«Домострой» представляет собой сборник, включающий свод правил, советов и наставлений, касающихся всех направлений человеческой жизни и затрагивающий общественные, семейные, хозяйственные и религиозные вопросы. Предполагаемый автор «Домостроя» – протопоп Сильвестр, политический и литературный деятель XVI века. «Домострой» также является примером уникального лингвистического синтеза народного и церковнославянского языков.
ГЛАВА 1
НАКАЗАНИЕ ОТЦА К СЫНУ
Благословляю аз многогрешный (им. рек) и поучаю и наказую и вразумляю единочадаго сына своего, (им. рек) и его жену, и их домочадцев быти во всяком христианском законе, и во всякой чистей совести и в правде; с верою творяще волю Божию, и храняще заповеди Его; себе утвержающе во всяком страхе Божии и в законом жительстве; и жену поучающе, тако ж и домочадцев своих наказующе не нуждою, ни ранами, ни работою тяжкою; имеюще яко дети, во всяком покое, – сыты и одеты, и в теплом храму и во всяком устрои. И вдаю вам христианскому жительству писание на память и вразумление вам и чадом вашим. Аще сего моего писания не внемлюще, и нашего наказания не слушаете, и по тому не учнете жити, и не тако творити, якоже есть писано, – сами за себя ответ дадите в день страшнаго суда; а аз вашим винам, и греху не причастен, кроме моея душа; аз о всяком благочинии благословлял, и плакал и молил, и писание предлагал; и аще восприимете сие мое худое учение и грубое наказание со всею чистотою душевною и прочитая, прося у Бога милости и помощи и разума поелико возможно, как вас Бог вразумит и начнете делом творити вся сия: будет на вас милость Божия и пречистыя Богородицы и всех святых и наше благословение от ныне и до веку; и дом ваш, и чада ваши, и стяжание ваше, и обилие, что вам подаровал Бог от нашего благословение и от своих трудов да будет благословенно во всяких благих во веки аминь.
ГЛАВА 2
КАКО ВЕРОВАТИ ХРИСТИАНАМ ВО СВЯТУЮ ТРОИЦУ, И ПРЕЧИСТУЮ БОГОРОДИЦУ, И КРЕСТУ ХРИСТОВУ И СВЯТЫМ НЕБЕСНЫМ БЕЗПЛОТНЫМ СИЛАМ[1] И ВЕЛИКОМУ ВО ПРОРОЦЕХ ИОАННУ ПРЕДТЕЧИ[2] И ВСЕМ СВЯТЫМ И ЧЕСТНЫМ[3] ИХ МОЩЕМ ПОКЛОНЯТИСЯ
Подобает убо всякому христианину по Бозе жити, в православной вере християнской. Первое убо: от всея душа и от всего помышления и всеми чювствы, теплою верою веровати во имя Отца и Сына и святаго Духа в неразделимую Троицу; и в воплощение Господа нашего Исуса Христа сына Божия веруй. Рождьшую его матерь – Богородицу нарицай; Кресту же Христову с верою покланяйся, яко на том, всем человеком[4] спасение содела Господь; иконе же Христове, и пречистой его матери, и Святым небесным безплотным силам, и всем святым честь верою воздавай; яко самем любовь[5] в молитве ее глаголи, и поклонение твори, и на помощь к Богу призывай их; мощи ж Святых с верою целуй и покланяйся им.
