еси свеща, Богородице Дево, во храм Господень пришедши. Отонудуже и облистала еси небесною чистотою всему миру, во тьме греховней пребывающу: да и мы со свещеносными девами узрим Тя радостно, во свете чистоты душевныя и телесныя сияющу, и воспоем Тебе похвалы сицевая: Радуйся, Свеще неугасимая, во Святилище возженная, свещеносными девами провождаемая; радуйся, Заре незаходимая, весь мир облиставшая, светлыми Ангелы во храме сретаемая. Радуйся, Светильниче небесныя славы, Свете нелестный, во храме всем возсиявший; радуйся, Чертоже Божия благодати, Хлебе словесный из руки Ангела приявший. Радуйся, Мати Света грядущая быти, светом чистоты Твоея всех просвещающая; радуйся, Мати Света Тихаго Сияние, теплотою молитв Твоих всех утешающая. Радуйся, Богоизбранная Отроковице, вхождением во храм двери райския нам отверзающая.

Кондак 12-й

Благодати Божия новый и одушевленный Кивот сущи, Богородице Дево, в немже вместо манны чувственныя и вещественных скрижалей вмещаются невещественныя неистощимыя дарования Божия, достойно введена была еси во Святая Святых, яко вместити имущая плотски Безначальное Слово. Таможе Силы небесныя служаху Тебе: страшнии Херувими и пламенеющии любовию Серафими осениша Тя крылами своими, Престоли и Господствия, Начала, Силы и Власти припадоша к Тебе со Архангелы и Ангелы, вопиюще о Тебе Богу: Аллилуиа.

Икос 12-й

Поюще пречестное Твое во храм Господень Введение, хвалим вси Твое пречудное во Святая Святых со Ангелы спребывание и небесным хлебом питание, поклоняемся равноангельской девственной чистоте Твоей, Богородице, и веруем, яко пришла еси от земнаго дома в Дом Божий, яко жертва чистая, яко дар освящен на обручение девства Твоего Жениху Небесному, да уготоваешися достойно к нетленному Рождеству Христову. Темже тако верующе, возглаголем Тебе сице: Радуйся, храм Господень Пречистых ног Твоих стопами освятившая; радуйся, жилище Божие от осквернения грешных отмывшая. Радуйся, во Святом храме, яко на небеси, поклонение Горних Сил приемшая; радуйся, во Святая Святых, яко на небеси, Престолу Божию представшая. Радуйся, Прекрасная Девице, изшествием Твоим из дому отчаго во храм мир всему миру принесшая; радуйся, Новая Голубице, вхождением во храм праведным в преисподней надежду впервые даровавшая. Радуйся, Богоизбранная Отроковице, вхождением во храм двери райския нам отверзающая.

Кондак 13-й

О Всепетая Богоотроковице Дево, нынешнее наше о всечестнем Введении Твоем приемши приношение, избави нас от всякия скорби и напасти, очисти ны от всякия скверны плоти и духа, и сохрани до скончания нашего в целомудрии и чистоте, яко да сподобимся Тобою вхождения во обители райския, идеже воспоем о Тебе Богу: Аллилуиа.

(Этот кондак читается трижды, затем Икос 1-й и Кондак 1-й)

Молитва

О Пресвятая Дево, Царице небесе и земли, прежде век избранная Невесто Божия, в последняя времена пришедшая в храм законный на обручение Жениху Своему Небесному! Ты бо оставила еси дом отца Твоего, во еже принести Себе Богови в жертву чистую и непорочную: даруй же и нам соблюдати себе в целомудрии, чистоте и страхе Божием во вся дни живота нашего, да будем храмы Духа Святаго. Ты бо пожила еси, Всечистая, вся дни юности Твоея во храме Господнем в бодрствовании молитвенном и во всяком воздержании душевнем и телеснем: помози же и нам отражати вся искушения вражеския, от плоти, мира и диавола находящия, и побеждати оныя молитвою и постом. Ты бо во храме Господнем со Ангелы пребывающи, украсилася всеми добродетельми, наипаче же смирением, чистотою и любовию и достойно воспиталася еси, да готова будеши вместити Слово Невместимое. Сподоби же и нас, обдержимих гордостию, невоздержанием и леностию, облещися во всякое совершенство духовное, да уготоваем, кийждо от нас, Тобою вспомоществуемии, одеяние брачное души своея и елей доброделания, да не нази и неготови явимся во сретение Жениху, Христу Богу нашему: яко да приимет ны с мудрыми девами во обители райския, идеже со всеми святыми воспоим Твое милостивое заступление и неизреченную славу Отца и Сынаи Святаго Духа, всегда, ныне и присно, и во веки веков, аминь.

Кондак 1-й

Избравый от всех родов Пречистейшую Ангел Деву, и от Нея родивыйся плотию Христе Боже наш, благодарственная приносим Ти, раби Твои, Владыко. Ты же, яко имеяй милосердие неизреченное, от всяких нас бед свободи, зовущих: Иисусе, Сыне Божий, воплотивыйся нас ради, слава Тебе.

Икос 1-й

Ангел множество собрася во Вифлееме, видети непостижное Рождество, и видевше своего Творца, в яслех яко Младенца лежаща, удивишася, и страхом благоговеюще, Рождшагося и Рождшую боголепне почитаху, поюще таковая: Слава Тебе, Сыне Божий, прежде век от Отца рожденный; слава Тебе, со Отцем и Духом вся сотворивый. Слава Тебе, спасти погибшия пришедый; слава Тебе, даже до рабия зрака снизшедый. Слава Тебе, Взыскателю заблудших; слава Тебе, Спасителю погибших. Слава Тебе, средостение вражды разрушившему; слава Тебе, рай, преслушанием затворенный, паки отверзшему. Слава Тебе, род человеческий неизреченно возлюбившему; слава Тебе, на земли вертеп Небо явившему. Слава Тебе, рождшую Тя Деву, Престол херувимский показавшему; слава Тебе, преславным Ея рождеством радость всей вселенней возвестившему. Иисусе, Сыне Божий, воплотивыйся нас ради, слава Тебе.

Кондак 2-й

Видяще бесплотнии Ангели своего Владыку, от Чистыя Девы плоть приемша, ужасошася и друг ко другу реша: преславое сие Таинство непостижимо нам является быти. Обаче неизреченному Того снисхождению дивящеся, со страхом пояху: Аллилуиа.

Икос 2-й

Разумная вся тварь ужасающися и благодарящи поет Твоего Рождества, Владыко, таинство! Силы небесныя радуются поюще: слава в вышних Богу; и земля с человеки веселится, мы же непрестанно вопием: Слава Тебе, в вышних славимому Богу; слава Тебе, мир на земли сотворшему. Слава Тебе, нас Тебе примирившему; слава Тебе, на земли нам явившемуся. Слава Тебе, от Девы неизреченно воплотившемуся; слава Тебе, звезду во знаменее возсиявшему. Слава Тебе, тою волхвы на поклонение Тебе призвавшему; слава Тебе, дары от них милостивно приявшему. Слава Тебе, всю тварь Тебе служити научившему; слава Тебе, и нас Тебе пети вразумившему. Слава Тебе, нас с Тобою соединившему; слава Тебе, нас Собою спасшему. Иисусе, Сыне Божий, воплотивыйся нас ради, слава Тебе.

Кондак 3-й

Сильный в крепости, Бог мира, и Отец щедрот, прииде на землю, спасти мир погибающий: ныне в Вифлееме яко Младенец раждается от Девы: Юже Матерь и Ходатаицу спасения показа, всем Того воплощение славящим и поющим: Аллилуиа.

Икос 3-й

Имуще Тебе пречисто Рождшую, о нас непрестанно молящуюся: радующеся поем Твоего вочеловечения, Владыко, Таинство и Рождество от Девы Богоприятныя славословяще вопием: Слава Тебе, Сыне Божий; слава Тебе, Сыне Девы, от Девы несказанно родивыйся. Слава Тебе, человеколюбия бездну на нас показавшему; слава Тебе, нас неизреченно возлюбившему. Слава Тебе, заблудшее овча взыскавшему; слава Тебе, о обретении того, срадоватися Ангелом рекшему. Слава Тебе, на рамо сие восприемшему; слава Тебе, ко Отцу тое приведшему. Слава Тебе, человеки со Ангелы во едино стадо совокупившему; слава Тебе, мир от прелести избавившему. Слава Тебе, великую и неизреченную милость нам явившему; слава Тебе, нас паче всех тварей возлюбившему. Иисусе, Сыне Божий, воплотивыйся нас ради, слава Тебе.

Кондак 4-й

Бурю внутрь помышлений сумнительных прежде имевый целомудренный Иосиф, ныне же Божественнаго вертепа видит преславная; аще бо и яко человека видя от Девы раждаемаго, Сего разумеваше Бога быти истиннаго; Тому боголепне поклонишася, радостно вопияше: Аллилуиа.

Икос 4-й

Слышаша пастырие Ангела, возвещающа им рождшагося Спаса миру во граде Давидове, скоро течаху, узревше Сего, яко Агнца непорочна, во чреве Девыя упасшагося, во яслех лежаща, и Рождшую, благоговейно служащу, и Иосифа, со страхом предстояща, Рождшемуся поклонишася, реша: Слава Тебе, Агнче Божий, Спасе мира; слава Тебе, Сыне Божий, неизреченное чудо нам показавый. Слава Тебе, ангельскаго пения нас слышатели явивый; слава Тебе, с ними и нас славословити Тя научивый. Слава Тебе, Ангелы и человеки пети Тя вразумивый; слава Тебе, на земли и на небеси радость сотворивый. Слава Тебе, яко о Тебе небесная земным срадуются; слава Тебе, яко Тобою земная небесным совокупляются. Слава Тебе, крепость диаволю немощну показавшему; слава Тебе, от того мучительства нас свободившему. Слава Тебе, в Тя верующим неизреченная радосте; слава Тебе, любящим Тя неизглаголанная сладосте. Иисусе, Сыне Божий, воплотивыйся нас ради, слава Тебе.

Кондак 5-й

Боготечную звезду, Христово Рождество предъявляющую, узревше звездоблюстители, и тоя вождением, достигоша Непостижимаго и видеша Невидимаго, возрадовашася Тому вопиюще: Аллилуиа.

Икос 5-й

Видяще царие перситстии, на руку Девичу Царя царствующих, яко на Престоле седяща, и Владыку Того разумевающе, аще и рабий прият зрак, потщашася дары Ему принести: злато, яко Царю, ливан, яко Богу, смирну, яко Сыну Человеческому, смерть прияти пришедшему, и поклонившеся пояху: Слава Тебе, Свет разума всем возсиявый; слава Тебе, нас звездою на поклонение Тебе призвавый. Слава Тебе, злобу лютого Ирода обличившему; слава Тебе, тщету того умышления показавшему. Слава Тебе, от прелести лукаваго нас избавльшему; слава Тебе, Тебе, Солнцу Правды, покланятися научившему. Слава Тебе, вся светом истины просветившему; слава Тебе, Твоим Рождеством многобожия прелесть упразднившему. Слава Тебе, вражие владычество до конца низложившему; слава Тебе, со Отцем и Духом Тебе славити нас научившему. Слава Тебе, древняго змия главу сокрушившему; слава Тебе, нас от вечныя смерти свободившему. Иисусе, Сыне Божий, воплотивыйся нас ради, слава тебе.

Кондак 6-й

Проповедник богоносных вещаний, яже от Тебе исполняяй, на земли явил еси, Спасе, во убозем вертепе ныне от Чистыя Девы родивыйся и богат сый нас ради волею обнищавый, да человеки обогатиши, верою Тебе поющия: Аллилуиа.

Икос 6-й

Возсиял еси от неискусомужныя Твоея Матере, Иисусе, яко солнце просвещая и прогоняя тьму лестчу: демони бо, Спасе, нетерпяще Твоея крепости, вострепеташа, и ад, видя чудо, убояся; мы же благодаряще вопием Ти сицевая: Слава Тебе, человек Спасителю; слава Тебе, бесов Потребителю. Слава Тебе, прелести начальника Твоим Рождеством устрашившему; слава Тебе, идольскую прелесть упразднившему. Слава Тебе, светом Богопознания вся осиявшему; слава Тебе, тму неведения прогнавшему. Слава Тебе, каменю, воду спасения всем источившему; слава Тебе, жажду Адамову и Давидову утолившему. Слава Тебе, яко солнцем, Твоим Рождеством вся просветившему; слава Тебе, лучи благодати вселенней облиставшему. Слава Тебе, землю обетования нам показавшему; слава Тебе, от всеродныя клятвы нас избавльшему. Иисусе, Сыне Божий, воплотивыйся нас ради, слава тебе.

Кондак 7-й

Хотя от века сокровенную тайну нам явити, от всея твари служители таинству показал еси, Спасе: от Ангел Гавриила, от человек Деву, от небес звезду, от земли вертеп, в немже родитися благоволил еси. Темже Твоей неизреченной премудрости дивяшеся, поем: Аллилуиа.

Икос 7-й

Новую показал еси тварь, явлься плотию всех Зиждитель, из безсеменныя прозяб утробы, и сохранив ю, яко же бе нетленну, и Ходатаицу спасения показал еси поющим: Слава Тебе, Сыне Божий, рождшую Тя Матерь милосердия показавый; слава Тебе, Тую и по Рождестве Деву сохранивый. Слава Тебе, спасти Адама пришедшему; слава Тебе, Евины слезы утолившему. Слава Тебе, вся спасти пришедшему; слава тебе, Воскресения образ облиставшему. Слава Тебе, грехов наших рукописание раздравшему; слава тебе, Собою смирения образ нам показавшему. Слава Тебе, нас ради обнищавшему; слава Тебе, Твоею нищетою нас обогатившему. Слава Тебе, одеждою спасения нас одеявшему; слава Тебе, Твоею любовию нас усладившему. Иисусе, Сыне Божий, воплотивыйся нас ради, слава Тебе.

Кондак 8-й

Странное и преславное Рождество Твое видевше, в вертепе совершаемое, устранимся суетного мира, ум на Божественная преложше. Сего бо ради Бог на земли явися смиренный Человек, да на небеса возведет Ему вопиющия: Аллилуиа.

Икос 8-й

Весь еси желание, весь сладость любящим Тя, Христе Боже, и Твое Божественное снисхождение славящим: от Девы бо Чистыя рождшийся на земли, нас на небеса возводиши поющия: Слава Тебе, Сыне Божий, на земли родившемуся; слава Тебе, от Девы неизреченно воплотившемуся. Слава Тебе, нам Себе показавшему; слава Тебе, нас от Тебе далече сущих призвавшему. Слава Тебе, нам неизреченная радосте; слава Тебе, сердец наших сладосте. Слава Тебе, в Рождестве Твоем свет спасения возсиявшему; слава Тебе, слезы в наше спасение пролиявшему. Слава Тебе, теми пламень страстей наших угасившему; слава Тебе, нас от скверны греховныя омывшему. Слава Тебе, прародителей преступление разрушившему; слава Тебе, от тления нас избавльшему. Иисусе, Сыне Божий, воплотивыйся нас ради, слава Тебе.

Кондак 9-й

Всякое разумение и всяк ум ангельский и человеческий не постигает Твоего Рождества, Владыко, Таинства разумети, обаче, Владыко Благий, нашу любовь и веру приими и спаси нас, Тебе поющих: Аллилуиа.

Икос 9-й

Вития многовещанныя, яко рыбы безгласныя, о Твоем воплощении, Владыко, недоумеют глаголати: како Бог Сый совершен, Человек совершенный явися, и от Девы неискусобрачныя како родися? Мы же Тайны сея неиспытующе, верою единою славим Тя, вопиюще: Слава Тебе, Ипостасная Божия Премудросте; слава Тебе, неизглаголанная всем Радосте. Слава Тебе, любомудры немудрыя явившему; слава Тебе, дерзостно испытующих о Тебе посрамившему. Слава Тебе, вся баснотворная плетения растерзавшему; слава Тебе, свет Боговедения всем возсиявшему. Слава Тебе, мудрость в делех Твоих пролиявшему; слава Тебе, многи разумы просветившему. Слава Тебе, путь спасения нам показавшему; слава Тебе двери райския нам отверзшему. Слава Тебе, бездна милосердия неизждиваемаго, слава Тебе, пучино человеколюбия неизмеримаго. Иисусе, Сыне Божий, воплотивыйся нас ради, слава Тебе.

Кондак 10-й

Спасти восхотев мир погибающий, Иже всех украситель, от Девы, яко Младенец раждается и во яслех пеленами повивается, разрешаяй многоплетенныя пленицы согрешений; и Сын сый Божий, Сын Девы бывает, и вся мудре устрояет, да спасет Тому вопиющия: Аллилуиа.

Икос 10-й

Ирод пребеззаконный, яко отрасль богопротивная, показася, жизнь всем Подающаго убити тщашеся; и незлобивыя младенцы, яко класы незрелы мечи пожинахуся. Обаче мы, злобу всякую от сердец наших отринувше, нас спасти Пришедшаго прославим вопиюще: Слава Тебе, Иродово умышление тщетно показавый; слава Тебе, от того убиенныя младенцы со Ангелы сопричтавый. Слава Тебе, злобы Потребителю; слава Тебе, смертных Искупителю. Слава Тебе, рог гордости сломившему; слава Тебе, силу кротости всем явившему. Слава Тебе, человеков смирению научившему; слава Тебе, блегодать тем даровавшему. Слава Тебе, утробу Рождшия Тя освятившему; слава Тебе, Матерь Божию всему миру явившему. Слава Тебе, чудо пастырем простым показавшему; слава Тебе, от мудрых волхвов дары приемшему. Иисусе, Сыне Божий, воплотивыйся нас ради, слава Тебе.

Кондак 11-й

Пение всякое побеждается, Твоему еже нас ради воплощению, достойно хвалу принести хотящих. Аще и равночисленныя песка морскаго песни приносим Ти, Царю Святый, ничтоже достойно совершаем: обаче со страхом поем: Аллилуиа.

Икос 11-й

Свет Тя незаходимый сущии во тьме и сени смертней, Спасе наш, узревши от Девы, просветишася огнем Твоего Божества; и Тебе премудрости и смысла Подателю сицевая пояху: Слава Тебе, Свете неизреченный; слава Тебе, Солнце Правды, тьму идольскую отгнавый. Слава Тебе, многосветлое просвещение возсиявшему; слава Тебе, многотекущую благодати реку нам источившему. Слава Тебе, жаждущих водою спасения богатно напоившему; слава Тебе, любящим Тя иго благо и бремя легко показавшему. Слава Тебе, от бремене греховнаго нас свободившему; слава Тебе, нас от работы вражия избавльшему. Слава Тебе, пришествием Твоим нас возвеселившему; слава Тебе, пакибытием нас утешившему. Слава Тебе, желаний наших край Себе явивый; слава Тебе, нас, врагов сущих, со Отцем примиривый. Иисусе, Сыне Божий, воплотивыйся нас ради, слава Тебе.

Кондак 12-й

Благодать всем подати и долги человеков разрешити пришедый, Спасе наш, темже и наша долги вся разреши и грехов рукописание раздери, Твое несказанное Рождество славящих и непрестанно поющих: Аллилуиа.

Икос 12-й

Поюще Твое вочеловечение, хвалим, благословим и покланяемся Тебе, Спасе наш, и веруем, яко Господь и Бог еси, спасаяй всех на Тя уповающих и Твое еже от Девы неизреченное Рождество славословящих и поющих таковая: Слава Тебе, Сыне Божий, в вышних со Отцем и Духом покланяемый; слава Тебе, от всех колен небесных и земных славимый. Слава Тебе, сокровенное от века таинство открывшему; слава Тебе, Твою к нам неизреченную любовь явившему. Слава Тебе, всея твари Удобрителю; слава Тебе, нам всемилостивый Спасителю. Слава Тебе, благочестно царствующих на земли скипетры утверждаяй; слава Тебе, святители благоговейныя и иереи премудростию и благолепием украшаяй. Слава Тебе, Церкве основание и утверждение; слава Тебе, всем верным надеждо и спасение. Слава Тебе, телес наших исцеление; слава Тебе, душ наших просвещение. Иисусе, Сыне Божий, воплотивыйся нас ради, слава Тебе.

Кондак 13-й

О, Пресладкий и Всещедрый Иисусе, Спасителю наш, Творче и Владыко, приими ныне малая сия молебныя славословия и благодарения наша, якожс приял еси от волхвов поклонение и дары; и сохрани нас, рабов Твоих, от всякия напасти и грехов прощение даруй, и вечныя муки избави верно славящих Твое от Чистыя Девы Рождество и вопиющих Ти: Аллилуиа.

(Этот кондак читается трижды, затем Икос 1-й и Кондак 1-й)

Молитва

Боже Великий и Непостижимый, Отче Безначальный, Собезначальный Сыне, и Душе Соприсносущный, осуществуяй не сущая, спасаяй погибающия, животворяй мертвыя, творяй по воли Твоей в силе небесней и в селении земнем, и дивным Твоим Промыслом управляяй всяческая! Приклони ухо Твое с высоты святыя Твоея, и приими от нас, смиренных и недостойных рабов Твоих, имже велие Твое от бед и всегубительства спасение явил еси, сердцем и усты возносимая Тебе благодарственная сия моления, исповедания и славословия. Яко не по беззакониям нашим сотворил еси нам, Господи, ниже по грехом нашим воздал еси нам. Ты глаголал еси древле сыновом Израилевым, яко, аще не послушают гласа Твоего хранити и творити вся заповеди Твоя, наведеши на них язык безстуден лицем, иже сокрушит их во градех их, дондеже разорятся стены их. И мы ведехом, яко прииде глагол страшный сей на ня и на отцы наша, обаче прещения Твоего не убоявшеся и о милосердии Твоем вознерадевше, оставихом путь правды Твоея и ходихом в волях сердец наших, и не искусихом имети в разуме Тебе, Бога разумов и сердец; еще же и отеческая предания ни во чтоже вменивше прогневахом Тя о чуждих. Ихже ради, якоже древле сынов Израилевых, тако и нас объят лютая обстояния, ихже ревновах наставлениих, сих врагов имеяхом буиих и зверонравных. Но Ты, Господи, Боже щедрый и милостивый, долготерпеливый и многомилостивый и истинный, и правду храняй, и творяй милость в тысящи, отъемляй беззакония и неправды и грехи призри на скорби наша и даждь нам память смертную непрестанну имети в себе, яко да в Тебе утверждени сыновним страхом и верою, всегда, якоже днесь, поем и славословим имя святое Твое. Подаждь во отечестве нашем пастырем святыню, правителем суд и правду, народу мир и тишину, законом силу и вере преспеяние. О премилосердный Господи! Пробави милость Твою ведущим Тя, но и не ищущим Тебе явлен буди, еще и врагов наших сердца к Тебе обрати, и всем языком и племеном во единем истиннем Христе Твоем познан буди. Да от восток солнца до запад, всеми убо языки, единем же сердцем, вси языцы восклицают Тебе гласом радования: Слава Тебе, Сыне Божий, воплотивыйся нас ради, слава Тебе.

Кондак 1-й

Возбранный Воеводо, Царю неба и земли, Тебе Просветителя нашего зряще во Иордане от раба крещаема, небеса ужасошася, и вся земля вострепета, Ангели же удивишася и вся тварь возрадовася. Мы же недостойнии благодарственно Тебе вопием: ко грешником и мытарем явился еси, да водами омыеши человеков грехи. Слава Тебе, Сыне Божий, во Иордане крестивыйся и весь мир просвещей, слава Тебе.

Икос 1-й

Ангельския днесь предгрядите силы, Владыку Христа зряще, ко Иорданским струям грядуща Адамов грех очистити, и смотряще толикое Божие таинство, со страхом прославите велие снисхождение Его, яко Бог человеком уподобися и отнюдь не ведый греха приходит, яко Агнец Божий взяти всего мира грехи. Сего ради прославляюще Божественное явление Христово, воспойте Ему якоже и в Вифлееме славословия сицевая: Слава Тебе, Сыне Божий, от Отца с небесе в мир сей пришедый. Слава Тебе, Превышний Боже, даже до рабия зрака снисшедый. Слава Тебе, Спасителю мира, яко человек ко Иоанну креститися грядый. Слава Тебе, Просветителю твари, яко нов Адам падшаго Адама грехи на Себе понесый. Слава Тебе, безначальный Свете, велию зарю просвещения всему миру на Иордане возсияти восхотевый. Слава Тебе, Солнце Правды, светоносное утро благодати человеком в Богоявлении Твоем даровати возжелавый. Слава Тебе, мир от древния прелести омыти пришедшему. Слава Тебе, велие благочестия таинство нам показавшему. Слава Тебе, чудеса велия нам водами многими сотворившему. Слава Тебе, небеса и всю землю светом разума просветившему. Слава Тебе, фараона мысленнаго в струях Иорданских потопившему. Слава Тебе, новыя люди в водах крещения к вечной жизни приведшему. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 2-й

Видев духом Божественный Предтеча Твое, Христе, в мир пришествие, прииде из пустыни на Иордан, светло людем вопия: Приближися и явися Избавление наше, покайтеся и водою очиститеся, и срести Его потщитеся, да чистыми помышлении просвещаеми, душами чистыми и нескверными усты с веселием воспойте Ему: Аллилуиа.

Икос 2-й

Разум небесный в себе являя, светильник Света, великий Предтеча, возопи к людем: Очиститеся, се бо предгрядет Христос от тли мир избавляяй, разрешити осуждение Адама первозданнаго. Да возрадуется пустыня Иорданова и да процветет, яко крин, земля же вся ныне пророчески да возрадуется. Уготовайте путь Господень и правы сотворите стези Бога нашего, вси с веселием возопийте Ему тако: Слава Тебе, неизреченный Свете, от светильника миру предъявленный. Слава Тебе, непостижимый Слове, от гласа Твоего Предтечею предреченный. Слава Тебе, Огню чистительный, Егоже действом всякая нечистота потребляется. Слава Тебе, Источниче благодатный, Имже всякое естество человеческое освящается. Слава Тебе, Творче неба и земли, от раба креститися восхотевый. Слава Тебе, Сыне Единородный, на Иордан явитися изволивый. Слава Тебе, Царю Правды, у Негоже Предтеча ремень сапогу разрешити убояся. Слава Тебе, Владыко твари, Имже весь род человечь в крещении Твоем возвеселися. Слава Тебе, Превечный Боже, яко явление Твое просвещает и вразумляет младенцы. Слава Тебе, Свете мира, яко пришествие Твое просветляет и умудряет слепцы. Слава Тебе, яко у Тебе источник живота. Слава Тебе, яко во свете Твоем узрим свет. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 3-й

Силу Божества Твоего, Христе, уразумев Предтеча, егда со страхом увиде Тя на Иордан пришедша, радуется душею и трепещет, рукою показуя Тя, и глаголет людем: Сей избавляяй мир от истления. Сей свобождай нас от скорби. Сей вместо рабов, сыны Божии нас соделовает. Сей вместо тьмы просвещает человеки водою Божественнаго крещения. Се Агнец Божий, вземляй грехи мира, Егоже сретающе, вопием: Аллилуиа.

