Господи, Боже мой! Иже еси Ангельския вся чины и безплотныя составль силы, и небо распен, землю основал, и вся сущая от небытия в бытие привел, иже еси всегда везде послушал творящих волю Твою, боящихся Тебе и хранящих заповеди Твоя, послушай моея молитвы и верное Твое стадо сохрани, ему же мя бе приставил неключимаго и недостойнаго раба Твоего. Избавляя вся от всякия безбожныя и поганскыя злобы, и от всякаго многоречиваго и хульнаго еретическаго языка, глаголюща на Тя хулу, погуби триязычную ересь, и возрасти Церковь Свою множеством, и вся в единодушие совокупль, сотвори изрядны люди, единомысляща о истинней вере Твоей и правем исповедании, вдохни же в сердца их слово Твоего учения, Твой бо есть дар. Аще ны еси приял недостойныя на проповедание им Евангелия Христа Твоего, острящася на добрыя дела и творяща угодная Тебе, еже мне бе дал, яко Твое, и Тебе предаю я, устрой я сильною Твоею десницею, покрый я кровом крилу Твоею, да вси хвалят и славят имя Твое, Отца и Сына и Святаго Духа во веки. Аминь.

Источник: А. П. Последния минуты жизни св. Кирилла Философа и брата его св. Мефодия, предсмертная молитва и прощальная «беседа-завещание». // «Странникъ», духовный журнал. — СПб.: Типография С. Добродеева, 1885. — Том I. — С. 581.