Икос 3-й

Имея богатство милосердия, ко грешником и мытарем на Иорданскую реку пришел еси, Иисусе, не терпел бо еси зрети от диавола мучимый род человечь, но пришел еси, да паки речеши падшему Адаму: где еси? Не скрывайся от Мене. Хошу бо видети тя, аще наг еси и нищ, и тако уподобихся тебе, да не стыдишися. Сего ради проповедуем велие снисхождение Твое, вопиюще Тебе таковая: Слава Тебе, Пастырю добрый, заблуждшее овча взыскати восхотевый. Слава Тебе, Сыне Единородный, понести тое на рамех пришедый. Слава Тебе, Милосте безмерная, к человеком падшим долу низшедый. Слава Тебе, Любы неизреченная, люди отчаянныя паки горе возведый. Слава Тебе, руки ослабленныя нищим укрепляяй. Слава Тебе, колена расслабленныя убогим исцеляяй. Слава Тебе, пустыню жаждущую яко Ливан возвеселивый. Слава Тебе, пустыню Иорданову, яко Кармил произростивый. Слава Тебе, Милостиве, яко льна курящагося не угасаеши. Слава Тебе, Долготерпеливе, яко трости сокрушенныя не погубляеши. Слава Тебе, взыскати и спасти погибшия пришедый. Слава Тебе, Адама отриновеннаго призвати восхотевый. Слава тебе, Сыне Божий, во Иордане крестивыйся и весь мир просвещей, слава Тебе.

Кондак 4-й

Бурею помышлений сумнительных исполнен бысть Предтеча, Христе Царю, егда Ты, яко человек на реку пришел еси и рабское крещение от него прияти восхотел еси, глаголя: простри руку твою и прикоснися верху Моему и ужас весь отряси, совершая повеленное. Трепетен бысть тогда Предтеча и возопи, глаголя: Что к рабу пришел еси, скверны не имый, Господи? Что ми повелеваеши, якоже выше мене? Высоты небесныя никакоже изследих звезд число, ниже землю николиже измерих. Како крещу Носящего горстию тварь? Како просветит светильник Света? Како руку положит раб на Владыку? Аз требую Тобою креститися, да воспою Тебе: Аллилуиа.

Икос 4-й

Слыша Человеколюбец Господь смиренных Предтечевых глагол высоту и видев страх его, рече к нему: Добре, о Иоанне, яко благоговееши предо Мною, обаче остави ныне и отложи боязнь твою, должен еси послужити Ми, тако бо подобает нам исполнити всяку правду, да во Мне человеков очистятся греси. Сему человеколюбному слову Твоему внемлюще, с любовию вопием Тебе сице: Слава Тебе, Христе, Свете истинный, яко милость и истина о тебе сретостеся. Слава Тебе, Царю правды, яко правда и мир о тебе облобызастася. Слава Тебе, Сладчайший Иисусе, яко истина Твоя в Вифлееме от земли возсия. Слава Тебе, Всемилостивейший Спасе, яко правда Твоя во Иордане с небесе приниче. Слава Тебе, Очищение наше, яко водами крещения нас паче снега убеляеши. Слава Тебе, Просвещение наше, яко струями благодати сердце чисто в нас созидаеши. Слава Тебе, преклонивый снисхождением небеса, главу Свою под руку Предтечеву приклонити восхотевый. Слава Тебе, покрываяй водами превыспренняя Своя, в водах Иорданских погрузитися благоволивши. Слава Тебе, Господи сил, Егоже вся боятся и трепещут, велию боязнь Предтече отложити повелевый. Слава Тебе, щедрот Отче, у Негоже милость безмерна и неизследованна, милостию Своею грехи мира покрыти изволивый. Слава Тебе, рождейся от Девы, Спасителю наш, посети нас неизреченным снисхождением Твоим. Слава Тебе, явлейся всему миру, Христе Боже наш, освяти нас Божественным явлением Твоим. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 5-й

Боготечная струя сый благости, Господи, в струи Иорданския возшел еси, да водами омыеши человеческий грех. Ужас бе видети Творца небеси и земли в реце обнажшагося и от раба крещение приемлющаго. Ангельския силы дивляхуся, Иордан же река возвращаше струи свои, не могуще терпети огня поядающаго воды его, яко не обычно ему есть Чистаго измывати и Безгрешного отирати. Сего ради веселися Иордане реко, и да радуются источницы и езера, и вся бездны и моря, яко освятися днесь водное естество, свободившеся от таящагося тамо князя тьмы, и вся тварь веселящеся да поет с нами: Аллилуиа.

Икос 5-й

Видев Тя Божественный Иоанн Владыку твари в водах погружаема, да грехи всего мира погрузиши, и, обнажившагося, да Адамову наготу паки облечеши во одежду славы, вострепета душею и возопи Тебе, Агнцу Божию, очищающему согрешения мира: Не смею прикоснутися верху Твоему, Владыко, Сам мя освяти и просвети, яко Ты еси Живот и Свет и Мир мирови. Обаче по глаголу Твоему со страхом возложи десницу свою на Божественную главу Твою, и крестив Тя, Безгрешна суща, с радостию возопи Тебе сице: Слава Тебе, Агнче Божий, грехи всего мира взяти на Себе пришедый. Слава Тебе, Спасе Милосердый, грехи всех человек потопити в водах Иорданских восхотевый. Слава Тебе, нас от скверны греховныя омывый. Слава Тебе, преступление Адамово разрешивый. Слава Тебе, Твоим на земли Богоявлением всех человек возвеселивый. Слава Тебе, Твоим во Иордане Крещением весь мир просветивый. Слава Тебе, нас ради до образа рабскаго обнищавшему. Слава Тебе, Твоею нищетою нас обогатившему. Слава Тебе, вражие владычество Твоим смирением до конца низложившему. Слава Тебе, Царство Божие во Твоем Крещении яве на земли созидати начавшему. Слава Тебе, путь Спасения на Иордане падшим людем показавшему. Слава Тебе, Свет Боговедения тамо верным Твоим возсиявшему. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 6-й

Проповедник дивный и Предтеча Иоанн многая изрече приходящим людем, во еже уготовати Тебе путь, Господи, обаче умолче, Тебе на Иордан пришедшу, зане Ты Сам рекл еси ему: Не глаголю тебе: рцы Ми, яже глаголеши беззаконным и учиши грешники, точию крести Мя молча. Не подобаше бо гласу человеческому возглашатися, пришедшу Слову Божию и толикому таинству совершающуся, егда Ангели Божии со страхом предстояху и вся тварь вострепета. Сего ради и мы в молчании глубоцем и со многим благоговением вопием в сердце своем: Аллилуиа.

Икос 6-й

Возсия на Иордане всему миру просвещение велие и таинство страшное егда, Владыко Христе, крестився от Иоанна, Ты абие восшел еси от воды, совозводя с Собою мир, и се отверзошася Тебе небеса, яже древле Адам затвори себе и сущим от него, да паки возрожденнии Тобою человецы восхождение улучат в райские обители, идеже с радостию да воспоют Тебе сице: Слава Тебе, Царю мира, средостение вражие разрушившему. Слава Тебе, милости Подателю, рай преслушанием затворенный, паки отверзшему. Слава Тебе, небо грехом заключенное, на Иордане паки отверзсто показавшему. Слава Тебе, Ангелы восходящия и нисходяшия отселе явити обетовавшему. Слава Тебе, схождением Твоим небеса до земли приклонившему. Слава Тебе, Крещением Твоим землю до небес возведшему. Слава Тебе, откровением небес неизреченныя тайны Божия всему миру открывшему. Слава Тебе, явлением горняго мира Святейшее благословение Божие всем верным преподавшему. Слава Тебе, небеса при Илии заключившему, не заключай нам двери милосердия Своего. Слава Тебе, небеса на Иордане отверзшему, отверзи нам входы Божественнаго Чертога Твоего. Слава Тебе, бездну человеколюбия при Крещении Твоем нам явившему, возведи от бездн земли всех до вражия отчаяния дошедших. Слава Тебе, восход до третьяго небесе избранным Твоим сотворившему, вознеси в небесныя обители и нас, до глубины греха ниспадших. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 7-й

Хотяй Человеколюбец Господь спасти мир во гресех погибающий, яви Троическаго Богоявления Своего великое таинство, и якоже в начале мирскаго бытия Дух Божий ношашеся верху воды, яко жизни Податель, тако и при Крещении Твоем, Господи, егда на реце Иорданстей восхотел еси обновити и просветити погибающий род человечь и всю тварь с нами совоздыхающую, Той же Дух Святый паки сниде с небесе отверста в виде голубине и почи над Тобою, Господи, яко над новым Адамом, во еже пребывати отныне в новых людех банею водною возрожденных, да тако силою свыше облеченнии во обновление духа ходити начнут, поюще Богу: Аллилуиа.

Икос 7-й

Новую показал еси тварь, Владыко твари, в Твоем от Иоанна спасительном Крещении, зане яко при Нои потопил еси грехи перваго мира, тако и в водах Иорданских паки потопил еси всего мира грехи, новотвориши бо земнородныя огнем и Духом и водою, странное совершая возрождение и обновление чудное. Духом бо новотвориши души, водою же освящаеши тело, назидая человека, и тако таинственно от воды соделоваеши Духом многочадну Церковь, да присно вопием Тебе таковая: Слава Тебе, Создателю твари, небеса приклонившему и на Иордан снисшедшему. Слава Тебе, Спасителю мира, небеса отверзшему и Духа Божественнаго нам явившему. Слава Тебе, Всеблаже, яко Дух Твой Благий наставит нас на землю праву. Слава Тебе, Всещедре, яко Тойже Дух Твой очистит нас от всякия скверны. Слава Тебе, водою и Духом, обветшавшее грехом естество наше обновившему. Слава Тебе, огнем Божества в струях Иорданских многосветлое Просвещение даровавшему. Слава Тебе, Христе, вся Божественныя силы, яже к животу и благочестию, Духом Твоим Святым при крещении верным преподавшему. Слава Тебе, Иисусе, нисшествием Духа Твоего Святаго причастники нас Божественнаго естества сотворившему. Слава Тебе, почившим на Тебе Духом премудрости и разума чистое Боговедение людем открывшему. Слава Тебе, схождением на Тя Духа Божия дух совета и крепости, ведения и благочестия и дух страха Божия нам излившему. Слава Тебе, Иорданскою струею змиевы главы опалившему. Слава Тебе, явлением Духа Божия в виде голубине к голубиной кротости и чистоте девственной нас призвавшему. Слава Тебе, Сыне Божий, во Иордане крестивыйся, и весь мир просвещей, слава Тебе.

Кондак 8-й

Странно и дивно бысть явление святыя Троицы на Иордане: первее Сын Возлюбленный явися во плоти от раба крещаемый, абие Дух Святый сниде в виде голубине, последи же Пребожественный Отец возгласи с небесе, свидетельствуя: Сей есть Сын Мой Возлюбленный, о нем же благоволих. О, велие и преславное таинство: Возгреме с небесе Господь и Вышний даде глас Свой, да сбудется Давида праотца предречение: Глас Господень на водах, Бог Славы возгреме, Господь на водах многих. Глас Господень в крепости, Глас Господень в великолепии». Сего ради и мы недостойными устами вопием Тебе из глубины души: Аллилуиа.

Икос 8-й

Весь еси в вышних, Иисусе, выну со Отцем на небесех соседяй, но и от нижних никакоже отступаеши, плотию от Чистыя Девы в Вифлееме рожденный, ныне же на Иордане всему миру явивыйся, да сущии во тьме и сени смертней сидящия просветиши светом Твоего Богоявления. Сего ради, просветившеся светом Троическаго Откровения, вопием Тебе, явившемуся Богу, и на земли виденному и просветившему мир: Слава Тебе, Сыне Божий, в вышних со Отцем и Духом покланяемый. Слава Тебе, Сыне Отечь, Предтечею от нижних славословимый. Слава Тебе, седый одесную Отца, Отеческим гласом с небеси проповеданный. Слава Тебе, воплотивыйся нас ради, возлюбленным Сыном Божиим от Того всему миру наименованный. Слава Тебе, во Иорданских струях явленный, Троицы Свет незаходимый в Крещении Твоем показавый. Слава Тебе, дланию раба крещенный, нас рабов сущих банею пакибытия сыны Божия сотворивый. Слава Тебе, Источниче жизни и безсмертия, паки рождением водою и Духом к первому благородию райскому нас приведый. Слава Тебе, Творче неба и земли, огненным Крещением новое небо и землю правды Твоея устроити грядый. Слава Тебе, Восточе востоков, во тьме и сени спящия Крещением Твоим просветивый. Слава Тебе, Свете от Света, Свет незримый Духа Твоего в душах наших возсиявый. Слава Тебе, Царю Безначальный, чистыми струями Крещения Твоего прародительский грех всеконечне омывый. Слава Тебе, Владыко твари, жаждущия люди водою жизни вечныя всебогатно напоивый. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 9-й

Все естество Ангельское удивися великому Твоего, Христе, Богоявления таинству: Адама бо грехом истлевшаго обновил еси Иорданскими струями и главы гнездящихся тамо невидимых змиев сокрушил еси во Твоем Крещении, и тако глубины бездны сатанинския открыл еси дно, да избавиши ны от тоя глубоких вод, и да начнеши созидати Царство Твое, не от мира сего сущее, о нем же пророк Давид предрече, глаголя: Царство Твое царство всех веков и Владычество Твое во всяком роде и роде, егоже и мы прославляюще с вои небесными вопием Тебе: Аллилуиа.

Икос 9-й

Вития Божественный и Ангел Божий, Малахией предреченный, Великий Предтеча един точию от человек сподобися, Господи, во Твоем Крещении Духа пришествие видети и глас Отеческий с небесе слышати, свидетельствующий Твое Богосыновство, да будет первый всему миру проповедник Троическаго Богоявления. Тон во утрий день свидетельствова людем, глаголя: Видех Духа Сходяща, яко голубя с небесе, и пребысть на Нем. И аз видех и свидетельствовах, яко Сей есть Сын Божий. Мы же сему богооткровенному свидетельству внемлюще, прославляем Богоявление Твое, Христе, поюще Тебе таковая: Слава Тебе, Боже Предвечный, явлением Святаго Духа свидетельствованный с небесе. Слава Тебе, Агнче Непорочный, гласом Предтечи проповеданный на земли. Слава Тебе, Крепосте высочайшая, отверзстыми над Иорданом небесными враты затворенный рай нам открывшему. Слава Тебе, Милосте предвечная, Крещением Твоим новый мир от вод Иорданских человеком явившему. Слава Тебе, Царю мира, мир и спасение на земли возвестившему. Слава Тебе, Солнце Правды, свет правды Твоея в душах наших возсиявшему. Слава Тебе, Святаго Духа в Твоем Богоявлении явившему, да чистым духом в небесный чертог Твой совнидем. Слава Тебе, Небеснаго Отца в Крещении Твоем нам показавшему, да вси право в Тя верующии сынове Его будем. Слава Тебе, в Дусе и огне, очерневшее грехом естество наше преславно просвещающему. Слава Тебе, водою и Духом истлевшее страстьми неможение наше пресветло очищающему. Слава Тебе, Богу явльшемуся плотию, весь мир в струях Иорданских обновившему. Слава Тебе, вземльшему на себе грехи мира, прародительский грех в водах Крещения потопившему. Слава Тебе, Сыне Божий, во Иордане крсстивыйся, и весь мир просвещей, слава Тебе.

Кондак 10-й

Спасти хотяй падшее и обнищавшее естество наше, Христе Спасе, на Иорданскую реку пришел еси ко грешником и мытарем и восприял еси крещение от Иоанна, егда крестишася вси людие, да возмеши на Себе вся, погруженныя тамо в водах, человеков грехи, яко Агнец Божий и да готов будеши отселе волею на заклание тещи искупити всего мира грехи драгоценною кровию Твоею. Сего ради и погрузился еси в Иорданския струи, да спогребшися тамо, ко смертному крещению Себе уготовиши, о немже рекл еси ко страданию грядый: Крещением имам креститися и како томлюся, дондеже истяжут. Сего ради благодарственно поем Тебе: Аллилуиа.

Икос 10-й

Царю Превечный Христе Иисусе! Ты пришел еси на Иордан во явление всему миру, да разрешиши осуждение Адама первозданнаго, яко Судия Всемилостивый, Един сердца всех испытуяй, и да подаси новую жизнь человеком. Сего ради чисгительную лопату рукою прием, всемирное гумно всемудре очистил еси, разлучая, яко Пастырь, овцы от козлищ. Сподоби и нам, во имя Пресвятыя Троицы крещенным, десныя части спасаемых в жизни сей всемерно искати, да угодно Тебе будет наше глашение Тебе сицевое: Слава Тебе, Архиерею, небеса прошедый, в Крещении Твоем всю землю онебесивый. Слава Тебе, Пастырю овцам великий, ко стаду Твоему на Иордан пришедый. Слава Тебе, землю на водах основавый, всю землю нашу на водах Иорданских благодатию Духа обновивый. Слава Тебе, над водами небо утверждей второе, новое небо, Церковь Твою, водами крещения сотворивый. Слава Тебе, Источниче жизни нашея, на источники спасения жаждущия люди Твоя призвавый. Слава Тебе, Проповедниче правды вечныя, духовную жажду нашу без цены и сребра утоливый. Слава Тебе, яко богат Сый в милости, за премногую любовь нас возлюбил еси. Слава Тебе, яко мертвых нас сущих грехми, водами крещения оживотворил еси. Слава Тебе, струям Иорданским спогребшемуся, да и мы в крещении в смерть и воскресение Тебе спогребемся. Слава Тебе, водами Иорданскими, яко ризою облекшемуся, да и мы в светлыя ризы правды и чистоты Тобою облечемся. Слава Тебе, средостение вражды плотию Твоею разрушившему, да и нас, далече в море сущих, близь Себе устроиши. Слава Тебе, твоих человек во единем Теле Твоем примирившему, да и нас странных и пришельцев во единую Церковь Божию созиждеши. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 11-й

Пение новолепное да поет Тебе, Христе, вся тварь, от Девы рождшемуся и днесь во Иордане крестившемуся, людие же вси духовно да возвеселятся, прославляюще светлое просвещения нашего торжество и с божественным Григорием да воспоют, глаголюще: Возрождения время возродимся свыше, возсоздания день облецемся в Новаго Адама, просвещения праздник просветимся божественне, да во обновлении духа ходити начнем, выну со Ангелы поюще небесную песнь: Аллилуиа.

Икос 11-й

Светлый и Самосиянный Свете, Христе, соприсносущный Свете Единосущнаго Отца! Возжег посреди Иордана, яко, светильник, пречистую Плоть Твою, Ты возсиял еси, яко Солнце, и даровал еси вселенней в Крещении Твоем велий и незримый свет Твоея благодати и истины, просвещаяй всякаго человека грядущаго в мир, да людие, сидящие во тьме и сени смертной, узрят Свет велий и пойдут по Нему. Просвети убо в великий день светов и нас во тьме греха еще блуждающих, да просветляяся, обновляяся и возвышаяся горе, воспоем Тебе таковая: Слава Тебе, Просветителю мира, Духом Святым и огнем крестити пришедшему. Слава Тебе, Спасителю грешных, из глубины греха нас воздвигнути восхотевшему. Слава тебе, Безначальный и Присносущный Свете, скверну душ наших водами крещения очищаяй. Слава Тебе, Свете превысший всех светлостей, во светлостях святых Твоих верныя озаряяй. Слава Тебе, Славы Отчия Сияние, тьму неведения явлением Твоим разгнавшему. Слава Тебе, во Свете живый неприступнем, свет Боговедения Крещением Твоим возсиявшему. Слава Тебе, Свете от Света во тьме возсиявый, от тьмы грехов очисти нас. Слава Тебе, Солнце Правды, утро спасения возвещающее, во свете добрых дел настави нас. Слава Тебе, невечерний Свете, во Иордане возсиявый, во Свете Твоем свет незаходимый Пресвятыя Троицы облистай нам. Слава Тебе, Образе пресветлый ипостаси Отчия, к чудному нестареемому животу банею пакибытия приведи нас. Слава Тебе, смерти Низложителю, от вечныя смерти избави нас. Слава Тебе, живота Начальниче, к вечней жизни настави нас. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 12-й

Благодать Божия спасительная всем человеком явися днесь во Твоем Крещении, Христе Спасе: пришел бо еси на Иордан, Едине Чистый, очистити человеческая согрешения и сокрушити главы гнездящихся тамо змиев, да даруеши благодать крепления решительную душ и телес наших. Сего ради с благочестием притецем прилежно к пречистым источником, да почерпнем с веселием воду жизни, благодать бо Духа невидимо подается всем верно почерпающим ю, и тайная дарования и Дух познания, Спасе, та вси благодарственно воспоем Тебе: Аллилуиа.

Икос 12-й

Поюще, Христе, Твое спасительное Богоявление, прославляем вси во Иорданских водах от Иоанна Божественное Крещение Твое, поклоняемся неизреченному к падшим человеком снисхождению Твоему и веруем со Предтечею, яко Ты воистину Агнец Божий, вземляй на Себе от вод Иорданских грехи всего мира, да омыеши и искупиши их Пречистою Кровию Твоею. Сего ради молим Тя: понеси и наши безчисленныя грехопадения и не лиши нас в великий день Светов благодатного возрождения Твоего, да чистым сердцем благодарственно вопием Тебе сице: Слава Тебе, Сыне Божий, велий свет к просвещению всего мира в водах Иорданских возсиявшему. Слава Тебе, Предвечный Боже, велию благодать и человеколюбие в Крещении Твоем всем человеком явившему. Слава Тебе, Спасителю заблуждших, заблуждшия безпутием человеки ко Иорданским струям искати пришедшему. Слава Тебе, Победителю жизни, новую чистую жизнь не по плоти, но во обновление духа даровати благоволившему. Слава Тебе, Владыко живота и смерти, жало смерти притупившему и нетленную жизнь явлением своим возсиявшему. Слава Тебе, Творче неба и земли, горнее небо и землю на брегах Иордана в Крещении Твоем возвеселившему. Слава Тебе, Царю царствующих, яко царство мира сего отселе в Царство Твое начинает прелагатися. Слава Тебе, Господи господствующих, яко днесь всем хотящим спастися небеса отверзаются и все естество наше начинает убелятися. Слава Тебе, Спасе наш, на Иордан пришедый, спаси нас не от дел праведности, но по велицей Твоей милости. Слава Тебе, Христе Боже, водное естество освятивый, жаждущую душу мою благочестия напой водами по неизреченней Твоей благости. Слава Тебе, Единородный Сыне и Слове Божий, напитай сердце мое явлением словес Твоих. Слава Тебе, Всесильный Боже, творяй чудеса Един, согрей хладную душу мою разумением чудес Твоих. Слава Тебе, Сыне Божий, во Иордане крестивыйся и весь мир просвещей, слава Тебе.

Кондак 13-й

О Иисусе Христе, Агнче Божий, пришедый на Иордан подъяти всего мира грехи! Приими малое сие от всея души приносимое Тебе моление наше, и просвети нас во тьме грехов седящих спасительным Твоим от Иоанна Крещением, да искупленнии Тобою от болезней душевных и телесных, во обновлении жизни право ходити начнем и со всеми святыми да воспоем Тебе: Аллилуиа.

(Этот кондак читается трижды, затем Икос 1-й и Кондак 1-й)

Молитва

Господи Иисусе Христе, Сыне Божий Единородный, от Отца прежде всех век рожденный, Свете от Света, просвещаяй всяческая, в последняя же лета от Пресвятыя Девы Марии нетленно воплощенный и в мир сей на спасение наше пришедый! Ты бо не потерпел еси видети от диавола мучима рода человеча и Сего ради в пресветлый день Богоявления Твоего пришел еси на Иордан ко грешником и мытарем креститися от Иоанна, безгрешен сый, да исполниши всякую правду и да возьмеши в водах Иорданских грехи всего мира, яко Агнец Божий, во еже понести я на Себе и искупити Крещением крестным, пречистою Кровию Твоею. Сего ради погрузившуся Тебе в водах, отверзошася Тебе небеса Адамом заключенная и Дух Святый сниде на Тя в виде голубине, просвещение и обожение носяй естеству нашему, и Пребожественный Отец Твой возвести Тебе небесным гласом благоволение Свое, зане сотворил еси волю Его и человек грехи восприял еси и Себе на заклание уже предуготовал еси, якоже Сам рекл еси: Сего ради любит Мя Отец, яко Аз душу Мою полагаю, да паки прииму ю, и тако во всесветлый день сей, Ты, Господи, положил еси начало искупления нашего от грехопадения прародительскаго. Сего ради вся силы небесныя радуются и вся тварь веселится, чающе свобождение Свое от работы истления, глаголюще: Прииде Просвещение, Благодать явися, Избавление наста, мир просветися и людие радостию исполняются. Да веселится ныне небо и земля и мир весь да играет; реки да плещут; источницы и озера, бездны и моря да срадуются, яко Божественным Крещением освятися днесь естество их. Да радуются днесь и человеков собори, яко естество их взыде ныне паки к первому благородию и вси с радостию да поют: Богоявления время. Приидите мысленно на Иордан, видение велие в нем узрим: Христос ко крещению грядет. Христос ко Иордану приходит. Христос наши в воде погребает грехи. Христос овча похищеннаго и заблуждшаго приходит искати и, обрет е, вводит в рай. Сего Божественнаго таинства воспоминание празднующе, усердно молимся Тебе, Человеколюбче Господи: Сподоби нам жаждущим по гласу Твоему приити к Тебе, Источнику присноживотныя воды, да почерпем воду благодати Твоея и оставления грехов наших и да отвергшеся нечестия и мирских похотей; целомудренно и девственно, и праведно и благочестно поживем в нынешнем веце, ждуще блаженнаго упования и явления славы Твоея, Великаго Бога и Спаса нашего, да не от дел наших спасеши нас, но по Твоей милости и по обновлению Святаго Духа Твоего банею пакибытия, Егоже обильно излиял еси, да оправдившеся благодатию Его, наследницы будем вечныя жизни во Царствии Твоем, идеже со всеми святыми Сподоби нам прославити всесвятое имя Твое со Безначальным Твоим Отцем и со Пресвятым и Благим и Животворящим Твоим Духом ныне и присно и во веки веков, аминь.

Кондак 1-й

Избраннаго Царя избранная Мати зрится ныне от Вифлеема в Иерусалим грядуща, Богомладенец же Иисус, яко на облаце легце во объятиях Тоя носим бывает. Мы же недостойнии, сретающе Царя Славы и Пресвятую Матерь Деву, с Симеоном старцем вопием Преблагословенней: Гряди, Пречистая, Господь с Тобою и Тобою с нами.

Икос 1-й

Ангел небесных небесные лики приникше на землю, зрят Своего Творца и Владыку перворожденна всея твари во объятиях Девических от Матери неискусомужныя, яко Младенца носима и ко храму во Иерусалим грядуща, и радующеся поют Тому и Царице Деве хвалу праздничную: Гряди, Царю неба и земли, во град Великаго Царя, Сион Святый. Гряди, Превышний Боже, от горних высот в рукотворенный храм земный. Гряди, Единородный Сыне Божий, вселитися с человеки на земли. Гряди, Непорочный Агнче Божий, принестися ко Господу, живущему на небеси. Гряди, Чистая Голубице, Святаго Духа Безмужная Невесто. Гряди, Нескверная Агнице, Агнца Христа Нетленная Мати. Гряди, Богоизбранная Отроковице, Бога Отца превожделенная Дщере. Гряди, Небесная Царице, всему миру Благая Владычице. Гряди, Пречистая, Господь с Тобою и Тобою с нами.

Кондак 2-й

Видящи Пресвятая Дева Себе в чистоте по рождестве Христове Сущую и не требующую очищения, зане Христос пройде от Нея, якоже луча солнечная кристал проходит, не повредив девственныя чистоты Пречистыя Матери Своея. Обаче смиренна сущи, не гордяшеся о нетленной чистоте Своея, и егда исполнишася дние очищения Ея законнаго, воставши со святым Иосифом Обручником от Вифлеема, вознесоста Божественна Младенца, да поставят Его пред Господем во Иерусалиме, с радостию поюще Ему: Аллилуиа.

Икос 2-й

Разумев Тя издалеча, Дево, Бога носящую воплощенна на руку Твоею, Исаия предвозвести: Се Господь седит на облаце легце. Ты же, о Богомати, в Иерусалим идуще и Божественнаго Младенца во объятиях носяще, помышляше, како Матерь содеяся и Дева пребысть. Обаче ведуще, яко паче естества рождение сие бысть, со трепетом глаголаше в Себе: како возименную Тя, Сыне Мой? Аще нареку Тя человека, вем, яко превыше человека еси, девство Мое соблюдый нетленно, яко Божествено есть зачатие Твое. Аще нареку Тя Бога, вижду Тя во всем подобна человеку, кроме греха. Сего ради проповедуют Тя совершенна Бога и совершенна человека суща. Мы же, сретающе пришествие Тоя, Чистую чисто почтим, глаголюще тако: Гряди, Чистая Дево, Чистаго Бога чисто родившая. Гряди, Безмужная Мати Еммануилова, брака не познавшая. Гряди, честнейшая Херувим, Еяже чистоте Гавриил удивися. Гряди, славнейшая без сравнения Серафим, Ейже все естество Ангельское поклонися. Гряди, Земле ненасеянная, Яже израсти нам Клас Живота. Гряди, Купино Неопалимая, Юже в рождестве не опали огнь Божества. Гряди, Вместилище невместимое, на Нюже шестокрилатии и многоочитии взирати не могут. Гряди, Престоле огнезрачный, Юже земнороднии по достоянию восхвалити недоумеют. Гряди, Пречистая, Господь с Тобою и Тобою с нами.

Кондак 3-й

Силою Божественною управляема, прииде Пресвятая Дева во Святый град Иерусалим, яко светоносный день, Солнце Правды Христа всему миру возсиявающи. Сия бо яве явися Престол херувимский, зело высок славою девственною превознесен, Та бо на руку Своею носит Царя Славы, Емуже незримо предстоят шестокрилатии Серафими, со всеми небесными силами вопиюще: Аллилуиа.

Икос 3-й

Имущи богоприятную Дева утробу, востече ко храму, держащи на руку Своею Богомладенца Христа, и приклонив колена Своя пред Господом, с веселием и благоговением глагола: О Превечный Отче, се Сын Твой, Егоже послал еси воплотитися от Мене спасения ради чсловеческаго. Се Плод утробы Моея, Духом Твоим Святым во Мне зачатый и неизреченно произшедый, се Первенец Мой. Приими воплощенное от Мене Твое Слово, приими Твоего от Мене Сына, Егоже Тебе приношу, да Того Плотию и Кровию от Мене приятою, искупиши род человечь. Мы же сему тайному молению Твоему, Пречистая, внемлюще, вопием Сыну Твоему и Богу нашему тако: Гряди, Пресладкий Иисусе, яко дождь с небесе на чистую землю кротко и тихо снисшедый. Гряди, Сладчайший Животе, яко капля каплющая на землю, в воплощении незримо Себе явивый. Гряди, Всемилостивый Спасе, взыскати и спасти погибшия пришедый. Гряди, Пастырю предобрый, заблудшии овцы понести на Себе восхотевый. Гряди, Врачу безнадежных, немощи и болезни наши на Себе носити изволивый. Гряди, Агнче Божий, грехи всего мира взяти на Себе возжелавый. Гряди, Господи Славы, на облаце легце носимый, прелести тьму отгнати имевый. Гряди, Царю мира, на престол Давидов пришедый, Царство не от мира сего являяй. Гряди, Пречистая, Господь с Тобою и Тобою с нами.

Кондак 4-й

Бурю внутрь имеяй помышлений сумнительных, великий архиерей Божий Захария смутися, зря Пресвятую Деву со Отрочатем, на месте нечистых жен пред дверьми храма ставшую и законнаго очищения просити пришедшую, ведуще бо Ю во Святая Святых воспитанную, и уразуме духом, яко Сия Матерь и по рождестве есть Дева Чистая. Сего ради постави Ю на месте девиц, идеже женам, имущим мужа, стояти не подобаше, и сретающе Ю, со страхом и с радостию воспе явльшемуся Богу: Аллилуиа.

Икос 4-й

Слыша Захария дивныя пред Богом глаголы Твоя, Пречистая, и видев, яко хощеши возложити возлюбленное чадо Свое на руце его, яко Архиерею Божию, аки в руце Самому Богу влагающи, и яко вкупе принесла еси Богу в жертву нищих, по реченному в законе, два птенца голубиныя, умилися сердцем и с верою и со страхом Божиим прият Богомладенца, и яко законну Творцу и Богу, изрече Ему тако: Гряди, Ветхий деньми, древле на Синае Моисеем закон даровавый. Гряди, Отроча младо, ныне закон исполнити хотяй ко храму пришедый. Гряди, Престол имеяй небо, земный храм небесною славою исполнити восхотевый. Гряди, воплотивыйся от Девы человеческое естество обожити возжелавый. Гряди, даже до рабия образа низшедый, да нас рабов греха в рабы Правды Божией сотвориши. Гряди, сияние Сый Ипостаси Отчия, да нас чадами Божиими Отца Небеснаго явиши. Гряди, Закона Исполнителю, птенцы голубины Богу принесый, да мы паче голубиц чистых на Небеса возлетим. Гряди, милости Подателю, милости, а не жертвы восхотевый, да и мы с елеем милования Тебе усрящем. Гряди, Пречистая, Господь с Тобою и Тобою с нами.

Кондак 5-й

Богосветлая звезда возсия, егда прииде Духом в Церковь святый старец Симеон. Той, юношествуя духом, престарев же телом, праведен бе и благочестив, верою живя, чая Утехи Израилевы, обещано бо бе ему Духом Святым не видети смерти, дондеже не видит Христа Господня, во плоти пришедша. Той воззрев на Пречистую Деву и на держимое Ею Отроча, виде благодать Божию, и познав Духом, яко Сей есть ожидаемый Мессия, приступи к Нему со тщанием, и воздав Богу благодарение велие, со страхом Божиим и с радостию сердечною воспе Ему: Аллилуиа.

Икос 5-й

Видев старец Симеон на руку Девичу создавшаго человеки, и Владыку разумев Его, аще и яко Младенец виден бысть, весь исполнися радости неизреченныя, и себе забыв, глаголет весело: Тебе желаю, Боже отцев и Господи милости, на Тя взираю, объемлющаго вся Словом Своим, Тебе сретаю, владычествующаго жизнию и смертию, Тебе чаю, соединившаго небо и землю. Тебе алкаю, мертвыя воскрешаюшаго. Тебе жаждаю, страждущия утешающаго и Тебе вопию сице: Гряди, всеми пророки чаемый, посетити нас Твоим спасением. Гряди, всеми языки желаемый, просветити нас Твоим откровением. Гряди, от юга пришедый Искупителю наш, да избавиши Адама и Еву от греха и клятвы древния. Гряди, на земли явивыйся, Спасителю наш, да с человеки поживеши и изведеши я из тьмы и сени смертныя. Гряди, Просветителю наш, благовестити лето Господне приятно. Гряди, Свободителю наш, отпустити сокрушенныя сердцем во отраду. Гряди, Пастырю и Учителю, проповедати плененным отпущение и слепым прозрение. Гряди, Творче и Владыко, возвестити нищим спасение и всем человеком прощение. Гряди, Пречистая, Господь с Тобою и Тобою с нами.

Кондак 6-й

Проповедник дивный пришествия Христова явися Богоносец Симеон, егда паче исполняяся Духа, первый от человек позна Творца своего, во плоти пришедша, и первый исповеда Того Божество, вопиюще Ему, яко от лица всех живущих на земли: Тебе поклоняемся, яко Ты еси Бог наш; Тебе молимся, яко Ты еси храм наш; Тебе служим, яко Ты еси закона Творец. Ты еси Бог Первый и несть инаго Бога паче Тебе, и инаго Сына Единосущна Отцу. Тобою живем и движемся и есмы. Ты красен еси паче всех сынов человеческих, яко Бог и человек. Сего ради веселися ныне небо, яко помилова Бог люди Своя и ликуйте основания земли и сущия во аде, яко явися ныне мертвым воскресение, увидех бо ныне Спасителя мира, вопиюще Ему: Аллилуиа.

Икос 6-й

Возсия всему миру просвещение Истины, егда Пресвятая Дева подаде старцу Симеону пречистыма рукама Своима Божественнаго Младенца, яко угль животворящ таинственно от жертвенника Божия, глаголюще: Приими, честный старче, Господа Твоего, приими Сокровище неисчерпаемое и Силу непостижимую. Обыми Нетление и обновися и просветися от Солнца Правды. Не опаляет бо огнь благодати Господа Моего, но паче просвещает, Той бо очистит грехи твоя и вся беззакония твоя очистит, да будеши начаток очищения всего мира, и тако совлечеши вся ветхая и во вся новая да облечешися. Сему милостивому вещанию Пречистыя внемлюще, возопием Ей таковая: Гряди, небесною чистотою сияющая Девице, Свет Невечерний нам просиявшая. Гряди, пречудная мира горняго Царице, во горния обители нас возводящая. Гряди, Купино таинственная, Еюже огнь Божества от горних высот всему миру возжеся. Гряди, светоносный Облаче, Еюже Богомладенец Христос во спасение всем принесеся. Гряди, огненный Престоле Невидимаго Царя. Гряди, небесный Кивоте, вместившая Христа. Гряди, Пресвятаго Духа Святейшая Палато. Гряди, Безсмертнаго Царя Нескверная Невесто. Гряди, Пречистая, Господь с Тобою и Тобою с нами.

Кондак 7-й

Хотяй святый старец Симеон новое очищение получити, якоже древле Исаия, поклонися Пречистей Богоматери, прикоснуся Божественным стопам Ея, глаголюще: Огнь носищи, Чистая, боюся объяти Младенца, миром владычествующа. Ты бо, яко крылами ангельскими, рукама просвещаеши мя, подавши, Егоже Херувими крылеми носити трепещут. Сего Симеон, простер руце, прият в честныя объятия своя, и с радостию возопи: Аллилуиа.

Икос 7-й

Новое и преславное чудо совершися днесь: Симеон старец приемлет тленныма рукама Творца, создавшаго человека, да Бог с человеки поживет и человека небеса сотворит. Прием же желаемого, и видев обещаний сбытие, той, якоже зрелая пшеница, просяще о разрешении телеснем, и якоже лебедь белый, сединами украшенный, на закате жития своего весело возопи: Видеста очи мои спасение Твое, еже от века таинство сокровенное. Темже ныне отпусти мя, Владыко, раба Твоего по глаголу Твоему с миром от соуза сея плоти к чудному и нестареемому животу да отходя от здешних, радостную весть принесу отцем моим о Твоем в мир пришествии. Сего ради вопием Ти: Гряди, Иисусе, жизни Подателю, жизнь и воскресение всем верным Твоим даровати. Гряди, Владыко, смерти Низложителю, от вечныя смерти люди Твоя свободи. Гряди, Безсмертный Царю, от тьмы и сени смертныя вечныя узники разрешити. Гряди, Сладчайший Животе, врата райския к чудному животу паки Адаму отверсти. Гряди, желаемый Женише, яко желает и скончавается душа моя во дворы Господни. Гряди, превожделенный Свете, яко обрете сердце мое в юдоли плача храмину о Бозе Живе. Гряди, Предвечный Боже, яко близ боящихся Тебе спасение Твое. Гряди, Всещедрый Спасе, яко мир много любящим Тя принесе Слово Твое. Гряди, Пречистая, Господь с Тобою и Тобою с нами.

Кондак 8-й

Странные глаголы дивнаго старца о Отрочате слышавше, Иосиф и Пречистая Дева чудяхуся о глаголемых о Нем: видеста бо Симеона к Младенцу вещающа, но не яко к Младенцу, но яко к Ветхому деньми и к Богу молящагося, Живота и смерти власть имущему и могущему абие к иной жизни отпустити того, и слагающе вся глаголы сия в сердце своем, благодарственно возопиша Богу: Аллилуиа.

Икос 8-й

Весь быв в Бозе, святый старец Симеон, исполнися духа пророческаго и многая изрече о Божественном Младенце, яко даже до ада приидет и плененным подаст всем оставление и слепым прозрение и яко и немым глаголати. И обращашеся к Марии Матери Его, провозгласи Ей: Се лежит Сей на падение непокоривым и на востание верным многим во Израиле, и в знамение пререкаемое. И Тебе Самой, о Безсмертная Мати, душу пройдет оружие печали, егда узриши Сына Твоего на Кресте пригвожденна, да открыются помышления многих сердец во спасение от грех их. Сему предречению внемлюще, вопием Пречистей тако: Гряди, Мати и Дево, в девственнем рождестве Твоем болезней матерних избегшая. Гряди, Агнца и Пастыря Мати, у Креста Сына Твоего болезни сердечныя понести имущая. Гряди, Радосте наша, приобщитися страстем Христовым, да в явлении Славы Его с Ним возрадуешися. Гряди, в печалех Утешение, искуситися, яко злато в горниле, да и Сама искушаемым помощи возможеши. Гряди, Обрадованная, печаль родившую женам Еву возвеселити имущая. Гряди, Препрославленная, весь мир скорбями Своими от скорбей свободити хотящая. Гряди, Честнейшая всея твари Дево, всю видимую тварь рождеством Своим обновившая. Гряди, Святейшая Святых всем Мати, ангелы и человеки во сретении Твоем объединившая. Гряди, Пречистая, Господь с Тобою и Тобою с нами.

Кондак 9-й

Всякое естество Ангельское удивися великому Бога нашего к человеком нисшествию, глаголюще: Чудная зрим ныне и преславная, непостижимая и несказанная: Адама бо создавый в объятиях старчих вмещается. Полны концы мира благости Его, полна вся тварь хваления Его, полно все человечество снисхождения Его. Небесная, земная и преисподняя полны суть благоутробия Его, полны милости Его, полны щедрот, полны даров, полны благодеяния Его. Исполнь небо и земля славы Его! Сего ради вси языцы восплещите руками, поюще Ему: Аллилуиа.

Икос 9-й

Вития Божественный Боговидец Симеон, аще и много изрече, хваляще и благодаряще Пренепорочную Матерь Божию, рождшую миру Бога и Человека, Спаса душ наших, обаче не возможе благохвалити по достоянию, Юже и премирные умы недоумевают воспевати, обаче любовию побеждаемый, величаше Ю, глаголюще: Святейшее и дивное Жилище Божие, Ты еси начало, середина и конец нашего праздника. Ты возсияла еси Свет Солнца, Ты отверзла еси источник человеколюбия Сына Твоего, память Твоя превыше всякаго слова и величие Твое превосходит немощь нашу. Молю Тя: непрестанно памятуй нас хвалящих Тя и в восторзе духовном вопиющих Тебе сице: Гряди, вечно нескончаемая Радосте наша, радость Христа всему миру явившая. Гряди, присно ублажаемая Сладосте наша, Огнь Божества рукама неопально держащая. Гряди, Заре присносиятельная, от ветхаго мира новою благодатию храм просветившая. Гряди, Свеще неугасающая, во сретение Твое души верных Светом Христовым осиявшая. Гряди Огнь Небесный рукама носившая, да Тобою святыня и красота во святилище возгорится. Гряди, Свет Невечерний нетленно, яко Приснодева, родившая, да Тобою спасение всем концем земли возвестится. Гряди, одушевленный Кивоте Божий, яко Тобою новая благодать спасительная всему миру явися. Гряди, Скиния Божия с человеки, яко Тобою Бог богов в Сионе над всеми людьми воцарися. Гряди, Пречистая, Господь с Тобою и Тобою с нами.

Кондак 10-й

Спасения проповедница явися Богодухновенная Анна пророчеством сияющая и в законе непорочная: не отхождаше бо от храма Господня день и нощь в молитвах и посте служащи. Та исшедши с праведным Симеоном во сретение Богомладенцу Христу, провещаше страшная, исповедующе Его Творца небу и земли. И объемши Того, приложи уста своя ко устом Его, и вселися Дух во устах ея и возопи: Ты еси Бог и Сын Человечь, Сын Царствия и уничижения. Ты слышиши и безмолвствуеши, видиши и невидим еси, всеведущ и сокровен. И та многая пророчески изрече о принесенном Младенце всем чающим избавления во Иерусалиме, Богородицу же проповедающе величаше. О дщи Фануилева, прииди и стани с нами, вопиюще Богу: Аллилуиа.

Икос 10-й

Царю Превечный и Слове Божий! Ты плотию ныне всему миру явился еси во храме, от Девы Матери, яко Младенец руконосим, да с человеки поживеши и всем сущим от Адама, да возвестиши спасение. Древняя ныне вся мимоидоша и се быша вся нова. Правда Твоя с небесе приниче, и милость Твою послал еси нам, и благодать Твоя воцарися на земли, яко пришел еси взыскати и спасти погибшия. Сего ради никогоже отвергаеши, никогоже отвращаешися, якоже древле Озы, иже прикоснуся к Кивоту Завета Твоего и поражен бысть смертию. Ныне же блудница припадает к Тебе и уцеломудрися, кровоточивая прикасается к Тебе и очистися, мытари и грешницы возлежат с Тобою и в друга Твоя приемлются, яко вся труждающияся и обремененныя призвал еси к Себе. Сего ради с радостию сретаем пришествие Твое, вопиюще тако: Гряди, о Христе, всех Царю, и востани на сретение наше. Гряди, Иисусе, душ наших Врачу, и изыди на помощь и спасение наше. Гряди, Пастырю наш добрый, на взыскание пришедый заблудшаго овчати, взыщи и нас заблуждших. Гряди, Утешителю Благий, погибшую драхму взыскавый и обретый, обрящи души людей погибших. Гряди, Всещедре и Человеколюбче, и приими нас во отеческия объятия Своя. Гряди, Всемилостиве и благоутробне, всели нас в райския обители Твоя. Гряди, Утешителю скорбящих, защити и управи нас в море житейския суеты плывущих. Гряди, Спасителю заблуждших. спаси и воздвигни нас в бездне греха утопающих. Гряди, Пречистая, Господь с Тобою и Тобою с нами.

Кондак 11-й

Пение всеумиленное приношаху о явлении Твоем, Христе, Богоносец Симеон и праведная Анна, духом пламенеюще, усты же радостно проповедающе Твое в мир пришествие всем чающим избавления. Книжницы же и фарисеи, слышаще таковая о Отрочате свидетельства, негодоваху, наипаче же осуждаху, аки явнаго законнопреступника Захарию, яко Матерь на месте девическом постави, чесо ради вскоре убиша его между жертвенником и алтарем. Богомладенец же Христос отнесен бысть от злобы Иродовой в Египет, да будет тамо в знамение вечное и да ведом будет Господь египтяном и да сотворят тамо жертву и дар, поюще Ему: Аллилуиа.

Икос 11-й

Свет во откровение языков, был еси, Солнце Правды, Христе, на облаце, легце носим, якоже Симеон днесь пророчески провозгласи, да явиши начало новыя благодати, начен от Египта и даже до последних земли, яко Ты еси Источник Живота и Свет человеков, да свет во тьме светится, и тьма Его не объят. Сею зарею Божества Твоею просвети и нашу душевную тьму, да вси возжегши в сердце добродетелей свещи, с Симеоном и с Анною, яко свещеносцы новии с любовию усрящем Тя, вопиюще Тебе и Пречистей Матери Твоей сице: Гряди, Иисусе, Свете мира, да во светлости святых Твоих нас просветиши. Гряди, Христе Спасе, во свете живый непреступнем, да во свете лица Твоего нас обожиши. Гряди, Солнце Правды, яко да возсияет во днех Твоих правда и мир на земли. Гряди, Свете Святый, яко да приидет в сердца наша огнь любве и веры с небесе. Гряди, Небесный Царю, яко да благословенно и пресветло будет пришествие Твое. Гряди, Творче и Владыко, яко да с горящими светильники чистоты изыдем во сретение Твое. Гряди, тихий и невечерний Свете, да в тихости и безмолвии поживем вся дни живота своего. Гряди, Единородный Сыне Божий и Слове, да с трепетом и в радости совершим спасение Твое. Гряди, Пречистая, Господь с Тобою и Тобою с нами.

Кондак 12-й

Благодать новая исполнь днесь ветхий храм законный, егда пришел еси в онь, Христе, яко Младенец руконосим, да исполнится Аггея пророка Твоего предречение: Приидет желаемый всеми языки и исполнит храм сей славою, зане велия будет слава храма сего последняго, паче перваго и на месте сем дам мир. Сего ради да украсится неизреченною Божества Твоего зарею и наша Церковь новая, готовящаяся Тя светло, яко Жениха, прияти, и наша душевныя руки просвети, да якоже Симеон прострем я в чистоте на сретение Твое, с веселием вопиюще Тебе: Аллилуиа.

Икос 12-й

Поюще, о Богомати, во храм Господень с Божественным Младенцем на сретение всему миру пришествие Твое, восхваляем неизреченную паче Ангел девственную Чистоту Твою, поклоняемся Возсиявшему от Тебе Солнцу Правды Христу, с Симеоном усрящем Его и приимем во объятия своя. С Анною исповедуем Божество Его, с Иосифом принесем Ему в дар, яко два птенца голубина, нашу душу и тело, и яко с мудрыми девами светильники душ наших светло украсим и горящия свещи истинному Свету Христу, явльшемуся во откровение мира, принесем, и исплетше днесь песни, якоже цвети, принесем Тебе, яко венец благодарения сицевыя похвалы: Гряди, Благодатная Богородице Дево, да под кровом девства Своего нас в девстве и чистоте сохраниши. Гряди, светоносная Владычня Палато, да благодатию Своею нас дом Духа Святаго сотвориши. Гряди, паче утра светлейшая Дево, да и нас сыны дне до конца жития соблюдеши. Гряди, Солнце носящая Мати Света, да и нас светом благодати Твоея просветиши. Гряди, Великаго таинства Святая Служительница, да и нас Сыну Твоему и Богу свято служити научиши. Гряди, всему миру Благая Помощнице, да и нас от мира, плоти и диавола невредимо защитиши. Гряди, о Девице Марие, да просветиши наши души помраченныя страстьми. Гряди, о Дивная Отроковице, да сохраниши люди Твоя ослепленныя грехми. Гряди, Пречистая, Господь с Тобою и Тобою с нами.

Кондак 13-й

О Всепетая Мати и Дево, принесшая во Святилище всех святых Святейшее Слово во сретение наше и спасение миру; праздничное приемши сие приношение наше, покрый и соблюди нас от всякия нужды и печали и избави нас от всякия греховныя вражия сети. Ты же, яко Дверь Божества нетленно бывшая, отверзи всем спастися желающим врата небесная, да избавльшеся Тобою от вечныя муки, воспоем во сретении Господне на воздусе: Аллилуиа.

(Этот кондак читается трижды, затем Икос 1-й и Кондак 1-й)

Молитва ко Господу нашему Иисусу Христу

Господи Иисусе Христе, Единородный Сыне и Слове Божий, древле во пророцех виденный, якоже зерцалом в гаданий, в последок же дний сих плотию от Пресвятыя Девы Марии нетленно рожденный и в четыредесятный день сей во Святилище во сретение всему миру от Тоя, яко Младенец руконосим, явленный и во объятиях праведнаго Симеона во спасение всем сущим от Адама носимый! Коль преславно и пресветло Твое на руку Богоматери во храм Господень принесение и от Святаго старца Божественное сретение Твое! Днесь небеса веселятся и радуется земля, яко видена быша шествия Твоя, Боже, шествия Бога нашего Царя, Иже во Святем. Древле Моисей восходит видети Славу Твою, но не возможе увидити лица Твоего, зане явил еси ему точию задняя Своя. В пресветлый же день сей Сретения Твоего Ты явил еси Себе человеком во святилище, сияя неизреченным Светом Божества, да вкупе с Симеоном видят Тя лицем к лицу и руками, да осяжут Тя, и восприемши во объятия Своя, да познают Ти Бога, во плоти пришедша. Сего ради прославляем неизреченное снисхождение и велие человеколюбие Твое, яко пришествием Твоим даровал еси ныне небесную радость падшему древле роду человечу: Ты бо праведным судом Своим изгнал еси прародители наши из рая сладости в мир сей, ныне же помиловал еси нас и паки отверзл нам райския обители и обратил еси плач наш на радость, да падший Адам к тому уже да не стыдится Тебе за преслушание и да не будет скрыватися лица Твоего, Тобою призываемый, яко Ты пришел еси ныне, да возьмеши на Себе грех его, да омыеши его Своею кровию и да облечеши его нага суща в ризу спасения и одежду веселия и украсиши его, яко невесту, красотою. Нам же всем Божественное Твое Сретение воспоминающим, Сподоби с мудрыми девами изыти на сретение Твое, Небесному Жениху нашему, с горящими светильниками веры, любви и чистоты, да лицезрим очами веры Божественное лице Твое, да восприимем Тя в душевныя объятия Своя, и да понесем Тя в сердце своем во вся дни живота своего, да будеши нам в Бога и мы в людие Твои. В последний же и Страшный день Пришествия Твоего, егда вси святии изыдут на последнее и великое сретение Твое на воздусе, сподоби и нам срести Тя, да тако всегда с Господом будем. Слава милосердию Твоему, Слава Царствию Твоему, Слава смотрению Твоему, едине Человеколюбче, яко Твое есть Царство и Сила и Слава со Безначальным Твоим Отцем и Пресвятым и Благим и Животворящим Твоим Духом ныне и присно и во веки веков, аминь.

Молитва ко Пресвятей Владычице Богородице

О Пресвятая, Небесною чистотою сияющия Дево, кроткая Голубице, нескверная Агнице, миру Благая Помощнице, Мати Христа Бога нашего! Ты еси начало, средина и конец нынешния радости нашея, яко из Тебе возсия Солнце Правды Христос Бог наш и Того принесла еси на святых объятиях Своих в четыредесятный день сей во Святилище на сретение наше и на радость и спасение всему миру. Сего ради и ублажаем и прославляем Тя, яко Ты еси Скиние Бога с человеки, Богословом предзримая, Еюже Бог вселися с нами, да мы людие Его будем. Ты еси Дверь Небесная, Иезекиилем Предреченная, Еюже отверзошася паки нам входы в райския обители. Ты еси Лествице высокая, Иаковом предвидимая, Еюже сниде Бог на землю и Мосте, преводяй сущия от земли на Небо. Темже молим Тя, взирающе, яко вошла еси во Святилище, носящи Огнь Небесный рукама Своима, Бога, Благодатная. Огнем молитвы Твоея попали огнь страстей наших, да избавимся вечнаго огня геенскаго. Во Святилище пришла еси очищения ради законного, очищения не требующая, яко Дева Чистая, и сим научи нас како подобает нам хранити себе в целомудрии и чистоте и с каковым смирением подобает нам провождати подвиг девства, памятуя, како Ты, превыше Херувим сущая, стала еси на месте нечистых жен. Ты, о, Мати Пресвятая, Сама сущи Боговместимый храм Божий, принесла еси в Церковь законную Превожделеннаго Сына Твоего, Христа Бога нашего, сподоби и нам паче всего на земли любити храмы Сына Твоего, посещати я во вся дни живота нашего, зрети тамо красоту Господню, яко лучше Един день приметатися во дворех Господних, паче неже жити в селениих грешничих. Наипаче же даруй нам, Пречистая, яко же Симеону, неосужденно носити Сына Твоего и Бога нашего в сердечных объятиях своих, егда причастницы будем Пречистаго Тела и Крови Его, и помози нам тогда сугубо хранити себе во святыне и страхе Божиим, да не растлим храм плоти нашея. И тако выну сретаюше, о Богомати, Сына Твоего в сердцах и душах наших, да сподобимся молитвами Твоими достигнути и блаженнаго онаго Сретения Господня на воздусе, егда со всеми святыми выну будем славити и воспевати Пресвятое Имя Его со Отцем и Святым Духом и Твое милостивое предстательство ныне и присно и во веки веков, аминь.

Кондак 1-й

Взбранной Воеводе победительная, яко избавльшеся от злых, благодарственная восписуем Ти раби Твои, Богородице; но яко имущая державу непобедимую, от всяких нас бед свободи, да зовем Ти: радуйся, Невесто Неневестная.

Икос 1-й

Ангел предстатель с небесе послан бысть рещи Богородице: радуйся, и со безплотным гласом воплощаема Тя зря, Господи, ужасашеся и стояше, зовый к Ней таковая: Радуйся, Еюже рaдocть возсияет; радуйся, Еюже клятва изчезнет. Радуйся, падшаго Адама воззвание; радуйся, слез Евиных избавление. Радуйся, высото неудобовосходимая человеческими помыслы; радуйся, глубино неудобозримая и ангельскима очима. Радуйся, яко еси Царево седалище; радуйся, яко носиши Носящаго вся. Радуйся, Звездо, являющая Солнце; радуйся, утробо Божественнаго воплощения. Радуйся, Еюже обновляется тварь; радуйся, Еюже покланяемся Творцу. Радуйся, Невесто Неневестная.

Кондак 2-й

Видящи Святая Себе в чистоте, глаголет Гавриилу дерзостно: преславное твоего гласа неудобоприятельно души моей является: безсеменнаго бо зачатия рождество како глаголеши, зовый: Аллилуиа.

Икос 2-й

Разум недоразумеваемый разумети Дева ищущи, возопи к служащему: из боку чисту, Сыну како есть родитися мощно, рцы Ми? К Нейже он рече со страхом, обаче зовый сице: Радуйся, совета неизреченнаго Таиннице; радуйся, молчания просящих веро. Радуйся, чудес Христовых начало; радуйся, велений Его главизно. Радуйся, лествице небесная, Еюже сниде Бог; радуйся, мосте, преводяй сущих от земли на небо. Радуйся, Ангелов многословущее чудо; радуйся, бесов многоплачевное поражение. Радуйся, Свет неизреченно родившая; радуйся, еже како, ни единаго же научившая. Радуйся, премудрых превосходящая разум; радуйся, верных озаряющая смыслы. Радуйся, Невесто Неневестная.

Кондак 3-й

Сила Вышняго осени тогда к зачатию браконеискусную, и благоплодная Тоя ложесна, яко село показа сладкое, всем хотящим жати спасение, внегда пети сице: Аллилуиа.

Икос 3-й

Имущи Богоприятную Дева утробу, востече ко Елисавети: младенец же оноя абие познав Сея целование, радовашеся, и играньми яко песньми вопияше к Богородице: Радуйся, отрасли неувядаемыя розго; радуйся, Плода безсмертнаго стяжание. Радуйся, Делателя делающая Человеколюбца; радуйся, Садителя жизни нашея рождшая. Радуйся, ниво, растящая гобзование щедрот; радуйся, трапезо, носящая обилие очищения. Радуйся, яко рай пищный процветаеши; радуйся, яко пристанище душам готовиши. Радуйся, приятное молитвы кадило; радуйся, всего мира очищение. Радуйся, Божие к смертным благоволение; радуйся, смертных к Богу дерзновение. Радуйся, Невесто Неневестная.

Кондак 4-й

Бурю внутрь имея помышлений сумнительных, целомудренный Иосиф смятеся, к Тебе зря небрачней, и бракоокрадованную помышляя, Непорочная; уведев же Твое зачатие от Духа Свята, рече: Аллилуиа.

Икос 4-й

Слышаша пастырие Ангелов поющих плотское Христово пришествие, и текше яко к Пастырю видят Сего яко агнца непорочна, во чреве Мариине упасшася, Юже поюще реша: Радуйся, Агнца и Пастыря Мати; радуйся, дворе словесных овец. Радуйся, невидимых врагов мучение; радуйся, райских дверей отверзение. Радуйся, яко небесная срадуются земным; радуйся, яко земная сликовствуют небесным. Радуйся, апостолов немолчная уста; радуйся, страстотерпцев непобедимая дерзосте. Радуйся, твердое веры утверждение; радуйся, светлое благодати познание. Радуйся, Еюже обнажися ад; радуйся, Еюже облекохомся славою. Радуйся, Невесто Неневестная.

Кондак 5-й

Боготечную звезду узревше волсви, тоя последоваша зари, и яко светильник держаще ю, тою испытаху крепкаго Царя, и достигше Непостижимаго, возрадовашася, Ему вопиюще: Аллилуиа.

Икос 5-й

Видеша отроцы халдейстии на руку Девичу Создавшаго руками человеки, и Владыку разумевающе Его, аще и рабий прият зрак, потщашася дарми послужити Ему, и возопити Благословенней: Радуйся, Звезды незаходимыя Мати; радуйся, заре таинственнаго дне. Радуйся, прелести пещь угасившая; радуйся, Троицы таинники просвещающая. Радуйся, мучителя безчеловечнаго изметающая от начальства; радуйся, Господа Человеколюбца показавшая Христа. Радуйся, варварскаго избавляющая служения; радуйся, тимения изымающая дел. Радуйся, огня поклонение угасившая; радуйся, пламене страстей изменяющая. Радуйся, верных наставнице целомудрия; радуйся, всех родов веселие. Радуйся, Невесто Неневестная.

Кондак 6-й

Проповедницы богоноснии, бывше волсви, возвратишася в Вавилон, скончавше Твое пророчество, и проповедавше Тя, Христа всем, оставиша Ирода яко буесловна, не ведуща пети: Аллилуиа.

Икос 6-й

Возсиявый во Египте просвещение истины, отгнал еси лжи тьму: идоли бо его, Спасе, не терпяще Твоея крепости, падоша, сих же избавльшиися вопияху к Богородице: Радуйся, исправление человеков; радуйся, низпадение бесов. Радуйся, прелести державу поправшая; радуйся, идольскую лесть обличившая. Радуйся, море, потопившее фараона мысленнаго; радуйся, каменю, напоивший жаждущия жизни. Радуйся, огненный столпе, наставляяй сущия во тьме; радуйся, покрове миру, ширший облака. Радуйся, пище, манны приемнице; радуйся, сладости святыя служительнице. Радуйся, земле обетования; радуйся, из неяже течет мед и млеко. Радуйся, Невесто Неневестная.

Кондак 7-й

Хотящу Симеону от нынешняго века преставитися прелестнаго, вдался еси яко младенец тому, но познался еси ему и Бог совершенный. Темже удивися Твоей неизреченней премудрости, зовый: Аллилуиа.

Икос 7-й

Новую показа тварь, явлься Зиждитель нам от Него бывшим, из безсеменныя прозяб утробы, и сохранив Ю, якоже бе, нетленну, да чудо видяще, воспоем Ю, вопиюще: Радуйся, цвете нетления; радуйся, венче воздержания. Радуйся, воскресения образ облистающая; радуйся, ангельское житие являющая. Радуйся, древо светлоплодовитое, от негоже питаются вернии; радуйся, древо благосеннолиственное, имже покрываются мнози. Радуйся, во чреве носящая Избавителя плененным; радуйся, рождшая Наставника заблудшим. Радуйся, Судии праведнаго умоление; радуйся, многих согрешений прощение. Радуйся, одеждо нагих дерзновения; радуйся, любы, всякое желание побеждающая. Радуйся, Невесто Неневестная.

Кондак 8-й

Странное рождество видевше устранимся мира, ум на небеса преложше: сего бо ради высокий Бог на земли явися смиренный Человек, хотяй привлещи к высоте Тому вопиющия: Аллилуиа.

Икос 8-й

Весь бе в нижних и вышних никакоже отступи неописанное Слово: снизхождение бо Божественное, не прехождение же местное бысть, и рождество от Девы Богоприятныя, слышащия сия: Радуйся, Бога невместимаго вместилище; радуйся, честнаго таинства двери. Радуйся, неверных сумнительное слышание; радуйся, верных известная похвало. Радуйся, колеснице пресвятая Сущаго на Херувимех; радуйся, селение преславное Сущаго на Серафимех. Радуйся, противная в тожде собравшая; радуйся, девство и рождество сочетавшая. Радуйся, Еюже разрешися преступление; радуйся, Еюже отверзеся рай. Радуйся, ключу Царствия Христова; радуйся, надеждо благ вечных. Радуйся, Невесто Неневестная.

Кондак 9-й

Всякое естество ангельское удивися великому Твоего вочеловечения делу; неприступнаго бо яко Бога, зряще всем приступнаго Человека, нам убо спребывающа, слышаща же от всех: Аллилуиа.

Икос 9-й

Вития многовещанныя, яко рыбы безгласныя видим о Тебе, Богородице, недоумевают бо глаголати, еже како и Дева пребываеши, и родити возмогла еси. Мы же, таинству дивящеся, верно вопием: Радуйся, премудрости Божия приятелище, радуйся, промышления Его сокровище. Радуйся, любомудрыя немудрыя являющая; радуйся, хитрословесныя безсловесныя обличающая. Радуйся, яко обуяша лютии взыскателе; радуйся, яко увядоша баснотворцы. Радуйся, афинейская плетения растерзающая; радуйся, рыбарския мрежи исполняющая. Радуйся, из глубины неведения извлачающая; радуйся, многи в разуме просвещающая. Радуйся, кораблю хотящих спастися; радуйся, пристанище житейских плаваний. Радуйся, Невесто Неневестная.

Кондак 10-й

Спасти хотя мир, Иже всех Украситель, к сему самообетован прииде, и Пастырь сый, яко Бог, нас ради явися по нам человек: подобным бо подобное призвав, яко Бог слышит: Аллилуиа.

Икос 10-й

Стена еси девам, Богородице Дево, и всем к Тебе прибегающим: ибо небесе и земли Творец устрои Тя, Пречистая, вселься во утробе Твоей, и вся приглашати Тебе научи: Радуйся, столпе девства; радуйся, дверь спасения. Радуйся, начальнице мысленнаго наздания; радуйся, подательнице Божественныя благости. Радуйся, Ты бо обновила еси зачатыя студно; радуйся, Ты бо наказала еси окраденныя умом. Радуйся, тлителя смыслов упраждняющая; радуйся, Сеятеля чистоты рождшая. Радуйся, чертоже безсеменнаго уневещения; радуйся, верных Господеви сочетавшая. Радуйся, добрая младопитательнице девам; радуйся, невестокрасительнице душ святых. Радуйся, Невесто Неневестная.

Кондак 11-й

Пение всякое побеждается, спростретися тщащееся ко множеству многих щедрот Твоих: равночисленныя бо песка песни аще приносим Ти, Царю Святый, ничтоже совершаем достойно, яже дал еси нам, Тебе вопиющим: Аллилуиа.

Икос 11-й

Светоприемную свещу, сущим во тьме явльшуюся, зрим Святую Деву, невещественный бо вжигающи огнь, наставляет к разуму Божественному вся, зарею ум просвещающая, званием же почитаемая, сими: Радуйся, луче умнаго Солнца; радуйся, светило незаходимаго Света. Радуйся, молние, души просвещающая; радуйся, яко гром враги устрашающая. Радуйся, яко многосветлое возсияваеши просвещение; радуйся, яко многотекущую источаеши реку. Радуйся, купели живописующая образ; радуйся, греховную отъемлющая скверну. Радуйся, бане, омывающая совесть; радуйся, чаше, черплющая рaдocть. Радуйся, обоняние Христова благоухания; радуйся, животе тайнаго веселия. Радуйся, Невесто Неневестная.

Кондак 12-й

Благодать дати восхотев, долгов древних, всех долгов Решитель человеком, прииде Собою ко отшедшим Того благодати, и раздрав рукописание, слышит от всех сице: Аллилуиа.

Икос 12-й

Поюще Твое Рождество, хвалим Тя вси, яко одушевленный храм, Богородице: во Твоей бо вселився утробе содержай вся рукою Господь, освяти, прослави и научи вопити Тебе всех: Радуйся, селение Бога и Слова; радуйся, святая святых большая. Радуйся, ковчеже, позлащенный Духом; радуйся, сокровище живота неистощимое. Радуйся, честный венче людей благочестивых; радуйся, честная похвало иереев благоговейных. Радуйся, Церкве непоколебимый столпе; радуйся, Царствия нерушимая стено. Радуйся, Еюже воздвижутся победы; радуйся, Еюже низпадают врази. Радуйся, тела моего врачевание; радуйся, души моея спасение. Радуйся, Невесто Неневестная.

Кондак 13-й

О, Всепетая Мати, рождшая всех святых Святейшее Слово! Нынешнее приемши приношение, от всякия избави напасти всех, и будущия изми муки, о Тебе вопиющих: Аллилуиа.

(Этот кондак читается трижды, затем Икос 1-й и Кондак 1-й)

Молитва

О Пресвятая Госпоже Владычице Богородице, вышши еси всех Ангел и Архангел, и всея твари честнейши, помощнице еси обидимых, ненадеющихся надеяние, убогих заступнице, печальных утешение, алчущих кормительнице, нагих одеяние, больных исцеление, грешных спасение, христиан всех поможение и заступление. О, Всемилостивая Госпоже, Дево Богородице Владычице, милостию Твоею спаси и помилуй святейшия патриархи православныя, преосвященныя митрополиты, архиепископы и епископы и весь священнический и иноческий чин, и вся православныя христианы ризою Твоею честною защити; и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше, на невидимыя и видимыя враги наша. О Всемилостивая Госпоже Владычице Богородице! Воздвигни нас из глубины греховныя и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от напрасныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум, и очи сердечнии, еже ко спасению; и сподоби ны, грешныя рабы Твоя, Царствия Сына Твоего, Христа Бога нашего; яко держава Его благословена и препрославлена, со Безначальным Его Отцем, и с Пресвятым и Благим и Животворящим Его Духом, ныне и присно, и во веки веков, аминь.

Кондак 1-й

Избранный Царю Горняго Сиона, Кроткий, спасаяй и Праведный Избавителю наш, Тебе, в вышних на Херувимех носимаго и певаемаго от Серафим, зрим ныне на жребя возшедшаго и в Иерусалим к вольней страсти грядущаго. Сего ради поклоняемся неизреченному снисхождению Твоему, и с ваиами и ветвьми умиленно сретаем Тя, да и с дети еврейскими воззовем Тебе: Благословен грядый во имя Господне, осанна в вышних!

Икос 1-й

Архангелов и Ангелов лики со страхом и с трепетом взираху с небесных высот на Твое, Христе Спасе, во Иерусалим к вольной страсти вхождение и со Апостолы незримо сопровождаху Тя Царя Своего и с дети еврейскими осанна в вышних Тебе приношаху и воспеваху песнопения сицевыя: Благословен еси, Господи Боже наш, яко посетил и сотворил еси избавление людем Своим. Благословен еси, Владыко Христе, яко пришел и даровал еси Крестом спасение чадом Своим. Благословен еси, грядый Адама из глубины ада воззвати. Благословен еси, пришедый Еве от древния печали свободу даровати. Благословен еси, благовествуяй мир на Израиля и спасение языков. Благословен еси, возвещаяй Завет Нов в Кроплении Крови Своея. Благословен Грядый во имя Господне! Осанна в вышних!

Кондак 2-й

Видев Тя, Иисусе, Марфа и Мария паки в Вифанию пришедша прежде шести дней бытия Пасхи, сотворша Тебе вечерю ту, и бе Лазарь един от возлежащих, Марфа с усердием служаше Тебе, Подателю всяческих, Мария же благую часть избра, благодарна сущи о воскрешении брата своего, и приемши литру мира нарда чиста многоценна, помаза пречистыя нози Твои и отре власы своими, с любовию от избытка сердца, вопиюще Тебе: Аллилуиа.

Икос 2-й

Разума неуразуменна вольнаго Твоего на страдания пришествия не разумев Иуда, иже хотяше уже предати Тя, смутися, зряще Мариино миром помазание ногу Твоею, Господи, и рече: Чесо ради гибель сия бысть? Можаше бо сие миро продати на трехстех пенязь и датися нищим. Сие же рече не яко о нищих печашеся, но яко тать бе. Ты же, Господи, ведый, яко надлежит Ти скоро смерть претерпети, оправдал еси святую жену сию, глаголюще: Не дейте ея, да в день погребения Моего соблюдет е. Сего ради почитающе вольное ко страсти пришествие Твое, вопием Тебе сице: Благословен еси, Господи, Мариею на вечери на погребение приуготованный. Благословен еси, Иисусе, Иудою в душе еще в Вифании на смерть уже осужденный. Благословен еси, в Вифанию пришедый, в дом мира, да любовь и миром помазание от Марии приемлеши. Благословен еси, во Иерусалим Грядый на вольную страсть, да паки любовь от святых жен мироносиц всему миру возвестиши. Благословен еси, Лазаря из мертвых воздвигнувый, да будет с крепостию пришествие Твое. Благословен еси, Себе Самого от гроба возставити Грядый, да будет со властию вхождение Твое. Благословен Грядый во имя Господне! Осанна в вышних!

Икос 3-й

Имеяй власть воистину Божественную, Владыко Христе, Ты во утрий день изшед из Вифании зело заутра и приближася в Виффагию, послал еси двоицу от ученик Твоих, глаголюще: Идита в прямную весь, в нюже входяща, обрящета осля привязано и жребя, на неже никтоже николиже вседе от человек, и отрешивша я, приведита Ми. И сице кто речет вам, что творита, рцыта, яко Господь требует я. Изшедша же ученика, приведоста осля и жребя, и возложиша на я ризы своя. Ты же, Бог Сый, на Херувимех носимый, яко человек на жребя младо возсел еси нас ради, да яко Царь кроток, в мир сотвориши вхождение Твое во град отца Твоего Давида. Сего ради сретаем Тя сицевыми похвалы: Благословен еси, в вышних со Отцем на Престоле седяй, на жребяти осли сести изволивый. Благословен еси, на небесех от Горних Сил поклоняемый, от детей на земли поклонение приявый. Благословен еси, крепостию царствуяй веки, со славою во Иерусалим грядый. Благословен еси, на смиренныя призираяй, с кротостию во своя пришедый. Благословен еси, на жребяте безсловесном возседый, древнее безсловесие разрешити хотяй. Благословен еси, странное обнищание долу приемый, на Небеси горе Отцу и Духу соседяй. Благословен Грядый во имя Господне! Осанна в вышних!

Кондак 4-й

Буря недоумения смущает ми ум, како достойно воспою велие снисхождения Твоего таинство, Господи, яко имея Престол небо, Ты на жребя худо возшел еси человека взыскуя, хотя разрешити его древняго безсловесия, да сбудется реченное Захариею пророком глаголющим: Радуйся зело, дщи Сионя, проповедуй дщи Иерусалимля. Се Царь Твой грядет к Тебе Праведен и Спасаяй, Той Кроток всед на подъяремника и жребца юна. Сего ради прославляем с миром на жребяте шествие Твое во Иерусалим, из глубины души вопиюще Тебе: Аллилуиа.

Икос 4-й

Слышавше народ мног пришедый на праздник, яко грядеши Господи во Иерусалим, собрашася вкупе во множестве и постилаху ризы своя по пути, друзии же резаху ветви от древ и постилаху по пути, и предходящии и вслед грядущий вопияху Тебе, глаголюще: Осанна Сыну Давидову! Благословен Грядый во имя Господне! Благословенно грядущее Царство во имя Господа отца нашего Давида! Осанна в вышних! Сего ради и мы в предпразднственный день сей, носяще воскресения знамения ветви древес, Тебе, яко Победителю смерти, вопием: Благословен еси, Царю Израилев, Царство не от мира сего взыскати пришедый. Благословен еси, Сыне Давидов, трости сокрушенныя преломити не восхотевый. Благословен еси, Пастырю Добрый, заблудшее овча обрести грядый. Благословен еси, Агнче Незлобивый, Себе Самого в жертву принести хотяй. Благословен, еси Владыко твари, от твари Твоея с любовию сретаемый и с ветвьми ублажаемый. Благословен еси, Царю Славы, со славою царскою от учеников провождаемый и от детей прославляемый. Благословен Грядый во имя Господне! Осанна в вышних!

Кондак 5-й

Богосветлою красотою и крепостию облечен быв от века, Господи, грядеши со славою в Сион, восход на Елеонскую гору совершая, да исполнится Наума пророка предречение: Се на горах ноги Благовествующаго и Возвещающаго мир. Празднуй Иудо праздники твоя, воздаждь обеты твоя. И паки исполнися Давида праотца Твоего другое предречение: Видена быша шествия Твоя, Боже, шествия Бога моего, иже во святем. Егда же приблизился еси уже к нисхождению с горы Елеонския, все множество учеников начаша радующеся хвалити Бога гласом велиим, сугубо прославляюще Тя о всех чудесех, яже видеша от Тебе, глаголюще: Благословен Грядый Царь во имя Господне! Мир на земли и слава в вышних! Сего ради и мы днесь Новый Израиль, яже от язык Церковь, радующеся, возопием Тебе с ними: Аллилуиа.

Икос 5-й

Видевше фарисеи от народа сущии, яко ликования народныя зело умножаются, Тебе, Господи, с горы нисходящу, и яко гласи учеников Твоих зело велии суть, вознегодоваша и реша Тебе: Учителю, запрети учеником Твоим. Ты же, Господи, возгласил еси им: аще сии умолкнут, камни возопиют, якоже предрече Аввакум пророк, глаголя: камение из стен возопиют, древо же отвещати будут им. Сего ради и мы, аще душами и сердцы хладни есмы, якоже камение, обаче по слову Твоему не умолчим хвалы Тебе возсылати сицевыя: Благословен еси, Господи Боже наш, яко пришел еси во Иерусалим грешныя спасти. Благословен еси, Христе Спасе наш, яко возвестил еси верным Твоим, яко близ к нам еси. Благословен еси, Сыне Отечь, яко грядеши Кровию Креста Твоего небесная и земная примирити. Благословен еси, Сыне Человечь, яко идеши велию любовь Отца Небеснаго всему миру возвестити. Благословен еси, Царю Царствующих, яко Царство Твое Царство всех веков. Благословен еси, Владыко владеющих, яко Владычество Твое во всяком роде и роде. Благословен Грядый во имя Господне! Осанна в вышних!

Кондак 6-й

Проповедницы Божественныя силы Твоея, Господи, быша сущии с Тобою в Вифании иудеи, зане тии свидетельствоваху в Иерусалиме, яко Лазаря от гроба воздвигл еси. Сего ради и срет Тя народ, яко слышаща Тя сие сотворша знамение. И глаголаху друг ко другу: чесо ждем и не исходим на сретение Сыну Давидову с ваиами от финик, да исполнится Писание: взыду на финик. удержу ветви его, зане Той есть финик правды, о Немже рече Давид: Праведник, яко финикс процветет. Сего ради с ветвьми воспеваху первое Тебе народи: Осанна, обаче послежде с дреколми изыдоша на Тя, яко на разбойника, не ведуще пети: Аллилуиа.

Икос 6-й

Возсия во всей славе своей и красоте Святый град Божий Сион, град Великаго Царя, егда приблизился еси к нему, Господи, и увидел еси с высоти горы Елионския вся здания церковная и иная строения градская зело красныя. Тогда, видя Святый град, Господи, восплакался еси о нем, яко Отец чадолюбивый, и с плачем рекл еси: аще бы разумел еси ты хотя в сей день твой, еже к миру твоему, обаче сие скрыся от очию твоею. И абие предрекл еси, яко приидут дние, егда обложат Святый град врази и разбиют его, и чада его, и не оставят камень на камни в нем, понеже не разумел времени посещения Твоего. Мы же ведуще Тя, яко Добраго Пастыря, скорбящаго об заблудших овцах Своих, вопием Ти: Благословен еси, Пастырю овцам Великий, овча погибшее взыскати пришедый. Благословен еси, Архиерею грядущих благ, немощем нашим спострадати восхотевый. Благословен еси, Новаго Завета Ходатаю, возжелавый падшия люди от вечныя смерти спасти. Благословен еси, Судие Праведнейший, яко праведен еси, и прави суди о граде Твоем. Благословен еси, Спасе Всемилостивейший, яко милостив бывал еси и милости Твоея исполнь вся земля. Благословен Грядый во имя Господне! Осанна в вышних!

Кондак 7-й

Хотяй избавити род человечь от работы вражия, Иисусе, пришел еси во Иерусалим, да исполнится Писание: явится Бог богов в Сионе. Тебе тамо, потрясеся весь град; единии бо изыдоша на сретение Тебе, восклицающе велегласно: Осанна Сыну Давидову, друзии же, удивляющеся вопрошаху: Кто есть Сей. О безумнии старцы, лжеимений учителие! Вся стогна града проповедуют чудеса Твоя. Вся Иудея исполненна благодеяньми Твоими, сии же вопрошают: Кто есть? Лазарь едва воскресе, и не ведят, Кто исхити его от смерти. От двора Иаирова едва исшел еси, и не ведят, Кто есть ожививый дщерь его? Видят, обаче не хотят воспети Тебе, яко Богу: Аллилуиа.

Икос 7-й

Дивное показал еси смотрение Твое, Иисусе, егда со славою восшел еси во Иерусалим и абие, яко Архиерей, посетил еси Святый храм соглядати его. В дом Отца Твоего пришел еси со властию, и исполнися святаго Аввакума пророка предречение: Господь во Святом храме Своем: да молчит вся земля пред лицем Его. И абие изгнал еси вон вся сущии тамо продающия и купующия, глаголя: Храм Мой храм молитвы наречется, вы же сотвористе его вертеп разбойником. И тако исполнися другое Писание: Ревность дома Твоего снеде Мя. Мы же, убоявшеся таковаго праведнаго гнева Твоего, Господи, единое просим от Тебе, еже жити в дому Твоем во вся дни живота нашего, зрети красоту Твою и посещати храм святый Твой, да прославим Тебе сице: Благословен еси, не в рукотворенных храмах живый на небеси, в храм земный со славою возшедый. Благословен еси, селение славы Своея возлюбивый на земли, дом молитвы от житейских попечений оградивый. Благословен еси, Господи сил, яко возлюбленна селения Твоя, паче селений грешничих. Благословен еси, Царю Славы, яко лучше день един во дворех Твоих, паче тысящ, во градех нечестивых. Благословен еси, велий в Сионе, яко страшно и свято имя Твое. Благословен еси, живый во Иерусалиме, яко свят храм Твой, дивен в правде Твоей. Благословен Грядый во имя Господне! Осанна в вышних!

Кондак 8-й

Странное и преславное чудо сотворил еси, Христе, егда внезапу пришел еси в Церковь Свою и тамо приступивших к Тебе хромых и слепых исцелил еси, яко Светлодавец, и Милостивый Врач, яко правда пред Тобою предыдет, якоже рече Давид, и тако всем источил еси в великий и предпразднственный день сей радость, истину, свет и живот, якоже предрече Софония пророк, глаголя: Радуйся дщи Сионова зело, отьят Господь неправды твоя, воцарится Господь посреде тебе и не узриши зла ктому Господь Бог Твой в тебе и обновит тя в любви Своей Тебе ради, глаголет Господь, спасу утесненную, и отриновенную прииму. Сего ради и мы, веселящеся в день праздника посещения Твоего, воспоем Тебе: Аллилуиа.

Икос 8-й

Весь был еси любовь, Сладчайший Иисусе, сего ради хвалу Тебе приносит возлюбленный Израиль из уст ссущих и незлобивых младенец: егда старцы и учителие их богохульствуют вопрощающе, Кто есть Сей, младенцы богословствуют, вопиюще Тебе: Осанна Сыну Давидову, и с ваии и с ветвьми сретают во храме пришествие Твое, предвозвещающе скорое Твое из мертвых воскресение. Сподоби же и нам одержимым гордостию обратитися, яко незлобивии дети, таковых бо есть Царствие Небесное, да от чистаго сердца купно с ними принесем Тебе таковые похвалы: Благословен еси, в вышних певаемый от Серафим, от незлобивых младенец воспевание приявый. Благословен еси, в горних носимый от Херувим, от чистых сердцем богоносно в сердце носимый. Благословен еси, скинию падшую Давидову возставити пришедый, да нашу внутреннюю благообразную скинию паки просветиши. Благословен еси, храм Твой дом молитвы сотворивый, да нас бывших вертеп душетленных разбойников паки дом чист Духа Святаго сотвориши. Благословен еси, Емуже тысящи тысящ служаху на небеси и тьмы тем предстояху пред Ним. Благословен еси, Емуже сонмы детей воспеваху на земли и тьмы народныя сретаху Его. Благословен Грядый во имя Господне! Осанна в вышних!

Кондак 9-й

Все сонмище Иудейское архиереев и книжников, видевше чудеса, яже сотворил еси во храме, Иисусе, и отроки зовущия: Осанна Сыну Давидову, вознегодоваша и реша Тебе: Слышиши ли, что сии глаголют? Ты же рекл еси им: Несте ли чли николиже, яко изо уст младенец и ссущих совершил еси хвалу. Мы же удивляющеся окаменению и жестосердию сердец их, злобою да младенчествуем ныне, да в простоте сердечной воспоем Ангельскую песнь: Аллилуиа.

Икос 9-й

Витии Божественнии, аще и много глаголют, но не возмогут воздати достойнаго благодарения неизреченному снисхождению Твоему, Христе, яко ныне волею пришел еси во Иерусалим крест претерпети, сего ради утаил еси от премудрых и разумных Свое Божество и открыл еси е младенцем, иже чистым сердцем паче отец своих ощутиша, яко Ты еси воистину Христос. Сподоби и нам душами чистыми и нескверными усты исповедати Божественную Славу Твою, поюще Тебе сице: Благословен еси, явлением словес Твоих просвещаяй и вразумляяй младенцы, просвети и вразуми наши мысли и сердца. Благословен еси, творением чудес Твоих свидетельствуяй Божество Свое, открый очи мои уразумети от закона Твоего чудеса. Благословен еси, пасый Израиля, паси мя в кротости духа на месте злачне. Благословен еси, храняй Иакова, всели мя в чистоте сердца на воде покойне. Благословен еси, Царю мира, да возсияет во днех Твоих правда, дондеже отъимется луна. Благословен еси, Солнце Правды, да просветится свет Твой во множестве мира, дондеже сияет солнце. Благословен Грядый во имя Господне! Осанна в вышних!

Кондак 10-й

Спасти хотяй языки, Христе Боже наш, Ты воздвигл еси нецыи от еллин, пришедших поклонитися в праздник, яко да видят Тя. Сего ради тии приступиша к Филиппу, глаголюще: Хощем Иисуса видети. Тойже вкупе с Андреем глаголаху Тебе. Ты же отвещеваеши им, яко ныне уже прииде час, да прославится о сем Сын Человеческий. Во своя бо пришел еси и свои не прияша Тя, и на смерть осудиша. Сего ради, яко зерно пшеничное не принесет плода, аще пад на землю не умрет, тако же и Ты смертию Своею мног плод принесл еси во языцех, да исполнится Исаии пророка предречение, яко явлен был еси не ищущим Тя, и обретен был еси не вопрошающими Тя. Сего ради приидите языцы и видите днесь Царя Небеснаго, яко на Престоле высоце на жребяте худе во Иерусалим входяща, да вси едиными усты и сердцем воспоем Ему: Аллилуиа.

Икос 10-й

Царю Превечный, кроткий, праведный и спасаяй Утешителю наш! Ты кротко пришел еси в день сей во Иерусалим на кротком жребяти осли сидя, да конское свирепство разрешиши на земли. Сего ради кротость Твоя разумна да будет всем человеком, и да ведают вси, яко Ты взираеши токмо на кроткаго, молчаливаго, трепещущаго словес Твоих. Сего ради да раскуют мечи своя на орала и копия на серпы, и да не навыкнут ктому ратоватися. Мы же кротцы сущи душею и смирении нравом, благодатию приимем кроткаго всех Владыку, грядущаго гордыню лукаваго сокрушити, да в кротости духа воспоем Ему сице: Благословен еси, на гору Сион возшедый, да мир на Израиля благовестиши. Благословен еси, Иерусалиму проповедуяй, да спасение языков возвестиши. Благословен еси, пришедый благовестити нищим лето Господне приятно, да вся сокрушенныя сердцем исцелиши. Благословен еси, восхотевый возвестити плененным отпущение, да вся уничиженныя во отраду свободиши. Благословен еси, яко кокош птенцы Своя под крыле собираяй, да вся обремененныя грехми Крестом искупиши. Благословен еси, яко зерно пшеничное в землю падшее, ко погребению грядый, да вся до глубины ада павшия Воскресением обновиши. Благословен Грядый во имя Господне! Осанна в вышних!

Кондак 11-й

Пение всеумиленное принесем Тебе, Христе, вкупе с незлобивыми младенцы осанна Тебе воспевшими, с нимиже и мы Тебе вопием: Бог Господь, и явися нам, да с ваии и ветви составим Тебе праздник свят, чист и духовен, да паки сотвориши вход во внутренния храмины душ наших, якоже обещался еси, глаголя: не оставлю вас сиры, но паки прииду к вам. Аще кто любит Мя, возлюблю его, и явлюся ему Сам. И Отец Мой возлюбит его, и к нему приидем и обитель у него сотворим. Благословенно да будет вхождение Твое! Прииди и возсяди па престоле ума нашего, якоже прежде на жребя, и воцарися в сердцах наших и разреши вся безсловесия страстей наших, да с присноцветущими ваиами чистоты паки якоже древле дети воспоем Тебе: Аллилуиа.

Икос 11-й

Светом небесным просветися днесь святый храм, егда посетил еси его, Иисусе, и очистил еси его от куплей земных, вкупе же просветися с ним и весь святый град, якоже предрече Исаия: от Сиона бо изыде закон и слава Господня из Иерусалима, яко на страдания пришел еси, и свет, радость и любовь принесл еси Крестом Твоим. Сего ради, рекл еси учеником прежде Своего Креста: Еще мало время свет в вас есть, ходите, дондеже свет имате, да тьма вас не имет. Веруйте во свет, да сынове света будете. Сие рекл еси, Господи, да и во страданиях Твоих свет веры не угаснет учеником Твоим, и да не пойдут во тьме неверия, не ведуще, камо идут, да и вси право в Тя верующии с верою возопиют Тебе: Благословен еси, Христе, Свете мира, от мира лукаваго возненавиденный. Благословен еси, Иисусе, Солнце Правды, от присных Твоих присноблажимый и препрославленный. Благословен еси, Невечерний и Тихий Свете, на захождение Свое во Иерусалим пришедый. Благословен еси, живый во Свете неприступном, зарею Воскресения весь мир просветити грядый. Благословен еси, Сладчайший и Присноживотный Свете, в Сионе явленный, да просветиши душевную тьму мою. Благословен еси, Светильниче светяй и горяй, во Иерусалиме возженный, да паки возжеши угасший светильник мой. Благословен Грядый во имя Господне! Осанна в вышних!

Кондак 12-й

Благодать Твою подаждъ нам, Иисусе, яко же прежде отроком еврейским осанна Тебе воспевшим и познавшим Твое Божество. И ныне в пречестные дни сия, Господи, паки к нам близ буди, наипаче же к призывающим имя Твое в духе кротости и мира, смирения и любве, сподоби же и нам ощутити благодать пришествия Твоего, да и мир Божий превосходяй всяк ум, да соблюдет сердца наша и вся разумения наша о Тебе, и тако просветивши души наши, во умилении и с веселием возопием Тебе, Завет Нов завещати пришедшему нам кроплением Крови Своея: Аллилуиа.

Икос 12-й

Поюще Твое на вольную страсть во Иерусалим пришествие и неизреченное снисхождение Твое, Христе, поклоняемся предначатию Креста Твоего и с дети еврейскими веселящеся, с ваиами и ветвьми сретаем Тя, и составльше праздник, прославляем Тя, яко Ты еси воистину Мессия Христос пришедый и имеяй паки со славою приити судити живых и мертвых, не на жребяти осли седяй, но яко Царь царем и Господь господствующим, Емуже имя Слово Божие, имеяй вслед Себе не отроки, осанна поющие, но вся воинства небесная вопиющия гласом громов крепких: Аллилуиа, спасение, честь и Слава и сила Господу нашему, яко воцарися Господь Вседержитель. Сие великое шествие Твое в Сион Горний нисходящь с небесе от Бога с верою чающе, прославляем в земный Сион на всемирное заклание вхождение Твое, поюще Тебе сице: Благословен еси, Сыне Отечь, славою венчавый человека, тернием венчатися грядый, да терноносное естество наше плодоносно сотвориши. Благословен еси, Агнче Божий, вземляй грехи мира, да Кровию Своею нас падших паче снега убелиши. Благословен еси, Женише душ и сердец наших, от Чертога Твоего исходяй, да никтоже укрыется от теплоты Твоея. Благословен еси. Пастырю Добрый, входяй ныне в Твой овчий двор, да никтоже похитит нас от руки Твоея. Благословен еси, Учителю наш, Сиона ради не умолчавый до крестныя Пасхи Твоея, да други своя до конца словом и любовию на Вечери утешиши. Благословен еси, Спасителю наш, в червлены ризы напоследок облещися восхотевый, да нас яко невесту ризою Спасения и одеждою веселия украсиши. Благословен Грядый во имя Господне! Осанна в вышних!

Кондак 13-й

О Иисусе Христе, Агнче Божий, прежде век на заклание приуготованный, ныне же во Иерусалим на вольную страсть грядый! Приими малое сие с ваиами и ветвьми приносимое Тебе моление наше, да в пречестные дни сии последуем стопам Твоим в тишине и кротости духа и во умилении и чистоте сердца и тако да пребудем с Тобою и во все время земнаго странствия нашего. И сподоби нас неосужденно причаститися Божественныя радости Святыя Пасхи Твоея зде на земли, да и по пришествии в Небесный Иерусалим на веки соединимся с Тобою, со всеми святыми поюще ангельскую песнь: Аллилуиа.

(Этот кондак читается трижды, затем Икос 1-й и Кондак 1-й)

Кондак 1-й

Возбранный Воеводо, Творче неба и земли! Победителю смерти похвальное приносим пение, яко по пресветлом Твоем из мертвых Воскресении на небеса со славою вознеслся еси и с Пречистою Плотию Твоею одесную Бога и Отца возсел еси, да и наше падшее естество совознесеши с Собою, и от грехов и от вечныя смерти свободиши на веки. Мы же, Божественное Твое Вознесение празднующе, со ученики Твоими, от души Тебе вопием: Иисусе, вознесыйся от нас на небо, не остави нас сирых.

Икос 1-й

Архангелов и Ангелов лики сопредсташа Тебе, Царю всех, на Елеонстей горе, со страхом видевше Тя на высоту небесную вземлема с плотию, и прославляху величие человеколюбия Твоего, поюще Тебе тако: Иисусе, Царю Славы, взыди на небеса в воскликновении во гласе трубне. Иисусе, Господи Сил, взыди на херувимы и возлети на крилу ветреню. Иисусе, Превечный Боже, даждь гласу Своему глас силы, да трепетна будет ныне вся земля. Иисусе, Превышний Свете, яви Силу Твою на облацех, и огнь от лица Твоего да воспламенится. Иисусе, Искупителю твари, уготови на небесех Престол Твой и Царствию Твоему да не будет конца. Иисусе, Творче небу и земли, седи одесную Отца Твоего, да будет Бог всяческая во всех. Иисусе, вознесыйся от нас на небо, не остави нас сирых.

Кондак 2-й

Видевше Апостоли Тя из мертвых возставша, Владыко Господи, егда во днех четыредесятих являл еси Себе им, глаголюще о тайнах Царствия Божия, и восприявше от Тебе заповедь от Иерусалима не отлучатися, но чаяти обетования Отча, дондеже облекутся силою свыше, сошедшеся, пребываху единодушно вкупе на молитве поюще Тебе едиными усты и единым сердцем: Аллилуиа.

Икос 2-й

Разум Божественного смотрения открывая, Всеблагий Иисусе, извел еси ученики Твоя вон до Вифании, и возвед их на гору Елеонскую, начат к великому Твоего Вознесения на небо таинству готовити, глаголюще: Приближися, о друзи Мои, восхождения время, шедше убо научите вся языки слову, еже слышасте от гласа Моего, крестяще их во имя Отца и Сына и Святаго Духа. Тии же, еще земная мудрствующе, вопрошаху, не в сие ли лето устроиши Царствие Израилево. Обаче Ты рекл еси им: несть ваше разумети времена и лета, яже Отец положи во Своей власти, да выну готови будут ко сретению Своего Жениха Небеснаго, вопиюще: Иисусе, Пастырю Добрый, не разлучайся никогдаже от нас, но пребуди с нами неотступно. Иисусе, Учителю Благий, Святаго Утешителя Духа ниспосли нам, да пребудет с нами неизменно. Иисусе, Просветителю наш, просвети души наши Твоим к Небесному Отцу Вознесением. Иисусе, Спасителю наш, спаси нас от малодушия и бури Твоим заступлением. Иисусе, Наставниче наш, словом уст Твоих настави нас на Твое служение. Иисусе, Помощниче наш, Духом Твоим Святым воспомяни нам Твое Откровение. Иисусе, вознесыйся от нас на небо, не остави нас сирых.

Кондак 3-й

Силою свыше Апостолы облещи хотяй, Иисусе, егда на горе Елеонстей обетовал еси им Духа Святаго сошествие. Ты повелел еси им, да свидетелие Твои будут во Иерусалиме и во всей Иудеи, и даже до последних земли, глаголюще: Приидите и внидите враты Моими, уготовите путь Мой и путь творите людем Моим и камения от пути размещите, вознесите знамение на языки, да вси вернии воспоют с вами: Аллилуиа.

Икос 3-й

Имея бездну милосердия, Сладчайший Иисусе, ученики Твоя и жены Тебе последствовавшия и наипаче Рождшую Тя Матерь Твою радости безчисленныя исполнил еси во Твое Вознесение, егда уже отступив от них, распростерл еси руце Твои и благословил еси, глаголюще: Се Аз с вами есмь во вся дни до скончания века. Тии же, страхом исполнени, прославляху Твое милостивное снисхождение, глаголюще: Иисусе, милости Подателю, помиловати род человеческий на Елеон пришедый. Иисусе, скорбных Увеселителю, сущия с Тобою други Твоя утешити восхотевый. Иисусе, Надеждо безнадеждных, Твоим благословением при отшествии на небо нас от уныния сохранивый. Иисусе, Прибежище безприютных, Твоим Вознесением восход к Отцу Небесному и нам даровавый. Иисусе, Утешителю Благий, Утешителя Иного от Отца послати нам обещавый. Иисусе, Пастырю овцам Великий, Твоему верному стаду разсеятися не благоволивый. Иисусе, вознесыйся от нас на небо, не остави нас сирых.

Кондак 4-й

Бурю внутрь недоумения и печали многия имуще, Апостоли рыданием слез исполнишася, егда увидеша Тя, Христе, на облацех возносима и плачуще, глаголаху: Владыко, како ныне оставляеши рабы Твоя, ихже за милосердие Твое возлюбил еси, камо идеши, руками содержай концы? Мы же оставивше вся, Тебе Богу последовахом, радующеся, во веки с Тобою надежду имуще быти. Не остави нас сирых, якоже обещался еси, не разлучися от нас, Пастырю наш Добрый, но посли нам Пресвятаго Духа Твоего, наставляюща, просвещающа и освящающа души наша, да благодарственно воспоем Тебе: Аллилуиа.

Икос 4-й

Слыша рыдания ученик Твоих, Владыко Господи, о разлучении скорбящих, Ты совершеннейшее благословение преподал еси другом Твоим, глаголюше: не плачите возлюбленнии, и сетование все отрините, полезно вам есть, да Аз иду ко Отцу Моему, аще бо не иду, Утешитель не приидет. Вас ради с небесе снидох и вас ради паки восхожду на небо уготовати место вам, не оставлю бо овец Моих, яже собрах, не забуду, ихже возлюбих. Тии же Божественными словесы сими утешени бывше, со умилением возопиша Тебе: Иисусе Всеблагий, печаль и слезы наши на радость преложивый, не лиши нас и вечныя радости во Царствии Твоем. Иисусе Всещедрый, радостию исполнивый нас во Твоем Вознесении, сохрани дух наш в присном радовании и во странствии земном. Иисусе, якоже кокош собравый птенцы своя, не попусти нам по стогнам мира сего разлучитися. Иисусе, союзом любве нас на Вечери связавый, не даждь нам по действу сатанину, яко пшенице разсеятися. Иисусе, мир Твой нам в наследие оставивый, соблюди нас в единомыслии и любви Твоей. Иисусе, обители мнози в раи устроивый, уготови место нам в Небесной Обители Твоей. Иисусе, вознесыйся от нас на небо, не остави нас сирых.

Кондак 5-й

Боготечный облак пресветел зело подъят Тя, Жизнодавче Господи, учеником зрящим, егда отступив от них, благословил еси, и тако со славою многою, яко на крылех херувимских носимый, предивный восход Твой ко Отцу Твоему совершил еси на небо, еже прежде непроходимо бысть от духов злобы поднебесных и от князей власти воздушныя, ныне же внутрь Тебе прият, да от всей твари видимыя и невидимыя услышиши ангельскую песнь: Аллилуиа.

Икос 5-й

Видевше преславное Твое с плотию на небеса Восхождение, Царю твари, чини Ангельския, долу сущия, ужасшеся, глаголаху силам горнейшим: Возмите врата вечная, яко грядет Царь Славы, отверзитеся, небеса, и вы небеса небес, восприимите Господа сил и поклонитеся Ему, вопиюще: Иисусе, Славы Отчия сияние, просвети нас светом лица Твоего. Иисусе, горних умов облистание, облистай нас в невечернем дни Царствия Твоего. Иисусе, пришедый яве во огни и буре зельней, умное Твое небо свыше призови. Иисусе, Велий и Хвальный зело в горе Твоей Святей, правду Твою в небесех возвести. Иисусе, возвеличивый до небес милость Твою, яви Славу Твою по всей земли. Иисусе, возшедый на небо небеси на востоке, во век Слово Твое да пребудет на небеси. Иисусе, вознесыйся от нас на небо, не остави нас сирых.

Кондак 6-й

Проповедницы Божественныя Славы, начальнейшие чины Ангельския, сущия на высоте небесней Господствия, Престоли, мнотоочитии Херувими и шестокрылатии Серафими, отверзоша вкупе вся высоты небесныя, сретающе Тя, Владыко всяческих, и видяще Тя, вознесшагося во плоти, друг ко другу со удивлением вопияху: Кто Сей, пришедый из Едома, Державный и Сильный во брани? Кто Сей, пришедый от Васора, еже есть от плоти? Почто червлены ризы Его, яко от омочения кровию, венец терновен носяй? Сей есть воистину Царь Славы, Агнец Божий, за спасение мира закланный и воскресый, во плоти ныне грядый сести одесную Отца, Емуже выну воспевати будем: Аллилуиа.

Икос 6-й

Возсиял еси Божественною славою, Иисусе, егда естество человеческое, в Негоже облекся еси, милостивно вознесл еси, Отцу спосадил еси, и обожил еси е. Темже небеснии безплотнии чинове, чудеси удивляющеся, ужасахуся, ужасом и трепетом содержимии, Твое человеколюбие величаху. С нимиже и мы земнии Твое нас ради снисхождение и еже от нас на небеса Вознесение славословяще, молимся, глаголюще: Иисусе, струя Сый жизни, Твоим на небо Вознесением нам странникам земли путь жизни вечныя в Вышний Иерусалим указавый. Иисусе, бездна Сый милости, Твоим одесную Отца сидением плотское наше восприятие обоживый. Иисусе, вземый на рамо заблудшее естество наше, возми на Себе и моя тяжкия прегрешения. Иисусе, возшедый Плотию ко Безплотному Отцу, возведи горе моя долу поникшия помышления. Иисусе, от земли одесную Бога и Отца на горняя возшедый, даруй ми десную часть спасаемых овец получити. Иисусе, от Сиона благолепие красоты Твоея явивый, сподоби мя причастником вечнаго блаженства Твоего быти. Иисусе, вознесыйся от нас на небо, не остави нас сирых.

Кондак 7-й

Хотяй вознести и прославити падшее во Адаме естество человеческое, Ты, яко вторый Адам, возшед на высоту небесную, уготовал еси Престол Твой во век века, и сел еси одесную Бога и Отца, Божеством Твоим никакоже разлучивыйся Отеческих недр. Приидите убо обнищавшему нас ради и возшедшему одесную Отца Иисусу поклонимся, дадим величия Ему, и воспоем из глубины души: Аллилуиа.

Икос 7-й

Новое и чистое жительство открыл еси, Господи, егда с Плотию Твоею возшел еси на небеса, да состаревшийся многими грехами мир обновиши возстанием Твоим и на небеса Вознесением, показуя нам явственно, якоже Божественный Павел глаголет, яко жительство наше на небесех есть. Сего ради устранимся суетнаго мира, ум на небеса преложша, и вопиюще Тебе таковая: Иисусе, со Ангелы небесными Божеством Своим на небеса возшествием нас к небесному жительству подвизатися призвавый. Иисусе, с человеки земный Плотию, Своим от земли отшествием нас от земных пристрастий отвращатися научивый. Иисусе, поискати пришедый заблудшее овча, к незаблудшим Твоим овцам возведи нас на небеса. Иисусе, совокупити сошедый растоящаяся естества, яже на земли соедини небесным у Вышняго Отца. Иисусе, во облаце легце возшедый на небеса, сподоби нас, земная оставльше, присно взирати на небесная врата. Иисусе, седяй во славе на Престоле Божества, даждь нам, отверзше очи, от Закона разумети Твоя чудеса. Иисусе, вознесыйся от нас на небо, не остави нас сирых.

Кондак 8-й

Странно и дивно Твое Воскресение, странно и страшно Твое, Жизнодавче Христе, еже от святыя горы Божественное Вознесение, непостижимо и паче ума Твое еже одесную Отца во Плоти сидение, о Немже Давид духом глагола: Рече Господь Господеви Моему: седи одесную Мене, дондеже положу враги Твои подножие ног Твоих. Сего ради вся силы небесныя, зряще Твое на небеса возшествие, воистину покоришася под нози Твои, поюще ангельскими языки херувимскую песнь: Аллилуиа.

Икос 8-й

Весь бе в Вышних, Сладчайший Иисусе, егда волею нас ради вознеслся еси со славою на небеса и одесную сел еси Бога и Отца, но и нижних никакоже отлучился еси, зане обетовал еси пребывати неотступно в Церкви и вопиял еси любящим Тя: Аз есмь с вами и никтоже на вы. Сие милостивое обетование Твое выну помняще и храняще в сердце, с любовию вопием Тебе таковая: Иисусе, всяку власть на небеси и на земли по Вознесении Твоем восприявый, восприими нас в Твое вечное наследие. Иисусе, всякия радости ученики Твоя обетованием Святаго Духа исполнивый, исполни нас Того благодати пришествием. Иисусе, приклонивый схождением небеса, приклони пред величием славы Твоея долу приклоньшуюся мою гордыню. Иисусе, превознесши Возшествием Твоим всю тварь, превознеси горе мою душу воспевати со Ангелы Твою Святыню. Иисусе, Божий Слове, Словом Твоим небеса утвердивый, утверди в сердце моем словеса Твоя, яко да не согрешу Тебе. Иисусе, Сыне Отечь, Духом уст Твоим всю силу Твою с небес явивый, обнови Дух правый во утробе моей, яко да не оскверню себе. Иисусе, вознесыйся от нас на небо, не остави нас сирых.

Кондак 9-й

Все естество падшее человеческое, долу поникшее и грехми истлевшее, взял еси на рамо Свое, Владыко Господи, новосотворивый Собою, и превыше всякаго начала и власти возвел еси днесь и Богу и Отцу привел еси, и с Собою спосадил еси на Престоле Небеснем, да освятиши е, и спрославиши, и обожиши. Безплотнии же, удивляющеся, глаголаху: Кто Сей Красный Муж, но не Человек точию, но вкупе Бог и Человек, Емуже да поем выну: Аллилуиа.

Икос 9-й

Витии Божественнии, ученицы Твои, Спасе, Твоему преславному Восхождению удивляющеся, на небо взираху, скорбяще, Тебе вознесшуся, и се два Ангела предстаста пред ними во одежди беле, и рекоста им во утешение: Мужие Галилейстии, что стоите, зряще на небо? Сей Иисус, вознесыйся от вас на небо, такожде приидет, имже образом видеста Его идуща на небо. Сие ангельское благовестие о Втором Пришествии Твоем, Господи, ученицы Твои слышавше, в радостный трепет приидоша, с нимиже и мы радостно да воспоем Тебе таковая: Иисусе, Вознесыйся от нас во всей славе Твоей, ей, гряди скоро со Ангелы святыми Твоими. Иисусе, имеяй паки приити сотворити суд прав, ей, гряди со славою во светлости святых Твоих. Иисусе, велий и страшный зело над всеми окрестными, помилуй и защити тогда вся кроткия земли. Иисусе, прославляемый в совете святых Твоих, Сам нас спрослави во Царствии Твоем на небеси. Иисусе, прошедый небеса Плотию, благоволи провести душу по мытарствам воздушным и улицезрети Тя. Иисусе, вознесыйся на облацех небесных, сподоби нам с веселием и со дерзновением в последний день на облацех усрести Тя. Иисусе, вознесыйся от нас на небо, не остави нас сирых.

Кондак 10-й

Спасти хотя сущия с Тобою ученики, Христе Спасе, и вся верующия словеси их ради в Тя, и по Тебе последовавшая, возшел еси на небеса, да уготоваеши место им, яко в дому Отца Твоего обители многи суть, якоже Сам рекл еси ко страсти грядый, глаголя: Аще уготовлю место вам, паки прииду и поиму вы к Себе, да идеже есмь Аз, и вы будете. Сего ради сподоби и нам, Господи, по смертнем вознесении нашем обрести храмину нерукотворенну, вечну на небесех, уготованную не от древа, или сена или тростия плотских дел наших ради, яже во огне не устоят, но от злата или сребра или каменей драгих на Твоем основании назданную, идеже выну будем Тебе славити и воспевати: Аллилуиа.

Икос 10-й

Царю Предвечный, Иисусе Христе, на небеса возшедый с Пречистою Твоею Плотию и всех нас в небесное наше Отечество призвавый, возведи нас долу поверженных от мирских пристрастий и плотских мудрований к высоте небесней и даруй нам еще во дни плоти нашея чистым свидетельством совести причаститися небесныя жизни и выну вкушати в таинстве Божественныя Евхаристии небесную пищу, да от чистаго сердца и духа праваго воспоем Тебе таковая: Иисусе, Великий Архиерею грядущих благ, в Вознесение Свое прошедый небеса Плотию и возшедый не в рукотворенный храм, но в самое небо, да лику Божию от нас предстанеши. Иисусе, Небесный Архитектоне, скинию нерукотворенную на небесех соорудивый и единою вшедый во Святая Святых ко Отцу со Своею Кровию, да вечное искупление совершиши. Иисусе, Непорочный Агнче Божий, единою за грехи мира закланный, во еже вознести грехи многих, вознеси к Престолу Божию моя о гресех приношения. Иисусе, Новаго Завета Ходатаю, единою на небеса ко Отцу возшедый, во еже открыти путь в Небесную Скинию, восприими о нечистоте моей воздыхания. Иисусе, Возлюбленный Женише наш, Светосиянный Чертог на небеси уготовавый, уготови тамо место Тебе Единому служити восхотевшим. Иисусе, Добрый Пастырю Твоих овец, небесная пастбища в раи Твоему стаду произрастивый, даруй нам венцы, Тебе Единому последовати возжелавшим. Иисусе, вознесыйся от нас на небо, не остави нас сирых.

Кондак 11-й

Пение всеумиленное приношаше Божественному Вознесению Твоему, Слове, рождшая Тя Всенепорочная Мати Твоя. Та бо во страсти Твоей матерски паче всех болезноваше о Тебе, сего ради подобаше Той в прославление Плоти Твоея премножайшия насладитися радости, и с сею радостию великою сниде с Елеонския горы со Апостолы, и возвратишася вси во Иерусалим и взыдоша в горницу, и бяху вси Апостоли, терпяще единодушно вкупе в молитве, молении и пощении с женами и Мариею Материю Иисусовой, и с братиею Его, чающе Сошествия Святаго Духа, хваляще и благословяще Бога, и воспевающе Ему: Аллилуиа.

Икос 11-й

Свет вечный и нетленный возсия всему миру от Святыя горы Елеонския, идеже стоясте пречистыя нозе Твои, Христе Спасе, егда вознеслся еси со славою на небеса, зане прошед небеса с плотию, Ты отверзл еси врата небесная, падением Адамовым заключенная, и Сам Сый путь, истина и живот, открыл еси путь всякой плоти во обители Отца Твоего Небеснаго, якоже и предрекл еси Твоим, учеником, глаголя: Отселе узрите небо отверзсто и Ангелы Божия восходящыя и нисходящыя на Сына Человеческаго. Сего ради ведуще путь Твой, яко никтоже приидет ко Отцу, токмо Тобою, поем Тебе сице: Иисусе, на облацех света возшедый ко Отцу, угасший светильник души моея просвети. Иисусе, во светлостях святых Твоих вознесыйся горе, животворящий огнь Твой в сердце моем воспламени. Иисусе, паче Солнца возсиявый на высоте небесней в Вознесении Твоем, теплотою Духа Твоего хлад души моея разжени. Иисусе, Свет от Света Божества Твоего возсиявый миру от Отца, светом словес Твоих в нощи греха нас спящих просвети. Иисусе, Солнце Правды, имеяй от края небесе восход Твой и сретение Твое даже до края небесе, во всю землю вещание Твое возвещай нам всегда. Иисусе, Невечерний Свете, имеяй паки в Пришествие Твое исход Твой, яко молнию от восток и даже до запад явление Твое, огнем гнева Твоего не попали нас тогда. Иисусе, вознесыйся от нас на небо, не остави нас сирых.

Кондак 12-й

Благодать новую преподал еси, Сладчайший Иисусе, к совершению святых и в созидание Церкви Святыя Твоея, егда на небеса с Пречистою Твоею Плотию возшел еси и одесную Бога и Отца сел еси, якоже писано есть: Сшедый прежде в дольнейшия страны земли спасения нашего ради, Ты ныне восшел еси на высоту превыше всех небес, да исполниши всяческая к совершению святых, в созидание Тела Христова, сего ради пленил еси плен, и подал еси даяния человеком, дондеже достигнем вси в соединение веры и познания Тебе, Сына Божия, в мужа совершенна, в меру возраста исполнения Твоего, да тако, спасение улучивше, благодарственно воспоем Тебе: Аллилуиа.

Икос 12-й

Поюще Твое вольное на небеса со славою Вознесение, поклоняемся Твоему, Владыко Христе, одесную Бога и Отца соседению, славим Твое на небеси и на земли воцарение и веруем со Апостолы Твоими, яко воистину, имже образом возшел еси на небо, такожде паки приидеши на облацех со славою и силою многою. Тогда убо не посрами нас в Тебе верующих и тако вопиющих: Иисусе, со Отцем Твоим на Престоле Божества присно соседяй, сподоби побеждающим мир с помощию Твоею сести с Тобою во Царствии Твоем. Иисусе, со Святым Утешителем Духом Твоим выну споклоняемый, не лиши нас по обетованию Твоему Того Сошествия во служении Твоем. Иисусе, с Херувимы и Серафимы и с лики святых по Вознесении Твоем на небеси спребываяй, подаждь нам зде на молитву во Имя Твое собранным присутствие Твое ощущати. Иисусе, Святии храмы Твоя по отшествии Твоем на небо право в Тя верующим даровавый, помоги нам во храме стоящим себе на небесе быти помышляти. Иисусе, Пречистую Матерь Твою со Апостолы в Вознесение Твое на молитву за весь мир по Себе оставивый, не остави нас без предстательства святых Твоих. Иисусе, Церковь, Невесту Твою на земли по Вознесении Твоем до скончания века оставивый, не лиши нас чад Тоя благодатных даров Твоих. Иисусе, вознесыйся от нас на небо, не остави нас сирых.

Кондак 13-й

О Пресладкий и Всещедрый Иисусе, вознесыйся от нас на небо и седением одесную Бога и Отца помиловавый и обоживый падшее естество наше! Призри с высоты небесныя на немощныя и к земли поверженныя рабы Твоя и даруй нам силу свыше побеждати вся искушения от плоти, мира и диавола находящия на ны, да горняя будем мудрствовати, а не земная. И сохрани нас от всех врагов видимых и невидимых возстающих на нас. По кончине же земныя жизни нашея вознеси души наша в небесныя обители, идеже со всеми святыми выну воспевати будем: Аллилуиа.

(Этот кондак читается трижды, затем Икос 1-й и Кондак 1-й)

Молитва

Господи Иисусе Христе, Боже наш, сошедый с Небесных высот Спасения нашего ради и напитавый нас духовною радостию во святыя и пресветлыя дни Воскресения Твоего, и паки по совершении земнаго служения Твоего вознесыйся от нас на небо со славою и возседый одесную Бога и Отца! В сей ясный и всесветлый день Божественнаго на небеса восхождения Твоего земля празднует и ликует, радуется и небо Вознесением днесь Творца твари, человецы славословят непрестанно, зряще заблуждшее и падшее естество Свое на рамо Твое, Спасе, вземлемо и на небеса вознесенное, Ангели же веселятся, глаголюще: Кто Сей, пришедый во славе, силен во брани, Сей воистину Царь Славы?! Сподоби и нам немощным, земная еще мудрствующим и плотоугодия творити непрестающим, восход Твой на небо страшный помышляющи и празднующе, плотская и житейская отложити попечения и со апостолы Твоими на небо ныне взирати всем сердцем своим и всеми помышленьми своими, поминающе, яко тамо на небеси горе жительство наше есть, здесь же на земли мы точию странники и пришельцы есмы, отшедшия из дома Отча в страну далечу греха. Сего ради усердно просим Тя, преславным Вознесением Твоим, Господи, оживи нашу совесть, еяже нужнейши ничтоже есть в мире, возведи нас из плена сего греховнаго плоти и мира и сотвори нас горняя мудрствовати, а не земная, яко да не ктому себе угождати будем и жити, но Тебе Господу и Богу нашему служити будем и поработаем, дондеже отрешившеся от уз плоти и прошедши невозбранно воздушныя мытарства, достигнем небесных обителей Твоих, идеже, ставше одесную величествия Твоего, со Архангелы и Ангелы и всеми святыми прославляти будем всесвятое имя Твое со Безначальным Твоим Отцем и Пресвятым и Единосущным и Животворящим Твоим Духом, ныне и присно и во веки веков, аминь.

Кондак 1-й

Предвечный Царю веков и Господи, всея твари видимыя и невидимыя Содетелю, Емуже, в Троице Святей славимому Богу, всяко колено покланяется небесных, земных и преисподних: темже и мы, яко крещеннии в Трисвятое имя Твое, аще и недостойнии, хвалебное сие дерзаем приносити Тебе пение: Ты же, яко Творец, Промысленник и Судия наш, вонми гласу раб Твоих, и не отстави милости Твоея от нас, да из глубины души выну зовем Ти: Свят, Свят, Свят еси Господи Боже наш, помилуй ны, падшее создание Твое, имене ради Святаго Твоего!

Икос 1-й

Архангели и Ангели, Начала и Власти, Престоли и Господствия, предстояще Престолу Славы Твоея, не довлеют изрещи величия совершенств Твоих: многоочитии же Херувими и шестокрилатии Серафими, закрывающе лица своя, точию с трепетом и любовию взывают: Свят, Свят, Свят Господь Саваоф! Нам же, яко прах и пепел есмы, кольми паче удобь хранити молчание: да не толиких щедрот, в создании и искуплении на нас излиянных, непамятливы явимся и неблагодарни, но, подражающе горнему славословию, с верою и любовию взываем: Свят, еси Господи Боже наш, неисповедимая совершенств высото и неизследимая таин пучино! Свят еси Господи Боже наш, везде Сый и вся исполняяй, Един и Тойже вчера, днесь и во веки! Свят еси Господи Боже наш, вся могий, осуществуяй не сущая, низводяй даже до ада и паки позводяй! Свят еси Господи Боже наш, испытуяй сердца и утробы человеческия, исчитаяй звезды и всем им имена нарицаяй! Свят еси Господи Боже наш, Егоже вси путие истинны и вся судьбы оправданы вкупе и вожделенны! Свят еси Господи Боже наш, наказуяй чада за грехи отцев, милуяй же и награждаяй в роды родов! Свят, Свят, Свят еси Господи Боже наш, помилуй ны, падшее создание Твое, имене ради Святаго Твоего!

Кондак 2-й

Видев Тя Исаиа на Престоле высоце и превознесенне, глаголаше: о окаянный аз, яко человек сый и нечисты устне имый, и Царя Господа Саваофа видех очима моима! Егда же угль горящий, от Ангела носимый, прикоснуся устом прочим, чисте восхваляше Тебе Отца, и Сына, и Святаго Духа, Единаго Бога. Попали убо, о Пресвятая Троице, огнем Божества Твоего терние и наших многих беззаконий, да чистым сердцем возопием Тебе: Аллилуиа!

Икос 2-й

Разум неуразуменный разумети ищя великий во пророцех Моисей, глаголаше Господеви: покажи ми славу Твою, да вижду Тя! Той же к нему: задняя Моя узриши, лице же Мое не явится тебе: не бо узрит человек лице Мое, и жив будет. Нам же, аще и недостойни, благоволил еси явити Себе в Лице Единороднаго Сына Твоего. Темже благодарне вопием: Свят еси Господи Боже наш, Серафимов пламенногорящая любы и Херувимов выну светящая премудросте! Свят еси Господи Боже наш, небесных Престолов превышний Царю и премирных Господствий всеистинный Господи! Свят еси Господи Боже наш, Вышних Сил непобедимая Сило и Горних Властей всемогущий Властителю! Свят еси Господи Боже наш, Архангелов всерадостное благовестие и Ангелов неумолкающая проповедь! Свят еси Господи Боже наш, разумных Начал верховное Всеначало, и всех прочих небесных чинов державный Повелителю; Свят еси Господи Боже наш, Един имеяй безсмертие и живый во Свете Неприступнем, со избранными же Твоими, яко со други, лицем к лицу беседуяй! Свят, Свят, Свят еси Господи Боже наш, помилуй ны, падшее создание Твое, имене ради святаго Твоего!

Кондак 3-й

Силою неизреченнаго могущества Твоего вся содержиши, Словом неизследимыя Премудрости Твоея вся строиши, Духом уст Твоих вся живиши и радуеши, о Трисолнечне Вседетелю! Измерил бо еси небо дланию и землю пядию, носиши и питаеши всю тварь, вся по имени призываеши, и несть могий утаитися властительныя десницы и взора Твоего: и мы, во умилении припадающе, со всеми небесными и земными поем Ти: Аллилуиа!

Икос 3-й

Имеяй всякое создание повелению Твоему работно, являеши всюду следы Промысла и неизчетных совершенств Твоих: темже видяще невидимая Твоя и присносущную Силу и Божество, со удивлением и радостию зовем: Свят еси Господи Боже наш, властительный Содетелю видимых и невидимых, и любвеобильный Строителю минувших, настоящих и грядущих! Свят еси Господи Боже наш, от четырех стихий сочинивый тварь и четырьми времены круг лета венчавый! Свят еси Господи Боже наш, повелевый солнцу светити во дни, и луне со звездами просвещати нощь! Свят еси Господи Боже наш, изводяй ветры от сокровищ, одеяй небо облаки, и посылаяй дождь и росу в прохлаждение зноя! Свят еси Господи Боже наш, препоясуяй холмы радостию и удолия веселием, украшаяй крины сельныя и венчаяй поля класами! Свят еси Господи Боже наш, посылаяй пищу птенцем врановым, напаяяй вся звери сельныя, и полагаяй щедроты Своя на всех делех Своих! Свят, Свят, Свят еси Господи Боже наш, помилуй ны, падшее создание Твое, имене ради Святаго Твоего!

Кондак 4-й

Злочестивыя ереси Ария безумнаго отвержеся, мы, аще и ино лице Отчее, ино Сыновнее, ино Святаго Духа глаголем: обаче Отчее, Сыновнее и Святаго Духа Едино Божество, равну силу, соприсносущно величество сердцем и устны исповедуем и, яко Трисолнечным светом в купели крещения озареннии, Отцу и Сыну и Святому Духу, Единому Богу, покланяемся, зовуще: Аллилуиа!

Икос 4-й

Слышавше пастырие и учителие Святыя Церкви Ария, яко лютаго зверя, вторгшася в словесное стадо Христово, и восхищающа, яко овцы, от истиннаго исповедания веры православныя, сошедшеся на Соборе в Никеи, Христа истиннаго Бога, а не тварь исповедаша, и Сына равна Отцу и Святому Духу чтуще, громогласне возгласиша: Свят еси Господи Боже наш, Отче, Сыне и Душе Святый, Единый истинный Бог, а не три бози! Един несозданный, а не три особь несозданнии! Свят еси Господи Боже наш, Отец предвечно раждаяй Сына, Сын безлетно от Отца раждаемый, Дух Святый от век от Отца исходяй, но не раждаяйся! Свят еси Господи Боже наш, Отец, воззвавый нас от небытия, Сын, искупивый нас Крестом Своим, Дух Святый, животворяяй всех Своею благодатию! Свят еси Господи Боже наш, души и телеса наша, яко скинию, на вселение Свое основати благоволивый, и всеконечне грехом разрушитися ей не попустивый! Свят еси Господи Боже наш, знамение Триипостаснаго Существа Своего на всех делех руку Своею в мире видимом и невидимом положивый! Свят, Свят, Свят еси Господи Боже наш, помилуй ны, падшее создание Твое, имене ради Святаго Твоего!

Кондак 5-й

Пребезначальная и Вседетельная Троице, создав нас по образу и по подобию Твоему, заповедала еси творити угодная пред Тобою: мы же, окаяннии, злую волю нашу возлюбивше, образ Твой помрачихом. Ныне же паки к Тебе прибегаем и молимся: подаждь нам благодать Твою, исхити нас из руки враг видимых и невидимых, и спаси ны, имиже веси судьбами, да во веки веков зовем Ти: Аллилуиа!

Икос 5-й

Видя превосходящая разум совершенства Твоя и неизреченная благодеяния к сынам Адамовым, благодарным умом, благодарным сердцем, благодарными усты, от Тебе созданными, преклоньше выя сердец наших, глаголем: Свят еси Господи Боже наш, в Триипостасном Совете Твоем сотворити человека положивый, и в тело его, от персти взятое, дыхание жизни от уст Твоих вдохнувый! Свят еси Господи Боже наш, образом и подобием Твоим в лице Адама всех нас одаривый, и рая сладости наследники учинивый! Свят еси Господи Боже наш, всю тварь дольнюю человеком покоривый! Свят еси Господи Боже наш, пищу райскую нам даровавый и даром безсмертия ны наделивый! Свят еси Господи Боже наш, преслушавших заповедь Твою прародителей и по грехопадении не оставивый! Свят еси Господи Боже наш, благодатию Твоею в купели крещения нас возраждающий! Свят, Свят, Свят еси Господи Боже наш, помилуй ны, падшее создание Твое, имене ради Святаго Твоего!

Кондак 6-й

Проповедник правды и ревнитель Святаго имени Твоего, Илиа досточудный, воззван от Ангела, ста в горе Хориве: бысть же дух крепок, низлагаяй горы, бысть трус велий и огнь палящ, обаче не в сих Тя виде, и во гласе хлада тонка. Покрыв убо лице милотию, с веселием и страхом свытый пророк взываше: Аллилуиа!

Икос 6-й

Возсияв в просвещение миру сиянием Трисветлаго Божества Твоего, Триипостасный Боже и Господи, отгнал еси вся идольская заблуждения. Весь же род человеческий от тьмы язычества во свет Евангелия привел еси, имже озареннии, славим вседержавный Промысл Твой, зовуще: Свят еси Господи Боже наш, грехом растленную тварь водами потопными потребивый и в лице Ноя весь род человечь обновивый! Свят еси Господи Боже наш, Авраама от смешения язык отлучивый и потомство его, яко звезды небесныя, умноживый! Свят еси Господи Боже наш, изведый люди Своя из Египта, в пустыне их манною препитавый и введый в землю, кипящую медом и млеком! Свят еси Господи Боже наш, Давида воздвигнувый, Духом Своим пророки исполнивый и теми во Израиле веру в Искупителя обетованнаго сохранивый! Свят еси Господи Боже наш, Вавилонским пленом люди Своя наказавый и, по скончании его, паки Иерусалиму возградитися повелевый! Свят еси Господи Боже наш, в вере отеческой Маккавеи непоколебимы даже до смерти показавый, и Церковь подзаконную, яко невесту, до пришествия возлюбленнаго Жениха, целу соблюдый! Свят, Свят, Свят еси Господи Боже наш, помилуй ны, падшее создание Твое, имене ради Святаго Твоего!

Кондак 7-й

Хотя явити величие любве и милосердия Твоего к падшему роду человеческому, послал еси Сына Твоего Единороднаго, от Жены раждаема и под законом бываема: да подзаконныя искупит, Иже, пожив на земли яко Человек и искупив ны Крестом Своим, вознесеся на небо, отнюдуже, исполняяй обетование, низпосла нам Духа Своего Пресвятаго, да зовем вси: Аллилуиа!

Икос 7-й

Дивное воистинну и новое показал еси чудо, дивный в высоких, Господи, егда по низпослании Пресвятаго Духа на избранныя ученики и апостолы Твоя, извел еси я на проповедь, да возвестят великое имя Пресвятыя Троицы и пленят вся языки в послушание веры. Темже, чудящеся силе и действию богодухновенных словес их, с радостию зовем: Свят еси Господи Боже наш, избравый немощная, худородная и буия мира, да посрамят крепкия, славныя и премудрыя! Свят еси Боже наш, сонмы безчисленныя мучеников воодушевивый, да кровию запечатлеют истину Евангелия Христова! Свят еси Господи Боже наш, сердце равноапостольнаго Константина знамением Креста преклонивый, и тем конец лютым гонением на христиан положивый! Свят еси Господи Боже наш, седмию Вселенскими Соборы, яко седмию столпы, Церковь оградивый и еретическим треволнениям неприступну ю сотворивый! Свят еси Господи Боже наш, богомудрым учителем и великим подвижником благочестия, яко пресветлым звездам на тверди Церкви, возсияти даровавый! Свят еси Господи Боже наш, Владимира, великаго князя земли Русския, к свету истинныя веры приведый, и тем землю нашу от прелести многобожия свободивый! Свят, Свят, Свят еси Господи Боже наш, помилуй ны, падшее создание Твое, имене ради Святаго Твоего!

Кондак 8-й

Странно и чудно у дуба Мамврийска узрев Тя Авраам во образе Триех Мужей, аки со единым беседоваше, глаголя: Господи, аще обретох благодать пред Тобою, не мини раба Твоего! Трием убо, в Триех явльшихся ему Лицах, Отцу, и Сыну, и Святому Духу, Единому же в существе Богу, до земли поклонися, зовый: Аллилуиа!

Икос 8-й

Весь еси везде и всегда, не точию могуществом неизчетныя силы Твоея, но и богатством вседетельнaro Промышления Твоего о всяцем создании Твоем: нам же, якоже рече Сын Твой, и власи главнии вси изочтени суть у Тебе, да ни един из них падет без воли Твоея: темже, уповающе на Промысл Твой, со дерзновением и любовию зовем: Свят еси Господи Боже наш, благоволивый всему роду человеческому разделитися на племена и языки, и коемуждо их место и время жительства указавый! Свят еси Господи Боже наш, царие во главу языков поставляяй и избранных Своих, яко зеницу ока, соблюдаяй! Свят еси Господи Боже наш, от Негоже исходит всяка премудрость и разум, всяка крепость и сила, всяко здравие и лепота! Свят еси Господи Боже наш, наводяй и отъемляй брани, венчаяй победою правое оружие, нeправое же, посреде самых побед, сокрушаяй! Свят еси Господи Боже наш, даяй знамения на небеси и на земли, посылаяй огнь, язву и глад на люди, да не до конца заблудят от путей Твоих! Свят еси Господи Боже наш, возносяй смиренныя от земли, еже посадити со князи людей Своих, и низлагаяй гордыя, яко не обрестися месту их! Свят, Свят, Свят еси Господи Боже наш, помилуй ны, падшее создание Твое, имене ради Святаго Твоего!

Кондак 9-й

Всякое естество, горе и низу, непрестанно славит Тя, предвечнаго Творца и Бога: Свят, Свят, Свят на небеси день и нощь взывают, на земли же мы, яко украшеннии образом присносущныя Твоея славы, со всею тварию к Тебе молимся и от Тебе великия и богатыя милости чаем, зовуще: Аллилуиа!

Икос 9-й

Вития многовещанныя не могут разумети, аще и много труждаются мыслию о Таинстве Пресвятыя Троицы: како в Триех совершенных Лицех Един есть естеством Бог. Мы же веруем точию сему и исповедуем, и коегождо из Триех Божественных Лиц неизчетная благодеяния к нам добре ведуще, с верою и благодарением зовем: Свят еси Господи Боже наш, праведным судом Твоим всем нам в землю, от неяже взяты есмы, возвратитися, и паки в день воскресения из нея востати положивый! Свят еси Господи Боже наш, солнцу, луне и звездам некогда померкнути, земле и всему, еже на ней, огнем преобразится предопределивый, да вместо их явится небо ново и земля нова, в нихже правда живет! Свят еси Господи Боже наш, уставивый день, воньже предстанут на суд вся племена и языцы, да восприимет кийждо по делом своим! Свят еси Господи Боже наш, имеяй в день воздаяния рещи праведным: приидите благословеннии Отца Моего, наследуйте Царствие, уготованное вам от сложения мира! Свят еси Господи Боже наш, от Него же нераскаяннии грешницы услышат тогда со страхом: отъидите от Мене проклятии во огнь вечный, уготованный диаволу и аггелом его! Свят еси Господи Боже наш, обещавый Церковь Свою до конца мира непоколебиму соблюсти, во еже неодоленней быти ей от врат адовых! Свят, Свят, Свят еси Господи Боже наш, помилуй ны, падшее создание Твое, имене ради Святаго Твоего!

Кондак 10-й

Спасти хотя мир, явилася еси на Иорданстей реце, Пребожественная Троице: Отец во гласе с неба, свидетельствуяй о возлюбленнем Сыне, Сын во образе человечестем, приемляй Крещение от раба, Дух Святый, в виде голубине сходяй на Крещаемаго: темже Единаго Бога, в Триех Лицех славим, зовуще: Аллилуиа!

Икос 10-й

Царю Превечный, Иже солнце Свое сияет на злыя и благия и дождит на праведныя и неправедныя, просвети ум наш светом богоразумия Твоего, сердца же наша одожди очистительною благодатию Твоею, да чистым сердцем и усты со умилением зовем Ти: Свят еси Господи Боже наш, о Немже апостольский лик яве глаголет, к Нему же пророческий собор выну взирает! Свят еси Господи Боже наш, Егоже полк мученический боголепно исповедует, и преподобных воинство Пресвятое имя славословит! Свят еси Господи Боже наш, о Немже пустынников множество присно воздыхает, от Негоже постников подвиги венчаются! Свят еси Господи Боже наш, Емуже святителие и пастырие благодарственное приносят пение, Имже вселенстии учителие во спасение наше богомудрствуют! Свят еси Господи Боже наш, приими мольбу о нас и предстательство всех святых, паче же простирающую к Тебе о нас руце Своя, Деву Пречистую! Свят еси Господи Боже наш, огради нас святыми Твоими Ангелы, и отжени от нас духов злобы поднебесных! Свят, Свят, Свят еси Господи Боже наш, помилуй ны, падшее создание Твое, имене ради Святаго Твоего!

Кондак 11-й

Пение всякое изнемогает, тщащеся принести должное благодарение о всех и за вся Тебе, в Троице славимому Богу: не имамы бо разума, могуща простретися мыслию ко множеству щедрот Твоих, ниже слов, во еже достойне изрещи я, обаче за вся нам подаемая буди Тебе, Пресвятая Троице, благодарение, честь и слава, яковы же Ты Сама Твоего величества достойны веси. Мы же, покланяющеся Тебе, со смирением и любовию зовем: Аллилуиа!

Икос 11-й

Яко светоподательна светильника во обетованиих Твоих сущим во тьме неведения благодарне исповедующе Тя и поне единаго из блаженств, Единородным Сыном Твоим возвещенных, улучити желающе, всеумильно с верою вопием: Свят еси Господи Боже наш, уготовавый избранным Своим блага, ихже око не виде, ухо не слыша и на сердце человеку не взыдоша! Свят еси Господи Боже наш, Егоже вси чистии сердцем узрят и познают, якоже от Него сами познани суть! Свят еси Господи Боже наш, в Немже вси алчущии и жаждущии правды николиже оскудевающее насыщение обретут! Свят еси Господи Боже наш, от Негоже миротворцы, яко подражатели вся умиротворившаго Единороднаго Сына Твоего, сынове Божии нарекутся! Свят еси Господи Боже наш, от Негоже кротцые наследят землю, и нищии духом улучат некончаемое Царствие! Свят еси Господи Боже наш, Иже милующим помилование и плачущим радование даровал еси! Свят, Свят, Свят еси Господи Боже наш, помилуй ны, падшее создание Твое, имене ради святаго Твоего!

Кондак 12-й

Благодать Твою всесильную подаждь нам, Пресвятая Троице: приими исповедание грехов наших пред величеством славы Твоея, призри на воздыхания наша, низпосли нам духа умиления и щедрот, да, очищеннии душею и сердцем, сподобимся неосужденно звати к Тебе на земли, якоже взывают Ангели на небеси: Аллилуиа!

Икос 12-й

Поюще Твое всечеловеколюбное смотрение, славим Тя, Пребезначальная Троице, веруем во Единаго Бога Отца, Бога Сына и Бога Духа Святаго, иного бо, разве Тебе, Господа не вемы, к Тебе припадаем и Тебе молимся, вопиюще: Свят еси Господи Боже нaш, буди нам во спасение, да не убоимся никоегоже зла, и в защищение живота нашего, да не устрашимся никоегоже врага! Свят еси Господи Боже наш, кающияся грешники спасаяй, спаси убо и нас многогрешных! Свят еси Господи Боже наш, умножаяй всем милость, умножи ю на нас, и помилуй ны, яко немощни есмы! Свят еси Господи Боже наш, даруй нам время покаяния и не осуди нас на посечение со смоковницею безплодною! Свят еси Господи Боже наш, избави ны искушений, от мира, плоти и диавола находящих, и укрепи в вере и любви к Тебе! Свят еси Господи Боже наш, сподоби ны лицем к лицу узрети Тя, и внити в светлый чертог Твой! Свят, Свят, Свят еси Господи Боже наш, помилуй ны, падшее создание Твое, имене ради Святаго Твоего!

Кондак 13-й

О Пресвятая, Животворящая, Неразделимая и Вседетельная Троице, Отче, Сыне и Душе Святый, Едине истинный Боже и Творче наш! Нынешнее приемши благодарение, низпосли на ны благодать и силу с высоты Святаго Престола Твоего, да, плотския похоти поправше, во всяком благочестии и чистоте поживем до конца дней наших, выну восхваляюще Пресвятое имя Твое и зовуще: Аллилуиа!

(Этот кондак читается трижды, затем Икос 1-й и Кондак 1-й)

Молитва

Пресвятая Троице, единосущная Державо, всех благих вина. Что воздадим Тебе за вся, яже воздала еси нам грешным и недостойным, прежде, неже в мир сей родихомся, за вся, яже воздаеши коемуждо от нас по вся дни, и яже уготовала еси всем нам в веце грядущем. Подобаше убо, за толикия благодеяния и щедроты, не словесы точию, но паче делы, Тя благодарити, храняще и исполняюще заповеди Твоя. Мы же, страстем нашим и злым обычаем внемше, в безчисленныя от юности низвергохомся грехи и беззакония. Сего ради, яко нечистым и оскверненным, не точию пред Трисветлое Лице Твое безстудно явитися, но ниже имене Твоего Пресвятаго изрещи довлеяше нам, аще бы не Ты Сама во отраду нашу возвестити благоизволила, яко чистыя и праведныя любящи, и грешнии кающияся милуеши, и с радостию приемлеши. Призри убо, о Пребожественная Троице, с высоты Святыя Славы Твоея на нас, многогрешных, и благое произволение наше вместо благих дел приими, и подаждь нам духа истиннаго покаяния, да всякий грех возненавидевше, в чистоте и правде до конца дней наших поживем, творяще пресвятую волю Твою и славяще чистыми помыслы и благими деяньми пресвятое и великолепое имя Твое, аминь.

Кондак 1-й

Возбранный Воеводо и Царю Славы, Тебе небеси и земли Создателя, зрящи на горе Фаворстей преобразившася со славою, вся тварь удивися, небеса вострепеташа, и вси земнороднии возрадовашася, мы же недостойнии Твоему нас ради Преображению благодарственно поклонение приносяще, с Петром вопием Ти: Иисусе, Превечный Боже, добро нам всегда быти под кровом благодати Твоея.

Икос 1-й

Ангелом недоведомое и человеком неприступное Твое, Светодавче Христе, Божество, незаходительными молниями и лучами Невечерняго Света Твоего, явил еси на горе Фаворстей начальнейшим учеником Твоим, тии же Божественным изменишася ужасом, облаком осиявшеся светлым и глас Отечь слышавше, разумеша Твоего вочеловечения таинство, вопиюще Тебе таковая: Иисусе, Сыне Божий Безсмертный, просвети нас светом Лица Твоего осияннаго. Иисусе, Благий Боже Всесильный, возбуди нас спящих из глубины тьмы сна греховнаго. Иисусе, во свете живый неприступнем, из области темныя изведи нас. Иисусе, Славою Твоею исполнивый весь мир, во обители райския введи нас. Иисусе, Свете мира, от мира лукавого свободи нас во тьме седящих. Иисусе, Солнце Правды, силою и правдою облеки нас, в сени смертней спящих. Иисусе, Превечный Боже, добро нам всегда быти под кровом благодати Твоея.

Кондак 2-й

Видя, яко ученицы Твои, Человеколюбче Господи, непросвещенни еще суще, не разумеют, яко подобает Тебе идти во Иерусалим и тамо много пострадати и убиену быти, Ты оттоле начал еси сказовати им, яко вся сия належит Тебе волею претерпети нашего ради спасения. Обаче тии не возмогоша еще мыслити, яже суть Божия, но яже суть человеческая, сего ради по днех шестих поял еси Петра, Иакова и Иоанна и возвел еси я на гору Фаворскую показати им прежде Креста Божественную Славу Твою, да и во время страданий Твоих разумно воспоют Тебе: Аллилуиа.

Икос 2-й

Разума неуразуменна вольнаго Твоего страдания не разумеша ученицы Твои, Господи. Сего ради прежде Креста Твоего нощию глубокою возвел еси на гору высоку лучшия ученики Твоя, да видят чудо страшнаго Преображения Твоего и нестерпимое Божественного пришествия Твоего издалеча присносущное благолепие, да егда Тя узрят распинаема, страдание убо Твое, да уразумеют вольное. Сего ради вопием Тебе сице: Иисусе, от удолий на гору высоку возведый Твоя ученики, возведи и нас горе, да горних научимся искати наслаждений. Иисусе, от житейских попечений и множества народнаго отлучивый Петра и Заведеовых, отлучи наш ум от благ земных, да дольных навыкнем избегати пристрастий. Иисусе, многими труды на превелию высоту вознесый други Своя, и нас многими труды и поты научи по вся дни подвизатися. Иисусе, в молчании ночныя молитвы Преображение Твое учеником показавый, и ныне верным Твоим сподоби сладостию словес Твоих в нощи просвещатися. Иисусе, трех точию свидетелей славы Твоея в тишине Фаворстей явивый, и ныне безмолвным и пустынным даждь славу Твою всегда созерцати. Иисусе, Фавор и Ермон о имени Твоем возвеселивый, даждь нам призыванием сладчайшаго имени Твоего восход горе совершати. Иисусе, Превечный Боже, добро нам всегда быти под кровом благодати Твоея.

Кондак 3-й

Силою свыше избранныя Твоя Апостолы облекий, Иисусе, на Фавор возвел еси я, да навыкнут вышних искати и горняя мудрствовати, а не земная, облецы и нас, долу поникших и немощию плоти всегда побеждаемых, силою и славою Твоею, да сила Твоя в немощи нашей совершится, чесо ради с любовию воспоем Тебе: Аллилуиа.

Икос 3-й

Имеяй прежде Креста и вольнаго страдания Твоего явити учеником отчасти Божества Славу Твою, Христе Спасе наш, Ты трех точию от живущих на земли избираеши, да зрителие Божественныя Твоея славы будут, ибо тии три пред очима Твоима лучши бяху паче всех народов и язык: Петр, яко паче иных Тебе возлюбивый, и яко первый от всех Сына Божия Тебе исповедавый, Иаков, яко первый во Апостолех надежды ради будущих благ под меч главу свою преклонивый и тако начало мучеником Твоим положивый, Иоанн же, яко девственник и паче всех чистоту плоти и духа целомудренно сохранивый и сего ради благодать особную паче иных получивый к зрению неизреченных откровений и Божественныя Славы Твоея. С нимиже приими и от нас похвалы Тебе сицевыя: Иисусе, от Петра прежде Преображения Твоего исповедание веры приемый, приими и мое теплое исповедание. Иисусе, тому же Петру на Фаворе дерзновение даровавый глаголати с Тобою, возглаголи благая и мирная в сердце моем. Иисусе, сынов Заведеивых за пламень любви их сынами громовыми нарекий, громом гнева Твоего не порази мя. Иисусе, тем же учеником огнь с небесе на Самарян низвести не попустивый, огнь страстей угаси во мне. Иисусе, с девственным Иоанном в чистоте плоти и духа на Фавор горний возведи мя. Иисусе, с мужественным Иаковом, первее чащу Твою испившим, в рай введи мя. Иисусе, Превечный Боже, добро нам всегда быти под кровом благодати Твоея.

Кондак 4-й

Буря Богоявления Твоего на горе Синайстей бысть, егда во громех и молниях даровал еси закон угоднику Твоему Моисеови, такожде и на горе Хориве бысть дух крепок, разоряяй горы, трус и огнь, егда Илия пророк хотяше зрети Тя, обаче не в вихре бурне, не в трусе и не во огне Господь, но во гласе хлада тонка Ты показал еси им лице Свое и Славу Божества Своего, егда на горе Фаворстей Ты предстал еси им, с радостию вопиющим Тебе: Аллилуиа.

Икос 4-й

Слышавше Моисей и Илия на Фаворе глаголы Твоя о исходе Твоем, егоже хотяше скончати во Иерусалиме, быша всему миру свидетелие Твои, Господи, яко Ты еси воистину Сын Божий на спасение людей от Бога Отца посланный и гласом с небесе Тем показанный. Моисей убо от мертвых призван бысть да свидетельствует во аде держимым Твое в мир пришествие. Илия же от рая призван бысть, да скажет Еноху Славу Твою в Преображении пречистыя Плоти Твоея виденную. Мы же, чудящеся тайне пророк Твоих на Фаворе явления, со умилением зовем Тебе: Иисусе, Боговидцу Моисею, лице Твое узрети восхотевшему, на Фаворе лицем к лицу явивыйся, яви нам в грядущем веце лица Твоего сладость превожделенную. Иисусе, в боговидении задних Твоих древле Моисею сияние Славы Твоея показавый, покажи нам во Царствии Твоем лицем к лицу Зрака Твоего доброту неизреченную. Иисусе, в тишине и гласе хлада тонка Илию откровением Своим наставивый, настави мя чудно в тишине безстрастия Божественнаго. Иисусе, на огненней колеснице неопальнаго небошественника Твоего Илию в рай возведый, возведи мя дивно на высоту жития совершеннейшаго. Иисусе, древле с пророки многообразно глаголавый, и на Фаворе исход Свой им возвестивый, глаголами живота вечнаго напитай алчущую душу мою. Иисусе, при устех двою свидетелей тайну Преображения учеником Твоим открывый, воздыханьми неизглаголанными Святаго Духа воспламени хладную веру мою. Иисусе, Превечный Боже, добро нам всегда быти под кровом благодати Твоея.

Кондак 5-й

Боготечней звезде в нощи возсиявшей, уподобися, Светодавче Господи, неизреченное осияние пречистыя Плоти Твоея, егда учеником спящим и нощи, уже ко утру приближающейся, Ты возносил еси Отцу Твоему на высоте горы премирную молитву Свою. Тогда просветися лице Твое, яко солнце, и ризы Твоя быша блещащяся, белы зело, яко снег. Апостоли же от нашедшия Божественный силы убудившеся, увидеша Славу Твою, яко Единороднаго от Отца, исполнь благодати и истины, и стояху трепетни, поюще Тебе: Аллилуиа.

Икос 5-й

Видевше Апостоли Тя на Фаворе во образе человечестем сущаго, славою же Божественною преобразившася и с Моисеом и Илиею о исходе Твоем беседующа, разумеша присносущную силу Твою и Божество под покровом плоти сокрываемо, и ужасни быша, послушающе глаголемых и наслаждающеся зрения Твоея Божественныя Славы, юже толико видеша, елика телесных очес зрение их вместити можаше. С нимиже и мы поем Тебе таковая: Иисусе, возсиявый учеником Твоим неизреченную и Богосиянную Славу Твою, возсияй в душах наших Свет Твой присносущный. Иисусе, причастивый первостоятели закона и благодати премирнаго Света Твоего, причащением Того собери ум наш приснозаблудший. Иисусе, сокровенную во плоти молнию Божества Твоего на Фаворе мало обнаживый, обнажи сокровенныя грехопадения в убогой совести моей Иисусе, несозданнаго Света Твоего лучами из Плоти Твоея святую гору озаривый, озари свет заповедей Твоих во мрачней души моей. Иисусе, Преображением причистыя Плоти Твоея просветивый мира концы, просвети и украси нас помраченных. Иисусе, блистанием Фаворскаго Света Твоего очистивый, яко снег, Твоя ученики, очисти и обнови нас потемненных. Иисусе, Превечный Боже, добро нам всегда быти под кровом благодати Твоея.

Кондак 6-й

Видевше преблагостное и спасительное собеседование Твое, Христе Боже наш, со Моисеом и Илиею на горе Фаворстей, возрадовашеся зело ученицы Твоя: Петр, Иаков и Иоанн. Петр же гласом любве божественныя исполненным, рече: Господи, добро сеть нам зде быти: аще хощеши, сотворим зде три сени, Тебе едину, и Моисеови едину, и едину Илии. Мы же недостойнии, не дерзаем прямо Тебе вопрошати, обаче смиренно о помиловании молим Тя и гласом трепетным вопием Ти: Аллилуиа.

Икос 6-й

Возсия на Фаворе во знамение всей вселенней облак светел, Петру о сенях вопрошающу, откровение гласа Отеческаго возвещающ и Духа Святаго пришествие, и егда осени Апостолы, верх горы окружающе, тии паче убояшася и во облак со страхом вступивше, ощутиша Твое неприступное Божество, и со дерзновением многим возопиша к Тебе таковая: Иисусе, Израиля древле столпом облачным в пустыне путеводивый, Сам и ныне путь во Царствие Твое нам укажи. Иисусе, Апостолы Твоя во облаце светле на Фаворе осенивый, росою Духа Твоего Святаго нас осени. Иисусе, во Храме нерукотвореннем живый на Небеси, храм световиден и сень пречистую покажи ми Твоего Божества. Иисусе, скиний рукотворенных не восхотевый на земли, внутреннюю благообразную скинию Духа Твоего сотвори мя, во еже взыти на Небеса. Иисусе, одеяйся светом, яко ризою, облеки мя обнаженнаго в боготканныя ризы целомудрия и чистоты. Иисусе, простираяй небо, яко кожу, одени мя острупленнаго в снегосветлыя одежды Твоея небесныя красоты. Иисусе, Превечный Боже, добро нам всегда быти под кровом благодати Твоея.

Кондак 7-й

Хотя открыти сокровенную от века тайну Твоего, Христе, Божества, Отец Твой Небесный паки якоже прежде на Иордане во время Крещения Твоего, Богосыновство Твое возвести и тако гласом из облака бывшим свидетельствова, глаголя: Сей есть Сын Мой Возлюбленный, Того послушайте. Апостоли же от великаго ужаса крепости своея лишившися, падоша ниц на землю, вопиюще Тебе: Аллилуиа.

Икос 7-й

Новая видевше и преславная на Фаворе бывшая, Словесе Твоего, Владыко Господи, самовидцы и слуги, и глас Отеческий и шум из облака слышавше, ужасни быша и новым светолитием внезапу освещахуся, друг друга зряху, удивляющеся и к земли падше ниц, Тебе Владыце всяческих поклонишася, похвалы Тебе возсылая таковыя: Иисусе, Образе Пресветлыя Ипостаси Отчия, преобрази мрачное и нечистое житие мое. Иисусе, Славы Отчия Сияние, просвети падшую и во тьму воглубльшуюся душу мою. Иисусе дивный и страшный во славе Божественнаго зрака Твоего, тлением растленный душевный наш зрак обнови. Иисусе тихий, любви исполненный, неизреченною светлостию Плоти Твоея всю нечистоту плоти моея паче снега убели. Иисусе, Свете Безначальный, во Свете Твоем, на Фаворе явленном, Свет покажи нам Отца. Иисусе, Свете неизменный, в незримом Свете Царства Твоего, Свет покажи нам и Духа. Иисусе, Превечный Боже, добро нам всегда быти под кровом благодати Твоея.

Кондак 8-й

Дивно и странно явистася Тебе Моисей и Илия на Фаворе, Владыко Господи, начертание Божественныя Ипостаси видевше, и глаголаста о вольном страдании Твоем, священнолепно предстояще Тебе. Осенившу же их облаку светлу и гласу с небесе бывшу, взятся Слава Господня от видения ученик Твоих, взяшася же и пророцы во своя места, поюще Тебе: Аллилуиа.

Икос 8-й

Весь был еси от вышних, Неисчетный Слове Божий, егда пречистая Плоть Твоя преображашася на Фаворе, но и от нижних никакоже отступил еси, егда отшедшим пророком и видению уже скончавшуся, Ты приступил еси к лежащим страха ради на земли Твоим учеником, и рукою коснувся их, глаголал еси им: востаните, не бойтеся. Ученицы же, возведше очи свои и никогоже видевше, точию Тебе Единаго с ними сущаго, возрадовахуся зело и возблагодариша Бога, поюще Тебе таковая: Иисусе, имеяй глаголы Живота вечнаго, всегда пребуди с нами во странствии земнем. Иисусе, насытивый нас зраком Твоего Божества, не остави нас сирых на служении Твоем. Иисусе, прежде Креста Твоего тайну вольнаго страдания уяснивый, подаждь нам всегда памятовати Твое нас ради истощание. Иисусе, прежде еже умрети, нам славу Твою Показавый, подаждь нам всегда да разумети Твоея Плоти обожение. Иисусе, образе непременный Сущаго, обнови в души моей вожделеннаго зрака Твоего образ и подобие. Иисусе, Печате равнообразная Отца, запечатлей во плоти моей неизреченныя доброты Твоея благообразие. Иисусе, Превечный Боже, добро нам всегда быти под кровом благодати Твоея.

Кондак 9-й

Все естество смятеся, зря Твое преславное на Фаворе Преображение, Христе Спасе: Ангели, незримо предстояще, со страхом и трепетом служаху Тебе, небеса убояшася, подвижеся и трепетна бысть вся земля, видящи славу Господа, гора Фавор, прежде мрачна и дымна, светлым облаком покрывашеся, на нейже пречистии нозе Твои стоясте, ученицы же Твои, Господи, не терпяще зрети нестерпимаго зрака Твоего, повергоша себе долу на землю, лица покрывающе, дондеже Ты Сам, видению скончавшуся, воздвигл еси я, Тебе вопиющих: Аллилуиа.

Икос 9-й

Витии суемудреннии, благодатию непросвещеннии, не могут разумети Твоего преславнаго Преображения таинства, Господи. Сего ради, егда со ученики сходил еси с горы, дню возсиявати начинающу, Ты заповедал еси другом Твоим, да никомуже поведят видения бывшаго, дондеже по приятии страдания и смерти воскреснеши в третий день от гроба. И тии умолчаша, и никомуже возвестиша в тыя дни ничесоже от тех, яже видеша и слышаша, обаче точию в сердце своем вопияху Тебе сице: Иисусе, во всего Адама оболкийся, очерневшее древле естество человече просвети. Иисусе, во облаце, огни и мраце носимый, Твоею светлостию весь мрак душевный в нас потреби. Иисусе, сиянием Божественного шума Апостолы Твоя усладивый, услаждай нас всегда глаголами Божественного Твоего откровения. Иисусе, росодательным облаком ученики Твои просветивый, просвещай нас всегда зарями преславнаго Твоего Преображения. Иисусе, пречистыми ногами Твоими гору Фаворскую освятивый, направи нозе наша на присное служение Тебе. Иисусе, с неповинными руками на гору Твою восходити повелевый, возбуди руце наши на молитвенное воздеяние горе. Иисусе, Превечный Боже, добро нам всегда быти под кровом благодати Твоея.

Кондак 10-й

Спасти хотяй мир, на Фаворе преобразился еси нас ради, Господи, да сотвориши ны достойны уготованныя избранным Твоим небесныя славы и да преобразиши тело смирения нашего, яко быти ему сообразну телу Славы Твоея во общее всех воскресение и в безконечном Твоем Царствии, еже уготовал еси от сложения мира любящим Тя, в немже да сподобиши и нас, яко Моисея и Илию на Фаворе лицем к лицу лицезрети Тя и со всеми святыми воспевати Тебе вечную песнь: Аллилуиа.

Икос 10-й

Царю Превечный! Вся твориши нашего ради спасения. Мене ради восприял еси плоть пречистую от Пресвятыя Девы Марии и в зраце раба пришел еси в мир сей. Такожде и преобразился еси на Святей горе, не Себе угождая, не требует бо Свет просвещения, но нас ради осужденных, да нашу просветиши тьму и нас, во тьме седящих и среди сени смертныя, от сынов гнева в возлюбленныя чада Твоя да преобразиши. Сего ради благодарственно вопием Тебе таковая: Иисусе, зрак рабий на Фаворе преобразивый, да нас из рабов греха чада Божия сотвориши. Иисусе, даже до плоти Себе истощивый, да наше падшее естество с Собою преобразиши. Иисусе, неизреченное благолепие Царства Твоего на Фаворе явивый, радость, мир и правду о Дусе Святе в нас утверди. Иисусе, Божественным блистанием Плоти Твоея всю тварь обоживый, обожением плоти во Втором Пришествии Твоем нас обнови. Иисусе, огнь Божества Твоего на Фаворе явивый, огнем невещественным грехи моя попали. Иисусе, сладчайшею беседою Твоею тамо ученики Своя напитавый, Святыми Тайнами Твоими гладную душу мою освяти. Иисусе, Превечный Боже, добро нам всегда быти под кровом благодати Твоея.

Кондак 11-й

Пение всеумиленное приношу Ти, недостойный, Твоего Преображения совершая светлое торжество и вопию Тебе: высоту небеснаго жития и славы присносущныя Божественное сияние даруй ныне рабом Твоим, сердцем же чистым сподоби нас мысленно взыти на гору святую Твою, видети разумными очесы преславное Преображение Твое, да светло воспоем Тебе: Аллилуиа.

Икос 11-й

Свет Сый неприступен и Света Податель, Иисусе, Безначальный и Присносущный Свете, Свет Твой в мир принесл еси, егда с пречистою плотию Твоею вшел еси на гору Фаворскую и тамо Несозданный и Божественный Свет явил еси учеником Твоим, Славы Отчия показуя образ. Сего Света Твоего преестественнаго причастники быти желающе, из глубины души вопием Тебе таковая: Иисусе Христе Свете Истинный, помыслы добрыми душу мою живи во вся дни земнаго странствия моего. Иисусе Царю, Свете Безначальный, угасший светильник души моея паки возжги до дне скончания моего. Иисусе, Свете тихий, Живот даяй, свет и Живот низпосли души моей в час ужасный смерти моея. Иисусе, Свете Святый, светяй и горяй, из огня неугасимаго и тьмы кромешныя изхити мя тогда. Иисусе, Сладчайший и Святейший Свете, к свету Небеснаго чертога Твоего среди горьких мытарств воздушных проведи мя. Иисусе, солнца всякого светлейший Свете, во светлостях святых Твоих в невечернем дни Царствия Твоего просвети мя. Иисусе, Превечный Боже, добро нам всегда быти под кровом благодати Твоея.

Кондак 12-й

Благодать Твою подаждь мне, Иисусе Боже мой, юже на Фаворе даровал еси избранным учеником Твоим Петру, Иоанну и Иакову, и приими нас, якоже оных, да облеченнии силою Твоею свыше и Духом Святым просвещеннии, сердце же чисто имущи и дух обновлен, взыдем на мысленный Фавор, восходяще от силы в Силу, наипаче же в посте и молитве подвизающеся, в целомудрии же и в чистоте пребывающе, и тамо да воспоем Тебе: Аллилуиа.

Икос 12-й

Поюще Пречистыя Плоти Твоея преславное Преображение, прославляем Божественную Славу Твою на Фаворе явленную, поклоняемся присносущней Силе Твоей и Божеству, Егоже зарю малую тамо обнажил еси, Христе, и веруем с Петром, яко Ты еси воистину Христос, Сын Бога Живаго, пришедый в мир грешныя спасти, темже и вопием с ним из глубины души: добро нам зде быти с Тобою. Сего ради не посрами нас в Тя право верующих, обаче немощных и плотию обложенных и покрый нас Светом Богосиянныя Плоти Твоея, с любовию зовущих Тебе сице: Иисусе, Солнце Незаходимое, на Фаворе возшедшее. Твоим Божественным сиянием осияй мя. Иисусе, Свете несокрываемый, в Преображении явленный, Твоея благодати причащением согрей мя. Иисусе, Храме Предвечный Небеснаго Иерусалима, в скинию Божию с человеки всели мя. Иисусе, Цвете благовонный Рая Всесвятаго, небесными ароматами святыни и чистоты облагоухай мя. Иисусе, Огню чистительный, небо и землю от всякия скверны очистити хотяй, от скверны плоти и духа очисти мя. Иисусе, Каменю вседрагий, Горний Сион вместо солнца красотою Божественною освещати имеяй, от зрения иныя красоты паче Тебе избави мя. Иисусе, Превечный Боже, добро нам всегда быти под кровом благодати Твоея.

Кондак 13-й

О Пресладкий и Всещедрый Иисусе, на Фаворе Божественною славою просиявый! Приими ныне малое моление сие наше, и якоже приял еси от ученик Твоих на святей горе поклонение, тако и нас сподоби преславному Преображению Твоему поклонитися, во Свете добрых дел сияюще, да просветится Тобою тьма греховная в нас живущая, и да явимся достойны быти наследники безконечнаго Царствия Твоего на небеси, идеже со всеми святыми сподоби и нам воспевати Тебе: Аллилуиа.

(Этот кондак читается трижды, затем Икос 1-й и Кондак 1-й)

Молитва

Господи Иисусе Христе, Боже наш, во Свете живый неприступнем, Сияние сый Славы Отчия и Образ Ипостаси Его! Егда прииде исполнение времен, Ты за милосердие неизреченное к падшему роду человеческому Себе умалил еси, зрак раба приял еси, смирил еси Себе, послушлив бысть даже до смерти. Обаче прежде Креста и вольныя страсти Твоея на горе Фаворстей преобразился еси в Божественней Славе Своей пред святыми Твоими ученики и апостолы, мало скрыв плоти восприятие, да егда Тя узрят распинаема, и смерти предаваема, уразумеют убо страдание Твое вольное и Божество. Даруй же и нам всем, Пречистыя Плоти Твоея Преображение празднующим, чистым сердцем и нескверными умы взыти на Святую гору Твою, в селения святыя славы Твоея, идеже глас чист празднующих, глас несказаннаго радования, да тамо купно с ними Лицем к лицу узрим Славу Твою в невечернем дни Царствия Твоего, и со всеми святыми, от века Тебе благоугодившими, прославим Всесвятое имя Твое со Безначальным Твоим Отцем и Пресвятым и Благим и Животворящим Твоим Духом ныне и присно и во веки веков.

Кондак 1-й

Избранной от всех родов Божией Матери и Царице, восходящей от земли к Небеси, благоговейная пения о пречестнем Твоем Успении приносим раби Твои, Богородице. Ты же, яко имущая победу над смертию, от всяких нас смертоносных бед свободи, да зовем Ти: Радуйся, Обрадованная, во Успении Твоем нас не оставляющая.

Икос 1-й

Ангел предстатель послан бысть рещи Богородице ко премирным Ея возшествие и приити предъявляше к Ней Сыну Ея и Богу, светло о Ней блистаяся и стоя, зовый таковая: Радуйся, Прерадованная Мати Царева; Радуйся, Небесная Царице, Мати Бога и Господа Небесе и земли. Радуйся, предпочтенная превеличеством пришествия к Тебе Сына Твоего и Бога; радуйся, возвеличенная извещением Твоего к Сыну отшествия. Радуйся, от всех родов Богом избранная; радуйся, святое вместилище Слова Божия. Радуйся, пророческаго проречения исполнение; радуйся, Апостолом пречестный венче. Радуйся, святителем украшение и священником доброто; радуйся, правителем удобрение и державо. Радуйся, богомудрых иноков возведение к Горнему Царствию; радуйся, отверзающая райския двери христианскому роду, присно Тя блажащему. Радуйся, Обрадованная, во Успении Твоем нас не оставляющая.

Кондак 2-й

Видяще Апостолов лик, всесильным мановением от конец земли на облацех представших ко пречестному Твоему, Пренепорочная, Успению, священноначальницы: Дионисий небесный таинник, Иерофей дивный и Тимофей, с Боголепною честию священства, пояху Богу: Аллилуиа.

Икос 2-й

Разумная вся тварь, старейшая чиноначалия ангельская приидоша со своим Царем, Иже во Своя живоначальнейшия руце душу Матере Своея прият; теплый же верою Петр, со слезами многая к Ней изрече, зовый: Радуйся, ко премирным, Мати Творца миру, восходящая; радуйся, к пренебесным, пространнейшая небес, вземлющаяся. Радуйся, четверочастное стихий освятившая Твоим восхождением; радуйся, Небесных возвеселившая Твоим прехождением. Радуйся, во Иерусалим Горний прекрасный приятая; радуйся, в нерукотворенныя храмы прерадостно вшедшая. Радуйся, Херувимов и Серафимов Царице; радуйся, Архангелов и Ангелов Владычице. Радуйся, прибежище верных и избавление; радуйся, достоянию Твоему помощь и защищение. Радуйся, о всем мире христианском к Богу Ходатаице; радуйся, благ всяческих всеблагая Подательнице. Радуйся, Обрадованная, во Успении Твоем нас не оставляющая.

Кондак 3-й

Сила Вышняго восхити от Индии Фому за некое изволение Божие не прилучшуся ему в пречестное Успение Богоматере, и предпостави живоприемному Ея гробу, иже Преставльшуюся приник видети, уразуме Вознесенную на небеса с телом и, веровав, о сем возопи: Аллилуиа.

Икос 3-й

Имея в себе помышление ученик, яко Божиим смотрением бе ему не обрестися ко провождению Богоматере с прочими вкупе, обрадован быв о безсмертнем Ея Успении, сия вопияше к Ней: Радуйся, восприемлемая от земли дланьма Сына Твоего; радуйся, ко превышним возшедшая наслаждатися славы Его. Радуйся, провождаемая от всех чиноначалий ангельских в Горняя; радуйся, подъемлемая Херувимы в небесная и наднебесная. Радуйся, в Небесных вратех от старейших Сил велелепно песньми возносимая; радуйся, от всех небесных граждан окружаемая и блажимая. Радуйся, Небо земное, к Горнему селению возвышенное; радуйся, Престоле Господень, от земли вознесенный в Царствие Небесное. Радуйся, предстательство наше и крепкое заступление; радуйся, грешником Споручнице во спасение. Радуйся, христианом Царице, и по Бозе Надеждо Небеснаго Царствия; радуйся, Мати Живота и по Господе нам упование жизни вечныя. Радуйся, Обрадованная, во Успении Твоем нас не оставляющая.

Кондак 4-й

Бурю внутрь имея помышлений неверных евреин Аффоний и зря богоносными Апостолы Богоматере пречестное тело всечестне ко гробу несенное, ко опровержению устремися; внезапу же, егда со ослеплением очию руце Его отъяте ко одру прилеплене висясте, верою Матерь Божию исповедаше, вопия Богу: Аллилуиа.

Икос 4-й

Слышавше таинницы и самовидцы слова Ангелов, поющих превышними песньми при погребении Богоприятнаго тела Божия Матере, и честь подати хотяще богоугодную, потщашася согласно пети, глаголюще: Радуйся, благовестие приемшая о прешествии Твоем в Горнее Царствие; радуйся, от благовестившаго Гавриила приемшая радостнаго рая вравие. Радуйся, пречестное херувимское множество просветившая; радуйся, преславное серафимское естество возрадовавшая. Радуйся, от патриархов прообразованная; радуйся, от пророков предвозвещенная. Радуйся, злую дерзость иудееву скоро отмстившая; радуйся, исцеление томужде подавшая. Радуйся, обратившая в веру Аффониево неверие; радуйся, верное того приемшая исповедание. Радуйся, возводящая к небеси любовь и веру к Тебе имущих; радуйся, спасающая верою имя Твое призывающих. Радуйся, Обрадованная, во Успении Твоем нас не оставляющая.

Кондак 5-й

Боготечныя звезды, Апостоли святии, в поднебесней разсеянии ради Евангелия, восхищени быша на облацех, по широте воздушной, ко погребению Матере Господни, Юже пеньми и песньми провождающе, с Невещественными взываху: Аллилуиа.

Икос 5-й

Видевше боговидцы своего Владыку, в руце Матере Своея душу приемша, и Господа Того разумевше, потщашася священнословия песньми благословне воспети Ю: Радуйся, Царице, над всеми Царствующаго носившая; радуйся, и Сама рукама Его сыновнима носимая. Радуйся, скиптре царский в Христовой деснице; радуйся, в руце Ноя ветвь голубицы. Радуйся, жезле Ааронов, прозябший нетление; радуйся, крине неувядаемый, процветший безсмертие. Радуйся, богоотца Давида цевнице богодохновенная; радуйся, пророчествия его возставшая слово, псалтирю и гусли прекрасныя. Радуйся, одушевленный святыни Господни кивоте; радуйся, в покой Господень воскресший наш животе. Радуйся, скиние, от Херувимов осеняемая; радуйся, Святая Святых, от Серафимов глаголемая. Радуйся, Обрадованная, во Успении Твоем нас не оставляющая.

Кондак 6-й

Проповедницы богоноснии Апостоли, по отшествии ко премирным Божия Матере во общем селении обычныя трапезы бывше и предложение части хлеба во имя Господне возносяще, внезапу свыше Богородицу Царицу, пришедшую со светоносными Ангелы, зряху и мир тем от Сына и Бога подавшую слышавше, возгласиша о сем: Аллилуиа.

Икос 6-й

Возсия нам Солнце Правды, Христос Бог, от Твоих пречистых ложесн, волею и благоразумием проповедания чрез Апостолы мир просвети и Тя, Богоматерь, от рода и в род прослави. Темже и мы вси ублажаем Тя, вопиюще Ти: Радуйся, Присноблаженная от всех родов во веки; радуйся, благоутробная и милостивая на человеки. Радуйся, ученическому лику обещание исполнившая; радуйся, присещением Твоим от Сына Твоего и Бога мир тому подавшая. Радуйся, всежелательное святых сладкое зрение; радуйся, преподобных матерей и дев святых всевеселящее радование. Радуйся, преходящая райское селение праведных; радуйся, посещающая всех во славе небесней сущих. Радуйся, начало человеческаго спасения; радуйся, исполнение всех благих желания. Радуйся, по Бозе Царе царствующих, Богородице Царице; радуйся, по Господе господствующих, Владыце нашем, Госпоже и Владычице. Радуйся, Обрадованная, во Успении Твоем нас не оставляющая.

Кондак 7-й

Хотящих всех с верою входити в храм Твой святый, Богородице, присно спасаеши и славящих Тя от всяких напастей и бед свобождаеши; темже и православным людем, присноблажащим Тя, победы на сопротивныя даруй и вся ко спасению прошения нам подавай, о сем молящимся Тебе и поющим Богу: Аллилуиа.

Икос 7-й

Новую показа тварь, явлься нам, всех Творец Господь Тобою, Богородице. Ты же сродное промышление о нас к Нему имущи, честне почитающих пречестное Твое Успение, приими сицевая Тебе вопиющих: Радуйся, Мати Богу, избранная от земных; радуйся, превышшая земных и Небесных. Радуйся, Херувимов и Серафимов горе превозшедшая; радуйся, лик ученический облаком ко погребению Ти доле совокупльшая. Радуйся, Фому по погребении Твоем силою Божиею предпоставившая изряднее; радуйся, чрез него уверившая Твое на небо с плотию преселение. Радуйся, красотою всех добродетелей украшенная; радуйся, краснейшему паче сынов человеческих Сынови Своему сопричтенная. Радуйся, яко финикс, плотию воскресшею процветшая; радуйся, яко кедр в Ливане небесном, умножившаяся. Радуйся, древо живота, насажденное посреде рая превышняго; радуйся, ковчеже мысленный, возвышенный в Горняя от потопа смертнаго. Радуйся, Обрадованная, во Успении Твоем нас не оставляющая.

Кондак 8-й

Странно в превышних ведуще Тя, Избранная, яко солнце, Владычице, внутрь пренебесных недомыслимых красот и неизреченных доброт, умильно к Сыну и Богу, дланьма Его держиму, возшедшую и прерадостно преклоньшуюся живоначальней Его деснице, о сем непрестанно вопием: Аллилуиа.

Икос 8-й

Вся бывши горе, к Небесным взята и земных не оставляя, Богомати, рукама Сыновнима носима, в незаходимая вниде, во оный град всесветящий и прекрасный, Иерусалим вышний, Херувимы обстоима со всеми небесными Силами, идеже слышит поющих сия: Радуйся, Еяже пресвятая душа в вышнем всесветлом Сионе вселяется; радуйся, Еяже и нетленное тело таможде с душею купно прославляется. Радуйся, вшедшая в престольный град Самаго Вседержителя; радуйся, вознесшаяся в прекрасный рай Вышняго Насадителя. Радуйся, пренесенная во град, основанный от каменей всесветяших; радуйся, введенная во ограду, обстоимую вои Сил превышних. Радуйся, превышше Небес во благолепие Божие взятая; радуйся, паче всех невещественных умов почтенная. Радуйся, приносящая к Сыну Своему и Богу моление верных; радуйся, и Сама непрестанно у Престола Сына Твоего и Бога молящаяся о всех. Радуйся, Предстательнице к Богу, мир спасающая; радуйся, Заступнице роду христианскому от Бога дарованная. Радуйся, Обрадованная, во Успении Твоем нас не оставляющая.

Кондак 9-й

Всякое естество ангельское превозносит Тя, Богородице, человечестии же роди вси Матерь Тя Божию славим и почитаем пречестное Твое Успение, Царице: Тебе бо ради земнии Небесным совокупляются, согласно поюще Богу: Аллилуиа.

Икос 9-й

Ветийства боговещанных пророческих речений ныне зрим о Тебе сбывшаяся, Богородице, яко воистину Бога плотию родила еси нам. Темже таинству словесе Божия верующе, вопием: Радуйся, закона и пророков главизно совершенная; радуйся, звездо Иаковля, Валаамом пророкованная. Радуйся, одре Царя Великаго, вещанный Соломоном; радуйся, руно, орошенное Иисусом, образованное Гедеоном. Радуйся, неопалимая Купино, законоположником предзримая; радуйся, горо святая, мужем желания усмотренная. Радуйся, лествице небесная, Иаковом предвидимая; радуйся, двере непроходимая, Иезекиилем предзримая. Радуйся, солнце селения Христова, псалмопевцем предъявленное; радуйся, таинство, многообразне пророки пронареченное. Радуйся, пророческих глагол всех предреченных о Тебе конец принесшая; радуйся, Вышняго смотрения вся за спасение мира совершившая. Радуйся, Обрадованная, во Успении Твоем нас не оставляющая.

Кондак 10-й

Спасти хотя мир, Иже всех Господь от земнаго Тя рода избра в Матерь Себе и, нас ради быв Человек, взыде, отнюдуже сниде, к Небеси от земли, и Тебе с Собою возведе ко пребыванию во славе вечней и соцарствованию с Собою, конца не имущему, Темже, яко Бог, слышит от всех: Аллилуиа.

Икос 10-й

Стена еси верным, Богородице Дево, и заступление всем, к Тебе прибегающим, ибо небесе и земли Творец от Тебе плотию прошед, Пречистая, духом и телом в Небесная Тя пресели, ко ближайшему предстательству о всех, ихже приглашати научи: Радуйся, граде Царя Великаго верху горы небесныя; радуйся, стено и покрове, не крыющийся от нашего притекания. Радуйся, верным на враги пособствующая; радуйся, нашествия агарянская побеждающая. Радуйся, веры благочестивыя недвижимое сохранение; радуйся, еретичествующих полков разорение. Радуйся, радость и умирение миру сущая; радуйся, всегубительнаго ада поправшая. Радуйся, воинствующих на плоть целомудрием изрядное венчание; радуйся, мученических подвигов всечестное прославление. Радуйся, преподобных трудом Ходатаице блаженнаго упокоения; радуйся, иноком благоскорбящим Подательнице вечнаго радования. Радуйся, Обрадованная, во Успении Твоем нас не оставляющая.

Кондак 11-й

Пение всякое богодухновенных песней не довлеет от нас ко похвале всечестнаго Успения Твоего, Всехвальная Владычице, Царице Богородице, но усердно Тебе приносим, яко Матери Царя всех, смиренное моление наше, с Небесными чинми поюще Единому достойно прославляющему Тя Богу: Аллилуиа.

Икос 11-й

Светоприемная свеща истиннаго Света сущим нам на земли явльшися, души просвещаеши и чтущих Твое всечестное преставление к разуму Божественному наставляеши, да поем Ти сицевая: Радуйся, свеще неугасимая огня невещественнаго; радуйся, заре незаходимая Света невечерняго. Радуйся, луно, от Солнца правды облиставаемая; радуйся, светлосте, во тьме святящая. Радуйся, светильниче, на свещнице превышнем поставленный; радуйся, источниче жизни, из гроба во свет изведенный. Радуйся, Мати Света умнаго, благочестивых души просвещающаго; радуйся, Мати всех Бога, озлобленных души утешающаго. Радуйся, уповающим на Тя живота конец непостыдный дарующая; радуйся, достояние Божиим и Своим рабом на Суде Сына Твоего одесную Его устрояющая. Радуйся, Преблаженная, яко Тобою блажени есмы и мы, иже Помощницу Тя имамы; радуйся, Преблагословенная в род и род, яко Господь с Тобою, и Тобою с нами. Радуйся, Обрадованная, во Успении Твоем нас не оставляющая.

Кондак 12-й

Благодать высокопрестольныя славы, на небесех дарованную Богоматери, почтенной седением одесную Сына Ея и Бога видяще горнии умы, подъяша Ю Престоли и Силы, окружиша Начала и Власти, припадоша страшнии Херувими, Серафими и Господства, со Архангелы и Ангелы вопиюще: Аллилуиа.

Икос 12-й

Поюще всечестное Твое Успение, восхваляем вси ко пренебесным возсшествие Твое, Царице Богомати. Ты же освяти, прослави и спаси всех, любовию поющих Тебе: Радуйся, очистившая землю пречистыми ног Твоих стопами; радуйся, освятившая воздух восхождением Твоим к Небеси. Радуйся, на Небесный круг возступившая; радуйся, вся доброты неизреченныя зрящая. Радуйся, во славе приседящая Престолу Сына Твоего и Бога; радуйся, с Сыном и Богом вечно царствующая. Радуйся, красото в деснице Господней, украшающая блажащих Тя всех Небесных; радуйся, обрадованная надеянием на Тя всех земных. Радуйся, облеченная в солнце, сияющая благодатию и славою всей вселенней; радуйся, обещавшая сохраняти и спасати призывающих Тя всех в поднебесней. Радуйся, от христианских родов Мати Божия почитаемая и Богородица именуемая; радуйся, от восток солнца до запад преславно и православно от всех благочестивых славимая. Радуйся, Обрадованная, во Успении Твоем нас не оставляющая.

Кондак 13-й

О Всепетая Мати Безсмертнаго Царя Небесе и земли, Христа Бога нашего, живущая и по смерти, нынешняя приношения о всечестном Твоем Успении от нас приемши, в жизни сей и в смертнем успении нашем от всякия напасти, бед и муки избави и Небеснаго Царствия нас, Царице, сподоби, о Тебе вопиющих: Аллилуиа.

(Этот кондак читается трижды, затем Икос 1-й и Кондак 1-й)

Молитва

О Пресвятая Богородице, Дево, Владычице, вышшая Ангел и Архангел, и всея твари Честнейшая, ангельское великое удивление, пророческая высокая проповедь, апостольская преславная похвало, святителей изрядное украшение, мучеников крепкое утверждение, иноков спасительное наставление, постников неизнемогающее воздержание, девствующих чистото и славо, матерей тихое веселие, младенцев мудросте и наказание, вдовиц и сирых кормительнице, нагих одеяние, болящих здравие, пленников избавление, по морю плавающих тишино, обуреваемых небурное пристанище, блуждающих нетрудная Наставнице, путешествующих легкое прехождение, труждающихся благое покоище, в бедах сущих скорая Заступнице, обидимых Покрове и Прибежище, ненадеющихся надеяние, требующих Помощнице, нищих неистощимое богатство, печальных присное утешение, ненавидимых любовное смирение, грешников спасение и к Богу присвоение, правоверных всех твердое ограждение, непобедимое поможение и заступление. Тобою нам, Владычице, Невидимый видим бысть, и Тебе мольбу приносим, Госпоже, грешнии раби Твои: о Премилостивая и Пречудная Света умнаго Царице, рождшая Царя Христа Бога нашего, Живодавца всех, от небесных славимая и от земных хвалимая; ангельский уме, светозарная звездо, святых Пресвятейшая, Царице цариц, Владычице всех тварей, Боголепная Девице, Нескверная Невесто, палато Духа Пресвятаго, огненный Престоле Невидимаго Царя, небесный кивоте, носило Слова Божия, огнеобразная колеснице, покоище Живаго Бога, неизреченное составление плоти Христовы, гнездо Орла Небеснаго, горлице богогласная, голубице кроткая, тихая и незлобивая, Мати чадолюбивая, милостей бездно, развергающая тучу гнева Божия, неизмеримая глубино, неизреченная тайно, несведомое чудо, нерукотворенная Церкве Единаго Царя всех век, благоуханное кадило, честная багрянице, боготканная порфиро, душевный раю, живоноснаго сада отрасле, цвете прекрасный, процветший нам небесное веселие, грозде спасения нашего, чаше Царя Небеснаго, в нейже растворися от Духа Святаго вино неисчерпаемыя благодати, Ходатаице Закона, зачало истинныя веры Христовы, непоколебимый столпе, еретиков пагубо, мечу ярости Божия на богопротивных, бесов устрашение, во бранех побеждение, христиан всех неложная Хранительнице и мира всего известное спасение. О Всемилостивая Госпоже, Дево Владычице Богородице, услыши нас, молящихся Тебе, и яви милость Твою на людей Твоих, моли Сына Своего избавитися нам от всякаго зла, и сохрани обитель нашу и всяку обитель, и град, и страну верных, и люди, благочестно прибегающия и призывающия имя Твое святое, от всякия напасти, губительства, глада, труса, потопа, огня, меча, нашествия иноплеменников и междоусобныя брани, от всякия болезни и всякаго обстояния, да ни ранами, ни прещением, ни мором, ни всяким праведным гневом Божиим умалятся раби Твои. Но соблюдай и спасай милостию Твоею, Госпоже, за ны молящися, и полезное воздуха благорастворение во времени плоднаго приношения нам даруй. Облегчи, возстави и помилуй, Премилостивая Владычице, Богородице Препетая, во всякой беде и нужде сущия. Помяни рабы Твоя, и не презри слез и воздыхания нашего, и обнови нас благостию Твоея милости, да со благодарением утешаемся, обретше Тя Помощницу. Умилосердися, Госпоже Пречистая, на немощныя люди Твоя, Надеждо наша. Разсеянныя собери, заблуждшия на путь правый настави, отпадшия от благочестивыя отеческия веры паки возврати, старость поддержи, юныя накажи, младенцы воспитай, и прослави славящия Тя, изряднее же Церковь Сына Твоего соблюди и сохрани в долготу дний. О Милостивая и Премилостивая Царице Небесе и земли, Богородице Приснодево! Ходатайством Твоим помилуй страну нашу и воинство ея и вся православныя христианы, сохраняющи их под кровом милости Твоея, ризою Твоею честною защити и моли из Тебе воплощшагося без семене Христа Бога нашего, да препояшет ны свыше силою на вся видимыя и невидимыя враги наша, на иноплеменники и единоплеменники, воюющия на нас и на веру нашу православную. Спаси же и помилуй, Госпоже, великаго господина и отца нашего Кирилла, Святейшего Патриарха Московского и всея Руси, преосвященныя митрополиты, архиепископы и епископы православныя, иереи же и диаконы и весь причет церковный, и весь монашеский чин, и вся правоверныя люди, поклоняющияся и молящияся пред честною Твоею иконою. Призри на всех нас призрением милостивнаго Твоего заступления, воздвигни нас из глубины греховныя и просвети очи сердечныя ко зрению спасения, милостива нам буди зде, и на Страшнем Суде Сына Твоего о нас умоли. Преставльшияся во благочестии от жития сего рабы Твоя, в вечной жизни со Ангелы и Архангелы, и со всеми святыми причти, да одесную Сына Твоего Бога предстанут; и молитвою Твоею сподоби вся православныя христианы со Христом жити, и радости ангельския в небесных селениих наслаждатися. Ты бо еси, Госпоже, слава небесных и упование земных, Ты наша Надежда и Заступница всех притекающих к Тебе, и Твоея святыя помощи просящих. Ты молебница наша теплая к Сыну Твоему и Богу нашему: Твоя Матерняя молитва много может на умоление Владыки, и Твоим предстательством ко Престолу благодати Пресвятых и Животворящих Его Тайн приступати дерзаем, аще и недостойнии. Темже всечестный образ Твой, и рукою Твоею держимаго Вседержителя видяще на иконе, радуемся грешнии, со умилением припадающе, и любовию сей целуем, чающе, Госпоже, Твоими святыми богоприятными молитвами дойти небесныя безконечныя жизни, и непостыдно стати в день Судный одесную Сына Твоего и Бога нашего, славяще Его купно со Безначальным Отцем, и Пресвятым, Благим, Животворящим и Единосущным Духом, во веки веков, аминь.